1-3. (a) Why nao mami laekem pikinini for werem gudfala kaleko wea klin? (b) Why nao Jehovah laekem pipol wea worshipim hem for klin? (c) Why nao iumi laek gohed klin?

MAMI redyim smol boy bilong hem for go long wanfala ples. Hem swimim hem and mekem hem werem gudfala kaleko wea klin. Mami savve wei for klin savve helpem pikinini for no sik. Hem luksavve tu sapos boy bilong hem klin, pipol bae tinghae long mami and dadi, bat sapos hem dirty, pipol bae no tinghae long tufala.

² Dadi long heven, Jehovah, laekem pipol wea worshipim hem for klin. Bible sei: “Long man wea klin, iu bae showimaot iu klin tu.” * (Psalm 18:26) Jehovah lovem iumi and savve  hem gud for iumi klin. Jehovah laekem pipol for tinghae long hem taem olketa lukim olketa Witness bilong hem klin and garem gudfala wei. Tru tumas, taem olketa duim olsem, pipol bae mekhae long Jehovah and holy nem bilong hem.—Ezekiel 36:22; readim 1 Peter 2:12.

³ God lovem pipol wea klin dastawe iumi laek gohed klin. From iumi lovem hem, iumi laek duim samting wea evritaem mekhae long hem. Iumi laek gohed kasem gud samting from love bilong hem. Iumi bae storyim why iumi mas gohed klin, wanem iumi mas duim for klin, and hao iumi savve gohed klin. Datwan savve helpem iumi for gohed klin.

4, 5. (a) Wanem nao main reason for gohed klin? (b) Hao nao samting wea Jehovah wakem showimaot hem klin?

⁴ Jehovah showimaot gudfala example for iumi. Dastawe Bible sei for “followim wei bilong hem.” (Ephesus 5:1) Why nao iumi mas gohed klin? Main reason hem bikos Jehovah, God wea iumi worshipim hem klin, and evri samting wea hem duim hem holy.—Readim Leviticus 11:44, 45.

⁵ Samting Jehovah wakem showimaot olketa wei bilong hem and showimaot tu hem klin. (Rome 1:20) God wakem klinfala earth for olketa man stap long hem. Hem putim samfala samting tu for klinim air and wata. Earth barava spesol bikos hem savve klinim hemseleva. Datwan showimaot wei for klin hem important long “Man wea wakem earth.” (Jeremiah 10:12) Iumi tu shud tinghae long wei for klin.

6, 7. Wanem nao Law bilong Moses talem wea showimaot pipol wea worshipim Jehovah mas klin?

⁶ Nara reason for gohed klin hem bikos Jehovah, wea hem Haefala Ruler, laekem pipol wea worshipim hem for  klin. Law wea Jehovah givim olketa Israelite showimaot man wea klin nomoa savve worshipim hem. Long day for forgivim sin bilong nation, Law sei hae priest mas swim tufala taem. (Leviticus 16:4, 23, 24) Olketa priest wea offerim sakrifaes mas wasim hand and leg bifor olketa mekem sakrifaes long Jehovah. (Exodus 30:17-21; 2 Chronicles 4:6) Law talem 70-fala samting wea savve mekem man no klin long physical wei and no fit for worshipim Jehovah. Wanfala Israelite wea no klin no savve worshipim Jehovah. Samfala taem panis for duim olsem hem for dae. (Leviticus 15:31) Eniwan wea no laek followim wanem Law talem for klin, olsem for swim and wasim kaleko, olketa mas “aotem hem from kongregeson,” wea minim for killim hem dae.—Numbers 19:17-20.

⁷ Nomata iumi no followim Law bilong Moses distaem, hem helpem iumi for savve long tingting bilong God abaotem olketa samting. Datfala Law showimaot pipol wea worshipim God mas klin. Tingting bilong Jehovah abaotem datwan nating change. (Malachi 3:6) Jehovah bae no hapi long worship bilong iumi sapos hem no “klin and stret.” (James 1:27) Dastawe iumi mas savve hao for klin long tingting bilong God.

8. Jehovah laekem iumi for mas klin long olketa wanem samting?

⁸ Bible no storyim nomoa for klin long physical wei. Long tingting bilong God, man mas klin long evri samting. Jehovah laekem iumi for klin long spiritual wei, long wei bilong iumi, tingting bilong iumi, and long physical wei. Iumi bae storyim fofala samting hia.

9, 10. (a) Wanem nao hem minim for klin long spiritual wei? (b) Wanem nao olketa tru Christian mas keakea for no duim?

⁹ Klin long spiritual wei. Diswan minim man mas no mixim tru worship witim false worship. Taem olketa Israelite  lusim Babylon for go bak long Jerusalem, olketa mas obeyim disfala toktok bilong God: “Kamaot from datfala ples. Iufala mas no tasim eni samting wea no klin! . . . Iufala mas klin.” (Isaiah 52:11) Olketa Israelite mas startim moa wei for worshipim Jehovah. Datfala worship mas klin. Olketa mas no followim teaching and wei bilong religion bilong Babylon, wea no mekhae long God.

¹⁰ Iumi trufala Christian distaem mas keakea for no duim eni samting wea followim false religion. (Readim 1 Corinth 10:21.) Staka samting join witim false religion. Long staka kantri, samfala kastom and celebration wea pipol duim join witim teaching bilong false religion. Wanfala teaching hia sei taem man dae, samting insaed long hem gohed for laef. (Ecclesiastes 9:5, 6, 10) Olketa tru Christian mas no duim eni samting wea join witim false religion. * No letem narawan forcem iumi for duim samting wea no followim wanem Bible talem abaotem klin worship.—Acts 5:29.

11. Wanem nao hem minim for garem gudfala wei, and why nao hem important?

¹¹ Gudfala wei. Man wea garem gudfala wei bae no durong or duim eni nara rong samting saed long sex. (Readim Ephesus 5:5.) Iumi mas gohed garem gudfala wei. Next chapter bae storyim sapos iumi laek gohed kasem gud samting from love bilong God, iumi mas ‘ranawe from eni samting wea switim iumi for durong.’ Pipol wea durong bat no repent “bae no kasem Kingdom bilong God.” (1 Corinth 6:9, 10, 18) Long tingting bilong God, olketa hia “no klin and duim olketa rabis samting.” Sapos olketa gohed for durong, “olketa bae go long . . . mek-tu dae.”—Revelation 21:8.

12, 13. (a) Wanem nao savve happen sapos man gohed tingim wanfala samting? (b) Hao nao iumi savve gohed tingim gudfala samting?

 ¹² Tingim gudfala samting. Samting man tingim nao bae hem duim. Sapos iumi gohed tingim rabis samting, gogo bae iumi duim datwan. (Matthew 5:28; 15:18-20) Bat sapos iumi tingim gudfala samting evritaem, iumi bae gohed garem gudfala wei. (Readim Philippi 4:8.) Wanem nao iumi savve duim for gohed tingim gudfala samting? Iumi mas no duim eni hapitaem wea savve mekem iumi tingim nogud samting. * Nara samting, iumi mas studyim Bible evritaem mekem iumi tingim gudfala samting.—Psalm 19:8, 9.

¹³ For gohed kasem gud samting from love bilong God, iumi mas klin long spiritual wei, garem gudfala wei, and tingim gudfala samting. Olketa nara chapter bae storyim samfala samting moa abaotem thrifala point hia. Distaem bae iumi storyim mek-foa point: klin long physical wei.

14. Why nao wei for klin hem no samting wea man seleva nomoa savve disaedem?

¹⁴ For klin long physical wei minim body mas klin and wanem iumi garem mas klin tu. Waswe, datwan hem samting wea man seleva nomoa savve disaedem? Nomoa. Pipol wea worshipim Jehovah no ting olsem. Iumi storyim finis Jehovah laekem iumi for klin long physical wei bikos hem savve iumi bae kasem gud samting and pipol savve tinghae long hem. Tingim tokpiksa wea iumi storyim finis. Sapos iu lukim pikinini wea dirty olowe and no werem gudfala kaleko, iu bae ting hao long dadi and mami bilong hem? Iumi no laekem lukluk or wei bilong iumi for mekem pipol no tinghae long Dadi long heven or mekem pipol no laek herem gud nius. Bible sei, ‘iumi no duim eni samting for spoelem tingting bilong pipol mekem olketa no tok againstim  waka iumi duim. Bat iumi showimaot long plande samting iumi olketa wakaman bilong God.’ (2 Corinth 6:3, 4) Hao nao iumi savve gohed klin long physical wei?

15, 16. (a) Wanem samting nao bae man duim for hem klin? (b) Wanem kaen kaleko nao iumi mas werem?

¹⁵ Body and lukluk mas klin. Long evri kantri, living bilong pipol and kastom bilong olketa no semsem. Nomata olsem, iumi evriwan fit for garem soap and wata for swim evriday mekem iumi and olketa pikinini savve klin. Hem gud for wasim hand long soap evritaem bifor iumi kaikai, redyim kaikai, bihaen iumi go long toilet, and bihaen iumi changem nappy bilong baby. For duim olsem savve protectim iumi from sik and savve sevem laef bilong iumi tu. Iumi bae no mekem nara pipol kasem sik tu, olsem beleran. Long olketa kantri wea staka haos no garem toilet  insaed, taem man laek toilet, hem savve digim hol long graon and berem toilet bilong hem, olsem olketa Israelite duim bifor.—Deuteronomy 23:12, 13.

¹⁶ Iumi mas wasim kaleko evritaem mekem hem klin and luk gud. Olketa Christian no need for werem kaleko wea expensive tumas or followim niu stael, bat kaleko bilong olketa mas klin, gudfala, and showimaot respect. (Readim 1 Timothy 2:9, 10.) Nomata long wea nao iumi stap, lukluk bilong iumi mas “mekem pipol barava tinghae long teaching bilong God wea sevem iumi.”—Titus 2:10.

17. Why nao haos and area raonem haos mas klin and evri samting stap stret?

¹⁷ Haos and wanem iumi garem. Maet iumi no garem big haos or haos wea expensive bat nomata iumi garem smol haos, hem mas klin and evri samting mas stap stret. Sapos iumi iusim trak for go long meeting and preaching, hem gud for keepim trak klin. Sapos haos and area raonem haos hem klin, pipol bae tinghae long God iumi worshipim. Iumi shud showim gud example bikos iumi teachim pipol Jehovah hem God wea klin, hem bae “finisim olketa wea spoelem earth,” and klosap nao Kingdom bilong hem bae mekem earth paradaes. (Revelation 11:18; Luke 23:43) Iumi laekem haos and wanem iumi garem for mekem pipol luksavve iumi redyim iumiseleva for stap long datfala klin paradaes.

18. Hao nao iumi savve showimaot iumi respectim Kingdom Hall?

¹⁸ Ples for worship. From iumi lovem Jehovah, iumi lukaftarem gud Kingdom Hall bikos hem ples for worshipim tru God. Taem hem firstaem for pipol kam long Kingdom Hall, iumi laekem olketa for tinghae long ples wea iumi worship. Iumi mas klinim Kingdom Hall evritaem and fixim eni samting wea brek mekem hem luk gud olowe. Taem iumi lukaftarem gud Kingdom Hall, datwan showimaot iumi respectim ples for worship. Hem privilege for klinim  ples wea iumi worship and “fixim” eni samting wea brek. (2 Chronicles 34:10) Hem semsem tu taem iumi iusim Assembly Hall or nara ples for assembly or convention.

19. (a) For klin long physical wei, wanem nao iumi mas no duim? (b) Long wanem wei nao Bible helpem iumi gohed klin?

¹⁹ For klin long physical wei, iumi mas no spoelem body bilong iumi, olsem for smoke, drunk, and tekem drug. Bible no storyim evri samting wea savve spoelem body, bat olketa Bible principle savve helpem iumi for luksavve long tingting bilong Jehovah abaotem olketa samting olsem. Taem iumi savve long tingting bilong Jehovah, iumi bae duim samting wea mekem hem hapi bikos iumi lovem hem. Iumi bae storyim faevfala Bible principle.

20, 21. (a) Wanem nao Jehovah no laekem iumi for duim? (b) Why nao iumi no duim kaen samting olsem?

²⁰ “Olketa fren bilong mi, from God promisim iumi olketa samting hia, iumi mas klinim from body bilong iumiseleva eni samting wea savve mekem body or tingting bilong iumi for no klin, mekem iumi kamap holy from iumi fraet long God.” (2 Corinth 7:1) Jehovah no laekem iumi for duim samting wea savve spoelem body and tingting bilong iumi. Dastawe iumi mas no duim kaen samting olsem.

²¹ Bible talem important reason for “klinim from body bilong iumiseleva eni samting wea savve mekem . . . iumi for no klin.” Firstfala toktok long 2 Corinth 7:1 sei: “God promisim iumi olketa samting hia.” Wanem nao hem promisim? Long tufala verse bifor datfala verse, Jehovah sei: “Bae mi nao lukaftarem iufala. . . . Mi bae dadi bilong iufala.” (2 Corinth 6:17, 18) Jehovah promis for lukaftarem and lovem iu olsem dadi wea lovem son or dota. Bat sapos iu duim samting wea mekem “body or tingting” no klin, Jehovah bae no duim wanem hem promisim. Man  wea gohed for tekem or duim samting wea no klin no garem gudfala tingting bikos hem bae spoelem spesol wei wea hem fren gud witim Jehovah!

22-25. Olketa wanem Bible principle nao savve helpem iumi for no duim samting wea savve spoelem body?

²² “Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu.” (Matthew 22:37) Jesus sei datfala law important winim evri law. (Matthew 22:38) Hem fitim for iumi lovem Jehovah olsem. Man wea lovem hem long full heart, full soul, and evri savve bilong hem, bae no duim samting wea savve kosim hem for dae or spoelem gudfala tingting bilong hem.

²³ “[Jehovah] mekem olketa man laef and savve brith and hem givim evri samting long olketa.” (Acts 17:24, 25) Laef hem nambawan present wea God givim. Iumi showimaot iumi tinghae long datfala present bikos iumi lovem Jehovah. Iumi no duim samting wea spoelem body bikos iumi luksavve, sapos iumi duim datwan, iumi nating tinghae long laef wea God givim.—Psalm 36:9.

²⁴ “Iu mas lovem narawan long sem wei wea iu lovem iuseleva.” (Matthew 22:39) Staka taem, samting man duim wea spoelem body savve spoelem hemseleva and nara pipol. Tingim man wea smoke. Hem savve spoelem health bilong hemseleva and narawan wea no smoke wea stap klosap long hem. Eniwan wea duim olsem no obeyim law bilong God for lovem narawan. Man olsem laea nomoa for sei hem lovem God.—1 John 4:20, 21.

²⁵ “Gohed talem olketa for stap anda and obeyim olketa gavman and olketa wea garem paoa.” (Titus 3:1) Long staka kantri, man brekem law sapos hem keepim or tekem drug. From iumi tru Christian, iumi no duim olsem.—Rome 13:1.

26. (a) Wanem nao iumi mas duim for gohed kasem gud samting from love bilong God? (b) Why nao wei for klin hem best samting for duim?

 ²⁶ For gohed kasem gud samting from love bilong God, iumi mas gohed for klin long evri samting. Maet hem no isi for lusim and gohed stap klia long samting wea savve spoelem body, bat iumi fit for duim datwan. * Hem nomoa best samting for duim, bikos Jehovah lanem iumi evritaem for kasem gud samting. (Readim Isaiah 48:17.) Barava important samting nao, taem iumi klin iumi hapi bikos datwan mekhae long God and iumi gohed kasem gud samting from love bilong hem.