1-3. (a) Diesorọ oni rẹ ọmọ ọvo vwo ru oma rẹ ọmọ rọyen fon? (b) Diesorọ Jihova vwọ guọnọ nẹ ihwo re ga dia fuanfon, die yen mu avwanre vwo ru oma rẹ avwanre fuanfon?

ONI rẹ ọmọ ọvo muegbe rẹ ọmọshare rọyen ro vwo kpo asan. Ọ nabọ họ, ji ru ewun rọyen fon. Ọ riẹnre nẹ ẹfuọn rẹ ugboma yovwin kẹ omakpokpọ rẹ ọmọ na. Oni na je mrẹvughe nẹ osẹnvwe rẹ ọmọ na che dje oka rẹ ohwo rẹ ọsẹ vẹ oni rọyen hepha.

² Jihova, Ọsẹ rẹ avwanre rọhẹ odjuvwu, guọnọre nẹ idibo rọyen dia fuanfon. Baibol na da ta: “Ohwo rọ fonro wọ me vwẹ ọfuanfon wẹn vwọ nẹ.” * (Une Rẹ Ejiro 18:26) Jihova  vwo ẹguọnọ rẹ avwanre, ọ riẹnre nẹ omaẹfuọn cha kẹ avwanre erere. Ọ je guọnọ nẹ avwanre kerẹ Iseri rọyen ru obo re cha nẹrhẹ ihwo efa muọghọ kẹ. Vwọrẹ uyota, omaẹfuọn vẹ omamọ uruemu avwanre cha nẹrhẹ ihwo jiri Jihova vẹ odẹ ọfuanfon rọyen.​—Izikiẹl 36:22; se 1 Pita 2:12.

³ Fikiridie avwanre riẹnre nẹ Ọghẹnẹ vwo ẹguọnọ rẹ ihwo re fonro na, ọnana sa nẹrhẹ avwanre dia ihwo re fonro. Avwanre guọnọre nẹ akpeyeren avwanre hwarhiẹ ọghọ rhe Ọghẹnẹ, kidie avwanre vwo ẹguọnọ rọyen. Avwanre je guọnọ sẹro rẹ oma rẹ avwanre vwevunrẹ ẹguọnọ rọyen. E jẹ a fuẹrẹn oboresorọ avwanre vwọ dia ihwo re fonro, oborẹ ẹfuọn churobọ si, kugbe oborẹ avwanre sa vwọ dia ihwo re fonro. Ẹfuẹrẹn fiotọ tiọyena sa chọn avwanre uko vwọ mrẹ ẹdia sansan ri fori nẹ avwanre de ru yovwinphiyọ.

4, 5. (a) Die yen iroro ọghanghanre ọvo rọ sorọ avwanre vwọ fon? (b) Idjerhe vọ yen emama rẹ Jihova vwo dje ẹfuọn rọyen phia?

⁴ Idjerhe ọvo rẹ Jihova vwo suẹn avwanre ọyehẹ womare udje rọyen. Baibol na tare nẹ avwanre “vwẹ ẹro kere Ọghẹnẹ.” (Ẹfesọs 5:1) Iroro ọghanghanre ọvo rọ sorọ avwanre vwọ dia ihwo re fonro kẹ ọna: Jihova Ọghẹnẹ rẹ avwanre ga na, ohwo rọ fonro vwẹ kidjerhe kidjerhe.​—Se Livitikọs 11:44, 45.

⁵ Kirobo ra mrẹ iruemu rẹ Jihova womarẹ emama rọyen ye, ọtiọyen ofuanfon rọyen je teyenphia vwẹ erọnvwọn rọ mare. (Rom 1:20) O ru akpọ na fuanfon vwọ kẹ ihworakpọ dia. Jihova ma erọnvwọn sansan phiyọ akpọ na ri ruẹ ame vẹ aphopho rẹ avwanre fuan. Erọnvwọn itete evo ri vwo arhọ herọ ri ruẹ otọ na fuan, ayen wene inuhun phiyọ erọnvwọn re cha sa so ọga kẹ avwanre-e. Vwẹ asan rẹ evwri de kuphiyotọ fikirẹ urhuru rẹ ihworakpọ, egbaerianriẹn reyọ erọnvwọn itete nana ri vwo arhọ na vwo ru asan tiọyena fon. Aphro herọ-ọ, ota rẹ ẹfuọn na pha ghanghanre kẹ Ohwo rọ “ma akpọ na.” (Jerimaya 10:12) Ọtiọyen ọ je dia kẹ avwanre.

6, 7. Idjerhe vọ yen Urhi rẹ Mosis vwọ kanrunumuo nẹ a guọnọ omaẹfuọn mie ihwo re ga Jihova?

 ⁶ Iroro ọfa rọ sorọ rẹ avwanre vwọ dia fuanfon ọyehẹ Jihova rọ dia Osun Rode rẹ avwanre na guọnọre nẹ ihwo re ga fon. Vwẹ Urhi rẹ Jihova vwọ kẹ ihwo rẹ Izrẹl, ẹfuọn vẹ ẹga churobọ si ohwohwo. Urhi na djerephia nẹ orherẹn rode na họ abọ ivẹ vwẹ Ẹdẹ rẹ Ọtanhirhe na. (Livitikọs 16:4, 23, 24) A guọnọre nẹ irherẹn na hworhẹ abọ vẹ awọ rayen tavwen ayen ki ze izobo vwọ kẹ Jihova. (Eyanno 30:17-21; 2 Ikun Rivie 4:6) Urhi na djunute erọnvwọn ri te omarẹ 70 re sa nẹrhẹ ayen dia ẹdia rẹ jẹfuọn, rọ je sa nẹrhẹ ẹga rayen dia ọ rẹ ẹgua. Ohwo rẹ Izrẹl da hẹ ẹdia rẹ jẹfuọn, o che se vwobọ vwẹ ẹga-a, ọ da davwọn, ọyena sa so ughwu rọyen. (Livitikọs 15:31) Ohwo ro nene ọrhuẹrẹphiyotọ rẹ ẹfuọn nana-a, “ke sionẹ uherevie rẹ ọghwẹgbe na.”​—Ukeri 19:17-20.

⁷ Dede nẹ avwanre hẹ otọ rẹ Urhi rẹ Mosis na-a, urhi na nẹrhẹ avwanre vwo oniso rẹ ẹro rẹ Ọghẹnẹ vwo ni uruemu re vwo ruẹ oma fuan. Urhi na nabọ kanrunumuo nẹ ẹfuọn ọyen obo ra guọnọ mie ihwo re ga Ọghẹnẹ. Jihova ji rhi wene-e. (Malakae 3:6) Ọghẹnẹ cha reyọ ẹga rẹ avwanre-e, jokpanẹ ọ ro “jẹ ẹgua evwo.” (Jems 1:27) Ọtiọyena, ofori nẹ avwanre riẹn obo rọ guọnọ mie avwanre vwẹ ẹdia nana.

8. Ẹdia sansan vọ yen Jihova da guọnọ nẹ avwanre dia ihwo re fonro?

⁸ Vwevunrẹ Baibol na, ẹfuọn vrẹ ra vwọ fon vwọrẹ ugboma. Ra vwọ fon vwẹ ẹro rẹ Ọghẹnẹ djobọte kẹdia kẹdia rẹ akpeyeren avwanre. Jihova guọnọre nẹ avwanre dia ihwo re fonro vwẹ ẹdia ẹne kiriguo; vwẹ ẹga, uruemu, iroro, kugbe ugboma rẹ avwanre. E jẹ avwanre roro kpahen oborẹ ọvuọvo rayen churobọ si.

9, 10. Die yen o mudiaphiyọ rẹ ẹga avwanre vwọ fon, die yen Inenikristi rẹ uyota kẹnoma kẹ?

⁹ Ẹga rọ fonro. Re vwo ru ẹga rẹ avwanre fon mudiaphiyọ  nẹ a kẹnoma kẹ ẹga rẹ efian. Ọke rẹ ihwo rẹ Izrẹl vwo nẹ Babilọn kpo Jerusalẹm, ayen ke kerhọ rẹ iji nana: “Yanran nẹ etiyin, wọ vwẹ obọ te emu ogbegbe-e! . . . Ru oma wẹn fon.” (Aizaya 52:11) Ihwo rẹ Izrẹl rhivwin kpo rere ayen sa vwẹ ẹga rẹ Jihova mu kirobo rọ hepha jovwo. Ẹga na kọ dia fuanfon, a guọnọre nẹ ayen vwẹ iyono, iruemu vẹ ẹga rẹ ihwo rẹ Babilọn vwọba ẹga rẹ Ọghẹnẹ-ẹ.

¹⁰ Nonẹna, o ji fo nẹ avwanre re dia Inenikristi rẹ uyota nomaso rere ẹga rẹ efian vwo jẹ ẹga rẹ avwanre emiovwo. (Se 1 Kọrẹnt 10:21.) Ofori nẹ avwanre nomaso vwẹ ẹdia nana mamọ, kiridie ona rẹ ẹga efian vwọ phiẹn ihwo vọn asan eje asaọkiephana. Vwẹ ẹkuotọ buebun, iruemu vẹ irueru rẹ ẹga sansan herọ ri churobọ si iyono rẹ ẹga efian, kerẹ udje, ayen tare nẹ siẹrẹ ohwo de ghwu nu, orọnvwọn ọvo hẹ evunrẹ ohwo na ro ghwẹ-ẹ. (Aghwoghwo 9:5, 6, 10) Inenikristi rẹ uyota kẹnoma kẹ irueru ri churobọ si esegbuyota rẹ ẹga rẹ efian. * Avwanre che ru obo re fẹnẹ uyono rẹ Baibol na kpahen ẹga rọ fonro fikirẹ okeke ro nẹ obo rẹ ihwo efa cha-a.​—Iruo Rẹ Iyinkọn Na 5:29.

11. Die yen uruemu rọ fonro churobọ si, diesorọ ọ vwọ dia obo re ghanre avwanre vwo vwo uruemu rọ fonro?

¹¹ Uruemu rọ fonro. Re vwo vwo uruemu rọ fonro churobọ si a vwọ kẹnoma kẹ ọfanrhiẹn ri koka koka. (Se Ẹfesọs 5:5.) Ọyen obo re ghanre a vwọ dia fuanfon vwẹ uruemu. Kirobo ra cha mrẹ vwẹ uyovwinrota rọ vwọ kpahen ọnana, ohwo sa vwọ dia vwevunrẹ ẹguọnọ rẹ Ọghẹnẹ, ko “si oma nẹ ọfanrhiẹ.” Ihwo re rhọnvwe kurhẹriẹ nẹ ọfanrhiẹ-ẹn cha sa “reuku rẹ Uvie rẹ Ọghẹnẹ na-a.” (1 Kọrẹnt 6:9, 10, 18) Vwẹ ẹro rẹ Ọghẹnẹ, ihwo ọtiọyena hẹ usun rẹ ihwo ri “gbe ẹgua.” Ayen rha rhọnvwe vwo uruemu rọ fonro-o, “ughwẹ rayen kẹ . . . ughwu rivẹ.”​—Ẹvwọphia 21:8.

12, 13. Idjerhe vọ yen oborẹ ohwo roro vwo churobọ si obo ro ruẹ phia, mavọ yen avwanre se vwo vwo iroro rọ fonro?

 ¹² Iroro rọ fonro. Oborẹ ohwo roro ọyen ọ ruẹ phia. Avwanre da vwẹ uphẹn kẹ iroro echọchọ nẹ e vwẹ owọ muotọ vwẹ iroro vẹ ubiudu rẹ avwanre, okriri o vwori-i, avwanre che vwobọ vwẹ iruemu rẹ jẹfuọn. (Matiu 5:28; 15:18-20) Ẹkẹvuọvo, avwanre de roro kpahen obo re fonro, ọyena cha nẹrhẹ avwanre vwo uruemu rọ fonro. (Se Filipae 4:8.) Mavọ yen avwanre se vwo vwo iroro rọ fonro? Idjerhe ọvo, ọyen avwanre vwọ kẹnoma kẹ koka koka rẹ erọnvwọn ra vwọ diotọ ri se miovwo iroro rẹ avwanre. * Vwọba, avwanre se vwo iroro rọ fonro siẹrẹ avwanre de yono Ota rẹ Ọghẹnẹ ọkieje.​—Une Rẹ Ejiro 19:8, 9.

¹³ Rere a vwọ dia vwevunrẹ ẹguọnọ rẹ Ọghẹnẹ, kọ ghanre mamọ avwanre vwọ fon vwọrẹ ẹwẹn, uruemu, vẹ iroro. A nabọ djunute ẹfuọn vwẹ ẹdia erha nana vwẹ iyovwinreta efa rẹ ọbe nana. E gbe jẹ a ta ota kpahen ẹbẹre rẹ ẹne rọ dia ẹfuọn rẹ ugboma.

14. Diesorọ ẹfuọn rẹ ugboma dia ota romobọ ọvo-o?

¹⁴ Ẹfuọn rẹ ugboma churobọ si re vwo ruẹ oma rẹ avwanre vẹ asan rẹ avwanre dia fuanfon. Oka rẹ ẹfuọn ọtiọyena ota romobọ ọvo? Vwọ kẹ ihwo re ga Jihova, ọ dia ọtiọyen ọ hepha-a. Kirobo re djunute jovwo, ẹfuọn rẹ ugboma ghanre kẹ Jihova, ọ dia kiridie nẹ o che fi erere kẹ avwanre ọvo-o, jẹ kidie oborẹ avwanre ruẹ ji djobọte Jihova. Roro kpahen udje ra vwọphia vwẹ ọtonphiyọ na. Ọmọ rọ pha gbegbe ọkeneje sa nẹrhẹ wo roro nẹ ọsẹ vẹ oni rọyen je pha gbegbe, gbanẹ ọ dia ọtiọyen? Avwanre guọnọre nẹ osẹnvwe yẹrẹ oborẹ avwanre yeren akpọ wan ghwa ekan bru Ọsẹ rẹ  avwanre rọhẹ odjuvwu-u, yẹrẹ ru obo re cha nẹrhẹ ihwo si ẹwẹn nẹ ovuẹ rẹ aghwoghwo na-a. Ota rẹ Ọghẹnẹ da ta: “Avwanre phi ọghrọrọ phihọ idjerhe rẹ ohwo ọvuọvo-o, rere e vwo jẹ ogbeku ẹmrẹ vwẹ odiboegbe rẹ avwanre, ẹkẹvuọvo avwanre dje oma rẹ avwanre phia kerẹ idibo rẹ Ọghẹnẹ vwẹ idjerhe kidjerhe.” (2 Kọrẹnt 6:3, 4) Idjerhe vọ yen avwanre sa vwọ fon vwọrẹ ugboma?

15, 16. Die yen omamọ uruemu rẹ ẹfuọn churobọ si, mavọ yen iwun rẹ avwanre dia?

¹⁵ Osẹnvwe kugbe omaẹfuọn rẹ avwanre. Dede nẹ ẹkuruemu vẹ obo re yeren akpọ wan fẹnẹre vwẹ ẹkuotọ sansan, avwanre je sa mrẹ ame vẹ odja ro che te avwanre vẹ emọ rẹ avwanre vwo ru oma rẹ avwanre fon ọkieje. Re vwo ru oma fon churobọ si ra vwọ vwẹ ame vẹ odja vwọ hworhẹ abọ tavwen e ki djobọte emu ra cha re, e de nẹ itọlẹti rhe, yẹrẹ e  de wene inapkini rẹ ọmọ nu. Siẹrẹ avwanre da vwẹ ame vẹ odja vwọ hworhẹ abọ, ọ sa nẹrhẹ avwanre vrabọ rẹ ega, o mi ji sivwin arhọ rẹ avwanre. Ọ je nẹrhẹ avwanre kẹnoma kẹ a vwọ hwariẹ ọga vwo nẹ asan ọvo kpo asan ọfa. Vwẹ iwevwin ri vwo itọlẹti-i, e se ne phiyọ ukpotọ rere e rhurho kirobo re ruro vwevunrẹ Izrẹl rẹ awanre.​—Urhi Rivẹ 23:12, 13.

¹⁶ O ji fo nẹ avwanre fọnrhọ emwa rẹ avwanre ọkieje rere ayen vwọ dia fuanfon. Ọ ghwa dianẹ iwun rẹ Inenikristi cha dia e re ghanre yẹrẹ i ri sherhe tavwen ayen ke dia fuanfo-on. (Se 1 Timoti 2:9, 10.) Kasan kasan rẹ avwanre hepha, ofori nẹ osẹnvwe rẹ avwanre “mu ọghọ kẹ uyono rẹ Ọghẹnẹ Osivwi rẹ avwanre.”​—Taitọs 2:10.

17. Diesorọ uwevwin vẹ asan rẹ avwanre dia vwọ fon, ji faro?

¹⁷ Uwevwin vẹ asan rẹ avwanre dia. Ọkiọvo, ọ ghwa dia iwevwin ride yen avwanre dia-a, ẹkẹvuọvo ofori nẹ avwanre ru iwevwin rẹ avwanre fuanfon, yoyovwin te asan rẹ ẹgba avwanre teri. Avwanre de ji vwo imoto rẹ avwanre ghwa kpo uyono yẹrẹ aghwoghwo, ofori nẹ obevun vẹ otafe rọyen dia fuanfon. Karophiyọ nẹ uwevwin rẹ avwanre dia vẹ otafe rọyen da dia fuanfon, ọ nẹrhẹ ihwo jiri Ọghẹnẹ rẹ avwanre. Vwọrẹ uyota, avwanre yono ihwo nẹ Jihova ọyen Ọghẹnẹ rọ fonro, nẹ ọ cha “ghwọrọ ọghwọrọ rẹ akpọ na,” avwanre ji yono ayen nẹ Uvie rọyen che ru akpọ na phiyọ iparadaisi. (Ẹvwọphia 11:18; Luk 23:43) Ọtiọyena, avwanre guọnọre nẹ uwevwin vẹ ekuakua rẹ avwanre vwori djephia kẹ ihwo efa nẹ asaọkiephana avwanre dje uruemu rẹ ẹfuọn ra guọnọ mie ihwo re cha dia akpọ kpokpọ na.

18. Idjerhe vọ yen avwanre vwo djephia nẹ avwanre ni Ọguan Ruvie rẹ avwanre ghanghanre?

¹⁸ Uwevwin rẹ ẹga avwanre. Ẹguọnọ rẹ avwanre vwo vwọ kẹ Jihova yen mu avwanre vwọ vwẹrote Ọguan Ruvie rẹ avwanre rọ dia asan rẹ avwanre da ga ẹga rẹ uyota. Siẹrẹ ihwo kpokpọ da rhe uyono, avwanre guọnọre nẹ ayen vwẹ omamọ ẹro vwo ni Ọguan Ruvie rẹ avwanre. Rere ọguan na  se vwo faro, ofori nẹ avwanre ruo fon, ji vwẹrote ọkieje. Siẹrẹ avwanre da vwẹrote Ọguan Ruvie na ọkeneje, jẹ avwanre djephia nẹ avwanre vwẹ ẹro rọ ghanre vwo no. Ọyen uphẹn rode rẹ avwanre vwọ vwẹ omakpahotọ vwọ “rhuẹrẹ” asan avwanre da ga. (2 Ikun Rivie 34:10) Ọtiọyen o ji fo nẹ avwanre vwẹrote Ọguan Romẹvwa yẹrẹ asan efa rẹ avwanre de ru isikoko yẹrẹ eghwẹkoko.

19. Die yen avwanre kẹnoma kẹ siẹrẹ a da guọnọ dia ihwo re fonro vwọrẹ ugboma, idjerhe vọ yen Baibol na vwọ chọn avwanre uko vwẹ ẹdia nana?

¹⁹ Avwanre sa vwọ fon vwọrẹ ugboma, ofori nẹ avwanre kẹnoma kẹ iruemu ri se gbe oma na ku kerẹ, isigati ephopho, udi a da vrẹ oma, vẹ ihuvwun egangan ri se djobọte iroro rẹ avwanre. Baibol na djunute iruemu na eje ri se gbe oma na ku ra mrẹ vwẹ akpọ na nonẹna-a, ẹkẹvuọvo ọ chọn avwanre uko vwọ riẹn ẹro rẹ Jihova vwo ni ayen. Ẹguọnọ avwanre vwo kpahen Jihova yen mu avwanre vwo ru obo re cha nẹrhẹ oma vwerhọn, kidie avwanre riẹn oborẹ Jihova ta kpahen iruemu nana. E je roro kpahen iyono rẹ Baibol iyorin.

20, 21. Oka rẹ iruemu vọ yen Jihova guọnọre nẹ avwanre kẹnoma kẹ, iroro ọgangan vọ yen sorọ avwanre vwo ru nene oborẹ Jihova tare?

²⁰ “Imoni re ghare, rẹ avwanre vwo vwo ive nana nure na, e gbe jẹn avwanre họ oma rẹ avwanre nẹ ẹgua rẹ ugboma vẹ [“ẹwẹn,” NW ], re ru ẹfuọn gba vwẹ oshọẹdjẹ rẹ Ọghẹnẹ.” (2 Kọrẹnt 7:1) Jihova guọnọre nẹ avwanre kẹnoma kẹ iruemu ri se miovwo ugboma kugbe ẹwẹn yẹrẹ iroro rẹ avwanre. Ọtiọyena, a kẹnoma kẹ iruemu ra vwọ da yẹrẹ reyọ erọnvwọn ri se miovwo ugboma yẹrẹ iroro rẹ avwanre.

²¹ Baibol na kẹ avwanre iroro ọgangan ọvo rọ sorọ avwanre vwọ “họ oma rẹ avwanre nẹ ẹgua.” Noso nẹ 2 Kọrẹnt 7:1 tonphiyọ vẹ eta nana: “Rẹ avwanre vwo vwo ive nana nure na.” Ive vọ? Kirobo rọ tare vwẹ awọreta e ki rhi te ọnana, Jihova de ve: “Ki mi dede ovwan reyọ, ke me dia ọsẹ kẹ  ovwan.” (2 Kọrẹnt 6:17, 18) Di roro, Jihova veri nẹ ọ cha vwẹrote we, o ji che vwo ẹguọnọ wẹn kirobo rẹ ọsẹ vwo ẹguọnọ rẹ emọ rọyen. Ẹkẹvuọvo, Jihova che ru ive rọyen gba siẹrẹ wọ da kẹnoma kẹ ogbeku rẹ “ugboma vẹ [“ẹwẹn,” NW ].” Mavọ ọ dia emu rẹ ẹkpa te wọ vwọ vwẹ uphẹn kẹ iruemu igbegbe yena nẹ i miovwin oyerinkugbe wẹn vẹ ọ rẹ Jihova!

22-25. Iyono rẹ Baibol vọ yen cha chọn avwanre uko vwọ kẹnoma kẹ iruemu ri se miovwo omakpokpọ rẹ avwanre?

²² “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi.” (Matiu 22:37) Jesu tare nẹ urhi nana yen ma rho. (Matiu 22:38) Oka rẹ ẹguọnọ yena yen Jihova guọnọ mie avwanre. Ra vwọ vwẹ ubiudu, oma vẹ iroro rẹ avwanre vwo vwo ẹguọnọ rẹ Jihova, mudiaphiyọ nẹ avwanre ke kẹnoma kẹ iruemu ri se bru arhọ rẹ avwanre krẹ yẹrẹ hwe ẹgba iroro rẹ Ọghẹnẹ vwọ kẹ avwanre.

²³ “[Jihova] re kẹ ihwo ejobi arhọ kugbe ẹnwẹn kugbe kemu kemu.” (Iruo Rẹ Iyinkọn Na 17:24, 25) Arhọ ọyen okẹ ro nẹ obọ rẹ Ọghẹnẹ rhe. Avwanre vwo ẹguọnọ rẹ Ohwo rọ kẹ avwanre arhọ na, ọtiọyena avwanre guọnọ dje ọdavwaro kpahen okẹ na. Avwanre kẹnoma kẹ iruemu re sa dia imuoshọ kẹ omakpokpọ rẹ avwanre, kidie avwanre riẹnre nẹ iruemu yena dje ọghọ phia kẹ arhọ-ọ.​—Une Rẹ Ejiro 36:9.

²⁴ “Guọnọ ọrivẹ wẹn kirobo wọ guọnọ oma wẹn.” (Matiu 22:39) Ohwo ro vwobọ vwẹ iruemu rẹ jẹfuọn nana cha so ọga kẹ oma rọyen vẹ ihwo efa re dia kẹrẹ. Kerẹ udje, ohwo ro se aphopho rẹ isigati reyọ, je sa rioja rẹ ega ri nẹ isigati ephopho cha. Ohwo ro ru obo re sa so ọga kẹ ọrivẹ rọyen, churhi rẹ Ọghẹnẹ rọ tare nẹ e vwo ẹguọnọ rẹ irivẹ rẹ avwanre. Uruemu rọyen ji djephia nẹ o vwo ẹguọnọ rẹ Ọghẹnẹ-ẹ, ọ da tobọ dianẹ ọ vwẹ ugbunu vwọ ta.​—1 Jọn 4:20, 21.

²⁵ “Karophihọ ihwo na nẹ ayen vwẹ oma kpotọ kẹ ayen otu ri suẹn ihwo, kugbe ihwo ride ri vwo ogangan, re mu ọghọ kẹ ayen.” (Taitọs 3:1) Vwẹ ẹkuotọ buebun, e vwo vwo yẹrẹ da  ihuvwun evo vwọso urhi rẹ ẹkuotọ na. Inenikristi vwo yẹrẹ da oka rẹ ihuvwun tiọyena-a.​—Rom 13:1.

26. (a) Die yen ofori nẹ avwanre ru rere a vwọ sẹro rẹ oma rẹ avwanre vwevunrẹ ẹguọnọ rẹ Ọghẹnẹ? (b) Diesorọ a vwọ dia fuanfon vwẹ ẹro rẹ Ọghẹnẹ vwọ dia idjerhe rẹ akpeyeren ro me yovwin?

²⁶ Ra vwọ sẹro rẹ oma rẹ avwanre vwevunrẹ ẹguọnọ rẹ Ọghẹnẹ, ofori nẹ avwanre dia ihwo re fonro vwẹ kidjerhe kidjerhe. Re vwo siobọnu, je kẹnoma kẹ iruemu ri miovwo ugboma na lọhọre-e, ẹkẹvuọvo e se ruo. * Ọnana yen idjerhe rẹ akpeyeren ro me yovwin, kidie Jihova yono avwanre rere avwanre vwọ mrẹ erere komobọ rẹ avwanre. (Se Aizaya 48:17.) Ma rho, siẹrẹ avwanre da dia ihwo re fonro, oma cha vwerhen avwanre nẹ avwanre vwẹrokere Ọghẹnẹ ro dia ohwo rẹ avwanre vwo ẹguọnọ rọyen, ọtiọyena kẹ avwanre sẹro rẹ oma avwanre vwevunrẹ ẹguọnọ rọyen.