1, 2. Dahme Palaam wia pwehn kauwehla sapwellimen Siohwa aramas akan?

MIE sounlaid men me kohla wasa me e kin kalapw laid ie. Mie soangen mwahmw me e men koledi. E pilada ehu pahn oh koskihla nansedo. Mwurin ahnsoukis, sahlo mwenge, ih eri apihada mwahmw men. E perenda pwe e ese me e pilada ehu pahn me pwung.

² Met katamankin kitail dahme wiawi nan pahr 1473 Mwohn Krais. Ohl men me adaneki Palaam kin medemedewe duwen lidip ehu me e kak doadoahngki. E men lidipiheki sapwellimen Koht aramas akan me mi nan Patapat en Mohap limwahn Sapwen Inowo. Palaam dene ih sapwellimen Siohwa soukohp men, ahpw ni mehlel ih aramas noahrok men me nanmwarki en Mohap doadoahngki pwehn keriahla mehn Israel kan. Ahpw Siohwa sohte ketin mweidohng met en wiawi, kahrehda Palaam kak ihte kapaiada mehn Israel kan. Pwehki e men alehdi pweine, Palaam medewe me ma e pahn kasonge sapwellimen Koht aramas akan en wiahda dihp laud ehu, met pahn kak kahrehiong Koht en ketin keriahla irail. Pwehn  wia met, Palaam doadoahngki lidip ehu, iei kasongosong sang lih pwulopwul en Mohap kan.​—Nempe 22:1-7; 31:15, 16; Kaudiahl 2:14.

3. Ia uwen en Palaam kasongosong eh pweida?

³ Eri, ia duwe, kasongosong wet pweida? Ei, e pweida. Ohl en Israel tohto lohdi oh “neneke lih en Mohap kan.” Irail pil tepida pwongih koht akan en Mohap me iangahki Paal en Peor, koht kasaut men ong kaparapar de wia nsenen pwopwoud. Pwehki met, mehn Israel 24,000 mehla mwohnte arail pedolong nan Sapwen Inowo. Ia uwen kansensuwed en met!​—Nempe 25:1-9.

4. Dahme kahrehda mehn Israel tohto lohdiong tiahk samin?

⁴ Dahme kahrehda kahpwal wet wiawi? Tohto irail kin kakairada mohngiong suwed sang ni arail sohpeisang Siohwa Koht me ketin kapitirailla sang Isip, kamwenge irail nan sapwtehn, oh kahluwairaillahng sapwen inou. (Ipru 3:12) Ni eh medemedewe met, wahnpoaron Pohl ntingihdi: “Kitail dehr nenek, duwehte me ekei irail wiadahr—kahrehda rienen silikid rehrail mehkihla rahnteieu.” *​—1 Korint 10:8.

5, 6. Dahme kahrehda dihp me mehn Israel kan wiahda nan Patapat en Mohap kin wia mehn kasukuhl ehu ong kitail?

 ⁵ Dahme ntingdi nan pwuhken Nempe kin kasalehda mehn kasukuhl kesempwal tohto ong sapwellimen Koht aramas akan rahnwet me pil pahn kereniong pedolong nan sapwen inou. (1 Korint 10:11) Karasepe, aramas tohto rahnwet kin nohn medemedewe duwen wia nsenen pwopwoud, ahpw laudsang mehn Mohap kan. Patehng met, ehuehu sounpar, Kristian tohto kin lohdiong tiahk samin, iei kasongosongohte me lelohng mehn Israel kan. (2 Korint 2:11) Duwehte Simri me kahrelahng lih en Midian men nan wasa me mehn Israel kan kin kousoan ie, ekei me kin iang sapwellimen Koht aramas akan rahnpwukat kin kasaminehla meteikan nan mwomwohdisohn Kristian.​—Nempe 25:6, 14; Sud 4.

⁶ Ke kak medewehla me ke mihmi nan irair ehu me duwehte dahme wiawi nan Patapat en Mohap? Ke kak kilang me ke pahn kereniong pedolong nan sampah kapw me ke kin awiawih ahnsou reirei? Ma ei, eri wia uwen omw kak koaros pwehn dadaurete ni limpoak en Koht sang ni omw kin kapwaiada kehkehlik wet: “Kumwail kadohwaneweisang kumwail tiahk en nenek [“tiahk samin me pid wia nsenen pwopwoud,” NW].”​—1 Korint 6:18.

7, 8. Dahkot “tiahk samin me pid wia nsenen pwopwoud”? Ia duwen irail kan me kin wia met ar kin ‘dolung dahme re kin padokedi’?

⁷ Nan Paipel, “tiahk samin me pid wia nsenen pwopwoud” (por·neiʹa ni lokaiahn Krihk) kin wehwehki nsenen pwopwoud me kin wiawi nanpwungen irail kan me sohte kapwopwoud nin duwen koasoandi en Paipel. Met iangahki kamwahl, netiki paliwar, wia nsenen  pwopwoud oh doadoahngki ewe oh wasahn kainen ong wia nsenen pwopwoud nanpwungen irail me sohte pwopwoud, oh mwadongki dipwisou en kaparapar en emen me kaidehn omw pwoud. Met pil kin pid soangen tiahk pwukat nanpwungen ohl kan de lih akan oh pil ong mahn akan. *

⁸ Dahme Paipel mahsanih duwen met uhdahn sansal: Irail kan me kin wia tiahk samin me pid wia nsenen pwopwoud sohte kak mihmi nan mwomwohdisohn Kristian oh sohte pahn ahneki mour soutuk. (1 Korint 6:9; Kaudiahl 22:15) Oh ahnsou wet, irail pil kin ahneki soangen kahpwal pwukat me duwehte re solahr kak wia aramas likilik kan, re solahr kak wauneki pein irail, nanpwung suwed nan pwopwoud, ohlahn nsenmwakelekel, liseianda mehnda e sohte men, soumwahu oh kakete mehla. (Wadek Kalesia 6:7, 8.) Eri, mehnda ken keid nan soangen ahl me diren kahpwal? Aramas tohto sohte kin medewe dahme pahn wiawi ni ahnsou me re tepida keid nan ahl wet. Met kin kalapw tepikihda en kilang kilel suwed.

9. Ia duwe, kilel suwed sohte keper duwen ekei ar kin nda? Menlau kawehwehda.

⁹ Nan sahpw tohto, kilel suwed kin rekla nan wasahn netikihla pwuhk kan, nan koul kan, nan TV, oh Internet. *  Ekei kin nda me soahng pwukat sohte keper, ahpw ia duwe, met mehlel? Uhdahn soh! Irail kan me kin kilang kilel suwed ele pahn tepida mwadongki dipwisou en kaparapar oh kakairada “ineng kanamenek kei.” Met kak imwikihla ren kin nohn medemedewe laud duwen nsenen pwopwoud, ineng kasaut kan, oh ahneki kahpwal laud nan pwopwoud oh mweipeseng. * (Rom 1:24-27; Episos 4:19) Soun roporop men koasoia me en nohn medemedewe laud duwen nsenen pwopwoud kin duwehte kanser. E nda: “E kin lalaudla oh inenen apwal en pein  mwahula. Oh e pil inenen apwal en sewese aramas me ahneki kahpwal wet.”

10. Ia duwen atail kak kapwaiada ire mehlelo me kileldi nan Seims 1:14, 15? (Pil menlau kilang koakon “ Ia Duwen Ei Diarada Kehl en Kolokol Tiahk Mwakelekel.”)

¹⁰ Nna medewehla mahsen kan me ntingdi nan Seims 1:14, 15: “Aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed, oh ni dihp eh kin pweidahr mehlel, e kin kahrehiong mehla.” Eri, ma ke tepida medewe ineng suwed, mwadangete kihsang nan omw madamadau! Karasepe, ma ke sapwungala oh kilang kilel suwed, mwadang sohpeisang de kakunla computer de kihong ehu kasdo tohrohr. Wia uwen omw kak koaros pwehn dehr lohdiong nan ineng suwed mwohn e pahn poweiukedi!​—Wadek Madiu 5:29, 30.

11. Ni atail kin nantihong powehdi ineng suwed kan, ia duwen atail kak kasalehda atail kin likih Siohwa?

¹¹ Ihme kahrehda Meno me mwahngih duwen kitail laud sang pein kitail mahsanih met: “Eri, kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed, oh noahrok kepwe (pwe noahrok kepwe iei ehu soangen kaudok ong dikedik en eni kan).” (Kolose 3:5) Mehlel me e kak apwal en wia met. Ahpw tamataman me kitail kak peki sawas sang rehn Samatail nanleng me limpoak oh kanengamah. (Melkahka 68:19) Eri mwadang peki reh sawas ma ke tepida medewe ineng suwed. Kapakapki sapwellimen Koht “manaman lapalap” oh nantihong medewe ehu soahng tohrohr.​—2 Korint 4:7; 1 Korint 9:27; menlau kilang koakon “ Ia Duwen Ei Kak Powehdi Tiahk Samin?”

12. Dahkot atail “mohngiong”? Dahme kahrehda kitail anahne pere atail mohngiong?

 ¹² Ohl loalokong Solomon ntingihdi: “Kanahieng omw madamadau [“mohngiong,” NW] pwe omw madamadau kan kin kahrehda mwomwen omw mour.” (Lepin Padahk 4:23) Atail “mohngiong” iei loalatail me kin kasalehda soangen aramas dah kei kitail mwohn silangin Koht. Oh pil, ia duwen Koht eh kin ketin kasawih atail “mohngiong” me pahn koasoanehdi ma kitail pahn kak ale mour soutuk de soh, ahpw kaidehn dahme meteikan kin medewe duwen kitail. Ire wet uhdahn sansal oh kesempwal. Ohl lelepek Sohp wiahda inou ehu pwehn dehr kangkakil serepein men ni ineng suwed. (Sohp 31:1) Ia uwen eh wia mehn kahlemeng mwahu ong kitail! Sounmelkahka men pil kasalehda soangen madamadauohte ni eh kapakapki met: “Komw kupwure ie, pwe I en dehr ngoangki dipwisou mwahl akan.”​—Melkahka 119:37.

13. Ihs Daina? Dahme kahrehda e wia elen soaloalokong eh pilada kompoakepah kan?

¹³ Nin duwen atail tehkpenehr nan Irelaud 3, kompoakpatail kan kak kamwakid laud kitail en wia me mwahu de suwed. (Lepin Padahk 13:20; wadek 1 Korint 15:33.) Nna medewehla dahme wiawihong Daina,  nein Seikop serepein. (Senesis 34:1) Mendahki eh pahpa oh nohno kihong ih kaiahn mwahu, Daina pilada en patehng serepein en Kenan kan. Duwehte mehn Mohap kan, mehn Kenan kan kin adsuwedkihla arail tiahk samin. (Lipai 18:6-25) Ong ohlen Kenan kan me iangahki Sekem, “me keieu wahu” nan peneinei en eh pahpa, Daina mwomwen serepein men me pahn mweidala pein ih en wia nsenen pwopwoud.​—Senesis 34:18, 19.

14. Ia duwen ahn Daina pilipil en kompoakepah kan eh kahrehda kahpwal?

¹⁴ Daina mwein sohte medewe en wia nsenen pwopwoud ni ahnsou me e tuhwong Sekem. Ahpw, Sekem wia dahme pali laud en mehn Kenan kan medewe me konehng en wia ni ahnsou me re ahneki ineng en wia nsenen pwopwoud. Mwein Daina song en kauhdi ih, ahpw met sohte katepe pwehki Sekem “angkehlailiong” ih. Mwuhr Sekem “inenen pokepoakehla” Daina, ahpw met sohte wekidala dahme e wiahiong Daina. (Wadek Senesis 34:1-4.) Oh kaidehn Daina kelehpw me lelohng kahpwal. Eh pilipil en kompoakepah kan kahrehda kanamenek oh kahdsuwedihala eh peneinei pwon.​—Senesis 34:7, 25-31; Kalesia 6:7, 8.

15, 16. Ia duwen atail kak ale erpit mehlel? (Pil menlau kilang koakon “ Iren Paipel kan me Kitail en Medemedewe.”)

¹⁵ Mwurin eh lelohng imwila suwed me ele mwein mie mehn kasukuhl kesempwal ehu me Daina sukuhlkihdi. Irail kan me kin poakohng oh peikiong Siohwa sohte anahne sukuhlki mehn kasukuhl kan ni soangen ahl wet. Pwehki re kin peikiong Koht, re kin pilada en patehng “me loalokong kan.” (Lepin Padahk 13:20a) Re esehla “dahkot pwung” oh sohte kin loiong kahpwal kan oh kansensuwed kan me re sohte anahne lelohng.​—Lepin Padahk 2:6-9; Melkahka 1:1-3.

 ¹⁶ Aramas koaros me uhdahn men ale sapwellimen Koht erpit kak ale met sang ni arail kin poadidi ong kapakap oh kaukaule onop Mahsen en Koht oh sawaspen Paipel kan me ladu lelepek oh loalokong kin kihda. (Luk 12:42; Seims 1:5) Irair en aktikitik pil kesempwal. Emen me aktikitik pahn perenki kapwaiada kaweid kan sang nan Paipel. (2 Nanmwarki 22:18, 19) Karasepe, mwein emen Kristian kin pwungki me eh mohngiong kak widing oh diren piht. (Seremaia 17:9) Ahpw ia duwe, ahnsou me e uhdahn anahne kaweid kan oh sawas kan, e pahn kak aktikitik pwehn ale oh kapwaiada sawas pwukat me poahsoankihda limpoak?

17. Soangen irair dahieu kak pwarada nan peneinei ehu? Ia duwen pahpa men eh kak sewese nah serepein?

¹⁷ Nna medewehla irair wet. Pahpa men sohte mweidohng nah serepein oh Kristian pwutak pwulopwul men en kelehpw kohla wasa kis. Serepeino ahpw sapeng: “Ipa, ke sohte likih ie? Se sohte pahn wia mehkot suwed!” Ele serepeino kin poakohng Siohwa oh sohte kin medewe en wia mehkot suwed. Ahpw ia duwe, e kin “idawehn padahk en me kupwurokong”? E kin ‘kadohwaneweisang ih tiahk samin  me pid wia nsenen pwopwoud’? De e kin “idawehnte pein eh kaweid”? (Lepin Padahk 28:26) Mwein ke pil kak medewe ekei kaweid kan oh ire mehlel kan me kak sewese pahpa menet oh nah serepeino en koasoiapene ire wet.​—Menlau kilang Lepin Padahk 22:3; Madiu 6:13; 26:41.

18, 19. Kasongosong dahieu lelohng Sosep? Ia duwen eh powehdi?

¹⁸ Mie ohl pwulopwul men me kin poakohng Koht oh kadohwaneweisang ih tiahk samin me pid wia nsenen pwopwoud, me iei Sosep, rien Daina. (Senesis 30:20-24) Ni ahnsou me e tikitik, Sosep kilang imwilahn ahn Daina pilipil sapwung. Dahme e tamataman oh pil eh ineng en dadaurete ni limpoak en Koht kin pere Sosep mwuhr nan Isip ni ahnsou me en eh soumaso eh pwoud kin kasonge ih “rahn koaros.” Nin duwen lidu men, sohte ahn Sosep pwuhng en uhdihsang eh doadoahk oh kohkohla! E anahne eimah oh doadoahngki eh loalokong pwehn powehdi kahpwalo. E kin wia met ni eh kin pwurepwurehng nda soh ong en Podipar eh pwoud oh pil tangasang ih.​—Wadek Senesis 39:7-12.

¹⁹ Nna medewehla: Ma Sosep kin medemedewe duwen liho de e kin kalapw medewe duwen nsenen pwopwoud, e pahn kak kolokol eh lelepek? E sansal me soh. Sosep sohte kin kolokol madamadau suwed kan, ahpw e kin kesempwalki eh nanpwungmwahu rehn Siohwa. Met sansalda ni eh ndaiong en Podipar eh pwoudo: “Ei soumas sohte irehdihsang ie mehkot, ihte komwi, eh  pwoud, me e irehdihsang ie. Eri a, ia duwen ei pahn wiahda soangen sapwung laud wet, oh dipikihda mwohn Koht?”​—Senesis 39:8, 9.

20. Ia duwen Siohwa eh ketin koasoanehdi soahng kan ong Sosep?

²⁰ Medewehla ia uwen Siohwa eh kupwurperenki ni eh mahsanihada ohl pwulopwul Sosep eh kin kolokol eh lelepek rahn koaros mendahki e kin dohsang eh peneinei. (Lepin Padahk 27:11) Mwuhr, Siohwa ketin koasoanehdi soahng kan pwe Sosep en pedoisang nan imweteng ahpw kaidehn ihte met, ahpw en pil wiahla kepina en Isip oh sounapwalih mwenge! (Senesis 41:39-49) Mahsen kan en Melkahka 97:10 uhdahn mehlel: “KAUN-O kin ketin loalloale irail kan me kin kailongki me suwed; e kin ketin sinsile mour en sapwellime aramas akan; e kin ketin kapitirailla sang pahn manaman en aramas suwed kan”!

21. Ia duwen emen brother pwulopwul nan Aperika eh kasalehda eimah en kolokol tiahk mwakelekel?

²¹ Duwehte Sosep, rahnwet sapwellimen Siohwa ladu tohto kin kasalehda me irail kin “tatki me suwed, oh kesempwalki dahme mwahu.” (Eimwos 5:15) Emen brother pwulopwul nan Aperika tamanda me emen ienge tohnsukuhl serepein ndaiong ih me e kak wendi reh ma e pahn sewese serepeino nan ehu des en sukuhl. Brothero koasoia: “I mwadangete soikala kasongosongo. Ni ei kin kolokol ei lelepek, I kak kolokol wahui. Met kesempwal douluhl sang kohl de silper.” Mehlel, emen kak “perenki dihp ahnsou mwotomwot,” ahpw soangen peren wet kin kalapw kahrehda kahpwal. (Ipru 11:25) Soangen peren wet sohte katepe ma kitail pahn medewe duwen peren poatopoat me kin kohsang atail kin peikiong Siohwa.​—Lepin Padahk 10:22.

22, 23. (a) Ma emen Kristian wiahda dihp laud, dahme kahrehda miehkihte eh koapworopwor? (b) Sawas dahieu mie ong ih?

²² Pwehki kitail sohte unsek, kitail koaros kin apwalki powehdi ineng suwed kan oh wia dahme pwung mwohn silangin Koht. (Rom 7:21-25) Siohwa mwahngih met oh pil “ketin tamataman me kitail uhdahn pwehl.” (Melkahka 103:14) Ahpw ekei ahnsou, Kristian men kak wiahda dihp laud. Ia duwe, solahr eh koapworopwor? Uhdahn mie eh koapworopwor! Mehlel me emen me wiahda dihp ele pahn kak lelohng imwila suwed duwehte Nanmwarki Depit. Ahpw Koht kin ketin ahnsou koaros “diren mahk” ong irail kan me kin koluhla oh ‘wehkada’ diparail kan.​—Melkahka 86:5; Seims 5:16; wadek Lepin Padahk 28:13.

²³ Patehng met, nan mwomwohdisohn Kristian, Koht ketikihda ni kadek “sapwellime kisakis kan” me iei silepen sihpw koahiek kan me kak oh pil perenki sewese emen me wiahda dihp. (Episos 4:8, 12; Seims 5:14, 15) Irail kin song en sewese emen me wiahda dihp en pwurehng ahneki nanpwungmwahu rehn Koht oh “loalokongla” pwehn dehr pwurehng wiahda dihp.​—Lepin Padahk 15:32.

24, 25. (a) Ia duwen ohl pwulopwul men me kileldi nan Lepin Padahk 7:6-23 kasalehda me e “pweipwei”? (b) Ia duwen atail kak “loalokongla”?

²⁴ Paipel mahsanih duwen aramas “pweipwei” oh irail kan me kin “loalokongla.” (Lepin Padahk 7:7) Emen me “pweipwei” saikinte esehla sapwellimen Koht madamadau oh saikinte koahiekla nan eh papah Koht. Ihme kahrehda ele e sohte kak dehdehki irair kan oh  sohte kak wiahda pilipil mwahu. Duwehte ohl pwulopwul men me kileldi nan Lepin Padahk 7:6-23, e pahn mengei ong ih en wiahda dihp laud. Ahpw emen me kin “loalokongla” kin kasawih eh mohngiong ni eh kin kaukaule kapakap oh wia onop en Mahsen en Koht. Oh mendahki eh soh unsek, e kin wia uwen eh kak koaros pwe eh madamadau kan, ineng kan, pepehm kan, oh mehn akadei kan en pahrekiong dahme Koht kin ketin kupwurperenki. Kahrehda e kin ‘pein wiahiong ih ehu sawas’ de wia kamwahupe, oh e “pahn paiamwahu.”​—Lepin Padahk 19:8.

²⁵ Eri, pein idek rehmw: ‘I kin uhdahn kamehlele me sapwellimen Koht koasoandi kan me pwung? I kin uhdahn kamehlele me en tengediong sapwellime koasoandi kan kin kahrehdo nsenamwahu mehlel?’ (Melkahka 19:7-10; Aiseia 48:17, 18) Ma ke diarada kisin peikasal, mwadang kapwungala. Medemedewe duwen dahme pahn kak wiawi ma ke sohte peikiong sapwellimen Koht kosonned kan. Patehng met, “pein rapahki ia uwen kalahngan en KAUN-O” ni omw kin momourki padahk mehlel oh audehkihda omw madamadau soahng mwahu kan, me duwehte soahng kan me mehlel, me pwung, me mwakelekel, me kaselel oh waun. (Melkahka 34:8; Pilipai 4:8, 9) Ke kak kamehlele me ma ke pahn wia met, omw limpoak ong Koht pahn kekeirda, oh ke pahn poakohng dahme e ketin poakohng oh tatki dahme e ketin kalahdeki. Sosep sohte unsek. Ahpw e kak “kadohwaneweisang” ih tiahk samin me pid wia nsenen pwopwoud pwehki e kin mweidohng Siohwa en ketin kaiahnehda ih erein sounpar tohto pwehn ahneki ineng en kaperenda Koht. Ke pil kak wia met.​—Aiseia 64:8.

26. Ire kesempwal dahieu me kitail pahn tehkpene?

²⁶ Sounkapikpatail ketikihong kitail dipwisou en kaparapar,  kaidehn ong mehn mwadong, ahpw pwehn kak wiahda mour oh ahneki peren nan pwopwoud. (Lepin Padahk 5:18) Irelaud riau en mwurin met pahn koasoia sapwellimen Koht madamadau ong pwopwoud.