1, 2. Balamu akacwa bwengye ki okureetera abaheereza ba Yehova kugwa omu kabi?

OMUJUBI naaza omu mwanya ogu arikukira kukwatiramu eby’enyanja bingi. Hariho ekika ky’eby’enyanja ebi arikwenda kukwata. Aronda eki eby’enyanja ebyo birikukunda, akita aha irobo reero aritambika omu maizi. Bwanyima y’akaanya kakye, eky’enyanja kikwatira aha irobo reero omujubi akikurura akitambika aha nkungu. Ashemererwa ahabw’okumanya ngu yaakoresa omutego murungi.

² Omu gwa 1473 Yesu atakazairwe, omushaija orikwetwa Balamu akateekateeka aha mutego ogu yaabaire naabaasa kukoresa. Abu yaabaire naayenda kutega, bakaba bari abaheereza ba Ruhanga abaabaire bateire orusiisira omu mpita za Moabu aha mwatano gw’Ensi Eyaaraganisiibwe. Balamu akaba naayetwara nka nabi wa Yehova, kwonka buzima akaba ari omunyamururu owaabaire aguzirwe kukyeena Israeli. Kwonka ahabw’okugira ngu Yehova akataaha omu nshonga, emikyeeno ya Balamu aha Baisraeli ekahindukamu emigisha yonka. Amaririire kutunga ekihembo kye, Balamu akateekateeka ngu shana akaba naabaasa kureetera Ruhanga kukyeena abantu be, ku baakukozire ebibi by’amaani. Balamu aine ekigyendererwa ekyo, akakoresa abakazi barungi ba Moabu.—Okubara 22:1-7; 31:15, 16; Okushuuruurwa 2:14.

3. Omutego gwa Balamu gukakwatsa bangahi?

³ Kwonka shi omutego gwe gukakora? Eego, abamwe bakagugwamu. Enkumi n’enkumi z’abashaija Abaisraeli bakagwa  omu mutego ogwo ‘barikushambana n’abaishiki b’Abamoabu.’ Kandi bakatandika kuramya baaruhanga b’Abamoabu, otwariiremu na Baali owa Peori, ruhanga w’oruzaaro. Ekyarugiremu, Abaisraeli 24,000 bakacwekyerera bari haihi kutaaha omu Nsi Eyaaraganisiibwe. Ka kaabaire akagwe k’amaani!—Okubara 25:1-9.

4. Ahabw’enki enkumi z’Abaisraeli baagwire omu bushambani?

⁴ Niki ekyareeteire baingi kugwa omu mutego ogwo? Abantu baingi bakatandika kugira omutima mubi barikuruga ahari Yehova, Ruhanga owaabaihire omu nsi ya Misri, akabariisa bari omu ihamba kandi akabeebembera kubatwara omu nsi eyaaraganisiibwe. (Abaheburaayo 3:12) Arikugamba aha nshonga egi, entumwa Paulo akahandiika ati: ‘Kandi tutashambana, nka bamwe omuribo oku baashambaine, hakafa abantu emitwaro ebiri n’enkumi ishatu eizooba rimwe.’ *—1 Abakorinso 10:8.

5, 6. Ahabw’enki ebirikukwata aha kibi ky’Abaisraeli bari omu Mpita za Moabu bikiri eby’omugasho ahariitwe omu bunaku obu?

⁵ Ebiri omu kitabo kya Okubara nibyegyesa abantu ba Ruhanga ab’omu bunaku obu ebintu bikuru, abari haihi kutaaha omu nsi erikukirira kimwe egyo eyaabaire eraganisiibwe. (1 Abakorinso 10:11) Nk’eky’okureeberaho, oku abantu omu  nsi barikutwara okuteerana obunaku obu, ni nk’oku Abamoabu baabaire nibakutwara kwonka hati kiri omu nsi yoona. Kandi, enkumi n’enkumi z’Abakristaayo buri mwaka nibagwa omu mutego gw’obushambani nk’ogu Abaisraeli baagwiremu. (2 Abakorinso 2:11) Kandi barikutooreza Zimuri owaaretsire Omumidianikazi omu rusiisira rw’Abaisraeli omu ihema rye, bamwe aha barikuramiza hamwe n’abantu ba Ruhanga basiisire bamwe omu kibiina Ekikristaayo.—Okubara 25:6, 14; Yuda 4.

⁶ Nooyereeba nk’ori omu Mpita za Moabu ez’omu bunaku obu? Nooreeba ekiconco eki ori haihi kutunga, ensi ensya ei tutuura tutegyereize? Ku kiraabe nikwo kiri, mariirira kwerindira omu kukunda kwa Ruhanga orikworobera ekiragiro eki: ‘Mwetantare eby’obushambani.’—1 Abakorinso 6:18.

7, 8. “Obushambani” niki, kandi abo abarikubwejumbamu nibagyesha bata ebi barikubiba?

⁷ Nk’oku kirikukoresibwa omu Baibuli, ekigambo “obushambani” (omu Rugriika, por·neiʹa) nikikwata aha kuteerana n’omuntu aheeru y’obushwere oburikwikirizibwa omu Byahandiikirwe. Eki nikitwariramu obwamaraaya, okuteerana okw’abatashweraine, okurigatsa ebicweka by’omuntu eby’enshoni, n’okukwatakwata ebicweka by’omubonano eby’omuntu ou otashweraine nawe. Nikitwariramu obutiingwa n’okuteerana n’enyamaishwa. *

⁸ Ebyahandiikirwe nibishoboorora gye aha nshonga egi: Abo abarikuguma nibeejumba omu by’obushambani tibarikubaasa kuguma mu kibiina Ekikristaayo kandi tibarikwija kutunga amagara agatahwaho. (1 Abakorinso 6:9; Okushuuruurwa 22:15) Okwongyera ahari ekyo, na hati nibeereetaho oburemeezi nk’obutesigwa, okutagira kitiinisa, obutaikirizana omu bushwere, okugira omutima gurikweshinja, okutwara  enda z’endaaro, endwara, obundi n’okufa. (Shoma Abagalatia 6:7, 8.) Buzima nikiba kitari ky’obwengye okutoora omuhanda nk’ogwo oguraarugyemu oburemeezi n’enaku. Eky’obusaasi, baingi tibarikuteekateeka aha bibi ebiraarugyemu baaba nibatandika kukora ebikorwa nk’ebyo obundi ekirikutwariramu ebirikwitsa enshoni.

9. Ebirikwitsa enshoni ti ky’akabi nk’oku abamwe barikugira? Shoboorora.

⁹ Omu mahanga maingi, ebirikwitsa enshoni nibikira kuteebwa omu mpapura z’amakuru, omu byeshongoro, aha tiivi n’ahari Intaneeti. * Okubireeba ti ky’akabi nk’oku abamwe barikuteekateeka? Ngaaha! Abo abarikubireeba nibabaasa kwihamu omuze mubi gw’okwemarisa, ekirikurugamu ‘okutegyekwa emize erikwitsa enshoni,’ kandi ekirikubaasa kurugamu okwenda kuteerana buri kiire, okwetenga okubi, oburemeezi omu bushwere nari okugaitururwa. * (Abarooma 1:24-27; Abaefeso 4:19) Omucondooza omwe akashushanisa okwenda kuteerana buri kiire nk’endwara y’ekookoro. Naagira ati: “Omuze ogu niguguma nigukura kandi gugumire eicwa n’okutambwa.”

10. Nitubaasa kugyendera tuta aha buhabuzi oburi omu Yakobo 1:14, 15? (Reeba n’akabokisi “ Oku Naatungire Obumanzi Kugira Emicwe Mirungi.”)

¹⁰ Teekateeka aha bigambo ebiri omuri Yakobo 1:14, 15, ebirikugira biti: “Omuntu weena ayohibwa yaabeihwabeihwa okwetenga kwe, kwamwosyosya. Bwanyima okwetenga okwo ku kuheza kutwara enda, kuzaara ekibi; n’ekibi ku kikura, kizaara okufa.” N’ahabw’ekyo okwetenga okubi ku kuraije  omu biteekateeko byawe, rahuka kukweihamu! Nk’eky’okureeberaho, waareeba ebishushani bibi ebirikushagika obushambani otakigyendereire, rahuka kureeba aha rubaju, nari oiheho kompyuta, nari tiivi. Kora kyona ekirikubaasika kwetantara okwetenga okubi kutakakusingwire!—Shoma Matayo 5:29, 30.

11. Twaba niturwanisa okwetenga kubi, nitubaasa kworeka tuta ngu nitwesiga Yehova?

¹¹ Ahabw’oburungi bwaitu, Ogwo orikutumanya munonga kukira oku turikwemanya naatwehanangiriza ati: “N’ahabw’ekyo mwite eby’ensi ebiri omu ngingo zaanyu, obushambani, ebihagaro, okurigira okubi, okwetenga okubi, kandi n’okwetenga, nikwo kuramya ebishushani.” (Abakolosai 3:5) Buzima, okukora tutyo nikibaasa kutooroba. Kwonka ijuka ngu twine  Tataitwe ow’omu iguru oine rukundo n’okugumisiriza. (Zaaburi 68:19) N’ahabw’ekyo shaba Ruhanga ahonaaho waagira ebiteekateeko bibi. Shaba kuheebwa “amaani agarikukirira kimwe,” kandi yegyemesereze kuteekateeka aha bintu ebindi.—2 Abakorinso 4:7; 1 Abakorinso 9:27; reeba akabokisi “ Nimbaasa Kucwa Nta Omuze Mubi?” aha rupapura 104.

12. “Omutima” gwaitu nikyo ki, kandi ahabw’enki tushemereire kugurinda?

¹² Omunyabwengye Sulemaani akahandiika ati: “Rinda omutima gwawe okukira ebindi byona ebi orikurinda, ahakuba nigwo gurugwamu enshuro z’amagara.” (Enfumu 4:23) “Omutima” gwaitu niwe muntu w’omunda orikworeka eki turi buzima omu maisho ga Ruhanga. Kandi, oku Ruhanga arikureeba omutima gwaitu beitu kutari oku abantu barikutureeba, nikyo kiribaasa kurugiiriraho okutunga amagara agatahwaho nari kutagatunga. Nikwo kyorobi kityo. Kandi nikwo kiri na kikuru. Yobu omushaija omwesigwa kubaasa kwetantara okureeba omukazi akamwetenga, akakora endagaano n’amaisho ge. (Yobu 31:1) Ka n’eky’okureeberaho kirungi ahariitwe! Arikworeka emiteekateekyere niyo emwe, omuhandiiki wa zaaburi akashaba ati: “Ohindure amaisho gangye, garekye kureeba ebitaine mugasho.”—Zaaburi 119:37.

13. Dina akaba ari oha, kandi ahabw’enki turikubaasa kugira ngu abu yaanywanire bakaba batari barungi?

¹³ Nk’oku twareebire omu Shuura 3, banywani baitu nibabaasa kutureetera kukora ebirungi nari ebibi. (Enfumu 13:20; Shoma 1 Abakorinso 15:33.) Teekateeka aha ky’okureeberaho kya Dina, muhara wa Yakobo. N’obu araabe yaakuziibwe gye, Dina akakora eky’obushema yaanywana abaishiki b’Abakanaani. Nk’Abamoabu, Abakanaani nabo bakaba baine emicwe mibi munonga. (Abaleevi 18:6-25) Omu maisho g’abashaija b’Abakanaani otwariiremu na Shekemu, owaabaire “naasiimwa munonga” okukira boona ab’omu ka ya ishe, bakareeba Dina nk’oyorobi kutega.—Okutandika 34:18, 19.

14. Okutoorana abanywani kubi kwa Dina kukarugamu kuta oburemeezi?

 ¹⁴ Noobaasa kushanga ngu obu Dina yaareeba Shekemu akaba ataine kigyendererwa ky’okuteerana nawe. Kwonka, Shekemu we akakora ekyo eki Abakanaani abaingi baabaire nibatwara nk’ekya butoosha obwo baagira ekyetengo ky’okuteerana. Dina okuteeraho kwanga aha muheru tikuramuhwereire ahakuba Shekemu ‘akamutwara’ kandi “yaamuhamba, yaamushiisha.” Nikireebeka ngu bwanyima Shekemu ‘akakunda’ Dina, kwonka ekyo tikirahindwire aha bi yaamukozireho. (Shoma Okutandika 34:1-4.) Kwonka Dina tiwe wenka owaabaire naija kubonabona ahabw’ebyabaireho. Okunywana kwe kubi kukarugamu oburemeezi kandi kwajumisa eka yaabo yoona.—Okutandika 34:7, 25-31; Abagalatia 6:7, 8.

15, 16. Nitubaasa kutunga tuta obwengye obwabuzima? (Reeba n’akabokisi aha  rupapura 109.)

¹⁵ Dina ku araabe aine eki yaayegiremu, akakyega bwanyima y’okugwa omu kabi. Abo abarikukunda Yehova kandi  bakamworobera tibaine kwega omu muringo nk’ogwo. Ahabw’okugira ngu niboorobera Ruhanga, nibacwamu ‘kugyenda n’abanyabwengye.’ (Enfumu 13:20a) Omu kukora batyo, nibeetegyereza “buri muhanda gwona omurungi” reero beetantara kwereetera oburemeezi n’amaganya.—Enfumu 2:6-9; Zaaburi 1:1-3.

¹⁶ Abo abarikuguma nibashaba kandi bakaguma nibashoma Ekigambo kya Ruhanga n’ebitabo ebirikutuheebwa  omwambari omwesigwa kandi ow’obwengye, nibabaasa kutunga obwengye bwa Ruhanga. (Matayo 24:45; Yakobo 1:5) Ekindi ekikuru n’obucureezi, oburikureebekyera omu kworobera obuhabuzi bw’omu Byahandiikirwe twekundiire. (2 Abagabe 22:18, 19) Nk’eky’okureeberaho, Omukristaayo naabaasa kwikiriza ngu omutima gwe nigubaasa kuba engobya kandi gumuhabise. (Yeremia 17:9) Kwonka shi ku yaakucwamu kubi, akaabaasa kuba omucureezi ekirikumara aikiriza okuhanwa n’obuhwezi?

17. Yoreka ekirikubaasa kubaho omu ka, n’oku omuzaire arikubaasa kukigaaniiraho n’omuhara.

¹⁷ Teekateeka aha mbeera egi. Omuzaire yaazibira muhara we kugyenda n’omutsigazi Omukristaayo bonka hataine ou baine. Omwishiki yaabuuza ishe ati: “Kwonka shi Taata torikuunyesiga? Tihaine kibi kyona eki turaakore!” Naabaasa kuba naakunda Yehova kandi aine n’ebigyendererwa birungi, kwonka shi naaba naagyendera ‘omu bwengye bwa Ruhanga’? Naaba ‘naayetantara obushambani’? Nari naaba ‘naayesiga omutima gwe’ ahabw’obushema? (Enfumu 28:26) Obundi noobaasa kuteekateeka aha misingye endiijo erikubaasa kuhwera omuzaire ogu n’omuhara kugaaniira aha nshonga egi.—Reeba Enfumu 22:3; Matayo 6:13; 26:41.

18, 19. Ni kugyezibwa ki okwahikire ahari Yosefu, kandi akakusingura ata?

¹⁸ Omutsigazi murungi owaabaire naakunda Ruhanga kandi owaayetantaire eby’obushambani, ni Yosefu munyanya Dina owa muka-ishe. (Okutandika 30:20-24) Yosefu akiri muto, akereebera ebyarugire omu kucwamu kubi kwa munyaanya. Hatariho kubanganisa okwijuka ebi, n’okugira ekyetengo ky’okuguma omu kukunda kwa Ruhanga, bikaija byahwera Yosefu ari omuri Misri, obu muka mukama we yaabaire naamubeihabeiha “obutoosha” kubyama nawe. Nk’omuhuuku, Yosefu akaba atarikubaasa kufa kurekura atyo omurimo gwe akagyenda! Akaba aine kukwata enshonga egi omu  bwengye n’obumanzi. Eki akakikora arikuguma naayanga kubyama na muka Potifaari, kandi aha muheru, akahunga yaamutsigaho.—Shoma Okutandika 39:7-12.

¹⁹ Teekateeka ahari eki: Ku ogire ngu Yosefu butoosha akaba nateekateeka aha mukazi ogwo nari aha kuteerana, akabaasize kurinda obwesigwa bwe? Obundi tikyakubaasikire. Omu mwanya gw’okuteekateeka aha bintu ebibi, Yosefu akooreka ngu naatwara omukago gwe na Yehova nka mukuru, ekyayeyorekyeire omu bigambo ebi yaabaire agambira muka Potifaari. Akaba amugira ati: “Mukama wangye . . ., tihariho ki atarandekuriire, kureka iwe wenka, ahabw’okuba ori omukazi we. Mbwenu nimbaasa nta kukora ekibi ekirikwingana kityo, n’okucumura ahari Ruhanga?”—Okutandika 39:8, 9.

20. Yehova akataaha ata omu nshonga ezaabaire nizikwata ahari Yosefu?

²⁰ Teekateeka aha kushemererwa oku Yehova yaagizire okureeba Yosefu omutsigazi muto, owaabaire ari hare n’owaabo, arikuguma ari omwesigwa butoosha. (Enfumu 27:11) Bwanyima, Yehova akataaha omu nshonga atyo Yosefu yaihwa omu kihome, kandi yaakuzibwa yaaba owa kabiri ahari Faraho, yaakurira n’amahunikiro g’eby’okurya omuri Misri! (Okutandika 41:39-49) Ebigambo ebiri omu Zaaburi 97:10 ka bihikire ebirikugira biti: “Imwe abakunda MUKAMA, mwangye obubi. Arinda amagara g’abarikwera be, abaiha omu mikono y’ababi!”

21. Ow’eishe-emwe muto omu ihanga rya Afrika akabaasa ata kworeka obumanzi aha bikwatiraine n’emicwe?

 ²¹ N’omu bunaku obu, abaheereza ba Ruhanga baingi nibooreka ngu ‘nibanga ebibi, bakunda ebirungi.’ (Amosi 5:15) Ow’eishe-emwe muto omu ihanga rimwe omuri Afrika, naijuka ngu omwishiki ou yaabaire naashoma nawe akamushaba kumuhwera omu kigyezo ky’okubara reero ngu bwanyima abyame nawe. Ow’eishe-emwe naagira ati: “Eshaaha egyo nkanga. Ahabw’okuguma ndi omwesigwa, ndinzire ekitiinisa kyangye, ekintu ekirikukirira kimwe efeeza n’ezaabu.” Buzima ekibi, nikibaasa kureeta ‘okushemererwa okw’akaanya bwanya,’ kwonka bwanyima nikukira kurugamu obusaasi bwingi. (Abaheburaayo 11:25) N’ekindi, okushemererwa nk’okwo tikurikubaasa kugyeragyeranisibwa n’okushemererwa okw’obutwire okurikuruga omu kworobera Yehova.—Enfumu 10:22.

22, 23. (a) Omukristaayo yaakora ekibi eky’amaani, ahabw’enki ekyo kitarikumanyisa ngu tarikubaasa kusaasirwa? (b) Ni buhwezi ki oburikubaasa kuheebwa omuntu osiisire?

²² Ahabw’okuba abatahikiriire, twena nituteeraho kurwanisa ebyetengo bibi n’okukora ekihikire omu maisho ga Ruhanga. (Abarooma 7:21-25) Yehova eki naakimanya, “naijuka ku turi omucuucu.” (Zaaburi 103:14) Kwonka obumwe, Omukristaayo naabaasa kukora ekibi ky’amaani. Nikimanyisa ngu Ruhanga tarikubaasa kumusaasira? Ngaaha! Buzima, omusiisi naabaasa kugyesha ebibi nk’oku kyabaire aha Mugabe Daudi. Kwonka nabwo, Ruhanga butoosha ‘naarahuka kusaasira’ abo abarikwefuuza ‘baketeisa’ ebibi by’abo.—Zaaburi 86:5; Yakobo 5:16; —Shoma Enfumu 28:13.

²³ Kandi, Ruhanga ahaire ekibiina Ekikristaayo ‘abashaija abari nk’ebiconco,’ nibo abareeberezi abakuzire omu by’omwoyo abarikuba beteekateekire kuha obuhwezi. (Abaefeso 4:8, 12; Yakobo 5:14, 15) Ekigyendererwa kyabo n’okuhwera osiisire kugaruka kugira omukago na Ruhanga kandi ngu  omu bigambo by’omunyabwengye, ‘ayeyongyere kwetegyereza’ kugira ngu atagaruka kukora ekibi.—Enfumu 15:32.

24, 25. (a) Omutsigazi orikugambwaho omu Enfumu 7:6-23 akooreka ata ngu akaba ‘ataine bwengye’? (b) Nitubaasa ‘kweyongyera kwetegyereza’ tuta?

²⁴ Baibuli neegamba aha muntu “otaine bwengye” n’ahari ogwo ‘orikweyongyera kwetegyereza.’ (Enfumu 7:7) Ahabw’okuteetegyereza gye oku Yehova arikureeba enshonga n’okutamanya bingi omu buheereza bwa Ruhanga, “otaine bwengye” naabaasa kucwamu kubi. Nk’omutsigazi orikugambwaho omu Enfumu 7:6-23, omuntu nk’ogwo naabaasa kurahuka kugwa omu nshobe y’amaani. Kwonka, ‘orikweyongyera kwetegyereza’ naayeshwijuma arikurabira omu kweyegyesa Ekigambo kya Ruhanga, kandi arikushaba butoosha. Ebiteekateeko bye, ebyetengo, n’ebigyendererwa bye naabihikaanisa n’ebi Ruhanga arikusiima nk’oku arikubaasa omu butahikiirira bwe. Yakora atyo naaba ‘naakunda amagara ge,’ nari naaba naayereetera emigisha kandi “aryagogyera.”—Enfumu 19:8.

²⁵ Yebuuze oti: ‘Buzima nimpamya ngu emitindo ya Ruhanga ehikire? Ni nyikiriza buzima ngu okugihamiraho nikurugamu okushemererwa kwingi?’ (Zaaburi 19:7-10; Isaaya 48:17, 18) Ku oraabe oine okubangaanisa kwona, kweihemu. Teekateeka munonga aha birikuruga omu kutoorobera ebiragiro bya Ruhanga. Okwongyera ahari ekyo, ‘roza, oreebe Yehova ku ari murungi’ orikugyendera aha mazima kandi orikwijuza ebiteekateeko byawe n’ebintu ebirungi, eby’amazima, eby’oburyo, ebishemeire, ebirikusiimwa, n’ebirikushemeza. (Zaaburi 34:8; Abafilipi 4:8, 9) Noobaasa kugira obwesigye ngu, oku oraayeyongyere kukora otyo, nikwo oraayeyongyere kukunda Ruhanga, kukunda ebi arikukunda, n’okwanga ebi arikwanga. Yosefu akaba atahikiriire. Kwonka, akabaasa ‘kwetantara obushambani’ ahabw’okuba akaikiriza Yehova kumuhabura kumara emyaka mingi arikwenda kumushemeza. Naiwe noobaasa kukora otyo.—Isaaya 64:8.

26. Ni nshonga ki enkuru erikuza kugambwaho?

 ²⁶ Omuhangi waitu taratuhaire bicweka by’omubonano nk’eby’okuzaanisa, beitu okutubaasisa kuzaara n’okutunga okushemererwa omu bushwere. (Enfumu 5:18) Oku Ruhanga arikutwara obushwere nikuza kugambwaho omu shuura ibiri ezirikukurataho.