1, 2. Aha do dipangke si Bileam laho mangelaela naposo ni Jahowa?

SAHALAK pangkail laho mangkail dengke. Diboto ibana do didia inganan ni dengke na laho sihailonna. Dipillit ibana do umpan na pas tu dengkena i. Dung i, disampathon ma hailna i, ndang leleng tanggir ma tali ni hail i jala mardengkuk baorna (pancingna). Mengkel ma ibana, ala diallang dengke i do umpan na dipillitna.

² Taon 1473 S.M., sahalak baoa na margoar si Bileam, naeng mambahen umpan tu naposo ni Debata, na marundungundung di Adaran ni Moab, di parbatasan ni Tano Kanaan. Si Bileam mandok tu halak Israel, molo ibana sahalak panurirang ni Jahowa. Alai sasintongna, naung digaji do ibana laho mamburai halak Israel. Marhite pangurupion ni Jahowa, gabe hata pasupasu do na dipasahat ibana. Nang pe songon i, marsitutu do ibana mandapot hepeng i. Diboto si Bileam do na uhumon ni Debata bangso Israel molo boi dielaela ibana bangso i mangulahon dosa na balga. Alani i, dibahen ibana ma boru ni halak Moab laho mangelaela halak Israel.​—4 Musa 22:1-7; 31:15, 16; Pangungkapon 2:14.

3. Sadia godang do na tarelaela tu akkal ni si Bileam on?

³ Marhasil do angkal ni si Bileam on? Marhasil do tu pigapiga halak Israel. Marpuluribu halak Israel tarelaela laho, ”marmainan tu boru ni halak Moab”. Nasida do parsidohot manomba debata ni halak Moab, songon Baal Peor, na  digoari dewa kesuburan manang dewa seks. Pangkorhon ni on, 24.000 halak Israel mate di parbatasan ni Tano Kanaan. Mansai ngeri do na masa on!​—4 Musa 25:1-9.

4. Boasa marribu halak Israel boi tarelaela mangulahon parmainanon?

⁴ Boasa boi masa on? Nunga godang sian nasida sai mamingkirhon roha na jahat, ala nunga mandao sian Jahowa, Debata na paluahon nasida sian Mesir, na mamparrohahon nasida di halongonan jala mangurupi nasida bongot tu Tano Kanaan. (Heber 3:12) Tingki mangarimangi on, apostel Paulus manurat, ”Unang ma hita marmainan, songon na deba sian nasida na marmainan i, gabe mate satongkin duapulutolu ribu di na sadari i”. *—1 Korint 10:8.

5, 6. Boasa marlaba tu hita saonari aha na disurat taringot na masa tu halak Israel di Adaran Moab?

⁵ Aha na disurat di buku 4 Musa on, gabe parsiajaran na ringkot tu naposo ni Debata saonari on, na laho bongot tu tano na imbaru. (1 Korint 10:11) Umpamana, portibi on holan mangharingkothon seks, dos songon na masa di Moab najolo. Alai, tarlumobi saonari on. Asing ni i, ganup taon marribu halak Kristen tarelaela mangulahon parmainanon,  songon umpan na dipangke laho mangelaela halak Israel. (2 Korint 2:11) Songon si Simri na mamboan boru ni Midian tu undungundungna sandiri di adopan ni godang halak Israel. Saonari pe, adong do songon si Simri di tongatonga ni naposo ni Debata, na mangkorhon na roa di huria.​—4 Musa 25:6, 14; Judas 4.

⁶ Boi do diida hamu molo dirimuna adong di Adaran Moab sisaonari on? Boi do ditatap hamu tano na imbaru na laho tajalo satongkinnari? Marsitutu ma hamu, asa tongtong di bagasan holong ni roha ni Debata marhite mangulahon parenta, ”Pasiding parmainanon!”​—1 Korint 6:18.

7, 8. Aha do ”parmainanon” i jala aha do na boi masa tu halak na mangulahon i?

⁷ Hata ”parmainanon” (di hata Junani, por·neiʹa) lapatanna, i ma mangulahon seks di luar ni ruhut parsaripeon, na so hombar tu Hata ni Debata. Songon mangalangkup, marboruboru na so hasea, mangulahon seks tu halak na so dongan saripena, manang mangulahon seks oral dohot anal, dohot manjamajama laho patubuhon giotgiot ni daging na sala. Dohot ma on baoa marjolmahon baoa manang mangulahon seks dohot binatang, na digoari bestialitas. *

⁸ Tangkas do didok di Bibel: Halak na mangulahon parmainanon ndang boi tongtong di bagasan huria Kristen jala ndang boi mandapot ngolu salelengna. (1 Korint 6:9; Pangungkapon 22:15) Asing ni i, halak na mangulahon parmainanon susa do pangkilalaanna ala ndang dihaporseai be nasida, ndang diargai halak, panggora ni roha na so denggan, mardenggan pamatang na so dihalomohon,  marsahit jala boi mate. (Jaha Galatia 6:7, 8.) Aha ma labana molo taulahon dalan ngolu sisongon i? Godang do na so mamingkirhon aha pangkorhonna molo mangulahon on. Ulaon aha ma i? Mangida pornografi.

9. Tutu do pornografi ndang parohon jea, songon na didok godangan halak? Patorang ma.

⁹ Di godang negeri, gambar pornografi dipatudu do di toko majalah, di musik, di TV dohot di internet. * Tutu do pornografi ndang parohon jea, songon na didok godangan halak? Ndang tutu songon i! Halak na mangida pornografi boi gabe mangulahon masturbasi. Dung i, patubuhon ”hisaphisap hailaon” na mambahen hatagian mangulahon seks, giotgiot ni daging na sala, mambahen sursar jala marsirang di parsaripeon. * (Rom 1:24-27; Epesus 4:19) Sahalak panulingkit patorangkon, molo halak na hatagian mangulahon seks dipatudos songon sahit kanker. Ibana mandok, ”Lam rarat do sahit on jala ndang boi mago sandiri. Maol diubati manang dipamalum.”

10. Songon dia do hita mangulahon prinsip di Jakobus 1:14, 15? (Ida ma kotak ” Mandapot Gogo Asa Boi Marparange na Ias”.)

¹⁰ Parrohahon ma hata na disurat di Jakobus 1:14, 15, ”Alai ditaiti jala dipaelaela sangkapsangkap ni rohana sandiri do ganup, umbahen na tarunjun. Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean.” Molo adong sangkap na roa di pingkiranmuna, pintor hatop ma pasiding! Umpamana, olo do na so panagaman diida hamu gombar na  so hasea, hatop ma padao pamerenganmu manang pamate ma komputermuna manang ganti ma siaran TV. Ulahon ma na asing, asa unang sanga sangkap na roa mangarajai pingkiranmuna!​—Jaha Mateus 5:29, 30.

11. Tingki mangalo giotgiot na sala, songon dia do hita patuduhon na mangasahon Jahowa?

¹¹ Jahowa do na tumanda dirinta. Debata mandok, ”Pamate hamu ma di bagasan dirimuna angka pangalaho portibi on, i ma parmainanon, haramunon, hisap ni daging, roha na jahat dohot hahisapon na dos dohot parsombaon tu begu.” (Kolosse 3:5, Bibel siganup ari.) Nang pe maol mangulahon on, alai ingot ma, adong do Ama parholong na tongtong sabar mangurupi hita. (Psalmen 68:20) Alani i,  hatop ma lului pangurupion sian Debata tingki adong giotgiot na sala na ro tu pingkiranmuna. Martangiang ma mangido ”hagogoon na sumurung” jala paksa ma dirimuna asa mamingkirhon na asing.​—2 Korint 4:7; 1 Korint 9:27; ida ma kotak ” Songon dia do Pasohon Hasomalan na Roa?”.

12. Aha do ’roha’ i jala boasa hita ingkon mangondingi rohanta?

¹² Si Salomo sahalak baoa na marbisuk manurat, ”Sian saluhut sijagaon i, gumodang ma jaga roham, ai sian i do ruar angka mual hangoluan.” (Poda 4:23) Hata ’roha’ lapatanna, i ma songon dia rohanta na sasintongna di adopan ni Debata. Na manontuhon boi manang ndang hita mangolu salelengna, i ma songon dia Debata mangida rohanta ndang mangihuthon pandapot ni jolma taringot hita. Si Job mambahen parjanjian tu simalolongna, asa unang mangida sahalak borua huhut marsangkap na so denggan. (Job 31:1) Sada sitiruon na denggan di hita! Panurat ni Psalmen sapandapot do tu pingkiran on, ibana martangiang, ”Sai pasalpu ma angka matangku, unang marnida na so gabeak [na so marguna].”​—Psalmen 119:37.

13. Ise do si Dina jala boasa ndang marbisuk ibana mamillit dongan?

¹³ Songon na taulas di Pasal 3, balga do pangkorhon ni angka dongan tu hita, boi do manjujui hita mangulahon na denggan manang na roa. (Poda 13:20; jaha 1 Korint 15:33.) Umpamana, si Dina boru ni si Jakob. Nang pe nunga diajari ibana sian na gelleng, alai ndang marbisuk ibana mamillit donganna. Mardongan do ibana dohot angka boru ni Kanaan. Songon halak Moab, tarbarita do halak Kanaan marparange na so suman. (3 Musa 18:6-25) Di pingkiran ni angka dolidoli Kanaan dohot ma i si Sikem, ”na sumangap sian sude pinompar ni amana” si Dina sahalak borua na mura dielaela.​—1 Musa 34:18, 19.

14. Ala sala si Dina mamillit dongan, aha do na masa tu ibana?

 ¹⁴ Ra, ndang adong di roha ni si Dina laho mangulahon parmainanon tingki jumpang dohot si Sikem. Alai, di pingkiran ni si Sikem ulaon na somal do sisongon i. Paraloan ni si Dina tu si Sikem ndang adong labana, ala nunga diboan jala ”digogoi [diperkosa]” ibana. Nang pe di pudian ni ari ”lomo rohana” tu si Dina, alai on ndang mambahen muba na masa naung dibahen ibana tu si Dina. (Jaha 1 Musa 34:1-4.) Alani na masa on, ndang holan si Dina na mangkilala hasusaan. Godang do na masa na parohon lea tu angka keluargana.​—1 Musa 34:7, 25-31; Galatia 6:7, 8.

15, 16. Songon dia do hita boi mandapot bisuk? (Ida ma kotak ” Angka Ayat na Laho Tarimangi”.)

¹⁵ Si Dina marsiajar sian aha na masa tu dirina. Angka halak na mangkaholongi dohot mangoloi Jahowa, ndang porlu marsiajar taringot hangoluan marhite na masa tu dirina  sandiri. Ala manangihon Debata, boi do nasida mamillit asa ”mangkombar halak na bisuk.” (Poda 13:20a) Alani i, diantusi nasida ma sude ”pangalaho na denggan” jala pasidingkon parsoalan na boi parohon hasusaan.​—Poda 2:6-9; Psalmen 1:1-3.

¹⁶ Dilehon Jahowa do bisuk tu halak na mangkaporluhon, marhite martangiang jala taratur marsiajar Bibel dohot  publikasi na diparade naposo haposan. (Mateus 24:45; Jakobus 1:5) Ringkot do serep ni roha tapatudu tingki mangihuthon poda ni Bibel. (2 Rajaraja 22:18, 19) Umpamana, diparhatutu sahalak Kristen do molo rohana boi angkal manang ganggu. (Jeremia 17:9) Molo dibahen do haputusan na so marbisuk, tutu do ibana marserep ni roha, ala rade mangido poda dohot pangurupion na denggan sian na asing?

17. Paboa ma na masa di sada keluarga jala songon dia sahalak ama mangurupi boruna mangulahon prinsip ni Bibel.

¹⁷ Pingkiri ma on. Molo ndang adong na mandongani, sahalak ama ndang paloashon boruna paduadua dohot sahalak donganta baoa. Didok boruna i ma, ”Na so porsea do ho bapa tu ahu? Ndang ulahononnami na sala!” Ra, boruna on denggan do na sinangkap ni rohana. Alai, tutu do ibana mangihuthon bisuk na sian Debata? Dipasiding do parmainanon? Na ”marhaposan tu rohana sandiri” do ibana? (Poda 28:26) Ra, boi do paboaonmu angka prinsip na asing, na mangurupi sahalak ama dohot boruna mamingkirhon on.​—Ida ma Poda 22:3; Mateus 6:13; 26:41.

18, 19. Aha do elaela na masa tu si Josep jala songon dia do ibana mangadopi i?

¹⁸ Sahalak dolidoli, na margoar si Josep mangkaholongi Jahowa pasidingkon parmainanon. (1 Musa 30:20-24) Tingki gelleng, diida si Josep do na masa tu ibotona, si Dina. Roha ni si Josep na marsitutu asa tongtong di bagasan holong ni roha ni Debata dohot na masa tu ibotona, mangurupi ibana boi mangolu di Mesir saleleng martaontaon. Malua ma ibana sian tungganeboru ni si Potipar, na mangelaela ibana mangulahon parmainanon ganup ari. Ala sahalak hatoban, ndang boi si Josep pintor so sian karejona jala laho sian inganan i! Ingkon adopanna do na masa i marhite mamangke bisuk dohot habaranion. Mulahulak do ibana  mandok na so olo tu tungganeboru ni si Potipar sahat tu na maporus ibana.​—Jaha 1 Musa 39:7-12.

¹⁹ Pingkiri ma: Autsura si Josep jotjot mamingkirhon tungganeboru ni si Potipar jala somal maranganangan taringot seks, boi do ibana tongtong denggan di adopan ni Debata? Tontu ndang boi! Dipatudu si Josep do na so olo ibana mamingkirhon ulaon on, marhite patuduhon pangargaion tu Jahowa. Tangkas ma on sian hatana tu tungganeboru ni si Potipar. Ibana mandok, ”Ndang adong manang ise na umbalga di jabu on sian ahu, jala ndang adong na so dipadapot tu ahu, dungkon ni ho, ala jolmana [tungganeboruna] ho; tung olo ma ahu mambahen jea na sai godang, asa mardosa ahu maradophon Debata?”​—1 Musa 39:8, 9.

20. Songon dia do Jahowa mangurupi parngoluon ni si Josep?

²⁰ Pingkiri ma las ni roha ni Debata tingki mangida si Josep na dao sian keluargana boi tongtong marbisuk ganup ari. (Poda 27:11) Di pudian ni ari, diurupi Jahowa do si Josep asa kaluar sian penjara. Gabe sahalak perdana menteri, na mangurus sipanganon di Mesir ma ibana! (1 Musa 41:39-49) Tutu ma hata di Psalmen 97:10, ”Hamu ale angka na mangkaholongi Jahowa, sai hagigihon hamu ma na jat! Ibana do siramoti tondi ni angka na niasianna, sai paluaonna do nasida sian tangan ni parjahat!”

21. Songon dia do sahalak donganta na poso di Afrika mambahen haputusan na denggan?

 ²¹ Godang do naposo ni Debata saonari, patuduhon molo nasida ’mangkagigihon na jat jala mangkaholongi na denggan’. (Amos 5:15) Sahalak donganta baoa di Afrika, dielaela sahalak anak boru dongan sakalasna mangulahon parmainanon, molo diurupi donganta baoa i ibana ujian matematika. Donganta baoa on mandok, ”Pintor hupasiding do elaelana i. Molo hujaga diringku tongtong ias, gabe diargai halak ma ahu. Ummarga do on sian mas dohot perak.” Tutu ma, dosa boi mambahen sonang roha ”satongkin”, alai jotjot do on parohon gok hasusaan. (Heber 11:25) Ndang adong labana taulahon on molo tapatudos do tu las ni roha na tahilala ala mangoloi Jahowa.​—Poda 10:22.

22, 23. (a) Boi do sahalak Kristen na mangulahon dosa na balga mandapot pangurupion? (b) Aha do pangurupion na diparade tu angka na mangulahon dosa?

²² Ala mardosa do hita, porlu do marsitutu asa boi mangulahon lomo ni roha ni Debata dohot pasidingkon giotgiot ni daging. (Rom 7:21-25) Tangkas do ditanda Jahowa hita, ala ”diingot do orbuk hita”. (Psalmen 103:14) Sipata, olo do sahalak Kristen mangulahon dosa na balga. Alai, boi dope ibana mandapot pangurupion? Boi! Ra, on parohon na hansit tu ibana, songon na hea dihilala Raja Daud. Alai, tongtong do roha ni Debata ”marpamuati” tu halak na marsitutu mambahen hamubaon.​—Psalmen 86:5; Jakobus 5:16; jaha Poda 28:13.

²³ Di huria Kristen, diparade Debata do muse ”silehonlehon tu angka jolma”, i ma angka sintua na toras di partondion jala rade mangalehon pangurupion. (Epesus 4:8, 12; Jakobus 5:14, 15) Na tinuju ni nasida, i ma mangurupi angka na mangulahon dosa asa mardenggan dohot Debata jala mandapot bisuk asa unang mangulahon dosa i muse.​—Poda 15:32.

24, 25. (a) Songon dia do sahalak baoa na poso na disurat Poda 7:6-23 patuduhon dirina halak ”na hurang roha”? (b) Songon dia do hita boi gabe halak na ”dapotan roha”?

²⁴ Adong do dipaboa di Bibel taringot halak ”na hurang roha” dohot halak na ”dapotan roha”. (Poda 7:7) Ala ndang toras di partondion jala ndang hea marhobas tu Jahowa, sasahalak ” na hurang roha” boi do ndang marpangantusion laho mambahen haputusan na denggan. Songon baoa na poso na disurat di Poda 7:6-23, ummura do dielaela mangulahon dosa na balga. Alai, halak na ”dapotan roha” mamareso rohana marhite marsiajar Bibel jala tongtong martangiang. Marsitutu do ibana nang pe jolma na mardosa laho pahombarhon pingkiran, roha dohot nasa ulaonna tu lomo ni roha ni Debata. Marhite songon i, ibana ”mangkaholongi hosana” jala ”dapotan tua”.​—Poda 19:8.

²⁵ Tasungkun ma dirinta: ’Porsea do ahu sintong sude prinsip ni Bibel? Porsea do ahu molo huulahon i boi mandapot las ni roha?’ (Psalmen 19:7-10; Jesaya 48:17, 18) Molo hurang dope pos ni rohamuna, nang pe holan saotik, marsitutu ma hamu asa boi marpos ni roha. Rimangi ma aha do pangkorhonna molo sasahalak ndang mangulahon hata ni Debata. Asing ni i, ”dai jala ida hamu denggan basa ni Jahowa” marhite mangulahon hasintongan jala mamingkiri angka parange na denggan, na sintong, na tigor, na ias jala manjujui hita mangulahon holong. (Psalmen 34:8; Pilippi 4:8, 9) Molo diulahon on, lam holong ma rohamuna tu Jahowa, diulahon hamu ma lomo ni rohaNa jala dihasogohon hamu ma sogo ni rohaNa. Halak na mardosa do si Josep. Alai, boi do dipasiding parmainanon, diloas ibana do Jahowa mangajari ibana saleleng martaontaon, mangalehon tu ibana bisuk dohot roha pangantusion. Anggiat ma hamu mangulahon na sarupa.​—Jesaya 64:8.

26. Aha do na taulas di pasal na mangihut?

 ²⁶ Jahowa manompa organ reproduksi ndang laho diparmeammeam manang laho manggohi giotgiot ni daging. Alai, asa boi do marpinompar jala mangkilala las ni roha di parsaripeon. (Poda 5:18) Songon dia do roha ni Debata taringot parsaripeon, taulas ma di dua pasal na mangihut.