အဆၢဒိၣ် ၁၁
မၤလၤကပီၤနဟံၣ်ဃီတက့ၢ်
“ဒီးနကသးခုဒီး နဖိၣ်သၣ်ခွါထီၣ်အမါလီၤ.”—ကတိၤဒိ ၅:၁၈.
၁, ၂. ပကသမံသမိးကွၢ် တၢ်သံကွၢ်မနုၤလဲၣ်. ဒီးလၢမနုၤအဃိလဲၣ်.
မ့ၢ်နအိၣ်ဒီးဟံၣ်ဃီဧါ. မ့မ့ၢ်ဒ်န့ၣ်ဒီး နအိၣ်ဒီးဟံၣ်မုာ်ဃီပၢၤကစီဒီဧါ. မ့တမ့ၢ် နကွၢ်ဆၢၣ်မဲာ်ဘၣ်ဒီး ဒီမိဝၤအဘၢၣ်စၢၤ တၢ်သဘံၣ်ဘူၣ်တဖၣ်ဧါ. နၤဒီးနသးသမူတံၤသကိး အတၢ်ရ့လိာ်သးန့ၣ် စှၤလီၤလံဧါ. နဝံသးစူၤ တၢ်တလီၤပလိာ်တဖၣ်လၢ ဟံၣ်ဃီပူၤသနာ်က့ နတဒိးန့ၢ်ဘၣ် တၢ်သူၣ်ခုသးခုဘၣ်ဧါ. မ့မ့ၢ်ဒ်န့ၣ်ဒီး, နကတူၢ်ဘၣ်တၢ်သးအုးလၢ ဖဲတဘျီခါ နီၢ်ဒီမိဝၤအဘၢၣ်စၢၤ တၢ်အဲၣ်တၢ်ကွံလၢအိၣ်ဘၣ်တ့ၢ်တဖၣ် ခုၣ်လီၤကွံာ်လံအဃိလီၤ. ဒ်ခရံာ်ဖိတဂၤအသိး, နကအဲၣ်ဒိးနီၢ်နီၢ်လၢ နဟံၣ်ဃီန့ၣ် ကမ့ၢ်တၢ်မၤလၤကပီၤယဟိဝၤ, ယွၤလၢနအဲၣ်အီၤလီၤ. လၢတၢ်န့ၣ်အဃိ, နတၢ်အိၣ်သးခဲအံၤတဖၣ်န့ၣ် ကမၤကိၢ်မၤဂီၤနၤဒီး မၤသးအုးနၤဒိၣ်မးလီၤ. ဘၣ်ဆၣ်သနာ်က့, ဝံသးစူၤတဘၣ်ဆိကမိၣ်လၢ နတၢ်အိၣ်သးန့ၣ် တၢ်မုၢ်လၢ်လၢာ်ကွံာ်လံတဂ့ၤ.
၂ မုၢ်မဆါတနံၤအံၤ, ခရံာ်ဖိဒီမိဝၤတနီၤန့ၣ် တဘျီခါအိၣ်ဃုာ်လိာ်သးသနာ်က့ တအိၣ်ဒီးတၢ်ရ့လိာ်သးဂ့ၤဂ့ၤဘၣ်. ခဲအံၤ အဝဲသ့ၣ်ထံၣ်ဘၣ်ဝဲ ကျဲလၢကမၤဂၢၢ်ကျၢၤထီၣ် အဝဲသ့ၣ်အတၢ်ရ့လိာ်သးလီၤ. နၤစ့ၢ်ကီး နဃုထံၣ်န့ၢ် တၢ်သူၣ်မံသးမုာ်အါမးလၢ နဟံၣ်ဃီပူၤသ့လီၤ. လၢကျဲဒ်လဲၣ်.
တၢ်သုးဘူးအါထီၣ်သးဆူ ယွၤ ဒီးနသးသမူတံၤသကိးအအိၣ်
၃, ၄. ပှၤဒီမိဝၤတဖၣ် မ့ၢ်ဂုာ်ကျဲးစၢးသုးဘူးအသးဆူ ယွၤအိၣ်ဒ်သိးသိးန့ၣ် ဘၣ်မနုၤအဃိ အဝဲသ့ၣ်ခံဂၤ ကဘူးလိာ်အသးလဲၣ်. ဟ့ၣ်အဒိတက့ၢ်.
၃ နၤဒီးနသးသမူတံၤသကိး မ့ၢ်ဂုာ်ကျဲးစၢးသုးဘူးအသးဆူယွၤအိၣ်န့ၣ် သုကဘူးလိာ်သုသးလီၤ. လၢမနုၤအဃိလဲၣ်. ဆိကမိၣ်ကွၢ် တၢ်အဒိတမံၤတက့ၢ်. ထံၣ်မှံကွၢ် ကစၢၢ်လၢ အခီၣ်ထံးလဲၢ်ဒီး အခိၣ်စူတလူၢ်တက့ၢ်. ပိာ်ခွါတဂၤဆၢထၢၣ်လၢ ကစၢၢ်ခီၣ်ထံး လၢအံၤတကပၤဒီး ပိာ်မုၣ်တခီဆၢထၢၣ်လၢ အဂၤတကပၤလီၤ. အဝဲသ့ၣ်ခံဂၤ စးထီၣ်, ထီၣ်ဝဲကစၢၢ်လီၤ. ဖဲအိၣ်လၢကစၢၢ်ခီၣ်ထံးအခါ အဝဲသ့ၣ်ယံၤလိာ်အသးဖးယံၤလီၤ. ဘၣ်ဆၣ်, ဒ်တဂၤစုာ်စုာ် ထီၣ်ဝဲဘူးထီၣ်ဆူ ကစၢၢ်ဒီခိၣ်အသိး, အဝဲသ့ၣ်ခံဂၤစ့ၢ်ကီး ဘူးထီၣ်အါထီၣ်လီၤ. နထံၣ်ဘၣ် တၢ်အဒိအံၤအပူၤ တၢ်မၤလိလၢ အလီၤသူၣ်မံသးမုာ်ဧါ.
၄ နတၢ်ဂုာ်ကျဲးစၢးလၢာ်သးလၢ တၢ်ကမၤယဟိဝၤအတၢ်မၤ လၢလၢပှဲၤပှဲၤန့ၣ် နထိၣ်သတြီၤအီၤဒီး တၢ်ဂုာ်ကျဲးစၢးထီၣ်ဆူ ကစၢၢ်ခိၣ်သ့လီၤ. နအဲၣ်ယဟိဝၤအဃိ, ပမ့ၢ်တဲတမံၤန့ၣ် နဂုာ်ကျဲးစၢးထီၣ်တ့ၢ်လံကစၢၢ်လီၤ. ဘၣ်ဆၣ်, နၤဒီးနသးသမူတံၤသကိး မ့ၢ်တဘၣ်လိာ်သးန့ၣ်, မ့ၢ်သုထီၣ်ကစၢၢ်တဂၤတကပၤလီၤ. ဘၣ်ဆၣ်, ဖဲသုထီၣ်ကဒီးကစၢၢ်အခါ တၢ်မနုၤကကဲထီၣ်လဲၣ်. သီသီခါန့ၣ် သုသကိးခံဂၤ သုကစီၤစုၤဖးယံၤညါလီၤ. သနာ်က့, ဒ်နဂုာ်ကျဲးစၢးအါထီၣ်လၢ နကဘူးထီၣ်ဒီးယွၤ—လၢလီၤဂာ်ဒီး တၢ်ကျဲးစၢးထီၣ်ဆူ ကစၢၢ်ဒီခိၣ်အသိး— နကဘူးအါထီၣ်ဒီး နသးသမူတံၤသကိးန့ၣ်လီၤ. မ့ၢ်လီၤ, တၢ်သုးဘူးသးဆူယွၤအအိၣ်န့ၣ် မ့ၢ်တၢ်ဂ့ၢ်မိၢ်ပှၢ်လၢ တၢ်ကဘူးဒီးနသးသမူတံၤသကိးလီၤ. ဘၣ်ဆၣ် နမၤတၢ်အံၤကသ့ဒ်လဲၣ်.
တၢ်မၤထွဲ တၢ်သ့ၣ်ညါလၢ လံာ်စီဆှံပူၤန့ၣ် မၤဂၢၢ်ကျၢၤနဟံၣ်ဃီန့ၢ်
၅. (က) ကျဲတမံၤလၢ နကသုးဘူးနသးဆူ ယဟိဝၤဒီး နသးသမူတံၤသကိးအအိၣ်န့ၣ် မ့ၢ်မနုၤလဲၣ်. (ခ) ယဟိဝၤ ထံၣ်ဝဲတၢ်ဆီဟံၣ်ဆီဃီဒ်လဲၣ်.
၅ တၢ်ဂ့ၢ်အကါဒိၣ်တမံၤလၢ နကဘူးဒီးယွၤအဂီၢ်, နၤဒီးနသးသမူတံၤသကိးန့ၣ် ကဘၣ်ဒိကနၣ် တၢ်ဟ့ၣ်ကူၣ်လၢ ဘၣ်ဃးဒီးဟံၣ်ဃီ ဒ်ပထံၣ်ဘၣ်လၢ လံာ်စီဆှံပူၤအသိးန့ၣ်လီၤ. (စံးထီၣ်ပတြၢၤ ၂၅:၄; ယၡါယၤ ၄၈:၁၇, ၁၈) လၢတၢ်န့ၣ်အဃိ, ဆိကမိၣ်ကွၢ် တၢ်နဲၣ်လိလီၤတံၢ်တမံၤလၢ တၢ်မၢဖိပီလူးပာ်ဖျါဝဲန့ၣ်တက့ၢ်. အဝဲစံးလၢ, “မ်တၢ်န့ၢ်မါန့ၢ်ဝၤ . . . , အိၣ်ဒီးအလၤကပီၤလၢ ပှၤခဲလၢာ်အကျါတက့ၢ်.” (ဧ့ၤဘြံၤ ၁၃:၄) အခီပညီမ့ၢ်မနုၤလဲၣ်. တၢ်ကတိၤလၢ “အိၣ်ဒီးအလၤကပီၤ” န့ၣ်ပာ်ဖျါဝဲလၢ မ့ၢ်တၢ်ပာ်ကဲဒီး ပာ်လုၢ်ဒိၣ်ပှ့ၤဒိၣ်တၢ်တမံၤမံၤန့ၣ်လီၤ. ယဟိဝၤထံၣ်ဝဲဟံၣ်ဃီဒ်သိးန့ၣ်ဒီး ပာ်လုၢ်ပာ်ပှ့ၤဝဲဒိၣ်မးလီၤ.
တၢ်လၢအထိၣ်ဂဲၤထီၣ်နၤ—တၢ်အဲၣ်ယဟိဝၤလၢ သးဒီဖျၢၣ်
၆. ပီလူးအတၢ်ဟ့ၣ်ကူၣ်လၢ ဘၣ်ဃးတၢ်ဆီဟံၣ်ဆီဃီ အတၢ်ကတိၤလၢခံလၢညါန့ၣ် ပာ်ဖျါဝဲတၢ်မနုၤလဲၣ်. ဘၣ်မနုၤအဃိ အကါဒိၣ်လၢ ဘၣ်ပာ်တၢ်အံၤလၢ ပသးပူၤလဲၣ်.
၆ နီၢ်နီၢ် ဒ်ယွၤအခ့အပှၤတဖၣ်အသိး, နၤဒီး နသးသမူတံၤသကိးန့ၣ် သုကသ့ၣ်ညါတ့ၢ်လၢ ဟံၣ်ဃီန့ၣ် မ့ၢ်တၢ်လုၢ်ဒိၣ်ပှ့ၤဒိၣ်ဒီး တၢ်ဆိၣ်ဂ့ၤလီၤ. ယဟိဝၤ အနီၢ်ကစၢ်ဒၣ်ဝဲ ဒုးအိၣ်ထီၣ် တၢ်ဆီဟံၣ်ဆီဃီ အတၢ်ရဲၣ်တၢ်ကျဲၤန့ၣ်လီၤ. (မးသဲ ၁၉:၄-၆) ဘၣ်ဆၣ်, ခဲအံၤနမ့ၢ် ကွၢ်ဆၢၣ်မဲာ်ဘၣ်ဒီး နီၢ်ဒီမိဝၤ တၢ်သဘံၣ်ဘူၣ်တဖၣ်ဒီး, ထဲတၢ်သ့ၣ်ညါပာ်လၢ ဟံၣ်ဃီအံၤ ကဘၣ်အိၣ်ဒီး အလၤကပီၤန့ၣ် တလၢပှဲၤဝဲလၢကထိၣ်ဂဲၤထီၣ် နၤဒီးနသးသမူတံၤသကိးလၢ သုကအံးထွဲကွၢ်ထွဲလိာ်သး တဂၤဒီးတဂၤလၢ တၢ်အဲၣ်ဒီး တၢ်ပာ်ကဲဘၣ်. မ့မ့ၢ်ဒ်န့ၣ်ဒီး တၢ်မနုၤကထိၣ်ဂဲၤထီၣ်နၤလၢ နကမၤဒ်န့ၣ်လဲၣ်. ပာ်သူၣ်ပာ်သးလၢ ပီလူးပာ်ဖျါဝဲ တၢ်အိၣ်ဒီး အလၤကပီၤအဂ့ၢ်တက့ၢ်. အဝဲတစံးဝဲလၢ “တၢ်န့ၢ်မါန့ၢ်ဝၤန့ၣ် အိၣ်ဒီးအလၤကပီၤ”ဘၣ်. လၢတၢ်န့ၣ်အလီၢ် စံးဝဲလၢ “မ်တၢ်န့ၢ်မါန့ၢ်ဝၤ . . . အိၣ်ဒီးအလၤကပီၤတက့ၢ်.” တမ့ၢ်ထဲလၢပီလူး ပာ်ဖျါထီၣ်ဝဲအတၢ်ထံၣ်ဘၣ်. မ့ၢ်ဒၣ်ဟ့ၣ်သဆၣ်ထီၣ်ဝဲတခီလီၤ. * တၢ်တိၢ်နီၣ်ပာ် တၢ်အံၤန့ၣ် ကထိၣ်ဂဲၤထီၣ်နၤ အါထီၣ်လၢ နကပာ်ကဲက့ၤ နသးသမူ တံၤသကိးန့ၣ်လီၤ. ဘၣ်မနုၤအဃိလဲၣ်.
၇. (က) ပမၤထွဲ လံာ်စီဆှံ တၢ်မၤလိာ်မနုၤလဲၣ်. လၢမနုၤအဃိလဲၣ်. (ခ) တၢ်အဘျုးအဂ့ၤမနုၤ အိၣ်ထီၣ်လၢတၢ်ဒိကနၣ်အဃိလဲၣ်.
၇ ဆိကမိၣ်တစိာ်ဖိလၢ ဘၣ်ဃးဒီးလံာ်စီဆှံ တၢ်မၤလိာ်အဂၤဒ်သိး တၢ်ဒုးကဲထီၣ်ပျဲၢ်ဘီၣ်အတၢ်မၤ မ့တမ့ၢ် တၢ်ဟ့ၣ်ပလီၢ်လၢ တၢ်စူးရိဖှိၣ်သကိးလၢ တၢ်ဘူၣ်ထီၣ်ဘါထီၣ်န့ၣ် မ့ၢ်နပာ်အီၤဒ်လဲၣ်န့ၣ်တက့ၢ်. (မးသဲ ၂၈:၁၉, ဧ့ၤဘြံၤ ၁၀:၂၄- ၂၅) နကမၤထွဲတၢ်မၤလိာ်အံၤန့ၣ် တဘျီတခီၣ် တမ့ၢ်ကညီဘၣ်. ပှၤလၢနလဲၤစံၣ်တဲၤတဲလီၤအီၤတဖၣ် မ့ၢ်ပာ်ဖျါဝဲ တၢ်တဘၣ်သူၣ်ဘၣ်သး မ့တမ့ၢ် နလီၤဘှံးလီၤတီၤလၢ ဟီၣ်ခိၣ်တၢ်ဖံးတၢ်မၤအဃိ ကကီဒိၣ်မးလၢ နကလဲၤထီၣ် ခရံာ်ဖိတၢ်အိၣ်ဖှိၣ်ရိဖှိၣ် တဖၣ်န့ၣ်လီၤ. သနာ်က့ နစံၣ်တဲၤတဲလီၤဒံး ဘီမုၢ်တၢ်သးခုကစီၣ်ဒီး နလဲၤထီၣ် ခရံာ်ဖိတၢ်အိၣ်ဖှိၣ်ရိဖှိၣ်န့ၣ်လီၤ. မတၤတဂၤဂ့ၤဂ့ၤဒီး စၤတၣ်ဒၣ်လဲာ် တြီနၤတန့ၢ်ဘၣ်. လၢမနုၤအဃိလဲၣ်. မ့ၢ်လၢနတၢ်အဲၣ် ယဟိဝၤလၢ သးဒီဖျၢၣ်အံၤထိၣ်ဂဲၤနၤလၢ နကဒိကနၣ်ဒီးမၤထွဲ ကစၢ်အတၢ်မၤလိာ်တဖၣ်န့ၣ်လီၤ. (၁ ယိၤဟၣ် ၅:၃) တၢ်အဘျုးမနုၤတဖၣ် အိၣ်ထီၣ်လဲၣ်. နသ့ၣ်ညါပာ်လၢ တၢ်ပာ်ဃုာ်လၢ တၢ်စံၣ်တဲၤတဲလီၤတၢ်မၤ ဒီးတၢ်ထီၣ်တၢ်အိၣ်ဖှိၣ်ရိဖှိၣ်န့ၣ် မ့ၢ်တၢ်လၢအဘၣ် ယဟိဝၤအသးအဃိ တၢ်အံၤဟ့ၣ်နၤ တၢ်ဃူတၢ်ဖိးလၢ သူၣ်ကံၣ်သးလဲဒီး တၢ်သူၣ်ခုသးခုအါမးလီၤ. တၢ်တူၢ်ဘၣ်ဒ်သိးအံၤန့ၣ် ဒုးဆူၣ်ထီၣ်နဂံၢ်နဘါလီၤ. (နဃ့မယၤ ၈:၁၀) ပဒိးန့ၢ်ဘၣ်တၢ်မၤလိ မနုၤဖဲအံၤလဲၣ်.
၈, ၉. (က) တၢ်မနုၤကထိၣ်ဂဲၤထီၣ်ပှၤလၢ ပကဒိကနၣ် တၢ်ဟ့ၣ်သဆၣ်ထီၣ်လၢ မၤလၤကပီၤဟံၣ်ဃီလဲၣ်. ဒီးဘၣ်မနုၤအဃိလဲၣ်. (ခ) ခဲအံၤပကဆိကမိၣ် တၢ်ဂ့ၢ်မနုၤခံဘီလဲၣ်.
၈ တၢ်တြီမၤတံာ်တာ်အိၣ်သနာ်က့ နတၢ်အဲၣ်ယွၤ အဒိၣ်အယိာ်အံၤ ထိၣ်ဂဲၤထီၣ်နၤလၢ နကစူၢ်တၢ်မၤလိာ်လၢ စံၣ်တဲၤတဲလီၤ တၢ်သးခုကစီၣ်ဒီး ထီၣ်တၢ်အိၣ်ဖှိၣ်ရိဖှိၣ်န့ၣ်လီၤ. ဒ်န့ၣ်အသိး တၢ်အိၣ်သးမ့ၢ်ကီခဲဒၣ်လဲာ်, နတၢ်အဲၣ်ယဟိဝၤ ထိၣ်ဂဲၤထီၣ်နၤသ့လၢ နကဒိကနၣ် လံာ်စီဆှံအတၢ်ဟ့ၣ်သဆၣ်ထီၣ် လၢအမ့ၢ် “မ်တၢ်န့ၢ်မါန့ၢ်ဝၤ, . . . အိၣ်ဒီးအလၤအကပီၤ” တက့ၢ်န့ၣ်လီၤ. (ဧ့ၤဘြံၤ ၁၃:၄, စံးထီၣ်ပတြၢၤ ၁၈:၂၉, စံၣ်တဲၤတဲလီၤ ၅:၄) အါန့ၢ်အန့ၣ်, နတၢ်ဂုာ်ကျဲးစၢး ပာ်ဃုာ်လၢ တၢ်စံၣ်တဲၤတဲလီၤဒီး ထီၣ်တၢ်အိၣ်ဖှိၣ်ရိဖှိၣ်အဃိ နဒိးန့ၢ်ဘၣ်တၢ်ဆိၣ်ဂ့ၤ အါမးလၢယွၤအအိၣ်လီၤ. နဂုာ်ကျဲးစၢး လၢနဟံၣ်ဃီကအိၣ်ဒီး အလၤအကပီၤအဂီၢ်အံၤန့ၣ် ယဟိဝၤပာ်သူၣ်ပာ်သးဝဲဒီး ကဆိၣ်ဂ့ၤဝဲလီၤ.—၁ သ့းစၤလနံ ၁:၃, ဧ့ၤဘြံၤ ၆:၁၀.
၉ မ့မ့ၢ်ဒ်န့ၣ်ဒီး, နဟံၣ်ဃီကအိၣ်ဒီးအလၤကပီၤအဂီၢ် နမၤကသ့ဒ်လဲၣ်. လိၣ်လၢနကဘၣ်ဟးဆှဲး တၢ်မၤလၢ ကမၤဟးဂီၤနဟံၣ်ဃီန့ၣ်လီၤ. အါန့ၢ်အန့ၣ်, လိၣ်လၢနကဘၣ် မၤတၢ်လၢ ကမၤဂၢၢ်ကျၢၤနဟံၣ်ဃီ အပျံၤစၢဃာ်လီၤ.
ဟးဆှဲးတၢ်ကတိၤဒီး လုၢ်လၢ် လၢအမၤစှၤလီၤ ဟံၣ်ဃီအလၤကပီၤ
၁၀, ၁၁. (က) လုၢ်လၢ်မနုၤန့ၣ် တမၤလၤကပီၤ ဟံၣ်ဃီလဲၣ်. (ခ) ပကြၢးဆိကမိၣ်ကွၢ် တၢ်သံကွၢ်မနုၤ ဒီးပသးသမူတံၤသကိးလဲၣ်.
၁၀ မါလၢအမ့ၢ်ခရံာ်ဖိတဂၤ တဘျီခါ စံးဝဲလၢ, “ယဃ့ဘါထုကဖၣ်ဆူ ယဟိဝၤအအိၣ်ဒ်သိး ကမၤစၢၤယၤလၢ ယတူၢ်တၢ်ကန့ၢ်အဂီၢ်လီၤ.” လၢတၢ်မနုၤအဂီၢ်လဲၣ်. အဝဲတဲဖျါထီၣ်ဝဲလၢ, “ယဝၤတဲဆါယၤလၢ တၢ်ကတိၤလီၤ. တမၤစုမၤခီၣ်ယၤဘၣ်ဆၣ် အဝဲတဲယၤထီဘိလၢ တၢ်ကတိၤမၤဆါယသးဒ်သိး ‘နမ့ၢ်တၢ်ဝံတၢ်ယိးလီၤ!’ ဒီး ‘နတဂိာ်တသီၣ်ဘၣ်’ လီၤ”. မါအံၤပာ်ဖျါထီၣ်ဝဲ ဟံၣ်ဃီပူၤတၢ်သူတၢ်ကတိၤ အၢအၢသီသီအံၤ တၢ်ဘၣ်ယိၣ်အလီၢ်အိၣ်အဂ့ၢ်လီၤ.
၁၁ ဖဲခရံာ်ဖိဟံၣ်ဃီပူၤ ပှၤဒီမိဝၤခံဂၤလၢာ် မ့ၢ်ကတိၤဆါလိာ်သး တဂၤဒီးတဂၤန့ၣ်, ဒုးအိၣ်ထီၣ်တၢ်သးဘၣ်ဒိလၢ သးပ့ၤနီၣ်အီၤတန့ၢ် ညီညီဘၣ်အဃိ လီၤသးအုးဒိၣ်မးလီၤ. ဖျါတြၢၢ်ကလာ်လၢ, နီၢ်ဒီမိဝၤတဂၤဂၤ မ့တမ့ၢ် ခံဂၤလၢာ် မ့ၢ်သူတၢ်ကတိၤ လၢအလီၤသးဆါန့ၣ် ဟံၣ်ဃီတမ့ၢ်ကအိၣ်ဒီး အလၤကပီၤဘၣ်. ဘၣ်ဃးဒီးတၢ်ဂ့ၢ်အံၤန့ၣ် နဟံၣ်ဃီစ့ၢ်ကီးမၤသးဒ်လဲၣ်. ကျဲတမံၤလၢနသ့ၣ်ညါဘၣ် တၢ်အံၤသ့န့ၣ် ခီဖျိလၢတၢ်ဆီၣ်လီၤသးအပူၤ နသံကွၢ်နသးသမူတံၤသကိးလၢ “ယတၢ်ကတိၤတဖၣ်န့ၣ် ဘၣ်ဒိနၤဒ်လဲၣ်” သ့လီၤ. လၢနတၢ်ကတိၤအဃိ နသးသမူတံၤသကိး အသးမ့ၢ်ဘၣ်ဒိတလီၢ်လီၢ်န့ၣ်, နသးကဘၣ်အိၣ်လၢ နကလဲလိာ် နလုၢ်လၢ်ဒ်သိးတၢ်အိၣ်သးကဂ့ၤထီၣ်အဂီၢ်လီၤ.—ကလၤတံ ၅:၁၅; အ့းဖ့းစူး ၄:၃၁.
၁၂. ပှၤတဂၤအတၢ်ဘူၣ်ထီၣ်ဘါထီၣ်န့ၣ် ကဲထီၣ်တၢ်ကလီကလီလၢ ယွၤအမဲာ်ညါသ့ဒ်လဲၣ်.
၁၂ နသူတၢ်ကတိၤလၢ နဟံၣ်ဃီပူၤန့ၣ် ဘၣ်ဒိနတၢ်ရ့လိာ်သးဒီး ယဟိဝၤန့ၣ် သ့ၣ်ညါဂ့ၤဂ့ၤတက့ၢ်. လံာ်စီဆှံပာ်ဖျါဝဲလၢ, “ပှၤတဂၤဂၤ မ့ၢ်ဆိကမိၣ်လၢ အမ့ၢ်ပှၤဘါယွၤဖိဒီး, မ့ၢ်တမၤနၢၤဘၣ်အပျ့ၤဘၣ်, မ့မ့ၢ်အလီလီၤအသးဒီး, အဝဲဒၣ်အတၢ်ဘူၣ်ထီၣ်ဘါထီၣ်န့ၣ် မ့ၢ်တၢ်ကလီကလီလီၤ.” (ယၤကိာ် ၁:၂၆) နတၢ်စံးတၢ်ကတိၤန့ၣ် ဘၣ်ထွဲလိာ်သးဒီး နတၢ်ဘူၣ်ထီၣ်ဘါထီၣ်လီၤ. လံာ်စီဆှံတတူၢ်လိာ်ဝဲ တၢ်ပာ်သူၣ်ပာ်သးလၢ အမ့ၢ်ဖဲနဘူၣ်ထီၣ်ဘါထီၣ် ယဟိဝၤအဖၢန့ၣ် နဟံၣ်ဃီမ့ၢ်မၤအသးဒ်လဲၣ်ဂ့ၤဒ်လဲၣ်ဂ့ၤ အကါတဒိၣ်ဘၣ်န့ၣ်လီၤ. ဝံသးစူၤလီလီၤနသးတဂ့ၤ. တၢ်အံၤမ့ၢ် တၢ်ဂ့ၢ်အဒိၣ်အမုၢ်လီၤ. (၁ ပ့းတရူး ၃:၇) နအိၣ်ဒီးတၢ်သ့တၢ်ဘၣ်ဒီး တၢ်သးဆူၣ်သနာ်က့ နမ့ၢ်ကတိၤဆါ နသးသမူတံၤသကိးလၢ တၢ်ကတိၤအၢအၢသီသီန့ၣ်, နတမၤလၤကပီၤ ဟံၣ်ဃီတၢ်ရဲၣ်တၢ်ကျဲၤဘၣ်. ဒီးနတၢ်ဘူၣ်ထီၣ်ဘါထီၣ်န့ၣ် မ့ၢ်တၢ်ကလီကလီလၢ ယွၤအမဲာ်ညါလီၤ.
၁၃. သးသမူတံၤသကိးတဂၤ အသးဘၣ်ဒိသ့ဒ်လဲၣ်.
၁၃ ပှၤလၢအအိၣ်ဒီးဟံၣ်ဃီတဖၣ်စ့ၢ်ကီး လိၣ်လၢကဘၣ်ပာ်သူၣ်ပာ်သးလၢ သုတမၤဘၣ်ဒိ အသးသမူတံၤသကိးလၢ ကျဲလၢအလီၤသဒၢန့ၣ်လီၤ. ဆိကမိၣ်တၢ်အဒိခံမံၤတက့ၢ်. မိၢ်ထဲတဂၤလၢဘၣ်လုၢ်ဒိၣ်ထီၣ်အဖိတဖၣ်န့ၣ် တဲလီၤကွဲၤဒီနၢ်တလီၢ်လီၢ်လၢ တၢ်အိၣ်ဖှိၣ်ပူၤ ခရံာ်ဖိဒီပုၢ်ဝဲၢ်ခွါလၢအိၣ်ဒီးအမါတဂၤ အအိၣ်ဒီးဃ့ဝဲတၢ်ဟ့ၣ်ကူၣ်, ဒီးအဝဲသ့ၣ်ကတိၤတၢ်ဖးယံာ်လီၤ. ခရံာ်ဖိဒီပုၢ်ဝဲၢ်ခွါသဘျ့တဂၤ ပိာ်လိာ်အခံဒ်သိးသိး ကိးနွံဒဲးဒီး ခရံာ်ဖိဒီပုၢ်ဝဲၢ်မုၣ်လၢ အိၣ်ဒီးအဝၤတဂၤ, လၢတၢ်စံၣ်တဲၤတဲလီၤတၢ်မၤအပူၤလီၤ. တၢ်အဒိအံၤအပူၤ ပှၤလၢအိၣ်ဒီး ဟံၣ်ဃီတဖၣ်အံၤ ကအိၣ်ဒီးတၢ်တိာ်လၢအဂ့ၤလီၤ. သနာ်က့, အဝဲသ့ၣ်အတၢ်အိၣ်တၢ်ဆိးန့ၣ် ဘၣ်ဒိအသးသမူတံၤသကိးဒ်လဲၣ်. မါလၢ အကွၢ်ဆၢၣ်မဲာ်ဘၣ်ဒီး တၢ်အိၣ်သးဒ်သိးအံၤတဂၤစံးဝဲ, “ယပာ်ယသးလၢ ယဝၤဟ့ၣ်ဝဲဒီပုၢ်ဝဲၢ်မုၣ်လၢ တၢ်အိၣ်ဖှိၣ်ပူၤတဂၤ တၢ်ဆၢကတီၢ်ဒီး တၢ်သးစဲအါမးအဃိ ယသးဘၣ်ဒိလီၤ. တၢ်အံၤမၤသးဆံးယၤလီၤ.”
၁၄. (က) ဖဲ ၁ မိၤၡ့ ၂:၂၄ န့ၣ် မၤနီၣ်ပာ်ဖျါဝဲ ဟံၣ်ဃီမူဒါမနုၤလဲၣ်. (ခ) ကြၢးပသံကွၢ်လီၤက့ၤပသး ဒ်လဲၣ်.
၁၄ ပနၢ်ပၢၢ်လၢ မါမ့တမ့ၢ် ဝၤဒ်သိးန့ၣ်တဖၣ်ဒီး ပှၤလၢကွၢ်ဆၢၣ်မဲာ်ဘၣ်တၢ် ဒ်သိးန့ၣ်တဖၣ်န့ၣ် အသးကဆါဝဲလီၤ. အဝဲသ့ၣ်အသးသမူတံၤသကိး ကွၢ်ကပာ်ဝဲ ယွၤအတၢ်နဲၣ်လိအခီၣ်ထံးလၢ ဟံၣ်ဃီအဂီၢ်လၢအမ့ၢ် “ပိာ်ခွါကဟးသဒၣ်အမိၢ်အပၢ်ဒီး ပာ်ဖှိၣ်အသးဒီးအမါလီၤ.” (၁ မိၤၡ့ ၂:၂၄) နီၢ်နီၢ်, ပှၤလၢအထီၣ်ပှၢ်တဖၣ်န့ၣ် ကဘၣ်ပာ်ကဲအမိၢ်အပၢ်တဖၣ်လီၤ. ဘၣ်ဆၣ်, တၢ်အံၤမ့ၢ်ယွၤအတၢ်ရဲၣ်တၢ်ကျဲၤလၢ အဝဲသ့ၣ်ကဘၣ်ဟံးန့ၢ် မူဒါလီၤဆီဒၣ်တၢ်န့ၣ် မ့ၢ်အသးသမူတံၤသကိးလီၤ. ဒ်န့ၣ်အသိး, ခရံာ်ဖိတဖၣ် အဲၣ်ဝဲပှၤစူၢ်တၢ်နာ်တၢ်ကဒဲကဒဲလီၤ. သနာ်က့ ပှၤလၢအဝဲသ့ၣ်ကဘၣ်ဟံးန့ၢ် မူဒါလီၤဆီန့ၣ် မ့ၢ်အသးသမူတံၤသကိးလီၤ. လၢတၢ်န့ၣ်အဃိ, ဖဲခရံာ်ဖိလၢ အိၣ်ဒီးအဟံၣ်ဃီတဖၣ် မ့ၢ်သူတၢ်ဆၢကတီၢ်တလၢကွံာ်အခၢး မ့တမ့ၢ် တၢ်အိၣ်ဘူးဘူးတံၢ်တံၢ်အါကဲၣ်ဆိးဒီး ပှၤစူၢ်တၢ်နာ်တၢ်ကဒဲကဒဲတဖၣ်, လီၤဆီဒၣ်တၢ်ပှၤလၢ က့းတလီၤဂာ်ဒီးအီၤတဖၣ်အခါ, အဝဲသ့ၣ်အဟံၣ်ဃီပူၤ တၢ်တဘၣ်လိာ်ဖိးဒ့ အိၣ်ထီၣ်ဝဲသ့လီၤ. တၢ်ဂ့ၢ်ဒ်အံၤအဃိ လၢနဟံၣ်ဃီပူၤ တၢ်ဘၣ်ယိၣ်အိၣ်ထီၣ်လံဧါ. သံကွၢ်လီၤက့ၤနသးလၢ, ‘တၢ်ဆၢကတီၢ်, တၢ်သးစဲ, ဒီးတၢ်အဲၣ်တၢ်ကွံလၢ ယသးသမူတံၤသကိး ကြၢးဒိးန့ၢ်ဝဲနီၢ်နီၢ်န့ၣ် မ့ၢ်ယဟ့ၣ်အီၤသပှၢ်တၢၢ်ဧါ’ န့ၣ်တက့ၢ်.
၁၅. ဒ် မးသဲ ၅:၂၈ အသိး, ခရံာ်ဖိလၢအိၣ်ဒီးဟံၣ်ဃီတဖၣ်န့ၣ် ဘၣ်မနုၤအဃိ ကြၢးဟးဆှဲးဝဲ တၢ်ဟ့ၣ်တၢ်သးစဲတလၢကွံာ်အခၢးလၢ ပှၤလၢအက့းတလီၤဂာ်ဒီးအီၤတဂၤလဲၣ်.
၁၅ အါန့ၢ်အန့ၣ်, ခရံာ်ဖိလၢ အိၣ်ဒီးအဟံၣ်ဃီတဖၣ် ဟ့ၣ်ဝဲတၢ်သးစဲတလၢကွံာ်အခၢးလၢ ပှၤလၢတမ့ၢ်အမါ, အဝၤန့ၣ် လၢတၢ်ကူၣ်တၢ်ဆးတအိၣ်အပူၤ လီၤနုာ်ဆူတၢ်အိၣ်အသးလၢ လီၤဘၣ်ယိၣ်အပူၤသ့လီၤ. လီၤသးအုးမးလၢ, ခရံာ်ဖိလၢအိၣ်ဒီးဟံၣ်ဃီတနီၤန့ၣ် သးအတၢ်ပလၢၢ်ဘၣ်တၢ်အဲၣ် အိၣ်ထီၣ်လၢပှၤလၢရ့ဝဲ ဘူးဘူးတံၢ်တံၢ်တဖၣ်န့ၣ်လီၤ. (မးသဲ ၅:၂၈) တၢ်ပိာ်ထွဲလၢခံန့ၣ်, တၢ်အဲၣ်အပျံၤဒ်သိးအံၤ ဒုးအိၣ်ထီၣ်အါထီၣ် လုၢ်လၢ်လၢ တမၤလၤကပီၤဟံၣ်ဃီန့ၣ်လီၤ. ဆိကမိၣ်ကွၢ် တၢ်မၢဖိပီလူး ပာ်ဖျါဝဲတၢ်ဂ့ၢ်ဘၣ်ဃးဒီးတၢ်အံၤတက့ၢ်.
‘မ်လီၢ်မံသုတဘၣ်အၢတဂ့ၤ’
၁၆. ဘၣ်ဃးဒီး ဟံၣ်ဃီန့ၣ် ပီလူးဟ့ၣ်တ့ၢ်ဝဲ တၢ်မၤလိာ်မနုၤလဲၣ်.
၁၆ ပီလူး ဟ့ၣ်ပလီၢ်ဝဲလၢ “မ်တၢ်န့ၢ်မါန့ၢ်ဝၤဒီး လီၢ်မံတဘၣ်အၢဘၣ်န့ၣ်, အိၣ်ဒီးအလၤအကပီၤလၢ ပှၤခဲလၢာ်အကျါတက့ၢ်. အဂ့ၢ်ဒ်အံၤ, ကစၢ်ယွၤကစံၣ်ညီၣ် ပှၤလၢအမၤကမၣ်ပိာ်မုၣ် ပိာ်မၢၤဒီး ပှၤလၢအအဲၣ်ဘၢတၢ်န့ၣ်လီၤ.” (ဧ့ၤဘြံၤ ၁၃:၄, ခစ.) ပီလူးသူဝဲ တၢ်ကတိၤလၢအမ့ၢ် “လီၢ်မံ”န့ၣ် ဘၣ်ထွဲလိာ်သးဒီး တၢ်န့ၢ်မါ, န့ၢ်ဝၤဒီး မ့ၢ်ဒၣ်စံးဝဲ တၢ်မံဃုာ်လိာ်သးလီၤ. တၢ်မံဃုာ်လိာ်သးန့ၣ် မ့ၢ်အိၣ်ထဲလၢ ဟံၣ်ဃီ တၢ်ရဲၣ်တၢ်ကျဲၤအပူၤန့ၣ်ဒီး တၢ်အံၤ “တဘၣ်အၢ”ဘၣ်ဒီးလုၢ်လၢ် က,ကဆှီဝဲလီၤ. လၢတၢ်န့ၣ်အဃိ, ခရံာ်ဖိတဖၣ် ဒိကနၣ်ဝဲ ယွၤအကလုၢ်ကထါလၢ “သးခုဒီး နဖိၣ်သၣ်ခွါထီၣ်အမါ” လီၤ.—ကတိၤဒိ ၅:၁၈.
၁၇. (က) ဟီၣ်ခိၣ်အတၢ်ထံၣ် လၢတၢ်အဲၣ်ဘၢမါအဲၣ်ဘၢဝၤန့ၣ် ဘၣ်မနုၤအဃိ တကြၢးလုၢ်ဘၢခရံာ်ဖိတဖၣ်လဲၣ်. (ခ) ပမၤထွဲ ဒ်ယိၤဘးအဒိအတဲာ်ကသ့ဒ်လဲၣ်.
၁၇ ပှၤလၢအမံဃုာ်ဒီး ပှၤတဂၤဂၤလၢ တမ့ၢ်အသးသမူတံၤသကိးတဖၣ်န့ၣ် မ့ၢ်ဒၣ်တယူးယီၣ်ပာ်ကဲဝဲ ယွၤအတၢ်မၤလိာ်လၢဘၣ်ဃး တၢ်သကဲာ်ပဝးန့ၣ်လီၤ. မ့ၢ်လီၤ. မုၢ်မဆါတနံၤအံၤ ပှၤအါဂၤ ထံၣ်ဝဲ တၢ်အဲၣ်ဘၢမါအဲၣ်ဘၢဝၤ ဒ်တၢ်မၤညီနုၢ်အသိးလီၤ. ဘၣ်ဆၣ်, ပှၤဂုၤဂၤတဖၣ် မ့ၢ်ထံၣ်ဝဲ တၢ်အဲၣ်ဘၢမါအဲၣ်ဘၢဝၤ ဒ်လဲၣ်ဂ့ၤဒ်လဲၣ်ဂ့ၤ တၢ်အံၤတကြၢးလုၢ်ဘၢ ခရံာ်ဖိတဖၣ် အတၢ်ထံၣ်ဘၣ်. အဝဲသ့ၣ် သ့ၣ်ညါပာ်ဝဲလၢ, လၢခံကတၢၢ် ပှၤကစံၣ်ညီၣ် “ပှၤလၢအမၤကမၣ် ပိာ်မုၣ်ပိာ်မၢၤဒီး အအဲၣ်ဘၢတၢ်န့ၣ်” တမ့ၢ်ပှၤကညီဘၣ်, မ့ၢ်ဒၣ် “ကစၢ်ယွၤ ကစံၣ်ညီၣ်”အီၤလီၤ. (ဧ့ၤဘြံၤ ၁၀:၃၁; ၁၂:၂၉) လၢတၢ်န့ၣ်အဃိ, ခရံာ်ဖိနီၢ်နီၢ်တဖၣ် ဘၣ်ဃးဒီး တၢ်ဂ့ၢ်အံၤန့ၣ် အိၣ်ဒီးတၢ်ထံၣ်ဒ် ယဟိဝၤအသိးလီၤ. (ရိမ့ၤ ၁၂:၉) သ့ၣ်နီၣ်ထီၣ်က့ၤ ယိၤဘးစံးတ့ၢ်ဝဲလၢ “ယမၤတၢ်အၢၣ်လီၤအီလီၤဒီး ယမဲာ်” န့ၣ်တက့ၢ်. (ယိၤဘး ၃၁:၁) ခရံာ်ဖိနီၢ်နီၢ်တဖၣ် သုတခါထီၣ်ဘၣ် ခီၣ်ခါတခါဒၣ်လဲာ်လၢ တၢ်အဲၣ်ဘၢမါအဲၣ်ဘၢဝၤအဂီၢ် အဝဲသ့ၣ်ပၢၤဃာ်အမဲာ်ချံ ဒီးတကွၢ်ဝဲ ပှၤလၢတမ့ၢ်အသးသမူတံၤသကိးလၢ တၢ်မိၣ်န့ၢ်သးလီဒိၣ်ဒိၣ်ကလဲာ်ဘၣ်.—ကွၢ်တၢ်ပိာ်ထွဲလၢ လံာ်ကဘျံးပၤ ၂၁၉- ၂၁ တက့ၢ်.
၁၈. (က) လၢယဟိဝၤ အမဲာ်ညါ တၢ်အဲၣ်ဘၢမါ အဲၣ်ဘၢဝၤန့ၣ် အတၢ်ကမၣ်ဒိၣ်ထဲလဲၣ်. (ခ) တၢ်အဲၣ်ဘၢမါအဲၣ်ဘၢဝၤဒီး တၢ်ဘါတၢ်ဂီၤတၢ်ဖီၣ်န့ၣ် တၢ်လီၤဂာ်လိာ်သးမနုၤအိၣ်လဲၣ်
၁၈ လၢယဟိဝၤ အမဲာ်ညါ တၢ်အဲၣ်ဘၢမါအဲၣ်ဘၢဝၤန့ၣ် အတၢ်ကမၣ်ဒိၣ်ထဲလဲၣ်. မိၤၡ့အတၢ်မၤလိာ် မၤစၢၤပှၤလၢ ပကထံၣ်သ့ၣ်ညါ ယဟိဝၤ အတၢ်ပာ်သူၣ်ပာ်သးလၢ တၢ်ဂ့ၢ်အံၤ အဖီခိၣ်န့ၣ်လီၤ. လၢကီၢ်အံၣ်စရ့အပူၤ, တၢ်အဲၣ်ဘၢမါအဲၣ်ဘၢဝၤဒီး တၢ်ဘါတၢ်ဂီၤန့ၣ် ပာ်ဃုာ်လၢ တၢ်ကမၣ်လၢ ကြၢးတၢ်စံၣ်ညီၣ်သံအီၤလီၤ. (၃ မိၤၡ့ ၂၀: ၂, ၁၀) မ့ၢ်နထံၣ်သ့ၣ်ညါသ့ တၢ်ခံမံအံၤ အတၢ်လီၤဂာ်လိာ်သးန့ၣ်ဧါ. ပှၤအံၣ်စရ့လးဖိတဂၤ မ့ၢ်ဘါတၢ်ဂီၤတၢ်ဖီၣ်န့ၣ် မ့ၢ်ဒၣ်မၤဟးဂီၤဝဲ အတၢ်အၢၣ်လီၤအီလီၤဒီး ယဟိဝၤလီၤ. ဒ်န့ၣ်အသိး, ပှၤအံၣ်စရ့လးဖိတဂၤ မ့ၢ်အဲၣ်ဘၢမါအဲၣ်ဘၢဝၤန့ၣ် အဝဲမၤဟးဂီၤ အတၢ်အၢၣ်လီၤအီလီၤဒီး အသးသမူတံၤသကိးလီၤ. ပှၤခံဂၤအံၤန့ၣ် မ့ၢ်ပှၤတတီဒီးအကလုၢ်လီၤ. (၂ မိၤၡ့ ၁၉:၅, ၆; ၅ မိၤၡ့ ၅:၉; မၤလကံ ၂:၁၄) လၢတၢ်န့ၣ်အဃိ, အဝဲသ့ၣ်ခံဂၤလၢာ် အိၣ်ဒီးတၢ်ကမၣ်လၢ ယဟိဝၤ, ယွၤလၢအတီဒီး ကြၢးပာ်ဂံၢ်ပာ်ဘါအီၤတဂၤအမဲာ်ညါလီၤ.—စံးထီၣ်ပတြၢၤ ၃၃:၄.
၁၉. တၢ်မနုၤ ကမၤဂၢၢ်ကျၢၤ ပှၤတဂၤ အတၢ်ပာ်လီၤသးလၢ ကဂ့ၢ်လိာ် တၢ်အဲၣ်ဘၢမါအဲၣ်ဘၢဝၤအဂီၢ်လဲၣ်. ဒီးလၢမနုၤအဃိလဲၣ်.
၁၉ နီၢ်နီၢ်န့ၣ် ခရံာ်ဖိတဖၣ် တအိၣ်လၢၤလၢ မိၤၡ့အတၢ်မၤလိာ်အဖီလာ်ဘၣ်. ဘၣ်ဆၣ်, တၢ်သ့ၣ်နီၣ်ထီၣ်က့ၤ လၢပျၢၤကီၢ်အံၣ်စရ့အပူၤ တၢ်အဲၣ်ဘၢမါ အဲၣ်ဘၢဝၤန့ၣ် ဘၣ်တၢ်ထံၣ်အီၤဒ် တၢ်ကမၣ်လၢ အဒိၣ်အယိၣ်အဃိ တၢ်အံၤ ဒုးဂၢၢ်ကျၢၤခရံာ်ဖိတဖၣ် အတၢ်ပာ်လီၤသးလၢ သုတမၤဘၣ် တၢ်ကမၣ်ဒ်သိးန့ၣ်တဂ့ၤလီၤ. လၢမနုၤအဃိလဲၣ်. ဆိကမိၣ်ကွၢ် တၢ်ထိၣ်သတြီၤအံၤတက့ၢ်. နကချံးလီၤနခီၣ်လၢ တၢ်ဂီၤတၢ်ဖီၣ် အမဲာ်ညါဒီး ဘါထီၣ်အီၤန့ၣ်ဧါ. နကစံးလၢ ‘ယတမၤလ့ၤတက့ၤဘၣ်’. ဘၣ်ဆၣ်, ပှၤမ့ၢ်ဟ့ၣ်နၤစ့အါမးဒီး နကမၤဘၣ်ဧါ. နကတဲဆၢက့ၤလၢ ‘ယတဆိကမိၣ်ထီၣ်ဒၣ်လဲာ်ဘၣ်.’ တၢ်ဆိကမိၣ်လၢ တၢ်တတီဒီး ယဟိဝၤခီဖျိ တၢ်ဘါတၢ်ဂီၤတၢ်ဖီၣ်န့ၣ် မ့ၢ်တၢ်လီၤသးဘၣ်အၢလၢ ခရံာ်ဖိတဂၤအဂီၢ်လီၤ. ဒ်န့ၣ်အသိး ခရံာ်ဖိတဖၣ် မ့ၢ်ကွၢ်ဆၢၣ်မဲာ်ဘၣ် တၢ်လ့ပစီ ဒ်လဲၣ်ဂ့ၤဒ်လဲၣ်ဂ့ၤ, အဝဲသ့ၣ်ကြၢး ဟးဆှဲးဝဲ တၢ်ဆိကမိၣ်လၢ ကတတီလၢၤဒီး ယဟိဝၤဒီး အဝဲသ့ၣ် အသးသမူတံၤသကိး ခီဖျိ မၤကမၣ်ဘၣ် တၢ်အဲၣ်ဘၢမါအဲၣ်ဘၢဝၤန့ၣ် မ့ၢ်တၢ်လၢ လီၤသးဘၣ်အၢလၢ ခရံာ်ဖိတဖၣ်အဂီၢ်လီၤ. (စံးထီၣ်ပတြၢၤ ၅၁:၁, ၄; ကလီးစဲ ၃:၅) တၢ်မၤလၢ ကဒုးသးခုစၤတၣ်ဘၣ်ဆၣ် တမၤလၤကပီၤ ယဟိဝၤဒီး ဟံၣ်ဃီတၢ်ရဲၣ်တၢ်ကျဲၤန့ၣ် ပတအဲၣ်ဒိးမၤဘၣ်.
နမၤဂၢၢ်ကျၢၤ နဟံၣ်ဃီသ့အဂ့ၢ်
၂၀. တၢ်မနုၤမၤအသးလၢ ဟံၣ်ဃီတနီၤအပူၤလဲၣ်. ဟ့ၣ်အဒိတက့ၢ်.
၂၀ နကဘၣ်ဟးဆှဲးလုၢ်လၢ်လၢ တမၤလၤကပီၤ ဟံၣ်ဃီတကးဘၣ်, နကပာ်ကဲကဒါက့ၤ နသးသမူတံၤသကိးအဂီၢ် နမၤတၢ်မနုၤတဖၣ်သ့လဲၣ်. တၢ်စံးဆၢအဂီၢ်, ဆိကမိၣ်ကွၢ် ဟံၣ်ဃီအတၢ်ရဲၣ်တၢ်ကျဲၤဒ်သိး ဟံၣ်တဖျၢၣ်တက့ၢ်. လၢခံ, တၢ်ကတိၤလၢအိၣ်ဒီးတၢ်အဲၣ်, တၢ်မၤလၢအိၣ်ဒီးတၢ်သးကညီၤ, ဒီးတၢ်ကတိၤလၢ အလီၤယူးယီၣ်ပာ်ကဲတဖၣ်န့ၣ် ဆိကမိၣ်ကွၢ်အီၤဒ် တၢ်ကယၢကယဲလၢ အမၤဃံမၤလၤဟံၣ်န့ၣ်တက့ၢ်. နမ့ၢ်တူၢ်ဘၣ်လၢ သုဘူးလိာ်သးတဂၤဒီးတဂၤန့ၣ်, နဟံၣ်ဃီန့ၣ် ကလီၤဂာ်ဒီး ဟံၣ်လၢတၢ်ကယၢကယဲဃာ်အီၤဃံဃံလၤလၤလၢ တၢ်အဲၣ်တၢ်ကွံန့ၣ်လီၤ. နတၢ်အဲၣ်မ့ၢ်စှၤလီၤန့ၣ်, တၢ်ကယၢကယဲတဖၣ် ကဟါမၣ်ကွံာ်ကယီကယီ, ဒီးလၢခံန့ၣ် နဟံၣ်ဃီကလီၤဂာ်လၢ ဟံၣ်တဖျၢၣ်လၢ တၢ်တကယၢကယဲအီၤနီတစဲးဘၣ်လီၤ. နသးအိၣ်ဒိကနၣ် ယွၤအတၢ်မၤလိာ်လၢ “မ်တၢ်န့ၢ်မါန့ၢ်ဝၤ. . .အိၣ်ဒီးအလၤကပီၤ” အဃိ, နကဘၣ်တၢ်ထိၣ်ဂဲၤထီၣ်နၤလၢ နကမၤဂ့ၤထီၣ်က့ၤ တၢ်အိၣ်သးန့ၣ်လီၤ. နီၢ်နီၢ်, တၢ်တမံၤလၢ လုၢ်ဒိၣ်ပှ့ၤဒိၣ်ဒီး အိၣ်ဒီးအလၤကပီၤန့ၣ် ကြၢးမၤဂ့ၤထီၣ်က့ၤအီၤလီၤ. နမၤကသ့ဒ်လဲၣ်. ယွၤအကလုၢ်ကထါ ပာ်ဖျါထီၣ်ဝဲလၢ, “ပှၤမၤဟံၣ်လၢ တၢ်ကူၣ်သ့, ဒီးဒုးအိၣ်ဂၢၢ်ဆိးကျၢၤဝဲလၢ တၢ်ကူၣ်တၢ်ဆးလီၤ. ဒီးတၢ်သ့ၣ်ညါ ကမၤပှဲၤဝဲအဒၢးတဖၣ်ဒီး တၢ်ထူးတၢ်တီၤလၢ အလုၢ်ဒိၣ်ပှ့ၤဒိၣ်, ဒီးအဂ့ၤအမုာ်ခဲလၢာ်လီၤ.” (ကတိၤဒိ ၂၄:၃, ၄) တၢ်ကတိၤတဖၣ်အံၤ ပမၤထွဲအီၤလၢ ဟံၣ်ဃီပူၤသ့ဒ်လဲၣ်န့ၣ် ဆိကမိၣ်ကွၢ်တက့ၢ်.
၂၁. ပမၤဂၢၢ်ကျၢၤအါထီၣ် ပဟံၣ်ဃီကသ့ဒ်လဲၣ်. (ကွၢ်စ့ၢ်ကီး လံာ်ကဘျံး ၁၃၁ အပူၤ တၢ်လွံၢ်နၢၣ်တက့ၢ်.)
၂၁ ဟံၣ်မုာ်ဃီပၢၤအပူၤန့ၣ် ပှဲၤဒီး‘တၢ်လၢအလုၢ်ဒိၣ်ပှ့ၤဒိၣ်’ ဒ်သိးတၢ်ဂ့ၤတၢ်ဝါလၢ အမ့ၢ်တၢ်အဲၣ်နီၢ်နီၢ်, တၢ်ပျံၤယွၤဒီး တၢ်နာ်ဂၢၢ်ကျၢၤလီၤ. (ကတိၤဒိ ၁၅:၁၆, ၁၇; ၁ ပ့းတရူး ၁:၇) တၢ်သ့ၣ်တဖၣ်အံၤ မၤဂၢၢ်ကျၢၤဟံၣ်ဃီသ့လီၤ. ဘၣ်ဆၣ်, တၢ်ကတိၤဒိလၢ ဘၣ်တၢ်ဒုးနဲၣ်ဖျါထီၣ်လၢထးအံၤန့ၣ် မၤပှဲၤဝဲဒၢးတဖၣ်ဒီး တၢ်လုၢ်ဒိၣ်ပှ့ၤဒိၣ်တဖၣ်ဒ်လဲၣ်န့ၣ် နပာ်သူၣ်ပာ်သးကစီဒီဧါ. “ခီဖျိ တၢ်သ့ၣ်ညါနၢ်ပၢၢ်လီၤ.” မ့ၢ်လီၤ, ဖဲတၢ်မၤထွဲ တၢ်သ့ၣ်ညါနၢ်ပၢၢ်လၢ လံာ်စီဆှံပူၤအခါ တၢ်သ့ၣ်ညါအံၤအိၣ်ဒီးအစိကမီၤလၢ ကမၤလဲလိာ်ပှၤကညီအတၢ်ဆိကမိၣ်ဒီး ကထိၣ်ဂဲၤအဝဲသ့ၣ်လၢ ကအဲၣ်လိာ်က့ၤသးအဂီၢ်န့ၣ်လီၤ. (ရိမ့ၤ ၁၂:၂; ဖံလံးပံၤ ၁:၉) လၢတၢ်န့ၣ်အဃိ, နၤဒီးနသးသမူတံၤသကိး ဆ့ၣ်နီၤဒ်သိးသိးဒီး ဖးလံာ်စီဆှံတဆၢ မ့တမ့ၢ် ကတိၤသကိး တၢ်ကွဲးဖှိၣ်ရၤလၢ ဘၣ်ဃးဟံၣ်ဃီ လၢတၢ်ဒိးသန့ၤထီၣ်အီၤလၢ လံာ်စီဆှံပူၤန့ၣ်တက့ၢ်. နမ့ၢ်မၤဒ်သိးအံၤန့ၣ် လီၤဂာ်ဒီးနသမံသမိးကွၢ် တၢ်ကယၢကယဲတမံၤလၢ မၤဃံမၤလၤနဟံၣ်န့ၣ်လီၤ. ဖဲနတၢ်အဲၣ်ယဟိဝၤထိၣ်ဂဲၤနၤလၢ နကမၤထွဲ တၢ်ဟ့ၣ်ကူၣ်လၢ နသမံသမိးကွၢ်ဝံၤတဖၣ်လၢ နဟံၣ်ဃီပူၤအခါ, မ့ၢ်နစိာ်နုာ်တၢ်ကယၢကယဲတဖၣ်အံၤလၢ “ဒၢး” ပူၤလီၤ. မ့ၢ်လၢနမၤဒ်သိးန့ၣ်အဃိ, တၢ်အဲၣ်ဒီးတၢ်ကဟုကယာ်တနီၤလၢ တဘျီခါ နမုာ်လၤသးခုလၢနဟံၣ်ပူၤန့ၣ် နကဒိးန့ၢ်ဘၣ်က့ၤလီၤ.
၂၂. ပဝဲတခီ ပမ့ၢ်ဂုာ်ကျဲးစၢးမၤဂၢၢ်ကျၢၤ ပဟံၣ်ဃီန့ၣ် ပကဒိးန့ၢ်ဘၣ် တၢ်သူၣ်မံသးမံ မနုၤလဲၣ်.
၂၂ မ့ၢ်လီၤ, တၢ်ကယၢကယဲတဖၣ်အံၤ နကပာ်က့ၤ တမံၤဘၣ်တမံၤဆူအလီၢ်အဂီၢ် နကဘၣ်ဟံးန့ၢ် တၢ်ဆၢကတီၢ်ဒီး ကျဲးစၢးအါမးလီၤ. ဘၣ်ဆၣ်, နၤတခီနမ့ၢ် ဂုာ်ကျဲးစၢးမၤဒ်သိးအံၤန့ၣ်, နကအိၣ်ဒီးတၢ်သူၣ်မံသးမံလၢ နသ့ၣ်ညါလၢနဒိကနၣ် လံာ်စီဆှံတၢ်မၤလိာ်လၢအမ့ၢ်, “သးဆူၣ်ဒုးနဲၣ်တၢ်ယူးယီၣ်ပာ်ကဲလိာ်သး လၢတဂၤဒီးတဂၤအဂီၢ်န့ၣ်တက့ၢ်.” (ရိမ့ၤ ၁၂:၁၀, ခစ; စံးထီၣ်ပတြၢၤ ၁၄၇:၁၁) လီၤဆီဒၣ်တၢ်, နတၢ်ဂုာ်ကျဲးစၢးမၤလၤကပီၤနဟံၣ်ဃီန့ၣ် ကဒုးအိၣ်နၤလၢ ယွၤအတၢ်အဲၣ်အပူၤလီၤ.
^ လံာ်အဆၢ. 6 တၢ်ကတိၤလၢခံလၢညါ ပာ်ဖျါဝဲလၢ ပီလူးအတၢ်ဟ့ၣ်ပလီၢ်လၢ ဘၣ်ဃးတၢ်ဆီဟံၣ်ဆီဃီန့ၢ် မ့ၢ်တၢ်ဟ့ၣ်သဆၣ်ထီၣ် အါမးအကျါတမံၤလီၤ.—ဧ့ၤဘြံၤ ၁၃:၁-၅.
