1, 2. Aha do sungkunsungkun na laho taulas jala boasa?

NUNGA marhasohotan hamu? Molo nunga, parohon las ni roha do pardongansaripeonmuna manang parohon hansit ni roha? Na hurang denggan do paralealeonmu tu dongan saripemuna? Sae do holan mampartahanton pardongansaripeon asa tama idaon ni halak, hape ndang adong sada ni roha? Molo songon i, lungun do ra rohamuna ala so dihalala hamu be las ni roha na hea dapotmu sian pardongansaripemuna. Hirim do ra rohamuna asa parohon sangap tu Jahowa pardongansaripeonmu. Nang pe songon i, unang ma dokkon na so boi be padengganonmuna parsaripeonmu.

² Saonari, godang do pardongansaripeon na gabe sitiruon. Nasida hea mangadopi parsoalan di parsaripeon. Alai, boi do nasida patoguhon parsaripeon i. Hamu pe boi do marlas ni roha di parsaripeon. Songon dia carana?

3, 4. Boasa boi lam jonok na mardongan saripe molo marsitutu nasida pajonokhon diri tu Debata? Patorang ma.

³ Lam jonok ma hamu tu dongan saripemuna molo marsitutu hamu pajonokhon diri tu Debata. Boasa? Parrohahon ma tudosan on: Pingkiri ma, adong sada dolok na timbo. Sahalak tungganedoli mardalan sian bariba ni sada dolok i. Dung i, tungganeboruna mardalan sian bariba na sada nai. Nangkok ma nasida tu punsu  ni dolok na sarupa. Tingki di toru ni dolok i, dao be do nasida, ndang masipaidaan. Alai, lam jonok tu punsu ni dolok i, lam jonok ma nasida jala boi masipaidaan. Boi do diida hamu aha parsiajaran na palashon roha sian tudosan on?

⁴ Sude na diulahon hamu laho manomba Jahowa, dipatudos ma tu sude na dibahen hamu laho manangkohi dolok i. Ala dihaholongi hamu do Jahowa, marsitutu ma hamu mangulahon lomo ni rohaNa, dos songon manangkohi dolok i. Alai, molo hurang denggan do hamu tu dongan saripemuna, dipatudos ma on songon na manangkohi dolok sian bariba na sada dohot na sada nari, ndang masipaidaan. Alai, aha do na masa molo marsitutu hamu  manangkohi dolok i? Nang pe mulana dao manang ndang boi masipaidaan, alai molo lam marsitutu hamu manangkohi dolok i, lam jonok ma hamu. Songon i ma, molo marsitutu hamu pajonokhon diri tu Debata, lam jonok ma hamu tu dongan saripemuna. Alai, songon dia do hamu boi mangulahon on di parngoluon siganup ari?

5. (a) Paboa ma sada cara asa boi lam jonok tu Jahowa dohot tu dongan saripe. (b) Songon dia do roha ni Debata mangida pardongansaripeon?

⁵ Sada cara na ringkot asa boi lam jonok tu Jahowa dohot tu dongan saripe, i ma molo diihuthon aturan taringot parsaripeon na adong di Bibel. (Psalmen 25:4; Jesaya 48:17, 18) Parrohahon ma poda na disurat si Paulus taringot pardongansaripeon, ”Sangap ma pardongansaripeon di na saluhut.” (Heber 13:4) Aha do lapatan ni ayat on? Hata ”sangap”, patuduhon adong na ingkon diharingkothon jala diargai. Alani i, sangap jala diargai Jahowa do pardongansaripeon.

6. Aha do na boi taida sian poda na dilehon ni si Paulus taringot pardongansaripeon jala boasa ringkot marningot i?

⁶ Nunga tangkas diboto hamu molo pardongansaripeon mansai arga jala badia. Ala Jahowa sandiri do na mamungka pardongansaripeon. (Jaha Mateus 19:4-6.) Ndang sae holan mamboto molo pardongansaripeon i sangap, asa boi manjujui hamu dohot dongan saripemuna masihaholongan jala masipasangapan tingki mangadopi parsoalan. Molo songon i, aha do na boi manjujui hamu mangulahon on? Parrohahon ma songon dia si Paulus patuduhon taringot pangargaion manang sangap di parsaripeon. Ndang didok ibana na ”sangap do pardongansaripeon”, alai ibana mandok ”sangap ma pardongansaripeon”. Hata ni si Paulus on, ndang holan marisi hatorangan alai adong  parenta na ingkon diulahon. * On ma na boi manjujui hamu asa patuduhon pangargaion tu dongan saripemuna. Boasa songon i?

7. (a) Aha do angka parenta na ingkon taulahon jala boasa? (b) Aha do labana mangulahon parenta ni Debata?

⁷ Rimangi ma songon dia rohamuna mangida parenta na asing, na adong di Bibel. Umpamana, taringot ulaon marbarita na uli dohot ro tu parpunguan. (Mateus 28:19; Heber 10:24, 25) Olo do maol mangulahon parenta on. Adong do halak na so manjangkon hita tingki marbarita na uli. Boi do alani lojana di parkarejoan mambahen hita maol ro tu parpunguan. Nang pe songon i, marsitutu do hita marbarita jala ro tu parpunguan. Ala tahaholongi do Jahowa, ndang taloas manang aha pe, songon i nang Sibolis mangambati hita mangulahon parentaNa. (1 Johannes 5:3) Aha do labana? Boi ma hita mangkilala dame dohot las ni roha, ala nunga mangulahon lomo ni roha ni Debata. Pangkilalaan sisongon on, mambahen hita lam margogo mangadopi parsoalan. (Nehemia 8:10) Aha do na taparsiajari sian on?

8, 9. (a) Aha do na manjujui hita mangoloi parenta taringot mambahen sangap pardongansaripeon jala boasa? (b) Aha do na laho taulas na mambahen sangap pardongansaripeon?

⁸ Nang pe adong na mangambati, holong tu Jahowa manjujui hamu mangoloi parenta marbarita na uli dohot ro tu parpunguan. Dos songon i ma, holong tu Jahowa manjujui hamu mangihuthon parenta laho mambahen ’sangap pardongansaripeon’, nang pe mangadopi parsoalan. (Heber 13:4; Psalmen 18:29; Parjamita 5:4) Hilalaonmuna ma pasupasu sian Jahowa, molo marsitutu hamu marbarita na uli jala ro tu parpunguan. Dos songon i ma, molo marsitutu hamu mambahen sangap pardongansaripeonmuna.​—1 Tessalonik 1:3; Heber 6:10.

 ⁹ Alai, songon dia do bahenon asa boi sangap pardongansaripeon? Pasiding ma parniulaon dohot pangkataion na mambahen sega pardongansaripeon. Jala, marsitutu ma asa tongtong togu parsaripeonmuna.

10, 11. (a) Aha do parange na so parohon sangap tu pardongansaripeon? (b) Aha do na porlu tasungkun tu dongan saripenta?

¹⁰ Sahalak tungganeboru mandok, ”Martangiang do ahu tu Jahowa mangido gogo laho mangadopi parsoalan.” Didok muse, ”Jotjot do tungganedolingku mangaleai ahu. Hansit situtu do rohangku tingki didok, ’Holan na mambahen susa do ho!’ jala ’Ndang adong huida lapatanmu!’” Tungganeboru on mangadopi parsoalan na balga, ala dileai dongan saripena ibana.

¹¹ Mansai lungun do roha, molo na marhasohotan mangaleai dongan saripena, ala boi parohon hansit ni roha na maol dihalupahon! Ndang sangap parsaripeon molo adong pangkataion sisongon on. Masa do sisongon on di parsaripeonmu? Sungkun ma tu dongan saripemuna taringot pangkataionmu, ”Songon dia do pangkilalaanmu mambege hatangki?” Molo hansit do roha ni dongan saripemuna mambege pangkataionmu, ingkon rade do hamu mambahen hamubaon.​—Galatia 5:15; jaha Epesus 4:31.

12. Aha do na mambahen ndang marlapatan na diulahon sasahalak laho manomba Debata?

¹² Ingotma, pangkataionmu tu dongan saripe mangkorhon do tu paralealeonmuna tu Jahowa. Bibel paboahon, ”Molo adong halak naung mangetong dirina maragama, hape ndang dirajai dilana, na paotootohon dirina do ibana disi, jala magopo ma paragamaonna i.” (Jakobus 1:26, Bibel siganup ari) Ringkot do pangkataionta tu panombaon na sintong. Ndang dihalomohon Debata molo sasahalak mandok dirina manomba Jahowa, alai ndang denggan  parniulaonna di jabu. Unang ma dipaotooto dirina. Dosa na balga do on. (Jaha 1 Petrus 3:7.) Nang pe malo manang ringgas hamu mula ulaon, alai molo pangkataionmu parohon hansit ni roha tu dongan saripemuna, on ndang mambahen sangap pardongansaripeon. Jala aha pe na diulahon hamu laho manomba Jahowa, ndang adong lapatanna.

13. Aha do parniulaon na boi mambahen hansit roha ni dongan saripe?

¹³ Adong do parniulaon na asing, na boi mambahen hansit roha ni dongan saripe. Parrohahon ma dua na masa on: Sahalak ina na mabalu di huria, jotjot martelepon tu sahalak donganta baoa naung marhasohotan. Jotjot do ina na mabalu on, leleng mangkatai jala mangido poda sian ibana. Dung i, sahalak donganta baoa na so marhasohotan, jotjot rap marbarita na uli dohot sahalak donganta borua naung marhasohotan. Ra, denggan do na tinuju ni roha ni angka donganta naung marhasohotan on. Alai, songon dia do on mangkorhon tu dongan saripena? Sahalak tungganeboru na mangkilala sisongon on mandok, ”Hansit hian do rohangku mangida tungganedolingku mangalehon godang tingkina tu donganta borua na asing di huria. Ndang adong lapatanku huhilala.”

14. (a) Aha do na ingkon diulahon halak na mardongan saripe songon na dipaboa di 1 Musa 2:24? (b) Aha do na porlu tasungkun tu dirinta sandiri?

¹⁴ Boi do taantusi hansit ni roha na dihilala tungganeboru on dohot halak na hea mangadopi sisongon on di parsaripeon. Dongan saripe ni nasida ndang mangulahon poda na sian Debata taringot pardongansaripeon na mandok, ”Dibahen i tadingkonon ni baoa do amana dohot inana mandongani jolmana [tungganeboruna], jadi sada sibuk nasida.” (1 Musa 2:24) Tangkas do taboto, ingkon disarihon halak naung marhasohotan do natuatuana. Alai, mangihuthon uhum na binahen ni Debata, ingkon rumingkot do di nasida manarihon dongan saripena. Dos songon  i ma, nang pe halak Kristen ingkon mangkaholongi dongan sahaporseaonna, alai rumingkot do manggohi tanggung jawab tu dongan saripena. Alani i, molo sahalak Kristen naung marhasohotan mangalehon gumodang tingkina manang umsolhot tu dongan sahaporseaon, tarlumobi tu halak na so dongan saripena, on boi parohon parsoalan di pardongansaripeon. Masa do on di parsaripeonmu?  Sungkun ma dirimuna sandiri, ’Gumodang do hulehon tingki dohot rohangku tu dongan saripengku?’

15. Songon na didok di Mateus 5:28, boasa halak Kristen naung marhasohotan ndang boi mangalehon gumodang rohana tu halak na so dongan saripena?

¹⁵ Boi do parohon dosa molo halak Kristen naung marhasohotan mangalehon gumodang roha dohot tingkina tu halak na so dongan saripena. Adong do halak Kristen na gabe marholong ni roha tu na so dongan saripena, ala pasolhothu nasida. (Mateus 5:28) Ujungna, on ma na mambahen nasida mangulahon ulaon na parohon dosa jala ndang pasangaphon parsaripeonna. Parrohahon ma aha na didok apostel Paulus taringot on.

16. Aha do parenta na dilehon ni si Paulus taringot pardongansaripeon?

¹⁶ Didok si Paulus, ”sangap ma pardongansaripeon”, dibahen halak naung marhasohotan. Dung i, didok ibana do muse, ”Unang ramun parsaoran pardongansaripeon; ai uhumon ni Debata do angka parmainan dohot pangalangkup.” (Heber 13:4) Hata ”parsaoran pardongansaripeon” lapatanna, i ma sampur. Ulaon on ”unang ramun” jala holan tu dongan saripena ma on boi diulahon. Alani i, halak Kristen ingkon mangihuthon hata na mandok, ”Dihalashon roham ma jolma ni haposoonmu!”​—Poda 5:18.

17. (a) Boasa ndang boi mangkorhon pingkiran ni godang jolma tu halak Kristen taringot mangalangkup? (b) Songon dia do hita boi maniru si Job?

¹⁷ Ndang mangargai uhum ni Debata sasahalak na sampur tu halak na so dongan saripena. Ulaon na somal do mangalangkup di godang halak saonari. Alai, ndang boi mangkorhon on tu pingkiran ni halak Kristen. Diboto nasida do ndang jolma na laho manguhum halak sisongon on. Alai, ”Uhumon ni Debata do angka parmainan dohot  pangalangkup.” (Heber 10:31; 12:29) Alani i, pingkiran ni Jahowa do na ingkon siihuthonon ni halak Kristen taringot on. (Jaha Rom 12:9.) Ingot ma, hata ni si Job na mandok, ”Nunga huhomat [hurajai] matangku.” (Job 31:1) Asa unang diulahon mangalangkup, ingkon dirajai halak Kristen do simalolongna. Unang ma tubu sangkap na roa mangida halak na so dongan saripena.​—Ida ma Lampiran, ”Na Didok Bibel taringot Parsirangan dohot Padaodao”.

18. (a) Songon dia do roha ni Jahowa mangida pangalangkup? (b) Boasa dipatudos uhum ni na mangalangkup dohot na manomba ganaganaan?

¹⁸ Songon dia do roha ni Jahowa mangida pangalangkup? Taboto ma on sian Patik ni si Musa. Di Israel najolo, dipamate do halak na mangalangkup dohot na manomba ganaganaan. (3 Musa 20:2, 10) Boasa dipatudos uhum ni na mangalangkup dohot na manomba ganaganaan? Molo sahalak Israel manomba ganaganaan, on patuduhon ibana mangose padanna tu Debata. Dos songon i ma, molo mangalangkup sahalak Israel, on patuduhon ibana mangose padanna tu dongan saripena. Alani i, halak na mangose padan do angka na manomba ganaganaan dohot pangalangkup. (2 Musa 19:5, 6; 5 Musa 5:9; jaha Maleaki 2:14.) Ulaon on ndang dihalomohon Jahowa, Debata na mangkaholongi hatigoran dohot na so hea mangose padan.​—Psalmen 33:4.

19. Patorang ma tudosan na mangurupi sasahalak marsitutu pasidingkon ulaon mangalangkup jala boasa?

¹⁹ Saonari, halak Kristen ndang diatur Patik ni si Musa. Alai, marsitutu do halak Kristen asa unang mangalangkup ala diingot, dosa na balga do mangalangkup di Israel najolo. Boasa? Tapatudos ma na masa on tu dirinta: Olo do hamu masuk tu gareja, marsinggang jala martangiang di jolo ni patung? Tontu ndang olo hamu! Alai, olo do hamu tarelaela mangulahon on molo dilehon godang hepeng? Na so tupa taulahon on! Holan mamingkirhon on pe hita  nunga magigi. Alani i, ingkon dihagigihon halak Kristen do ulaon manang aha pe na boi mangose padanna tu Jahowa. Songon i nang tu dongan saripe, unang ma mangalangkup nang pe godang elaela. (Psalmen 51:3, 6; Kolosse 3:5) Ndang lomo rohanta pasonangkon roha ni Sibolis marhite mangulahon ulaon na so pasangaphon Jahowa dohot parsaripeon.

20. Aha do na masa di pigapiga parsaripeon? Lehon ma tudosan.

²⁰ Asing ni pasidingkon parniulaon na so pasangaphon pardongansaripeon, aha dope na porlu diulahon asa boi muse diargai dongan saripena? Dipatudos ma parsaripeon songon sada jabu. Lam bagak do sada jabu molo adong hiasanna. Hata na lambok dohot parniulaon na patuduhon holong, boi do dipatudos tu hiasan na mambahen lam bagak sada jabu. Molo sada rohamu tu dongan saripemuna, dipatudos ma on tu jabu na bagak jala mambahen dame pingkiran. Molo moru holong ni rohamu tu dongan saripemuna, dipatudos ma on songon jabu na so adong hiasanna. Lomo do rohanta padengganhon parsaripeon ala naeng taoloi parenta ni Debata laho mambahen sangap parsaripeon. Songon dia do hamu mangulahon on? Disurat do di Bibel, ”Marhitehite hapistaran pinajongjong sada bagas, jala dipahot do i marhitehite roha hapantason. Jala marhitehite parbinotoan, gok angka bilutna dohot ugasan marragamragam angka na arga jala na uli.” (Poda 24:3, 4) Parrohahon ma songon dia hita mangulahon on di parsaripeon.

21. Songon dia do hita boi patoguhon pardongansaripeonta? (Ida ma kotak ” Songon dia do Asa Boi Lam Denggan Parsaripeonku?”.)

²¹ Angka ugasan na arga jala na uli di pardongansaripeon, i ma parange songon holong na marsihohot, biar mida Jahowa dohot haporseaon na togu.  (Poda 15:16, 17; 1 Petrus 1:7) Angka parange on patoguhon pardongansaripeon. Alai diboto hamu do, songon dia angka bilut boi digohi angka ugasan na arga songon na didok di buku Poda nangkin? Marhite ”parbinotoan”. Molo diulahon hamu poda na sian Bibel, boi ma on pauba pingkiran jala manjujui hamu asa patuduhon holong muse tu dongan saripe. (Rom 12:2; Pilippi 1:9) Molo rap hundul hamu dohot dongan saripemuna mangulas angka ayat ni Bibel, songon ayat harian, manang parsiajaran sian Joujou Paboahon taringot pardongansaripeon, dipatudos ma on songon mamillit hiasan na laho bahenonmu di jabumuna. Alani i, tingki diulahon hamu on, dipatudos ma on songon mambahen ugasan na arga tu bilut na adong di jabu. Hilalaonmuna ma muse las ni roha songon tingki parjolo sahali hamu mamungka parsaripeon.

22. Aha do na tahilala molo marsitutu hita patoguhon parsaripeon?

²² Ra, porlu do godang tingki laho mambahen mulak muse las ni roha songon tingki parjolo sahali hamu mamungka parsaripeon. Alai, molo marsitutu do hamu, hilalaonmuna ma las ni roha ala nunga mangihuthon parenta ni Debata na mandok, ”Masijolojoloan ma hamu masipasangapan.” (Rom 12:10; Psalmen 147:11) Alai na rumingkot, sude na diulahon hamu laho padengganhon pardongansaripeonmuna boi mambahen hamu tongtong di bagasan holong ni roha ni Debata.