1, 2. Lapeny ango ma wabinyamone, dok pingo?

IN DONG inyomme? Ka tye kit meno, ci nyommi-ni mono tye ka keli yomcwiny, kece itye ka limo peko aye? Wat ma tye i kinwu dong okwe woko? Itye ka kanyo kwo me otwu akanya labongo kit yomcwiny mo? Ka tye kit meno, ci nen calo itye ka winyo marac pien wat macok ma nene kong wubedo kwede okwe woko. Macalo Lakricitayo, in imito ni nyommi okel deyo i kom Jehovah ma obedo Lubanga ma imaro. Pi meno, kodi kwo ma itye iye-ni romo keli par ki remcwiny. Kadi bed kit meno, pe itam ni gen mo dong pe piri.

² I kare-ni, Lukricitayo mogo onongo kong yam gikanyo bedo i otgi akanya. Ento gin gutute gunongo yo me jingo wat i kingi. In bene pud itwero nongo yomcwiny i nyommi. I yo ma nining?

3, 4. Pingo kin jo munyomme doko cok ka ce gitute me nyiko cok ki Lubanga? Mi lapor.

³ In ki luotwu wutwero bedo ki wat macok ka ce wutute me nyiko cok bot Lubanga. Pingo? Nen kong lapor man: Ket ni tye got mo ma tere oyarre malac ki piny ento wiye oywine matidi ki malo. Ket-ti laco ocung i tere ki tung kunyango, dakone ocung ki tung kupoto ceng. Ket ni gin aryo-ni ducu gucako ito got meno. Ka gin  aryo-ni ducu pud gitye cok ki te got meno, nongo kingi tye mabor. Ento, ka giwoto ki ito me cito i wiye malo, kingi bene woto ki doko cok. Tika iniang pwony me cuko cwiny ma tye i lapor man?

⁴ Kero ma iketo i tiyo tic pa Jehovah-ni kiromo porone ki kero ma iketo me ito got. Ka imaro Jehovah, nongo itye ka tute ki keroni ducu. Ento ka wat ma tye i kinwu pe tye macok, ci nongo rom ma ngat acel tye ka ito got ki i bute tungcel kun lawote ito ki tungcel. Ngo ma timme ka wumedde ki itone? Kong i acakkine, kinwu romo bedo bor. Ento ka ce wumedde ki keto tek me nyikke cok ki Lubanga, ma rom ki ito malo ca, ci kinwu woto ki doko cok. Adada, nyiko cok bot Lubanga obedo  lagony me nyiko cok ki luotwu. Ento itwero timo meno nining?

5. (a) Yo acel me nyiko cok ki Jehovah ki dok bot luotwa obedo ngo? (b) Jehovah neno nyom nining?

⁵ Yo acel ma pire tek ma konyowu aye ni wun omyero wulub tira ma nonge i Lok pa Lubanga ma dok i kom nyom. (Jabuli 25:4; Icaya 48:17, 18) Pi meno, tam kong lok i kom tira mo acel ma lakwena Paulo omiyo. En owacci: “Jo ducu myero guket deyo i kom nyom.” (Jo Ibru 13:4) Meno te lokke ngo? Ka kiwacci “deyo” nongo te lokke ni gin moni kitero i yo me woro calo gin ma pire tek. Meno aye kit ma Jehovah neno kwede nyom, en tero calo gin ma pire tek.

6. Lok murumo nget lok pa Paulo i kom nyommi nyutu ngo, dok pingo pire tek ni myero wange meno?

⁶ Kono gire tye ni, macalo lutic pa Lubanga, in ki luotwu wungeyo ni nyom obedo gin ma pire tek, nyo ni gin maleng. Jehovah kikome aye ocako te yub me nyom. (Kwan Matayo 19:4-6.) Ento ka wutye ki peko i nyomwu, bedo ki ngec ni nyom obedo gin ma omyero kiket iye deyo keken pe romo tugo cwinywu me nyutu woro ki mar i kinwu. Dong ngo kono ma bimiyo wutimo meno? Nen kong ki diro kit ma Paulo oloko kwede i kom keto deyo. Lok murumo ka nget ginacoya meno nyutu ni lok pa Paulo i kom nyom-mi tye i kin jami mukene mapol ma en ocuko cwiny dano me timone. (Jo Ibru 13:1-5) En pe owacci, nyom obedo gin me deyo; ento en owacci, ‘jo ducu myero guket deyo i kom nyom.’ Paulo onongo pe tye ka lok i kom gin ma en oneno anena ki wange; en onongo tye ka cuko cwinygi me timone. Ngeyo ni Paulo onongo tye ka cuko cwinywu  romo konyowu me cako nyutu woro bot luotwu. Pingo tye kumeno?

7. (a) Cik me Ginacoya mene ma walubu, dok pingo? (b) Adwogi mabeco ango ma wanongo ki i bedo ki winy?

⁷ Tam kong i kom kit ma itero kwede cik mukene ma tye i Ginacoya, calo cik ma kimiyowa me loko dano me doko lupwonnye nyo cik ma mako cokke kacel pi woro. (Matayo 28:19; Jo Ibru 10:24, 25) Tye ni, lubu cik magi i cawa mukene pe yot. Pien jo ma itito botgi lok me kwena i cawa mukene pe guromo jolone, nyo dog ticci bene romo weko iol ma cito wa i cokke doko tek adada. Kadi bed kit meno, pud imedde ki tito kwena me Ker-ri kacel ki bino i cokke pa Lukricitayo. Pe tye ngat mo ma twero juki—kadi wa Catan! Pingo? Pien marri pi Jehovah ki cwinyi ducu miyo ilubu cikke. (1 Jon 5:3) Adwogi maber ango ma inongo? Nywako i tic me pwony kacel ki bedo tye i cokke weko ibedo ma wi opye dok mini yomcwiny pien nongo ingeyo ni itye ka timo miti pa Lubanga. Meno miyo keroni jing doko matek. (Nekemia 8:10) Pwony ango ma wanongo kany?

8, 9. (a) Ngo ma romo miyo ilubu cik me keto deyo i kom nyom, dok pingo? (b) Lok aryo ango ma wabinenogi kombeddi?

⁸ Kit ma mar-ri matut pi Lubanga miyo ilubu cikke me pwonyo dano ki dok bedo tye i cokke kadi bed ariya tye-ni, i yo acel-lu bene, marri pi Jehovah twero miyo ilubu cik me Ginacoya ki keto “deyo i kom nyom [mi]” kadi bed i kare mukene nen tek tutwal. (Jo Ibru 13:4; Jabuli 18:29; Latitlok 5:4) Medo i kom meno, kit macalo tuteni me nywako i tic me pwony ki dok bedo tye i cokke keli mot mapol ma a ki bot Lubanga, Jehovah bene bineno tuteni me keto deyo i kom nyommi dok goyo laane iye.—1 Jo Tecalonika 1:3; Jo Ibru 6:10.

⁹ Dong, in itwero keto deyo i kom nyommi nining?  Omyero igwokke ki kodi kwo mogo ma romo balo nyommi woko. Medo i kom meno, omyero ikwany yo ma twero jingo watwu.

10, 11. (a) Kodi kit ango ma lano nyom? (b) Lapeny ango ma myero ipeny ki luotwu?

¹⁰ Dako mo ma obedo Lakricitayo kare mo owacci: “Abedo ka lego Jehovah wek omiya kero me cirone.” Ciro ngo? En otito ni: “Cwara yeta ki yet maraco. Kadi bed ape ki bwur mo i koma, ento yet ma en yeta kwede nino ducu oketo bwur woko i cwinya, yet calo ni ‘In ibedo twon yec!’ ki ni ‘In konyi pe!’” Dako man otito gin mo ma mito kiyab iye wang maber—tic ki leb marac i ot.

¹¹ Rac adada ka ce jo me odi ma gubedo Lukricitayo gitiyo ki leb maraco, ma kelo arem me cwiny ma cangone tek! Ngene kene ni nyom ma opong ki yet nongo deyo pe iye. Nyommi tye nining i lok man? Yo acel me niang aye me penyo luot-ti ki mwolo ni, “Lok ma aloko mono miyo iwinyo nining?” Ka ce luot-ti nongo ni lokki pol kare wango iye, ci omyero iyub tic ki lebi pi ber bedowu.—Jo Galatia 5:15; kwan Jo Epeco 4:31.

12. Woro pa ngat moni konnye romo doko pe i wang Lubanga nining?

¹² Myero inge ni kit ma itiyo kwede ki lebi i otwu gudu bene wa wat-ti ki Jehovah. Baibul waco ni: “Ka ce dano mo otamo ni en ladini kun pe juko lebe, nongo bwolle abwola kene ki i cwinye, dinine-nu konnye pe.” (Yakobo 1:26) Lok ma iloko kubbe ki woroni. Baibul pe cwako lakodi tam moni ni gin mo keken ma timme ki gang pire pe tek, teke ngat moni wacci eworo Lubanga.  Pe ibwolle kekeni. Man obedo lok ma pire tek. (Kwan 1 Petero 3:7.) Oromo bedo ni itye ki kero kacel ki mit kom, ento ka ce icwero cwiny luotwu akaka ki loko leb marac, ci nongo ilano nyom dok Lubanga romo neno woroni calo gin ma konnye pe.

13. Ngat munyomme twero cwero cwiny luot-te nining?

¹³ Jo munyomme bene myero gugwokke pe gucwer cwiny luotgi i yo mogo ma tye lapiny piny. Nen kong labol aryo magi: Megi litino mo ma tye kene goyo cim bot Lakricitayo mo i kacokke ma obedo won ot pi penyo tam ki bote pol kare, ci giloko pi cawa malac; omego mo ma wiye nono maro tic pi cawa malac i tic me pwony cabit ki cabit gin ki lamego mo munyomme. Romo bedo ni jo munyomme ma kiloko i komgi i labol-li nongo gipe ki tam mo marac; ento kodi ticgi-ni mono romo miyo luotgi winyo nining? Dako mo ma tim man ogudo kome owacci: “Neno ka cwara cwalo cawa malac dok keto cwinye tutwal i kom lamego mukene ma i kacokke cwero cwinya mada. Weko atamo ni an kara konya pe.”

14. (a) Lok ango ma mako nyom ma kitito pire i Acakki 2:24? (b) Lapeny mene ma omyero wapenye kwede?

¹⁴ Ngene kene ni dako ma kiloko i kome-ni ki mukene ma girwatte ki kodi peko ma kit man i otgi giwinyo malit adada. Luotgi cayo cik ma Lubanga omiyo i kom nyom ma wacci: ‘Laco weko wonne ki minne moko i kom dakone liking.’ (Acakki 2:24) Tye gire ni, jo ma gunyomme pud gimedde ki woro lunyodogi; ento Lubanga oyubo ni ticgi madit omyero obed me gwoko ngat ma gunyomme kwede. I yo acel-lu bene, Lukricitayo gimaro luye luwotgi matek; ento margi mukwongo myero obed i kom luotgi. Pi meno, ka ce Lukricitayo ma  gunyomme gitero cawa malac tutwal nyo gidoko lurem ma okato kare woko ki luye luwotgi, tutwalle ka obedo i kin jo ma pe gunyomme, ci gikelo cwercwiny i nyomgi. Nyo gwok tim ma kit man aye tye ka kelo tele i nyommi? Penye kong kekeni ni, ‘An mono amiyo karena, aketo cwinya dok anyutu mar ma mitte bot luot-ta?’

15. Ma lubbe ki Matayo 5:28, pingo omyero Lukricitayo munyomme gugwokke ki keto cwinygi i kom ngat mukene i yo ma pe opore?

 ¹⁵ Medo i kom meno, Lukricitayo munyomme ma giketo cwinygi i kom ngat mukene i yo ma pe opore-ni nongo gucung ka mapwot adada. Tye me cwercwiny tutwal ni Lukricitayo mukene munyomme gidongo miti marac i kom jo ma nongo kingi odoko cok tutwal kwedgi ca. (Matayo 5:28) Adwogi me wat macok ma kit meno oo wa i tim ma kelo alano i nyom. Nen kong ngo ma lakwena Paulo otito i kom lok man.

16. Cik ango ma Paulo omiyo ma mako nyom?

¹⁶ I kare ma Paulo ociko ni “jo ducu myero guket deyo i kom nyom,” en omedo ni: “Kitanda pa jo ma gunyomme myero giwor obed maleng; pien Lubanga bingolo kop i kom lutim tim me abor ki jo ma balo nyomgi.” (Jo Ibru 13:4) Paulo otiyo ki lok ni “kitanda pa jo ma gunyomme” me lok i kom mit. Gin ma kit meno ‘bedo maleng,’ ka ce obedo i kin jo munyomme keken. Pi meno, Lukricitayo gilubu lok ma kicoyo ni: ‘Cwinyi myero obed yom i kom dakoni ma inyomo ka tinoni.’—Carolok 5:18.

17. (a) Pingo Lukricitayo omyero pe guwek kit ma jo me lobo gineno kwede tim me abor obal tamgi? (b) Wan watwero lubu lanen ma Yubu onyutu nining?

¹⁷ Jo ma gibuto ki jo ma pe gunyomme kwedgi nongo gitye ka turo cik pa Lubanga akaka. Ada, i kare-ni pol pa dano gineno tim me abor calo gin ma pe rac. Ento, kit ma dano mukene gineno kwede tim me abor pe myero obal kit ma Lukricitayo gineno kwede. Gin gingeyo ni i agikkine, ‘Lubanga aye bingolo kop i kom lutim tim me abor ki jo ma balo nyomgi,’ ento pe dano. (Jo Ibru  10:31; 12:29) Pi meno, Lukricitayo me ada gineno nyom kit ma Jehovah neno kwede. (Kwan Jo Roma 12:9.) Wi po ni Yubu owacci: “Atyeko cikke con, wan ki wanga.” (Yubu 31:1) Dong, me gwokke ki i lubu yo mo keken ma romo terowa i tim me abor, Lukricitayo me ada gigwoko wanggi ki i neno kun gigomo ngat mo ma pe obedo luotgi.—Nen Lamed ngec, pot karatac 219-221.

18. (a) Tim me abor mono rac ma rom mene i wang Jehovah? (b) Tim me abor rom aroma ki woro cal jogi nining?

¹⁸ Tim me abor mono rac ma rom mene i wang Jehovah? Cik pa Moses konyowa me niang tam pa Jehovah i lok man. I lobo Icrael, tim me abor ki woro cal jogi onongo gitye i kin bal ma pwodde obedo to. (Lulevi 20:2, 10) Tika itwero neno kit ma tim aryo magi girom kwede? Tye ni, Laicrael ma woro cal jok nongo oturo cikkene ki Jehovah. I yo acel-lu, Laicrael ma timo abor nongo oturo cikkene ki luot-te. Gin aryo-ni ducu nongo pe gugwoko gennegi. (Nia 19:5, 6; Nwoyo Cik 5:9; kwan Malaki 2:14.) Pi meno, gin weng nongo gutimo gin marac i nyim Jehovah, Lubanga ma lagen.—Jabuli 33:4.

19. Ngo ma twero jingo cwiny ngat moni me kwero tim me abor, dok pingo?

¹⁹ Kono gire, Lukricitayo dong gipe i te Cik pa Moses. Ento ka wi Lukricitayo po ni tim me abor i kare pa jo Icrael macon onongo gineno calo bal madit atika, ci bijingogi me cung matek i kwero tim me abor. Pingo? Tam kong i lok man: In tika iromo donyo i ot lega, ci irumo congi piny ilego i nyim cal? Ibikwero woko ni, ‘Kulu pe larre!’ Ento mono cwinyi nyo twero biti me timone ka kimini cente madit? Pud ibigamo ni, ‘Matwal pe twere!’ Adada, tam me kwero Jehovah ki woro cal jok-ki obedo gin mo ma cwiny Lakricitayo me ada okwero me agikki. I kit yo acel-lu, Lukricitayo myero gunen tam me kwero  Jehovah Lubangagi ki luotgi ki timo abor calo gin marac atika kadi bed dong gibiminigi ngo pire. (Jabuli 51:1, 4; Jo Kolocai 3:5) Pe wamito ni watim gin mo ma yomo cwiny Catan ento kelo alano i kom Jehovah ki i kom yub maleng me nyom.

20. Ngo ma otimme i nyom mogo? Mi lapor.

²⁰ Medo i kom gwokke ki i tim mogo ma lano nyom, yo ango mukene ma iromo kwanyone me roco woroni pi luotwu? Me gamone, ket kong ni yub me nyom obedo ot. I ngeye, ter kong lok i yo me kica, tic mabeco, ki lok mogo me deyo ma jo munyomme giloko i kingi calo obedo jami ma kiketo me deyo ot wek onen maber adada. Ka ce watwu tye macok, ci nyomwu nongo bedo calo ot ma kideyo ma neno mit atika. Ento ka marwu okwe woko, ci jami me deyo magi cako rweny woko mot mot ma weko nyomwu cako nen calo ot mo ma pe kideyo ma neno rac. Dong kit ma mitini tye me winyo cik pa Lubanga ki ‘keto deyo i kom nyommi,’ in ibibedo ki kero me yubo kwo me otwu. Adada, gin mo ma pire tek dok ma tye me deyo ka oballe myero kiyub. In iromo timone nining? Lok pa Lubanga waco ni: “Gitwero gero ot pi ryeko, dok pi niang matut miyo cung matek liking. Pi ngec ma dano tye kwede miyo pongo ode ki kit jami mabeco me wel ki lwak jami ma yomo cwiny.” (Carolok 24:3, 4) Nen kong kit ma jo munyomme gitwero keto kwede lok magi i tic.

21. Waromo jingo nyomwa mot mot nining? (Nen bene bok ma tye i  pot karatac 131.)

²¹ I kin “jami mabeco” ma pong i ot ma yomcwiny tye iye aye obedo kit calo mar me ada, lworo Lubanga, kacel ki niye matek. (Carolok 15:16, 17; 1 Petero 1:7) Kit magi  giweko ot cung matek. Ento tika iniang kit ma ot ma kiloko pire i carolok malo-ni kitwero pongone kwede ki jami mabeco? Ki pongo “pi ngec.” Adada, ngec me Baibul tye ki teko ma ka kiketo i tic, ci loko tam pa dano dok tugo cwinygi me roco mar i kingi. (Jo Roma 12:2; Jo Pilipi 1:9) Pi meno, ka ce in ki luotwu wukwanyo kare me lok i kinwu kun wungiyo pwony mo me Baibul calo ginacoya me nino ducu, pwony mo i Wi Lubele nyo Awake! ma loko i kom nyom, ci nongo bedo calo wutye ka ngiyo gin mo ma twero deyo otwu wek onen maber. Dong ka mar pi Jehovah otugo cwinyi me keto tira ma pud wa a ka nenone-ni i tic i nyomwu, ci nongo bedo calo itye ka ‘pongo otwu’ ki jami me deyo. Macalo adwogine, kwo me yomcwiny ma nongo nene kong wubedo kwede con ca romo dwogo cen i otwu.

22. Kit yengo ango ma watwero bedo kwede ka watute matek me timo tic ma megwa i jingo nyomwa?

²² Tye kono ni, oromo tero kare kacel ki kero me dwoko jami me deyo magi cen kakargi ki acel acel. Ento ka itute matek me timo tic ma megi, ci ibibedo ki yengo madit me ngeyone ni in itye ka lubu cik me Baibul ma wacci: “Dano acel acel [omyero otel yo i] miyo deyo bot lawote.” (Jo Roma 12:10; Jabuli 147:11) Ma dong pire tek loyo ducu, tuteni matek me keto deyo i kom nyommi bimiyo ibedo i mar pa Lubanga.