1, 2. ¿Ibu igargi anmar sunmagsoggali, geb ibigala anmar aagi sunmagsoggali?

BE, ABIRGIN niggale, ¿bule be abirginbo be nued gudii be na iddoge? ¿Igi be sogsale, be abirginbo be na yeer iddodii, sulirdi bemar na urwedbi dagdidimala? ¿Bar idualedyob bemar na binarsurmar be iddoge? ¿Bemar binsae, igi bar sasunnoye wegi anmar na gaedidisunnoye? Degi bega neg gunaile, be wile iddodiir gebed. Uggine, be Cristo sordabalile, be nue Jehová sabbarsoggua, be buggib binsaer gebed, bemar deyob gudidiidba Jehová nug oissodidimaladba. Auggi, mer binsamalo bemarga igar nuguosurguoye.

² Ebbenne, buggidar anmar sordagan gebbe na niggusmargua, sun urwedbi na dagdidigusmarmogad, auggi emi ibagindi na ebo yeer iddodidimalad. Ibmar soggwen imasmalar gebed, nabir yeer iddodi gumalaga. Be nabir we ibmar imasmogaled. Degsoggu, anmar binsabisunnad: Dule abirgin niggusar, ¿ibu imagger gebe na yeer iddodii gumalaga?

3, 4. ¿Na niggumamaid Bab igar durdaggega alamagnanaile, igi nabir na gadi binar gumaloe? ¿Ome niggued igar ibigala yar enaggwedyob guye be sogsale?

³ Bebobela bemar alamagnaile, Jehová aiga gumalaga, bemar na gadi binar gudmaloed. Wegi anmar sogoena.  Dule omebo yar gwagwen siid enagsoggalid, diggasur gwissi nagi nodmaloed, massered yar dagsig gwissi enaggwidoed, omedina asabin gwissi enaggwidoed, auggi na dare naggwidmaloed, degsoggu nagmaidbali na waligga gudmaloed. ¿Ibu igargi we anmar odurdagge?

⁴ Yar enaggwedgi sunmaglenaidi, igwen obared, anmar nueggwa Jehovága arbaedgi alamagnaid. Bemar Jehová sabmosoggua, bemar yar enaggwedgi alamagnaiyobmogad. Bemar na doggus binarsurmale, bemar nagi diggasur gwigwissiyobid. ¿Igi guder sunna bemar na dare yar enaggwider? Enagmaidba bemar nabbis na waligga gudsunnoed. Bemar nagmaidbiile, soglesundo, bemar Jehová aiga guedga alamagnaile, bemar na gadi binar gudmaloye. Degsoggu bemar na gadi binar gumalaga,  bebobela bemar Jehová aiga gumalar gebed. Degidde ¿igi nabir bemar Jehová aiga gusmalale?

5. a) ¿Dule ibu imagger gebe, nabir Jehová aiga guega, geb gadi e abirgin binar gubaliga? b) ¿Igi Jehová, abirgin niggued igar dagge?

⁵ Dule “nabir Jehová aiga guegala”, Bibliagi binsaed nuegan abirgin nigmaladga uglenaidba igar imagbalir gebed (Salmo 25:4; Isaías 48:17, 18). Be daggena, apóstol Pablo sogsad: “Ome niggued igar, mer igar dodogedga [...] samarye” (Hebreos 13:4, Pap Tummat Karta [PTK], e narmagleged wis ogwalesad). ¿We ibu obare? Wegi soglesadi, ‘mer dodoaggwa daggoye’ ibmar nuedgi sunmasad, ibmar yeer daglegedgi. Aaga Jehovádi abirgin niggued igar ibmar dodoaggwagwad dagsulid.

6. ¿Anmar apóstol Pablo ibmar sogsadgi nueggwa binsadele, ibu ibmar anmar mag iddononiggoe, geb ibigala nuedi we ibmargi binsaed?

⁶ Bemar Jehovága arbamaladile, bebobela bemar wisid, abirgin niggued igar dodoaggwa daglegedsuli, ar Jehová we igar mesisadid (Mateo 19:4-6 absogo). Auggi, bemarga wis neg gagaledele, ¿unnila binsaed unnidibe, ome niggued igar, igar dodogedsurye? Bemar na sabgudii gumalaga, geb bemar mer na ibgwensur imagdii gumarbaliga, bemar ibmar baid wisgubalir gebed. ¿Biddi ibmar baidi? Anmar we ibmar wisguega gannar anmar daggoena apóstol Pablo ibmar sogsad. Pablo Hebreos 13:4 gi sogsad, ome niggued igar, mer igar dodogedga samarye (Hebreos 13:1-5). Pablo sogsasulid abirgin nigmalad binsa we ibmar wisi gudi gumaloye, Pablo sogsad, wegi soglenaidba igar imagmaloye. We ibmar ieged abelesulid, degiile, abirgin nigmalad na gadi binar gudimaloed. ¿Ibigala anmar deyob soge?

7. a) ¿Ibu anmar imaggoye Bibliagi anmarga soglenai, geb ibigala anmar aaba igar imagge? b) ¿Ibigala nuedi Biblia sogedba igar imagged?

 ⁷ Bibliagi soglenabalid, be emarga Bab igargi sunmagnaoye, geb sognabalid be igar iddogedse mer iggubaloye (Mateo 28:19; Hebreos 10:24, 25.) Anba dulemar be iddobisurdae inigwale, be emarga Bab igargi sunmagnaddaed. Geb be geggus arbaedgi negse nonidae inigwale, be igar iddogedse nanaed indagdisulid. Dule wargwensaar be gaosulid mer be we ibmar imaggega, Niabela begi obinosulid. ¿Ibigala be we ibmar imagged indagdisuli? Ar be bela belad Jehová sabed, aaga be we ibmar imagged indagnasulid (1 Juan 5:3). Degidde, ¿ibu nued be amidisunna, emarga be Bab igargi sunmagdiidba, geb be igar iddoged negse iggudisurbalidba? Be wissoggua be Jehová sogedba igar imagnai, be buggib binsadiosulid, bur be yeer iddodioed. Jehovága bur bule be ibmar imagdii gudsunnoed (Nehemías 8:10). ¿Ibu igargi we ibmar anmar odurdagge?

8, 9. a) ¿Ibigala anmar abirgin niggued igar dodoaggwa dagbisuli, degiile igi Jehová anmar dagmai guoe? b) ¿Ibu igargi anmar sunmagsoggali?

⁸ Bad anmar sogsad, anba anmarga ibigwensur gusur dae inigwale, Jehová sabedba anmar emarga Bab igargi sunmagdaye, geb aaga anmar igar iddoged negse nanabarye. Degsoggu Jehová sabedbali anmar ome niggued igar dodoaggwa dagbisurbalid, anba ibigwensur gusur inigwale (Hebreos 13:4; Salmo 18:29; Eclesiastés 5:4). Igi Jehová anmar bendagdae anmar e igargi sunmagdiir, geb anmar igar iddoged negse nanaer, aayobi, Jehová anmar bendagbaloed anmar abirgin niggued igar dodoaggwa dagsulir (1 Tesalonicenses 1:3; Hebreos 6:10).

⁹ Degsoggu, ¿igi anmar ome niggued igar dodoaggwa dagdi gussulile? Anmar galagwensur gudisulir, geb anmar alamagnabalir, mer na meddedgi binsamalaga.

10, 11. a) ¿Igi na abirgin nigmalad imagdidiile, Jehová asabin nued gudi guosuli? b) ¿Ibu be bogwadse be nabir egissale?

¹⁰ Ebbenne ome wargwen weyob sogsad: “Jehovága an sogdaed be an bendaye, mer an bai iddogega”. ¿Ibigala ome deyob sogsadibe? Ome weyob soged: “An sui sabsur anga ibmar soggardaed, gwage nunmag an imagdaed. Wegi be an daggele, gwen sarsoledii an daglesulid, auggi, ulubgindi, an inniggi gwage nunmagdaed, ar an sui anga soggardaed: ‘¡Be binsasun weggudiid!’, ‘¡Be ibmar imagdisulid!’”. We ome ibmar sogsadyobi inbagwen dulemar na ga neg yagi sabsur ibmar soggardamarmogad.

¹¹ ¡Dogdar dolle anmar nue Bab Dummad Jehová igar wisi, agga anmar na abirgin sabsur imaggarbalir. Dule sabsur e abirgingala ibmar sogele, inniggigwad na e abirgin wiodiid. Degsoggu, dule deyob na e abirgin imagdiile, Jehová asabin nued gudiosulid. ¿Be igi be abirgin imagdimoga? Be wisgubiele, be bogwadse be egisdo: “¿Bule urwedgi an bega ibmar soge be iddodae?”. Be bogwad bega soggardibe, be sabsur anga ibmar soggardaye, be daed be ogwaer gebed (Gálatas 5:15; Efesios 4:31 absogo).

12. ¿Igi anmar na abirgin imaggele, sun anmar binsasun Babga arbadiye soglesale?

¹² Anmar sabsur anmar abirgin imaggele, Bab Dummad Jehová anmargi bangudoed. Bibliagi soglenaid: “Ar dule wargwen Bab Dummad igarba nue nanadiiye binsaele, degi inigwele, na wissur gwabin bargaele, na duggin yardagdiid. Bab igar wisye sogdiid, binsa gordido” (Santiago 1:26). Anmar binsaed abelesulid anmar sunmaggeddi Jehová basur dagmaye. Bibliagi sognaid, mer anmar binsaoye, anmar Bab Dummadga arbadisoggua,  aggarsurye igi an na neg yaggi abirgin imagdidibe. Wegi daed boni bibbisursoggua, anmar na duggin yardagged abelesulid (1 Pedro 3:7 absogo). Sun dule wargwen alamagdiiled gwenagan bendaggega, sun yeer ibmar wisbaliled. Auggi, neg yaggi gadi e abirginse urwedaele, we dule abirgin niggued igar dodoaggwa dagdido. Degsoggu Jehová dagmamogad we dule binsasun ega arbadiye sogdii.

13. ¿Igi dule wargwen sun e abirgin gwage onunmasale?

¹³ Abirgin nigmaladi nue dagdii gued abelemalad mer e abirgin gwage onunmagdii gumalaga. ¿Igi sun deyob gusale? Ome wargwen masseredse teléfonoba gadi gordibe, ega binsaed daggega, geb ebo beedse sunmagsigusdaele, we massered we omegi issaggwa binsasulindo, auggi, massered e omedi ¿igi iddoger be binsae? Baid anmar sogbaloena, ome sui niggadi, iddoged irbali massigwa ome saddedbo Bab igargi sunmagdii osedoddaele, we ome issaggwa massigwagi binsasurmogando, auggi, ome e suidi ¿igi iddoger be binsae? Ome wargwen weyob e sui e imagdii gusad, sogsad: “An daggalile an sui ome baidbo sunmagsidae, andi gwen bai an dagsuli an iddodaed”.

14. a) Dulemar na niggusmalale ibu imagmaloye Génesis 2:24 gine soglenai. b) Abirgin nigmalad ¿ibu ibmargi binsaed abelemala?

¹⁴ Mag iddolledo ibigala we ome wile iddodaglege. Bamalad deyob imagledimarmogale, wile iddodimarmogad, ar dagdimalad e sui Biblia sogedba igar imagnasuli. Bibliagi sognaid: “Massered e babgi bangudoed, e nangi bangudoed. Geb massered e ome ebo garmagdii guoed” (Génesis 2:24). Dule abirgin niggusale bar e sergangi binsaosurye soglesulid, gwenagan bamalad anba ielegosurmogad, auggine bur e abirgingar inso ibmar imagdagoloed. Nuedsurbalid dule e bogwadsulir doggus ebo  sunmagdi gued, degiile sun binsasun neguyagi urwed amiledoed. Deyob be gudiidbali sun be neguyaggi bega urwed yaisur gusaled. Aaga abeleged dulemar na niggumamaidi na gadi binar gumalad. We ibmargi be binsaena: “¿Aaga be neguyagi urwed yaisursua? ¿Bule be na be bogwad binarmoga?”.

15. Igi Mateo 5:28 gine soglenai, ¿ibigala nuedsuli dule abirgin niggad, doggus e abirginsulid binar guedi?

 ¹⁵ Dule wargwen, e abirginsulid doggus binardaele, boni bibbisulid. Abar gwenadgan degi gudiidbali, inbaggwa dule baid abeardasunnad (Mateo 5:28). Degi gusmalale, abirgin niggued igar dodoaggwa daggeyob iddollesundo, aaga abar ega bur bule dummad neg gagales damalad. Anmar daggoena apóstol Pablo we ibmargi sunmasgu igi sogsamosunna.

16. ¿Igi mer gudi gumaloye Pablo abirgin nigmaladga sogsa?

¹⁶ Apóstol Pablo sogsagua, ome niggued igar, mer igar dodogedga samarye, sorba sognonibalid: “Massered, degine, omemo mer na yardaggaggwagwa nanamarye; ar Bab Dummad dulemar igarsuli ome diggarba, degine, sui diggarba yoledimalad, degine neg sidsigi yoledimalad, e odurdagged igar maye” (Hebreos 13:4, PTK, e narmagleged wis ogwalesad). Degsoggu, abirgin nigmalad ‘mer na yardagdii nanamalaga’, na e abirginsebii gordii gumaloed. Aaga Bibliagi sognaid: “Nussuggwagwadgi bega abirgin uglesad ebo be wergudii gusun” (Proverbios 5:18).

17. a) ¿Ibigala anmar dulemar bamaladyob, na diggarba abirgin yardagdii gubisuli? b) ¿Igi anmar Jobyobi ibmar imasmogale?

¹⁷ Dule bad abirgin nigga diggarba baidbo yogasaar galagwensur gudiile, Bab igargi nue yolenaid. Dulemardi, aggar dagsur damar inigwale na abirgin diggarba galagwensur gudi gued, anmardi, Cristo sordagansoggua, anmardi dulemar bamaladyob dabisulid. Ar anmardi nue wisid “Bab Dummad dulemar igarsuli ome diggarba, degine, sui diggarba yoledimalad, [...] odurdagg[oed]” (Hebreos 10:31; 12:29). Degsoggu, anmar Jehová igargi annabisulid (Romanos 12:9 absogo). Anmardi Jobyob ibmar imagbimogad, Jobdi na weyob igar mesisad, “an ome  gwensag daggalile, bibbisaale galagwensuli an egi binsaosu[lid]” (Job 31:1). Degsoggu bibbisaar anmar omegan baid abedii gubisulid. Anmar emar omeganbo galagwensur guedgi binsasulile, mag iddolledo anmar na abirgin yardagbisuli (apéndice “¿Igi Bibliagi soglenai niggumamaid na meddebi guarmalale?” aagi naid dagbalo segadgi naid dagbalo).

18. a) ¿Bule Jehovága abirgin diggarba yoledi gued nue igar isgana sunna? b) ¿Ibigala Jehovága abirgin diggarba galagwensur gudi gued ibmar isgana, geb ibmar baid babdummadga imagged ibmar isganabali?

¹⁸ ¿Bule Jehovága abirgin diggarba yoledi gued nue igar isgana sunna? Moisésga Igar uglesadgi soglesad, Israel neggweburgi, dule wargwen e abirgin diggarba galagwensur gusale, ibmar baid e Bab Dummadga imasardibe, oburgwilesdaye (Levítico 20:2, 10). ¿Igi Jehová dagge ibmar baid Bab Dummadga imagged, geb igi Jehová dagbali dule e abirgin diggarba galagwensur nanaed? Ar Jehovágardi sogbober ibmar isgana nanaed. Degsoggu dule we ibmar imadele, igar maidgi annanailed, Jehová yardaggodibe, e ome yardaggodibe (Éxodo 19:5, 6; Deuteronomio 5:9; Malaquías 2:14 absogo). Ar Jehovádi emar yardaggedsursoggu, we ibmar nued dagmasulid (Salmo 33:4).

19. ¿Igi nabir anmar bibbisaar binsassulile, anmar abirgin diggarba galagwensur gudi guedgi, geb ibigala?

¹⁹ Anmardi, Moisés israelitamarga igar mesisadba daosulindo, auggi anmar iebisulid ibigala aa unni soglesa abirgin diggarba yosgu nanaedi, ibmar nuedsurye. ¿Ibigala anmar we igar iebisuli? Ar degiile anmar na bogwad yardaggedgi binsaosulid. We ibmargi be binsaena. ¿Be nudsu sega godsale, mas gundagega? Be sogsaled “¡sun ande deyob imaggo!”. Be bennuggoye beg soggarmalardina ¿be deyob imasale? Be anba “imassurbaliled”. Mag iddolledo ar anmardi bibbisaar Jehová yardaggedgi  binsabisulid. Degsoggu, ibmar abegedba, anmar na abirgin yardaggedgi binsabisurmogad (Salmo 51:1, 4; Colosenses 3:5). Nia sogedba anmar igar imagbisulid, ar anmar bibbisaar Jehová nug oisgubisulid, geb anmar abirgin niggued igar dodoaggwa dagbisurbalid.

20. ¿Ibigala soglege, ome nigguedi neg aggwedyobye?

²⁰ Nabir na gadi binar gudi gumalagala, na yardaggedgi binsadisurmalarbii unnisulid, ibmar baid imagmarbalir gebed. Ome nigguedi, neg aggwedyobid. Anmar neg yeer daglesii guegala, anmar nueggwa neg durwidaer gebed, mer anmar ibmar gadigibi mier gebed. Aayobi, dule nuedgi na bogwadga sunmagdibe, gadi na e bogwad binardibe, neg yaurgi urwedii guosurmalad, degsoggu nued gudi gumarsunnoed. Auggi na ga sabsur ibmar sogmalardi, neg sunnasur daglesiiyobid. Jehová igar mesisadba bedi igar imagbisoggua, be abesulid bemar na neguyagi urwedbi dagdigumalad, bedi abirgin niggued igar dodoaggwa dagbisurbalid. Abirgin niggued igar dodoaggwagwadsursoggua, bemardi na meddedgi binsabisurmalad, wis neg aggar guder, bur igar onugued abeleged. Bibliagi sognaid: “Nue binsaed nigga guedba neg sobleged. Nue ibmar wisidba neg e saglamar mesleged. Iddoaggwaa binsalegedba e gabed negmar yaba ibmar gargermaladi, degi, ibmar yeer daglemaladi enoleged” (Proverbios 24:3, 4). Anmar daggoena igi we binsaed naid anmar bendaggoe, anmar yeer iddodii guega.

21. ¿Abirgin nigmalad ibu imagmalar gebe na gadi binar gumalaga? (Recuadro “ Ibu bemar imaggoe mer na meddemalaga” aagi naid dagbalo.)

²¹ Na niggumamaid nueggwa na sabgudimalale, Jehová dobeggwa nanadimalale, geb Jehová bensurmarbalile, “ibmar yeer daglemalad” e neggi niggayobid  (Proverbios 15:16, 17; 1 Pedro 1:7). Weyob gudidiile, na gadi binar gudmaloed. Proverbios 24:4 gine igi sognai, ¿igi degidde “ibmar yeer daglemalad” neg yaba oubosale? Dule “binsa[ed]” nigga gudiir gebed. Degsoggu na gaddig sabgudii gubimalale, geb na e daed ogwabimarbalile, Bab Dummad igar durdagmalar gebed, geb aabali igar imagmarbalir gebed (Romanos 12:2; Filipenses 1:9). Bemar na bebo Biblia absomardibe, bebo be La Atalaya gine, ¡Despertad! gine, abirgin niggued igargi sunmaglenaid durdagbardibe, bamalad gardamar aa igargi sunmagnaiddibe, degiile, bemar balaminaiyobid ibu ibmarmala, “ibmar yeer daglemaladi”. Bemar ibmar nuegan durdagnaid “neg yaba” odonaiyobid. Weyob bemar ibmar imagdiile, sogledo, bemar Jehová sabedba, Jehová igarmar mamaidba igar imagdidiye. Deyob bemar imagdidiile, bemar nabir yeer iddodii gudmaloed.

22. ¿Anmar wala walagwengi alamagnaile na gaddig sabgumalaga, igi anmar iddodi gudoe?

²² Anmar wisid gannar neg nudaggega ibgwensursulid, auggi anmar buraggwa arbadibe neg nudaggega, nabir gannar neg nued daglesii gued. Aayobmogad, anmar na wala walagwengi Biblia sogedba igar imagdimogale, na gaddig sabgumalaga, anmar yeer iddodii gudoed (Romanos 12:10; Salmo 147:11). Degsoggu, anmar dodoaggwa abirgin niggued igar dagsulile, Bab Dummad anmar sabgumai gudoed.