1-3. (a) Ngera uchul me a chedil a soal el mesang a ngelekel el mo ungil el kltmokl? (b) Ngera uchul me a Jehovah a soal a remesiungel a bo leklikiid, e ngera el tekoi a rullid me ngsoad el mo klikiid er a rokui el tekoi?

A CHEDIL a kutmeklii a ngelekel er a uchei er a lorael. Ngsoal el mesa ngelekel el melecholb e oubail a selilek e ungilbesul el bail. Ngmedengei el kmo a ungil el omengetmeklel a mo uchul e ngmesisiich a bedengel. Ngdirrek el medengei el kmo a omengetmeklel a ngalek a mo uchul a ungil chisel a demal me a delal.

² A Jehovah el Demad el ngar er a eanged a soal a remesiungel a bo lebliochel e leklikiid. A Tekingel a kmo:  “Ke bliochel el kirir a re bliochel.” * (Psalm 18:26) A Jehovah a kmal betik a rengul er kid, e medengei el kmo nguchul a klungioled sel bo deklikiid er a rokui el tekoi. Ngdirrek el soal a Resioning er ngii a bo luchul a ungil chais el kirel. Me a ungil el omengetmekled me a omerelled a mo uchul a klebkall el mo er Ngii me a chedaol el ngklel, el diak bo luchul a otuub.—Esekiel 36:22; monguiu er a 1 Petrus 2:12.

³ Me kid el medengei el kmo a Dios a betik a rengul er tirke el bliochel e klikiid el chad a uchul, me ngsoad el mo klikiid er a rokui el tekoi. Ngbetik a rengud er ngii me ngsoad a rolel a klengar er kid a bo luchul a odanges el mo er ngii. Ngdirrek el soad el melemolem el ngar er a bltikerreng er ngii. Me a leuaisei, e bo dosaod er a uchul me ngkired el melemolem el klikiid, me a tekoi el uldimukl er ngii, me a rolel e kede melemolem el klikiid. Tiang a ngosukid el mo medengei el kmo ngera el tekoi a dirk kired el oureor el kirel.

4, 5. (a) Ngera sel kot el ngarbab el uchul me ngkired el mo blechoel el klikiid? (b) Ngmekerang a blebelel a Jehovah e ochotii el kmo ngii a klikiid?

⁴ A Jehovah a kutmeklii a kerebai el kired el oltirakl er ngii. Me a Tekingel a mengelechel er kid el mo “melasem el mo ua ingii.” (Efesus 5:1) A Jehovah el Dios el dongull er ngii a klikiid, e bliochel, e dirrek el chedaol er a bek el tekoi. Me tiaikid sel kot el ngarbab el uchul me ngkired el mo blechoel el klikiid.—Monguiu er a Levitikus 11:44, 45.

 ⁵ A blekerdelel a Jehovah el klikiid, me a lmuut el bebil el blekerdelel, a mocholt el oeak a blebelel. (Rom 1:20) A beluulechad a kmal mle ungil el obeob el kirel el delengcheklir a rechad. A Jehovah a kiltmeklii a rolel e a ralm me a eolt er a beluulechad a sebechel el di ngii el omekbeches er ngii. Ngdirrek el ngar er ngii a bebil el kmal mekekerei el charm el sebechel el menga mekikiongel. El ua tiang, a re scientist a mla ousbech a bebil er aika el mekekerei el charm el mo menga oil el milechubel er a daob me a kuk bebil er a mekikiongel el mlo er ngii el mekngit el omerellir a rechad a uchul. Me ngbleketakl el kmo, ngike el “milebii a beluulchad” a soal a bo leklikiid a bek el tekoi. (Jeremia 10:12) Me kid me ngdirrek el kirel el mo uaisei a uldesued.

6, 7. Ngmilekerang a Llach er a Moses e meketeklii el kmo tirke el mengull er a Jehovah a kirir el mo klikiid?

⁶ A Jehovah el Merredeled a mengerechir er tirke el mengull er ngii el mo klikiid, e tiang a ta er a uchul me ngkired el mo klikiid. Tia el tekoi a ulebeketakl el oeak a Llach el Jehovah a milsterir a rechad er a Israel. A doltirakl er a Llach e a ngarbab el prist a mle kirel el eru el taem el lolecholb er sel Sils er a Tngakireng. (Levitikus 16:4, 23, 24) A reprist a mle kirir el melebal e meriso a ocherir er a uchei er a loldars a tenget el mo er a Jehovah. (Exodus 30:17-21; 2 Kronika 4:6) A Llach a ulemasech a bekord el 70 el tekoi el uchul e a chad a mo diak leklikiid. Me a ngii di el chad er a Israel el dimlak leklikiid a dimlak el sebechel el mo teloi er a omengull. Me a chad el dimlak leklikiid el mlo teloi er a omengull a mle sebechel el mo okodall. (Levitikus 15:31) Me a chad el chetil el mengikiid er ngii el oltirakl er a mla meketmokl el rolel a omengikiid, el uldimukl er a omelecholb me a omesilek el bail, a kirel el mo meringel el obals.—Ulecherangel 19:17-20.

 ⁷ Me alta e ngdiak doltirakl er a Llach er a Moses er chelechang, engdi ngosukid el mo medengei a uldesuel a Jehovah. A Llach a bleketakl el ochotii el kmo tirke el mengull er a Dios a kmal kirir el mo klikiid. A Jehovah a dirkak lemengodech. (Malakai 3:6, 7) Me a omengull er kid el mo er ngii a kirel el mo “merang e bliochel” a lsekum ngsoad a bo lekengei er ngii. (Jakobus 1:27) Me ngkmal kired el mo medengei a uldesuel a Jehovah el kirel tia el tekoi.

8. A Jehovah ngsoal a bo deklikiid el okiu a ngera el rolel?

⁸ A Dios a soal a bo deklikiid er a bek el tekoi er a klengar er kid. Me ngmengerechir er kid el mo klikiid el okiu a eua el rolel, el ngii a omengull er kid, me a omerelled, me a uldesued, me a bedenged. Me bo dosaod a derta er aika el tekoi.

9, 10. Ngera belkul a bo leklikiid a omengull er kid? A remera el Kristiano te mengeroid er tir er a ngera el tekoi?

⁹ A omengull er kid. A omengull er kid a mo klikiid a lsekum e ngdiak el chelsechusem er a klsuul el osisechakl. A rechad er a Israel el tilobed er a Babilon el lmuut el mo er a Jerusalem a mle kirir el olengesenges er a mesisiich el uleklatk el kmo: “Lak morutech a ikel mokebai er ngii el tekoi; di mchedaol e mtobed er a beluu.” (Isaia 52:11) Tirka el chad a liluut el mo er a Jerusalem el mle kirir el lmuut el mo melisiich er a omengull el mo er a Jehovah. Me a omengull er tir a mle kirel el mo klikiid, e diak el chelsechusem er a ngii di el klsuul el osisechakl me a dirrek el omeruul me a siukang el luleltirakl er a lengar er a Babilon.

¹⁰ Me chelechang, e kid el Kristiano a kired el kerekikl  me lak bo dechelsechusem er a klsuul el omengull. (Monguiu er a 1 Korinth 10:21.) E le ngkmal betok a klsuul el klechelid el di iliuekl er kid. Ngar er a betok el beluu e ngbetok a siukang el mlengai er a klsuul el osisechakl el ua uldasu el kmo, sel demad e ngar er ngii a kmung ngerang el tuobed er a bedenged e melemolem el ngar. (Olisechakl 9:5, 6, 10) A remera el Kristiano a mengeroid er tir er a ngii di el siukang el chelsechusem er a klsuul el osisechakl. * E diak lemorimel er a rechad el mo omtok a llechul a Biblia el kirel a mera el omengull.—Rellir 5:29.

11. Ngera uldimukl er a klikiid el omeruul e ngera uchul me ngklou a ultutelel a bo leklikiid a omerelled?

¹¹ A omerelled. A bo leklikiid a omerelled, e nguldimukl er ngii a dongeroid er kid er a deleboes. (Monguiu er a Efesus 5:5.) Ngkmal kirel el mo klikiid a omerelled. A ongingil el suobel er tia el babier a ochotii el kmo, a lsoad el melemolem el ngar er a bltikerreng er a Dios, e ngkired el ‘mengeroid er kid er a deleboes.’ Me a rengar er a deleboes el diak lekengei el melodech a omerellir a “diak bo le siseb er a Rengedel a Dios.” (1 Korinth 6:9, 10, 18) A Dios a dirrek el omes er chouaitirka el chad el ua tirke el “meruul a de merur er ngii el tekoi.” Me a lsekum e ngdiak lengodech a omerellir e “a ongerul kodall, a mo dikesir.”—Ocholt 21:8.

12, 13. A uldesued, ngerang rullii er a omerelled, e kede mekerang e melemolem el mengikiid er ngii?

¹² A uldesued. A uldesued a rullid el mo meruul a tekoi. Me a cherengel a taem el domdasu a mekngit, e kede ulterekokl el mo meruul a klengit. (Mateus 5:28;  15:18-20) Engdi a lsekum kede omekeek a uldesued er a bliochel e ungil el tekoi, e ngmelisiich er kid el mo blechoel el meruul a ungil. (Monguiu er a Filipi 4:8.) Me kede mekerang e melemolem el klikiid a uldesued? Ngkired el mengeroid er kid er a ngii di el ongelaod el sebechel el mengikiongel a uldesued. * Ngdirrek el ungil a domekeek a uldesued er a ungil el tekoi el okiu sel deblechoel el mesuub er a Tekingel a Dios.—Psalm 19:8, 9.

¹³ Ngklou a ultutelel el kired el melemolem el klikiid a omengull er kid, me a omerelled, me a uldesued a lsekum ngsoad el melemolem el ngar er a bltikerreng er a Dios. Ngar er ngii a lmuut el klou el omesodel aika el tekoi el ngar er a bebil el bliongel er tia el babier. Me ngar  tia el bliongel e kede kuk mo mesaod er a rolel a bo leklikiid a bedenged.

14. Ngera uchul me a omengetmekled a diak di el tekoi el kired e lemerekong?

¹⁴ A ungil el omengetmekled a uldimukl er a omengetmeklel a bedenged me a blid. Me aikang ngkuk di tekinged el diak a ngerechelir a rebebil er a rechad el mesaod? Ngdiak leuaisei, el kirir tirke el mengull er a Jehovah. Me ngua dulsaod er a uchei, a omengetmekled a klou a ultutelel er a osengel a Jehovah, e le ngmedengei el kmo ngklungioled, e dirrek el sebechel el mo uchul e ngmukebkall. Ka molatk er sel okesiu el ngar er a uchelel tia el suobel. A lsekum ke omes er a ngalek el blechoel el di dechudech e diak lungil el kltmokl, e ke locha mo melechedech er a rechad er a blil. Me a leuaisei, e ngkmal diak el soad a rolel a omengetmekled a bo el uchul a otuub el mo er a Demad el ngar er a eanged, me a lechub e bo lerellii a klumech el domerk er ngii el mo ua lak a belkul. A Tekingel a Dios a kmo: “Ng diak kimoruul olibesongel el mor a ngii di le chad, me ng diak a mo oltelechakl er kemam er a ngera er omesiungam. Aki bai olecholt er kemam el mesiungel a Dios er a rokui el tekoi, maki kmal di outekangel er a uldikel, ma chelebuul, ma ringel.” (2 Korinth 6:3, 4) Me kede mekerang e mo ungil a omengetmekled?

15, 16. Nguldimukl er a ngerang a ungil el omengetmeklel a bedenged, e kirel el mo uangera biled?

¹⁵ A omengetmeklel a bedenged me a biled. Me alta e ngkakerous a blekeradel er a chelsel a kakerous el beluu, engdi oumesingd el taem e ngar er ngii a sob me a ralm el sebeched el ousbech el melecholb, kid me a  rengeleked. Ngkmal ungil a dolebal el ousbech a sob me a ralm er a uchei er a domengur e doruul a kall, me a uriul er a dousbech er a benjo me a lechub e kede oliuid a osime er a rengalek. A omelebal el ousbech a sob me a ralm a sebechel el olengeasek a secher me a kodall. Ngdirrek el sebechel el merrob a virus me a baiking me ngdiak leiuul el mo er a rechad el mo uchul e te mo smecher el omachediil. Me a lsekum a blai a diak a ungil el rolel a sewer er ngii, e ngkirel a dach el medakl er a chutem, el ua lurruul a rechad er a Israel er a irechar.—Duteronomi 23:12, 13.

¹⁶ A biled a kirel el blechoel el selilek e ungil el kltmokl. Ngkirel el ungilbesul el bail, el diak el belkul a kmo ngmeringel a cheral me a lechub e ngoltirakl aike el merael a chisel el bail er chelechang. (Monguiu er a 1 Timothy 2:9, 10.) Me ngbek el taem el soad a omengetmekled a “bo loruulchisel osisechakl el kirel a Dios el Osebeled.”—Titus 2:10.

17. Ngera uchul me a blid me a mekesekesed a kirel el mo ungil kltmokl?

¹⁷ A chelsel a blid me a mekesekesed. Alta e ngdiak el sal klou e lungil el blai a blid, engdi ngkirel el mo ungil el kltmokl. Me a lsekum kede ousbech a mlid el kirel a miting me a odingel, e ngkired el mengetmokl er ngii. E le ungil el omengetmeklel a blid me a mekesekesed a mo uchul a ungil el ocholt el kirel ngike el Dios el dongull er ngii. Ngdirrek el soad el meruul el uaisei, e le kede olisechakl er a rechad el kmo a Jehovah a klikiid el Dios, e ngii a mo ‘melemall er tirkel melemall er a beluulchad,’ me a Rengedel a di kmedung el mo omekbeches er tia el beluad el chutem e rullii el mo baradis. (Ocholt 11:18; Lukas 23:43) Me ngsoad a rechad a bo lomes a blid me a klokled e bo lodengei el  kmo kede mesuub el mo ungil mengetmokl me bo el sebeched el mo kiei er tia el merael el mei el beches el beluulechad.

18. Kede mekerang e ochotii a omengull el kirel a Blil a Ongdibel er kid?

¹⁸ A Blil a Ongdibel er kid. A bltkil a rengud el mo er a Jehovah a rullid me kede olecholt a omengull el kirel a Blil a Ongdibel er kid, el ngii a blil a mera el omengull el ngar er a beluad. Sel lemei a beches el chad e ngsoad a lesang el kmo kede ungil mengetmokl er tia el basio er kid. Me ngkired el blechoel el mengetmokl er ngii me lolemolem el ungil er a ues. Kede olecholt a omengull el kirel a Blil a Ongdibel er kid el oeak sel doruul aike el sebeched el mengetmokl er ngii. Kede dirrek el oba ileakl el techall el mo omtechei aike el telemall er a Blil a Ongdibel er kid. (2 Kronika 34:10) Ngdirrek el ungil el uleklatk el kired sel debo er aike el meklou el blil a ongdibel er kid me a lechub aike el basio el dousbech el kirel a meklou el ongdibel.

19. A lsoad a bo leklikiid a bedenged, e ngkired el mengeroid er kid er a ngera el tekoi, e mekerang a Biblia e ngosukid el kirel tiang?

¹⁹ A lsoad a bo leklikiid a bedenged, e ngkired el mengeroid er kid er a mekikiongel el omeruul el ua omelamech el dekool me a buuch, me a imis el omelim el rrom me a mekngit el usbechel a kar. A Biblia a diak lomasech a bek el mekikiongel el omeruul el ngar er ngii er chelechang, engdi ngar er ngii a omellach er a chelsel el ngosukid el mo medengelii a uldesuel a Jehovah el kirel aika el tekoi. Me kid el betik a rengud er ngii a uchul me sel bo dodengelii a uldesuel, e ngrullid el mo meruul a tekoi el odeuir a rengul. Me bo dosaod a eim el omellach el ngar er a Biblia.

20, 21. A Jehovah ngsoal a dongikiid er kid er a ngera el omeruul, e ngera el tekoi a smisichid el mo meruul el uaisei?

 ²⁰ “Kemiu el betik er a renguk, a ikal telbiil a le riruul a Dios el kired. Ma le ua isei, e de kikidid er a ikel mengikiongel a bedenged ma rengud, e dutebechel a klengar er kid el mo cherrungel el chemau a ungil el tekoi el mengull er a Dios.” (2 Korinth 7:1) A Jehovah a soal a dongeroid er kid er a omeruul el mengikiongel a bedenged me a rengud. Me ngkired el mengeroid er kid er a ngii di el tekoi el sebechel el tomellii a bedenged me a lechub e ngrullid el mo mekngit a bdelud.

²¹ A Biblia a smodii a ta er a uchul me ngkmal kired el mengikiid er kid er “a ikel mengikiongel a bedenged ma rengud.” A 2 Korinth 7:1 a omuchel el mesaod el kmo, “a ikal telbiil a le riruul a Dios el kired.” Me ngera aika el telbiil? Ngar er aike el uleakuchei el bades e a Jehovah a tibir el kmo: “[Ak mo] ngoikemiu, mak mo demmiu.” (2 Korinth 6:17, 18) Ka di molatk, a Jehovah a tibir el kmo ngmo omekerreu e oubltikerreng el eko er kau el di ua omerellel a chedam el mo er a ngelekel. Engdi a Jehovah a mo otaut aika el telbilel, a lsekum ke kikidau er aike el rokui el mengikiongel er ‘a bedengem ma rengum.’ Me ngkmal klebelung el tekoi a lsekum ke mechei a ngii di el mekngit el omeruul me ngmo uchul e ke oridii a ungil el deleuill er kau me a Jehovah!

22-25. Ngera el omellach er a Biblia a ngosukid el mo mengeroid er kid er a mekngit el omeruul?

²² “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Mateus 22:37) A Jesus a dilu el kmo tiaikid sel kot el ngarbab er a rokui el llach. (Mateus 22:38) A Jehovah a rredemelel a chouaitia el bltikerreng er kid. Me a lsekum e ngbetik a rengud er ngii er a  rengud el rokir, me a klengar me a uldesued el rokir, e ngkired el mengeroid er kid er a omeruul el sebechel el kodebengii a klengar er kid me a lechub e ngrullid el mo mekngit el omdasu a tekoi.

²³ “[A Jehovah] a omesterir a re bek el chad a klengar, ma telrir, ma bek el tekoi.” (Rellir 17:24, 25) A klengar a sengk el mla er a Dios. Me kid el betik a rengud er Ngii a uchul me ngsoad el olecholt a omengull el kirel tia el sengk. Me kede mengeroid er kid er a ngii di el omeruul el tomellii a bedenged, e le kede medengei el kmo a doruul el uaisei, e ngua demeterekakl er tia el klengar el ngii a sengk.—Psalm 36:9.

²⁴ “Bo le betik a rengum er a ngar bitar kau el ua le betik a rengum er kau.” (Mateus 22:39) A chad el meruul a mekngit a diak di lolemall er ngii, e ngdirrek el melemall er tirke el ngar er a bita er ngii. El ua tiang, a chad el melamech a dekool a sebechel a chetul a chemelel el tomelleterir a rebebil. Me a chad el melemall er a rebebil a omtok er a llechul a Dios el kmo, bo lebetik a rengum er a ngar bita er kau. Ngdirrek el mo blulak sel tekingel el kmo ngbetik a rengul er a Dios.—1 Johanes 4:20, 21.

²⁵ “Momeklatk er a ruumerang me bo loltirakl a tekingir tirkel merreder ma rulab a dereder.” (Titus 3:1) Ngar er a betok el beluu e ngar er ngii a bebil er a kar, el ua marijuana, el mekull er a llach. Me kid el mera el Kristiano a diak dolab me a lechub e dousbech a kar el ngii a mekull er a llach.—Rom 13:1.

26. (a) Ngera kired el meruul me dolemolem el ngar er a bltikerreng er a Dios? (b) Ngera uchul me ngkot el ungil el rolel a klengar sel deklikiid er a osengel a Dios?

²⁶ A lsekum e ngsoad el melemolem el ngar er a  bltikerreng er a Dios e ngdiak di bo deklikiid er a bebil el tekoi, e ngbai kired el mo klikiid er a bek el tekoi. Me alta e ngdiak lebeot a dongikiid e dongeroid er kid er a mekngit el omeruul, engdi ngsebeched. * Me a kot el ungil el rolel a klengar a sel bo deklikiid, e le Jehovah a olisechakl er kid el di mo uchul a klungioled. (Monguiu er a Isaia 48:17.) E a kot el ngaruchei, sel bo deklikiid e ngmo dmeu a rengud e le kede medengei el kmo kede mengebkall er a Dios el betik er a rengud, e melemolem el ngar er a bltikerreng er ngii.