1, 2. Bileam okwa li a kongo ondunge yini opo a falithe oshigwana shaJehova moshiponga?

OMUYULI gwoohi gumwe okwa yi kehala hoka e hole okuyula oohi. Okwa li a hala okuyula oohi dholudhi lwontumba. Okwa tula uukulya kondjolo ye mboka wu holike nawa koohi e te yi umbile momeya. Konima yokathimbo okwa li a mono kutya ondjolo ye oya kwata sha note yi kwata a dhiginina e te yi nipi mo. Okwa li ti imemeha a nyanyukwa, molwaashoka oku shi shi kutya okwa hogolola uukulya mboka tawu opalele.

² Shika otashi tu dhimbulukitha oshiningwanima shimwe sha ningilwe momumvo 1473 K.E.N. Omulumentu gwedhina Bileam okwa li a dhiladhila omukalo gwontumba ngoka a li ta vulu okulongitha opo a yule nago Aaisraeli. Elalakano lye olya li okupukitha oshigwana shaKalunga shoka sha li shu unga oontanda mOlushandja lwaMoab, koongamba dhEvi lyEuvaneko. Bileam okwa li i iti omupolofeti gwaJehova, ihe muushili wo wene, okwa li owala omunalwiho ngoka a li a pulwa a ka thinge Aaisraeli. Ihe Jehova okwa li u ukitha iinima opo Bileam a laleke nuuyamba Aaisraeli, pehala lyoku ya thinga. Molwaashoka Bileam okwa li a tokola toko okumona ondjambi ye, okwa li a dhiladhila kutya Kalunga otashi vulika a thinge oshigwana She ngele osha makelwa shi yone eyono lya kwata miiti. Onkee ano Bileam okwa longitha okakulya kopathaneko, aakiintu aagundjuka Aamoab ye na iineya opo ya pukithe Aaisraeli. — Num. 22:1-7; 31:15, 16; Eh. 2:14.

3. Ondunge yaBileam oya li ye shi pondola ngiini?

³ Mbela ondunge yaBileam oya li ngaa ye shi pondola? Eeno,  oya li ye shi pondola. Aalumentu omayuvi omulongo Aaisraeli oya li ya yulwa kemakelo ndika ya “hondele naakadhona Aamoab.” Oya li ya tameke nokuli okulongela iikalunga yAamoab, mwa kwatelwa oshikalunga oshinyanyalithi shokugandja oluvalo nenge shomilalo, Baal-Pegor. Oshizemo, Aaisraeli 24 000 oya li ya sile poongamba dhEvi lyEuvaneko. Shika kasha li tuu shinikitha oluhodhi noonkondo! — Num. 25:1-9.

4. Omolwashike Aaisraeli omayuvi ya li ya yi momwigo gwoluhondelo?

⁴ Oshike sha li sha ningitha Aaisraeli ya ye monkalo ndjoka ya nika oshiponga? Aantu oyendji oya li ya kokeke iikala iiwinayi moomwenyo mokwiiteka po Jehova Kalunga kashili ngoka e ya hupitha muEgipiti, e ya palutha mombuga nokwe ye enditha ya gamenwa sigo omevi lyeuvaneko. (Heb. 3:12) Mokudhimbulukwa oshinima shoka, omuyapostoli Paulus okwa nyola a ti: “Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe.” * — 1 Kor. 10:8.

5, 6. Omolwashike ehokololo li na ko nasha nokuyona kwAaisraeli sho ya li mOlushandja lwaMoab lya simana kutse kunena?

⁵ Ehokololo lyomuNumeri oli na iiyilongomwa oyindji ya simana  koshigwana shaKalunga shokunena shoka shi li pokuya mevi lyeuvaneko ewanawa li vule lyonale. (1 Kor. 10:11) Pashiholelwa, aantu muuyuni kunena oye hole nayi iipala ye vulithe Aamoab yonale. Kakele kaashono, omvula kehe Aakriste omayuvi ohaya yi momwigo gwoluhondelo ngoka tuu gwa li gwa yulu Aaisraeli yonale. (2 Kor. 2:11) Mokulandula oshiholelwa shaSimri ngoka a li a kutha omukiintu Omumidiana montaneho yAaisraeli e te mu fala metsali lye kee na uumbanda, yamwe mboka haye endathana noshigwana shaKalunga kunena oya nwetha mo yakwawo megongalo lyopaKriste nomikalo omiwinayi. — Num. 25:6, 14; Jud. 4.

⁶ Mbela owu wete ngaa kutya kunena otu li mOlushandja lwaMoab lwopathaneko? Mbela owu wete ngaa kutya owu li pokumona ondjambi ndjoka wa kala wa tegelela, sha hala okutya, uuyuni uupe mboka wu li pokuya? Ngele osho, ninga ngaashi to vulu opo wi ikaleke mohole yaKalunga mokuvulika koshipango shika tashi ti: “Yandeni oluhondelo.” — 1 Kor. 6:18.

7, 8. “Oluhondelo” oshike, nongiini mboka haya hondele haya teya shoka ya kuna?

⁷ Oshitya “oluhondelo” (mOshigreka por·neiʹa) shoka sha longithwa mOmbiimbeli otashi ulike komilalo pondje yondjokana. Oluhondelo olwa kwatela mo eyonondjokana, uumbwanda, omilalo pokati kaantu inaaya hokana, okuthipa iilyo yoluvalo, okweendathana konima nosho wo okugumaguma iilyo yoluvalo yomuntu ngoka inaamu hokana naye. Osha kwatela mo wo uushenge nosho wo okulala niinamwenyo. *

⁸ Omanyolo otage shi yelitha nawa kutya mboka haya hondele itaya vulu okukala megongalo lyopaKriste noitaya ka mona omwenyo gwaaluhe. (1 Kor. 6:9; Eh. 22:15) Kakele kaashono, ngashingeyi otaya mono iilanduliko iiyehameki, ngaashi: okwaainekelwa, okwiishundula, okwaauvathana mondjokana, eiyuvo  tali ipe uusama, okuninga omategelelo inaaga halika, omikithi nokuli neso. (Lesha Aagalati 6:7, 8.) Ano inashi nika tuu uusama okweenda mondjila ndjoka tayi ku etele owala omaupyakadhi! Shinikitha oluhodhi, aantu oyendji ihaya dhiladhila kutya iilanduliko otayi ka kala ya tya ngiini ngele oya katuka onkatu yotango ya puka ndjoka olundji oyo okutala omathano giipala.

9. Mbela okutala omathano giipala inaku nika oshiponga ngaashi yamwe haya ti? Shi yelitha.

⁹ Miilongo oyindji omathano giipala ohaga adhika miifokundaneki, miikwamusika, ko-TV nogendji ohaga monika ko-Internet. * Mbela inaga nika lela oshiponga ngaashi yamwe haya ti? Oga nika lela oshiponga. Mboka haya tala omathano giipala otashi vulika ya kale ye na omukalondjigilile gwokwiidhanena kiilyo yawo yoluvalo nokukala ye na ‘uuhalu tau sitha omuntu ohoni,’ mboka tawu vulu oku ya fala mokukala ya yonuka kiipala, ye na uuhalu uuwinayi, hawu etitha okwaauvathana mondjokana kwa kwata miiti nokuli nokuhengathana. * (Rom. 1:24-27; Ef. 4:19) Omukongi gwomauyelele gumwe okwa yelekanitha ohole yiipala nokankela sho a ti: “Okupikwa kiipala ohaku taandele nolutu [ngaashi okankela]. Ihaku vulu we okushuna nohashi kala wo nokuli oshidhigu noonkondo oku ku panga nenge oku ku aludha.”

10. Omomikalo dhini tatu vulu okutula miilonga ekotampango ndika tali adhika muJakob 1:14, 15? (Tala wo oshimpungu “ Shoka sha kwathela ndje opo ndi kale nda yogoka pamikalo.”)

¹⁰ Konakona oohapu ndhoka tadhi adhika muJakob 1:14, 15 tadhi ti: “Omuntu oha makelwa kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba,  otau vala uulunde; nuulunde ngele wa koko, otau vala eso.” Onkee ano, ngele uuhalu tawu ya momadhiladhilo goye, endelela okudhiladhila kombinga yiinima yilwe. Pashiholelwa, ngele to mono omathano giipala manga inoo shi tegelela, endelela wu tale kumwe kwi ili nenge wu dhime okompiuta yoye nenge wu lundulukile kositaasi yimwe yoko-TV. Ninga kehe shimwe to vulu opo wu yande okunwethwa mo kohole yiipala nokaayi ku vule oonkondo. — Lesha Mateus 5:29, 30.

11. Ongiini tatu vulu okuulika kutya otwi inekela Jehova uuna tatu kondjitha uuhalu uuwinayi?

¹¹ Jehova ngoka e tu shi nawa ote tu kumagidha netompelo ewanawa ta ti: “Dhipageni ano uuhalu weni wopavi mboka tau longo mune ngashika oluhondelo, iipala, uuholume nuuhalu uuwinayi nolwiho. Nokuli olwiho olwo olupe lumwe lwesimaneko lyiimenka.” (Kol. 3:5) Odhoshili kutya okutula miilonga ekumagidho  ndika otaku vulu okukala eshongo. Ihe dhimbulukwa kutya otatu vulu okupula ekwatho megalikano kuTate yetu gwomegulu omunahole nomutalanteni. (Eps. 68:19) Onkee ano konga ekwatho nziya kuye ngele owa kwatwa komadhiladhilo ga puka. Galikana Kalunga e ku pe ‘oonkondo’ nokukambadhala wu dhiladhile iinima yimwe mbyoka iiwanawa. — 2 Kor. 4:7, OB-1954; 1 Kor. 9:27; tala oshimpungu “ Ongiini tandi vulu okweetha po omukalondjigilile omwiinayi?”

12. “Omutima” gwetu otagu ulike kushike, nomolwashike tu na oku gu tonatela?

¹² Omulumentu omunandunge Salomo okwa nyola a ti: “Tonatela omutima gwoye shi vule ayihe mbyoka yi na okutonatelwa, oshoka omo mu na ekota lyomwenyo.” (Omayel. 4:23) “Omutima” gwetu ogwo uuntu wetu womeni, shoka tu li lela koshipala shaKalunga. Niishewe, shoka tashi utha ngele otatu ka mona omwenyo gwaaluhe kashi shi nkene yamwe ye tu tala ko, ihe onkene Kalunga ha tala ko ‘omitima’ dhetu. Shika osho owala sha pumbiwa, ihe osha kwata wo miiti. Onkee ano, omudhiginini Job okwa li a tokola toko opo kaa tale omukiintu nokahalu. (Job 31:1) Shika kashi shi tuu oshiholelwa oshiwanawa kutse! Omupisalomi gumwe okwa li u ulike etaloko lya fa lyaJob, sho a galikana a ti: “Omeho gandje ga keelela po, gaa taalele uuwinayi.” — Eps. 119:37, OB-1954.

13. Dina okwa li lye, nomolwashike etokolo lye okupanga uukuume naakadhona Aakaanana kaalya li pandunge?

¹³ Ngaashi twe shi mona montopolwa onti-3, ookuume ketu otaya vulu oku tu nwetha mo noonkondo, kutya nduno onaashoka oshiwanawa nenge onaashoka oshiwinayi. (Omayel. 13:20; lesha 1 Aakorinto 15:33.) Natu taleni oshiholelwa shaDina omwanakadhona gwatatekulululwa Jakob. Nonando Dina okwa li a tekulwa nawa, okwa li a ningi etokolo kaali li pandunge mokupanga uukuume naakadhona Aakaanana. Omikalo dha nyata dhAakaanana odha li dha tseyika apuhe ngaashi ndhoka dhAamoab. (Lev. 18:6-25) Aalumentu Aakaanana, mwa kwatelwa Sikem ngoka a li “omunenentu” mezimo lyahe, kaya li ye wete sha puka okuya momilalo naDina. — Gen. 34:18, 19.

14. Ongiini okupanga uukuume kwaDina nAakaanana okwa li kwe etitha uupyakadhi?

 ¹⁴ Otashi vulika Dina sho a mono Sikem ka li a dhiladhila okuya momilalo naye. Ihe Sikem okwa li a ningi shoka Aakaanana oyendji ya li ya tala ko shi li paunshitwe uuna ehalo lyokuya momilalo lya penduthwa muyo. Nonando ando Dina okwa ningile oonkambadhala okutinda Sikem, kasha li tashi kwatha sha molwaashoka Sikem okwa li e “mu kwata koonkondo e ta lala naye.” Konima yethimbo Sikem okwa li a “pwile mohole” naDina, ihe inashi lundulula shoka a li e mu ningile. (Lesha Genesis 34:1-4.) Dina haye awike a li ta hepekwa kiilanduliko yaashoka a ningi. Okupanga kwe uukuume nAakaanana okwa li kwa pendutha iiningwanima mbyoka ya li ya sitha ohoni noya dhinitha uukwanegumbo waandjawo auhe. — Gen. 34:7, 25-31; Gal. 6:7, 8.

15, 16. Ongiini tatu vulu okumona uunongo washili? (Tala wo oshimpungu “ Tedhatedha omanyolo ngaka.”)

¹⁵ Dina okwa li i ilongo oshiilongomwa sha simana pamukalo guyemateka. Mboka ye hole Jehova nohaya vulika kuye kaye na okwiilonga iiyilongomwa monkalamwenyo okupitila moonkalo  dhiyemateka. Molwaashoka ohaya pulakene kuye, oya tokola ‘okweenda pamwe naanawino.’ (Omayel. 13:20a) Kungawo, ohayi ilongo “ondjila kehe yo opala” nohaya yanda omaupyakadhi nokwiiyehameka komutima inaaku pumbiwa. — Omayel. 2:6-9; Eps. 1:1-3.

¹⁶ Uunongo wopakalunga otawu vulu okumonika kwaayehe mboka ye wu hala notaya katuka metsokumwe nehalo lyawo mokukala aluhe taya galikana notaya konakona Oohapu dhaKalunga  nosho wo iileshomwa mbyoka ya nyanyangidhwa kongundu yomupiya omudhiginini nomunandunge. (Mat. 24:45, NW; Jak. 1:5) Osha simana wo okukala neishonopeko ndyoka hali ulikwa mokukala nehalo okupulakena komayele. (2 Aak. 22:18, 19) Pashiholelwa, Omukriste otashi vulika a zimine ekotampango ndyoka tali ti kutya omwenyo gwe otagu vulu okukala omunamakoto. (Jer. 17:9) Ihe ngele opwa holoka onkalo yontumba moka inaa katuka pandunge, mbela ohi ifupipike ngaa lela e ta taamba ko omayele gontumba gopahole nosho wo ekwatho ndyoka ta pewa?

17. Hokolola onkalo ndjoka tayi vulu okuholoka po muukwanegumbo e to ulike nkene omusamane omuvali ta vulu okutompathana nomwanakadhona.

¹⁷ Natu tye nduno omusamane gumwe omuvali ita pitike omwanakadhona nomumati omugundjuka Omukriste ye ke endaende oyo ayeke yaali. Omukadhona ota pula he ta ti: “Tate, ano ino inekela ndje? Itatu ka ninga sha sha puka.” Omukadhona ngoka oku hole Jehova noku na omalalakano omawanawa, ihe mbela ote ende ngaa “mowino [yopakalunga]”? Mbela ota ‘yanda ngaa oluhondelo’? Nenge okwa nika uusama ‘mokwiinekela omutima gwe’? (Omayel. 28:26) Otashi vulika wu shi omakotampango gamwe ngoka taga vulu okukwathela omuvali nguka a tompathane nokamwanakadhona kombinga yoshinima shika. — Tala Omayeletumbulo 22:3; Mateus 6:13; 26:41.

18, 19. Emakelo lini lya li lya adha Josef monkalamwenyo ye, nokwa li u ungaunga nalyo ngiini?

¹⁸ Josef omumwahe gwaDina okwa li omugundjuka e na omaukwatya omawanawa, e hole Kalunga nokwa li a yanda oluhondelo. (Gen. 30:20-24) Sho Josef a li okanona, okwa mona nomeho ge iilanduliko mbyoka ya li ye etithwa ketokolo kaali li pandunge lyomumwayinakadhona Dina. Osha yela kutya okudhimbulukwa kwaJosef oshinima shoka nosho wo okukala a hala okwiikaleka mohole yaKalunga, osha li she mu gamene konima yoomvula sho a li a kala muEgipiti sho omukulukadhi gwamwene gwe a li a kambadhala “esiku nesiku” oku mu heka a lale naye. Molwaashoka Josef okwa li omupiya, ka li ta vulu okweetha po owala iilonga ye e ta yi. Okwa li  e na okuungaunga nuupyakadhi mboka noondunge nonuulaadhi. Okwa li e shi ningi mokutinda omukulukadhi gwaFarao lwiikando, nolwahugunina okwa li e mu yi ondapo. — Lesha Genesis 39:7-12.

¹⁹ Dhiladhila kashona kwaashika: Ando Josef okwa li ha kala a hala omukulukadhi gwaPotifar nenge ha kala ta dhiladhila okuya naye momilalo, mbela ando okwa vulu ngaa okukakatela uudhiginini we moshinima shino? Hasho, ando ine shi vula. Pehala lyokukala ta dhiladhila kombinga yomilalo, Josef okwa li a lenga ekwatathano lye naJehova, naashoka osha li shi iwetikile moohapu ndhoka a li a lombwele omukulukadhi gwaPotifar a ti: ‘Mwene gwandje ina keelela ndje sha shilwe, kakele koye. Ondi longe ngiini uuwinayi u thike mpoka, ndi yone kuKalunga?’ — Gen. 39:8, 9.

20. Ongiini Jehova a li u ukitha iinima moshinima shaJosef?

²⁰ Dhiladhila owala kenyanyu ndyoka Jehova a li e na mpoka li thike sho a mono omugundjuka Josef a kakatela uudhiginini esiku nesiku nonando okwa li e li kokule noyaandjawo. (Omayel. 27:11) Konima yethimbo Jehova iinima okwe yi enditha nawa opo Josef a mangululwe mondholongo e ta langekwa po e li omupangeli gwaEgipiti alihe nomutonateli gwiikulya. (Gen. 41:39-49) Oohapu dhEpisalomi 97:10 kadhi shi tuu dhoshili ndhoka tadhi ti: “OMUWA oku hole mboka haa tondo uuwinayi, ota gamene aantu ye note ya hupitha miikaha yaakolokoshi”!

21. Omumwatate gumwe omugundjuka moshilongo shimwe muAfrika okwa li u ulike ngiini kutya oku na uulaadhi okukala a yogoka pamikalo?

²¹ Nokunena aapiya oyendji yaKalunga ohayu ulike wo kutya  oye ‘tonde uuwinayi noye hole uuyuuki.’ (Amos 5:15) Omumwatate gumwe omugundjuka moshilongo shimwe shomuAfrika okwa ti kutya omunasikola omukwawo omukadhona okwa li e mu lombwele inaa sa ohoni kutya ota vulu okulala naye ngele okwe mu kwathele okunyola ko kokakonakono ke komwaalu. Omumwatate nguka okwa ti: “Onda li nde shi tindi neendelelo. Molwaashoka onda li nda kakatela uudhiginini, kanda li ndi ishundula, oshinima shoka shi na ondilo yi vule yoshingoli noyoshisiliveli.” Odhoshili kutya eyono otali vulu okweetela omuntu ‘uutoye wopokathimbo,’ ihe uuwanawa wa tya ngaaka olundji ohawu etitha oluhodhi olunene. (Heb. 11:25) Kakele kaashono, uuwanawa mboka kawu na ongushu yasha moku wu yelekanitha nenyanyu tali kalelele ndyoka hali zi mokuvulika kuJehova. — Omayel. 10:22.

22, 23. (a) Ngele Omukriste okwa yono sha kwata miiti, mbela osha hala okutya ke na we ekwatho lyasha? (b) Ngoka a yona ota vulu okukwathelwa ngiini?

²² Molwaashoka atuheni inatu gwanenena, ohatu kondjo opo tu sinde omahalo gopanyama notu longe shoka shu uka koshipala shaKalunga. (Rom. 7:21-25) Jehova oku shi kutya inatu gwanenena noku “shi kutya otse ontsi yevi.” (Eps. 103:14) Ihe omathimbo gamwe Omukriste ohashi vulika a yone sha kwata miiti. Mbela osha hala okutya ke na we ekwatho lyasha? Hasho nando. Odhoshili kutya omuntu ngoka a yona otashi vulika a mone iilanduliko yinikitha oluhodhi, ngaashi omukwaniilwa David e shi ningilwa. Ihe nonando ongaaka, Kalunga ‘oha dhimine po’ aluhe mboka yi iyela ombedhi nohaya ‘hempulula’ oondjo dhawo. — Eps. 86:5; Jak. 5:16; lesha Omayeletumbulo 28:13.

²³ Kakele kaashono, Kalunga omolwohole ye okwa pe egongalo lyopaKriste “aantu omagano,” sha hala okutya, aasita yopambepo ya pyokoka mboka ya gwana noye na ehalo oku tu kwathela. (Ef. 4:8, 12; Jak. 5:14, 15) Elalakano lyawo olyo okukwathela ngoka a yona a kale ishewe e na ekwatathano naKalunga, mokwiilikolela ‘oondunge’ ngaashi sha popiwa kuSalomo, opo keehe endulule we eyono ndyoka. — Omayel. 15:32.

24, 25. (a) Omulumentu omugundjuka ngoka a hokololwa mOmayeletumbulo 7:6-23 okwa li u ulike ngiini kutya “omugoya”? (b) Ongiini tatu vulu ‘okwiilikolela oondunge’?

²⁴ Ombiimbeli otayi popi kombinga yomuntu “omugoya” nosho wo ngoka ti ‘ilikolele oondunge.’ (Omayel. 7:7) Omuntu ngoka ‘egoya’ otashi vulika a ninge omatokolo kaage li pandunge molwaashoka ina pyokoka pambepo noke na owino mokulongela Kalunga. Ngaashi omulumentu omugundjuka ngoka a hokololwa mOmayeletumbulo 7:6-23, omuntu a tya ngaaka otashi vulika a yone nuupu omayono ga kwata miiti. Ihe ‘ngoka ti ilikolele oondunge’ oha tonatele omutima gwe okupitila mokukonakona aluhe Oohapu dhaKalunga pamwe negalikano. Nonando ina gwanenena, oha ningi wo oonkambadhala dha mana mo opo u ukithe omadhiladhilo ge, omaiyuvo ge nosho wo omalalakano ge monkalamwenyo opo a kale metsokumwe naashoka shi holike kuKalunga. Nena ngele te shi ningi, otu ulike kutya “oku hole omwenyo gwe mwene,” nenge otashi mu etele omalaleko nuuyamba, nota ka ‘kala e li nawa.’ — Omayel. 19:8.

²⁵ Ipula mwene to ti: ‘Mbela ondi itaala ngaa lela kutya omakotampango gaKalunga oge li mondjila? Mbela ondi itaala ngaa lela kutya oku ga dhiginina otaku eta enyanyu enene?’ (Eps. 19:7-10; Jes. 48:17, 18) Ngele owu na omalimbililo gasha, kambadhala oku ga kandula po. Tedhatedha kiilanduliko mbyoka hayi ka etithwa kokwiipwililika oompango dhaKalunga. Kakele kaashono, “konakona mwene, u mone, nkene OMUWA omwaanawa” mokukala metsokumwe noshili nomokuudhitha omadhiladhilo goye niinima mbyoka iiwanawa, iinima mbyoka yoshili, yu uka, ya yogoka noyi na epopilo ewanawa. (Eps. 34:8; Fil. 4:8, 9) Ngele to shi ningi, oto ka kala wu hole Kalunga noonkondo, oto ka kala wu hole shoka e hole nowu tonde shoka e tonde. Dhimbulukwa kutya Josef naye ka li a gwanenena. Ihe nando ongaaka, okwa li a vulu ‘okuyanda oluhondelo’ molwaashoka okwa li e etha Jehova e mu zule uule woomvula odhindji, moku mu kwathela i ilikolele oondunge. Ano nangoye osho wu ninga. — Jes. 64:8.

26. Oshipalanyolo sha simana oshini tatu ka kundathana moontopolwa tadhi landula?

 ²⁶ Omushiti gwetu okwe tu shita tu na iilyo yoluvalo opo tu vule oku yi longitha okumona aanona nokunyanyukilwa omilalo mondjokana, ihe hakudhana nayo mokwiinyanyudha owala. (Omayel. 5:18) Moontopolwa mbali tadhi landula otatu ka kundathana kutya Kalunga oha tala ko ngiini ondjokana.