1, 2. Әме кʹижан пьрсе шьровәкьн, у чьма?

ҺӘРГЕ тö зәwьщи йи йан жи меркьри йи, гәло зәwаща тә тәрʹа шабуне тинә? Дьбәк малбәта тәда проблемед пʹьрʹ мәзьн һәнә? Дьбәк дьлсарбун кʹәтийә ортʹа wә? Йан жи тö зәwаща хwә һʹәсаб дьки барәки гьран у тә шабуна хwә öнда кьрийә? Һәрге әре, дьбәк жи тö зәʹф бәр хwә дькʹәви wәки һәләqәтийа wә ида незик у баш нинә. Бе шьк, ча Мәсиһи тö дьхwази wәки зәwаща тә һöрмәте бинә Йаһоwа Хwәдерʹа, чьмки тö wи һʹьз дьки. Дьбәк дәрәща тә зәʹф тә дьчәрчьринә у дьле тә дешинә. Ле нәфькьрә кö илащ ида тʹöнә.

2 Рʹожа иройин нава Мәсиһийада һәнә гәләк жьн у меред баш, зәwаща кʹижана кö бәре һʹаләки хьрабда бу. Ле wана зәwаща хwә qәwи кьрийә. Һәрге wана карьбуйә зәwаща хwә qәwи кьн, тöйе жи бькарьби зәwащеда бәхтәwар би. Wәрә әм пебьһʹәсьн чь щурʹәйи?

3, 4. Һәрге жьн у мер незики Хwәде бьн, әв йәк wе ча али wан бькә кö незики һәвдö бьн? Мәсәле бинә.

³ Һәрге жьн у мер дьхәбьтьн кö незики Хwәде бьн, бь wе йәке әwана wе бькарьбьн незики һәв жи бьн. Бьдә бәр чʹәʹве хwә алики чʹийайе мәзьн жьн сәкьнийә ле алийе дьн мер. Һʹәта әwана жере нә навбәра ортʹа wан гәләк мәзьн ә, демәк әw зәʹф дури һәв ьн. Һәрге әwана  чʹийева һьлкʹьшьн, навбәра ортʹа wан һеди-һеди wе кем бә. Жь ве мәсәле тö чь дькари һин би?

⁴ Әw qәwата кö жьн у мер дьдьнә хәбате wәки бь дьл у щан Хwәдерʹа хьзмәт кьн, әм дькарьн бәрамбәри wе qәwате кьн, кʹижан кö лазьм ә бьдьн хәбате wәки чʹийева һьлкʹьшьн. Һʹьзкьрьн һьндава Йаһоwа wә һелан дькә, кö һʹәму qәwата хwә бьдьн хәбате сәва кö чʹийева һьлкʹьшьн. Ле һәрге һун һьндава һәвдö сар ьн, әв те һʹәсабе кö рʹаст ә һун чʹийева һьлдькʹьшьн, ле жь щурʹә-щурʹә алийава. Һәрге һун нәсәкьньн у бәрдәwам кьн чʹийева һьлкʹьшьн, зани ахьрийе wе чь бьqәwьмә? Бәле, һуне һеди-һеди незики һәв бьн. Демәк чьqас һе зедә һун qәwате бьдьнә хәбате сәва незики Хwәде бьн, һаqас  һе зедә һуне бькарьбьн незики һәвдö бьн. Бь рʹасти, сәва кö незики һәв дö бьн, бәре пешьн гәрәке незики Хwәде бьн. Ләма жи wәрә әм пебьһʹәсьн кʹа ча дькарьн незики Хwәде бьн.

5. (а) Чь гәрәке бьки wәки незики Хwәде би у незики жьн йан мере хwә би? (б) Ньһерʹандьна Йаһоwа һьндава зәwаще чь щурʹәйи йә?

⁵ Фәрз ә, кö жьн у мер ширәтед Хwәде бьдьнә хәбате, йед кö пьрсед зәwащева гьредайи нә. Әв ширәтед wи, дь Кʹьтеба Пирозда ньвисар ьн (Зәбур 25:4; Ишайа 48:17, 18). Wәрен әм дина хwә бьдьн кö Паwлосе шанди чь ширәт ньвиси: «Зәwаща һәр кәси бьра һöрмәт бә» (Ибрани 13:4, ДТʹ). Ньһерʹандьна Йаһоwа һьндава зәwаще һәма бь ви щурʹәйи йә, демәк Йаһоwа зәwаще гәләк qимәт дькә.

6. Әм жь контекста Ибрани 13:4 чь педьһʹәсьн у чьрʹа лазьм ә кö әве йәке бира хwәда хwәй кьн?

⁶ Һәрге һун һәр дö жи хьзмәткʹаред Йаһоwа нә, wәки öса нә һун заньн кö зәwащ qимәт ә у пироз ә, у һʹимдаре зәwаще Йаһоwа йә. (Бьхунә Мәтта 19:4-6.) Ле һәрге малбәта wә ньһа рʹасти проблема те, wәки öса нә тʹәне бьзаньби кö зәwащ гәрәке бе һöрмәткьрьне, бәс нинә кö һун бькарьбьн һьндава һәв бь qәдьр бьн, у һʹьзкьрьне жи бьдьнә кʹьфше. Хенщи занәбуне шьхöл жи лазьм ә. Дина хwә бьде Паwлосе шанди чь дьбежә дәрһәqа һöрмәткьрьна зәwаще. Әwи нәдьгот кö «зәwащ, һöрмәт ә», ле гот wәки «зәwаща һәр кәси бьра һöрмәт бә». Бь ван хәбәра Паwлос нә кö дьхwәст бьгота кö зәwащ хwәха һöрмәт ә, ле әwи һелан да һәр кәси wәки öса бькьн кö зәwаща wан һöрмәт бә. Һәрге һун дәрһәqа ве йәке кʹур бьфькьрьн, әв йәк wе али wә бькә кö һун qәдьре һәв бьгьрьн. Wәре ньһа әм пебьһʹәсьн чьма әw йәк öса фәрз ә.

7. (а) Кʹижан принсипед Хwәде әм дьqәдиньн у чьма? (б) Гöһдарикьрьн чь кʹаре тинә?

 ⁷ Һәла бьфькьрә, тö ча дьqәдини тʹәмийед Кʹьтеба Пирозә майин, мәсәлә, бәлакьрьна мьзгинийа хере, йан жи чуйина ль сәр щьвата (Мәтта 28:19; Ибрани 10:24, 25). Рʹаст ә, нә һеса йә кö ван тʹәмийа тʹьме бьqәдини. Чьмки wәʹде хьзмәте мәрьв дьбәк һьндава мьзгинийе бетʹалаш бьн, йан жи дьбәк тö жь хәбате öса wәстийайи тей, wәки тәрʹа гәләк чәтьн дьбә кö һәрʹи щьвате. Ле чь жи һәбә, йәкә тö дәрһәqа Пʹадшатийа Хwәде әʹлам дьки у дьчи щьвата жи. Тʹö кәс нькарә тә бьдә сәкьнандьне, һәла һе Шәйтʹан Мире-щьна жи! Ле гәло чьма? Чьмки һʹьзкьрьна тәйә бь дьл һьндава Хwәде, тә һелан дькә тʹәмийед wи бьqәдини (1  Йуһʹәнна 5:3). Ле гöһдарикьрьн чь кʹаре тинә? Чахе тö мьзгинийе бәла дьки у дьчи сәр щьвата, бь ве йәке тö рʹьһʹәтийе у шабуне дьстини, чьмки тö зани кö qьрара Йаһоwа дьqәдини. У әв һʹәму тьшт qәwате дьдә тә (Нәһәмийа 8:10). Ле гәло жь ве йәке әм чь дькарьн һин бьн?

8, 9. (а) Чь дькарә мә һелан кә гöһ бьдьнә ве тʹәмийе кö зәwащ һöрмәт бә, у чьма? (б) Әме кʹижан дö пьрса шьровәкьн?

⁸ Һʹьзкьрьна тәйә мәзьн һьндава Хwәде тә һелан дькә бини сери тʹәмийед wи, демәк мьзгинийе бәла ки у һәрʹи сәр щьвата, һәла һе wи чахи жи, чахе рʹасти пәйкʹәтьна тейи. Әв һьʹзкьрьн öса жи дькарә тә һелан кә, кö гöһ бьди әwе ширәта Кʹьтеба Пироз, wәки һәла һе wи чахи жи зәwаще һöрмәт ки, чахе әв йәк тәрʹа зәʹф чәтьн ә (Ибрани 13:4; Зәбур 18:29; Wаиз 5:4). Хенщи ве йәке, ча хьзмәткьрьн у һазьрбуна тә сәр щьвата кʹәрәмед пʹьрʹ мәзьн тинә, öса жи Йаһоwа wе кʹәрәм кә әwе qәwата тә, кʹижан кö тö дьди хәбате, wәки зәwаща хwә һöрмәт ки (1  Тʹесалоники 1:3; Ибрани 6:10).

 ⁹ Ле чь щурʹәйи дькари зәwаща хwә һöрмәт ки? Лазьм ә хwә дур бьгьри жь хәбәрдан у кьред öса, кʹижан кö һәләqәтийа тә ортʹа жьн йан мере тә дькарә хьраб кә. Хенщи ве йәке, wәки зәwаща хwә qәwи ки лазьм ә тьштед öса бьки, чь кö wе зәwаща тә qәwи кә.

10, 11. (а) Чь зәwаще беһöрмәт дькә? (б) Кʹижан пьрсе гәрәке бьди жьн йан мере хwә?

¹⁰ Щарәке Мәсиһикә меркьри гот: «Әз Йаһоwарʹа дöа дькьм кö qәwате бьдә мьн, у али мьн бькә тәйах кьм». Гәло чь тәйах кә? Әwе шьровәкьр: «Мере мьн бь хәбәред хwә мьн бьриндар дькә. Рʹаст ә, сәр бәдәна мьн бьринед кʹöтане тʹöнә нә, ле гьлийед wийә туж дьле мьн бьриндар дькьн. Мәсәлә, хәбәред wийә öса «Тö барәки гьран и!», «Тö qә нә тьштәк и!» Әве кʹöлфәте хәбәр дьда дәрһәqа беһöрмәткьрьне дь малбәтеда, әв йәк бь рʹасти жи проблемәкә гәләк мәзьн ә.

¹¹ Йазьх, кö жьн у мере Мәсиһи дь малбәтеда хәбәред нәщайиз һәвдöрʹа дьбежьн, жь бо чь жи емосийонали гәләк һәвдö бьриндар дькьн, у әв бьрин һеса дәрбаз набә! Фәʹмдари йә, кö зәwаща wан жьн у мера, йед кö һәвдö беһöрмәт дькьн, найе һöрмәткьрьне. Ле гәло зәwаща тәда әв проблем һәнә? Сәва кö щаба ве пьрсе бьзаньби, дькари жь жьн йан мере хwә пьрс ки: «Гьлийе мьн ча сәр тә һʹöкöм дькьн?» Һәрге жь щаба wи (wе) те кʹьфше, кö гьлийе тә тʹьме жьн йан мере тә емосийонали бьриндар дькә, бьхәбьтә кö хwә бьгöһези. (Галати 5:15; бьхунә Әфәси 4:31.)

12. Хwәде чьма дькарә хьзмәткьрьна кәсәки пʹучʹ һʹәсаб кә?

¹² Бир нәкә wәки хәбәрдана тә дь малбәтеда гәләк һʹöкöм дьбә сәр һәләqәтийа тә тʹәви Йаһоwа. Дь Кʹьтеба Пирозда ньвисар ә: «Һәрге йәк хwә хwәденас һʹәсаб дькә у зьмане хwә нькарә, әw хwәха хwә дьхапинә,  хwәденасийа wи пʹучʹ ә» (Аqуб 1:26). Хәбәрдана тә, тʹәви хьзмәткьрьна тә Хwәдерʹа, гәләк гьредайи йә. Ләма жи Кʹьтеба Пироз фькьрәкә öса qәбул накә: кö һәрге мәрьв Хwәдерʹа хьзмәт дькә, изьн ә wәки дина хwә нәде һәла дь малбәта wида чь дьqәwьмә. Ле һиви жь тә дькьн хwә нәхапинә. Әва пьрсәкә гәләк фәрз ә. (Бьхунә 1  Пәтрус 3:7.) Дьбәк фәрәсәтед тә һәнә, у тö бь хирәт Хwәдерʹа хьзмәт дьки, ле һәрге тö жьн йан мере хwә беһöрмәт дьки у зани wәки изьн тʹöнә, wи чахи тö зәwаща хwә беһöрмәт дьки у Хwәде дькарә хьзмәткьрьна тә пʹучʹ һʹәсаб кә.

13. Ча жьн у мер дькарьн емосийонали һәвдö бьриндар кьн?

¹³ Щара жи жьн у мер нафькьрьн чь дькьн у бь кьред хwә дьле һәвдö дешиньн. Wәрен әм дәрһәqа дö мәсәла хәбәр дьн. Мәсәла пешьн: Мәсиһи йа кö тʹәне зарʹа хwә мәзьн дькә, тʹьме бьре зәwьщирʹа тʹеле дьхә, wәки ширәта жь wи бьстинә, у һәврʹа дьреж хәбәр дьдьн. Мәсәла дöда: Бьре азәп һәр һʹәфти гәләк щар тʹәви хушка меркьри хьзмәт дькә. Дьбәк нет-фькьред wи бьре зәwьщи у хушка меркьри хьраб ниньн, ле фәрз әw ә кö кьред wан чь щурʹәйи һʹöкöм дьбә ль сәр жьн йан мере wан. Кʹöлфәтәк йа кö дәрәща öсада бу, гот: «Әз бона мере хwә qә нә тьштәк ьм: чьмки әw гәләк wәʹде хwә хәрщ дькә бона хушкәкә дьн. Әв йәк гәләк дьле мьн дешинә».

14. (а) Дь Дәстпебун 2:24-да чь те кʹьфшкьрьне дәрһәqа зәwаще? (б) Әм чь пьрсе гәрәке бьдьнә хwә?

¹⁴ Фәʹмдари йә wәки әв жьн у әwед кö дәрәща öсада ньн, чьрʹа дьхәйдьн. Чьмки жьн йан мере wан пьшт гöһе хwәва давежьн рʹебәрийа фәрз, дәрһәqа жьн у мера: «Мере де у баве хwә бьһелә, хwә ль жьна хwә бьгьрә у бьбьнә бәдәнәк» (Дәстпебун 2:24, ПКʹМ). Рʹаст ә, әwед кö зәwащеда ньн гәрәке диса бәрдәwам кьн qәдьре де у баве хwә бьгьрьн, ле qьрара Хwәде әw ә кö жьн у  мер бәре пешьн бона һәвдö хәм бькьн. Әм гәрәке әве принсипе бьдьнә хәбате бона хушк у бьра жи. Рʹаст ә, әм wана зәʹф һʹьз дькьн, ле бәре әʹwьл әм гәрәке жьн йан мере хwә һʹьз бькьн. Ләма жи чахе мере зәwьщи тʹәви хушкәкә дьн, йан жи жьна меркьри тʹәви бьраки дьн, гәләк wәʹдә хwә хәрщ дькә, бь ве йәке әw дькарә зийанәкә мәзьн бьдә малбәта хwә. Дьбәк малбәта тәда  жи проблема öса һәйә? Пьрсе бьдә хwә: «Әз бь рʹасти епʹещә wәʹде хwә хәрщ дькьм бона жьн йан мере хwә? У öса wи (wе) һʹьз дькьм у гöһ дьдьме, ча кö әw һежа йә?

15. Ль гора Мәтта 5:28 жь чь гәрәке фәсал бьн у чьма?

¹⁵ Һәрге бьред зәwьщи гöһдайина зедә дьдә кʹьфше һьмбәри хушкәке, йан жи хушка меркьри һьндава бьракь, әв гәләк беаqьлайи йә, öса әwана тʹәви агьр дьлизьн. Йазьх, ле һьнәка бь ве йәке бал хwә пешда анинә һәсте романтики, һьндава wан тʹәви кʹижана кö әwана зәʹф незик дьбун (Мәтта 5:28). Ахьрийеда һәсте öса, әwана бәрбь кьред öса бьрьн, кʹижан кö һе зедә зәwаще беһöрмәт дькә. Wәре әм пебьһʹәсьн Паwлосе шанди чь гот дәрһәqа ве йәке.

16. Паwлос дәрһәqа зәwаще чь тʹәми да?

¹⁶ Паши ве ширәте кö «зәwаща һәр кәси бьра һöрмәт бә», Паwлосе шанди диса ширәтәк да: «Щи-ньвин һʹәлал бә, чьмки Хwәде wе диwана чʹәʹвдәр у зьнекʹара бькә» (Ибрани 13:4). Бь хәбәра «щи-ньвин» Паwлос дьхwәст бьгота: һәләqәтийа сексуал ортʹа жьн у мер. Һәләqәтийа öса тʹәне зәwащеда дькарә һʹәлал бә, демәк бь намуси бә. Ләма жи Мәсиһи гәрәке гöһ бьдьнә хәбәред жь бина бәр Хwәде: «Ша бә тʹәви жьна хwәйә щаһьлтийе» (Мәтʹәлок 5:18, ДТʹ).

17. (а) Чьрʹа Мәсиһи ньһерʹандьна wе дьнйайе сәр qавийе, qәбул накьн? (б) Ча әм дькарьн чʹәʹв бьдьнә Ибо?

¹⁷ Кʹи кö дькʹәвә һәләqәтийа сексуал нә тʹәви жьн йан мере хwә, ле тʹәви мәрьве майин, нишан дькә кö qәдьре qанунед Хwәде нагьрә. Рʹожа иройин гәләк мәрьв дьфькьрьн кö qавикьрьнеда тьштәки хьраб тʹöнә. Ле ньһерʹандьна мәрийа гәрәке сәр Мәсиһийа һʹöкöм нәбә. Чьмки Мәсиһи фәʹм дькьн кö ахьрийа-ахьрийе «Хwәде wе диwана чʹәʹвдәр у зьнекʹара бькә» (Ибрани 10:31;  12:29). Ләма жи Мәсиһийед рʹаст дь ван пьрсада, хwә qәwи ньһерʹандьна Йаһоwава дьгьрьн. (Бьхунә Рʹомайи 12:9.) Wәре әм биньнә бира хwә гьлийе Ибо пʹехәмбәр: «Мьн бь чʹавен хwә рә пәйманәке че кьр» (Ибо 31:1). Мәсиһийед рʹаст чʹәʹве хwә хwәй дькьн жь тьштед öса кö ахьрийе бәрбь qавийе дьбьн. Әwана мьqати щʹәʹве хwә дьбьн, wәки ль сәр мәрьвед дьн бь тәме хьраб нәньһерʹьн (Бьньһерʹә Әʹламәтийед Зедә бь наве «Ньһерʹандьна Кʹьтеба Пироз сәр wе йәке, Чахе Башqә Дьжин у жь Һәв Дьqәтьн»).

18. (а) Qавикьрьн бәр чʹәʹве Хwәде гöнәки чьqас гьран ә? (б) Qавикьрьн у пʹутпʹарьсти чьда wәкә һәв ьн?

¹⁸ Бәр чʹәʹве Хwәде qавикьрьн гöнәки гәләк гьран ә. Qануна Муса мәрʹа рʹьнд дьдә кʹьфше, кö Йәһоwа ча дьньһерʹә ль сәр qавийе. Дь Исраеледа qавикьрьн у пʹутпʹарьсти гöнед wәкә һәв гьран бун, һәqе ван һәрдö гöна мьрьн бу (Qануна Кʹаһинтийе 20:2, 10). Ле зани чьда әw һәр дö гöнә wәкә һәв ьн? Һәрге Исраели сәре хwә бәр пʹута датани, бь wе йәке әwи созе хwәйи кö дабу Йаһоwа нәдьани сери. Ле һәрге qави дькьр, созе хwәйи кö дабу мере хwә, йан жьна хwә, нәдьани сери. Демәк әwан һәрдö жи мьхәнәти у нәмами дькьрьн. (Дәркʹәтьн 19:5, 6; Qануна Дöщари 5:9; бьхунә Малахи 2:14.) Ләма жи, бәр чʹәʹве Хwәдейе амьн әw һәрдö жи һежайи щәзакьрьне бун (Зәбур 33:4).

19. Чь дькарә һе зедә мә һелан кә, кö тʹö щар qавийе нәкьн, у чьма?

¹⁹ Рʹаст ә иро әм бьн qануне Мусада ниньн. Ле һәрге тʹьме бира мәда бә, кö qави дь Исраеледа гöнәкь гьран дьһатә һʹәсабе, әме һелан бьн кö тʹö щар гöнәки öса гьран нәкьн. Мәсәлә һәрге кәсәк тә бьпьрсә: Тöйе һәрʹи дере у бәр пʹута чок wәди, йан жи дöа бьки? Бей шьк тöйе бежи: На! Ле һәрге бона ве йәке гәләк пʹәрә бьдьнә тә, тöйе бьки? Сәд сәләфи на! Тöйе тʹö щар нәки, öса нинә? Бь рʹасти жи, әв фькьр кö Йаһоwарʹа мьхәнәтийе бькьн у бәр пʹута сәре хwә дайньн,  бәр чʹәʹве Мәсиһийед рʹаст гәләк рʹәш ә. Wәкә ве йәке, әw фькьр кö qавийе бькьн гәрәке бәр чʹәʹве Мәсиһийа рʹәш бә. Чьмки бь qавийе әм мьхәнәтийе дькьн һьм жьн йан мере хwәрʹа, һьм жи Хwәдерʹа. Бь рʹастийе жи qавикьрьн гöнәки гәләк гьран ә (Зәбур 51:1, 4; Колоси 3:5). Әм тö щар нахwазьн пе кьред хwә дьле Шәйтʹан ша кьн, у нахwазьн нә Йаһоwа нә жи зәwаща кö әwи саз кьрийә беһöрмәт кьн.

20. Чь дькарә бьqәwьмә дь һьнә малбәтада? Бь мәсәлә шьровәкә.

²⁰ Әм гәрәке нә кö тʹәне жь wан шьхöла бьрʹәвьн, йед кö зәwаще беһöрмәт дькьн, ле öса жи бьхәбьтьн кö qәдьргьртьна һьндава һәв зедә кьн. Ле ча әм дькарьн әве йәке бькьн? Бьдә бәр чʹәʹве хwә кö зәwащ мал ә, ле хәбәр у кьред баш әв һәнә навмал у тьштед пе кʹижана кö мале дьхәмьлиньн. Һәрге һун һәврʹа незик у амьн ьн, wи чахи дькарьн зәwаща wә бәрамбәри мала öса бькьн, йа кö бәдәw у хәмьланди йә. Ле һәрге һун һьндава һәвда сар ьн, wи чахи зәwаща wә мина маләкә нәчекьри у нәхәмьланди йә. Ләма жи һәрге тö дьхwази бьqәдини әw qануна Хwәде, кö зәwащ гәрәке һöрмәт бә, wи чахи тö гәрәке чʹарәке бьки. Бь рʹасти жи, һәрге тьштәк кö тәрʹа qимәт ә хьраб буйә, тöйе әʹсәйи щәфе бькʹьшини у әwи тьшти чеки у тʹәзә ки. Дь кʹьтеба Пирозда те готьне: «Хани бь занийари те ава кьрьн у бь аqьл те зәхьмандьн. У бь сайа занйарийе одәйен wе у бь һәр щурәйи кʹутален бь qимәт у хwәшьк вә тʹьжи дьбьн» (Мәтʹәлок 24:3, 4). Wәрә әм пебьһʹәсьн, кö чаwа дькарьн әван хәбәра дь малбәтеда бьдьнә хәбате.

21. Чаwа әм дькарьн зәwаща хwә qәwи кьн? (Бьньһерʹә öса жи чаргоше  «Әз Ча Дькарьм Зәwаща Хwә һе Бәхтәwар Кьм»)

²¹ Һʹьзкьрьна дьлпʹаки, баwәрийа qәwи у хwәдехофи,  әw һәнә тьштен «бь qимәт у хwәшьк» йед кö малбәте бәхтәwар у бәдәw дькьн (Мәтʹәлок 15:16,17; 1 Пәтрус1:7). Бь аликʹарийа wан һʹöнöра зәwащ qәwи дьбә. Дина хwә бьдә гьлийе жь мәтʹәлок кö жоре ньвисар ә. Чаwа хани бь тьштед qимәт те тʹьжәкьрьне? Бь аликʹарийа занийарийе. Занийарийед жь Кʹьтеба Пироз дькарьн ньһерʹандьна мәрийа бьгöһезьн у һелан кьн кö һʹьзкьрьна хwәйә һьндава һәв qәwи кьн (Рʹомайи 12:2; Филипи 1:9). Чахе мер у жьн тʹәвайи рʹезед Кʹьтеба Пироз леколин дькьн, рʹеза йа һәр рʹожи дьхуньн, öса жи чахе жь «Бьрща Qәрәwьлийе» йан жь «Һʹьшйар бьн» готаред öса дьхуньн йед кö бона малбәте нә, әwана бь симболик тьштед бәдәw бона хәмьландьна мала хwә дьгәрʹьн. Ле чахе әwана wан ширәта дьдьнә хәбате, әw те һʹәсабе кö әwана wан тьштед бәдәw тиньнә мала хwә. Бь ве йәке әw һʹьзкьрьна кö бәре мала wә бәдәw дькьр, дькарә диса wәгәрʹә.

22. Һәрге әм жь алийе хwәва һʹәму тьшти бькьн, әме чь кʹаре бьстиньн?

²² Сәва кö һʹәму тьштед бона хәмьландьне дь маледа щи wар кьн, лазьм ә qәwате бьдьнә хәбате. Ле һәрге әм жь алийе хwәва һʹәму тьшти дькьн әме шабуне бьстиньн. Чьмки бь wе йәке әм ширәтәкә жь Кʹьтеба Пироз дьqәдиньн, йе кö дьбежә: «Qәдьркьрьнеда жь һәвдö дәрбазтьр бьн» (Рʹомайи 12:10; Зәбур 147:11). Ле һе фәрз әw ә, кö чахе тö дьхәбьти wәки зәwаща тә бе һöрмәткьрьне, бь wе йәке тö дь һʹьзкьрьна Хwәдеда дьмини.