1, 2. ¿Kasa wekirajaainjatka anain? ¿Jamüsü waainjüinjatka shia?

KAʼWAYUUSERE pia, ¿talatüsü paaʼin mojutaapa paaʼin sünain kaʼwayuusee? ¿Müsü nnojoluitpakai paaʼin sünain puʼwayuuse? ¿Sümaashi pia sooʼopünaa paaʼin? Müle shia, mojusü paaʼin sutuma tia. Pünoujüle shapaasü paaʼin otta aisü pümüin nnojoluin talatüin naaʼin Je’waa sutuma pukuwaʼipa sümaa kaʼwayuusee. Akatsaʼa, ¡nnojo mojuin paaʼin! Eesü süpüla sünoukteʼennüin. *

² Soto waaʼin wainmain wawalayuu kaʼwayuuseshii mojuka maʼin akuwaʼipa namaiwa sünain kaʼwayuusee. Mayaapejeʼe müin naya nanta anainrü sukuwaʼipa süpüla kooʼomüin saaliin naʼwayuuse napüla. Eesü süpüla puuntüin tia. Wekirajaa sünain tü waainjüinjatkat süpüla talatüin maʼin waya sünain kaʼwayuusee.

3, 4. ¿Jamüshii nnojoliika wattaawain na kaʼwayuuseshiikana narütkaale maʼin nünainmüin Maleiwa? Piʼitaa wanee shiyaawase.

³ Narütkaale na kaʼwayuuseshiikana nünainmüin Maleiwa, arütkaashii nanainmüin naʼwayuuse. Weʼitaa wanee shiyaawase. Sümülatuʼu wanee uuchi eesü wanee jierü otta wanee toolo. Oʼotooshi chi toolokoi palaajeeruʼu otta tü jietkat uuchijeeruʼu, wattaawashii naya. Oʼotooshii wanaawa. ¿Kasa  alataka nalüʼütpa süraloʼumüin tü uuchikat? Nnojoishii wattaawain maʼin. ¿Kasa shikirajakat anain waya tia?

⁴ Tü oʼotowaakat saaʼu tü uuchikat shiyaakuayaasü tü waainjakat süpüla waʼyataain nümüin Je’waa süka süpüshuaʼa waaʼin. Aishi püpüla Je’waa sümaa puʼwayuuse otta aʼyataashii maʼin jia süpüla jürütkaain nünainmüin maʼaka joʼotooin saaʼu uuchi. Akatsaʼa wattaawale jia, müshi poʼotookai aaʼin palaajeeruʼu otta puʼwayuuse uuchijeeruʼu. ¿Kaseerü alataka joʼotoole wanaawa süraloʼumüin tü uuchikat? Mayaapejeʼe wattaawain jia paala, ayatüle kachiiruain jaaʼin joʼotooin, tia shia jürütkaale nünainmüin Maleiwa, arütkaajiraajeena maʼin jia. Shiimain: arütkaainjana nünainmüin Maleiwa na kaʼwayuuseshiikana süpüla nnojoluin wattaawain naya. ¿Kasa naainjüinjatka süpüla tia?

5. (1) ¿Kasa naainjüinjatka na kaʼwayuuseshiikana süpüla nnojoluin wattaawain naya nuulia Maleiwa otta naʼwayuuse? (2) ¿Jamüsü nümüin Je’waa tü kaʼwayuuseekat?

 ⁵ Wanee sukuwaʼipa süpüla nnojoluin wattaawain na kaʼwayuuseshiikana nuulia Maleiwa otta naʼwayuuse shia naainjüle tü sümakat tü Wiwüliakat (Salmo 25:4; Isaías 48:17, 18). Wekirajaa maʼin sünain süpüshi tia. Wanee shia tü nümakat Pablo: ‹Anakaja kojutule jütüma sukuaippa kaʼwayuusee› (Hebreokana 13:4). ¿Kasa nüküjeeka achiki Pablo? Jülüja waaʼin palajana jamaluʼuluin tü pütchikat ‹kojutaa›. Tia, shia alin wapüla wanee kasa otta waaʼinmajüin shia. Tia pütchikat, shiiʼiyatüin kojutüin maʼin nümüin Je’waa tü kaʼwayuuseekat.

6. ¿Kasa watüjaaka aaʼu wekirajaapa sünain tü nümakat Pablo süchiki tü kaʼwayuuseekat? ¿Jamüsü choʼujaaka jülüjüin waaʼin tia pütchikat?

⁶ Piʼyataale nümüin Je’waa sümaa puʼwayuuse jütüjaa aaʼu kojutüin maʼin tü kaʼwayuuseekat süka niʼinaajalain shia Je’waa (Mateo 19:4-6). Akatsaʼa mojujiraale jia, nnojoleena anajiraain jia sutuma jütüjaain saaʼu tia. Choʼujaasü jümüin wanee kasa süpüla aijiraain otta kojutüjiraain jia. ¿Jarat shia? Süpüla watüjaain saaʼu jülüja waaʼin süchikuaʼa tü nümakat Pablo. Nnojoishi nia müin: «Kojutüsü jutuma sukuwaʼipa kaʼwayuusee»; tü nümakat shia: ‹Anakajaʼa kojutüle jutuma sukuwaʼipa kaʼwayuusee›. Sutuma tia, nnojoishi aashajaain neʼe Pablo süchiki wanee kasa alatüirü, shia nuluwataain na kaʼwayuuseshiikana sünain aainjaa tia. * Jülüjeesü waaʼin tia pütchikat süka sükaaliinjeenain waya süpüla watüjaain saaʼu tü kooʼomüinjatkat atuma saaliin waʼwayuuse wapüla, ¿jamüsü wamaka tia?

7. (1) ¿Kasa suluwataaka anain waya tü Wiwüliakat? ¿Jamüshii woonooka sümüin? (2) ¿Jamüsü waaʼin sutuma woonooin sümüin?

 ⁷ Wekirajaa motsomüin süchiki wanee kasa. ¿Jamüsü saaʼin pümüin waneeirua kasa suluwataaka anain tü Wiwüliakat maʼaka saaʼin wekirajüin wayuu otta woutkajaain süpüla waʼwaajüin Maleiwa? (Mateo 28:19; Hebreokana 10:24, 25.) Oonooshi pia sümüin, mayaapejeʼe eein kasa kapüleeka atuma shia. Oʼunüshi pia sünain aküjaa pütchi jaʼitairü nnojoluin süchekünüin süchiki Nuluwataaya Maleiwa. Oʼunüshi pia sünain outkajawaa jaʼitaichi mapüsain pia süchiki aʼyatawaa. Mayaapejeʼe eein kasa mojusü, nnojoishi pia ooʼulaain suulia aküjaa pütchi otta outkajawaa. Nnojoishi eein wayuu ooʼuleʼeraka pia suulia aainjaa tia, jaʼitakajeʼe Satanás isasü nüchiki. ¿Jamüsü? Süka alin püpüla Je’waa süka süpüshuaʼa paaʼin, makalaka poonooin sümüin nünüiki (1 Juan 5:3). ¿Jamüsü paaʼin sutuma püküjüin pütchi otta puutkajaain? Süka pütüjaain saaʼu paainjüin tü nüchekakat Maleiwa, jimatüsü, talatüsü otta katchinsü paaʼin (Nehemías 8:10). ¿Kasa shikirajaka anain waya tia?

8, 9. (1) ¿Kasa kojutüinjatka atuma wamüin sukuwaʼipa kaʼwayuusee? ¿Kaseerü naapaka wamüin Je’waa sutuma waainjüin tia? (2) ¿Jarat tü piamasü kasa wekirajaainjatkat anain?

⁸ Maʼaka wekirajaainnapain, sükajee alin wapüla Maleiwa oonooshii waya sümüin tü nuluwataakat, maʼaka saaʼin aküjaa pütchi otta outkajawaa. Waainjüin tia, mayaapejeʼe eein tü kasa kapüleekat atuma shia. Süka alin wapüla Maleiwa oonooinjana waya sümüin tü nuluwataakat anain, ‹kojutüinjatü wamüin sukuwaʼipa kaʼwayuusee›, mayaapejeʼe eein tü kapüleekat atuma shia (Hebreokana 13:4; Salmo 18:29; Eclesiastés 5:4). Maʼaka naapüin wamüin Je’waa kasa anasü sutuma waküjüin pütchi otta woutkajaain, naapeerü wamüin kasa anasü sutuma kojutüin wamüin kaʼwayuusee (1 Tesalónica 1:2, 3; Hebreokana 6:10).

⁹ ¿Kasa waainjüinjatka süpüla kojutüin wamüin kaʼwayuusee? Palajana, wayouktüinjatü akuwaʼipaa mojuka atuma  shia. Piama, wachajaainjatü sukuwaʼipa süpüla kooʼomüin saaliin waʼwayuuse wapüla.

10, 11. (1) ¿Kasa nnojoluinjatka naainjüin na wayuukana sümüin naʼwayuuse? (2) ¿Kasa wasakirüinjatka anain waʼwayuuse?

¹⁰ Müsüinka sünüiki wanee anoujüsü: «Tachuntüin nümüin Je’waa tachecherüin taaʼin». ¿Jamüsü süchuntaka tia? Müsü shia: «Mojusü taaʼin sutuma airuʼuluin maʼin nünüiki taʼwayuuse tamüin. Nnojotsü eʼikaajüin tata nutuma, akatsaʼa mojusü maʼin taaʼin sutuma nümüin tamüin pejeewa: ‹Pikeʼeja aaʼinchi taya yaakalü aluʼu pia›, ‹nnojotsü kasain anain apüla pia›». Wayuukat tüü, süküjüin wanee kasa alataka maʼin namüin na kaʼwayuuseshiikana: airuʼuluin maʼin nanüiki sümüin naʼwayuuse.

¹¹ Mojusü maʼin airuʼurule nanüiki na anoujüshiikana sümüin naʼwayuuse, tia nnojotsü süpüla motuin saaʼin. Eeka müin anüiki nnojotsü kojutüin natuma tü kaʼwayuuseekat. ¿Jamüsü sukuwaʼipa pünüiki sümüin puʼwayuuse? Süpüla pütüjaain saaʼu, püsakira shia sümaa nnojoluin yaletüin paaʼin: «¿Jamüsü paaʼin sutuma tanüiki?». Sümüle pümüin: «Wainmatuairü mojuin taaʼin sutuma», pünoukteʼerüinjatü pukuwaʼipa (Galacia 5:15; Éfeso 4:31).

12. ¿Jamüsü süpüla nnojoluin kasain saamüin wanoula noʼuluʼu Maleiwa?

¹² Soto waaʼin mojeerüin wakuwaʼipa nümaa Je’waa mojule wanüiki sümüin waʼwayuuse. Müsü tü Wiwüliakat: ‹Wane wayuu eekai talatüin Maleiwa nümaa naajüin, nnojorule nülaüleʼerüin naaʼin süka nünüiki, nnojotsü kasain saamüin nümüin tia noʼuluʼu Maleiwa› (Santiago 1:26). Nnojoishii süpüla wamüin katatüin wanüiki suulia wakuwaʼipa sünain anoujaa. Mojusü saashin tü Wiwüliakat wamüle: «Süka taʼyataain nümüin Maleiwa aneerü takuwaʼipa jaʼitairü kasain alatüin tepialuʼu». Nnojo wemeejiraain waaʼin, nnojotsü ashaittaain tia (1 Pedro 3:7). Eeshi süpüla niʼyataain otta  tütüin maʼin wanee wayuu suluʼu tü outkajaaleekat. Akatsaʼa airuʼurule nünüiki nipialuʼu, mojutüsü nümüin kaʼwayuusee otta nnojotsü kasain saamüin nünoula noʼuluʼu Maleiwa.

13. ¿Kasa eeka süpüla mojuin atuma naaʼin naʼwayuuse na anoujüshiikana?

¹³ Eeinjatü naaʼin na kaʼwayuusekana suulia mojuin naaʼin naʼwayuuse sutuma wanee kasa nnojotka sükajeein nanüiki. Weʼitaa piamasü shiyaawase. Eeshi wanee wawala kaʼwayuuseshi sümaa kachoin nia, kamaʼawaishi aashajaain suluʼupünaa teleepono sümaa wanee wawala epijaka süchonnii sümüiwaʼa, achuntüsü shia kaaliinwaa nümüin. Otta eesü wanee wawala kaʼwayuusesü ojuʼitawaisü sünain aküjaa pütchi kojuyatua süpüla semaanaka nümaa wanee wawala maʼwayuusesai. Chi wawalakai otta tü wawalakat naainjüin tia süka nakaaliinjeein na wawalayuukana; akatsaʼa, ¿jamüsü naaʼin na naʼwayuusekana sutuma tia? Müsü wanee wawala alataka amüin tia: «Aisü tamüin teʼrüin chi taʼwayuusekai naashajaain kamaʼawai otta jülüjüin maʼin naaʼin wanee wawala suluʼu tü outkajaaleekat. Müsü mojutükai taaʼin nutuma».

14. (1) ¿Kasa naainjüinjatka na kaʼwayuuseshiikana saashin Génesis 2:24? (2) ¿Kasa nasakirüinjatka anain na kaʼwayuuseshiikana?

¹⁴ Watüjaa aaʼu jamüin mojuka maʼin saaʼin tü wawala aashajaanakat achiki. Müsia naaʼin na wawalayuu nnojoliikana oonooin aʼwayuuse sümüin tü nuluwataakat anain Maleiwa, ‹nükatalaainjachin shipialuʼujee nii je nipialuʼujee nüshi süpüla saʼaniraain nukuaippa sümaa nuʼwayuuse› (Génesis 2:24). ¿Maluʼulu tia nnojoluinjachin jülüjüin naaʼin nüshi jee nii wanee wayuu kaʼwayuusepa nia? Nnojo. Tia maluʼulu kaʼwayuusepa wanee wayuu, shia jülüjüinjatka naaʼin palajana nuʼwayuuse. Mayaapejeʼe alin maʼin nüpüla nuwalayuu sünain anoujaa, shia jülüjüinjatka naaʼin palajana nuʼwayuuse. Makalaka mojujiraajeechin nia sümaa kamaʼawaire naashajaain otta sülanaʼaleere nümanee namüin na nuwalayuukana, mojuleesia maʼin shia naainjüle sümaa wanee wawala. Püsakira paaʼin: «¿Shiache tia mojujiraaka atuma taya sümaa  taʼwayuuse? ¿Kamaʼawaishi taya aashajaain sümaa taʼwayuuse, jülüjüsü taaʼin waneepia otta teeʼiyatüin alin tapüla shia?».

15. ¿Jamüsü mojuka saashin Mateo 5:28 jülüjüle maʼin naaʼin wanee wayuu wanee jierü nnojotka nuʼwayuusein?

¹⁵ Jülüjüle maʼin naaʼin wanee wayuu wanee jierü nnojotka nuʼwayuusein jee sülanaʼaleere nümanee sümüin, eesü  süpüla sümojujaain nukuwaʼipa. Naainjüin tia noʼutku wawalayuu otta mapa müliashii shiiʼiree (Mateo 5:28). Otta eeshii naainjüle kasa mojutüka maʼin atuma tü kasaalüükat. Wekirajaa sünain tü nümakat Pablo süchiki tia.

16. ¿Kasa nnojoluinjatka naainjüin na kaʼwayuuseshiikana naashin Pablo?

¹⁶ Süchikijee nümüin Pablo ‹kojutüinjatüin sukuwaʼipa kaʼwayuusee›, nüküjüin wanee kasa nnojoluinjatka naainjüin na kaʼwayuuseshiikana: «[Nnojo yarüttüin jutuma tü jüinkaayakat, TNM]. Kasalajaneerü nütüma Maleiwa naainjala chi eekai nümaʼüjaain sümaa wayuu nnojotkat nuʼwayuusein otta nnojoikai suʼwayuusein, je naainjala chi aʼluwajiraakai nukuaippa» (Hebreokana 13:4). Tü pütchikat «jüinkaaya» shia tü aainjirawaakat akuwaʼipaa. Süpüla ‹nnojoluin yarüttüin› shia, naya neʼe aainjiraainjanaka nakuwaʼipa na kasaatshiikana, pansaa sümaa pütchikat tüü: «Talata paaʼin sümaa tü puʼwayuuse pümaajatkat jimaʼaliiwaʼaya pia» (Proverbios 5:18, TNM).

17. (1) ¿Jamüsü wayouktüinjatka tü anakat namüin na wayuukana süchiki tü amaʼüjirawaakat akuwaʼipaa sümaa wayuu nnojotka aʼwayuuseein? (2) ¿Jamüsü süpüla washatüin nukuwaʼipa Job?

¹⁷ Eeka nümaʼüjiraain sümaa wayuu nnojotka nuʼwayuusein mojutsat maʼin nümüin tü nuluwataakat anain Maleiwa. Mayaapejeʼe anain saaʼin sümüin wayuu tia, na anoujüshii shiimainshiikana nayouktüin tü anakat naashin na wayuukana. Watüjaa aaʼu ‹kasalajaneerüin nütüma Maleiwa naainjala chi eekai nümaʼüjaain sümaa wayuu nnojotkat nuʼwayuusein otta chi aʼluwajiraakai nukuaippa›. Tia, nnojotsü naainjüinjatüin shia na wayuukana (Hebreokana 10:31; 12:29). Sutuma tia, kojutüsü wamüin tü nuluwataakat anain Je’waa (Roma 12:9). Washata nukuwaʼipa Job, müshi nia: «Aashajaashi taya sümaa toʼu» (Job 31:1, TNM). Wekirajüinjatü tü woʼukot süpüla nnojoluin weirakaain sümüin wayuu nnojotka waʼwayuusein shiiʼiree wamaʼüjiraain wakuwaʼipa sümaa. Müle shia, nnojoleerü waainjüin tü palajatkat kasa eeka süpüla wamaʼüjiraain  atuma wakuwaʼipa sümaa wayuu nnojotka waʼwayuusein (Paashajeʼera tü pütchikat «Tü sümakat tü Wiwüliakat süchiki ooʼulaajirawaa otta akatajirawaa» suluʼu).

18. (1) ¿Jamüsü mojuka maʼin nümüin Je’waa tü amaʼüjirawaakat akuwaʼipaa sümaa wayuu nnojotka aʼwayuuseein? (2) ¿Jamüsü wanaawaka tü amaʼüjirawaakat akuwaʼipaa sümaa wayuu nnojotka aʼwayuuseein otta tü aʼwaajaakat maleiwayaasü?

¹⁸ ¿Jamüsü mojuka maʼin nümüin Je’waa tü amaʼüjirawaakat akuwaʼipaa sümaa wayuu nnojotka aʼwayuuseein? Tia, süküjüin tü pütchi aapünakat nümüin Moisés. Saashin, oʼutünajatü naaʼin na israeliita amaʼüjiraakana nakuwaʼipa sümaa wayuu nnojotka naʼwayuusein jee naʼwaajüle maleiwayaasü (Levítico 20:2, 10). ¿Jamüsü wanaawaka tia piamasükat kasa? Shia süka nuʼwaajüle wanee wayuu tü maleiwayaasükat nnojotsü nikeraajüin tü nümakat nümüin Je’waa otta nümaʼüjiraale nukuwaʼipa sümaa wayuu nnojotka nuʼwayuusein nnojotsü nikeraajüin tü nümakat sümüin nuʼwayuuse. Tia piamasükat akuwaʼipaa, emeejaa shia (Éxodo 19:5, 6; Deuteronomio 5:9; Malaquías 2:14). Sutuma tü naainjalakat, süsalashii naya nutuma Je’waa, chi Maleiwa wamaakai waneepia otta chi eekai süpüla wanoujüin anüiki (Salmo 33:4).

19. ¿Kasa akaaliinjeenaka waya süpüla wachecherüin waaʼin suulia wamaʼüjiraain wakuwaʼipa sümaa wayuu nnojotka waʼwayuusein? ¿Jamüshii sükaaliinjaka waya tia?

¹⁹ Oonoopuʼushii na israeliitakana sümüin tü pütchi aapünakat nümüin Moisés, akanasaʼa wayakana nnojoishii oonooinjanain maʼin sümüin. Mayaapejeʼe müin shia, anasü sotule waaʼin shiyouktünüin maʼin sünain tia pütchikat tü amaʼüjirawaakat akuwaʼipaa sümaa wayuu nnojotka aʼwayuuseein. ¿Jamüsü sotuinjatka waaʼin shia? Süka sükaaliinjeenain waya süpüla wachecherüin waaʼin suulia waainjüin shia. Weʼitaa wanee shiyaawase. ¿Ekerotüshijeʼe pia suluʼumüin wanee iküleesia otta püsapainkashijeʼe pia süpüla püresaain sümüin ayaakuaa? «¡Nnojottaa!», müshijeʼe pia. ¿Jama saapünüle wainma nneerü pümüin? «¡Nnojorüleejaʼa!», mamaatüshijeʼe pia. Anasü tü pümakat süka nayouktüin maʼin na anoujüshiikana naʼwaajüin wanee maleiwayaashi nuulia Je’waa. Süpüla  nnojoluin wemeejüin Maleiwa otta waʼwayuuse nnojoishii waya amaʼüjiraainjanain wakuwaʼipa sümaa wayuu nnojotka waʼwayuusein, jaʼitairü eein wanee kasa waainjaka atuma shia (Salmo 51:1, 4; Colosas 3:5). Nnojoishi niainjachin Satanás talatüin watuma, nia kojutüinjachika Je’waa otta tü kaʼwayuuseekat.

20. ¿Kasa alataka namüin noʼutku na kaʼwayuuseshiikana? Piʼitaa wanee shiyaawase.

²⁰ Süpüla kojutüjiraain maʼin na kaʼwayuuseshiikana nnojotsü shiain neʼe nayouktüinjatüin wanee akuwaʼipaa mojuka atuma tü kaʼwayuuseekat. ¿Kasa amaa naainjüinjatka? Süpüla wasouktüin shiʼipajee tia weʼitaa wanee shiyaawase. Tü kaʼwayuuseekat müsü aka saaʼin wanee miichi. Suluʼu eesü tü anakat atuma shiyolojo. ¿Kasa anaka maʼin atuma tü kaʼwayuuseekat? Shia naküjüle pütchi analuʼulu, jülüjüle naaʼin naʼwayuuse, nnojorüle jameein shia natuma otta kojutüle shia namüin. Paaʼinwajiraale na kaʼwayuuseshiikana, anasü maʼin nakuwaʼipa, müsü aka saaʼin wanee miichi eeka aluʼu kasa anasü. Akatsaʼa seemiajaale saaliin naʼwayuuse napüla, amülouisü tü anakat maʼin atuma nakuwaʼipa sünain kaʼwayuusee. Sutuma tia, mojusü maʼin naaʼin. Akatsaʼa, nnojotsü pücheküin sülatüin pümüin tia. Tü püchekakat shia ‹kojutüin putuma sukuwaʼipa kaʼwayuusee›, maʼaka nuluwataain Maleiwa. Pütüjaa aaʼu kojutüin shia, anain süpüla pünoukteʼerüin otta ayatüin pia sünain. Makalaka pünoukteʼereerüin wanee kasa amojujaka sukuwaʼipa. Süküjüin tü Wiwüliakat tü sukuwaʼipainjatkat, müsü shia: «Sutuma tü kekiiwaakat maʼin akumajünüsü tü piichikat otta ichesü shia sutuma tü ayaawataakat otta süka tü atüjawaakat piratüsü tü sütaüjiakat sümaa kasa kojutüsü otta anasü» (Proverbios 24:3, 4, TNM). Wekirajaa sünain jamüin sünainpünaaka pütchikat tia tü kaʼwayuuseekat.

21. ¿Kasa waainjüinjatka süpüla kooʼomüin saaliin waʼwayuuse wapüla? (Paashajeʼera tü pütchikat « ¿Jamüsü süpüla kooʼomüin saaliin taʼwayuuse tapüla?».)

²¹ Saʼakajee tü «kasa kojutüsü» talatakat atuma na kaʼwayuuseshiikana shia aijiraain maʼin naya, mmoluwaain naya neema  Maleiwa otta ichein nanoula (Proverbios 15:16, 17; 1 Pedro 1:7). Sutuma tia akuwaʼipaakat otta waneeirua, kooʼomüinsü saaliin waʼwayuuse wapüla. Akatsaʼa, ¿pütüjaa aaʼu jamüin sukuwaʼipa süpüla piratüin sütaüjia tü miichikat sümaa «kasa kojutüsü» saashin Proverbios 24:4? Shia sutuma «tü atüjawaakat.» Sünainjee tia, na kaʼwayuuseshii anoukteʼereekana nakuwaʼipa otta kooʼomüinweeka atuma saaliin naʼwayuuse napüla, nekirajaainjatü anain tü sümakat tü Wiwüliakat otta naainjüinjatü shia (Roma 12:2; Filipos 1:9). Ekirajaainjana sünain tü karaloukta aashajeʼennakat weinshi, tü pütchi aashajaakat süchiki kaʼwayuusee suluʼu ¡Despertad! otta La Atalaya. Tia, sükaaliinjeena naya süpüla natüjaain saaʼu tü «kasa kojutüsü» choʼujaakat namüin. Süchikijee, neʼitaainjatü shia suluʼu «tü sütaüjiakat» nepia. Tia, shia naainjüinjatüin tü nekirajaakat anain süka alin napüla Je’waa. Naainjüle tia, aneerü nakuwaʼipa sümaa naʼwayuuse maʼakaapuʼu paala.

22. ¿Jameerü waaʼin waʼyataale maʼin süchiirua waainjüin tü eʼitaanakat apüla waya sünain kaʼwayuusee?

²² Koulainsü shiʼitaanüin süchikuaʼa tia kasa anasü eepuʼukat. Akatsaʼa, talateerü naaʼin na anoujüshii aʼyataakana maʼin süchiirua naainjüin tü eʼitaanakat apüla naya. Aneerü naaʼin süka natüjaain saaʼu noonooin sümüin tü nuluwataakat anain Maleiwa: nayainjanain palajanain sünain eeʼiyataa kojutüin namüin naʼwayuuse (Roma 12:10, TNM; Salmo 147:11). Sükajee tü naainjakat süpüla kojutüin namüin sukuwaʼipa kaʼwayuusee, ayateechi alin napüla Maleiwa.