1, 2. Kaba wakutiha lidan kapítulu le, ani ka uagu?

MARIEIHADÜN san? Anhein ítara liña lubéi, barüti san maríei ugundani hun o turóbulirügüñein lanüga? Sanditün san adisedagueina hiña lan tuéi hipaaná o áfaaguarügütün lun hasigirun úara lidan magundani? Anhein ítara liña lubéi, háfuga serí humuti aba lan leferidirun ínsiñeni le hasandirubei huougua. Kei kristiánu chóuruti busén humá líchugun hamarieidun uéiriguni lun Heowá, Bungiu le hínsiñebei hun. Ligíati adüga lubéi gádantün lun hasandirun saragu idiheri luma igarigu. Íbini ítara moun lumuti hasaminarun máraninaali lan. Lun sensiyutima lan, wayanuhaña ya lun wügüri. Gama lumoun, adundehani le hounti biángubei, dandu wügüri kei würi marieitiña.

² Haritagua humá añahein lan kristiánugu maríeitiña ha meha áfaaguarügütiña lun hasigirun úara, ani guentó abanhaña buiti hénpulu lánina aban maríei derebuguti. Furanguti darí hamuti lan manera lun héredagüdüni hamarieidun. Ani huguya, gayarati giñe hadariruni. Ida?

3, 4. Ka uagu aba lubéi hayarafadagun maríeitiña hámagua dan le háfaagun biángubei lun hayarafadun lun Bungiu? Ru humá aban hénpulu.

³ Dan le biángubei lan maríeitiña áfaagua lun hayarafadun lun Bungiu, aba giñe hayarafadun hámagua. Ru wamá aban hénpulu. Luagu lugudina aban óunwenbu wübü,  anihein aban wügüri tuma aban würi luéigiñe ámuñegueinarügü oubaü, díseguatiña hawariuagua. Gama lumoun, biángubei hagía aba hagumeserun awarira luagun wübü. Kaba asusereda? Eibu hamudeirun lábulugun wübü ábatima ayarafadeina hamá hóuniwagua. Ida luba líchugun hénpulu le gurasu woun?

⁴ Awariruni luagun wübü, aban sínbolu lani áfaaguni le hadügübei sun kristiánugu lun heseriwidun lun Heowá tau sun hawani. Chóuruti hínsiñe lan Heowá hun luma tun hani paaná, ani hadügüñein sun hiyaraati lidan awariruni le. Gama lumoun, anhein dise hubéi huariuagua, ítara liña kamá hamuga luéigiñeñadün ámuñegueinarügü oubaü. Kábati asusereda anhaün asigira awarira lábulugun  wübü? Íbini disegua humá dan le hagumeserun, eibu háfaagun lun hachülürün lábulugu wübü, yarafaguatimahadünme. Chóuruti dan le lan hayarafadun maríeitiña lun Bungiu, aba giñe hayarafadun hámagua. Gama lumoun, ida luba san hadügüni?

5. a) Ka manera buítimabei lun hayarafadun lun Heowá luma tun hani paaná? b) Ida liña larihini Heowá maríei?

⁵ Wafalaruni lubuidun adundehani le tíchugubei Bíbülia houn maríeitiña, ligía aban manera buítimati lun ladügǘn awariruni le (Sálumu 25:4; Isaíasi 48:17, 18). Akutiha wamá aban lídangiñe buidu, le líchugubei apostolu Pábulu dan le lariñagunbei: “Inebelá maríei hun súngubei” (Ebüréu 13:4). Ka labusenrubei lariñagun lau dimurei le? Dimurei “inebelá”, lidan iñeñei le ídanbei tabürüdǘwa Bíbülia furumiñe, mini lan, aban katei hínsiñewati ani gebegiti. Ligíati, arufuda lumuti layusurún dimurei le luagu weiri lan lebegi maríei lun Heowá.

6. Ka larufudubei dimurei le lariñagubei Pábulu luagu maríei, ani ka uagu súdini lubéi mabulieidun wamani?

⁶ Anhein seriwi hubéi lun Heowá biángubei, chóuruti subudi humani weiri lan lebegi maríei ani sagüráu lan, lugundun Heowá adügübalin (aliiha huméi Matéu 19:4-6). Gama lumoun, dan le ñein lan turóbuli lidan maríei, háfuga úabei buídurügü lan hasubudiruni weiri lan lebegi maríei lun hóuseragun hungua lau ínsiñeni luma inebesei. Kati lunbei hadügüni? Akutihaya waméi dimurei le lariñagubei Pábulu. Mariñagunti: “Inebewati maríei”; lubaragiñe lira ariñagati: “Inebelá maríei hun”. Ligíati, mama layanuharügüña luagu maríei, líchuguña aban gumadi. * Súdiniti gabaroun humani katei le, lugundun líderagubadün ariha  amu katei le lunbei líderagunün lunya hasandirun ínsiñeni huougua. Ka uagu wariñagei le?

7. a) Ka burí gumadi tídangiñeti Bíbülia wagunfulirubei ani ka uagu? b) Ka burí buiti wibihibei lau gaganbadi wamá?

⁷ Samina humá murusun, ida liña harihini amu burí gumadi tídangiñeti Bíbülia kéiburi le ariñagubei lunti lan wadügün disipulugu o lunti lan wadamuridagun lun wáhuduragun lun Bungiu? (Matéu 28:19; Ebüréu 10:24, 25.) Chóuruti gúnfuli humani, lau sun anihein lan dan hénrengu lan. Furitün apurichiha íbini añahein lan gürigia mínsiñeti houn haganbun luagu Larúeihan Bungiu. Ñüdüntün giñe adamuridagua íbini buchá lan huagu lárigiñe huádigimari. Íbini ítara, mígirun humuti hapurichihan ni hadamuridagun. Úati araramutün, ni Satanási, lugundun hínsiñeti Heowá hun tídangiñe sun hanigi, ligía lébunabei gaganbadi humá lun sun lugumadin (1 Huan 5:3). Kati buiti hasagarubei? Kei subudi hubalin hadügüñein lan lugundan Bungiu, sanditün darangilaü luma ugundani, ligíati íchugubei erei hun lun hasigirun (Neemíasi 8:10). Ka wafurendeirubei lídangiñe le?

8, 9. a) Kaba ádahawa lun inebe lan maríei woun, ani kaba wibiha anhein wadüga? b) Kaba wakutiha guentó?

⁸ Kei warihini, ínchaha lumutiwa ínsiñeni le wasandirubei luagu Bungiu lun gaganbadi wamá lun gumadi luáguti apurichihani luma adamuridaguni íbini anihein lan dan hénrengu lan. Ligía giñe adügübei lun gaganbadi wamá lun gumadi tídangiñeti Bíbülia le: “Inebelá maríei hun”, íbini hénrengu lan warihini (Ebüréu 13:4; Sálumu 18:29; Apurichihati 5:4). Ítara kei labiniruni Heowá áfaaguni le wadügübei lun wapurichihan luma lun wadamuridagun, wéiribei giñe labiniruni wáfaagun lun warufuduni gebegi lan maríei woun (1 Tesalónikana 1:3; Ebüréu 6:10).

⁹ Kaba hadüga lun inebe lan maríei hun? Furumiñe, mosu hígiruni furumiñeguarügü igaburi le adügüti lun leferidirun  ínsiñeni áluaha hugíame ida luba lan héredagüdüni.

10, 11. a) Ka usa arufudubei minebeni luagu maríei? b) Ka álügüdahani lunbei hadügüni tun hani weiriou?

¹⁰ Lüha meha, ariñagatu aban kristiána: “Amuriahatina luma Heowá lun líchugun erei nun lun nawanduni”. Kaba tawanda? Afuranguagüda tumuti dan le tariñagun: “Bulesei lumutina nani weiriei lau lererun. Marihínti lárigi luagu nura, gama lumoun, gárigüda lumutu nanigi lau lererun, lugundun súnwandan lariñagun nun: ‘aban ihürügu buguya nun’ ‘meseriwintibu lun ni kata’”. Tayanuhaña würi maríeitu to luagu aban turóbuli sériuti hadan maríeitiña: hayusurun dimurei gáriti.

¹¹ Híruti añahein lan kristiánugu maríeitiña óuseragutiña houngua ítara, yusutiña dimurei le ígiruti igarigu le hénrenguti lareidagun. Furanguti ha lan gürigia ha ayusuruti dimurei libe lira, úati inebesei haganagua. Kábati ariñawagúa huagu? Lun hasubudiruni, álügüda humoun hani weiriou lau ǘnabuguni: “Ka lánibei nererun efekütu buagu?”. Anhoun ariñaga anihein lan dan adüga lan hererun dañu tun, mosu hasansirun (Galasiana 5:15; aliiha huméi Éfesuna 4:31).

12. Ka katei gayarabei ladügün lun meseriwin lan wáhuduragun lun Bungiu lun ni kata?

¹² Mabulieida huméi ánhadün lan ayanuha wuriba tun hani paaná lagünrinchaguba humadagua luma Heowá. Ariñagatu Bíbülia: “Gürigia le haritagubei luagu gúnfuli lan luma Bungiu ani siñá lumutu liñeñe eredera, leyeedaguña lungua ani úati hu lan ligaburi lagunfulirun lun ni kata” (Santiagu 1:26). Moun lumuti wasaminarun mani lan ligaburi wayanuhan efekütu lidan wáhuduragun. Kei  tariñaguni Bíbülia, charatiwa ánhawa asaminara mani lan ligaburi wóuserun múnada efekütu lidan weseriwidun lun Bungiu. Meyeedagua wamá woungua, aban katei sériuti lira. (aliiha huméi 1 Féduru 3:7). Íbini gibe lan katei liyaraati aban gürigia adüga ani seriwiti lau ubebeni, anhein yusu lubéi dimurei le gáriti lúbiñe, úati hu lan leseriwidun lun ni kata ligibugiñe Bungiu.

13. Ida liña gayara lan hadügün maríeitiña dañu hóuniwagua?

¹³ Mosu duari hamá maríeitiña luéi hadügün dañu hóuniwagua lidan amu manera. Ariha wamá bián hénpulu. Lerederun aban íbiri le maríeiti saragu dan ayanuha luagu gágamuru tuma aban íbiri lílana damuriguaü, to agüriahabaliña tirahüñü tábuguarügü ani busentu tamuriahan adundehani luma. Aban íbiri to maríeitu, ásügüra saragu dan dimaasu luagu dimaasu apurichiha luma aban íbiri le mamarieidungili. Biángubei íbirigu ha, masaminaruntiña hadügün ni kata wuribati; gama lumoun, ida liña funa san hasandiragun hánigu paaná houngua? Ariñagatu aban kristiána to ásügürütu lídangiñe katei le: “Wéiriti ligari nun narihini nani weiriei ásügüra saragu dan etenira tun aban íbiri lidan damuriguaü. Aba nasandiragun nungua kamá mebegitina”.

14. a) Según Agumesehani 2:24, ka hánibei maríeitiña buligasion? b) Ka burí álügüdahani lunbei hadügüni gürigia maríeitiña hóuniwagua?

¹⁴ Ménrengunti gunfurandawa lan tigarigu íbiri to. Gayarati giñe lariñawagún ligiaméme hawagu ha arihibalin magunfulirun hamani hánigu paaná adundehani méiniti le líchugubei Bungiu houn maríeitiña: “Ligía lígirubei lubéi wügüri lúguchi tuma lúguchu, lun laganóun tuma lúmari” (Agumesehani 2:24). Mini lan san le dan le lan lamarieidun aban gürigia gayarahali lan metenirun lan houn lagübürigu? Uá. Le larufudubei, tuáguba lan lani weiriou nidiheri lan furumiñe. Ligiaméme lunbei ladügüni hama  íbirigu lidan afiñeni: íbini weiri lan ínsiñeni le lasandirubei hawagu, lani weiriou lániboun buligasion le súdinitimabei. Ligíati, anhein ígira saragu dan houn íbirigu, túntima aban würi súnwandan aniheinbei lan magundani múnada. Álügüdagua humá hungua: “Ligía funa san anihein lubéi magundani núbiñe? Tenitina san tun nani weiriou ani ru au dan luma ínsiñeni le yuubei tun?”.

15. Según Matéu 5:28, ka uagu moun lumuti lubéi hetenirun gürigia maríeitiña saragu houn gürigia ha umabaña mamarieidun hamá?

 ¹⁵ Dan le weiri lan letenirun aban wügüri maríeiti tun aban würi to mama lani weiriou o würi lan etenira lun wügüri le mama tani weiriei, lídanñanu peliguru. Híruti adüga hamaali lan fiú kristiánugu ítara ani aban hínsiñedagun houngua (Matéu 5:28). Libe-agei dan, barǘ lumutiña adüga katei létima arufudubei minebeni luagu maríei. Ariha waméi ka lan lariñagubei apostolu Pábulu luagu katei le.

16. Ka eweridihani líchugubei Pábulu dan le layanuhan luagu maríei?

¹⁶ Lárigiñe lariñagun “inebelá maríei hun súngubei” ábaya leweridihan “lunti giñe hagunfulirun úmarigu hámagua lau úarani; lugundun laguseragüdübaña giñe Bungiu ha agamaridubaña mamarieidunga hama ha agabarahabaña” (Ebüréu 13:4). Maríeitiñarügüñanu gayara harounrun hámagua. Ligía gaganbadi habéi kristiánugu lun gumadi le: “Gundaabá tuma to úmaboun bamarieida danbei nibureingidibu” (Ariñawagúni 5:18).

17. a) Ka uagu moun lumuti lubéi wáyeihani hasaminan gürigia ubouaguna luáguti agabarahani? b) Ida luba wáyeihani lani Hobu hénpulu?

¹⁷ Dan le lagabarahanu aban gürigia lani weiriou, larufuduña mineben lan lilurudun Bungiu lun. Íbini mariban lan harihini gürigia ubouaguna, máyeihan hamuti kristiánugu hasaminan gürigia ubouaguna. Gunfuranda hamuti luagu ‘Bungiuba lan aguseragüdaña ha agamaridubaña mamarieidunga hama ha agabarahabaña’ (Ebüréu 10:31; 12:29). Ligíati inebe lubéi lilurudun Heowá woun (aliiha huméi Rómana 12:9). Áyeiha wamuti Hobu le ariñagubei: “Füramasehadina núniwagua” (Hobu 31:1). Anha, füramasetiwa  mawamadirunbadiwa lan amu gürigia tuéidigia to úmaboun wamarieida. Ítarati, míchugun wabéi furumiñeti pasu le anügübei lidoun agabarahani (Ariha huméi lanwoun ariñahani “Ka tariñagubei Bíbülia luagu ígiraguni luma fánreinguaü?”).

18. a) Hanarimeti san luriban larihini Heowá agabarahani? b) Ka idan genegegua lan agabarahani luma áhuduraguni houn guáriua?

¹⁸ Hanarimeti san luriban larihini Heowá agabarahani? Íderagua lumutiwa Lilurudun Moisesi gunfurandei lisaminan Heowá luagu katei le, lugundun ísüraelina meha ha áhuduragutiña houn guáriua hama ha agabarahabaña síadiwatiña lun hóunwegun (Fádirigu 20:2, 10). Ka idan genegegua lan bián figóu le? Biángubei dürüguati aban füramasei sériuti ani arufudati múarani: Dan le háhuduragun lun guáriua halagua hamuti daradu le hadügübei luma Heowá, ani dan le hagabarahan magunfulirun hamuti füramasei le hadügübei dan le hamarieidun (Áfuriduni 19:5, 6; 2 Lúrudu 5:9; aliiha huméi Malakíasi 2:14). Ligía meha lasiadirunbaliña Heowá, Bungiu le úaraguati (Sálumu 33:4).

19. Kaba íderaguawa lun desidírütima wamá méiguadun wamá lidoun agabarahani, ani ka uagu?

¹⁹ Inarüni luagu mámaadiwa lan lábugiñe Lilurudun Moisesi. Íbini ítara, buiti lun waritaguni aban lan meha figóu wéiriti agabarahani lidan binadu Ísüraeli, lugundun íderagua lumutiwa lúntima desidírü wamá madügün wamani. Ru wamá aban hénpulu. Hebeluruña hamuga san tidoun aban ligilisi lun háhuduragun arisara lun aban guáriua? “Maweiyasuntina!” luba hóunabun. Anheinti ariñawagúa hun lichugúba lan bandi seinsu hun? “Ni ítara!” luba hóunabunya. Lugundun sun kristiánugu ha inarünitiña mabusenruntiña nírügü lun hasaminarun hagarabaagun lun Heowá lau háhuduragun lun somu guáriua (Sálumu 51:1, 4; Kolosana 3:5). Mabusenruntiwa wagundaaragüdüni Satanási ni lun wíchugun  minebeni lun Heowá luma lun aransehani sagüráuti lánina maríei.

20. Ru humá aban hénpulu luagu le asuseredubei haganagua fiú maríeitiña.

²⁰ Lárigiñe hígiruni igaburi le arufudubei minebeni luagu maríei, ka amu katei lunbei hadügüni lun inebegua humá hungua? Lun wóunabuni álügüdahani le, konpararü waméi maríei tuma aban muna. Lárigiñe, ábame hasaminarun luagun dimurei buiti luma burí amu luwuyeri igaburi le arufuduti hínsiñe tan hani paaná hun kamá hamuga ílagu buíduburiti le awendedagüdübei aban muna. Dan le buidu lan hanaagun maríeitiña houngua, ítara liña maríei ligía kei aban muna to buintiña lau wendei le íchugubei ibagari tun. Gama lumoun, anhein eferidira ínsiñeni, aba eferidireina lan wendei ligía murusun murusun, aba hasandirun aban lanarime íruni. Kei busén hubéi gaganbadi humá lun lugumadin Bungiu lun ‘inebe lan maríei hun’, mosu hasansirun. Lugundun subuditi hun aban lan katei wéiriti lebegi ani lunti lan haransehani katei húmagua. Ida luba hadügüni? Ariñagatu Lererun Bungiu: “Lau lichú aau tábunawagua muna, lau lualin ichügü lichugúa tuágaburi; lau subudi labuinchagüdüwa tirumun lau ílagu gebegiti le buíduburiti” (Ariñawagúni 24:3, 4). Ariha waméi ida luba lan wayusuruni dimurei le lidan luáguti maríei.

21. Kaba íderaguaña maríeitiña lun hanaagun houngua buidu? (Ariha huméi “ Ida luba nederebugudagüdüni namarieidun?”.)

²¹ Laganagua katei gebegiti le abuinchubei hábiñe iduheñu ha gúndaabaña anihein ínsiñeni inarüniti, inebesei lun Bungiu luma afiñeni derebuguti (Ariñawagúni 15:16, 17; 1 Féduru 1:7). Igaburi burí le, adügati lun buidu lan hanaagun maríeitiña houngua. Ariha humuti san lidan  Ariñawagúni 24:4 ida liña lan labuinchagüdüniwa rumu lau katei gebegiti? “Lau subudi”. Ligíati, maríeitiña ha busenbaña hasansiruni hagaburi luma lunya laweiridagun ínsiñeni hámagua mosu hibihini subudi le tídanbei Bíbülia, lárigiñe ábame hawinwanduni (Rómana 12:2; Filipuna 1:9). Hañuurun akutihei bérusu le lánina sagü weyu o amu ariñahani luáguti maríei le burí áfuridubei tidan Garüdia Awisahatu o ¡Despertad!, líderagubadün arihei ka lan “ílagu gebegiti le buíduburiti” hemegeirubei lun hawendedagüdünu huban. Lárigiñe, ábame hebelaagüdüni wendei ligía tirumurugun huban, lidan amu dimurei, ládahabadün ínsiñeni luagu Heowá lun hawinwanduni adundehani le akutiha humaalibei. Ítara luba hibihin lun lagiribudun ínsiñeni le meha hasandirubei huougua furumiñe.

22. Ida luba wasandiragun woungua ánhawa áfaagua lun wagunfulirun lau le yuubei woun lidan lóurate waransehani katei lidan maríei?

²² Inarüni barǘ lan saragu dan wíchuguni sun ílagu gebegiti le lárigoun. Gama lumoun, kristiánugu ha áfaagutiña lun hagunfulirun lau le yuubei houn, gúndaabei hasandiragun houngua lau hasubudiruni luagu gaganbadi hamá lun gumadi tídangiñeti Bíbülia lun hagía lan furumiñetiña arufuda inebesei hóuniwagua (Rómana 12:10; Sálumu 147:11). Le súdinitimabei, líderagubaña lan óunwenbu áfaaguni le hadügübei lun inebe lan maríei houn lun herederun lidan línsiñehabu Bungiu.