1-3. (a) Ahabw’enki nyina w’omwana naahamya ngu omwana we acumire gye? (b) Ahabw’enki Yehova naayenda ngu abarikumuramya babe abecumi, kandi n’enki ekirikutuhiga okwenda kuguma turi abecumi?

OMUKAZI naatebeekanisa omwana we muto ow’omwojo kugira ahu baagyendana. Ahamya ngu yaamunaabisa kandi ngu yaamujweka ebijwaro ebicumire gye. Nyina naamanya ngu obwecumi n’ekintu kikuru aha magara g’omwana we. Kandi naamanya ngu endeebeka y’omwana we neebaasa kuhaisa abazaire be ekitiinisa nari kutakibahaisa.

² Yehova, Tataitwe ow’omu iguru, naayenda ngu abaheereza be babe abeecumi. Ekigambo kye nikigira kiti: “Ahari oshemeire oyeyoreka ori oshemeire” * (Zaaburi 18:26) Yehova naatukunda; naamanya  ngu okuguma turi abecumi nikitugasira munonga. Kandi naayenda ngu itwe Abajurizi be tumuhaise ekitiinisa. Buzima, obwecumi bwaitu n’emicwe yaitu mirungi nibiija kuhaisa Yehova n’eiziina rye eririkwera ekitiinisa, beitu kutari kurijumisa.—Ezekieli 36:22; shoma 1 Petero 2:12.

³ Okumanya ngu Ruhanga naakunda abantu abecumi nikituhiga kuguma turi abecumi. Nitwenda ngu emitwarize yaitu emuhaise ekitiinisa ahabw’okuba nitumukunda. Kandi nitwenda kwerindira omu kukunda kwe. Ka tushwijume enshonga ahabw’enki tushemereire kuguma turi abecumi, ekirikutwarirwa omu kuba abecumi, n’oku turikubaasa kuguma turi abecumi. Okweshwijuma nk’okwo, nikutuhwera kureeba yaaba hariho ahu twine kukora empindahinduka.

4, 5. (a) Ni nshonga ki enkuru eshemereire kutureetera kuguma turi abecumi? (b) Obwecumi bwa Yehova nibureebekyera buta omu bihangirwe bye ebirikureebwa?

⁴ Omuringo gumwe ogu Yehova arikutwebemberamu n’okututeeraho eky’okureeberaho. Ekigambo kye nikituhiga ‘kumutooreza.” (Abaefeso 5:1) Egi niyo nshonga nkuru ahabw’enki tushemereire kuguma turi abecumi: Yehova, Ruhanga ou turikuramya n’omwecumi, taine kamogo kandi n’orikwera omu miringo yoona.—Shoma Abaleevi 11:44, 45.

⁵ Obwecumi bwa Yehova, nk’emitwarize ye endiijo mingi, nabwo nibureebekyera omu bi yaahangire ebirikureebwa. (Abarooma 1:20) Ensi ekatebeekanisibwa kuba obutuuro burungi bw’abantu. Yehova akatamu ebintu ebirikuboneza omwoya n’amaizi. Obukooko obumwe nibukora aha kuhindura ebintu ebibi bubiihamu obutwa. Ab’ebya sayansi nibakoresa bumwe aha bukooko obu kuboneza ahu oiro erikwatika n’okumaraho n’obundi burofa oburikureetwaho abantu abarikweyendeza. Buzima, obwecumi n’ekintu kikuru aha ‘Muhangi w’ensi.’ (Yeremia 10:12) Naitwe tushemereire kubutwara nk’ekintu kikuru.

6, 7. Ebiragiro ebi Ruhanga yaahaire Musa bikahamya bita ngu abarikuramya Yehova baine kuba abeecumi?

 ⁶ Enshonga endiijo ahabw’enki tushemereire kuguma turi abecumi n’ahabw’okugira ngu Yehova, Omutegyeki wa Byona, naayenda ngu abarikumuramya babe bari abecumi. Omu Biragiro ebi Yehova yaahaire Abaisraeli, obwecumi n’okuramya bikaba nibigyendera hamwe. Ebiragiro bikaba nibyoreka gye ngu aha Izooba ry’Okurihiirira Ebibi, omunyamurwa omukuru akaba aine kwoga emirundi ebiri, beitu gutari gumwe gwonka. (Abaleevi 16:4, 23, 24) Abanyamurwa abaabaire nibeebembera omu kutamba ebitambo bakaba baine kunaaba engaro zaabo n’ebigyere byabo batakatambiire Yehova ebitambo. (Okuruga 30:17-21; 2 Obusingye 4:6) Ebiragiro bikooreka ebintu nka 70 ebyabaire nibireetera abantu oburofa bw’aha mubiri n’okuba abatashemeire. Omwisraeli ku yaabaire aba otashemeire, akaba ateejumba omu kuramya kw’omuringo gwona, ku yaabaire akwejumbamu atashemeire, akaba aitwa. (Abaleevi 15:31) Weena owaabaire ayanga kukora ebyabaire nibyetengyesa omuntu okubaasa kuba oshemeire, otwariiremu okwoga n’okwozya emyenda ye, akaba aitwa.—Okubara 19:17-20.

⁷ N’obu turaabe tutarikutegyekwa Ebiragiro ebyahairwe Musa, nibituhwera kumanya emiteekateekyere ya Ruhanga aha bintu bitari bimwe. Buzima, Ebiragiro bikaba nibihamya ngu abarikuramya Ruhanga baine kuba abeecumi. Yehova takahindukaga. (Malaki 3:6) Okuramya kwaitu tarikubaasa kukusiima okwihaho kwaba ‘kushemeire kandi kutaine kamogo.’ (Yakobo 1:27) N’ahabw’ekyo, twine kumanya eki arikwenda ngu tukore omu nshonga egi.

8. Ni miringo ki ei Yehova arikwenda ngu tubemu abecumi?

⁸ Okurugiirira ahari Baibuli, okuba omwecumi tikirikumanyisa okuba omwecumi aha mubiri kwonka. Okuba omwecumi omu maisho ga Ruhanga nikikwata aha magara gaitu goona. Yehova naayenda ngu tube abecumi omu miringo ena emikuru, omu kuramya kwaitu, omu micwe yaitu, omu biteekateeko byaitu n’omu  by’emibiri yaitu. Ka tureebe eki buri kimwe ahari ebyo kirikutwariramu.

9, 10. Nikimanyisa ki okuguma turi abecumi omu kuramya kwaitu, kandi Abakristaayo ab’amazima nibeetantara ki?

⁹ Obwecumi omu kuramya. Okukishoboorora omu bigufu, okuguma turi abecumi omu kuramya nikimanyisa okutajwanzya okuramya okw’amazima n’okw’ebishuba. Obu Abaisraeli baaruga Babulooni bakagaruka Yerusaalemu, bakaba baine kukuratira ekiragiro eki: ‘Murugyemu, mutakora aha kintu kyona ekitashemeire . . . mugume mweyerize.’ (Isaaya 52:11) Ekikuru ekyareeteire Abaisraeli kugaruka owaabo, kukaba kuri okugaruka kuramya Yehova. Okuramya okwo kukaba kwine kuba okushemeire, kutasiisirwe nyegyesa, ebikorwa n’emigyenzo yoona ey’ediini y’Abababulooni ebitarikuhaisa Ruhanga ekitiinisa.

¹⁰ Obunaku obu, itwe nk’Abakristaayo ab’amazima tushemereire kwegyendesereza kugira ngu tuteeshiisha n’okuramya kw’ebishuba. (Shoma 1 Abakorinso 10:21) Twine kwegyendesereza, ahabw’okuba okubeihabeiha kw’amadiini g’ebishuba kuri hoona. Omu mahanga maingi, emigyenzo mingi n’ebikorwa bingi biine akakwate n’enyegyesa y’ediini z’ebishuba, nk’enyegyesa erikugira ngu hariho ekintu ekitafa ekiruga omu muntu kikagumizamu kubaho bwanyima y’okufa. (Omubuurizi 9:5, 6, 10) Abakristaayo ab’amazima nibeetantara emigyenzo eine akakwate n’enyikiriza z’ediini z’ebishuba. * Titurikwija kwikiriza abandi kutugyemesereza kuhenda emitindo ya Baibuli erikukukwata aha kuramya okw’amazima.—Ebyakozirwe 5:29.

11. Okuba abecumi omu micwe nikitwariramu ki, kandi ahabw’enki ni kikuru ngu tugume turi abecumi omu micwe?

¹¹ Obwecumi omu micwe. Okuguma turi abecumi omu micwe nikitwariramu okwetantara eby’obushambani eby’omuringo gwona. (Shoma Abaefeso 5:5.) Ni kikuru ngu tugume turi abecumi omu micwe. Nk’oku turikwija kureeba omu shuura y’akatabo aka eraakurateho, okubaasa kwerindira omu kukunda kwa Ruhanga, tushemereire ‘kwetantara obushambani.’ Abashambani  abatarikweteisa “tibarihungura bukama bwa Ruhanga.” (1 Abakorinso 6:9, 10, 18) Omu maisho ga Ruhanga, abantu nk’abo ni bamwe ahari abo ‘abarikukora ebihagaro.’ Baayanga kuguma bari abecumi omu micwe, ‘omugabo gwabo guryaba . . . okufa kwa kabiri.’—Okushuuruurwa 21:8.

12, 13. Ni kakwate ki akari ahagati y’ebiteekateeko n’ebikorwa, kandi nitubaasa tuta kuguma turi abecumi omu biteekateeko?

¹² Okuba abecumi omu biteekateeko. Ebiteekateeko nibirugamu ebikorwa. Twareka ebiteekateeko bibi kuguma omu mitima yaitu, bwanyima nitubaasa kukora ebintu bibi. (Matayo 5:28; 15:18-20) Kwonka twaijuza ebishemeire omu mitima yaitu n’omu biteekateeko byaitu, nikiija kutuhiga kuguma twine emicwe eshemeire. (Shoma Abafilipi 4:8.) Nitubaasa kuguma tuta twine ebiteekateeko ebishemeire? Twine kwetantara eby’okweshemeza eby’omuringo gwona ebirikubaasa kushiisha ebiteekateeko byaitu. * Ekindi, nitubaasa kwijuza omu mitima yaitu n’ebiteekateeko byaitu ebirungi turikwega Ekigambo kya Ruhanga butoosha.—Zaaburi 19:8, 9.

¹³ Okubaasa kwerindira omu kukunda kwa Ruhanga, ni kikuru ngu tugume turi abecumi omu kuramya, omu micwe n’omu biteekateeko. Emiringo y’obwecumi egi neeshoboororwaho omu bwijwire omu shuura ezindi ez’akatabo aka. Ka tureebe omuringo gwa kana, obwecumi omu by’omubiri.

14. Ahabw’enki obwecumi bw’omubiri butashemereire kuba enshonga erikukwata ahari buri muntu okwe?

¹⁴ Obwecumi bw’eby’omubiri nibutwariramu okuboneza emibiri yaitu n’ei turikutuura. Kwonka shi obwecumi nk’obwo n’enshonga erikukwata ahari buri muntu okwe, etarikukwata aha bandi? Ekyo tikwo kishemereire kuba aha baheereza ba Yehova. Nk’oku kyaba kyagambirweho, Yehova naatwara obwecumi bwaitu obw’eby’omubiri nka bukuru munonga tihabw’okugira ngu nibutugasira kwonka, kureka n’ahabw’okugira ngu nituhimbisisa  eiziina rye. Teekateeka aha ky’okureeberaho ekiri aha kutandika kw’eshuura egi. Okureeba omwana orikukira kuba ari omurofa nikukureetera kwebuuza aha ku abazaire be bari, tikwe kiri? Titurikwenda ngu endeebeka yaitu nari oku turikutwaza kujumise Tataitwe ow’omu iguru, nari ngu kugayise amakuru agu turikubuurira. Ekigambo kya Ruhanga nikigira kiti: “Nikyo twerindira kutateeza omuntu weena ntsibo, ngu obuheereza bwaitu burekye kugaywa, kureka omuri byona nitweyoreka nk’abashemereire kuba abaheereza ba Ruhanga.” (2 Abakorinso 6:3, 4) Mbwenu shi obwo, nitubaasa tuta kuguma turi abecumi aha mubiri?

15, 16. Obwecumi nibutwariramu ki, kandi ebijwaro byaitu bishemereire kuba mu mbeera ki?

¹⁵ Okweboneza hamwe n’endebeeka. N’obu eby’obuhangwa n’oku abantu barikutuura omu mahanga gatari gamwe kuraabe kutarikushushana, twena nitubaasa kutunga esaabuuni n’amaizi g’okwoga buri izooba kandi tuhamye ngu turi abecumi,  itwe n’abaana baitu. Obwecumi nibutwariramu okunaaba engaro zaitu na saabuuni n’amaizi tutakariire nari tutakakwatsire aha by’okurya, twaruga omu kihoroonio na twaheza kunaabisa omwana nari kuhindura napi ye. Okunaaba engaro na saabuuni n’amaizi nikibaasa kutuhwera kwerinda endwara kandi nikirinda amagara gaitu. Nikuzibira obukooko obw’akabi kujanjaara, kityo kihwera abantu kutakwatwa endwara nk’esheshe. Omu mahanga ei abantu bataine maju agarimu ebihoroonio, obubi nibubaasa kuziikwa omu itaka, nk’oku Abaisraeli aba ira baabaire bakora.—Eky’Ebiragiro 23:12, 13.

¹⁶ Ebijwaro byaitu nabyo bishemereire kwogibwa butoosha kugira ngu bireebeke gye. Ebijwaro by’Omukristaayo tikugira ngu biine kuba biri eby’obuguzi bwingi nari eby’emishono ehangire, kureka bishemereire kuba bicumire gye kandi bishemeire. (Shoma 1 Timoseo 2:9, 10.) Ahu turaabe turi hoona, nitwenda ngu endeebeka yaitu ‘esiimise enyegyesa ya Ruhanga, Omujuni waitu.’—Tito 2:10.

17. Ahabw’enki amaka gaitu n’ebi twine bishemereire kuba bicumire gye kandi birikureebeka gye?

¹⁷ Amaka gaitu n’ebi twine. Amaka gaitu nigabaasa kutabamu bintu by’obuguzi bwingi, kwonka gashemereire kuba gacumire gye kandi garikureebeka gye nk’oku kirikubaasika. Omu muringo nigwo gumwe, twaba nitukoresa ebiiruka ebyaitu turikuza omu nteerane n’omu kubuurira, nitubaasa kukora kyona eki turikubaasa kubiboneza omunda n’aheeru. Tutakaayebwa ngu eka n’ebi twine byaba bicumire gye nibihaisa Ruhanga ou turikuramya ekitiinisa. Manya nitwegyesa abantu ngu Yehova ni Ruhanga oshemeire, ngu naija ‘kuhwerekyereza abahwerekyereza b’ensi,’ kandi ngu Obukama bwe buri haihi kuhindura ensi egi ekaba paradiso. (Okushuuruurwa 11:18; Luka 23:43) Buzima nitwenda ngu endebeeka y’eka yaitu n’ebi twine byorekye abandi ngu hati nituteeraho kugira obwecumi oburaije kuhikaana n’embeera z’ensi ensya.

18. Nitubaasa kworeka tuta ngu nituha Ekyombeko kyaitu eky’Obukama ekitiinisa?

¹⁸ Omwanya ogu turikuramizamu. Rukundo ei twiniire Yehova neetuhiga kureeberera gye Ekyombeko ky’Obukama, omwanya  gw’okuramya okw’amazima omu kicweka eki turimu. Nitwenda ngu abasya baija aha Kyombeko ky’Obukama, bareebe ngu omwanya ogu turikuramizamu gushemeire. Okuguboneza n’okuguhunduuza obutoosha nibyetengyesa kuhamya ngu gwaguma guboneire kandi gurikureebeka gye. Nitworeka ngu nituha Ekyombeko ky’Obukama ekitiinisa twakora kyona eki turikubaasa kukiboneza kikaguma kishemeire. N’omugisha kuhayo obwire bwaitu tukahwera omu kuboneza ‘n’okuhunduuza’ omwanya ogu turikuramizamu. (2 Obusingye 34:10) Kandi twine n’okukora tutyo twaba twine oruteerane aha Kyombeko ky’Obukama ekirikubamu enteerane empango nari omu byombeko ebindi.

19. Kubaasa kuguma turi abecumi omu mubiri, twine kwetantara ki, kandi Baibuli neetuhwera eta omu nshonga egi?

¹⁹ Kubaasa kuguma turi abecumi omu mubiri, twine kwetantara emize n’ebikorwa ebirikushiisha omubiri, nk’okureetsa, okunywa amaarwa maingi n’okukoresa emibazi erikutabura obwongo. Baibuli terikugamba butunu aha mize yoona emibi n’ebikorwa ebibi ebikanyire obunaku obu, kwonka erimu emisingye erikutuhwera kwetegyereza oku Yehova arikubireeba. Ahabw’okugira ngu nitumanya oku Yehova arikureeba ebintu, rukundo ei tumwiniire neetuhiga okukora ebirikumushemeza. Ka twetegyereze emisingye etaano ey’omu Byahandiikirwe.

20, 21. Yehova naayenda ngu twetantare ebikorwa bya muringo ki, kandi ni nshonga ki ey’amaani eshemereire kutureetera kukora ekyo?

²⁰ “Nk’oku twine ebyaraganisiibwe ebyo, abarikukundwa, tweyozyeho oburofa bwona obw’aha mubiri n’obw’omu mwoyo, nituhikiiriza okwera omu kutiina Ruhanga.” (2 Abakorinso 7:1) Yehova naayenda ngu twetantare ebikorwa ebirikushiisha omubiri kandi bikatushiisha ebiteekateeko. N’ahabw’ekyo, tushemereire kwetantara emize erikumanywa ngu neeshiisha omubiri n’ebiteekateeko.

²¹ Baibuli neetuha enshonga y’amaani ahabw’enki tushemereire ‘kweyozyaho oburofa bwona.’ Yetegyereze ngu 2 Abakorinso 7:1 nihatandika harikugira hati: “Nk’oku twine ebyaraganisiibwe  ebyo.” Ebyaraganisiibwe biiha? Nk’oku kirikugambwaho aha muheru gw’eshuura 6, Yehova naaraganisa ati: “Ndyabaakiira. Kandi ndyaba Shoimwe.” (2 Abakorinso 6:17, 18) Teekateeka ahari eki: Yehova naaraganisa kukurinda kandi akakukunda nk’oku ishe w’omwana arikumukunda. Kwonka Yehova naija kuhikiiriza ebi ebi arikuraganisa waayetantara ebirikushiisha ‘omubiri n’ebiteekateeko.’ Ka nikiba kiri eky’obushema okwikiriza omuze mubi okuturemesa kugira na Yehova omukago murungi nk’ogwo!

22-25. Ni misingye ki ya Baibuli erikubaasa kutuhwera kwetantara emize mibi n’ebikorwa bibi?

²² “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona.” (Matayo 22:37) Yesu akatooranamu ekiragiro eki nk’ekirikukira ebindi. (Matayo 22:38) Kihikire itwe kugirira Yehova rukundo nk’egyo. Okumukunda n’omutima gwaitu gwona, n’amagara gaitu goona, n’obwengye bwaitu bwona, tushemereire kwetantara ebikorwa ebirikubaasa kutwita juba nari ebirikuturemesa kuteekateeka gye.

²³ “[Yehova] aha abantu boona amagara n’omwitsyo na buri kintu kyona.” (Ebyakozirwe 17:24, 25) Amagara n’ekiconco kuruga ahari Ruhanga. Nitukunda Owaagatuhaire, n’ahabw’ekyo nitwenda kworeka ngu nitusiima ekiconco ky’amagara. Nitwetantara emize yoona nari ebikorwa ebirikushiisha amagara gaitu, ahabw’okuba nitumanya ngu ebikorwa nk’ebyo nibyoreka okutaha amagara ekitiinisa—Zaaburi 36:9.

²⁴ “Kunda mutaahi waawe nk’oku oyekunda.” (Matayo 22:39) Emize n’ebikorwa ebitashemeire butoosha nibishiisha orikubyejumbamu n’abo abu arikutuura nabo. Nk’eky’okureeberaho, omwika ogurikuruga aha barikureetsa nigurwaza abatarikureetsa abarikugwitsya. Omuntu orikukora kubi abu arikutuura nabo naaba atarikworobera kiragiro kya Ruhanga ekirikugira ngu tukunde bataahi baitu. Kandi naaba naabeiha ngu naakunda Ruhanga.—1 Yohaana 4:20, 21.

²⁵ Guma “obaijutsye kworobera abaine obushoboorozi.’ na gavumenti (Tito 3:1) Omu mahanga maingi, okugira nari okukoresa emibazi emwe nikihenda ebiragiro. Abakristaayo ab’amazima,  tibashemereire kukoresa nari kugira emibazi etarikwikirizibwa.—Abarooma 13:1.

26. (a) Twine kukora ki kubaasa kwerindira omu kukunda kwa Ruhanga? (b) Ahabw’enki okuguma turi abecumi omu maisho ga Ruhanga kiri kikuru?

²⁶ Okubaasa kwerindira omu kukunda kwa Ruhanga, twine kuguma turi abecumi, ti mu bintu bikye byonka kureka omuri byona. Okureka emize n’ebikorwa ebirikushiisha omubiri nikibaasa kutooroba, kwonka nikibaasika. * Buzima, okureka emize nk’egyo ni kirungi aha magara gaitu, ahakuba Yehova butoosha naatwegyesa eby’okutugasira. (Shoma Isaaya 48:17.) Ekikuru munonga, twaguma turi abecumi, nitutunga okumarwa okurikuruga omu kumanya ngu nituhaisa Ruhanga ou turikukunda ekitiinisa, tutyo twerindira omu kukunda kwe.