1, 2. Us kwɛstyɔn wi go tɔk bɔt, ɛn wetin mek?

YU DƆN mared? If yu ansa na yɛs, yu de ɛnjɔy yu mared, ɔ yu de gɛt siriɔs prɔblɛm dɛn na yu mared-os? Yu ɛn yu man ɔ yu wɛf nɔ de du tin togɛda lɛk aw una bin de du trade? Yu nɔ de ɛnjɔy yu mared bɔt yu jɔs de bia? If na so yu mared de, yu go mɔs dɔn de fil bad bikɔs una nɔ de ɛnjɔy una mared lɛk aw una bin de ɛnjɔy am trade. Yu na Kristian we lɛk Jiova, so yu go mɔs want mek yu mared briŋ ɔna to Jiova. Bɔt di we aw yu mared de naw go mɔs mek yu de wɔri ɛn gɛt pwɛl at. Duya, ilɛksɛf na so i bi, nɔ tink se natin nɔ de fɔ du igen bɔt yu mared.

² Tide, Kristian dɛn de we de rili ɛnjɔy dɛn mared, bɔt trade dɛn nɔ bin de ɛnjɔy am, dɛn bin jɔs de bia. Bɔt dɛn bin fɛn we fɔ mek dɛn bigin ɛnjɔy dɛn mared. Yusɛf go ebul fɔ ɛnjɔy yu mared. Aw yu go ebul du dat?

3, 4. Wetin mek mared pipul dɛn go ebul kam nia dɛnsɛf if dɛn de tray fɔ go nia Gɔd? Gi ɛgzampul.

³ Yu ɛn di pɔsin we yu mared go ebul kam nia unasɛf if una de tray fɔ kam nia Gɔd. Wetin mek wi se so? Tink bɔt dis ɛgzampul: Lɛ wi tɔk bɔt wan ay mawnten we big dɔŋ ɛn smɔl ɔp. Wan man tinap dɔŋ di mawnten bay di lɛft-an say, ɛn wan uman tinap dɔŋ di mawnten bay di  rayt-an say. Dɛn ɔl tu bigin fɔ klem di mawnten. We dɛn bin de dɔŋ di mawnten, dɛn bin de fa frɔm dɛnsɛf. Bɔt as dɛn de klem di mawnten na so dɛn de kam nia dɛnsɛf smɔl smɔl. Yu ebul ɔndastand di fayn tin we dis ɛgzampul de tɔk bɔt?

⁴ Di tray we yu de tray fɔ sav Jiova jɔs tan lɛk di tray we pɔsin kin tray fɔ klem mawnten. Ɛnti yu na pɔsin we lɛk Jiova, yu go mɔs dɔn de tray tranga wan fɔ du wetin i want. If yu ɛn yu man ɔ yu wɛf nɔ de du tin togɛda lɛk aw una bin de du tin trade, i tan lɛk se una de difrɛn say na di mawnten. Bɔt wetin go apin if una kɔntinyu fɔ klem? We una bin bigin, una bin de fa frɔm unasɛf. Bɔt di mɔ we una de tray fɔ klem di mawnten na di mɔ  una go de kam nia unasɛf. Semweso, di mɔ we una de tray fɔ kam nia Gɔd na di mɔ una go de kam nia unasɛf. Di men tin we go mek mared pipul dɛn kam nia dɛnsɛf na we dɛn de tray fɔ go nia Gɔd. Bɔt aw dɛn go ebul du dat?

5. (a) Wetin na wan impɔtant we aw mared pipul dɛn go ebul kam nia dɛnsɛf ɛn Jiova? (b) Aw Jiova de si mared?

⁵ Wan impɔtant we aw mared pipul go ebul kam nia Jiova, na we dɛn du wetin i tɛl dɛn fɔ du. (Sam 25:4; Ayzaya 48:17, 18) Tink bɔt wan tin we di apɔsul Pɔl bin tɔk. I bin se: “Mek ɔlman rɛspɛkt mared layf.” (Di Ibru Pipul Dɛn 13:4) Wetin di apɔsul Pɔl bin min? We di Baybul yuz di wɔd “rɛspɛkt” i min sɔntin we gɛt valyu. Ɛn na so Jiova insɛf de si mared. I valyu am bad bad wan.

6. Aw di vas dɛn we de na Di Ibru Pipul Dɛn 13:1-5 ɛp wi fɔ no wetin Pɔl bin de tɔk bɔt? Wetin mek i impɔtant fɔ de mɛmba dat?

⁶ Wans yu ɛn yu man ɔ wɛf de sav Gɔd, una go mɔs no se mared na tin we gɛt valyu ɛn i oli. Na Jiova insɛf sɛf mek mared. (Rid Matyu 19:​4-6.) Bɔt if una de gɛt siriɔs prɔblɛm na una mared-os, nɔto di no nɔmɔ we una no se mared valyu na Gɔd in yay go ɛp una fɔ trit unasɛf wit lɔv ɛn rɛspɛkt. Wetin naw go ɛp una? Fɔ no di ansa, na fɔ tink gud wan bɔt wetin di apɔsul Pɔl bin tɔk bɔt mared. I nɔ bin tɔk se “mared na tin we gɛt rɛspɛkt”; i bin se “lɛ ɔlman rɛspɛkt mared.” Di tin we Pɔl tɔk sho se i nɔ bin jɔs de luk wetin de apin insay mared, bɔt i bin de ɛnkɔrej in brɔda dɛn fɔ rɛspɛkt mared. * So dis tin we Pɔl tɔk go ɛp  yu fɔ gɛt di lɔv ɛn rɛspɛkt we yu bin gɛt fɔ di pɔsin we yu mared to. Wetin mek wi se so?

7. (a) Wetin di Baybul tɛl wi fɔ du, we wi kin du? Wetin mek wi kin du am? (b) Us bɛnifit wi kin gɛt we wi obe Jiova?

⁷ Tink bɔt aw yu kin tek di ɔda tin dɛn we di Baybul tɛl wi fɔ du, lɛk fɔ prich ɛn fɔ go mitin. (Matyu 28:19; Di Ibru Pipul Dɛn 10:24, 25) Na tru se i nɔ kin izi fɔ du dɛn tin ya. Sɔntɛnde, di pipul dɛn we wi kin prich to nɔ kin want fɔ lisin, ɔ di wok we wi de du kin mek wi taya, so i nɔ kin izi fɔ go mitin. Bɔt pan ɔl dat, yu stil de prich bɔt di Kiŋdɔm, ɛn yu stil de go di mitin dɛn. Nɔbɔdi nɔ ebul stɔp yu, ivin Setan sɛf nɔ ebul stɔp yu! Wetin mek? Bikɔs di lɛk we yu lɛk Jiova wit ɔl yu at go ɛp yu fɔ obe in lɔ dɛn. (Jɔn In Fɔs Lɛta 5:3) Us bɛnifit dis de gi yu? We yu de prich ɛn go mitin, de mek yu gɛt kolat ɛn gladi at bikɔs yu no se yu de du wetin Gɔd want. Ɛn dis go mek yu gɛt mɔ trɛnk fɔ du wetin Gɔd want. (Nɛimaya 8:10) Us lɛsin wi lan naya?

8, 9. (a) Wetin go ɛp yu fɔ obe di advays fɔ rɛspɛkt yu mared? Wetin mek yu fɔ du dat? (b) Us tu tin dɛn wi de kam tɔk bɔt?

⁸ Jɔs lɛk aw di lɛk we yu lɛk Gɔd de mek yu obe in lɔ dɛn, lɛk fɔ prich ɛn fɔ go mitin pan ɔl we i nɔ izi, na so di lɛk we yu lɛk Jiova go mek yu obe in advays we se “mek ɔlman rɛspɛkt mared layf.” Wi want fɔ du dis ilɛksɛf i nɔ izi. (Di Ibru Pipul Dɛn 13:4; Di Sam Dɛm 18:29; Ɛkliziastis 5:4) Mɛmba bak se, jɔs lɛk aw di tray we yu de tray fɔ prich ɛn go di mitin dɛn, de mek Gɔd blɛs yu, na so di tray we yu de tray fɔ sho rɛspɛkt na yu mared go mek Jiova blɛs yu.​—Fɔs Lɛta Fɔ Tɛsalonayka 1:3; Di Ibru Pipul Dɛn 6:10.

⁹ So aw yu go ebul mek rɛspɛkt de na yu mared? Yu fɔ avɔyd tin dɛn we go ambɔg yu mared. Apat frɔm dat, yu fɔ du tin dɛn we go mek yu ɛnjɔy yu mared.

10, 11. (a) Wetin kin mek rɛspɛkt nɔ de na mared? (b) Us kwɛstyɔn yu fɔ aks di pɔsin we yu mared?

¹⁰ Wan mareduman we na Kristian bin tɔk se: “A de pre to Jiova fɔ mek i ɛp mi fɔ bia.” Fɔ bia wetin? Di uman tɔk se: “Yu nɔ go si am na mi bɔdi se a wund, bɔt di wɔd dɛn we mi man kin tɛl mi, kin wund mi at. I kin tɛl mi wɔd dɛn lɛk, ‘Yu na big big lod!’ ɛn ‘Yu yuzlɛs!’ Dis kin mek mi at pwɛl bad bad wan.” Dis uman tɔk bɔt wan bad tin we kin apin insay mared. Wetin na da tin de? Na di bad we aw mared pipul dɛn kin tɔk to dɛnsɛf.

¹¹ I rili sɔri fɔ si Kristian dɛn we dɔn mared de yuz bad bad wɔd pan dɛnsɛf! Dis kin mek dɛn gɛt wund na dɛn at we nɔ izi fɔ wɛl! Ɛni mared we di man ɔ di uman de yuz bad bad wɔd pan in kɔmpin, na mared we rɛspɛkt nɔ de. Na so yu mared tan lɛk? Wan we fɔ no dis na fɔ put yusɛf dɔŋ ɛn aks yu man ɔ yu wɛf dis kwɛstyɔn: “Aw wetin a kin tɔk kin mek yu fil?” If yu man ɔ yu wɛf fil se di we aw yu de tɔk to am de mek i fil bad, na fɔ rɛdi fɔ chenj di we aw yu de tɔk to am.​—Lɛta Fɔ Galeshya 5:15; rid Lɛta Fɔ Ɛfisɔs 4:31.

12. Wetin go mek pɔsin in wɔship to Gɔd bi fɔ natin?

¹² Mɛmba se, di we aw yu de tɔk to di pɔsin we yu mared, go mek Jiova gladi ɔ nɔ gladi fɔ yu padi biznɛs wit am. Di Baybul se: “If ɛnibɔdi tink se in de fala Gɔd ɛn i nɔ de tek tɛm wɛn i de tɔk, i de mek insɛf ful. Na fɔ natin di pɔsin de fala Gɔd.” (Jems 1:26) Di we aw yu de tɔk gɛt fɔ du wit di wɔship we yu de wɔship Jiova. Bɔku pipul dɛn kin tink se wetin de apin na dɛn mared-os nɔ impɔtant wans dɛn de sav Gɔd. Bɔt di Baybul nɔ gri wit dat. Duya, nɔ ful yusɛf. Ɛnitin we de apin na yu mared-os na tin we siriɔs. (Rid Pita In Fɔs Lɛta 3:⁠7.) Ilɛksɛf yu na pɔsin we sabi du  bɔku tin ɛn gɛt zil fɔ Gɔd in wok, bɔt if bay wilful yu de yuz bad bad wɔd dɛn pan yu man ɔ yu wɛf, yu dɔn sho se yu nɔ de rɛspɛkt yu mared, ɛn na fɔ natin yu de wɔship Gɔd.

13. Aw pɔsin we mared go du sɔntin we go mek in man ɔ in wɛf fil bad?

¹³ Pipul dɛn we dɔn mared fɔ tek tɛm mek dɛn nɔ du sɔntin we go mek dɛn man ɔ dɛn wɛf fil bad. Lɛ wi tink bɔt tu ɛgzampul dɛn: Di fɔs wan na bɔt wan uman we gɛt pikin bɔt i nɔ gɛt man. Ɔltɛm dis uman de fon wan brɔda we mared, fɔ mek di brɔda advays am, ɛn dɛn kin tɔk fɔ lɔng tɛm. Di ɔda wan na bɔt wan brɔda we nɔ mared. Ɛvri wik, dis brɔda kin spɛn lɔng tɛm na fil savis wit wan sista we mared. Di tu mared pipul dɛn na dɛn ɛgzampul ya nɔ min fɔ du ɛni bad tin. Bɔt aw yu fil se di wan dɛn we dɛn mared to, go fil? Wan mareduman we gɛt dis kayn prɔblɛm bin tɔk se: “A kin fil bad we mi man de spɛn plɛnti tɛm wit ɔda sista na di kɔngrigeshɔn. Dat de mek a fil lɛk se a nɔ impɔtant.”

14. (a) Us impɔtant tin bɔt mared we Jɛnɛsis 2:24 tɔk bɔt? (b) Us kwɛstyɔn wi fɔ aks wisɛf?

¹⁴ Ɔlman no se ɛni maredman ɔ mareduman we gɛt dis kayn prɔblɛm go mɔs fil bad. Di pɔsin we dɛn mared to nɔ de du wan impɔtant tin we Gɔd bin tɔk se mared pipul dɛn fɔ du. I bin se: “Na fɔ dis mek man go lɛf in mama ɛn papa ɛn go de wit in wɛf, ɛn dɛn tu go bi wan.” (Na wi mek am italiks; Jɛnɛsis 2:24) Di wan dɛn we mared fɔ stil rɛspɛkt dɛn mama ɛn papa; bɔt Gɔd want mek dɛn pe mɔ atɛnshɔn pan dɛn man ɔ dɛn wɛf. Semweso, Kristian dɛn lɛk dɛn kɔmpin dɛn; bɔt di pɔsin we dɛn fɔ lɛk mɔ na dɛn man ɔ dɛn wɛf. So we maredman ɔ mareduman de spɛn tumɔs tɛm ɔ yus pasmak wit sɔmbɔdi we nɔto in man ɔ in wɛf, dis de mek prɔblɛm de na di mared. Yu tink se dis na wan pan di tin dɛn we kin kam  wit prɔblɛm na yu mared? Aks yusɛf dis kwɛstyɔn: ‘A kin spɛn bɔku tɛm wit mi man ɔ mi wɛf, a kin kia fɔ am, ɛn sho am se a rili lɛk am?’

15. Wetin Matyu 5:28 tɔk we sho se Kristian we mared nɔ fɔ spɛn tumɔs tɛm wit ɔda pɔsin we nɔto in man ɔ in wɛf?

¹⁵ If maredman de spɛn tumɔs tɛm wit ɔda uman ɔ  mareduman de spɛn tumɔs tɛm wit ɔda man, dɛn de put dɛnsɛf pan denja. I sɔri fɔ no se sɔm Kristian dɛn we dɔn mared kin bigin lɛk di pɔsin we dɛn dɔn yus to pasmak, we nɔto dɛn man ɔ dɛn wɛf. (Matyu 5:28) Dis kin mek dɛn du sɔntin we de sho klia wan se dɛn nɔ gɛt wan rɛspɛkt fɔ mared. Lɛ wi tink bɔt wetin di apɔsul Pɔl bin tɔk bɔt dis.

16. Wetin Pɔl bin tɔk bɔt mared?

¹⁶ Jɔs afta Pɔl dɔn ɛnkɔrej di brɔda dɛn se, “mek ɔlman rɛspɛkt mared layf,” i tɔk bak se: “Di man we mared nɔ fɔ gɛt ɔda uman ɛn di wɛf nɔ fɔ gɛt ɔda man. Una mɛmba se Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman.” (Di Ibru Pipul Dɛn 13:4) Na insay mared nɔmɔ pɔsin fɔ du mami ɛn dadi biznɛs. Na dat mek Kristian dɛn fɔ tek di advays we se: “Yu fɔ liv api wan wit yu wɛf, ɛnjɔy di uman we yu mared wɛn una yɔŋ.”​—Prɔvabs 5:18.

17. (a) Plɛnti pipul fil se i nɔ bad fɔ mek pɔsin we dɔn mared kip ɔda pɔsin, bɔt wetin mek Kristian dɛn nɔ fɔ fala di we aw pipul dɛn de tink? (b) Aw wi go ebul falamakata Job in ɛgzampul?

¹⁷ We maredman ɔ mareduman du mami ɛn dadi biznɛs wit pɔsin we nɔto in man ɔ in wɛf, i de sho se i nɔ gɛt wan rɛspɛkt fɔ Gɔd in lɔ dɛn. Tide, plɛnti pipul fil se i nɔ bad fɔ lɛ pɔsin we dɔn mared du mami ɛn dadi biznɛs wit ɔda pɔsin. Bɔt wi we na Kristian nɔ fɔ fala di we aw pipul dɛn de tink. Wi no se tumara bambay, nɔto mɔtalman go jɔj wi, bɔt na “Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman.” (Di Ibru Pipul Dɛn 10:31; 12:29) So tru Kristian dɛn rɛdi wit ɔl dɛn at fɔ du wetin Gɔd se. (Rid Lɛta Fɔ Rom 12:⁠9.) Mɛmba wetin Job bin tɔk we i se: “Mi ɛn mi yay dɔn mek wanwɔd.” (Job 31:1) Tru Kristian dɛn we dɔn mared fɔ kɔntrol dɛn yay, ɛn  dɛn nɔ fɔ de luk ɔda pɔsin tumɔs we nɔto dɛn man ɔ dɛn wɛf. Dis na di fɔs tin we dɛn fɔ du we go ɛp dɛn nɔ fɔ kip ɔda pɔsin.​—If yu want fɔ no mɔ, na fɔ rid di atikul we tɔk bɔt “Wetin di Baybul Tɔk bɔt Mared Pipul dɛn We De Pat ɔ Dayvɔs?”

18. (a) Aw Jiova de fil we mared pipul dɛn de du mami ɛn dadi biznɛs wit ɔda pɔsin? (b) If pɔsin wɔship aydɔl ɛn ɔda pɔsin we dɔn mared du mami ɛn dadi biznɛs wit ɔda pɔsin, aw di tin we dɛn ɔl tu du, fiba?

¹⁸ Aw Jiova de fil we mared pipul dɛn de du mami ɛn dadi biznɛs wit ɔda pɔsin? Di Lɔ we Gɔd bin gi Mozis go ɛp wi fɔ no aw Jiova de fil bɔt dis. Di tɛm we di Izrɛlayt dɛn bin de, dɛn fɔ kil ɛnibɔdi we wɔship aydɔl ɔ ɛni mared pɔsin we du mami ɛn dadi biznɛs wit ɔda pɔsin. (Lɛvitikɔs 20:2, 10) Aw dɛn tu tin ya fiba? Tink bɔt dis, if pɔsin we na Izrɛlayt wɔship aydɔl, i dɔn pwɛl di agrimɛnt we i bin mek wit Jiova. Semweso, if pɔsin we na Izrɛlayt du mami ɛn dadi biznɛs wit ɔda pɔsin we nɔto in man ɔ in wɛf, i dɔn pwɛl di agrimɛnt we i bin mek wit di pɔsin we i mared to. Dɛn tu pipul ya dɔn du bad bad tin. (Ɛksodɔs 19:5, 6; Ditarɔnɔmi 5:9; rid Malakay 2:14.) So dɛn ɔl tu dɔn gɛt badnem bifo Jiova we na di Gɔd we de kip to in wɔd.​—Di Sam Dɛm 33:4.

19. Wetin go ɛp mared pɔsin fɔ tinap tranga wan nɔ fɔ kip ɔda man ɔ uman? Wetin mek mared pɔsin nɔ fɔ kip ɔda pɔsin?

¹⁹ Kristian dɛn nɔ de ɔnda di Lɔ we Gɔd bin gi Mozis. Bɔt we wi mɛmba se insay di Izrɛlayt dɛn tɛm, na bin siriɔs sin fɔ lɛ mared pɔsin du mami ɛn dadi biznɛs wit ɔda pɔsin, go ɛp wi nɔ fɔ du di sem tin. Wetin mek wi se so? Tink bɔt dis: Yu go ɛva go insay chɔch, nil dɔŋ ɛn pre bifo aydɔl? Yu go se, ‘A nɔ go ɛva du dat!’ Bɔt if dɛn gi yu bɔku bɔku mɔni, yu go du am? Yu go se, ‘Nɔ, a nɔ de ɛva tink bɔt dat sɛf!’ Ɛnibɔdi we na tru Kristian nɔ go want fɔ kɔmɔt biɛn Jiova ɛn wɔship aydɔl, ɛn fɔ mek dɛn tink sɛf bɔt dis kayn tin kin mek dɛn fil bad. Semweso, Kristian dɛn  fɔ fil bad fɔ ivin tink sɛf se dɛn go kɔmɔt biɛn Jiova ɛn di pɔsin we dɛn mared to. Aw pɔsin kin kɔmɔt biɛn Jiova ɛn di pɔsin we i mared to? Na bay we i du mami ɛn dadi biznɛs wit ɔda pɔsin we nɔto in man ɔ in wɛf. So natin nɔ fɔ mek wi du dɛn kayn tin ya. (Sam 51:1, 4; Lɛta Fɔ Kɔlɔse 3:5) Wi nɔ go want fɔ du ɛnitin we go mek Setan gladi, bɔt we go briŋ badnem pan Jiova ɛn wi mared.

20. Wetin dɔn apin to sɔm mared dɛn? Gi ɛgzampul.

²⁰ Wi no se wi fɔ avɔyd ɛnitin we go mek rɛspɛkt nɔ de na wi mared, bɔt us ɔda tin dɛn wi fɔ du we go mek wi rɛspɛkt wi man ɔ wi wɛf lɛk aw wi bin de rɛspɛkt am trade? Fɔ ansa dis kwɛstyɔn, lɛ wi se mared tan lɛk os. Lɛ wi se bak, di fayn fayn wɔd dɛn we mared pipul dɛn kin tɔk to dɛnsɛf, ɛn ɔl di ɔda fayn fayn tin dɛn we dɛn kin du to dɛnsɛf tan lɛk dɛkɔreshɔn we kin mek di os fayn. If una rili lɛk unasɛf, dɛn una mared tan lɛk os we gɛt fayn fayn dɛkɔreshɔn dɛn. Ɛn dis go mek una ɛnjɔy una mared. Bɔt if una nɔ kɔntinyu fɔ lɛk unasɛf, dɛn fayn fayn dɛkɔreshɔn ya nɔ go de na una mared, ɛn una mared go tan lɛk os we nɔ gɛt wan dɛkɔreshɔn. If yu rili want fɔ obe Gɔd in lɔ we se “mek ɔlman rɛspɛkt mared layf,” dat go mek yu du ɔl wetin yu ebul fɔ du fɔ mek yu ɛnjɔy yu mared mɔ. If sɔntin we yu lɛk ɛn valyu pwɛl, yu kin tray fɔ mek am. Bɔt aw yu go ebul du dat? Gɔd in Wɔd tɛl wi se: “Na sɛns pɔsin de yuz fɔ bil os, na sɛns i de yuz fɔ le gud fawndeshɔn. Na sɛns i de yuz fɔ put ɔlkayn dia ɛn fayn dɛkɔreshɔn de.” (Prɔvabs 24:3, 4) Tink bɔt aw yu go ebul du dis insay yu mared.

21. Wetin go ɛp maredman ɛn mareduman fɔ ɛnjɔy dɛn mared mɔ? (Rid di bɔks we se “ Wetin A Go Du fɔ Mek A Ɛnjɔy Mi Mared Mɔ?”)

²¹ Sɔm pan di “fayn ɛn dia” tin dɛn we fɔ de na swit  mared-os, na tru tru lɔv, fɔ fred Gɔd, ɛn fɔ biliv Gɔd tranga wan. (Prɔvabs 15:16, 17; Pita In Fɔs Lɛta 1:7) Dɛn tin ya go mek mared pipul dɛn ɛnjɔy dɛn mared mɔ. Bɔt yu no wetin go ɛp pɔsin fɔ put dɛn fayn ɛn dia tin ya na in mared-os? “Na sɛns” go ɛp di pɔsin. We mared pipul dɛn yuz di sɛns we de na di Baybul, i go mek dɛn ebul chenj di we aw dɛn de tink ɛn mek dɛn lɛk dɛnsɛf lɛk aw dɛn bin lɛk dɛnsɛf fɔs. (Lɛta Fɔ Rom 12:2; Lɛta Fɔ Filipay 1:9) So ɛnitɛm we yu ɛn yu man ɔ yu wɛf rid di Baybul togɛda, di deli tɛks, ɔ di pɔblikeshɔn dɛn we tɔk bɔt mared, i jɔs tan lɛk se una de luk wan fayn dɛkɔreshɔn we go mek una mared-os fayn. Ɛn we di lɛk we yu lɛk Jiova mek yu du wetin yu dɔn lan, na yu mared, i tan lɛk se yu de briŋ da dɛkɔreshɔn de na yu mared-os. Dis go mek una ɛnjɔy una mared lɛk aw una bin de ɛnjɔy am fɔs.

22. Aw wi go fil if wi tray fɔ du ɔl wetin wi ebul fɔ du so dat wi go ɛnjɔy wi mared mɔ?

²² Fɔ tru, i kin tek plɛnti tɛm ɛn wok fɔ put dɛn dɛkɔreshɔn ya bak na yu mared-os. Bɔt we yu tray fɔ du ɔl wetin yu ebul fɔ du, yu go gladi fɔ no se yu de obe wetin di Baybul tɔk, we i se: “Una . . . fɔ rɛspɛkt una kɔmpin.” (Lɛta Fɔ Rom 12:10; Sam 147:11) Apat frɔm ɔl wetin wi dɔn tɔk bɔt, di tray we yu de tray fɔ mek rɛspɛkt de na yu mared go mek Gɔd kɔntinyu fɔ lɛk yu.