1, 2. Ano nga pamangkot ang aton pagabinagbinagon, kag ngaa?

MINYO ka na bala? Kon amo, nalipay ka bala sa inyo pag-asawahay ukon madamo kamo sing mabug-at nga problema? Amat-amat na bala kamo nga nagalas-ay sa isa kag isa? Indi ka na bala malipayon kag daw ginaagwanta mo na lang ang inyo pag-updanay? Kon amo, mahimo nga nasubuan ka nga nagbugnaw na ang inyo mainit anay nga pagtamdanay. Subong Cristiano, luyag mo gid nga ang inyo pag-asawahay makahatag sing kadayawan kay Jehova, ang Dios nga imo ginahigugma. Gani, mahimo nga nabalaka ka kag nasubuan sa inyo kahimtangan karon. Apang, indi ka dapat madulaan sing paglaum.

² Sa karon, may maayo nga Cristianong mga mag-asawa nga sang una nagaupdanay lang pero indi malipayon. Apang, nakakita sila sing paagi agod mapabakod ang ila relasyon. Makasalig ka nga magabakod man ang inyo pag-asawahay. Paano?

3, 4. Ngaa magasuod ang mag-asawa kon ginapanikasugan nila nga makigsuod sa Dios? Iilustrar.

³ Magasuod pa gid kamo sang imo tiayon kon panikasugan ninyo nga makigsuod sa Dios. Ngaa? Binagbinaga ini nga ilustrasyon: Hunahunaa ang mag-asawa nga nagatindog sa tiilan sang isa ka bukid. Ang bana yara sa isa ka bahin sang tiilan sang bukid kag ang asawa naman yara sa pihak. Dayon dungan sila nga nagtaklad sa bukid. Sang bag-o pa lang sila nagataklad, malayo pa ang ila antad nga duha. Apang, samtang padayon sila nga nagataklad, nagalapit kag nagalapit sila  sa isa kag isa. Nahangpan mo bala kon ano ang ginatudlo sini nga ilustrasyon?

⁴ Ang imo panikasog nga alagdon si Jehova sing bug-os mahimo mapaanggid sa imo panikasog nga taklaron ang isa ka bukid. Nanikasog ka na sa pagtaklad bangod ginahigugma mo si Jehova. Apang, kon naglas-ay na ang inyo pagtamdanay sang imo tiayon, daw subong nga nagataklad kamo sa bukid, ugaling ikaw yara sa isa ka bahin kag sia naman yara sa pihak. Apang, ano ang matabo kon magpadayon kamo sa pagtaklad? Sa umpisa malayo ang inyo antad sa isa kag isa. Apang samtang nagapanikasog kamo nga makigsuod sa Dios—paagi sa padayon nga pagtaklad—labi kamo nga magalapit sa isa kag isa. Gani, ang sekreto agod magsuod kamo sang imo tiayon amo ang pagpakigsuod sa Dios. Paano mo ini himuon?

5. (a) Ano ang isa ka paagi agod mangin suod ka kay Jehova kag sa imo tiayon? (b) Ano ang pagtamod ni Jehova sa pag-asawahay?

 ⁵ Ang isa ka importante nga paagi amo ang pagsunod sa laygay tuhoy sa pag-asawahay nga masapwan sa Pulong sang Dios. (Salmo 25:4; Isaias 48:17, 18) Gani, binagbinaga ang espesipiko nga punto sang laygay ni apostol Pablo. Nagsiling sia: “Dapat padunggan sang tanan ang pag-asawahay.” (Hebreo 13:4) Ano ang buot silingon sini? Ang tinaga nga ‘dungganon’ nagapatuhoy sa isa ka butang nga ginapabaloran kag bilidhon. Amo gid sini ang pagtamod ni Jehova sa pag-asawahay—ginapabaloran niya ini subong bilidhon.

6. Ano ang ginapakita sang konteksto tuhoy sa laygay ni Pablo sa pag-asawahay, kag ngaa dapat gid ini dumdumon?

⁶ Siempre pa, subong mga alagad sang Dios, nahibaluan na ninyo sang imo tiayon nga para kay Jehova ang pag-asawahay bilidhon kag sagrado. Sia mismo ang nagtukod sang pag-asawahay. (Basaha ang Mateo 19:4-6.) Apang kon may mga problema kamo subong, ang paghibalo nga dungganon ang pag-asawahay mahimo nga indi bastante para magpakita kamo sing gugma kag pagtahod sa isa kag isa. Kon amo, ano ang makabulig sa inyo? Talupangda sing maayo kon ano ang ginsiling ni Pablo tuhoy sa pagpakita sing pagpadungog. Wala sia nagsiling nga “ang pag-asawahay dungganon,” kundi nagsiling sia nga “dapat padunggan ang pag-asawahay.” Wala lamang nagkomento si Pablo tuhoy sa pag-asawahay kundi naghatag sia sing laygay. * Kon dumdumon mo ini, maninguha ka pa gid nga manumbalik ang pagpabalor mo sa imo tiayon. Ngaa?

7. (a) Ano nga mga sugo sa Kasulatan ang aton ginatuman, kag ngaa? (b) Ano ang maayo nga mga resulta sang pagkamatinumanon?

⁷ Binagbinaga sing makadali kon paano mo ginatamod ang  iban pa nga mga sugo sa Kasulatan, subong sang paghimo sing mga disipulo ukon pagtipon sing tingob agod magsimba. (Mateo 28:19; Hebreo 10:24, 25) Matuod, kon kaisa mabudlay ini sundon. Mahimo nga ang mga tawo nga imo ginabantalaan indi magsapak sa imo, ukon tuman ka na kakapoy sa trabaho, gani nabudlayan ka gid magtambong sa Cristianong mga miting. Apang, nagapadayon ka sa pagbantala sing mensahe sang Ginharian kag sa pagtambong sa Cristianong mga miting. Wala gid sing makapugong sa imo—bisan si Satanas pa! Ngaa? Bangod ang imo tudok nga gugma kay Jehova nagapahulag sa imo nga sundon ang iya mga sugo. (1 Juan 5:3) Ano ang maayo nga mga resulta sini? Ang pagpakigbahin sa pagbantala kag ang pagtambong sa mga miting nagahatag sa imo sing malinong nga hunahuna kag tudok nga kalipay bangod nahibaluan mo nga ginahimo mo ang kabubut-on sang Dios. Ini nga balatyagon magapasag-uli sang imo kusog. (Nehemias 8:10) Ano ang matun-an mo sa sini?

8, 9. (a) Ano ang magapahulag sa aton nga tumanon ang laygay nga padunggan ang pag-asawahay, kag ngaa? (b) Ano ang duha ka punto nga aton binagbinagon?

⁸ Subong nga ang imo tudok nga gugma sa Dios magapahulag sa imo nga tumanon ang mga sugo sa pagbantala kag pagtambong sa mga miting walay sapayan sang mga kabudlayan, ang imo gugma kay Jehova magapahulag man sa imo nga sundon ang laygay sang Kasulatan nga ‘dapat padunggan ang pag-asawahay,’ bisan pa daw mabudlay ini himuon. (Hebreo 13:4; Salmo 18:29; Manugwali 5:4) Dugang pa, subong nga ang imo mga panikasog nga makigbahin sa pagbantala kag pagtambong sa mga miting pakamaayuhon sang Dios, ang imo mga panikasog nga padunggan ang inyo pag-asawahay dumdumon man kag pakamaayuhon gid ni Jehova.—1 Tesalonica 1:3; Hebreo 6:10.

⁹ Gani, ano ang himuon mo agod mapadunggan ang inyo pag-asawahay? Dapat likawan mo ang paggawi nga makaguba sang inyo kaangtanan. Dayon, maghimo ka man sing mga tikang nga mapabakod ang inyo pag-asawahay.

10, 11. (a) Ano nga paggawi ang wala nagapadungog sa pag-asawahay? (b) Ano ang mahimo naton ipamangkot sa aton tiayon?

¹⁰ Ang isa ka Cristianong asawa nagsiling: “Nangamuyo ako sing kusog kay Jehova nga makabatas.” Mabatas ang ano? Sia nagpaathag: “Maparas maghambal ang akon bana. Bisan pa wala niya ako ginpatup-an, apang ang iya masakit nga mga tinaga, subong sang ‘Pabug-at ka lang sa akon!’ kag ‘Wala ka gid pulos!’ nagpilas sang akon tagipusuon.” Ginasugid sini nga asawa ang isa ka serioso nga problema sang mga mag-asawa—ang masakit nga mga tinaga.

¹¹ Makapasubo gid kon ang Cristianong mga mag-asawa magsabtanay sing masakit nga mga tinaga, nga makapilas sa balatyagon nga indi dayon mag-ayo! Maathag gid nga ini nga sahi sang pag-asawahay indi dungganon. Kamusta naman ang inyo pag-asawahay? Ang isa ka paagi nga masabat ini amo ang mapainubuson nga pagpamangkot sa imo tiayon, “Ano ang ginabatyag mo sa mga ginapanghambal ko sa imo?” Kon pirme lang sia nasakitan sa imo mga ginapanghambal, dapat handa ka nga magbag-o.—Galacia 5:15; basaha ang Efeso 4:31.

12. Paano ang pagsimba sang isa mangin wala sing pulos para sa Dios?

¹² Dumduma gid nga ang imo paagi sa pagpakighambal sa imo tiayon may epekto sa imo kaangtanan kay Jehova. Ang Biblia nagasiling: “Kon ang bisan sin-o nagahunahuna nga sia sumilimba sang Dios, apang wala nagarenda sang iya dila, ginadaya niya ang iya tagipusuon, kag ang iya pagsimba wala sing pulos.” (Santiago 1:26) Ang imo ginahambal may yara kaangtanan sa imo pagsimba. Ang Biblia wala nagaugyon sa ginasiling sang iban nga basta nagaalagad ka lang sa Dios, indi na importante kon ano ang nagakatabo sa inyo puluy-an. Indi paglimbungi ang imo kaugalingon. Serioso gid ini nga butang. (Basaha ang 1 Pedro 3:7.) Mahimo nga may mga ikasarang ka kag makugi, apang kon  hungod mo nga ginasakit ang balatyagon sang imo tiayon paagi sa masakit nga mga tinaga, wala mo ginapadunggan ang kahimusan sang pag-asawahay, kag para sa Dios wala sing pulos ang imo pagsimba.

13. Paano masakit sang isa ang balatyagon sang iya tiayon?

¹³ Dapat likawan man sang mag-asawa nga masakit sing indi hungod ang balatyagon sang isa kag isa. Binagbinaga ining duha ka halimbawa: Pirme ginatawgan sang nagasolo nga iloy ang isa ka Cristianong bana agod mangayo sing laygay, kag nagaistoryahanay sila sing malawig; ang soltero naman nga utod pirme nagaupod kada semana sa isa ka Cristianong asawa sa pag-alagad sa latagon. Sa sini nga mga halimbawa, mahimo nga maayo man ang katuyuan sining minyo nga mga Cristiano; apang, ano ang epekto sini sa ila mga tiayon? Ang isa ka asawa nga yara sa sini nga kahimtangan nagsiling: “Nagalain gid ang buot ko kay pirme ko makita nga ginahatagan sang akon bana sing daku nga tion kag atension ang isa ka utod nga babayi sa kongregasyon. Pamatyag ko indi na ako importante sa iya.”

14. (a) Ano nga obligasyon sang mag-asawa ang ginapadaku sa Genesis 2:24? (b) Ano ang dapat naton ipamangkot sa aton kaugalingon?

¹⁴ Natural lang nga masakitan ining tiayon kag ang iban pa nga yara sa sini nga kahimtangan. Ginabalewala sang ila mga tiayon ang sadsaran nga sugo sang Dios sa pag-asawahay: “Bayaan sang lalaki ang iya amay kag ang iya iloy kag magahiusa sia sa iya asawa.” (Genesis 2:24) Siempre pa, ginapadunggan gihapon sang mga minyo ang ila mga ginikanan; apang sa kahimusan sang Dios, dapat nila unahon ang ila obligasyon sa ila tiayon. Sing kaanggid, ginahigugma man sang mga Cristiano ang ila mga kauturan; apang dapat nila unahon ang ila katungdanan sa ila tiayon. Gani, kon ang minyo nga mga Cristiano nagahinguyang sing indi nagakaigo nga tion ukon tuman ka suod sa isa ka utod nga tuhay sing sekso, ginabutang nila sa katalagman ang ila pag-asawahay. Amo bala ini ang kabangdanan sang  inyo problema nga mag-asawa? Pamangkuta ang imo kaugalingon, ‘Ginahatag ko bala sa akon tiayon ang tion, atension, kag pagpalangga nga para gid sa iya?’

15. Suno sa Mateo 5:28, ngaa dapat likawan sang minyo nga mga Cristiano nga magpakita sing indi nagakaigo nga atension sa tuhay sing sekso?

¹⁵ Dugang pa, ang minyo nga mga Cristiano nga nagapakita  sing indi nagakaigo nga atension sa tuhay sing sekso nga indi nila tiayon nagabutang sang ila kaugalingon sa katalagman. Makapasubo nga nahulog ang buot sang pila ka minyo nga mga Cristiano sa iban nga tuman kasuod sa ila. (Mateo 5:28) Nagresulta ini sa paggawi nga wala gid nagapadungog sa pag-asawahay. Binagbinaga kon ano ang ginsiling ni apostol Pablo tuhoy sini.

16. Ano nga sugo ang ginhatag ni Pablo tuhoy sa pag-asawahay?

¹⁶ Pagkatapos maglaygay si Pablo nga ‘padunggan ang pag-asawahay’ nagpaandam sia: “Ang bana kag asawa dapat mangin matutom sa isa kag isa, kay hukman sang Dios ang mga nagahimo sang seksuwal nga imoralidad kag ang mga makihilahion.” (Hebreo 13:4) Ang pagpakigsekso dapat himuon lamang sa sulod sang kahimusan sang pag-asawahay. Gani, ginasunod sang mga Cristiano ang inspirado nga pulong: “Magkalipay ka sa imo asawa nga ginpangasawa mo sang bataon ka pa.”—Hulubaton 5:18.

17. (a) Ngaa indi dapat magpaimpluwensia ang mga Cristiano sa pagtamod sang kalabanan tuhoy sa pagpanghilahi? (b) Paano naton mailog ang huwaran nga ginpahamtang ni Job?

¹⁷ Ang mga nagapakigsekso sa indi nila tiayon wala gid sing pagtahod sa moral nga kasuguan sang Dios. Matuod, daw kinaandan na lang para sa madamo karon ang pagpanghilahi. Apang, ano man ang pagtamod sang iban nga tawo tuhoy sa pagpanghilahi indi dapat magpaimpluwensia sa sini nga pagtamod ang mga Cristiano. Nakahibalo sila nga sa ulihi, indi tawo, kundi ‘Dios ang magahukom sa mga nagahimo sang seksuwal nga imoralidad kag mga makihilahion.’ (Hebreo 10:31; 12:29) Gani ginasunod sang matuod nga mga Cristiano ang pagtamod ni Jehova tuhoy sini. (Basaha ang Roma 12:9.) Dumduma ang ginsiling sang patriarka nga si Job: “Nakigkatipan ako sa akon mga mata.” (Job 31:1) Huo, agod indi gid makahimo sang tikang nga magaresulta sa pagpanghilahi, dapat kontrolon sang matuod nga  mga Cristiano ang ila mga mata kag indi gid magtulok nga may kaibog sa tuhay sing sekso nga indi nila tiayon.—Tan-awa ang Apendise nga “Ang Pagtamod sang Biblia sa Diborsio kag Pagbulagay.”

18. (a) Daw ano ka serioso para kay Jehova ang pagpanghilahi? (b) Ano ang pagkaanggid sang pagpanghilahi kag sang pagsimba sa diosdios?

¹⁸ Daw ano ka serioso para kay Jehova ang pagpanghilahi? Ang Mosaikong Kasuguan nagabulig sa aton nga mahangpan ang pagtamod ni Jehova tuhoy sini. Sa Israel, ang pagpanghilahi kag ang pagsimba sa mga diosdios nalakip sa mga sala nga ginasilutan sing kamatayon. (Levitico 20:2, 10) Nakita mo bala ang pagkaanggid sining duha? Binagbinaga ini: Ang isa ka Israelinhon nga nagasimba sa diosdios nagaguba sang iya katipan kay Jehova. Sing kaanggid, ang isa ka Israelinhon nga nagapanghilahi nagaguba man sang iya katipan sa iya tiayon. Pareho sila nga maluib. (Exodo 19:5, 6; Deuteronomio 5:9; basaha ang Malaquias 2:14.) Gani, pareho sila nga manabat sa matutom kag masaligan nga Dios nga si Jehova.—Salmo 33:4.

19. Ano ang magapabakod sa determinasyon sang isa nga indi gid manghilahi, kag ngaa?

¹⁹ Matuod, ang mga Cristiano wala na napaidalom sa Mosaikong Kasuguan. Apang kon dumdumon sang mga Cristiano nga ang pagpanghilahi ginakabig nga isa ka serioso nga sala sa Israel sang una, magabakod ang ila determinasyon nga likawan ini. Ngaa? Binagbinaga ini nga pagpaanggid: Magasulod ka bala sa simbahan, magaluhod kag mangamuyo sa imahen? ‘Indi gid!’ siling mo. Apang ano abi kon hatagan ka sing daku nga kuarta? ‘Imposible nga himuon ko ina!’ sabat mo. Sa pagkamatuod, bisan ang paghunahuna lang nga luiban si Jehova paagi sa pagsimba sa diosdios makangilil-ad sa matuod nga Cristiano. Sing kaanggid, dapat mangil-ad ang mga Cristiano bisan sa pagpamensar lang nga luiban nila ang ila Dios nga si Jehova kag ang ila tiayon paagi sa pagpanghilahi—ano man ang mahimo nga kabaylo sini. (Salmo 51:1, 4; Colosas 3:5) Indi gid kita  maghimo sing isa ka buhat nga magapahalipay kay Satanas kag magahatag sing daku nga kahuy-anan kay Jehova kag sa iya sagrado nga kahimusan sang pag-asawahay.

20. Ano ang nagakatabo sa pila ka pag-asawahay? Iilustrar.

²⁰ Luwas nga likawan mo ang buhat nga wala nagapadungog sa pag-asawahay, ano pa ang mahimo mo agod mabalik ang imo pagtahod sa imo tiayon? Agod masabat ini, hunahunaa nga ang kahimusan sang pag-asawahay kaangay sang isa ka balay. Masunod, kabiga nga ang mainayuhon nga hambal, madinumdumon nga buhat, kag iban pa nga butang nga nagapadungog sa pag-asawahay amo ang mga dekorasyon nga nagapatahom sa balay. Kon nagapalanggaanay kamo sang imo tiayon, ang inyo pag-asawahay daw pareho sang balay nga gindekorasyunan agod magtahom. Kon nagalas-ay ang inyo pagtamdanay, ini nga mga dekorasyon amat-amat nga nagakaladula, gani ang inyo pag-asawahay wala na sing kalipay pareho sang balay nga wala sing mga dekorasyon. Sanglit luyag mo nga sundon ang sugo sang Dios nga ‘padunggan ang pag-asawahay,’ mapahulag ka nga pauswagon ang inyo kahimtangan. Kay man, ang isa ka butang nga bilidhon kag dungganon takus gid nga kay-uhon, ukon ipasag-uli. Paano mo ini mahimo? Ang Pulong sang Dios nagasiling: “Paagi sa kaalam ginapatindog ang balay, kag paagi sa paghangop ginapabakod ini. Paagi sa ihibalo ang mga hulot sini ginapuno sang tanan nga sahi sang bilidhon kag matahom nga mga butang.” (Hulubaton 24:3, 4) Talupangda kon paano ini maaplikar sa pag-asawahay.

21. Paano naton mapabakod ang aton pag-asawahay? (Tan-awa man ang kahon nga “ Ano ang Akon Himuon Agod Mangin Malipayon ang Amon Pag-asawahay?”)

²¹ Lakip sa bilidhon nga mga butang nga nagahimo sa isa ka puluy-an nga malipayon amo ang mga kinaiya subong sang matuod nga gugma, diosnon nga kahadlok, kag malig-on nga pagtuo. (Hulubaton 15:16, 17; 1 Pedro 1:7)  Nagapabakod ini sa pag-asawahay. Apang natalupangdan mo bala kon paano ang mga hulot mapuno sing bilidhon nga mga butang suno sa hulubaton? “Paagi sa ihibalo.” Kon iaplikar ang ihibalo sa Biblia, may ikasarang ini nga bag-uhon ang panghunahuna sang mga tawo kag magapahulag sa ila nga pukawon ang ila gugma sa isa kag isa. (Roma 12:2; Filipos 1:9) Gani, kon ginahambalan ninyo kag ginabinagbinag sing kalmado ang isa ka teksto sa Biblia, subong sang teksto sa sina nga adlaw, ukon sang isa ka pasad sa Biblia nga artikulo sa Ang Lalantawan ukon Magmata! tuhoy sa pag-asawahay, daw subong bala nga ginausisa ninyo ang isa ka manami nga dekorasyon nga makapatahom sang inyo balay. Kon ginapahulag ka sang gugma kay Jehova nga iaplikar sa inyo pag-asawahay ang laygay nga bag-o lang ninyo natun-an, daw subong nga ginadala mo ini nga dekorasyon sa mga kuarto sang inyo balay. Subong resulta, mahimo manumbalik ang kalipay sa inyo pag-asawahay.

22. Ano ang aton mabatyagan kon ginahimo naton ang aton bahin sa pagpabakod sang aton pag-asawahay?

²² Matuod nga nagakinahanglan sing malawig nga tion kag panikasog agod isaisa nga mabutang ini nga mga dekorasyon. Apang, kon ginahimo mo ang imo bahin, mangin malipayon ka gid bangod nakahibalo ka nga ginasunod mo ang sugo sang Biblia: “Sa pagpadungog sa isa kag isa, manguna kamo.” (Roma 12:10; Salmo 147:11) Labaw sa tanan, ang imo mga panikasog nga padunggan ang inyo pag-asawahay makabulig sa imo nga magpabilin sa gugma sang Dios.