1-3.(a) Ntakhara heeni mai onnamurehererya phaama mwanawe? (b) Ntakhara heeni Yehova onachuneiye wi akapuro awe ekhaleke a weela, nave tiheeni enaneeriha okhala aweela?

MAI onnamurehererya phaama mwanawe wi apwahevo. Owo onnamurapiha ni onwariha soowara saphaama ni soophwanelela. Owo oosuwela wi wiikhapelela ti woochuneya wi akhaleno okumi waphaama. Oosuwela tho wi ophwaneliwa wa mwaana onooniherya ophwaneliwa wa asitiithi awe.

² Yehova, tiithi ahu a wirimu, onachuna wi akapuro awe ekhaleke aweela naari ohikhala oonyala. Masu awe annaloca: “Va awéla murima munakhalanyu awéla.” * (Salmo 18:26) Yehova onnanisivela; owo oosuwela wi okhala aweela onnanikhaliha phaama. Owo onaweherya wi hiyaano ntoko Anamoona  awe nooniheryeke mikhalelo sawe. Mwawiihiiha, ophwaneliwa waahu ni mikhalelo sahu saphaama, sinnamvaha ncicimiho, ohiya omuuliha muru Yehova, ni nsina nawe na weela.—Esekiyeli 36:22; mwaalakhanye 1 Petro 2:12.

³ Osuwela wi Muluku onaasivela achu aweela ennanikhaviherya okhala aweela. Nnachuna wi mukhalelo ahu wa okumi omucicimihe owo nthowa nawi ninnamusivela. Nnachuna tho wiikhapelela mu osivela wawe. Hankooni nthokororye, ntakhara heeni nnaphwanelaahu okhala aweela, enavolowela eheeni weela, nnii niwerye hai okhala aweela. Othokororya onanwerya onikhaviherya woona makupa nnaphwanelaahu otoroka.

4, 5. (a) Nthowa taani noopacerya nnaneeriha okhala aweela? (b) Moonelo wa Yehova vooloca sa weela onooneya hai mu soopatuxiwa sawe?

⁴ Mukhalelo mmoha Yehova onanihusiheiye ti moorweela wa sawooniherya. Masu awe annanceenyerya ‘okhala ótakiherya a Muluku.’ (Aefeso 5:1) Nla nthowa noopacerya nnaneeriha okhala aweela. Yehova, Muluku nnamurumeela ahu, taweela mmikhalelo soothene.—Mwaalakhanye Onamukucho 11:44, 45.

⁵ Weela wa Yehova, mikhalelo sawe ni iphiro sawe sinnooneya mu soopatuxa sawe sawooneya. (Aroma 1:20) Elapo yaapakiwe wi ekhale empa yaweela ya achu. Yehova oopaka meerelo eelapo yaawo enarapiha nwiya ni maahi. Nyuuku ikina sinnakhaviherya muteko wa orapiha yeerihaka wi mapuro oonanara ekhale aweela. Alipa oohuserya aapharihela nyuuku mikina wi irapiheke mapuro akuhiwemo makhurwa ni onanariha okina onatannyiwa ni nrima na achu. Mwawiihiiha, ti yawooneya wi weela ti wookhweleya wa yoole ‘àpatunse elapo.’ (Yeremiya 10:12) Eyo tho enaphwanela okhala yookhweleya wa hiyaano.

6, 7. Nlamulo na Moose naacicimiherya hai okhweleya wa weela wa yaale yaamulapela Yehova?

⁶ Nthowa nikina nnaneeriha okhala aweela ti wi Yehova,  Mulamuleli ahu Mutokotoko, onachuna wi alapeli awe ekhale aweela. Mu nlamulo nenlo Yehova aavanheiye a Isarayeli weela ni malapelo saari ichu sookhweleya. Nlamulo naari nookwakwaleya wi mu nihiku na ovaha mukucho, namukucho aaphwanela wiirapiha ohiya ekwaha emoha nyenya piili. (Onamukucho 16:4, 23, 24) Namukucho aaphwanela orapiha matata ni inaani sawe ahaakumve oveleela mukucho wa Yehova. (Mukwaha 30:17-21; 2 Matharihelo 4:6) Nlamulo naaloca sa ichu 70 saariipiha mwiili ni mukucho. Mmoha a Isarayeli akhala ooriipiheya, haapaka makupa mmalapelo—wakhala wi oopaka aahaala wiiphiwa. (Onamukucho 15:31) Muchu vyakala yoowo aakhooca wiiwelela nlamulo na wiirapiha, ophitaanyerya orapa ni ocapa soowara sawe, aahaala ‘wikariwemo munlokoni na Isarayele’—Namarepela 19:17-20, BNM.

⁷ Naamwi nihiri vathi va nlamulo na Moose, nlamulo nlo ninnanikhaviherya osuwela moonelo wa Muuku vooloca sa miyaha seiho. Mwawooneya, nlamulo naanacicimiherya wi weela waari wookhweleya wa yaale yaamulapela Muluku. Yehova hatoroken’ye. (Malakiya 3:6) Malapelo ahu enahaala okhala aweemereryiwa wa yoowo waakhala wi ta ‘awéla ni ohirípihiwa.’ (Yakobo 1:27) Nnaphwanela osuwela tiheeni owo onaweheryeiye wa hiyaano mmwaha yoola.

8. Mmikhalelo taani Yehova onaweheryeiye wi nikhale aweela?

⁸ Mpiipiliyani, okhala aweela ennataphulela ohiya pahiru weela woomwiilini. Okhala aweela mmoonelo wa Muluku ennavolowela mmikhalelo soothene sa okumi ahu. Yehova onaweherya wi nikhale aweela mmakupa maxexe a okumi ahu: mmunepani, mmeecelo, mmuupuwelo, ni mmwiilini. Hankooni nthokororye tiheeni enavolowela mmakupa ari oothene.

9, 10. Enataphulela eheeni okhala aweela mmakupa oomunepani, nave tiheeni Akiristu eeparipari anasepaaya?

⁹ Weela woomunepani. Mmukhalelo wookhweya, okhala  aweela mmakupa oomunepani enataphulela ohipweseeherya malapelo eeparipari ni atheru. Vaavaa Aisarayeli yaakhummaaya o Paapulu ekookela o Yerusalemu, awo yaaphwanela wiiwelela nlakiheryo nla nooveereliwa “Vinyan’wo nno! . . . Muhikwakhwilihe.” (Isaiya 52:11, BNM) Aisarayeli yaachikela owannyaya xaxaxa wi yakookela omulapela Yehova. Waanachuneya wi malapelo aya ekhale aweela—ohiya opweseherya ni mahusiheryo, meerelo, ni mihapo sa o Paapulu saamunyemula Muluku.

¹⁰ Olelo, hiyaano ntoko Akiristu eeparipari nnaphwanela wiikasopa ovoloweliwa ni malapelo atheru. (Mwaalakhanye 1 Akorinto 10:21.) Ti woochuneya wiikasopa mmukhalelo yoola, woona wi ovoloweliwa wa malapelo atheru anaphwanyeya mmapuro oothene. Mmapuro mancipale, sookhovelela, miteko ni mihapo soohiyanahiyana siniiwanana ni malapelo atheru, ntoko muupuwelo wa wi yookhalavo echu mpuwa mwahu enavinyamo vaavaa nnakhwaahu. (Eklesiyaste 9:5, 6, 10) Akiristu eeparipari anniikasoopa ni mihapo sinavolowela malapelo atheru. * Hinnachuna wi okhinyererya wa akina oneerihe ohipwacha malakiheryo a Mpiipiliyani eniiwanana ni malapelo aweela.—Saweriwa Tarummwa 5:29.

11. Enavolowela heeni okhala aweela mmeecelo, nave ntakhara heeni ti wookhweleya wi nikhale aweela mmwaha yoola?

¹¹ Weela mmeecelo. Okhala aweela mmeecelo enavolowela wiikasopa mmukhalelo woothene wa ocapaheya. (Mwaalakhanye Aefeso 5:5.) Ti wookhweleya okhala aweela mmeecelo. Ntoko nnahaalaahu woona mu mwaha woocharela wa liivuru yoola, wi niikhapelele mu osivela wa Muluku, nnaphwanela ‘ochawa ochapaheya.’ Acapaheya oohicharuwa “herwa-evolowa omwene wa Muluku.” (1 Akorinto 6:9, 10, 18) Vamiithoni va Muluku, awo ari variyari va yaale “ótakhalaIa.” Wakhala wi annatitelela okhala ooriipiheya mmeecelo, “yawakheláya enarwa-ekhala . . . okhwa wanawili.”—Yawupulula 21:8.

12, 13. Wiiwanana taani orivo variyari va muupuwelo ni saweera, nave nnii niwerye hai okhala aweela mmuupuweloni?

 ¹² Weela mmuupuwelo. Muupuwelo onnaneeriha weera echu. Wakhala wi noheemererya wi muupuwelo woonanara otikitheryeye mmuupuwelo ni mmurima mwahu, moohilekela nnahaala opaka ichu sooriipiheya. (Mateyu 5:28; 15:18- 20) Nyenya wakhala wi noosariha muupuwelo ahu ni ichu saweela, nnahaala olipiheya okhalano meecelo aweela. (Mwaalakhanye Afilipi 4:8.) Nnii niwerye hai okhala aweela mmuupuwelo? Echu emoha, eri osepa mathatelo oothene enahaala onanariha muupuwelo ahu. * Mwa waaceererya, nnaphwanela tho osareiha muupuwelo ahu ni ichu saweela moorweela wa ohuserya moohihiyererya Masu a Muluku.—Salmo 19:8, 9.

¹³ Wi niikhapelele mu osivela wa Muluku, ti woochuneya okhala aweela mmunepani, mmeecelo, ni mmuupuwelo. Miyaha mikina sa liivuru yoola sinahaala waaceererya mukhalelo yoola. Vano nthokororye mukhalelo waneexexe—weela woomwiilini.

14. Ntakhara heeni weela woomwiilini tahi mwaha wa muchu mukhateiye?

¹⁴ Weela woomwiilini onavolowela orapiha mwiili ahu ni orehererya voorukurerya vahu. Apwanne weela mwaha wa muchu mukhateiye, ohinaavolowela akina? Chiryene alapeli a Yehova hanuupuwela hiiha. Ntoko noonnaahu, weela wahu ti wookhweleya wa Yehova, ohiya ntakhara wi pahiru ennanikhaliha phaama, nyenya tho ntakhara wi hiyaano nnamweemelela yoowo. Muupuwele niphwanaphwaniho niphariheliwe woopaceryani va mwaha yoola. Mwaana yoowo ohinarapa naari oonyala, onooniherya mukhalelo wa asitiithi awe, tahi hiiha? Hinnachuna wi ophwaneliwa wahu naari mukhalelo ahu wa okumi omunyemule Tiithi ahu a wirimu naari michaka nnalaleeryaahu. Masu a Muluku anii: “óhivaharu  yokwachuliha mwitchu pyakala, wi oruméla iwo ohiheleliwe; nyenya mu sothe sene ninnichichimiheryela hiyo mkhatihu ntoko arummwa a Muluku.” (2 Akorinto 6:3, 4) Nnii nikhale hai aweela omwiilini?

15, 16. Onavolowela heeni okhala eesipanti, nave soowara sahu inaphwanela okhala mwawiihai?

¹⁵ Esipanti ahu ni Ophwaneliwa. Naamwi sookhovelela ni mukhalelo wa okumi ohiyanaka elapo ti elapo, wiiliwiili nnanwerya omphwanya sapau oophwanelela ni maahi wi nrape ni okhalano eparipari wi hiyaano vamoha ni anamwane ahu nri a weela. Esipanti enavolowela onawa ni sapau nihaakumve olya naari waapeya soolya, nimanle opharihela itumpusi, nave nimanle omurapiha naari otoroka ikuwo sa mwaana. Weerano yeela enahaala onirapeliha ireca ni ovuluxa ikumi. Ela enanwerya osepa omwaramwaxeya wa nyuuku sawoopiha, yaakhaviheryaka achu osepa ireca sa nammirimani. Mmapuro  yaawo achu ancipale ahiryaayano itumpusi, mari enaphwanela okaceliwa ntoko yeeraaya Aisarayeli a khalai.—Malamulo 23:12, 13.

¹⁶ Soowara sahu sinaphwanela tho okhala soocampwa ni sooreheryeya. Tahi woochuneya wi soowara sa Akiristu sikhale soowalamela naari sakhorowa, nyenya iho inaphwanela okhala sooreheryeya, saphaama ni soophwanelela. (Mwaalakhanye 1 Timoteo 2:9, 10.) Moohipwacha weiwo nnakhalaahuwo, nnachuna wi mawarelo ahu ‘ererihe mahusiheryo a Mvulushahu Muluku.’—Tito 2:10.

17. Ntakhara heeni empa ahu ni voorukurerya vahu sinaphwanela okhala sooreheryeya ni soophwanelela?

¹⁷ Empa ahu ni moorukurerya. Tahi wookhweleya wi empa ahu ekhale yooreeraxa naari ya muhakhu, nyenya eyo enaphwanela okhala yooreheryeya ni yoophwanelela ntoko makhalelo aneemereryaaya. Mmukhalelo mmohamoha, wakhala wi ninnapharihela yoowela vaavaa nnayaahu mmithukumano naari mu orummwa, nnaphwanela wiilipixerya wi ekhale yoophwanelela ni yooreera. Nihicuwale wi oreherya empa ahu ni voorukurerya vahu ennavaha onamoona. Opwaha soothene, ninnaahusiha achu wi Yehova Muluku taweela nave tho wi owo onahaala “wapahula yawo enapahula elapo” nave wi Omwene moohilekela onahaala weeriha wi elapo ya vathi ekhale parataiso. (Yawupulula 11:18; Luka 23:43) Mweeparipari nnachuna wi mukhalelo wa empa ahu ni soothene nryaahuno sooniherye wa akina wi ninnooniherya makhalelo aphaama aweela yaawo aniiwanana ni elapo evyaani enoorwa.

18. Nnii nooniherya hai ncicimiho wa Empa ahu ya Omwene?

¹⁸ Nipuro nahu na malapelo. Osivela wahu wa Yehova onnaneeriha wooniherya ncicimiho Empa ahu ya Omwene, mpuro wa malapelo eeparipari mu ekulucu. Vaava aleco anaphiyaaya mu Empa ya Omwene, nnachuna wi awo ekhaleno moonelo wa phaama vooloca wa mpuro ahu wa mithukumano. Onakhweleya oreherya ni oreeriha moohihiyererya wi achu echuneke, esiveliweke ni Empa ahu ya Omwene. Nnanwerya wooniherya ncicimiho wa Empa ahu ya Omwene moorweela wa  weera yeeyo nnaweryaahu wi eyo ekhale yoophwanelela. Ekari etokotoko ovaha elukuluku ahu wi ‘nreherye’ nipuro nahu na malapelo. (2 Matharihelo 34:10) Malakiheryo mamohamoha annaphariheleya vaavaa nnaphwanyeyaahu mu Empa ya Muthukumano wa Muceche naari mapuro makina wi niwiriyane muthukumano wa muceche naari wa ekulucu.

19. Ti heeni nnaphwanelaahu osepa wi nikhale aweela omwiilini, nave Piipiliya onanikhaviherya mwawiihai?

¹⁹ Wi nikhale aweela omwiilini, nnaphwanela osepa saweera ni sookhovelela soonanara ntoko omulya soona, owurya soohapaliha ni opharihela mirece soohiphwanelela naari sinnanariha muupuwelo. Piipiliya hanathariha masina oothene a saweera ni sookhovelela soonanara sinaphwanyeya mmahiku yaala, nyenya onnavaha malakiheryo ananikhaviherya wiiwexexa muupuwelo wa Yehova vooloca sa seiho. Nthowa na wi noosuwela moonelo wa Yehova, osivela wahu wa yoowo onnaneeriha weera echu wi nikhale aweemereryiwa. Hankooni nthokororye malakiheryo mathanu a Mpiipiliyani.

20, 21. Saweera taani Yehova onachuneiye wi nsepe, nave nthowa taani noolipa nryaahuno wi neereno hiiha?

²⁰ “N’rahuno nto malakano yala, ósiveliwa, niryeheryele mkhatihu otcharuwa yorípiha yothene ya mwíli ni ya munepa, ni oveliha mélelo ni omova Muluku.” (2 Akorinto 7:1) Yehova onachuna wi nsepe saweera sinariipiha mwiili, munepa ni muupuwelo ahu. Mwawiihiiha nnachuna osepa minkhela seiho sinnanariha okumi ahu woomunepani naari muupuwelo.

²¹ Piipiliya onnanivaha mathowa oolipa wi “niryeheryele mkhatihu otcharuwa yorípiha yothene.” Moone wi 2 Akorinto 7:1 onapacerya ariki: “N’rahuno nto malakano yala.” Malakano taani? Ntoko yooniheriwaaya mu iciciri soopacerya, Yehova oolaiherya: “Miyo kinan’wakhelani; kinamukhala Tithinyu.” (2 Korinto 6:1, 18, BNM) Nkaanyiheryani: Yehova onnalaiherya wi onahaala wookhapelelaani ni woosivelaani ntoko tiithi onaasiveleiye anaawe. Nyenya Yehova onahaala  waakhwaniherya soolaiherya seiha wakhala wi moosepa yooripiha “ya mwíli ni ya munepa.” Mwawiihiiha, yaahaala okhala yoonanara weemererya wi saweera naari sookhovelela sooriipiha soohiiheni okhalano onthamwene waphaama ni Yehova!

22-25. Malakiheryo taani a Mpiipiliyani ananikhaviherya osepa sookhovelela ni saweera soonanara?

²² ‘Wasiveleke Apwiya Mulukuá ni murimá wothene, nave ni okumiá wothene, nave ni mirikuá yothene.’ (Mateyu 22:37) Yesu olonce wi nla nlamulo ntokweene noopacerya wa oothene. (Mateyu 22:38) Yehova onaweherya wi nimusiveleke. Wi nimusivele ni murima woothene, okumi, ni miruku, nnaphwanela osepa saweera sinahaala okukuca okumi ahu naari onanariha muupuwelo yoowo Muluku onivanheiye.

²³ “[Yehova] annavaha sothe sene okumi ni miwiya ni itchu sothene.” (Saweriwa Tarummwa 17:24, 25) Okumi yoovaha ya Yehova. Woona wi ninnamusivela Namavaha, nnachuna wooniherya ncicimiho wa yoovaha eyo. Ninnasepa sookhovelela ni saweera soothene sinahaala onanariha okumi ahu, ntakhara ninneemererya wi oneerano ichu seiha hanooniherya ncicimiho wa yoovaha eyo ya okumi.—Salmo 36:9.

²⁴ ‘Omusiveleke mukhwá ntoko onerá wisivela mwanene mekhá.’ (Mateyu 22:39) Sookhovelela ni saweera sooriipiha sinanivolowela ohiya pahiru wa hiyaano, nyenya tho wa oothene ananirukurerya. Ntoko yootakiherya, ale ahinamulya soona annapahuwa nthowa na yaale anamulya. Yoole onaapahula yaale emwaacamenle onnachekela nlamulo na Muluku na omusivela mwaacamani. Owo tho hanamusivela Muluku.—1 Yohane 4:20, 21.

²⁵ ‘Nwiweleleke alipa òlamulela ni asitokwene.’ (Tito 3:1, BNM) Mu ilapo sincipale, okhalano naari opharihela mirece mikina ori ochekela nlamulo. Ntoko Akiristu eeparipari, hanakhalano naari hanapharihela mirece sooheemereryeya.—Aroma 13:1.

26. (a) Wi niikhapelele mu osivela wa Muluku, tiheeni nnaphwanelaahu weera? (b) Ntakhara heeni okhala aweela mmoonelo wa Muluku mukhalelo waphaamaxa wa okumi?

 ²⁶ Wi niikhapelele mu osivela wa Muluku, nnaphwanela okhala aweela, ohiya mukhalelo mmoha naari miili, nyenya mu soothene. Ocharuwa ni osepa saweera ni sookhovelela soonanara akhweya hokhala wookhweya, nyenya ti wooweryeya. * Chiryene, hiwaavo mukhalelo mukina waphaamaxa wa okumi, pahiru yeeyo Yehova onanihusiheiye ti yamphurelo ahu. (Mwaalakhanye Yesaya 48:17.) Opwaha soothene, moorweela wa okhala aweela nnahaala ohakalala nthowa na osuwela wi ninnooniherya osivela wa Muluku, ni wiikhapelela mu osivela wawe.