1-3. (a) Aayyiyaa ba naˈay giiganne geeshsha gidanaadan oottiyoy aybissee? (b) Yihooway baayyo goynniyaageeti geeshsha gidanaadan koyiyoy aybissee? Nuuni geeshsha gididi deˈanau koyanaadan denttettiyay aybee?

ISSI aayyiyaa ba guutta naˈaa banaara issisaa efaanau giigissawusu. A naˈaa meeccawusu; qassi geeshshanne giiga maayuwaa mayzzawusu. Geeshshatettay naˈaa payyatettau keehi koshshiyoogaa erawusu. Qassi ba naˈaa hanotay a yelidaageeta bonchissiyoogaa woy bonchissennaagaa erawusu.

² Saluwan deˈiya nu Aawaa Yihooway, ba ashkkarati geeshsha gidanaadan koyees. A Qaalay: “Geeshshatuyyo neenikka geeshsha” yaagees. * (Mazamure 18:26) Yihooway nuna siiqees; geeshsha gididi deˈiyoogee nuna keehi goˈˈiyoogaa erees. Qassi nuuni  a Markkata gidiyoogaadan a sabissiyaabaa oottanaadan koyees. Nu geeshshatettaynne nu loˈˈo kanddoy Yihoowanne a geeshsha sunttaa borissiyaaba gidennan bonchissiyaaba.—Hizqqeela 36:22; 1 PHeexiroosa 2:12.

³ Xoossay geeshsha asaa siiqiyoogaa eriyoogee nuunikka geeshsha gididi deˈanaadan denttettees. Nuuni Yihoowa siiqiyo gishshau, nu deˈuwaa ogee a bonchissanaadan koyoos. A siiquwan deˈanaukka koyoos. Hegaa gishshau, geeshsha gidiyoogee aybissi koshshiyaakko, geeshsha gidiyoogee woygiyoogaakkonne nuuni waanidi geeshsha gididi deˈana danddayiyaakko ane pilggoos. Hegaa mala pilggettay nuuni giigissana bessiya hanotay deˈiyaakkonne akeekanaadan maaddana danddayees.

4, 5. (a) Nuuni geeshsha gididi deˈanau koshshiyo waanna gaasoy aybee? (b) Yihoowa geeshshatettay beettiya a meretatun waanidi qonccidee?

⁴ Yihooway nuna kaalettiyo issi ogee nuussi leemiso gidiyoogaana. Hegaa gishshau a qaalay, “[Xoossaa] milatite” giidi nuna minttettees. (Efisoona 5:1) Nuuni geeshsha gididi deˈanau koshshiyo waanna gaasoy, nuuni ayyo goynniyo Xoossaa Yihooway ubbaban geeshshanne xillo gidiyo gishshataassa.—Wogaabaa 11:44, 45.

⁵ Yihoowa geeshshatettay, a eeshshatuppenne a ogetuppe daroti qonccidoogaadan, beettiya a meretatun qoncciis. (Roome 1:20) Biittay asaa naati deˈanaadan geeshsha soho gididi giigiis. Saˈaa bollinne a heeran deˈiya simmi simmi haniyaabati (ekolojikal saykilis) carkkuwaanne haattaa geeshsha oottanaadan Yihooway giigissiis. Issi issi deˈuwan deˈiya ayfiyan beettennabati, goˈˈennabata qohennabau laammiyoogan, heeraa geeshshatettaa naagiya ooso keetta mala gididi oottoosona. Maanau hatattaamiya deˈuwan deˈiya ayfiyan beettennabatuppe issota issota, sayinttistteti nadaajiyan moorettida heeraanne asaa naati ba huuphiyaa siiqiyoogaappenne yaaretiyoogaappe denddidaagan moorido harabata geeshshanau goˈettoosona. “Sa7aa medhdhidaagee” geeshshatettaa keehippe xoqqu ootti xeelliyoogee erettidaba. (Ermaasa 10:12) Hegee nuunikka keehippe xoqqu oottidi xeellanau koshshiyaaba.

6, 7. Yihoowayyo goynniyaageetuppe geeshshatettay koyettiyoogaa Muuse Higgee waatidi mintti qonccissii?

 ⁶ Nuuni geeshsha gididi deˈanau koshshiyo hara gaasoy, Ubbaappe Bollaara Haariyaagee, Yihooway baayyo goynniyaageetuppe geeshshatettaa koyiyo gishshataassa. Yihooway Israaˈeeletuyyo immido Higgiyaa giddon, geeshshatettay goynuwaara keehippe gayttidaba. Nagaray Atto Geetettiyo Gallassi, qeese ubbatu halaqay naaˈˈutoo meecettana bessiyoogaa Higgee qonccissi yootees. (Wogaabaa 16:4, 23, 24) Yarshshuwaa shiishshiya qeeseti, Yihoowayyo yarshshuwaa shiishshanaappe kase bantta kushiyaanne tohuwaa meecettana koshshees. (Kessaabaa 30:17-21; 2 Hanidabaa Odiya 4:6) Higgee, asatettaaninne goynuwaara gayttidaagan tunissiya 70 gidiyaabata yootees. Issi Israaˈeelee tuni uttidi goynuwan shaahettana danddayenna; i tuni uttidi hegaadan oottikko, hayquwan pirddettana danddayees. (Wogaabaa 15:31) Ba bollaa meecettiyoogaanne ba maayuwaa meecciyoogaa gujjiya, koyettiya geeshshatettaa naagiyo wogaa polennan ixxiya ooninne, “Israa7eela asaa giddoppe” shaahettidi xayana bessees.—Qoodaabaa 19:17-20.

⁷ Nuuni Muuse Higgiyaa garssan deˈennaba gidikkonne, dumma dumma allaalleta xeelliyaagan Xoossaa qofay aybakko nuuni shaakkidi eranaadan hegee maaddees. Xoossaayyo goynniyaageetuppe Geeshshatettay koyettiyoogaa Higgee minttidi yootiyoogee akeekiyooba. Yihooway laamettibeenna. (Milkkiyaasa 3:6) Nu goynoy “pokkoi bainna geeshsha” gidana xayikko, Yihoowa ufayssenna. (Yaaqooba 1:27) Yaatiyo gishshau, ha yohuwaa xeelliyaagan, i nuuppe ay koyiyaakko erana koshshees.

8. Nuuni ayba ogetun geeshsha gididi deˈanaadan Yihooway koyii?

⁸ Geeshsha gidiyoogaa giya qofay asatettaa geeshshatetta xalla gidennaagaa Geeshsha Maxaafay yootees. Xoossaa sinttan geeshsha gidiyoogee nu deˈo macara ubbaa gujjees. Yihooway nuuni oyddu waanna ogiyan—ayyaanaaban, kandduwan, qofaaninne asatettan geeshsha gididi deˈanaadan koyees. Hegeeti ay ay gujjiyaakko ane beˈoos.

9, 10. Ayyaanaaban geeshsha gididi deˈiyoogee woygiyoogee? Tumu Kiristtaaneti aybippe haakkiyoonaa?

 ⁹ Ayyaanaabaa geeshshatettaa. Qanttan, ayyaanaaban geeshsha gididi deˈiyoogaa giyoogee, tumu goynuwaa worddo goynuwaara walakkennaagaa giyoogaa. Israaˈeeleti Baabilooneppe Yeerusalaame simmido wode: “Yaappe kiyite. Tunabaa bochchoppite;  . . . Intte huuphiyaukka geeyite” yaagiya geeshsha ayyaanay kaalettin odettida zoriyaa oosuwan peeshshanaadan etau odettiis. (Isiyaasa 52:11) Israaˈeeleti bantta biitti simmido waannabay, Yihoowa goynuwaa zaarettidi essanaassa. He goynoy geeshsha gidanau bessees; Xoossaa bonchissenna Baabiloone haymaanootiyaa timirttetun, oosotuuninne wogatun hambbalaashettanau koshshenna.

¹⁰ Ha wodiyaanikka, nuuni tumu Kiristtaaneta gidiyoogaadan, worddo goynuwan hambbalaashettennaadan naagettana bessees. (1 Qronttoosa 10:21) Worddo haymaanootee gattiyo qohoy nu yuusho ubbasan deˈiyo gishshau, hegaa xeelliyaagan akeekan naagettana koshshees. Daro biittatun deˈiya dumma dumma wogati, oosotinne meezeti nuuni hayqqiyo wode nuuppe shaahettidi paxa deˈiya issibay deˈees giyaagaa mala, worddo haymaanootiyaa timirttiyaara gayttidosona. (Eranchchaa 9:5, 6, 10) Tumu Kiristtaaneti worddo haymaanootiyaa ammanuwaara gayttida meezetuppe haakkoosona. * Geeshsha Maxaafan deˈiya geeshsha goynuwaa maarata bonchennaadan oottiya haratu sugettau kushiyaa immokko.—Oosuwaa 5:29.

11. Kandduwan geeshsha gidiyoogee ay gujjii? Hegaa xeelliyaagan nuuni geeshsha gidana koshshiyoy aybissee?

¹¹ Kandduwaa geeshshatettaa. Kandduwan geeshsha gididi deˈiyoogee ay qommo gidinkka shori baynna asho gaytotettaappe haakkiyoogaa gujjees. (Efisoona 5:5) Kandduwan geeshsha gididi deˈiyoogee keehippe koshshiyaaba. Nuuni ha maxaafan kaalliya shemppuwan beˈanaagaadan, Xoossaa siiquwan deˈanau ‘SHaaramuxiyoogaappe baqatana’ bessees. SHaaramuxidi nagaaraappe simmennaageeti, “Xoossaa kawotettaa laattokkona.” (1 Qoronttoosa 6:9, 10, 18) Hegaa mala asati Xoossaa xeelan ‘tunata’ geetettidaageetun qoodettoosona. Eti kandduwan geeshsha gididi  deˈana xayikko, eti deˈana “sohoi . . . naa77antto haiqo” gidana.—Ajjuutaa 21:8.

12, 13. Qofaanne oosuwaa giddon ayba gaytotettay deˈii? Nuuni qofan geeshsha gididi deˈana danddayiyoy ayba ogiyaanee?

¹² Qofaa geehshatettaa. Qofay oosuwau kaalettees. Nu guuggiyaaninne nu wozanan bala qofaa wottiyaaba gidikko, sohuuwaara gidin woy takkidi tunabaa oottanaagee attenna. (Maatiyoosa 5:28; 15:18-20) SHin nuuni nu guuggiyan loˈˈonne geeshsha qofaa kunttiyaaba gidikko, geeshsha eeshshaa naagidi deˈanaadan nuna denttettana danddayees. (Piliphphisiyuusa 4:8) Nuuni qofan geeshsha gididi deˈanau danddayiyoy ayba ogiyaanee? Issi ogee, nu qofaa moorana danddayiya wodiyaa aattiyo aybippenne haakkana koshshiyoogaa akeekiyoogaa. * Haray qassi, ubbatoo Xoossaa Qaalaa xannaˈiyoogan nu guuggiyan geeshsha qofaa kunttiyoogaa.—Mazamure 19:8, 9.

¹³ Xoossaa siiquwan deˈanau, nuuni ayyaanaaban, kandduwaaninne qofan geeshsha gididi deˈiyoogee keehippe koshshees. Geeshshatettaa xeelliya ha hanotati ha maxaafan hara shemppotun aahuwan qonccoosona. Ane haˈˈi oyddantta ogiyaa—asatettaa geeshshatettaabaa pilggoos.

14. Asatettaa geeshshatettay nu huuphe allaalle xalaala gidennay aybissee?

¹⁴ Asatettaa geeshshatettay nu bollaanne nu heeraa geeshshatettaa naagiyooga gujjees. Hegaa mala geeshshatettay hara oonanne qofissennaba gidida, nu huuphe allaallee? Yihoowau goynniyaageetuyyo hegaadaana gidennaagee tuma. Hagaappe kase qonccidaagaadan, nu asatettaa geeshshatettay Yihooway xoqqu oottidi xeelliyooba gididoy, nuuyyo loˈˈoba gidiyoogaa xalaalaassa gidennan, nuuni a malatiyo gishshaataassa. Doomettan goˈettido leemisuwaa qoppa. Issi naˈay ubbatoo loˈˈo ogiyan oyqettibeennaagaanne qitattidaagaa beˈiyoogee, neessi a yelidaageeta xeelliyaagan sirissiyaabay merettanaadan oottennee? Nu eqotay  woy nu duussay aybiininne gidin, saluwan deˈiya nu Aawaa borissanaadan woy nuuni sabbakiyo kiitau xube gidanaadan koyokko. Xoossaa Qaalay: “Nuuni nu oosuwaa ooninne boranaagaa koyokko; qassi oonanne xubbanaagaa koyokko. SHin ubbaban nuuni Xoossaa ashkkarata gidiyoogaa nu huuphen bessida” yaagees. (2 Qoronttoosa 6:3, 4) Yaatin nuuni asatettan geeshsha gididi deˈana danddayiyoy ayba ogiyaanee?

15, 16. Geeshshatettaa naagiyo loˈˈo meezee ay ay gujjii? Nu maayuwaa hanotay ay mala gidanau koshshii?

¹⁵ Nu asatettaa geeshshatettaanne nu eqotaa. Biittaappe biittan deˈuwaa hanotaynne wogay dummatiyaaba gidikkonne, ubbatoo bollaa meecettanaunne nuugaanne nu naatu geeshshatettaa naaganau gidiya haattaanne saamunaa darotoo demmana danddayoos. Geeshshatettaa loyttidi naagiyo meezee qumaa maanaappe woykko a oyqqanaappe kasetidi, sheeshsha keetti bi simmidinne guuta naˈa meecci simmidi woykko ayyo hixxiyoobaa laammi simmidi, kushiyaa haattaaninne saamunan meecettiyoogaa  gujjees. Kushiyaa haattaaninne saamunan meecettiyoogee harggiyaa teqqeesinne ubba hayquwaappekka ashees. Hegee qohiya bayresetinne bakiteereti asaappe asaa oyqqennaadan teqqiyoogan, karayiya harggetuppe naagettanaadan maaddees. SHeeshsha keettaynne hara goˈˈennabaa yeggiyo sohoy deˈenna biittatun, beni wode Israaˈeeletuugaadan sheeshsha utettaanne hara goˈennabaa bookkidi moogana danddayettees.—Zaarettido Wogaa 23:12, 13.

¹⁶ Nu maayoykka geeshshanne bonchissiyaagaa gidanaadan ubbatoo meecettana koshshees. Issi Kiristtaaniyaa maayoy alˈˈuwan shamettiyaagaa woykko wodiyaa paashiniyaa kaallidaagaa gidanau koshshenna; hegaappe giiga, geeshshanne bessiyaagaa gidana koshshees. (1 Ximootiyoosa 2:9, 10) Nuuni deˈiyoy awaana gidikkonne, nu eqotan “ashshiya Xoossaabaa tamaarissiyoogaa ubbaban galatissanau” koyoos.—Tiitu 2:10.

17. Nu keettaynne nu heeray geeshshanne giigidaagaa gidana koshshiyoy aybissee?

¹⁷ Nu keettaanne nu heeraa. Nu keettay keehi gita woy alˈˈoban keexettidaagaa gidennan aggana danddayees; shin nuuyyo danddayettidaagaadan geeshshanne giigidaagaa gidana koshshees. Hegaadankka, shiiquwaanne haggaazuwaa baanau nu kaamiyaa goˈettiyaaba gidikko, kaamiyau kare baggaynne so baggay bessiyaagaadan geeshsha gidanaadan nu danddayiyoobaa oottana danddayoos. Geeshsha keettaynne heeray nuuni ayyo goynniyo Xoossaabaa markkattiyoogaa dogana koshshenna. Qassi Yihooway geeshsha Xoossaa gidiyoogaa, i ‘saˈaa xayssiyaageeta xayssanaagaanne’ a Kawotettay mata wode saˈaa gannatiyau laammanaaga nuuni asaa tamaarissoos. (Ajjuutaa 11:18; Luqaasa 23:43) Nu keettaa hanotaynne nuuyyo deˈiyaabay, sinttaara yiya ooratta alamiyau bessiya geeshshatettaa meeziyaa ha wodiyankka nuuni dichiiddi deˈiyoogaa haratussi qonccissanaadan koyiyoogee tuma.

18. Nu Kawotettaa Addaraashaa bonchiyoogaa waati bessana danddayiyoo?

¹⁸ Nu goynuwau shiiqiyo sohuwaa. Yihoowa siiqiyoogee, nu deˈiyo heeran tumu goynuwaayyo waanna soho gidida, Kawottettaa Addaraashaa bonchanaadan nuna denttettees. Oorattati he addaraashaa koyro yiyo wode, nu shiiquwaa sohuwaayyo etassi loˈˈo xeelay deˈanaadan koyoos. Addaraashay loˈˈiyaagaa gididi  deˈanau ubbatoo geehshatettaa naagiyoogeenne giigissiyoogee koshshees. Nu Kawotettaa Addaraashay geeshsha gidanaadaaninne giigidi deˈanaadan oottiyoogan a bonchiyoogaa bessoos. Nu goynuwau shiiqiyo sohuwaa geeshshatettaa naagiyoogan, ‘bottokoniyoogaaninne wotti yeggidi keexxiyoogan’ wodiyaa immidi dosan maaddiyoogee gita maata. (2 Hanidabaa Odiya 34:10) Gita SHiiquwaa Addaraashan woykko hara sohuwankka gidin gita shiiquwaa shiiqiyo wode, he baaso siraatata oosuwan peeshshoos.

19. Nuuni asatettan geeshsha gididi deˈanau aybippe haakkana koshshii? Hegaa xeelliyaagan Geeshsha Maxaafay nuna waatidi maaddii?

¹⁹ Nuuni asatettan geeshshtettaa naagidi deˈanau, tambbuwaa uyiyoogaa, cammiya ushshaa bessiyaagaappe aattidi uyiyoogaanne akkamettiyo wode gidana xayikko, jallissiyaabaa woy amale gidiyaabaa goˈettiyoogaa mala tunissiya meezetuppenne oosotuppe haakkana koshshees. Ha wodiyan aakkidi deˈiya sheneyiya, tuna meeziyaanne oosuwaa ubbaa sunttan shaakkidi Geeshsha Maxaafay yootenna; shin hegaa malabatuyyo deˈiya Yihoowa xeelaa shaakki eranaadan maaddiya baaso siraatata oyqqiis. Dumma dumma allaalleta xeelliyaagan Yihoowa xeelaa nuuni eriyo gishshau, nuuni a siiqiyoogee an sabissiyaaba oottanaadan denttettees. Geeshsha Maxaafan deˈiya ichashu baaso siraatata ane beˈoos.

20, 21. Yihooway nuuni haakkanaadan koyiyo oosoti awugeetee? Nuuni azazettanaadan oottiya mino gaasoy aybee?

²⁰ “Ta siiqotoo, Xoossai ha ubbabaa nuuyyo immana giidoogaappe hini baggan, nu ashuwaanne nu shemppuwaa [“ayyaanaa,” NW] tunissiya ubbabaappe nu huuphiyaa ane geeshshoos; qassi Xoossaayyo yayyiyoogan muleera geeyidi de7oos.” (2 Qoronttoosa 7:1) Yihooway nuna asatettan mooriyaanne ayyaanan woy qofan qohiya oosotuppe nuuni haakkanaadan koyees. Yaatiyo gishshau, asatettaanne guuggiyaa payyatettaa qohiyoogan erettida amale gidiya meezetuppe nuuni haakkanau bessees.

²¹ Geeshsha Maxaafay, ‘tunissiya ubbabaappe nu huuphiyaa geeshshanau’ koshshiyo mino gaasuwaa yootees. Naaˈˈantto Qoronttoosa 7:1y: “Xoossai ha ubbabaa nuuyyo immana giidoogaappe hini baggan” yaagidi doommiyoogaa akeeka. Immana giidobay woy qaalaa gelidobay aybee? Hegaappe kasetidi deˈiya  paydoti Yihooway, “Taani inttena mokka ekkana. Qassi taani intteyyo aawa gidana” yaagidoogaa qonccissoosona. (2 Qoronttoosa 6:17, 18) Aaway ba naˈaa woykko ba naˈiyo siiqiyoogaadaaninne naagiyoogaadan, Yihooway nena naaganaunne siiqanau qaalaa gelidoogaa qoppa. SHin Yihooway gelido ha qaalaa poliyoy, neeni ‘ne ashuwaanne ne ayyaanaa’ tunissiyaabaappe haakkiyo wode xalaalaana. Hegaa gishshau, Yihoowaara deˈiya keehi alˈˈonne mata dabbotaa moorana danddayiya, sheneyiya meeziyaa woy oosuwaa awugaanne oottiyoogee ay keena eeyyatettee!

22-25. Tuna gidida meezetuppenne oosotuppe haakkanaadan nuna maaddana danddayiya Geeshsha Maxaafaa baaso siraatati awugeetee?

²² “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa.” (Maatiyoosa 22:37) Yesuusi ha azazoy hara azazo ubbaappe aadhiyoogaa yootiis. (Maatiyoosa 22:38) Nuuni hegaadan a siiqiyoogee Yihoowayyo bessiyaaba. Nu kumetta wozanaappe, nu kumetta shemppuwaappe, nu kumetta qofaappe a siiqanau, nu layttaa qanttiya woykko Xoossay nuuyyo immido qoppiyo abbiyaa jallissiya oosotuppe haakkana bessees.

²³ “[Xoossay] de7uwaa shemppuwaanne ubbabaa asa ubbaassi immees.” (Oosuwaa 17:24, 25) Deˈoy Xoossaa imota. Nuuni Immidaagaa siiqiyo gishshau, he imotaa bonchana koyoos. Nu payyatettaa qohiya oosoti deˈuwaa imotaa bonchennagaa qonccissiyoogaa akeekiyo gishshau, hegaa mala ay meeziyaappekka woy ay oosuwaappekka haakkoos.—Mazamure 36:9.

²⁴ “Neeni ne shooruwaa ne huuphedan siiqa.” (Maatiyoosa 22:39) Tuna gidida meezetinne oosoti darotoo hegaa oottiya ura xalaala gidennan, a heeran deˈiyaageetakka qohoosona. Leemisuwau, tambbuwaa uyiya ura achan takkiyoogee tambbuwaa uyennaagaa qohana danddayees. Ba heeran deˈiyaageeta qohiyaaba oottiya issi uri, nu shooruwaa siiqanaadan imettida Xoossaa azazuwaa kanttees. I Xoossaa siiqays giyoogee tuma gidennaagaa ba oottiyooban bessees.—1 Yohaannisa 4:20, 21.

²⁵ ‘Deriyaa haariyaageetussinne godatettai de7iyoogeetussi haarettitenne azazettite.’ (Tiitu 3:1) Daro biittan, jallissiya xaliyaa oyqqidi bettiyoogee woykko goˈettetiyoogee higgiyaa kanttiyoogaa. Tumu Kiristtaaneta gidiyoogaadan nuuni higgee diggiyo jallissiya  xaleta oyqqidi beettokko woykko goˈettokko.—Roome 13:1.

26. (a) Xoossaa siiquwan deˈanau nuuni ay oottana koshshii? (b) Xoossaa sinttan geeshsha gididi deˈiyoogee aybippenna aadhiya deˈo oge gididoy aybissee?

²⁶ Xoossaa siiquwan deˈanau, nuuni amarida ogetu xallan gidennan ubba ogetun geeshsha gididi deˈanau koshshees. Tunissiya meezetanne oosota aggiyoogeenne etappe geeyidi deˈiyoogee deexxiyaaba gidikkonne danddayettiyaaba. * Yihooway ubbatoo nuna nu goˈˈau tamarissiyo gishshau, hegee aybippenne aadhiya deˈo oge gidiyoogee tuma. (Isiyaasa 48:17) Geeshsha gididi deˈiyoogan, nuuni siiqiyo Xoossaa sabissiyoogaanne a siiquwan deˈiyoogaa eriyoogan ufayssaa demmana danddayiyoogee aybippenne aadhiyaaba.