1, 2. Kihsen siyuck fuhkah se kuht ac fah topuk uh, ac efuh?

YAC kom pahyuck tari? Fin ahok, yac kom insewowo ke moul in pahyuck lom an kuh oasr ma upac ma kom puhla kac? Yac inmahsrlom ac mukul tuhmom kuh muhtwacn kiyom an tilac arlac fototo nuh sie? Yac kom kwacfeacng na in weluhl tuhsruhktuh kom tiac engankihn moul in pahyuck lom an? Fin ohingacn, sahp kom ahsor lah fototo wo se inmahsrlomtacl meet ah wacngihnlac. In oacna sie mwet Christian, kahlwem lah kom luhngse moul in pahyuck lom an in sang wolacna n”uh sin Jeova God suc kom luhngse. Ke srihpac se inge, moul se ma kom oasr kac ke pacl inge uh sahp mwe elyah se nuh sum ac ma inge sahp ahkahsorye kom. Fin ohingacn, nuhnak muhnahs nikmet nuhnkuh muh wacngihnlac finsrak lom.

² Ke pacl inge, oasr siacnyacn puhs ma meet tiac arlacna engankihn moul in pahyuck laltahl uh. Tuhsruhktuh, eltahl konwacack sie inkacnek in ahkkweye inmahsrloltahl. Kom kuh pac in insewowokihn moul in pahyuck lom an. Fuhkah?

3, 4. Siacnyacn se fin kwacfeacng in fototoyang nuh sin God, ma inge ac oruh fuhkah eltahl in fototoeni nuh sie? Sang sie mwe puhpuhlyuck an.

³ Kom ac mukul tuhmom kuh muhtwacn kiyom an ac  kuh in fototoeni nuh sie komtacl fin suk in fototo nuh sin God. Efuh? Nuhnkuh ke kahs in puhpuhlyuck se inge: Srihke petsacelah soko finohl ma kohsrohsroh fac ah. Oasr sie mukul suc tu ten ke lacyen lacsac ke finohl soko ingacn ac sie muhtwacn suc tu ten ke lacyen lacyot an. Eltahl kewana srihke in fanuhkyac finohl soko ingacn. Ke pacl se ma eltahl srackna oasr ke pe ohl sacn, srackna loes inmahsrloltahl. Tuhsruhktuh, ke kais sie seltahl kwacfeacng in fan nuh lucng in sun fin tohktohk an, inmahsrloltahl ac kais kuhtuh na fototoeni. Yac kom kahlwem ke mwe lutlut na yohk srihpac se ke mwe puhpuhlyuck se inge?

⁴ Kwacfeacng lom in kuhlwacnsuhpuh Jeova ke kuhiyom kewa ac kuh in luhmweyuck nuh ke kwacfeacng lom in fanuhkyac finohl soko ingacn. Ke kahs in puhpuhlyuck, ke srihpen kom luhngse Jeova kom muhtwacwacack in sang kuhiyom kewa in fan. Fin kom ac mukul tuhmom kuh muhtwacn kiyom an tiac fototo nuh sie, ma inge ac oacpacna ke sie tu ke sie lacyen an ac sie pac tu ke lacyen se sahyac an ac kewana srihke in fanuhkyac finohl soko ingacn. Meac ac sikyak komtacl fin tahfwelah na in fan? Pwacye lah ac arlacna loes inmahsrlomtacl ke muhtwacwackiyac an. Tuhsruhktuh, ke pacl se komtacl kwacfeacng in fan nuh lucng, kalmac pa komtacl kwacfeacng in fototoyang nuh sin God, kom ac mukul tuhmom kuh muhtwacn kiyom an ac fah oacyacpac fototoeni nuh sie. Ahok, fototo lom nuh sin God uh pa ac ahkfototoye kom nuh sin mukul tuhmom kuh muhtwacn kiyom an. Tuhsruhktuh, kom ac oruh fuhkah ma inge?

5. (a) Piyac sie inkacnek ma sie mwet el kuh in fototoyang nuh sin Jeova ac nuh sin mukul tuhmwacl kuh muhtwacn kiyacl uh? (b) Meac nuhnak luhn Jeova ke macruht uh?

⁵ Sie inkacnek na yohk ma kom kuh in fototoyang nuh sin mukul tuhmom kuh muhtwacn kiyom an kac uh pa ke  komtacl kewana lohacng ahkwoyac ac ahkos kahs in kahsruh nuh ke moul in pahyuck ma oasr ke Kahs luhn God uh. (Psalm 25:4; Isaiah 48:17, 18) Ke srihpac se inge, nuhnkuh ke sie kahs in kahsruh ma mwet sap Paul el tuh ahkkahlwemye. El fahk: “Pahyuck uh enenuh in suhnakihnyuck sin mwet nuhkewa.” (Hebrew 13:4) Meac kalmen ma inge? Kahs se inge “suhnakihnyuck,” ahkkahlwemye lah ma sacn arlacna sacohk. Ac pa inge nuhnak luhn Jeova ke macruht uh, el arlacna ahksacohkye.

6. Meac kahs in kahsruh lal Paul ke macruht uh ahkkahlwemye, ac efuh kuh yohk srihpac in esamyuck ma inge?

⁶ Ke srihpen kom ac mukul tuhmom kuh muhtwacn kiyom an kuhlwacnsuhpuh Jeova, komtacl etuh tari lah macruht uh sie ma na sacohk ma tuhkuh sel me. Jeova el sifacna oakiyac oakwuck in macruht uh. (Riti Matthew 19:4-6.) Tuhsruhktuh, kom fin puhla ma upac ke moul in pahyuck lom an ke pacl inge, sahp etuh lom in suhnakihn moul in pahyuck uh suhfal in mokle kom kuh komtacl kewa in ahkkahlwemye luhngse ac suhnak nuh sin sie sin sie. Pwacnacng, meac ac kuh in mokle kom in ahkkahlwemye ma inge? Paul el tiac fahk muhkwena ma el akihlen uh, a el kwacfe: “Pahyuck uh enenuh in suhnakihnyuck sin mwet nuhkewa” kuh in liyeyuck oacna sie ma enenuh in ahkkahlwemyeyuck suhnak nuh kac. * Kom fin esam na kahs in kwacfe lal Paul inge, sahp ma inge ac kuh in kahsre kom in konwacack inkacnek ma ac kuh in ahkwoye inmahsrlom nuh sin mukul tuhmom kuh muhtwacn kiyom an. Efuh kuh in ohinge?

7. (a) Masap fuhkah in Bible kuht ahkos uh, ac efuh kuh kuht ahkos? (b) Ma wo fuhkah tuhkuh ke kuht ahkos uh?

 ⁷ Nuhnkuh pac ke nuhnak lom nuh ke kuhtuh pac masap in Bible, oacna ke sapkihnyuck nuh sesr in orek mwet tuhma lutlut ac in wi ke miting. (Matthew 28:19; Hebrew 10:24, 25) Pwacye, kuhtuh pacl uh upac in oruh ma sapkihnyuck nuh sesr inge. Mwet suc kom som luti nuh se uh sahp, tiac top ke inkacnek wo kuh sahp ke pacl se kom som liki yen in orekma lom an kom tohtohlah tari ac ma ingacn oruh upac nuh sum in som nuh ke toeni uh. Finne ohinge, kom srackna fahkwack pweng ke Tohkohsrahi uh ac tahfwelah na in wi ke toeni nuhkewa. Wacngihn sie mwet suc kuh in tulokihnkowi. Tiac pac Satan! Efuh?  Mweyen luhngse pwacye lom nuh sin Jeova uh mokle kom in ahkos masap lal uh. (Sie John 5:3) Ma wo fuhkah ac kuh in tuhkuh kac? Ke kom wi ke orekma in luti uh ac ke toeni nuhkewa, ma inge usot inse mislac ac engan yohk ke srihpen kom etuh lah kom oruh ma luhngse luhn God uh. Ac kain in puhlakihn inge ac kuh in ahkkweye kom. (Nehemiah 8:10) Mwe lutlut fuhkah se kuht lotwelah uh?

8, 9. (a) Meac ac kuh in mokle kuht in ahkos kahs in kwacfe inge, in suhnakihn moul in pahyuck, ac efuh? (b) Srihpac fuhkah luo kuht ac fah tuni ke pacl inge?

⁸ Luhngse lom nuh sin God uh mokle kom in ahkos masap lal nuh sesr in som fahkwack ac in toeni nuh sie finne ke pacl upac. In oacpacna, luhngse lom nuh sin Jeova uh ac kuh in mokle kom in ahkos kahs in kwacfe lal nuh sesr in Bible ma fahk lah “pahyuck uh enenuh in suhnakihnyuck,” finne ke pacl upac. (Hebrew 13:4; Psalm 18:29; Ecclesiastes 5:4) Kwacfeacng lom in wi ke orekma in luti ac in toeni nuh sie uh oruh kuht in engankihn mwe insewowo pucspucs sin God me. In oacpacna, kwacfeacng lom in suhnakihn moul in pahyuck lom an akihlenyuck ac ahkinsewowoyeyuck sin Jeova.​—Sie Thessalonica 1:3; Hebrew 6:10.

⁹ Pwacnacng, kom ac oruh fuhkah pahyuck lom uh in suhnakihnyuck? Kom enenuh in fahsr liki kuhtwena ohiyac ma ac kuh in kuhnahoslah moul in pahyuck lom an. In wekuhnacng, kom enenuh pac in oruh ma enenweyuck in ahkkweye moul in pahyuck lom an.

10, 11. (a) Ohiyac fuhkah se tiac ahkkahlwemye suhnak nuh ke moul in pahyuck uh? (b) Kihsen siyuck fuhkah se kuht enenuh in siyuck sin mukul tuhmwacsr kuh muhtwacn kiyacsr uh?

¹⁰ Sie muhtwacn lili suc pahyuck, el tuh fahk ke sie pacl ah: “Nga puhruhe nuh sin Jeova ac siyuck elan kahsreyuc  nga in muhtweng.” Ke meac? El ahkuhtweyac: “Mukul tuhmuhk uh kwacna fahk kahs na upac nuh sihk. Sahp tiac kahlwem lah nga ngalyak kac. Tuhsruhktuh, kahs in ahkkuluk lal nuh sihk ke pacl puhs inge, oacna ke el ac fahk, ‘Kom oruh upac moul luhk uh!’ ac ‘Wacngihn srihpom!’ Kain in kahs inge arlacna luhseyuclac.” Muhtwacn pahyuck se inge el ahkkahlwemye ke sie ma na upac luhn mwet pahyuck uh, pa ke kahs na upac.

¹¹ Mwe ahsor se ke pacl ma siacnyacn uh ekihn mwet Christian a eltahl fahk kahs na upac nuh sin sie sin sie ma ac ahkngalye puhlakihn luhn mwet se sahyac an! Kahs upac uh tiac fihsracsr in muhlkihnyucklac. Arlacna kahlwem lah mwet pahyuck suc orekmakihn kahs in ahkngal inge tiac suhnakihn moul in pahyuck laltahl uh. Fuhkah moul in pahyuck lom an ke ip se inge? Sie inkacnek ma kom ac kuh in konwacack uh pa kom in ahkkahlwemye inse puhsisacl ac siyuck sin mukul tuhmom kuh muhtwacn kiyom an, “Meac puhlakihn lom ke kahs luhk nuh sum uh?” Mukul tuhmom kuh muhtwacn kiyom an fin puhla muh kahs lom an ahkngalye puhlakihn lal an ke pacl puhs, kom enenuh in kwacfeacng in ekuhllah ohiyac ingacn.​—Galatia 5:15; riti Ephesus 4:31.

12. Ke inkacnek fuhkah ma alu luhn sie mwet ac kuh in wacngihn srihpac ye muhtuhn God?

¹² Nik kom muhlkuhnlah lah inkacnek in sramsram lom nuh sin mukul tuhmom kuh muhtwacn kiyom an kuhpahsr nuh ke fototo lom nuh sin Jeova uh. Bible uh fahk: “Yac oasr mwet nuhnkuh muh el ahkfalye oakwuck luhn alu uh? El fin tiac karihngihn lohuhl, ac wacngihn srihpen alu lal ac el sifacna kiacpwellah.” (James 1:26) Ma kom fahk uh kuhpahsr nuh ke alu lom uh. Bible uh fahk lah God el tiac insewowo sin mwet suc nuhnkuh muh el fin kuhlwacnsuhpuh God, na ma kuluk ma sikyak ke lohm sel uh tiac arlac yohk srihpac. Nuhnak muhnahs  nik kom kiyacpwe kom sifacna. Ma inge arlacna yohk srihpac. (Riti Sie Peter 3:7.) Sahp, oasr ma kom arlacna suhmaht kac ac kom moniyuck. Tuhsruhktuh kom fin tahfwelah na in ahkngalye mukul tuhmom kuh muhtwacn kiyom an ke kahs fakfuck, ma inge oacpacna kom in tiac suhnakihn moul in pahyuck uh, ac alu lom nuh sin God uh wacngihn srihpac.

13. Inkacnek fuhkah sahyac ma sie mukul pahyuck kuh muhtwacn pahyuck el ac kuh in ahkngalye puhlakihn luhn mwet se sahyac an?

¹³ Siacnyacn uh enenuh in oacyacpac taran eltahl in tiac ahkngalye puhlakihn luhn mwet se sahyac an ke kuhtwena inkacnek sahyac. Nuhnkuh ke mwe puhpuhlyuck luo inge: Sie muhtwacn lolacp suc oasr tari tuhlihk nahtuh el kwacna pahngon mukul lili se suc pahyuck tari in eis kahs in kahsruh sel, ac kwacna paht sramsram laltahl uh. Ke kais sie wik, yohk pacl ma sie mukul lili lolacp el wi sie muhtwacn lili suc pahyuck tari ke orekma in luti uh. Sahp, kais sie mwet pahyuck ma sramsramkihnyuck ke puhpuhlyuck luo inge eltahl tiac nuhnkuh muh oasr ma kuluk ke ma inge. Tuhsruhktuh, orekma laltahl uh ac ahkkulukye fuhkah mwet se ma eltahl pahyuck nuh se uh? Sie muhtwacn pahyuck ma tuh sun kain in ohiyac se inge el fahk: “Nga arlacna ahsor ke nga akihlen lah mukul tuhmuhk uh sang pacl yohk lal ac lohacng nuh sin sie pacna muhtwacn lili ke congregation uh. Ma inge oruh nga in puhla muh wacngihn srihpuck.”

14. (a) Ke Genesis 2:24, ma yohk srihpac fuhkah se ahkkahlwemyeyuck ke moul in pahyuck uh? (b) Meac kuht enenuh in siyuck sesr sifacna uh?

¹⁴ Kahlwem lah ohiyac se inge ahkngalye muhtwacn se inge ac kuhtuh pac mwet sahyac suc sun ma inge ke moul in pahyuck laltahl uh. Ma inge sikyak ke srihpen mukul kuh muhtwacn pahyuck se pihlesruh kahs in luti luhn God inge: “Sie mukul el som liki pahpah tuhmwacl ac  ninac kiyacl, ac fulyang nuh sin muhtwacn kiyacl.” (Genesis 2:24) Ahok, mwet pahyuck uh srackna enenuh in suhnakihn pahpah tuhmwacltahl ac ninac kiyacltahl uh. Tuhsruhktuh, oakwuck luhn God uh pa eltahl in lohacng meet nuh ke mwe enenuh luhn mukul tuhmwacltahl kuh muhtwacn kiyacltahl uh. In oacpacna, mwet Christian uh luhngse na pwacye mwet lili wiyacltahl uh, tuhsruhktuh mwet se suc eltahl enenuh in lohacng nuh se emeet uh pa mukul tuhmwacltahl kuh muhtwacn kiyacltahl uh. Pwacnacng, ke pacl se sie mwet pahyuck el sang pacl yohk lal kuh arlacna fototoyang nuh sin sie mwet lili wiyacl suc el tiac pahyuck nuh se, ma inge ahkkulukye moul in pahyuck lal uh. Yac pa inge srihpac ma sahp ahkkulukye moul in pahyuck lom an? Siyuck sum sifacna, ‘Yac nga sang na pwacye pacl luhk, lohacng luhk ac luhngse yohk luhk nuh sin mukul tuhmuhk kuh muhtwacn kiyuck uh?

15. In fal nuh ke Matthew 5:28, efuh kuh mwet lili suc pahyuck tari uh enenuh in tiac arlacna fototoyang nuh sin sie mwet suc eltahl tiac pahyuck nuh se?

¹⁵ Yohk liki na ma inge, mwet pahyuck suc fototoyang nuh sin mwet suc eltahl tiac pahyuck nuh se uh sun mwe sensen yohk. Mwe ahsor se in fahk lah kuhtuh sin mwet lili suc pahyuck tari eltahl muhtwacwacack in luhngse mwet sahyac ke srihpen eltahl arlacna fototoyang nuh seltahl. (Matthew 5:28) Ke srihpac se inge, puhlakihn laltahl nuh sin mwet suc eltahl fototoyang nuh se inge kol nuh ke kain in orekma ma ahluhkwelah ohiyac ma tiac ahkkahlwemye suhnak nuh ke moul in pahyuck uh. Nuhnkuh ke ma mwet sap Paul el fahk ke ip se inge.

16. Masap fuhkah se Paul el ahkkahlwemye ke mwet pahyuck uh?

¹⁶ Tukun na Paul el fahk kahs inge, “pahyuck uh enenuh in suhnakihnyuck,” el oacyacpac fahk kahs in sensen  inge, “mwet pahyuck uh enenuh in inse pwacye nuh sin sie sin sie. God el fah nuhnuhnkaclos nuhkewa suc moul in elahn kosro” (Hebrew 13:4) Pacl sefanna ma mwet luo kuh in tuhkweni oan uh pa ke pacl se eltahl pahyuckyak uh. Ke srihpac se inge, mwet Christian uh ahkos kahs luhn God inge: “Kom in engan sin muhtwacn kiyom.”​—Soakas 5:18.

17. (a) Efuh kuh mwet Christian uh enenuh in tiacna lwelah nuhnak luhn mwet sahyac ke orekma in kosro in kihfaslah nuhnak laltahl uh? (b) Kuht ac ukwe fuhkah mwe srihkasrak ma Job el oakiyac uh?

 ¹⁷ Mwet se fin oan yurin sie mwet suc el tiac pahyuck nuh se, el ahkkahlwemye lah wacngihn na pwacye suhnak lal nuh ke masap luhn God ke ma wo ac ma kuluk. Pwacye, mwet pucspucs ke pacl inge eltahl nuhnkuh muh wacngihn na ma kuluk ke orekma in kosro uh. Tuhsruhktuh, ma mwet sahyac uh nuhnkuh ke orekma in kosro uh enenuh in tiacna kihfaslah nuhnak luhn sie mwet Christian kac. Eltahl ac fah akihlen ke sahflahiyac uh lah tiac mwet, a “God el fah nuhnuhnkaclos nuhkewa suc moul in elahn kosro.” (Hebrew 10:31; 12:29) Mwet Christian pwacye uh tu na kuh ke puhlakihn luhn Jeova ke ip se inge. (Riti Rome 12:9.) Esam ma Job el fahk inge: “Nga oraclah tari sie wuhlelah na kuh. In tiac ngwetngwet in mwel nuh sin sie muhtwacn fuhsr.” (Job 31:1) Ahok, mwet Christian pwacye uh karihngihn muhtahltahl ke ma eltahl liye uh. Eltahl tiac pac ngwetngwet in mwel nuh sin kuhtwena mwet suc eltahl tiac pahyuck nuh se tuh eltahl in fahsr liki inkacnek nuhkewa ma ac kuh in kol nuh ke orekma in kosro.​—Liye ke Kuhtuh Pac Mwe Ahkuhtweyac ke mwe lutlut se inge “Ma Bible uh Ahkkahlwemye ke Divorce ac Fahsrelihk.”

18. (a) Meac nuhnak luhn Jeova ke orekma in kosro uh? (b) Meac oacna sie ke orekma in kosro ac alu nuh ke ma sruhloaclah uh?

¹⁸ Meac nuhnak luhn Jeova ke orekma in kosro uh? Masap ma ituckyang nuh sel Moses ac kuh in kahsre kuht in kahlwem na pwacye ke puhlakihn luhn Jeova kac uh. Misac pa mwe kai ma ituckyang nuh sin sie mwet Israel suc oruh orekma in kosro kuh alu nuh ke ma sruhloaclah. (Leviticus 20:2, 10) Yac kom kuh in liye lah meac oacna sie ke orekma kuluk luo inge? Srihke nuhnkuh kac ohinge, sie mwet Israel suc alu nuh ke ma sruhloaclah el kuhnahoslah wuhlelah lal nuh sin Jeova. In oacna, sie mwet Israel suc oruh orekma in kosro el kuhnahoslah  wuhlelah lal nuh sin mukul tuhmwacl kuh muhtwacn kiyacl. Kewana mwet luo inge orek kuhtasrihk. (Exodus 19:5, 6; Deuteronomy 5:9; riti Malachi 2:14.) Ke srihpac se inge, eltahl kewa sruhngacyuck ye muhtuhn Jeova, suc sie God oaru ma kuh in luhlahlfongiyuck.​—Psalm 33:4.

19. Meac ac kuh in ahkkweye sulaclah luhn sie mwet in tiacna oruh orekma in kosro, ac efuh?

¹⁹ Pwacye lah mwet Christian uh tiac oan ye Masap lal Moses ac ke pacl inge. Tuhsruhktuh, mwet Christian se fin esam lah orekma in kosro uh sie orekma na kuluk ke pacl luhn mwet Israel meet ah, ma inge ac kuh in ahkkweye kwacfeacng lal in tiac oruh orekma kuluk se inge. Efuh? Nuhnkuh ke ma inge: Yac oasr pacl se kom ac muh sihkuckmuhtuhntei ac puhruhe nuh sin sie ma sruhloaclah ah? Sahp kom nuhnkuh, ‘Wacngihn sie pacl!’ Yac kom ac kuh in insese in oruh fin ituckot sie luhpah na luhlahp ke mani? Sahp kom ac tiac tahfuh luo in topuk, ‘Nga tiacna kuh in oruh!’ Ahok, sie mwet Christian el ac tiac kuh in tahfonglac in oruh kain in orekma kuhtasrihk inge nuh sin Jeova ac in alu nuh ke sie ma sruhloaclah ah. Ke inkacnek se pacna inge, mwet Christian uh enenuh in koase kuhtwena nuhnak ma lain kuh ahkkahlwemye kuhtasrihk nuh sin Jeova suc God laltahl ac oacyacpac nuh sin mukul tuhmwacltahl kuh muhtwacn kiyacltahl uh ke pacl ma eltahl wi mwet sahyac. Eltahl ac tiac oruh ma inge finne oasr kuhtwena ma  wo kuh mwe engan ma eltahl puhla ke orekma in kosro. (Psalm 51:1, 4; Colossae 3:5) Wacngihn sie pacl kuht luhngse in oraclah sie ma kuluk ma ac oruh Satan elan engan ac ahkmwekihnye Jeova wi oakwuck na sacohk se ke macruht inge.

20. Meac sikyak ke kuhtuh moul in pahyuck uh? Sang sie mwe puhpuhlyuck an.

²⁰ Sahyen kwacfeacng lom in fahsr liki kuhtwena ohiyac ma tiac suhnakihn moul in pahyuck lom an, meac kuhtuh pac ma kom ac kuh in oruh in sifwil ahkkweye suhnak lom nuh sin mukul tuhmom kuh muhtwacn kiyom an? In sang tohpohklah, srihke luhmahlah oakwuck ke pahyuck se nuh ke sie lohm. Tok, nuhnkuh ke kahs kuhlwacng, orekma wo, ac kuhtuh pac ma sahyac ma siacnyacn uh oruh in ahkinsewowoye mukul tuhmwacltahl kuh muhtwacn kiyacltahl uh. Ma inge kewa oacna mwe yucn nuh ke lohm se in ahkkahtoye. Komtacl fin fototo nuh sie, moul in pahyuck lomtacl an ahkkahlwemye sie lohm ma yucnlac ke kain in tuhn. Fin luhngse lomtacl an wacngihnlac, mwe yucn ingacn ac kais kuhtuh na wacngihnlac ac ma luhlah an pa sie moul in pahyuck ma oacna sie lohm ma tiac yucnlac wo. Ke srihpen kom luhngse in ahkos masap luhn God inge “pahyuck uh enenuh in suhnakihnyuck sin mwet nuhkewa,” ma inge ac mokle kom in ahkwoye ohiyac ma kom oasr kac an. Sahyen ma inge, fin ma inge sacohk nuh sesr, kuht ac suk in ahkwoye. Kom ac oruh fuhkah? Kahs luhn God uh fahk: “Lohm uh muhsahiyuck fin pwelucng luhn lahlmwetmwet ac etwacack. Acn ma oasr etwacack we, infuckihl uh yucnlac ke ma sacohk ac oaskuhlacna.” (Soakas 24:3, 4) Nuhnkuh lah kahs inge ac orekmakihnyuck fuhkah nuh ke pahyuck uh.

21. Kuht ac ahkkweye fuhkah moul in pahyuck lasr uh? (Liye pac pohk se inge “ Nga ac Ahkwoye Fuhkah Moul in Pahyuck Luhk uh?”)

 ²¹ Inmahsrlon “ma sacohk” ma kuh in ahkenganye sie sucu, oasr pac ohiyac wo inge oacna luhngse pwacye, sahngweng sin God ac sie luhlahlfongi na kuh. (Soakas 15:16, 17; Sie Peter 1:7) Ma inge oraclah sie moul in pahyuck na kuh. Tuhsruhktuh, yac kom akihlen lah nwacnwaclah fuhkah infuckihl se ma sramsramkihnyuck ke fuhs se lucng inge ke ma sacohk? Pa ke “etwacack.” Ahok, ke pacl ma orekmakihnyuck etwacack ke Bible uh, ma inge oasr kuh kac in ekuhllah nuhnak luhn mwet uh ac mokleltahl in sifwil ahkkweye luhngse laltahl nuh sin sie sin sie. (Rome 12:2; Philippi 1:9) Ke srihpac se inge, pacl nuhkewa ma kom ac mukul tuhmom kuh muhtwacn kiyom an tuhkweni muhta ac sramsramkihn sie fuhs in Bible ma kuhpahsr nuh ke moul in pahyuck, oacna daily text, kuh mwe lutlut ke Tower in San kuh Awake!, ma inge ac oacpacna kom in tuni inkacnek ma kom kuh in ahkkahtoye lohm se sum. Ke luhngse lom nuh sin Jeova uh mokle kom in orekmakihn kahs in kahsruh ma komtacl tuhkweni liye inge, ma inge ac oacpacna kom in usack mwe yucn ingacn nuh ke “infuckihl” ke lohm sum an. Ke sahflahiyac uh, kuhtuh ma wo ma kom engankihn ke moul in pahyuck lom an meet ah ac sifwil fohlohk.

22. Mwe insewowo fuhkah se kuht ac kuh in puhla kuht fin kwacfeacng in oruh ma kunacsr in ahkkweye moul in pahyuck lasr uh?

²² Sahp kom ac enenuh pacl ac kwacfeacng yohk in fohlohkuhnack mwe yucn inge nuh ke acn ma oan we an. Tuhsruhktuh, kom fin kwacfeacng in oruh ip kunom kac an, kom ac arlacna engan lah kom ahkos masap se luhn Bible inge: “Kowos in engan ac ahkfuhlwactye sie sin sie.” (Rome 12:10; Psalm 147:11) Yohk liki nuhkewa, kwacfeacng yohk lom in suhnakihn moul in pahyuck lom an ac oruh kom in muhtana in luhngse luhn God uh.