1, 2. Fuhkah pwacpa kuluk lal Balaam in ahkkulukye mwet luhn Jeova uh?

SIE mwet pahtuhr el som nuh ke acn se ma el luhngse emeet ke acn in pahtuhr uh. Oasr kain in ik ma el ac luhngse na pwacye in ahsack. Pwacnacng, el sulaclah pa se ma el ac orekmakihn uh ac sislah ah nahtuhl uh nuh inkof uh. Ke na kihtin pacl tohkoh, el puhla lah ah ac fo nahtuhl uh ulul, na el tuhlahkuhnack. Ac el isracsr srihsrihk ke srihpen el etuh lah pa se ma el sulaclah inge arlacna wo.

² Apkuhran nuh ke yac 3,500 somlah ah, mukul se inge pahngpahng Balaam el nuhnkuh yohk pac ke sie kain in pa ma el luhngse in orekmakihn. Tuhsruhktuh, ma el luhngse in srihfe uh pa mwet luhn God suc muhta ke Infahlfahl Moab. Acn se inge oan oasr ke mahsrol ke Facl in Wuhlelah uh. Balaam el oraclah in muh el sie mwet pahluh luhn Jeova, tuhsruhktuh el sie mukul rahpkuh suc moul nuh se in ahkkulukyelah mwet Israel. Tuhsruhktuh, ke srihpen Jeova el tulokihnilyac, Balaam el ahkinsewowoye mwet Israel muhkwena. Ke srihpen Balaam el arlacna kwacfeacng in eis molin orekma lal uh, el nuhnkuh nuh sel sifacna muh el fin kuh in srihfaclah mwet Israel inge in oruh sie ma na kuluk ac, sahp ma inge ac kuh in oruh God elan selngawi mwet lal uh. Ke pa ingacn ma Balaam el sulaclah  elan oruh, el orekmakihn muhtwacn fuhsr na kahto fin acn Moab in oacna mwe pa se lal.​—Oekyuk 22:1-7; 31:15, 16; Fwackyuk 2:14.

3. Ke inkacnek fuhkah pwacpa kuluk lal Balaam uh orekma?

³ Yac pwacpa kuluk se lal inge orekma? Ahok. Tausin pucspucs sin mukul Israel eltahl srihfeyucklac ke kain in pa se pacna inge ke eltahl “muhtwacwacack in orek kosro yurin muhtwacn Moab.” Eltahl oacyacpac muhtwacwacack in alu nuh sin god luhn mwet Moab inge, weluhlacng Baal Peor ke eltahl oan yurin sie sin sie in alu nuh sel. Ke sahflahiyac ah, oasr mwet 24,000 sin mwet Israel suc tuh misac meet liki na eltahl ilyak nuh ke Facl in Wuhlelah. Ma na yohk se pa sikyak inge!​—Oekyuk 25:1-9.

4. Efuh kuh tausin pucspucs sin mwet Israel tuh sruhflah ke orekma in kosro?

⁴ Meac srihpac se oruh ma upac se inge in sikyak nuh sin mwet Israel? Muhtwacwacack in yohkwelihk ohiyac ac nuhnak kuluk luhn mwet pucspucs inge ke eltahl forlah liki Jeova, suc God se ma molweltahllah liki acn Egypt, kihtacltahl ke yen mwesis, ac kohluhltahllah nuh ke facl in wuhlelah. (Hebrew 3:12) Ke Paul el nuhnkuh ke ma sikyak inge,  el suhmuhslah: “Kuht in tiac moulkihn inkacnek in kosro, oacna kuhtuh selos ac in lwen sefanna, tausin longoul tolu selos misac.” *​—Sie Corinth 10:8.

5, 6. Efuh kuh ma suhmuhslah ke orekma kuluk luhn mwet Israel ke Infahlfahl Moab uh yohk srihpac nuh sesr ke pacl inge?

⁵ Ke pacl inge puhs mwe lutlut ke ma sihmlac ke puk luhn Oekyuk nuh sin mwet luhn God, suc arlacna apkuhran in ilyak nuh ke sie facl sasuc ma wo liki na facl wuhlelah uh. (Sie Corinth 10:11) Ke sie mwe puhpuhlyuck, luhngse luhn mwet pucspucs in oan yurin sie mwet ahkkahlwemye ohiyac luhn mwet Moab in pacl meet ah tuhsruhktuh upac liki na. Ke kais sie yac, mwet Christian pucspucs puhtatlac ac oruh orekma in kosro. Pa pacna inge pa se ma srihfasrlah mwet Israel in pacl meet ah. (Luo Corinth 2:11) Ac in oacna ke Zimri el tiac mwekihn in usack muhtwacn Midian se nuh ke lohm nuknuk sel ah, ke pacl inge, oasr mwet suc asruoki yurin mwet luhn God ac kuhtuh pac mwet lili suc bacptais tari suc mwe ahkkuluk nuh sin mwet ke congregation uh.​—Oekyuk 25:6, 14; Jude 4.

⁶ Yac kom kuh in sifacna petsacelah muh ma sikyak ke Infahlfahl Moab inge sikyak nuh sum ke pacl inge? Yac kom kuh in liye lah kom apkuhran in eis mwe insewowo lom ke sie facl sasuc ma kom soano ke lusen yac pucspucs? Fin ohingacn, sang kuhiyom kewa in muhtana in luhngse luhn God uh ke kom ahkos masap se lal inge: “Kahing liki inkacnek in kosro.”​—Sie Corinth 6:18.

7, 8. Meac se inge orekma “in kosro,” ac ke inkacnek fuhkah mwet suc oruh ma inge eltahl kosrwacni ma eltahl tahknelihk uh?

⁷ In oacna ma Bible uh orekmakihn, orekma “in kosro”  (ke kahs Greek, por·neiʹa) pa oacna sie kain in orekma fohkfohk inmahsrlon mwet luo suc tiac fahsr fal nuh ke oakwuck luhn Bible nuh ke moul in pahyuck. Kuhtuh pac orekma in kosro uh pa ke mwet pahyuck se wi sie pacna mwet suc el tiac pahyuck nuh se, wi mwet se oan ke srihpen mani, ac ke mwet luo suc tiac pahyuck eltahl tuhkweni oan, orekmakihn inwacluh in puhsral acn in orek tuhlihk luhn mukul kuh muhtwacn, ohsun ke mahno ke orekmakihnyen acn tok ke sie mwet, ac ke sie mwet el puhsral acn in orek tuhlihk luhn sie mukul kuh muhtwacn ma el tiac pahyuck nuh se. Ohiyac inge wekuhnacng pac kain in orekma inmahsrlon mukul nuh sin mukul kuh muhtwacn nuh sin muhtwacn, ohsun ke mahno luhn sie mwet nuh sin ma orahkrahk kuh in puhsral acn in orek fahko luhn sie ma orahkrahk ke inkacnek fohkfohk. *

⁸ Ma suhmuhslah uh arlacna kahlwem: Mwet suc oruh orekma in kosro uh eltahl tiac kuh in muhta ke congregation luhn mwet Christian ac eltahl ac tiac eis moul ma pahtpaht. (Sie Corinth 6:9; Fwackyuk 22:15) In wekuhnacng, arlacna yohk ma upac ma sie mwet suc oruh ma inge el sun ke srihpen wacngihn luhlahlfongi lal nuh sin mwet sahyac ac el tiac suhnakuhnuhl sifacna, ma upac nuh ke moul in pahyuck, sie inse toasr ke srihpen ahkkulukye nuhnak ac puhlakihn, pihtuctucyak ma tiac planiyuck, mas ac oacyacpac misac. (Riti Galatia 6:7, 8.) Kom tiac enenuh in muhtwacwacack ke sie inkacnek ma ac kol nuh ke sie moul ma nwacnwaclah ke mwe ahsor yohk. Mwe ahsor se nuh sin mwet pucspucs lah eltahl tiac ngwetlah nuhnkuh ke sahflahiyac uh ke pacl se ma eltahl oruh ma tahfonglac ke muhtwacwacackiyac an, pa in liyeyuck petsac fohkfohk.

9. Kuhtuh mwet uh fahk muh petsac fohkfohk uh tiac kuh in ahkkulukye kuht. Yac ma inge pwacye? Ahkuhtweyac.

⁹ Ke acn pucspucs, oasr orekma fohkfohk ma oreklac ke inkacnek luhn petsac, mwe rit kuh ke puhsra ma recordiyucki ac sramsram luhn mwet ke telefon in puhrakack kena  luhn mwet se in wi sie mwet oan. Ma inge kuh in oacna sie petsac ke sie mwet suc oraclah luhmahl in pihrihk kena luhn sie mwet ac oacyacpac petsac ke orekma in tuhkweni ke mahno luhn mwet luo kuh puhs liki. Kain in petsac inge kewana ahkkahlwemyeyuck ke acn in kuhka mackuhsin, oasr ke on ac ke tv, ac nwacklah pac internet uh. Kuhtuh mwet uh fahk muh ma inge tiac kuh in ahkkulukye kuht. Yac pwacye? Moh! Mwet suc pahlah ke liyeyuck petsac fohkfohk uh ac kuh in pahlah pac in orekmakihn mahnoltahl ke inkacnek fohkfohk ac ma inge ahkyohkye ‘luhng luhn ikoac suc mwe ahkmwekihn yohk.’ Ma inge ac kuh in oruh sie mwet elan ahkfalye kena se inge pacl nuhkewa, in fohkfohk nuhnak lal, ac elan sun ma upac ke moul in pahyuck lal uh, kuh in oacyacpac divorce. * (Rome 1:24-27; Ephesus 4:19) Sie mwet suc orek research el luhmah mwet suc pahlah in ahkfalye kena inge pacl nuhkewa nuh ke cancer. El fahk, “Cancer uh ac kap na kap ac sa in fahsrelihk. Sesahlah in sifacna wacngihnlac ac ma inge oacyacpac upac in ahkwoyeyuck kuh unweyucklac.”

10. Ke inkacnek fuhkah kuht kuh in orekmakihn kahs in kahsruh in James 1:14, 15? (Liye pac pohk se inge “ Nga Eis Kuh In Moulkihn Moul Nwacsnwacs Fuhkah.”)

¹⁰ Nuhnkuh ke kahs ma sihmlac in James 1:14, 15 inge: “A mwet se el srifweyuck ke srihpen luhngse lal sifacna, suc amackuhnuhllah nuh ke ma kuluk ac el sruhflah. Ac ke kena kuluk lal kuhi in el, ac oswelah ma kuluk luhlahp; ac ke ma kuluk inge yohkwelihk na, ac kohluhllah nuh ke misac.” Pwacnacng, kena kuluk se inge fin ilyak nuh ke nuhnak lom an, suhlahklahk na in eslah liki! Ke sie mwe puhpuhlyuck, kom fin liyacack sie petsac fohkfohk ah, suhlahklahk na ngwetlah liki, konelah computer an kuh ekuhllah channel ke tv an. Oruh ma nuhkewa ma kom kuh in  oruh tuh kom in tulokihnyac kena kuluk se inge in tiacna yohkwelihk!​—Riti Matthew 5:29, 30.

11. Ke kuht lain kena kuluk lasr uh, kuht ac ahkkahlwemye fuhkah lah kuht luhlahlfongi Jeova?

¹¹ God el etwekuht yohk liki kuht sifacna. Pwacnacng, oasr srihpac wo lal in moklacl Paul elan suhmuhslah ma inge: “Ke ma inge kowos enenuh in lwelah ma luhngse luhn facluh suc orekma in kowos an in misac: kain ma kuluk luhn moul in kosro, kuhtwena luhmah fohkfohk, luhng lun ikoac, luhngse kuluk, ac rahpkuh (tuh rahpkuh el oacpacna alu nuh ke ma sruhloaclah).” (Colossae 3:5) Pwacye, sahp upac in oruh ma inge. Tuhsruhktuh, esam lah kuht kuh in siyuck kahsruh sin Pahpah na luhngse ac mongfihsracsr se tuhmwacsr uh. (Psalm 68:19) Pwacnacng, suhlahklahk ngwetack nuh sel ke pacl ma nuhnak fohkfohk inge ilyak nuh ke nuhnak lom an. Puhruhe siyuck ke “kuh fuhlwactlacna,” ac lihksreni pahtok nuhnak lom an in nuhnkuh ke ma sahyac.​—Luo Corinth 4:7; Sie Corinth 9:27; liye pohk  se inge “ Nga ac Kuhtanglah Fuhkah Ohiyac Kuluk se Ma Nga Pahlah Kac Inge?”

12. Meac se inge “nuhnak” lasr, ac efuh kuh kuht enenuh in karuhnguhnwacng?

¹² Solomon, sie mukul lahlmwetmwet el suhmuhslah: “Arlacna karuhnguhnwacng nuhnak lom an, mweyen moul lom ac sikyak oacna ma kom nuhnkuh.” (Soakas 4:23)  Ahok, nuhnak lasr uh pa God el liye uh. Ohiyacsr pa yohk srihpac nuh sel uh, ac tiac atacsr ye muhtuhn mwet sahyac uh. Ohiyacsr pa ac fahkwack lah kuht ac eis moul ma pahtpaht kuh tiac uh. Ma inge arlacna kahlwem ac yohk srihpac nuh ke moul lasr uh. Job, sie mwet kuhlwacnsap oaru, el oraclah sie wuhleacng kuh wuhlelah na kuh ke muhtahl, tuh elan tiac ngwetacng liye sie muhtwacn ac oasr kena lal nuh sel. (Job 31:1) Mwe srihkasrak na wowo se nuh sesr pa inge! Mwet sihm luhn psalm el ahkkahlwemye kain in nuhnak se pacna inge ke el puhruhe ac fahk: “Furohklah muhtuhk liki ma lusrohngtwen.”​—Psalm 119:37.

13. Suc Dinah, ac efuh kuh kuluk kawuck ma el sulaclah uh?

¹³ In oacna ke kuht liye ke Sapta 3 ac, kawuck lasr uh kuh in kihfuhskuhtlac in oruh ma wo kuh ma kuluk. (Soakas 13:20; riti Sie Corinth 15:33.) Nuhnkuh ke mwe srihkasrak lal Dinah, tuhlihk muhtwacn se nahtuhl Jacob. (Genesis 34:1) Finne ahkpah ma ituckyang nuh sel Dinah ah wo ke el kapkapack ac mahtuhlah, el oraclah sulaclah na kuluk se ke el kawuckyak nuh sin tuhlihk muhtwacn Canaan. In oacna mwet Moab, mwet Canaan inge etweyuck ke orekma fohkfohk laltahl uh. (Leviticus 18:6-25) Ke liye luhn mukul Canaan ac Shechem, suc “mukul se ma oa emeet in sucu luhn pahpah tuhmwacl” ah, Dinah el oacna muhtwacn Canaan nuhkewa sahyac suc ahkolah in oruh ma kuluk.​—Genesis 34:18, 19.

14. Sulaclah lal Dinah nuh ke mwet suc el asruoki nuh se uh oraclah ma upac fuhkah?

¹⁴ Sahp Dinah el tiac nuhnkuh elan weluhl Shechem oan ke pacl se el liyacl ah. Ac Shechem el oruh na ma mwet Canaan nuhkewa ac nuhnkuh in oruh ke pacl se kena lal nuh sin sie mwet pihrihkyuckyak. Pwacnacng, Dinah el finne sruhnga, wacngihn srihpac, mweyen Shechem el “usacllah ac ahkkulukyacl.” Kahlwem tuh Shechem “el luhngseyak”  Dinah tok, tuhsruhktuh ma inge tiac kuh in ekuhllah ma el oruh tari nuh sel uh. (Riti Genesis 34:1-4.) Ac tiac Dinah muhkwena pa ahsor ke ma sikyak inge. Ke srihpen sulaclah lal Dinah ke asruoki lal uh, ma inge oraclah ma upac pucspucs ma kol nuh ke mwekihn luhn sucu lal uh.​—Genesis 34:7, 25-31; Galatia 6:7, 8.

15, 16. Kuht ac eis fuhkah lahlmwetmwet pwacye? (Liye pac pohk se inge “ Nuhnkuh Yohk Ke Ma Suhmuhslah Inge.”)

¹⁵ Dinah el lotwelah mwe lutlut na yohk se tukun el sun ma upac. Tuhsruhktuh, mwet suc luhngse ac ahkos Jeova uh tiac enenuh in sun ma upac tuhfah eltahl lotwelah ma yohk srihpac nuh ke moul uh. Ke srihpen eltahl porongo God, pwacnacng eltahl sulaclah in “kuhpahsr nuh sin mwet lahlmwetmwet.” (Soakas 13:20a) Ke inkacnek ohinge eltahl kuh in ‘etuh lah meac fal eltahl in oruh’ ac fahsr liki kuhtwena ma upac kuh mwe kweok.​—Soakas 2:6-9; Psalm 1:1-3.

¹⁶ Lahlmwetmwet luhn God uh ma nuh sin mwet nuhkewa suc luhngse in eis ac kwacfeacng in eis ke inkacnek luhn puhruhe ac lutlut ke Kahs luhn God ac ke mwe rit ma ituckyang nuh sin mwet kuhlwacnsap oaru ac lahlmwetmwet uh. (Matthew 24:45; James 1:5) Sie pac ma yohk srihpac uh pa in inse puhsisacl, ma ahkkahlwemyeyuck ke luhngse luhn sie mwet in ahkos kahs in kahsruh luhn Bible uh. (Luo Tokosra 22:18, 19) Ke sie mwe puhpuhlyuck, sie mwet Christian el kuh in sruokyac  kahs in kahsruh inge lah insiac uh kuhtasrihk ac mwe sensen se. (Jeremiah 17:9) Tuhsruhktuh, ke pacl se el sun sie ma upac ma el tiac orekmakihn nuhnak wo nuh kac, yac el inse puhsisacl in eis kahsruh?

17. Ahkuhtweyac sie ma ma ac kuh in sikyak ke sie sucu, ac ahkkahlwemye lah pahpah se ac ahkuhtweyac fuhkah nuh sin tuhlihk muhtwacn se nahtuhl inge.

¹⁷ Srihke petsacelah ma sikyak inge. Pahpah se el tiac lwelah tuhlihk muhtwacn se nahtuhl ac sie mukul lili in tuhkweni som nuh yen fin wacngihn mwet weluhltahl. Muhtwacn se inge fahk: “Tuh Pahpah, meac kom tiac luhlahlfongiyuc? Kuht ac tiac oruh kuhtwena ma kuluk!” Sahp, pwacye lah tuhlihk muhtwacn se inge luhngse Jeova ac el tiac nuhnkuh in oruh kuhtwena ma kuluk, tuhsruhktuh, yac el “fuhfahsryucsr ke lahlmwetmwet luhn God”? Yac el “kahing liki inkacnek in kosro”? Kuh yac el “luhlahlfongi nuhnak [lal] sifacna”? (Soakas 28:26) Sahp, kom kuh in nuhnkuh ke kuhtuh pac kahs in kahsruh sahyac ma ac fal pahpah se ac tuhlihk muhtwacn se nahtuhl inge in nuhnkuh kac.​—Liye Soakas 22:3; Matthew 6:13; 26:41.

18, 19. Joseph el srihfeyuck fuhkah, ac meac el oruh in kuhtanglah?

¹⁸ Sie mwet fuhsr suc luhngse God ac fahsr liki orekma in kosro pa Joseph, suc ma wiyacl Dinah. (Genesis 30:20-24) Ke Joseph el srackna tuhlihk, el sifacna liye fukun orekma lahlfon luhn tuhlihk muhtwacn se wiyacl inge. Wacngihn ahlohloh kac lah ke ma sikyak inge, weacng luhngse yohk lal Joseph in muhtana in luhngse luhn God, pa karuhnguhnuhl ke yac pucspucs tok fin acn Egypt ke pacl se ma muhtwacn kiyacn leum lal uh srihfacl in oan yohrohl “pengana lwen.” Pwacye lah ke srihpen Joseph el sie mwet kuhlwacnsap, oruh el tiac kuh in siyuck elan tui kuh srolah liki orekma lal uh ac som! El enenuh in muhtweng ke ma sikyak inge ke inkacnek puhlaik ac lahlmwetmwet. El oruh  ma inge ke el kalweni na in fahk moh nuh sin muhtwacn kiyacl Potiphar ah ac ke sahflahiyac Joseph el kahinglac luhkel.​—Riti Genesis 39:7-12.

¹⁹ Srihke nuhnkuh: Joseph el fin nuhnkuh yohk ke muhtwacn se inge kuh nuhnkuh elan weluhl oan, yac el ac kuh in sruokyacna oaru lal uh? Sahp el ac tiac kuh. Joseph el tiac ahkpwacrye nuhnak lal ke ma fohkfohk, a el ahksacohkye fototo lal nuh sin Jeova ac ma inge arlacna kahlwem ke kahs lal nuh sin muhtwacn kiyacl Potiphar ah. El fahk, “Wacngihn kuhtwena ma el sruok nuh sihk sahyom. Fuhkah tuh ngan oruh kain elahwet ingacn ac orekma kuluk lain God?”​—Genesis 39:8, 9.

20. Jeova el ekuhllah fuhkah ohiyac ma Joseph el oasr kac ah?

²⁰ Srihke petsacelah luhpan engan luhn Jeova ke el liye lah Joseph el finne loes liki mwet in sucu lal uh, el sruokyacna oaru lal uh pacl nuhkewa. (Soakas 27:11) Tok, Jeova el ekuhllah ohiyac ma Joseph el oasr kac ah tuh elan sukohsohklah liki presin ac el eklac sie mwet kol ac mwet in karihngihn oakwuck ke mongo fin acn Egypt! (Genesis 41:39-49) Arlacna pwacye kahs ke Psalm 97:10 inge: “LEUM GOD El luhngse elos suc koase ma kuluk. El karihngihn moul luhn mwet lal. El moleloslac liki kuh luhn mwet kuluk”!

21. Mukul lili fuhsr se fin acn Africa inge ahkkahlwemye fuhkah puhlaik lal in oruh sulaclah ma wo ac nwacsnwacs?

²¹ In oacpacna nuh mihsenge, mwet kuhlwacnsap luhn God uh ahkkahlwemye lah eltahl “sruhnga ma kuluk, ac luhngse ma wo.” (Amos 5:15) Sie mukul lili fuhsr fin acn Africa el esam ke sie tuhlihk muhtwacn suc oacpacna matwacl el fahk nuh sel muh el ac oan yohrohl el fin insese in kahsrel ke sie test ke math. El fahk, “Nga suhlahklahk na fahk moh. Ke nga sruokyacna oaru luhk uh, nga kuh in sruokyacna ine wo luhk ac ahksacohkyeyuc sifacna.” Pwacye, kuht kuh in “pwacrkihn ma kuluk ke kihtin pacl,” tuhsruhktuh, inkaiyen pacl uh ma pwacrkihnyuck ke kihtin pacl inge kwacna sahflah ke mwe ahsor yohk. (Hebrew 11:25)  Yohk liki nuhkewa, ma inge wacngihn srihpac fin tuniyuck nuh ke mwe insewowo ma ac oan ma pahtpaht ma tuhkuh ke ahkostwen lasr nuh sin Jeova uh.​—Soakas 10:22.

22, 23. (a) Sie mwet lili el fin oraclah sie ma kuluk efuh kuh srackna oasr finsrak lal in eis nuhnak muhnahs? (b) Mwe kahsruh fuhkah ituckyang nuh sin mwet suc oraclah ma kuluk uh?

²² Ke srihpen kuht nuhkewa sesuwohs, kuht kwacfeacng in kuhtanglah kena luhn ikoac ac oruh ma wo ye muhtuhn God. (Rome 7:21-25) Jeova el akihlen ma inge, ac “el esam lah kuht oreklac ke kutkut.” (Psalm 103:14) Tuhsruhktuh, kuhtuh pacl uh sie mwet Christian el ac kuh in oraclah sie ma kuluk. Yac kalmac pa God el tiac kuh in nuhnak muhnahs nuh sel? Moh! In oacna Tohkohsrah David, sie mwet suc oraclah ma kuluk el ac srackna kosrwacni ma kuluk lal uh. Tuhsruhktuh, pacl nuhkewa God el “nuhnak muhnahs” nuh sin mwet suc auliyak na pwacye ac “fahkwack ma kuluk” la uh.​—Psalm 86:5; James 5:16; riti Soakas 28:13.

²³ In wekuhnacng ma inge, God el use “mwe sang” nuh sin congregation uh ke inkacnek luhn mwet elder suc pah in nuhnak ac orekma suc fal ac ahkolah in sang kahsruh. (Ephesus 4:8, 12; James 5:14, 15) Finsrak laltahl uh pa in kahsruh sie mwet suc oraclah ma kuluk elan sifwil fototo nuh sin God ac in “yohkwelihk etwacack” lal uh elan tiac sifwil oruh ma kuluk sacn.​—Soakas 15:32.

24, 25. (a) Mukul fuhsr se ma sramsramkihnyuck in Soakas 7:6-23 inge el ahkkahlwemye fuhkah lah “wacngihn lahlmwetmwet” lal? (b) Kuht ac oruh fuhkah in “yohkwelihk etwacack” lasr uh?

²⁴ Bible uh sramsramkihn mwet suc “wacngihn lahlmwetmwet” la ac mwet suc “yohkwelihk etwacack” la. (Soakas 7:7, BMK) Sahp, ke srihpen sie mwet el soenna  kahlwem na pwacye ke nuhnak luhn God kuh el srackna suhpah ke orekma in kuhlwacnsap lal uh, mwet suc “wacngihn lahlmwetmwet” la kuh srihk kahlwem la inge el ac tiac oruh sulaclah wo. In oacpacna, mukul fuhsr se ma sramsramkihnyuck ke Soakas 7:6-23, sahp fihsracsr nuh sel in oraclah ma kuluk se inge. Tuhsruhktuh, sie mwet suc “yohkwelihk etwacack” la, el lohacng ahkwoyac nuh ke ohiyacl sifacna ke el lutlutkihn Kahs luhn God pacl nuhkewa ac puhruhe. El finne sesuwohs, el ac sang kuhiyacl kewa in ahkfalye nuhnak, kena, puhlakihn ac finsrak lal ke moul in fal nuh ke ma God el insewowo kac. Ke srihpac se inge, el ‘oruh sie ma wo nuh sel sifacna’ kuh el sifacna ahkinsewowoyacl ac el “fah kapkapwack.”​—Soakas 19:8.

²⁵ Siyuck sum sifacna: ‘Yac nga luhlahlfongi na pwacye lah oakwuck luhn God pa pwacye uh? Yac nga luhlahlfongi na pwacye lah nga fin ahkos, ma inge ac use insewowo ma yohk emeet?’ (Psalm 19:7-10; Isaiah 48:17, 18) Kom fin ahlohloh, kwacfeacng in ahkwacngihnyelah. Nuhnkuh yohk ke ma upac ma ac tuhkuh fin masap luhn God uh pihlesreyuck. In wekuhnacng, “kom in sifacna akihlenack luhpan woiyen Leum God” ke kom moul ke inkacnek pwacye ac nwacklah nuhnak lom an ke nuhnak wo, ma pwacye, ma suwohs, ma nwacsnwacs, ma luhngseyuck, ac ma kaksakihnyuck. (Psalm 34:8; Philippi 4:8, 9) Kom kuh in luhlahlfongi lah kom fin tahfwelah na in oruh ma inge, luhngse lom nuh sin God uh ac fah yohkwelihk, in luhngse ma el luhngse ac sruhnga ma el sruhnga. Joseph el tiac mwet suwohswohs se, tuhsruhktuh el kuh in “kahing liki inkacnek in kosro” mweyen el lwelah Jeova elan lotwel ke lusen yac pucspucs, elan luhngse in ahkinsewowoye God. Finsrak tuh ma inge in oacpacna nuh sum.​—Isaiah 64:8.

26. Sifac na yohk srihpac fuhkah se kuht ac fah sramsramkihn tok uh?

²⁶ God el tiac oraclah ip pucspucs ke mahnosr in mwe sritacl,  tuhsruhktuh el oraclah nuh sesr in kuh in isus fahko ac in engankihn fototo ke moul in pahyuck lasr uh. (Soakas 5:18) Nuhnak luhn God ke moul in pahyuck uh pa ac fah sramsramkihnyuck ke sapta luo tok uh.