1—3. а) Немишкә ана балисиниң таза вә сәрәмҗан кийингәнлигини тәкшүрәйду? ә) Немишкә Йәһва өз хизмәтчилириниң таза болушини халайду һәм таза болушқа бизни немә дәвәт қилиду?

АНА оғлини талаға чиқириштин бурун униң пакиз жуюнғанлиғини, таза һәм сәрәмҗан кийингәнлигини қарап чиқиду. Чүнки у балисиниң таза жүргәнлиги саламәтлиги үчүн муһим екәнлигини, шундақла балиниң ташқи көрүнүши униң ата-анисиниң аброй-инавитигә тәсир қилидиғанлиғини чүшиниду.

² Бизниң асмандики Атимиз Йәһва өз хизмәтчилириниң таза болушини халайду. Униң Сөзидә: «Сап диллиқларға Өзәңни сап диллиқ көрситисән»,— дейилгән * (Зәбур 18:26). Йәһва Худа бизни яхши көриду һәм таза болушимиз  биз үчүн интайин пайдилиқ екәнлигини билиду. Шундақла башқилар Униң гувачилириға қарап Униң һәққидә яхши пикирдә болушини халайду. Дәрһәқиқәт, сәрәмҗан ташқи көрүнүшимиз һәм яхши жүрүш-турушимиз Йәһвани вә униң муқәддәс исмини шәрмәндә қилмастин, униңға шан-шәрәп кәлтүриду (Әзәкиял 36:22; Петрусниң 1-хети 2:12ни оқуң).

³ Худаниң таза жүридиғанларни яхши көридиғанлиғини билиш бизни таза болушқа дәвәт қилиду. Пәрвәрдигар Йәһвани яхши көргәчкә, уни һаят тәрзимиз билән мәдһийиләшни халаймиз. Шундақла Униң меһир-муһәббитидин айрилишни халимаймиз. Шундақ болса, қайси тәрәптин яхшилиниш керәклигимизни көрүшкә ярдәм беридиған соалларни қараштуруп көрәйли: Немишкә өзүмизни пак тутушимиз керәк? Пак болуш дегән немә? Қандақ қилип таза болалаймиз?

4, 5. а) Тазилиқни сақлашниң асасий сәвәви немидә? ә) Йәһва Худаниң тазилиқни яхши көридиғанлиғи униң мәвҗудатлиридин қандақ көрүниду?

⁴ Йәһва Худа бизгә һәммә җәһәттин үлгә көрситиду. Униң Сөзидә: «Рәббиңларға тәқлит қилиңлар» дәп ейтилған (Әфәсликләргә 5:1). Пак болушимизниң асасий сәвәви — биз ибадәт қилидиған Йәһва Худа барлиқ тәрәптин пак вә муқәддәс (Лавийлар 11:44, 45ни оқуң).

⁵ Йәһва Худаниң мәвҗудатлиридин униң тазилиққа болған муһәббити һәм көплигән хисләтлири билән ишлири көрүнүп туриду (Римлиқларға 1:20). Мәсилән, Йәһва йәрни адәмләр үчүн өз-өзини тазартилайдиған макан сүпитидә яратти. У һава билән суни тазартидиған тәбийәт дәврилирини орнатти. Бәзи бактерияләр қалдуқларни бехәтәр маддиларға айландуруп, санитарлар ролини атқуриду. Алимлар адәмләрниң шәхсийәтчилиги вә ачкөзлүги сәвәвидин пәйда болған нефть дағлири вә башқиму булғунушларни тазилаш үчүн мошу тоймиғур бактерияләрниң бәзибир түрлирини пайдилиниду. Көрүп туримизки, «Аләмни бәрпа қилған» Худа үчүн тазилиқ интайин муһим (Йәрәмия  10:12). Бизниңму тазилиққа болған көзқаришимиз мошундақ болуши керәк.

6, 7. Тәвратта Худаға ибадәт қилидиғанларниң таза болуши керәклиги тоғрилиқ немә йезилған?

⁶ Тазилиқни сақлишимиз керәклигиниң йәнә бир сәвәви — бу Аләмниң һөкүмрани Йәһваниң тәливи. Йәһваниң исраиллиқларға бәргән қануниға бенаән, тазилиқ билән ибадәт чәмбәрчас бағлиқ болған. Қанунда баш роһанийниң паклинидиған күндә бир әмәс, икки қетим жуюнуши керәклиги алаһидә ейтилғанди (Лавийлар 16:4, 23, 24). Вәзипилирини орунлайдиған роһанийлардин қурбанлиқ әкелиштин авал пут-қоллирини жуюш тәләп қилинатти (Чиқиш 30:17—21; Тарихнамә 2-язма 4:6). Тәвратта адәмниң мәрасмий яки удул мәнада напак болуп қелишиниң тәхминән 70 сәвәви кәлтүрүлгән. Напак болған кишигә ибадәткә қатнишиш мәнъий қилинған, бу тәләпни орунлимиған адәм һәтта өлүм җазасиға һөкүм қилинатти (Лавийлар 15:31). Паклиниш рәсмигә, шу җүмлидин, өз тенини вә кийим-кечәклирини жуюшқа бепәрва қариған һәрбир «киши җамаәттин кесилиши», йәни өлтүрүлүши керәк еди (Санлар 19:17—20).

⁷ Гәрчә биз Муса қануниға бенаән яшимисақму, у бизгә Худаниң һәр түрлүк мәсилиләргә тегишлик көзқаришини билишкә ярдәм бериду. Байқиғинимиздәк, Тәвратта Худаға ибадәт қилидиғанларниң таза болуши тәләп қилинатти. Йәһва Худа өзгәрмиди (Малаки 3:6). Худа ибадитимизни пәқәт «таза һәм булғанмиған» чағдила қобул қилиду (Яқуп 1:27). Шу сәвәптин, Худа биздин немини күтидиғанлиғини билишимиз һаҗәт.

8. Йәһва Худа бизниң қайси җәһәттин пак болушимизни халайду?

⁸ Муқәддәс китаптики паклиқ пәқәт җисманий тазилиқнила билдүрмәйду. Худаниң нәзәридә пак болуш үчүн, һаятимизниң барлиқ саһалирида пак болушимиз керәк. Йәһва Худа бизниң роһий, әхлақий, җисманий вә ой-пикир паклиғини сақлишимизни халайду. Тазилиқ түрлириниң һәрбирини айрим қарап чиқайли.

9, 10. Роһий җәһәттин пак болуш немини билдүриду вә һәқиқий мәсиһийләр немидин нери туриду?

 ⁹ Роһий паклиқ. Аддий сөз билән ейтқанда, роһий паклиқ һәқиқий ибадәтни ялған дин билән арилаштурмаслиқни билдүриду. Исраиллиқлар Йерусалимға қайтиш үчүн Бабилдин чиқиватқанда, роһниң йетәкчилигидә берилгән мону сөзләргә қулақ селиши керәк еди: «Һеч напак нәрсигә тәгмәй шу йәрдин чиқип кетиңлар....Өзүңларни пак тутуңлар» (Йәшая 52:11). Исраиллиқларниң вәтинигә қайтишиниң асасий сәвәви — Йәһва Худаға болған ибадәтни әксигә кәлтүрүш. Уларниң ибадити пак, йәни Бабил дининиң Худаниң исмиға дағ кәлтүридиған тәлимлири, иш-һәрикәтлири яки урп-адәтлири билән булғанмиған болуши керәк еди.

¹⁰ Бүгүнму биз һәқиқий мәсиһийләр сүпитидә өзүмизни сахта ибадәт билән булғавелиштин авайлишимиз лазим (Коринтлиқларға 1-хәт 10:21ни оқуң). Бу мәсилидә наһайити пәхәс болушимиз керәк, чүнки сахта динниң тәсири һәммә йәрдә байқалмақта. Көп мәмликәтләрдики һәрхил әнъәниләр, урп-адәтләр вә қаидә-йосунлар сахта диний тәлиматлар билән бағлиқ. Уларниң бири — адәм өлгәндин кейин, униң роһи яшашни давамлаштуридиғанлиғи һәққидики тәлим (Вәз 9:5, 6, 10). Һәқиқий мәсиһийләр сахта динға бағлиқ урп-адәтләрдин нери туриду *. Әтрапимиздикиләрниң бесимиға берилип, Муқәддәс китаптики паклиққа тегишлик тәләпләрни бузмаймиз (Әлчиләр 5:29).

11. Әхлақий җәһәттин таза болуш дегән немә вә немишкә бу биз үчүн муһим?

¹¹ Әхлақий паклиқ. Әхлақий җәһәттин пак болуш җинсий әхлақсизлиқниң һәрқандақ түридин нери турушни билдүриду (Әфәсликләргә 5:5ни оқуң). Әхлақий җәһәттин пак болуш биз үчүн наһайити муһим. Келәрки баптин көридиғинимиздәк, Худаниң меһир-муһәббитидин айрилмаслиғимиз үчүн җинсий әхлақсизлиқтин қечишимиз керәк. Товва қилмиған җинсий әхлақсизлиқ қилғучилар «Худаниң Падишалиғиға мираслиқ қилмайду» (Коринтлиқларға 1-хәт  6:9, 10, 18). Худаниң көзқариши бойичә, мундақ адәмләр «напаклиғида жиркиничликләр» қатариға кириду. Әхлақий җәһәттин пак болмиса, уларниң җазаси — «иккинчи өлүм» (Вәһий 21:8).

12, 13. Ой-пикирләр билән иш-һәрикәтләрниң қандақ бағлиниши бар вә ой-пикирлиримизниң паклиғини қандақ сақлалаймиз?

¹² Ой-пикир паклиғи. Һәрқандақ иш-һәрикәт ой-пикирдин чиқиду. Әгәр ой-пикирлиримиз билән қәлбимиздә яман ойларниң йилтиз тартишиға йол қойсақ, нәтиҗидә напак ишларни қилишимиз мүмкин (Мәтта 5:28; 15:18—20). Бирақ әқлимизни таза ой-пикирләр билән толдурсақ, бизгә әхлақий ишларни қилиш асан болиду (Филипиликләргә 4:8ни оқуң). Ой-пикир тазилиғини қандақ сақлалаймиз? Биринчидин, ойлиримизни булғайдиған оюн-тамашилардин нери турушимиз керәк *. Иккинчидин, Худа Сөзини дайим тәтқиқ қилиш арқилиқ әқлимизни таза ой-пикирләр билән толдуралаймиз (Зәбур 19:8, 9).

¹³ Худаниң меһир-муһәббитидә қелишимиз үчүн роһий, әхлақий вә ой-пикир паклиғини сақлаш муһим. Тазилиқниң бу түрлири мошу китапниң башқа баплирида тәпсилий қараштурулиду. Әнди тазилиқниң төртинчи түри — җисманий тазилиқни қараштурайли.

14. Немишкә җисманий тазилиқ — һәрбир адәмниң шәхсий иши әмәс?

¹⁴ Җисманий тазилиққа өзүмизни вә өйүмизни таза тутуш кириду. Тазилиқ һәркимниң шәхсий иши болуп, униңға һечким арилишалмамду? Йәһваниң хизмәтчилири ундақ дәп һесаплимайду. Атап өткүнимиздәк, бизниң җисманий тазилиғимиз Йәһва Худа үчүн муһим: таза болғанлиғимиз өзүмизгә пайдилиқ болуп, шундақла униңға шан-шәрәп кәлтүриду. Бапниң бешида кәлтүрүлгән мисални есиңизға елиң. Кийим-кечәклири паскина балини көргәндә, униң ата-аниси тоғрисида сәлбий пикирдә болисиз, шундақ  әмәсму? Өзүмизниң ташқи көрүнүшимиз вә һаят тәрзимиз билән асмандики Атимизни шәрмәндә қилишни яки адәмләрниң ойини биз вәз қиливатқан хуш хәвәрдин бөлүшини халимаймиз. Худаниң Сөзидә: «Һечнәрсидә путликашаңға сәвәп қоймаймиз, әксичә барлиқ җәһәттин өзүмизни Худаниң хизмәтчилиридәк тәвсийә қилимиз» дәп ейтилиду (Коринтлиқларға 2-хәт 6:3, 4). Җисманий тазилиқни қандақ сақлалаймиз?

15, 16. Шәхсий гигиенаға немә кириду вә бизниң кийимимиз қандақ болуши керәк?

¹⁵ Шәхсий гигиена вә ташқи көрүнүш. Гәрчә һәрбир дөләтниң өз мәдәнийити вә турмуш шараитлири болсиму, көпинчә вақитта балилиримиз вә өзүмиз дайим жуюнуп, пакиз жүрүш үчүн су вә совун тепилиду. Тамақ тәйярлаштин вә ғизалиништин авал қолумизни совун билән пакиз жуюшни адәт қилиш яхши. Шундақла һаҗәтханидин кейин вә балиниң йөгәклирини йөткәп, уни жуюп болғандин кейинму  қоллиримизни совун билән пакиз жуюшимиз керәк. Қоллиримизни совун билән жуюш бизни һәрхил ағриқлардин, һәтта өлүмдин сақлап қелиши мүмкин. Мошу адәткә бола хәтәрлик вируслар билән бактерияләрниң тарқилишини тохтитип, ич сүрүш кесилини пәйда қилидиған ағриқлардин сақлинимиз. Өйлиридә канализация болмиған мәмликәтләрдә тәрәтни қедимий Исраилдикидәк көмүветишкә болиду (Қанун шәрһи 23:12, 13).

¹⁶ Шундақла пакиз вә чирайлиқ кийинип жүрүш үчүн кийим-кечәклиримизни турақлиқ жуюп турушимиз керәк. Мәсиһийниң кийим-кечәклириниң қиммәтбаһа вә ахирқи модиға мас болуши шәрт әмәс, лекин пакиз, сәрәмҗан вә аддий болуши керәк (Тимотийға 1-хәт 2:9, 10ни оқуң). Қәйәрдила болмайли, биз өзүмизниң ташқи көрүнүшимиз билән «Қутқазғучимиз Худаниң тәлиматини һәммә тәрәптин» зенәтләшни халаймиз (Титқа 2:10).

17. Немишкә өйүмиз вә һойлимиз таза вә көркәмлик болуши керәк?

¹⁷ Өй вә һойла. Өйүмизниң бәк чирайлиқ вә һәшәмәтлик болуши шәрт әмәс, амма у мүмкинқәдәр таза вә көркәмлик болуши лазим. Шундақла җамаәт учришишлириға вә вәзилик хизмәткә машинида барсақ, қолумиздин келишичә униң ичи вә тешини таза тутушимиз керәк. Таза өй вә һойла яхши гувалиқ берәләйдиғанлиғини унтумайли. Биз адәмләргә пак Худа Йәһваниң «йәрни гумран қилғучиларни гумран қилидиғанлиғи» һәм йеқинда Униң Падишалиғи түпәйли йәр шари җәннәткә айлинидиғанлиғи һәққидә тәлим беримиз (Вәһий 11:18; Луқа 23:43). Әлвәттә, биз өйүмизни вә мүлкимизни һазирниң өзидә таза тутушни үгинип, йеңи дунияда өмүр сүрүшкә тәйярлиниватқанлиғимизни башқиларниң көргинини халаймиз.

18. Ибадәт өйигә һөрмәт билән қарайдиғанлиғимизни қандақ көрситәләймиз?

¹⁸ Учришишлар өтидиған җайлиримиз. Йәһваға болған меһир-муһәббитимиз һәқиқий ибадитимизниң мәркизи болған Ибадәт өйигә һөрмәт билән қарашқа дәвәт қилиду. Биз Ибадәт өйигә биринчи қетим кәлгән адәмләрниң яхши тәсират елишини халаймиз. У сәрәмҗан вә йеқимлиқ болуп  көрүниши үчүн уни дайим тазилап туруш вә күтүш һаҗәт. Буниң үчүн қолумиздин кәлгинини қилсақ, униңға һөрмәт билән қарайдиғанлиғимизни көрситимиз. Биз ибадәт орнини тазилашқа, җөндәп турушқа вә йеңилап турушқа вақит бөлүшни шан-шәрәп дәп һесаплаймиз (Тарихнамә 2-язма 34:10). Конгресс сарийи билән конгресс өтидиған башқа җайларниму шундақ тутушимиз керәк.

19. Пак болуш үчүн немидин нери болушимиз керәк вә бу мәсилидә Муқәддәс китап бизгә қандақ ярдәм бериду?

¹⁹ Өзүмизни җисманий җәһәттин таза сақлишимиз үчүн биз тамака чекиш, һарақ-шарапқа берилип кетиш, хумарлиқни ойғитидиған яки аң-сезимға сәлбий тәсир қилидиған маддиларни тиббий әмәс мәхсәттә қоллиниш қатарлиқ напак қилидиған адәтләр вә ишлардин нери туримиз. Муқәддәс китапта бүгүнки күндә тарқалған барлиқ әхлақсиз вә жиркиничлик адәтләр вә ишлар йезилмиған, лекин униңда Йәһваниң мундақ нәрсиләргә нисбәтән көзқаришини билишкә ярдәмлишидиған принциплар бар. Йәһваға болған меһир-муһәббитимиз бизни уни хурсән қилидиған йол билән меңишқа дәвәт қилиду. Келиң, Муқәддәс китаптики бәш принципни қарап чиқайли.

20, 21. Йәһва Худа қандақ ишлардин нери турушимизни халайду вә биз қайси җиддий сәвәпни әстә сақлишимиз керәк?

²⁰ «Қәдирданлирим, мошундақ вәдиләргә егә болған екәнмиз, келиңлар, Худа қорқунучида муқәддәсликни мукәммәлләштүрүп, тән билән роһни булғайдиған һәммә нәрсидин өзүмизни тазилайли» (Коринтлиқларға 2-хәт 7:1). Йәһва Худа тенимизни напак қилип, роһумизға, йәни аң-сезимимизға, зиян кәлтүридиған ишларниң қули болуп қелишимизни халимайду. Шуңлашқа биз саламәтлигимиз вә аң-сезимимизгә һалакәтлик тәсир қилидиған адәтләрдин жирақ болушимиз керәк.

²¹ Муқәддәс китапта «булғайдиған һәммә нәрсидин» тазилиниш керәклигиниң җиддий сәвәви кәлтүрүлгән. Байқиған болсиңиз, жуқурида кәлтүрүлгән айәт «мошундақ  вәдиләргә егә болған екәнмиз» дегән сөзләрдин башлиниду. Бу айәттә қайси вәдиләр тоғрилиқ гәп болуватиду? Алдинқи айәтләрдә Йәһва Худаниң: «Мән силәрни қобул қилимән вә Мән силәргә Ата болимән» дегән вәдиси йезилған (Коринтлиқларға 2-хәт 6:17, 18). Тәсәввур қилип көрүң: Йәһва Худа сизни қоғдашқа, сизгә ғәмхорлуқ қилишқа вә өзиниң оғли яки қизини яхши көридиған атидәк яхши көрүшни вәдә қилиду. Лекин У өз вәдисини «тениңиз билән роһуңизни» напак қилидиған нәрсиләрдин нери турсиңизла орунлайду. Жиркиничлик адәтләргә Йәһва Худа билән бебаһа зич мунасивәтлиримиздин айриветишигә йол бериш нәқәдәр әқилсиз!

22—25. Муқәддәс китаптики қайси принциплар напак адәтләр билән ишлардин нери болушқа ярдәм бериду?

²² «Йәһва Худани пүтүн жүригиң, пүтүн җениң һәм пүтүн әқлиң билән сөйгин» (Мәтта 22:37). Әйса Мәсиһ бу әмирниң әң муһим екәнлигини ейтқан (Мәтта 22:38). Йәһва Худа мошундақ меһир-муһәббәткә лайиқ. Биз Уни пүткүл жүригимиз билән, пүткүл җенимиз билән вә пүткүл әқлимиз билән яхши көримиз, шуңлашқа һаятимизни қисқартидиған яки Худа бәргән ойлаш қабилийитимизни аҗизлаштуридиған ишлардин жирақ болушимиз лазим.

²³ «[Йәһва] Өзи һәммигә һәм һаятлиқ, һәм нәпәс, һәм барлиқ нәрсини бәрмәктә» (Әлчиләр 17:24, 25). Һаят — Худаниң соғиси. Биз Һаят бәргүчини яхши көргәнликтин, Униң соғисиға һөрмәт билән қараймиз. Саламәтлигимизгә һалакәтлик тәсир қилидиған ишлардин вә адәтләрдин нери болимиз, чүнки мошундақ ишларни қилсақ, һаят соғисиға һөрмәтсизлик көрситидиғанлиғимизни чүшинимиз (Зәбур 36:9).

²⁴ «Өз йениңдики кишини өзәңдәк сөйгин» (Мәтта 22:39). Напак адәтләр вә ишлар пәқәт адәмниң өзигила әмәс, шундақла өп-чөридикиләргиму тәсир қилиду. Мәсилән, тамака чәккүчи йенидикиләрниң саламәтлигигә хәвп-хәтәр кәлтүриду. Башқиларға зиян йәткүзидиған киши Худаниң йеқиниңни сөй дегән әмрини орунлимайду. Униң «Худани сөйүмән» дегән барлиқ сөзлири сахта (Йоһанниң 1-хети 4:20, 21).

 ²⁵ «Һөкүмәткә бойсунуңлар вә һоқуқдарларниң гепигә кириңлар» (Титқа 3:1). Нурғун мәмликәтләрдә нәшиниң бәзи түрлирини сақлаш яки қобул қилиш қанунға хилап. Һәқиқий мәсиһийләр нәшини қанунсиз сақлимайду һәм қобул қилмайду (Римлиқларға 13:1).

26. а) Худаниң меһир-муһәббитидин айрилмаслиғимиз үчүн немә қилишимиз керәк? ә) Немишкә Худаниң алдида пак болуш — һаятниң әң яхши йоли?

²⁶ Худаниң меһир-муһәббитидин айрилмаслиғимиз үчүн биз һаятниң пәқәт бирнәччә саһасида әмәс, бәлки барлиқ саһалирида пак болушимиз керәк. Бәлким, напак қилидиған адәтләр билән ишлардин қутулуп, таза болуш асан әмәс, лекин бу қолумиздин келиду *. Дәрһәқиқәт, бу — әң яхши йол, сәвәви Пәрвәрдигар Йәһва бизни пәқәт пайдилиқ нәрсиләргә үгитиду (Йәшая 48:17ни оқуң). Әң муһими, паклиқни сақлишимиз арқилиқ сөйүмлүк Яратқучимизни мәдһийиләймиз вә өзүмизни Униң меһир-муһәббитидә сақлалаймиз.