1, 2. Bõe la a Balaam maan sẽn na yɩl tɩ yel-beed paam a Zeova nebã?

ZĨM-YÕGD n kẽng n na n tɩ yõg zĩm zĩig ning a sẽn nong n yãt zĩmã. Zĩif buud a ye la a rat n yɩɩda. A ninga rɩɩb b sẽn nong a lɛoogã noorẽ, n lob koomẽ wã. Sẽn yɩ bilfu, bũmb n sɩng lɛoogã vẽsbo, t’a bãng t’a yõka a sẽn datã. A sũur yaa noogo, bala rɩɩb ning buud a sẽn ning a lɛoogã noorã zemsame.

² Yʋʋmd 1473 sẽn deng a Zezi rogmã, rao a ye yʋʋr sẽn boond t’a Balaam baoa a sẽn na n maan to-to n bẽd neba. Yaa Wẽnnaam nebã sẽn da be Moaab weoogẽ wã Kãabg Tẽngã toadgẽ wã la a ra rat n bẽde. A Balaam ra yetame t’a yaa a Zeova no-rɛɛsa, la a yaool n da yaa ned sẽn nong ligdi. B yeel-a lame t’a tɩ kãab Israɛll nebã wẽng la a wa reeg ligdi. La a Zeova kɩtame t’a Balaam sã n yaag a noor n na n kãab Israɛll nebã wẽng fãa, yaa bark la a ningd-ba. A sẽn da rat ligdã ne a sũur fãa wã, a tagsame t’a sã n tõog tɩ Wẽnnaam nebã maan yel-wẽnde, tõe n kɩtame tɩ Wẽnnaam meng wẽneg n kãab a nin-buiidã wẽnga. Woto kɩtame t’a tũnug ne Moaab pʋg-neebã n na n kʋɩɩb Wẽnnaam nebã.—Sõdbo 22:1-7; 31:15, 16; Wilgri 2:14.

3. Bõe yĩng tɩ d tõe n yeel t’a Balaam sɩlmã tõogame?

³ A sɩlmã tõogame bɩ? D tõe n yeelame tɩ n-ye, bala Israɛll rap tusa n lʋɩ bẽdgã pʋgẽ, n sɩng “yoob ne Moaab  pagbã.” B pʋd n sɩnga Moaab wẽnnaam dãmbã pʋʋsgo. Wala makre, b pʋʋsa rogem la yoob wẽnd a Baal-Peoore. Rẽ kɩtame tɩ Israɛll neb 24 000 ki Kãabg Tẽngã toadgẽ wã. Ad sɩd yɩɩ yel-beed menga!—Sõdbo 25:1-9.

4. Bõe yĩng tɩ Israɛll neb tusa lʋɩ yoobã pʋgẽ?

⁴ Yaa bõe n kɩt tɩ yel-be-kãngã paam nebã? Bãmb wʋsg sũy lebga wẽnse, tɩ b bas a Zeova, Wẽnnaam ning sẽn yiis bãmb Ezipti, n dɩlg-b weoogẽ wã, la a yãag-b n ta Kãabg Tẽngã toadgẽ wã. (Hebre dãmba 3:12) Tʋm-tʋmd a Poll goma rẽ yell n yeel woto: “Bɩ tõnd da maan yoob wa bãmb neb kẽer sẽn maan tɩ tus pisi la a tã ki daar a yembrã ye.” *—1 Korẽnt dãmba 10:8.

5, 6. Bũmb ning sẽn paam Israɛll nebã Moaab weoogẽ wã zãmsda tõnd bõe rũndã-rũndã?

⁵ Kibar ning sẽn be Sõdb sebrã pʋgẽ wã kõta Wẽnnaam nebã yam rũndã-rũndã, bala ka la bilfu, d na n kẽe kãabg tẽng sẽn yaa sõma n yɩɩd pĩnd soabã pʋgẽ. (1 Korẽnt dãmba 10:11) Rũndã-rũndã nebã nonga raglem tʋʋmã n yɩɩd Moaab nebã. Sẽn paase, yʋʋmd fãa, kiris-neb tusa n  lʋɩt yoobã pʋgẽ. Yɩɩ ne yoobã me la b paam Israɛll nebã. (2 Korẽnt dãmba 2:11) Wala a Zimri sẽn pa zoe nif n tall Madiã pag n wa Israɛll nebã sikã zĩigẽ wã, rũndã-rũndã me, tigingã pʋgẽ neb kẽer maanda yɛl sẽn tõe n kʋɩɩb tigingã neba.—Sõdbo 25:6, 14; Ziid 4.

⁶ Rẽ yĩnga yãmb miime tɩ y sẽn vɩ sasa ning rũndã-rũndã wã wõnda Israɛll nebã sẽn da be Moaab weoogẽ wã sɩda? Yãmb miime tɩ dũni paalgã y sẽn sɩng n gũudẽ wã kolgame sɩda? Sã n yaa woto, bɩ y maan y sẽn tõe fãa n pa Wẽnnaam nonglmã pʋgẽ. Bɩ y tũ Biiblã noor ning sẽn yet tɩ “y zoe yoobã.”—1 Korẽnt dãmba 6:18.

7, 8. Gom-bil ning b sẽn lebg tɩ “yoobã” võor yaa bõe, la wãn to la yoaadbã kẽebd b sẽn bʋde?

⁷ Gɛrk gom-bil ning b sẽn lebg moorã Biiblã pʋgẽ tɩ “yoobã” yaa porneia. La Biiblã pʋgẽ, porneia wã võor yalmame. Yaa neb a yiib sẽn pa kẽ kãadem ne taab sẽn gãe taab walla b mogsd taab raoolem bɩ poglem, ned sẽn gãe a to a se-nifẽ, ned sẽn salem ned a to raoolem bɩ a poglem, rap sẽn gãe rapa, pagb sẽn gãe pagba, la ned sẽn yõgd rũnga, la raglem buud toor-toorã. *

⁸ Biiblã wilgda vẽeneg tɩ yoaadbã ne raglem dãmbã pa tõe n kell n pa kiris-neb tigingã pʋgẽ, b pa na n paam vɩɩm sẽn kõn sa wã me ye. (1 Korẽnt dãmba 6:9; Wilgri 22:15) Sẽn paase, baa masã menga, b paamda zu-loeese. Bala nebã pa le tõe n kɩs sɩd ne-ba, b pa nand b mense, b tara zu-loees b kãadmã pʋgẽ, b sũur-kasetã ningd-b-la taale, b rɩgsda pʋs b sẽn pa rate, b paamda bãase, la b kiidẽ menga. (Galat dãmba 6:7, 8) Bõe yĩng tɩ d na n sak  n maan bũmb sẽn na n wa wã-d woto? Zu-bʋko, neb wʋsg pa tagsd n zãag la b yaool n maan bũmb sẽn tõe n wa kɩt tɩ b yo ye.

9. Neb kẽer sẽn yet tɩ yoobã yɛl gesg ka yellã yaa sɩd bɩ? Wilg-y y leoorã võore.

⁹ Tẽns wʋsg pʋsẽ, yoobã yɛlã bee sɛbã pʋsẽ, mizikã ne televiziõ wã pʋgẽ, la a pida ẽntɛrnetã pʋgẽ me. * Rẽ yĩnga neb kẽer sẽn yet tɩ yoobã yɛl gesg ka yellã yaa sɩd bɩ? Yaa ziri fasɩ! Neb nins sẽn get yoobã yɛlã wat n lebga neb sẽn nong n salemd b mens raoolem bɩ b poglem, n yãngd “b yĩngã ratem sẽn yaa wẽngã.” Woto tõe n kɩtame tɩ b lebg raglem yembse, bɩ n paam zu-loees wʋsg b kãadmã pʋgẽ, walla pʋd n sãam b kãadmã. * (Rom dãmb 1:24-27; Efɛɛz rãmba 4:19) Bãngd a ye wilgame tɩ ned sã n nong raglem tʋʋma, yaa wa kãnsɛɛr sẽn yõk-a. A yeelame tɩ wala kãnsɛɛr sẽn yãngd n paasdẽ t’a tɩbsg yaa toogã, ned sã n wa nong raglem tʋʋm me, a tʋlsmã yãngd n paasdame, tɩ yɩl n bas yaa toogo.

10. Wãn to la goam nins sẽn be Zak 1:14, 15 wã tõe n sõng tõndo? (Ges-y  seb-neng 101 zĩ-gũbrã me.)

¹⁰ D ges goam nins sẽn be Zak 1:14, 15 wã. Be b yeta woto: “Ned kam fãa tara makr a meng wẽngã ratem sẽn makd yẽnda n bẽt yẽnda. La wẽng ratem sã n dɩk pʋga a rogda yel-wẽna, la yel-wẽnã sã n wa bɩ, a wata ne kũum.” Rẽnd tags-wẽng sã n wa kẽ y yamẽ wã, bɩ y maan bũmb tao-tao n yiis-a! Wala makre, y sã n yã bũmb sẽn pa sõma, bɩ y wẽnemd y neng kɛɛnga. Sã n yaa y ordinatɛɛrã  bɩ y televiziõ wã pʋgẽ bɩ y kiisi, walla y toeem zĩig a to. Maan-y y sẽn tõe fãa tɩ yoobã tʋlsem ra wa kẽ-y tɩ y lebg a yamb ye!—Matɩe 5:29, 30.

11. D sã n wa maood ne tags-wẽnse, wãn to la d na n wilg tɩ d teega a Zeova?

¹¹ Wẽnnaam sẽn mi tõnd n yɩɩd tõnd mengã la a rat tõnd neerã sagenda tõnd woto: “Bɩ y kɩɩs y yĩngã ratem dũniyã zug ka, sẽn yaa yoobo, la rẽgdo, la wẽng ratem la tags-wẽnse, la zoe-bõne, sẽn yaa bõn-naands pʋʋsgo.” (Kolos rãmba 3:5) Yaa sɩd tɩ woto maaneg tõe n yɩɩ toogo. La tẽeg-y tɩ tõnd tara saasẽ Ba sẽn nong tõndo, sẽn maagd a meng ne tõndo, tɩ d tõe n pʋʋs-a n kos sõngre. (Yɩɩl Sõamyã 68:20) Woto yĩnga, tags-wẽns sã n wa kẽ  y yamẽ, bɩ y yɩ tao-tao n kos sõngr a nengẽ. Pʋʋs-y n kos-y “pãn-kãseng” sẽn yɩɩd ninsaal dẽndã, la y modg n tags yɛl a taab zutu.—2 Korẽnt dãmba 4:7; 1 Korẽnt dãmba 9:27; ges-y seb-neng 104 zĩ-gũbrã sẽn sok tɩ:  “Wãn to la m tõe n bas minim-wẽnga?”

12. Bõe yĩng tɩ d segd n kogl d sũurã?

¹² Yam soab a Salomo yeela woto: “Bɩ f gũus ne f sũurã tagsg n yɩɩd bũmba fãa. Tɩ bala, ned vɩɩm yita a sũur pʋgẽ.” (Yelbũna 4:23) Yaa bũmb ning sẽn be tõnd sũurã pʋgẽ wã n wilgd d sẽn yaa a soab Wẽnnaam nifẽ. Yaa tõnd sẽn yaa a soab Wẽnnaam nifẽ wã n na n kɩt tɩ d paam vɩɩm sẽn kõn sa wã bɩ n konge, lakae pa d sẽn yaa a soab nebã nifẽ wã ye. Woto pa reem yell ye. Rẽ n kɩt tɩ wẽn-sakd a Zoob maan kaool ne a nif t’a pa na n ges pag ne ratem wẽng ye. (Zoob 31:1) Ad woto sɩd yaa mak-sõng meng n kõ tõndo! Yɩɩl gʋlsdã me pʋʋsa woto: “Bɩ y kɩt tɩ m wẽneg n da ges bõn-zaals ye.”—Yɩɩl Sõamyã 119:37.

13. A Dina yaa ãnda, la bõe yĩng t’a sẽn yõg zood ne Kanaã kom-pugli wã yaa yalemdo?

¹³ Wala d sẽn yã sak a 3 pʋgẽ wã, tõnd rɩkda d zo-rãmbã zʋgd la b manesem, yaa sõma tɩ yaa wẽng me. (Yelbũna 13:20; 1 Korẽnt dãmba 15:33) D ges a Zakoob bi-pugl a Dina kibarã. (Sɩngre 34:1) Baa ne a sẽn paam wubr sẽn yaa sõma wã, a maana yalemd n tɩ yõg zood ne Kanaã kom-pugli wã. La Kanaã nebã ra yaa yoaadb wala Moaab nebã. (Maankʋʋre 18:6-25) Kanaã nebã, la baa ne a Sikɛm b sẽn da get wa nin-tɩrg n yɩɩd a ba wã zak neb fãa wã ra tagsdame t’a Dina me yaa pag sẽn na n sak tɩ b gãand-a nana-nana wa Kanaã pagbã.—Sɩngre 34:18, 19.

14. A Dina zo-rãmbã yãkr waa ne yel-bʋse?

¹⁴ Tõe t’a Dina pa tags yoob yell a sẽn wa n yã a Sikɛmmã ye. La a Sikɛm yẽ maana Kanaã rao fãa sẽn da  na n maane. Ne bãmba, f sã n yã pag n dat bala yaa f yõk-a n gãande. A Dina sẽn wa n bãng tɩ yaa yellã, baa a sã n da bao n na n zoe me, ra sãam n saame. Bala Biiblã yeelame t’a Sikɛm modg-a lame ‘n gãand-a n sãam-a.’ Wõnda wa rẽ poore a Sikɛm wa n sɩd nonga a Dina “ne a sũur fãa,” la rẽ ra pa tõe n yẽes wẽng ning a sẽn zoe n maanã ye. (Sɩngre 34:1-4) La pa a Dina bal la yellã nams ye. A sẽn yãk tũud-n-ta-wẽnsã waa ne yel-beedo, tɩ kɩt t’a zakã rãmb fãa yʋʋr sãame.—Sɩngre 34:7, 25-31; Galat dãmba 6:7, 8.

15, 16. Wãn to la d tõe n paam yam hakɩkã? (Ges-y  seb-neng 109 zĩ-gũbrã.)

¹⁵ A Dina sã n dɩka yam me, yaa yellã sẽn paam-a wã poore. Neb nins sẽn nong a Zeova la b sakd-a wã pa baood n na n kɩɩs a noyã tɩ yell paam-ba, tɩ b yaool n bãng yam ye. B kelgda Wẽnnaam goamã, n “tũud yam dãmba.” (Yelbũna 13:20a) Woto kɩtame tɩ b bãngd  “bũmb nins fãa [b] sẽn tog n maanã,” n lakd b mens ne bũmb nins fãa sẽn tõe n kɩt tɩ b paam yell zaalem balã.—Yelbũna 2:6-9; Yɩɩl Sõamyã 1:1-3.

¹⁶ Neb nins sẽn baood yam ning sẽn yit Wẽnnaam nengẽ wã tõe n sɩd paam-a lame, b sã n pʋʋsdẽ la b karemd Biiblã la sɛb nins tʋm-tʋmd sẽn tũud sɩdã sẽn yiisdã. (Matɩe 24:45; Zak 1:5) Bũmb a to me sẽn tar yõod  yaa sik-m-mengã. Ned sã n yaa sik-m-meng soaba, a na n sak n tũu Biiblã saglsã. (2 Rĩm dãmba 22:18, 19) Wala makre, kiris-ned tõe n sak n deegame tɩ sũur tõe n yɩɩ zãmb soaba. (Zeremi 17:9) La rẽ yĩnga a sã n wa be yell ning pʋgẽ, a na n sika a meng n sak n deeg saglg la a sak tɩ b sõng-a bɩ?

17. Bilg-y yell sẽn tõe n zĩnd zak pʋgẽ, la y wilg ba sẽn tõe n sõng a bi-pugl to-to.

¹⁷ Tags-y n ges-y bi-pugl sẽn na n kos a ba n na n tũ bi-ribl sẽn yaa kiris-ned n yi t’a zãgse. Bi-puglã yeela a ba wã woto: “M baaba, fo pa kɩs maam sɩd la? D pa na n tɩ maan bũmb sẽn yaa wẽng wɛ!” Bi-puglã tõeeme n nong a Zeova la a pa rat n maan bũmb sẽn yaa wẽng ye. La rẽ yĩnga a sẽn tagsd woto wã wilgdame t’a sɩd tara yam sɩda? A zãagda a meng ne yoobã bɩ, bɩ a maanda yalemd “n teegd a meng tagsgo”? (Yelbũna 28:26) Tõe tɩ y tẽra Biiblã sagls a taab sẽn tõe n sõng bi-puglã ne a ba wã fãa tɩ b tags yellã zug sõma.—Ges-y Yelbũna 22:3; Matɩe 6:13; 26:41.

18, 19. Yel-bʋg n paam a Zozɛfe, la a maana wãna?

¹⁸ A Zozɛf sẽn yaa a Dina ba-biigã yɩɩ bi-bɩɩg sẽn da nong Wẽnnaam la a ra zoet yoobo. (Sɩngre 30:20-24) A Zozɛf maana kaset ne a Dina yalemdã sẽn wa ne zu-loees ninsã. Sãmbg sẽn ka be, a Zozɛf sẽn da tẽr yel-kãensã wã, la a sẽn da rat n pa Wẽnnaam nonglmã pʋgẽ wã sõng-a lame. Kɩtame tɩ yʋʋm wʋsg poore, a sẽn wa n be Ezipt t’a zu-soabã pag ra pẽdgd-a “daar fãa” n dat t’a gãand-a wã, a pa sak ye. A Zozɛf sẽn da yaa yambã, a ra pa tõe n bas a tʋʋmdã n loog ye. A ra segd n talla raood la a bao yam n kõ a menga. La a sɩd maana woto n kell n zãgs a Potifaar pagã kosgã. La baasgo, wa n yɩɩ tɩlae t’a zoe n yi la a bas-a.—Sɩngre 39:7-12.

 ¹⁹ Tags-y n ges-y-yã: A Zozɛf sã n da sɩng n get pagã ne ratem wẽng bɩ n da tagsd pagb gãag yelle, rẽ yĩnga a ra na tõog n kell n tall a burkĩndã sɩda? Na yɩ toogo. A Zozɛf ra pa tar tags-wẽns ye. A ra getame tɩ zood ning a sẽn tar ne a Zeova wã yaa bũmb sẽn tar yõod wʋsgo. A sẽn yeel a Potifaar pagã bũmb ningã sɩd wilgda rẽ. A yeel-a-la woto: “M zu-soabã . . . ka mong maam bũmb baa sẽn yaa bũmb ninga, sã n ka foom bala. Tɩ bõe, fo yaa bãmb paga. La mam na n yɩɩ wãn n maan yel-wẽn-kãseng woto n beeg m Wẽnnaam?”—Sɩngre 39:8, 9.

20. Wãn to la a Zeova sõng a Zozɛfe?

²⁰ Tags-y n ges-y a Zeova sũur sẽn yɩ noog to-to ne a Zozɛfe. Baa ne a sẽn da zãr ne a zakã rãmbã, a baas n kell n talla a burkĩndã daar ne a to fãa. (Yelbũna 27:11) Kaoosg zugẽ, a Zeova kɩtame tɩ b yiis a Zozɛf bãensã roogẽ la a kɩt t’a lebg nin-kãsenga, la Ezipt koodã yel-gɛta! (Sɩngre 41:39-49) Yɩɩl Sõamyã 97:10 goamã sɩd yaa sɩda. Be b yeta woto: “[A Zeova] nonga neb nins sẽn kis wẽngã, bãmb gũuda neb nins sẽn yaa bãmb dẽndã n yiisd bãmb nin-wẽns nusẽ.”

21. Wãn to la bi-bɩɩg a ye wilg ne raood t’a rat n kell n yɩɩ yɩlemd Wẽnnaam nifẽ?

²¹ Rũndã-rũndã me, wẽn-tũudb wʋsg wilgame tɩ b kisa wẽnga, la tɩ b nonga sẽn yaa tɩrga. (Amos 5:15)  Afiriki, bi-bɩɩg a ye sẽn yaa a Zeova Kaset soab wilgame tɩ bi-pugl sẽn yaa a karen-bi-taag n yeel t’a sã n sõng-a t’a tõog n maan matematik devoaare, a na n sakame t’a gãand-a. Bi-riblã yeela woto: “Mam zãgsa zĩig pʋgẽ. Mam sẽn kell n tall m burkĩndã, kɩtame tɩ m ket n nand m menga. La rẽ yaa bũmb sẽn tar yõod ne maam n yɩɩd sãnem la wanzuri.” Yaa sɩd tɩ yel-wẽnd maaneg tõe n kõo ned sũ-noog “wakat bilf pʋgẽ,” la rẽ nong n wata ne sũ-sãams wʋsgo. (Hebre dãmba 11:25) Sẽn paase, d pa tõe n dɩk wakat bilf sũ-noogã n mak ne sũ-noog ning a Zeova sakrã sẽn wat ne wã ye. Bala sũ-no-kãng ka saab ye.—Yelbũna 10:22.

22, 23. a) Kiris-ned sã n maan yel-wẽn-kãsenga, bõe yĩng tɩ d tõe n yeel t’a yellã tara tɩɩm? b) Wãn to la yel-wẽn-maand tõe n paam sõngre?

²² Tõnd sẽn pa zems zãngã yĩnga, d segd n modga wʋsg sẽn na yɩl n tõog d yĩngã ratem wẽnsã, la d maan sẽn yaa tɩrg Wẽnnaam nifẽ. (Rom dãmb 7:21-25) A Zeova mii rẽ tiiri, a “tẽegdame tɩ tõnd yaa tẽng tom.” (Yɩɩl Sõamyã 103:14) La wakat ninga, kiris-ned tõe n maana yel-wẽn-kãsenga. Wakat kãngã, a yellã tara tɩɩm bɩ? N-ye, tara tɩɩm! La wala a Davɩɩde, yel-wẽn-maandã tõe n kẽeba a tʋʋmã biisi. Baa ne rẽ, wakat fãa Wẽnnaam kõta neb nins sũy sẽn sãam la sẽn na n “vẽneg n togs” b yel-wẽnã sugri.—Yɩɩl Sõamyã 86:5; Zak 5:16; Yelbũna 28:13.

²³ Sẽn paase, Wẽnnaam kõo kiris-neb tigingã kũuni, sẽn yaa pe-kɩɩmb sẽn tar minim la sẽn dat n sõng tõndo. (Efɛɛz rãmba 4:8, 12; Zak 5:14, 15) Bãmb sẽn datã yaa b sõng yel-wẽn-maand t’a leb n paam zood ne Wẽnnaam, la a ‘paam bãngr’ bɩ yam, sẽn na yɩl n da wa yɩlem a yel-wẽndã ye.—Yelbũna 15:32.

24, 25. a) Wãn to la bi-bɩɩg ning b sẽn bilg Yelbũn 7:6-23 wã wilg t’a “ka tar yam”? b) Wãn to la d tõe n paam yam?

²⁴ Biiblã gomda neb sẽn “ka tar yam” la neb sẽn “tar bãngr” bɩ yam yelle. (Yelbũna 7:7) Ned sẽn “ka tar yam” tõeeme n pa bãng sẽn yaa sõma yell taoore, a sẽn pa mi Wẽnnaam noyã sõma la a pa tar minim Wẽnnaam tũudmã pʋgẽ wã yĩnga. Wala bi-bɩɩg ning b sẽn bilg Yelbũn 7:6-23 pʋgẽ wã, b tõe n kʋɩɩba ned sẽn ka tar yam nana-nana t’a maan yel-wẽn-kãsenga. La ned sẽn “tar bãngr” bɩ yam pʋʋsda wakat fãa la a zãmsd Wẽnnaam Gomdã, n gũusdẽ t’a sũurã tagsg ra yɩ wẽng ye. Baa ne a sẽn pa zems zãngã, a maanda a sẽn tõe fãa t’a tagsgã, a tʋlsmã la a sẽn dat n maan bũmb ninsã fãa tat Wẽnnaam yam. A sẽn maand woto wã, a wilgdame t’a “nonga a menga,” bɩ t’a baooda Wẽnnaam barka. La a ‘sũur na n yɩɩ noogo.’—Yelbũna 19:8.

²⁵ Sok-y y meng woto: ‘Mam kɩsa sɩd tɩ Wẽnnaam noyã yaa sõma bɩ? Mam sɩd tẽedame tɩ m sã n tũ-ba, m na n paama sũ-noog hakɩk bɩ?’ (Yɩɩl Sõamyã 19:8-11; Ezai 48:17, 18) Yãmb sã n maanda sãmbs baa yaa bilfu, bɩ y modg n yiis sãmbsã y sũurẽ wã. Tags-y n ges-y yɛl nins sẽn tõe n paam-yã, y sã n pa tũ Wẽnnaam noyã. Sẽn paase, y sã n tũud a Zeova sõma la y kɩtdẽ tɩ bõn-sõma kẽed y yamẽ wã, sẽn dat n yeel tɩ bũmb nins sẽn yaa sɩda, sẽn yaa tɩrse, sẽn be pʋ-peelem, sẽn segd ne nonglem, la sẽn zems ne pẽgre, y na n sɩd bãngame ‘t’a Zeova yaa sõma.’ (Yɩɩl Sõamyã 34:9; Filip rãmba 4:8, 9) Y sã n maand woto, y na n nonga Wẽnnaam n paasdẽ, y na n nonga bũmb nins a sẽn nongã, la y na n kisa bũmb nins a sẽn kisã. A Zozɛf ra yaa ninsaal wa tõndo. La baa ne rẽ, a tõogame n “zoe yoobo,” bala a sakame t’a Zeova zãms-a yʋʋm wʋsg pʋgẽ t’a paam yam. Bɩ yãmb me modg n maan woto.—Ezai 64:7.

26. Bõe yell la d na n gom sak 10 la 11 wã pʋgẽ?

 ²⁶ Tõnd Naandã sẽn kõ tõnd raoolmã ne poglmã, pa sẽn na yɩl tɩ d tar n maand yaar ye. Yaa sẽn na yɩl tɩ d tõog n dog kamba, la d paam sũ-noog kãadem pʋgẽ. (Yelbũna 5:18) D na n goma Wẽnnaam sẽn get kãadmã to-to wã yell sak 10 la 11 wã pʋgẽ.