1, 2. Ka ladügübei Balaamü lun ladügün dañu houn lumutuniña Heowá?

ÑǗDÜNTI óuchahati lidoun fulasu le hínsiñetimabei lun áluaha somu luwuyeri úduraü. Aba lanúadahani emei le lunbei layusuruni, aba líchuguni luagu gǘnwünri aba lachüürünu fítaru, dan le larihin tederaagüdün aba lachawarunu. Aba láhayachun, ladüga lubuidun lanúadiruni emei le layusurubei.

² Lidan irumu 1473 lubaragiñe wadaani, anihein meha aban wügüri gíriti Balaamü le giñe anúadirubei aban emei buiti, ani busenti meha hágürüni lumutuniña Bungiu gǘnwüri, ha meha tídanbaña kianpu-agei lidan fulasu mawübüriti Moabü lidan láfadaragun luma Fulasu Füramasewati. Íbini meha busén lan lásügürün kei lani Heowá profeta, aban meha wügüri igaaduati le áluahoubei lun líñaraguniña ísüraelina. Gama lumoun, aba ladügün Heowá lun labiniruniña. Kei le busén lubalin Balaamü seinsu, mederaguagüdünti, aba lasaminarun anhein lan ibiha lun héiguadun ísüraelina lidoun figóu le wéiriti, Bungiu guánarügüba lan íñaraguaña. Kati emei layusurubei Balaamü? Yusu lumutiña würiña magadiñeburitiña ani nibureingiña ha Moábüna (1 Lúrudu 22:1-7; 31:15, 16; Arufudúni 2:14).

3. Halía san lébeda tani lisadaran Balaamü efekütu?

³ Huutu meha san lisadaran? Anha lugundun gíbetiña wügüriña ísüraelina éiguadutiña tidoun, aba “hádaragun houngua  hamoun würiña Moábüna”. Darí lun háhuduragun houn habungiutegu moábüna, kéiburi Baali-peoru le lubungiute agamariduni. Kei resultóu hilatiña 24,000 wügüriña lubaragiñe hebelurun lidoun Fulasu Füramasewati. Ma lirun lamiselu! (1 Lúrudu 25:1-9.)

4. Ka uagu héiguada saragu milu ísüraelina lidoun magíaguni?

⁴ Ka adügübei lun lasuseredun katei wuribati le? Le tídanbei hanigi saragu ísüraelina. Aba laribadun hagaburi ladüga hadisedun luéi Heowá, ani aba habulieiduni lesefuruniña Ehiptugiñe, léigagüdüniña lidan fulasu mageirawati ani barǘ laña lau ibagari lidoun Fulasu Füramasewati (Ebüréu 3:12). Dan le lasaminarun apostolu Pábulu luagun sügǘ le, ariñagati: “Moun lumuti wahoruhan kei meha hadüga fiu hádangiñe, aba larufuduni Bungiu luagu wuriba lan le hadügübei lau láfaragun wein-ǘrüwa-milu hádangiñe lidan aban weyu” (1 Korintuna 10:8). *

5, 6. Ida liña líderaguniwa abahüdagüni luáguti hafigoun ísüraelina lidan fulasu mawübüriti Moabü?

⁵ Ítara liña gádantiña lubueingu Bungiu uguñe weyu kei abahüdaguni le lídanbei 1 Lúrudu. Lugundun belumemediwa lidoun aban Fulasu Füramasewati le wéiritimati (1 Korintuna  10:11). Wawinwanduña lidan aban ubóu ñein lubéi hanarime lan hasaminarun gürigia luagun agamariduni sügǘ hau Moábüna. Sagü irumu, héiguatiña saragu milu kristiánugu lidoun magíaguni, tugugiaméme sádara to ídonboun héiguada ísüraelina (2 Korintuna 2:11). Gíbetiña asigiruti lani Simürí hénpulu ani gánitiña aban efekütu wuribati lidan damuriguaü. Aban meha ísüraelina Simürí le ebelaagüdübei aban würi madianna lau mabusigari tidoun hakianpun-agei ísüraelina ani belugudaloun tidoun likianpun (1 Lúrudu 25:6, 14; Húdasi 4).

⁶ Álügüdagua wamá woungua: “Rútina san fe luagu lídanñadina lan aban sügǘ libe le meha asuseredubei Moabü? Ariaguatina san nungua lidan iseri ubóu, afayeiruahaü le nagurabahabei?” Anhein ítara liña lubéi, adüga waméi sun wayaraati lun werederun lidan línsiñehabu Bungiu lau gaganbadi lun gumadi le: “Anuraha humá luéi magíaguni lidan agamariduni” (1 Korintuna 6:18, TNM).

7, 8. Tidan Bíbülia, ka mini lubéi dimurei magíaguni lidan agamariduni ani ka lanügübei houn ha awinwandubaña lidan?

⁷ Tidan Bíbülia, dimurei magíaguni lidan agamariduni (lidan güriegu pornéia) mini lan, sun luwuyeri agamariduni le múaranti luagu lilurudun Bungiu. * Kéiburi agabarahani, larounrun aban wügüri tuma aban würi dan le mamarieidungiña o tuma aban horu. Hayusuruni hayuma luma hanagangiñeti lidan agamariduni. Tamulidahanu aban würi lóustarun aban wügüri, lamulidahani aban wügüri tani o turi aban würi dan le mamarieidun hamá. Lagamaridun wügüri wügüri líledi o würi tuma würi, lagamaridun gürigia animaalu. *

 ⁸ Ariñagatu Bíbülia furangu: Siñati herederun gürigia ha asigirubaña adüga magíaguni lidan damuriguaü, mibihinbaña giñe ibagari magumuchaditi (1 Korintuna 6:9; Arufudúni 22:15). Íbini guentó gíbebei haturobulin, mañuuragunti hasaminan, féridi hamuti inebesei luma afiñeni hawougua, anihein magundani lidan hamarieidun, dageinaü le mabusenrun hamuti, luriban sandi luma óunweni (aliiha huméi Galasiana 6:7, 8). Kaba uagu wabusenra wárügüdün aban üma lánina saragu asufuriruni? Híruti gibe hamá gürigia masaminaruntiña luagun lani le resultóu dan le híchuguni furumiñeti pasu, haríagun iyawaü lánina agamariduni.

9. Madügünti funa san lariawagún katei burí lánina agamariduni dañu kei hasaminarun saragu? Afurangüagüda huméi hóunabun.

⁹ Lidan saragu ageiraü, fuátu iyawaü lánina agamariduni lidan sun fulasu: ñein lubéi talugurahóua garüdia, lidan uremu, tidan bigibigitu luma lidan saragu míñunu páhina lani Internet. * Inarüni san madügün lan dañu kei hariñagun saragu? Uá. Ha ariagutiña katei burí le, héiguatiña lidoun bisiu lun hamulidaagun houngua (masturbación) ani adaaguatiña “katei nibusigarídünati” ani gayarabei lásiñarun hawinwandun sin hagamaridun, aba wuriba lan hayumahan, gíbeti turóbuli lidan hamarieidun, íbini gayarati hígiragun (Rómana 1:24-27; Éfesuna 4:19). * Según lariñagun aban akutihati luagu katei le, dan le siñá lan lawinwandun gürigia sin lagamaridun ítara liña kei kánserü: “Hénrenguti lararamun lawanserun ani hénrenguti giñe lareidagun”.

10. Ida luba wayusuruni inarüni méiniti le lídanbei Santiagu 1:14, 15? (Ariha huméi kuaduru “ Asagara erei lun haruma wamá”.)

 ¹⁰ Lunti mabulieidun wamani dimurei le lídanbei Santiagu 1:14, 15: “Dan le lachawahani luriban layumahan gürigia, ligía lábürühan lidoun ladügǘn le wuribabei. Lídangiñe burí luriban ayumahani le, liabin figóu; danti le laweiridun figóu barüti óunweni”. Anhein ñübuin luriban ayumahani lidoun wasaminan mosu wasagaruni lídangiñe lau lóufudagun. Kéiburi dan le wadunragun tuma iyawaü to bulagiaditu, lunti wadigiruni warihin lau lóufudagun, wéñeguchunu kónputadora, wasansiruni programa o wadügün furumiñeguarügü katei lun méiguadun wamá lidoun luriban ayumahani le gayarati lanügüniwa lidoun magíaguni (aliiha huméi Matéu 5:29, 30).

11. Dan le liabin luriban ayumahani woun, ida liña warufuduni wafiñen luagu Heowá?

¹¹ Subuditima lumutiwa Heowá sügǘ lau wasubudiragun woungua. Lau buiti resun leweridirawa: “Ualá ni aban hídangiñe  agamariduti mamarieidunga, madügün huguyame katei wíyeti, mafalara huméi luriban haritagun, ígira humeime igaaduaü, lememe ítarabei kei lanügǘniwa irisini kei Bungiu” (Kolosana 3:5). Inarüni mosu lan wáfaagun saragu lun wadügüni. Gama lumoun, líderagubadiwa Wáguchi le siélubei, le hínsiñehabubei ani gaguraasun ligía (Sálumu 68:19). Ligíati, sagü liabin luriban ayumahani woun, amuriaha wamá luma lau lóufudagun lun líchugun “óunwenbu ubafu” woun, ani áfaagua wagíame lun wasaminarun luagun amu katei (2 Korintuna 4:7; 1 Korintuna 9:27; ariha huméi kuaduru “ Ida luba nesefuragun nungua luéi luriban échuni?”).

12. Ka tuwuyeri ‘anigi’ uáguboun layanuhóua ya ani ka uagu mosu lubéi wóunigirunu?

¹² Ariñagati urúei Salomón: “Lídangiñe sun katei [...] góunigiboun banigi, ladüga tídangiñe liabin ibagari” (Ariñawagúni 4:23). ‘Anigi’ lidan bérusu le layanuhaña luagu kátañadiwa lan múnadagiñe wabiti luma ida liña lan larihiniwa Bungiu. Le larihibei Bungiu tidan ‘wanigi’ ligíaba achoururei anhein wibihiba lubéi o mibihinbadiwa lan ibagari magumuchaditi, mama ida liña lan harihiniwa amu. Wéiriti liseriun katei le. Ligíati, mosu wáyeihani Hobu, aban wügüri úaraguati le adügübei aban daradu luma lagu lun mawamadirun lan amu würi tuéidigia lúmari (Hobu 31:1). Kei abürühati Sálumu, mosu wafurieidun: “Míchugun nubéi narihin luagun katei le mabuidunti” (Sálumu 101:3).

13. Ka meha Dinaboun, ani ka uagu chara tubéi lidan táluahan umadagu?

¹³ Kei wafurendeirun lidan kapítulu 3, wéiriti hani umadagu efekütu wawagu, dandu lun buiti kei lun wuribati (Ariñawagúni 13:20; aliiha huméi 1 Korintuna 15:33). Ítara liña larufuduni tani Dina, to liráü Hakobu, hénpulu. Íbini buidu lan tagüriarún, charatu lau tidin áluaha umadaguaü hamá würiña nibureintiña kananna, aban fulasu subudiwati meha luagu magíagu hamá lílana kei Moabü (Fádirigu 18:6-25). Furumiñeguarügü wügüri kananna dan larihinu Dina lasaminaruba  ménrengubei lan tábürühan lidoun magíaguni, íbini Sikemü wügüri le “inebewatimabei hadan liduheñu Amoru le lúguchi” (Agumesehani 34:18, 19).

14. Ka lanarime resultóu lanügübei luriban desidírü tan Dina?

¹⁴ Dan le tasubudirunbalin Dina Sikemü, háfuga masaminaruntu meha tarounrun luma. Kei furumiñeguarügü kananna, dan le háguduña lan lau ayumahani, íbini maha tan nibureintu tuguya, “aba lafosurunu lun tarounrun luma”. Lau lásügürün dan, “aba tínsiñedun lun saragu” gama lumoun siñaali lasansiruni le adüga laalibei tun (aliiha huméi Agumesehani 34:1-4). Mámarügüñoun Dina asufurirei resultóu. Ladüga luriban tanúadahaniña tumadagu, barüti saragu turóbuli le adügübei lun hasufurirun tufamilia igarigu luma busiganu (Agumesehani 34:7, 25-31; Galasiana 6:7, 8).

15, 16. Ida liña wibihini lichú aau le inarüniti? (Ariha huméi kuaduru “ Bérusu burí lun wasaminarun”.)

¹⁵ Háfuga furendeitu Dina aban leksióun súdiniti, gama lumoun, lau luriban tafurendeirei. Wagía, mama mosu  wafurendeirun ítara. Hínsiñeti Heowá woun, ligía gaganbadi wabéi lun leweridihan kéiburi le ariñagubei lun ‘wóundaragun hama chu tau’ (Ariñawagúni 13:20a). Ánhawa gaganbadi lun Bungiu súnwandan, wasubudirubei ka lan üma buídubei, le lánina “ísuruni luma irichaü”, ani wesefuruba luéi bandi turóbuli (Ariñawagúni 2:6-9; Sálumu 1:1-3).

¹⁶ Ruti Bungiu lichú aau houn sun ha amuriahabalin luma. Gama lumoun, lun wibihini, mosu wafurieidun ani aturiaha  wamounme Bíbülia tuma agumeiraguagüdüni lúmagiñetu musu úaraguati ani gúnfurandati (Matéu 24:45; Santiagu 1:5). Mosu giñe ǘnabugu wamá ani resibi waméime adundehani le tídanbei Bíbülia (2 Urúeigu 22:18, 19). Ru wamá aban hénpulu. Chóuruti sun lan wagía subudi wamuti geyeedaguaditu lan anigi ani salufuritu (Heremíasi 17:9). Gama lumoun, lidan lóurate wibihin eweridihani luma ídemuei le ichugúbei woun lau ínsiñehabuni, resibi wamuti san lau ǘnabuguni?

17. Ka sügǘ úmabei gayara lan ladunragun aban úguchili tuma lisaani, ani ida luba ladügün lun tararamagun asaminara?

¹⁷ Samina wamá luagun sügǘ le: máhati aban úguchili táfuridun liráü luma aban nibureinti kristiánu, ánheingubeirügü ñüdün amu gürigia hamá. Aba tóunabun nibureintu tuguya: “Le san mafiñen ban nuagu núguchi? Madügünbadiwa ni kata wuribati!”. Chóuruti weiri lan línsiñe Heowá tun ani masaminaruntu tadügün ni kata wuribati, gama lumoun, tóuseruña san lau “lichú aau”?, tanurahaña san luéi téiguadun lidoun magíaguni lidan agamariduni? O tafiñeruña luagu ‘taritagun guánarügü’? (Ariñawagúni 28:26.) Chóuruti ñübuin lan amu burí inarüni méiniti lidoun wasaminan le gayarati líderaguni úguchili le adüga lun tasaminarun liráü (ariha huméi Ariñawagúni 22:3; Matéu 6:13; 26:41).

18, 19. Ka óuchawaguni ídanbei ladariragua Hosé lungua, ani ka ladügübei?

¹⁸ Anihein meha aban nibureinti hínsiñehabuti lun Heowá anurahati luéi magíaguni lidan agamariduni. Hosé líribei, tíbiri Dina luéigiñe túguchi (Agumesehani 30:20-24). Dan le ñǘraügili ariha lumuti luriban resultóu le lanügübei tichara litu. Dandu sügǘ ligía luma lueirin labusenrun lerederun lidan línsiñehabu Bungiu, seriwiti lun saragu irumu lárigiñe, dan le aban lubéi idamuni Ehiptu ani “sagü weyu” tálugun lani liyubudiri weiriou tarounrun luma. Kei idamuni lubéi, siñati lígiruni luadigimari lun lidin, mosu meha lárügüdün anigi ani rárama ligíame lun turóbuli ligía lau lichú aau. Ani ítara  liña ladüga, máhati ladügüni le tabusenrubei würi tuguya, lagumuhóun oura mosu léibaagun tuéi (aliiha huméi Agumesehani 39:7-12).

¹⁹ Samina wamá murusun: Kiputi hamuga san úaraguni lun hamuga lerederun asaminara tuagun würi tuguya luma luagun agamariduni? Hénrengubei yebe. Lubaragiñe labuinchagüdüni lichügü lau saminaü wíyeti, tóunigi lumuti Hosé lumadagua luma Heowá. Ítara liña larufuduni lau le lariñagubei tun lúmari Potifárü: “Mamahanti niyubudiri lau ni kata nun, luéidigia bau, ladüga lúmari buguya; siñati lubeiti nadügün aban katei wuribati ítara lun nafigouhan ligibugiñe Bungiu” (Agumesehani 39:8, 9).

20. Ka ladügübei Heowá luagu lufulesein Hosé?

²⁰ Ma funa lugundan Heowá dan le larihini lasigirun Hosé arufuda úaraguni weyu luagu weyu íbini dise lan hawéi liduheñu! (Ariñawagúni 27:11.) Lárigiñe, aba ladaürǘn Hosé, gama lumoun adügati Heowá lun lasagarún ñéingiñe lun ligía lan furumiñeti minisi luma lun larihin lau éigini lidan sun Ehiptu (Agumesehani 41:39-49). Inarüniti dimurei le lídanbei Sálumu 97:10: “Hínsiñehabuti Aburemei houn ha iyereehabúbaña lun wuribati; góunigi lumuti habagari ha gúnfulibaña luma; sefu lumutiña luéi hábürühan háhaburugun gürigia wuribatiña”.

21. Ida liña larufuduni aban nibureinti áfürikana úaragua lan lun lafiñen?

²¹ Kei Hosé, gíbetiña kristiánugu gaganbaditiña lun gumadi  le: “Iyereegulá wuribani hun! Hínsiñela le buídubei hun!” (Amosu 5:15). Abahüdahati aban nibureinti áfürikana luagu mabusigari tan aban lani paaná lidan haturiahan lau tariñagun lun tarounruba lan luma anhoun líderagua lidan egüsámini tani matemátika. Aba lariñagun: “Lúmagiñe furumiñe máhatina. Ladüga úaragua nan lun nafiñen, meferidirun numuti inebesei le nasandirubei nuougua, le gebegitimabei nun sügǘ lau sun golu le ubouagubei”. Inarüni gayara lan “wagundaarun lidan figóu luagu fiú dan”, gama lumoun, ugundani burí gásügürati le, manügünti ni kata buiti luéidigia magundani (Ebüréu 11:25, TNM). Siñati giñe konpararua lan luma ugundani magumuchaditi le lunbei wibihini dan le gaganbadi wamá lun Heowá (Ariñawagúni 10:22).

22, 23. a) Anhein éiguada aban kristiánu lidoun aban figóu wéiriti, ka uagu garaninagili lubéi? b) Ka ídemuei gayarabei libihini le afigouhabei?

²² Kei le gafigoun wabéi, mosu wáfaagun lun mígiraguagüdün wamá woungua lun luriban wayumahan ani adüga wameime le lamuriahabei Bungiu wama (Rómana 7:21-25). Mabulieidun lumuti Heowá “múa lan wabuñabei” (Sálumu 103:14). Ánhawati adüga aban figóu wéiriti, maraninaali san? Uá. Inarüni gayara lan lanügün luriban resultóu woun ítara kei lasuseredun lun urúei Dawidi. Gama lumoun, ‘gíchigaditi Bungiu ferudun’ ánhawa asaküriha ani ‘gúfese waméi wafigoun’ (Sálumu 86:5; Santiagu 5:16; aliiha huméi Ariñawagúni 28:13).

²³ Lidan damuriguaü, ruti giñe Heowá aban ídemuei woun lidan línsiñehabu: “wügüriña keisi idewesei”, o hóuniri mudún ha derebuguhaña lidan hafiñen ani aransetiña lun híderaguniwa (Éfesuna 4:8, 12, TNM; Santiagu 5:14, 15). Anhein afigouhaadiwa lubéi, híderagubadiwa ederebudagüdei wamadagua luma Bungiu luma lun wíchuguni pasu le lunbei líderaguniwa lunya méiguadun wamá: wibihin “gunfurandaü” (Ariñawagúni 15:32).

24, 25. a) Ida liña larufuduni nibureinti le uágubei layanuhóua lidan Ariñawagúni 7:6-23 ‘ibidiougua lan lau’? b) Ida liña ‘libihíniwa gunfurandaü’?

²⁴ Ayanuhatu Bíbülia luagu aban gürigia le “ibidiouguabei aau” luma luagu amu le ‘ibihibei gunfurandaü’ (Ariñawagúni 7:7). Le ‘ibidouguabei aau’ úati gunfuranda lan ani mabuidunti lichügü, gayarati ladüga lan lumahan lun ligaburi larihini Heowá katei o ladüga iserigili lan lidan leseriwidun lun Bungiu. Ligía ménrenguntima lubéi léiguadun lidoun figóu wéinamuti, kei nibureinti le uágubei layanuha Ariñawagúni 7:6-23. Le ‘ibihibei gunfurandaü’ nidiheriti luagu ida liña lan múnadagiñe libiti, ligíati laturiahanbalun Lererun Bungiu sagü weyu lábugiñe furíei. Íbini gafigoun lan, adüga lumuti sun liyaraati lun lagundaarun Heowá lau le lasaminarubei, le layumahabei, le lasandirubei luma le labusenrubei ladügün. Ítara liña larufuduni ‘hínsiñegua lan lungua’, lidan amu dimurei, ladügüña buiti lúniwagua ani busenti ‘lawanserun’ (Ariñawagúni 19:8).

²⁵ Buiti lun wálügüdagun woungua: “Chouru numuti san lilurudun lan Bungiu buítimabei ani ánhana lan afalarei gúndaatimabei lan nibagari?” (Sálumu 19:7-10; Isaíasi 48:17, 18). Anhein machoururun wabalin buidu, lunti wasaminarun luagun resultóu le lanügübei maganbadi lun Bungiu. Súdiniti giñe ‘wouchun ariha wamaamugei luagu buidu lan Aburemei’, dan le wawinwanduni inarüni ani buíngüda wameime wasaminan lau lubuidun aritaguni le inarüniti, le richati, le harumati, le buídubei (Sálumu 34:8; Filipuna 4:8, 9). Ánhawa áfaagua saragu, laganwounduba ínsiñeni le wasandirubei luagu Bungiu luma luagu katei le hínsiñebei lun, ani íyereegutimabei katei le iyereegubei lun woun. Haritagua wamá luagun Hosé, íbini meha gafigoun lan anurahati luéi magíaguni lidan agamariduni. Ladüga ígirati lun Heowá lan adundehei libagari luagu saragu irumu ani ru ligía aban anigi gaganbaditu lun, ligiaméme lunbei wadügüni (Isaíasi 64:8).

26. Kaba katei súdiniti wakutiha?

 ²⁶ Umegeguni le líchugubei Bungiu hawagu kada gürigia lun gayara lan hagibedagun ubouagu, mama lunti hayusuruni kei adibiri o lúnrügü hagidaruni luriban hayumahan. Ru lumuti Heowá lun gayara lan gasaanigu hamá gürigia maríeitiña ani gunda hagíame hámagua (Ariñawagúni 5:18). Lidan biama kapítulu le asigirubei wakutihabei ida liña lan larihini Heowá maríei.