1-3. (a) Dahme kahrehda nohno men kin tehk ma mwomwen nah pwutako kin mwakelekel oh soandi mwahu? (b) Dahme kahrehda Siohwa kupwurki sapwellime tohnkaudok kan en kin mwakelekel? Dahme kin kamwakid kitail en kin mwakelekel?

NOHNO men kin kaunopada nah pwutako pwehn kohla wasakis. E kin tehk pwe pwutako en duhduhla oh eh likou kan en mwakelekel oh soandi mwahu. E ese me mwakelekel en paliwar kin kesempwal ong ahn serio roson mwahu. E pil kin ese me mwomwen nah pwutako pahn kasalehda mwomwen eh pahpa oh nohno.

² Siohwa, Samatail nanleng kin kupwurki sapwellime ladu kan en mwakelekel. Sapwellime Mahsen mahsanih:  “Komw kin kupwur mwakelekel ong irail kan me kin mwakelekel.” * (Melkahka 18:26) Siohwa ketin poakohng kitail oh mwahngih me atail kin mwakelekel kin wia mehkot mwahu ong kitail. E pil kupwurki kitail, sapwellime Sounkadehde kan, en wahdo kaping ong ih. Ma mwomwatail oh atail wiewia kin mwakelekel, met sohte pahn kasaminehla Siohwa oh mware sarawio, ahpw e pahn kawauwih ih oh mwareo.​—Esekiel 36:22; wadek 1 Piter 2:12.

³ Atail kin ese me Koht ketin poakohng aramas mwakelekel kan kin kamwakid kitail en kin mwakelekel. Kitail men atail mour en kawauwih ih pwehki kitail poakohng ih. Kitail pil men dadaurete ni sapwellime limpoak. Eri kitail en tehk dahme kahrehda kitail anahne kolokol atail mwakelekel, ia wehwehn en mwakelekel, oh ia duwen atail kak kolokol atail mwakelekel. Met pahn sewese kitail en kilang ma mie wasa kan rehtail me kitail anahne kamwahwihala.

4, 5. (a) Ia kahrepe keieu kesempwal kitail en kin mwakelekel? (b) Ia duwen sapwellimen Siohwa mwakelekel eh kin sansalda nan sapwellime kapikipik kan?

⁴ Siohwa kin ketin kaweid kitail sang ni eh ketikihda mehn kahlemeng mwahu ong kitail. Kahrehda sapwellime Mahsen kin kangoange kitail en “kahlemengih ih.” (Episos 5:1) Kahrepe keieu kesempwal kitail en kin mwakelekel iei pwehki Siohwa Koht me kitail kin kaudokiong kin sarawi ni soahng koaros.​—Wadek Lipai 11:44, 45.

 ⁵ Duwehte sapwellimen Siohwa irair teikan, sapwellime irair en mwakelekel kin sansalda nan sapwellime kapikipik kan. (Rom 1:20) Sampah kapikipikda pwehn wia wasahn kousoan mwakelekel ehu ong aramas. Siohwa ketin koasoanehdi koasoandi kan me kak kamwakele ahng oh pihl. Ekei kisin mwahs kan kin doadoahk pwehn kamwakelehda soahng kan. Irail me kin semen nan palien sains kin doadoahngki ekei mwahs pwukat pwehn kamwakelehda wasa kan me aramas kin kasaminehla. E sansal me mwakelekel kin kesempwal ong Koht me ‘ketin wiahda sampah.’ (Seremaia 10:12) Kitail pil anahne kesempwalki mwakelekel.

6, 7. Ia duwen Kosonned en Moses eh kasalehda me tohnkaudok en Siohwa kan anahne en kin mwakelekel?

⁶ Pil ehu kahrepe kitail anahne kolokol atail mwakelekel iei pwehki Siohwa, Kaunepen lahng oh sampah, kin kupwurki sapwellime tohnkaudok kan en kin mwakelekel. Nan kosonned me Siohwa ketikihong mehn Israel kan, mwakelekel kin inenen kesempwal nan arail kaudok. Kosonnedo koasoanehdi me ni Rahnen Tomw, samworo lapalap men anahne duhdu pak riau. (Lipai 16:4, 23, 24) Samworo kan anahne omwiomw oh widen nehrail mwohn re pahn wia meirong ong Siohwa. (Eksodus 30:17-21; 2 Kronikel 4:6) Kosonnedo kasalehda kahrepe 70 samwa me kin kahrehiong emen en saminla ni paliwar oh ong kaudok. Ma emen mehn Israel kin samin, e sohte kak iang pidada pwukoahn kaudok. Ma e kauwehla kosonned wet, e pahn kakete kamakamala. (Lipai 15:31) Ma emen sohte pahn kapwaiada koasoandi en kamwakelda me iangahki en duhdu oh lopworada eh likou, “e solahr pahn wia kisehn sapwellimen Koht aramas akan” me wehwehki e pahn kamakamala.​—Nempe 19:17-20.

 ⁷ Mendahki kitail sohte kin mi pahn Kosonned en Moses, e kin sewese kitail en wehwehki sapwellimen Koht madamadau. Kosonnedo kasalehda ni sansal me tohnkaudok en Koht akan anahne en kin mwakelekel. Siohwa sohte ketin wekila. (Malakai 3:6) Koht sohte pahn kupwurki atail kaudok ma e sohte pahn “pwung [“mwakelekel,” NW] oh unsek.” (Seims 1:27) Ihme kahrehda kitail anahne ese dahme e kupwurki me pid duwen mwakelekel.

8. Ni ire dah kan Siohwa kupwurki kitail en kin mwakelekel?

⁸ Nan Paipel, en mwakelekel kin wehwehki laud sang mwakelekel en paliwar. En mwakelekel mwohn silangin Koht kin pidada soahng koaros nan atail mour. Siohwa kupwurki kitail en kin mwakelekel ni ire pahieu, iei atail kaudok, tiahk, madamadau, oh paliwar. Kitail pahn tehkpene dahme ehuehu ire pwukat kin pidada.

9, 10. Ia wehwehn en kolokol kaudok min? Dahme Kristian mehlel kan kin liksang?

⁹ Kaudok min. Kaudok min wehwehki en dehr kapatapene kaudok mehlel oh kaudok likamw. Ahnsou me mehn Israel kan mweselsang nan Papilon pwehn pwuralahng Serusalem, irail anahne kapwaiada kaweid wet: “Kumwail dehpa sair mehkot me keinepwi; kumwail pein kamwakeleikumwailda oh mweselsang nan kahnimwet.” (Aiseia 52:11) Mehn Israel kan pwurala pwehn onehda sapahl arail kaudok ong Siohwa. Kaudok wet anahne mwakelekel oh dehr saminkihla padahk kan, wiewia kan oh tiahk kan en pelien lamalam en Papilon me kin kasohwauwi Koht.

¹⁰ Rahnwet, nin duwen Kristian mehlel kan, kitail  anahne kanahieng en dehr saminkihla kaudok likamw. (Wadek 1 Korint 10:21.) Kitail uhdahn anahne kanahieng pwehki kaudok likamw kin mihla wasa koaros. Nan sahpw tohto, soangsoangen tiahk kan oh wiewia kan kin pidada padahk en kaudok likamw kan me duwehte madamadau me dene mie mehkot me kin momour mwurin paliwar mehla. (Eklesiasdes 9:5, 6, 10) Kristian mehlel kan kin liksang tiahk kan me pidada padahk en kaudok likamw kan. * Kitail sohte pahn mweidohng kasongosong kan sang meteikan en kauwehla koasoandi kan en Paipel me pid kaudok min.​—Wiewia 5:29.

11. Dahme tiahk mwakelekel kin pidada? Dahme kahrehda e kesempwal atail tiahk en kin mwakelekel?

¹¹ Tiahk mwakelekel. En kolokol tiahk mwakelekel kin pidada en liksang tiahk samin koaros me pid wia nsenen pwopwoud. (Wadek Episos 5:5.) E kesempwal atail tiahk en kin mwakelekel. Nin duwen irelaud en mwuhr eh kasalehda, kitail anahne kadohwaneweisang kitail tiahk samin me pid wia nsenen pwopwoud pwehn dadaurete ni limpoak en Koht. Irail kan me kin wia tiahk samin me pid wia nsenen pwopwoud oh sohte koluhla “sohte pahn iang sohsohki Wehin Koht.” (1 Korint 6:9, 10, 18) Mwohn silangin Koht, irail pwukat kin wia “me loallap akan.” Ma irail sohte kin kolokol tiahk mwakelekel, “dewen irail pwukat . . . iei keriaun mehla.”​—Kaudiahl 21:8.

12, 13. Ia duwen atail madamadau eh kin kamwakid atail wiewia kan? Ia duwen atail kak kolokol madamadau mwakelekel?

¹² Madamadau mwakelekel. Atail madamadau kin kamwakid atail wiewia kan. Ma kitail pahn mweidohng mehkot suwed en tengala nan atail madamadau oh  mohngiong, met pahn kahrehiong kitail en wia tiahk samin. (Madiu 5:28; 15:18-20) Ahpw ma kitail pahn audehkihda atail madamadau mehkan me min oh mwakelekel, e pahn kamwakid kitail en kolokol tiahk mwakelekel. (Wadek Pilipai 4:8.) Ia duwen atail kak kolokol madamadau mwakelekel? Keieu kitail anahne liksang mehn kamweit kan me kak kasaminehla atail madamadau. * Patehng met, kitail kak audehkihda atail madamadau mehkan me mwakelekel sang ni atail kin kaukaule onopki Mahsen en Koht.​—Melkahka 19:8, 9.

¹³ Pwehn dadaurete ni limpoak en Koht, e uhdahn kesempwal kitail en kolokol kaudok min, tiahk mwakelekel oh madamadau mwakelekel. Ekei irelaud teikan  nan pwuhk wet kin koasoia ire pwukat. Ahpw ni ahnsou wet, kitail pahn tehk duwen mwakelekel en paliwar.

14. Dahme kahrehda mwakelekel ni paliwar kin pidada meteikan?

¹⁴ En kin mwakelekel ni paliwar kin pidada paliwaratail oh atail wasahn kousoan. Ia duwe, atail kin mwakelekel sohte kin pidada meteikan? Tohnkaudok kan en Siohwa kin nsenohki meteikan me pid ire wet. Nin duwen atail tehkpeneier, Siohwa kin ketin kesempwalki atail kin mwakelekel pwehki kaidehn ongete kamwahupatail ahpw met kin kawauwih ih. Tamanda karasaras ehu me kohda ni tepin irelaud wet. Ma ke kin kilang seri men me kin ahnsou koaros samin oh sohte soandi mwahu, ele ke pahn medewe ihs eh pahpa oh nohno, kaidehn? Kitail sohte men mwomwatail oh mwomwen atail mour en kasohwauwi Samatail nanleng de kahrehiong aramas akan en kahng rong rohng me kitail kin kalohki. Mahsen en Koht mahsanih: “Se sohte men aramas emen en kahdsuwedih at kohwa doadoahk, ihme se sohte kin men kedirapwahki emen. Eri, se kin kasalehda ni mehkoaros me se kin wia, me kiht ladun Koht kei.” (2 Korint 6:3, 4) Eri, ia duwen atail kak kolokol atail mwakelekel ni paliwar?

15, 16. Soahng dah kan me kitail anahne wia pwe en mwakelekel ni paliwar? Dahme kesempwal duwen atail likou kan?

¹⁵ Mwakelekel en paliwaratail oh mwomwatail. Mendahki mwomwen atail tiahk oh irair en mour kin wekpeseng nan ehuehu sahpw, pali laud en ahnsou kitail kak diarada sohpw oh pihl pwe kitail oh neitail seri kan en kin duhdu oh mwakelekel. Met kin iangahki omwiomwki sohpw oh pihl mwohn mwenge  de wia mwenge, mwurin doadoahngki imwen kainen de duhpada seri oh wilianda ahn seri daiper. Omwiomwki sohpw oh pihl kak irehdi soumwahu kan oh doarehla atail mour. E kak irehdi doupeseng en mwahs akan oh sewese aramas en dehr soumwahukihda mehn tang. Nan wasa kan me sohte mie paip en imwen kainen kan, e pil mwahu en sarepedi kainen mwenge me duwehte mehn Israel kan kin wia mahs.​—Deuderonomi 23:12, 13.

¹⁶ Kitail pil anahne kaukaule lopworada atail likou kan pwehn mwakelekel oh mwomw mwahu. Ahn Kristian likou kan sohte anahne pweilaud de keieu kapw, ahpw e anahne soandi mwahu, mwakelekel, oh konehng. (Wadek 1 Timoty 2:9, 10.) Sohte lipilipil ia wasa kitail kin mihmi ie, kitail men mwomwatail en kamwakid aramas akan en “kapingahki atail padahk duwen Koht, atail Sounkomour.”​—Taitus 2:10.

17. Dahme kahrehda atail wasahn kousoan oh dipwisou kan anahne mwakelekel oh soandi mwahu?

¹⁷ Atail wasahn kousoan oh dipwisou kan. Mwein imwatail sohte nohn kaselel, ahpw kitail anahne wia uwen atail kak pwehn mwakelekel oh mwohmw mwahu. Oh pil ma kitail kin doadoahngki waratail sidohsa ong mihting kan oh kalohk, kitail kak wia uwen atail kak pwehn kamwakelehda loale oh liki. Kitail en dehr manokehla me wasahn kousoan oh dipwisou mwakelekel kin wia kadehde ehu duwen atail Koht. Ni mehlel kitail kin padahkihong aramas akan me Siohwa iei Koht sarawi oh mwakelekel, oh e pahn ketin “kauwehla irail kan me kin kauwehla sampah,” oh sapwellime Wehi pahn kahrehiong sampah en wiahla paradais ehu. (Kaudiahl 11:18; Luk 23:43) Eri kitail men mwomwen imwatail oh atail dipwisou kan en kasalehiong  meteikan me kitail kin nantihong wia aramas mwakelekel kei me pahn warohng mi nan sampah kapw.

18. Ia duwen atail kak kasalehda atail wauneki Wasahn Kaudok?

¹⁸ Atail wasahn kaudok. Atail limpoak ong Siohwa kin kamwakid kitail en wauneki atail Wasahn Kaudok, wasa me kitail kin kaudokiong Koht. Ahnsou me irail me kapw kan pahn kohdo nan atail Wasahn Kaudok, kitail men irail en perenki atail wasahn mihting. Kitail anahne kaukaule kamwakele oh apwalih atail Wasahn Kaudok pwehn mwomw mwahu ahnsou koaros. Kitail kin kasalehda atail wauneki Wasahn Kaudok sang ni atail kin wia uwen atail kak en apwalih mwahu. E wia pwais kaselel ehu en toukihda atail ahnsou en kamwakele oh “apwalih ong ni onohnsapahl en” atail wasahn kaudok. (2 Kronikel 34:10) Met pil duwehte ni ahnsou me kitail kin kohpene ni Wasahn Mihting Tohrohr kan de ehu wasa tohrohr me kitail kin doadoahngki ong mihting tohrohr kan.

19. Pwe kitail en mwakelekel ni paliwar, dahme kitail anahne liksang? Ia duwen Paipel eh kin sewese kitail en wia met?

¹⁹ Pwe kitail en mwakelekel ni paliwar, kitail anahne liksang wiewia samin kan me duwehte simoak, kamamsakau, oh doadoahngki mehn kasahliel kan. Paipel sohte kin oaritikiada wiewia samin kan koaros me aramas kin wia rahnwet. Ahpw e kin kasalehda kaweid oh ire mehlel kan me kak sewese kitail en wehwehki ia sapwellimen Siohwa pepehm ong soahng pwukat. Pwehki kitail wehwehki sapwellimen Siohwa madamadau ong soahng pwukat, atail limpoak ong ih kin kamwakid kitail en idawehn ahl me pahn kahrehiong ih en kupwurki kitail. Kitail pahn tehkpene kaweid oh ire mehlel en Paipel limau.

20, 21. Soangen wiewia dah kan me Siohwa kupwurki kitail en liksang? Kahrepe kehlail dahieu kin kamwakid kitail en kapwaiada met?

 ²⁰ “Kompoakepahi ko, inou pwukat koaros wiawihong kitail. Eri, kitail kamwakeleikitailsang mehkoaros me kin kasaminehla paliwar oh [“elen madamadau,” NW] oh kitail song en sarawihla unsek, ni atail pahn kin momour nan atail lemmwiki kupwur en Koht.” (2 Korint 7:1) Siohwa kupwurki kitail en liksang wiewia kan me kak kasaminehla paliwaratail oh elen atail madamadau. Ihme kahrehda kitail anahne liksang wiewia kan me kin keper ong roson en paliwar oh madamadau.

²¹ Paipel kihong kitail kahrepe kehlail kitail en “kamwakeleikitailsang mehkoaros me kin kasaminehla” kitail. Tehk me 2 Korint 7:1 tepikihda mahsen pwukat: “Inou pwukat koaros wiawihong kitail.” Mehnia inou pwukat me e koasoia wasaht? Nan iretikitik kan en mwowe, Siohwa ketin inoukihda: “I ahpw pahn apwalih kumwail. I pahn wiahla Samamwail.” (2 Korint 6:17, 18) Nna medewehla: Siohwa ketin inoukihong uhk me e pahn ketin apwalih oh pere iuk oh poakohng uhk duwehte pahpa men me kin poakohng nah pwukat de serepein men. Ahpw Siohwa pahn ketin kapwaiada inou pwukat ma ke pahn liksang soahng koaros me kak kasaminehla paliweromw oh omw madamadau. Ia uwen soaloalokong en mweidohng wiewia samin kan en kauwehla omw nanpwungmwahu kesempwal rehn Siohwa!

22-25. Mehnia kaweid oh ire mehlel kan en Paipel kak sewese kitail en liksang tiahk oh wiewia samin kan?

²² “Ke pahn poakohng Kaun-o omw Koht sang nan kapehdomw unsek, sang ni [“omw mour unsek,” NW] sang ni omw lamalam koaros unsek.” (Madiu 22:37) Sises ketin pilada me kosonned wet me keieu kesempwal. (Madiu 22:38) Siohwa ketin warohng soangen  limpoak wet sang rehtail. Pwe kitail en poakohng ih sang nan atail mohngiong unsek, atail mour unsek, oh atail lamalam unsek, kitail anahne liksang wiewia kan me kak kamwotehla atail mour de kauwehla koahiek en madamadau me Koht ketikihong kitail.

²³ “[Siohwa] ketikihong mour oh esingek oh soahng teikan ong aramas akan koaros.” (Wiewia 17:24, 25) Mour iei kisakis ehu sang rehn Koht. Kitail poakohng Ih, kahrehda kitail men kasalehda atail wauneki kisakis wet. Kitail kin liksang tiahk kan oh wiewia kan me kak keper ong atail roson pwehki kitail ese me soangen wiewia pwukat kin kasalehda atail mwamwahliki kisakis en mour.​—Melkahka 36:9.

²⁴ “Ke pahn poakohng mehn mpomw duwen omw kin poakohng pein uhk.” (Madiu 22:39) Tiahk samin kan oh wiewia samin kan kin suwed kaidehn ongete me kin wia wiewia pwukat ahpw pil kin suwed ong meteikan. Karasepe, irail kan me sohte kin simoak kak esingengki ediniei sang irail kan me kin simoak oh met inenen keper. Emen me kin wia soahng kan me keper ong meteikan kin kauwehla sapwellimen Koht kehkehlik en poakohng mehn mpatail. Mendahki ma e kin nda me e kin poakohng Koht, eh wiewia kan kin kasalehda me met sohte mehlel.​—1 Sohn 4:20, 21.

²⁵ “Dukiong kaun akan oh soumas akan.” (Taitus 3:1) Nan sahpw tohto, en kolokol oh doadoahngki ekei mehn kasahliel kan kin uhwong kosonned. Nin duwen Kristian mehlel kan, kitail sohte kin wia met.​—Rom 13:1.

26. (a) Pwe kitail en dadaurete ni limpoak en Koht, dahme kitail anahne wia? (b) Dahme kahrehda en kin mwakelekel mwohn silangin Koht kin wia elen mour me keieu mwahu?

²⁶ Pwe kitail en dadaurete ni limpoak en Koht, kitail  anahne en kin mwakelekel ni soahng koaros, kaidehn ni ekeite irair kan. Mwein en kesehla oh liksang tiahk oh wiewia samin kan sohte pahn mengei, ahpw kitail kak pweida. * Met wia elen mour me keieu mwahu pwehki ahnsou koaros, Siohwa kin ketin padahkihong kitail en wia soahng kan me pahn wia kamwahupatail. (Wadek Aiseia 48:17.) Me keieu kesempwal, sang ni atail kin kolokol atail mwakelekel, kitail kak ahneki nsenamwahu ni atail kin ese me kitail kin kawauwih Koht me kitail kin poakohng oh dadaurete ni sapwellime limpoak.