1, 2. Kodi tin’cezerana mbvunzo uponi, ndipo thangwe ranyi?

KODI muna banja? Penu inde, kodi munkukomedwa kwene-kwene na banjalo, ayai munkugumana na madede makulu m’banjamo? Kodi lufoyi lanu layamba kumala pang’ono-pang’ono? Kodi munkundokhalira kupirira m’banjamo? Penu bziri tenepoyo, ndiye kuti munkukomedwa lini thangwe rakuti lufoyi lomwe mukhanalo pakuyamba lire linkumala. Tsono pakuti ndimwe Mkristau, imwepo mun’funa kuti banja lanu limbalemekeze Yahova, Mulungu omwe mumbamufuna. Tenepo, bzingacitike kuti munkucita thupo, ndipo munkudandaula kwene-kwene na momwe linkufambira banja lanu. Tsono, lekani kukukumbuka kuti palibe comwe mungacite kuti banja lanulo liyambe pomwe kufamba bwino.

² Pana mabanja mazinji ya Akristau yomwe yankufamba bwino tsapano, napo kuti m’mbuyomu bzinthu bzikhawafambira lini bwino. Iwo adagumana njira yabwino yakulimbisira mabanja yawo. Imwepo mungakondwembo kwene-kwene m’banja mwanu. Tsono, bzingakwanisike tani bzimwebzo?

3, 4. Thangwe ranyi tingalewe kuti wanthu wakulowolana ambabverana kwene-kwene pomwe iwo an’cita nyongo yakulimbisa uxamwali bwawo na Mulungu? Perekani ciratizo.

³ Imwepo na mwanzanu omwe mudalowolana naye mungafunane kwene-kwene penu awirimwe mumbafuna kwene-kwene Mulungu. Thangwe ranyi bziri tenepoyo? Onani ciratizoci: Muyezezere kuti pana phiri litali lakusongoka ninga nsodzi ya gwangwa. Mwamuna adaima pa tsinde la phiriro ku mbali ya kumadokero, ndipo mkazi adaimambo pa tsinde la phiriro, koma ku mbali ya kumabvadzuwa. Ndipo, tsapano awiriwo  ankuyamba kukwira phiriro. Pomwe ankuyamba kukwira phiriro, pambakhala na ntantho utali omwe umbawasiyanisa. Tsono, ali-wense akambakwira, acifendera pa nsonga pa phiriro, ntantho omwe ukhawasiyanisa ule umbafupika pang’ono na pang’ono. Kodi mwakwanisa kuiwona nfundo yabwino ya ciratizoci?

⁴ Nyongo yomwe mumbacita kuti mutumikire Yahova na mtima wanu wense, tingaindendemeze na nyongo yomwe munthu angacite kuti akwire phiri. Pakuti imwepo mumbafuna Yahova, tingalewe kuti mwayamba kale kukwira phiriro. Tsono, penu imwepo munkubverana lini na mwanzanu wa m’banja, ndiye kuti munkukwira phiri limweri na ku mbali zakusiyana. Tsono, n’ciyani cingacitike pomwe awirimwe mun’pitiriza kukwira phiriro? Pomwe munkuyamba kukwira, imwepo mumbakhala wakutalikirana kwene-kwene. Tsono, mukapitiriza kucita nyongo  yakufenderera Mulungu, bzomwe bziri ninga kukwira phiri, imwepo mun’dzakhala munkufendereranambo na mwanzanu wa m’banjayo, mucilimbisa mbverano wanu. Inde, kuti mulimbise mbverano wanu na mwanzanu wa m’banja, cinsinsi cace ni kulimbisa uxamwali bwanu na Mulungu. Tsono, mungacite tani bzimwebzo?

5. (a) Kodi njiponi njira ibodzi yakufenderera Yahova pabodzi na mwanzanu wa m’banja? (b) Kodi Yahova ambayawona tani malowozi?

⁵ Njira ibodzi yakufenderera Yahova pabodzi na mwanzanu wa m’banja, ni kuteweza malango yense ya m’Bibliya yakulewa bza banja. (Psalymo 25:4; Zaiya 48:17, 18) Tenepo, onani malango yomwe mpostolo Paulo adayapereka. Iye adati: ‘Malowozi yakhale yakulemekezeka kwa wense.’ (Wahebereu 13:4) Kodi bzimwebzi bzin’funa kulewa ciyani? Fala lakuti ‘kulemekezeka’ limbathandauza cinthu cakufunika kwene-kwene. Ndipo ndimo momwe Yahova ambayawonera malowozi. Iye ambawona malowozi kukhala cinthu cakufunika kwene-kwene.

6. Kodi mafala yomwe Paulo adalewa pa nkhani ya malowozi yankulatiza ciyani? Thangwe ranyi mun’funika kubvesesa bzimwebzi?

⁶ Pakuti ndimwe atumiki wa Mulungu, imwepo pabodzi na mwanzanu wa m’banja mumbadziwa kale kuti malowozi n’cinthu cakufunika kwene-kwene, ndipo njakupambulika. Yahova ndiye omwe adayambisa malowozi. (Werengani Mateu 19:4-6.) Tsono, penu munkugumana na madede m’banja, kundodziwa kokha kuti malowozi njakulemekezeka kungakuthandizeni lini kuti mumbafunane na kumbalemekezana. Tsono, n’ciyani comwe cingakuthandizeni? Onesesani na tceru momwe mpostolo Paulo adalewera bza nkhani yakulatiza ulemu. Iye alibe kulewa kuti malowozi ‘njakulemekezeka,’ koma adati malowozi ‘yakhale yakulemekezeka.’ Mpostolo Paulo akhalewa lini bzinthu bzomwe bzikhacitika kale, koma akhalewa bzinthu bzomwe wanthu akhafunikira kumbabzicita. * Kubvesesa bzimwebzi  kungakuthandizeni kudziwa bzomwe mungacite kuti muyambe pomwe kumbam’funa mwanzanu omwe mudalowolana nayeyo. Kodi thangwe ranyi bziri tenepoyo?

7. (a) Kodi ifepano timbabvera bzakutonga bziponi bza m’Bibliya, ndipo thangwe ranyi? (b) Kodi tikambabvera, bzakutewera bzace bzimbakhala bziponi?

⁷ Kumbukirani pang’ono momwe mumbawonera bzakutonga bzinango bza m’Bibliya, ninga bzomwe bzimbalewa kuti timbapalizire na kumbatsonkhana pabodzi. (Mateu 28:19; Wahebereu 10:24, 25) N’cadidi kuti bzimbakhala bzakutinesa kubvera nthawe zinango. Pakuti wanthu winango omwe timbawapalizirawo angatibvere lini, ayai basa lomwe timbaphata lingatinetese, ticisaya mphanvu kuti tiyende ku mitsonkhano. Tsono, ifepano timbapitiriza basi kuyenda mu utumiki na ku mitsonkhanoko. Palibe omwe angatiletse kucita bzimwebzi, ne Sathani caiye! Thangwe ranyi? Thangwe timbafuna Yahova kucokera pansi pa mtima, ndipopa timbabvera bzakutonga bzace. (1 Juwau 5:3) Kodi bzakutewera bzace bzimbakhala bziponi? Kupalizira wanthu pabodzi na kuyenda ku mitsonkhano kumbatithandiza kukhala na mtendere wa mu mtima, ndipo timbakondwa kwene-kwene pakudziwa kuti tinkucita kufuna kwa Mulungu. Ndipo, cikondwesoco cimbathumizira mphanvu zathu kuti tipitirize kumbabvera Mulungu. (Nehemiya 8:10) Kodi tinkupfunza ciyani pamwepa?

8, 9. (a) Kodi n’ciyani cingakuthandizeni kubvera cakutonga cakulewa bza kulemekeza malowozi, ndipo thangwe ranyi? (b) Kodi n’ziponi nfundo ziwiri zomwe tin’cezerana tsapano?

⁸ Ninga momwe tawoneramu, kufuna Mulungu kucokera pansi pa mtima kumbacitisa kuti imwepo mumbabvere bzakutonga bzace pa nkhani ya kupalizira na kuyenda ku mitsonkhano, napo mugumane na mabvuto. Mu njira ibodzi-bodziyi, kufuna Yahova kungakuthandizenimbo kubvera cakutonga cace cakulewa kuti ‘malowozi yanu yakhale yakulemekezeka,’ napo kuti kucita bzimwebzo kungakhale kwakunesa. (Wahebereu 13:4; Psalymo 18:29; Mpalizi 5:4) Kuthumizira bzimwebzi, ninga momwe nyongo yanu yakuyenda mu utumiki na ku mitsonkhano imbakubwereserani bzisimbo bza Mulungu, kucitambo nyongo yakulemekeza  malowozi yanu kun’dzacitisa kuti Yahova akusimbenimbo.—1 Watesalonika 1:3; Wahebereu 6:10.

⁹ Tsono, kodi mungacite ciyani kuti malowozi yanu yakhale yakulemekezeka? Mun’funika kutcenkha bzicito bzomwe bzingadzonge malowozi yanuyo. Ndipo, mun’funikambo kucita bzinthu bzomwe bzingalimbise banja lanu.

10, 11. (a) Kodi n’ciyani cimbacitisa kuti malowozi yakhale yakusaya kulemekezeka? (b) Kodi tin’funika kumubvunza ciyani mwanzathu wa m’banja?

¹⁰ Mkazi munango omwe ni Mkristau adalewa kuti: “Ndimbapemba kwa Yahova kuti andipase mphanvu yakuti ndikwanise kupirira.” Kodi kupirira ciyani? Iye adati: “Bayangu ambalewalewa lini bwino na inepano. N’cadidi kuti ndiribe bzironda m’thupimu, koma mu mtimamu ndina bzironda thangwe ra kutukwanidwa naye. Iye ambandilewa kuti: ‘Iwepo umbandinetesa.’ Ulibe phindu na libodziro.” Mkaziyu ankulewa bza bvuto lakucitisa thupo kwene-kwene, lomwe ni kulewana bzinthu bzakuipa m’banja.

¹¹ Mwamuna na mkazi omwe ambatumikira Mulungu, akambapwetekana na mafala yakuipa, bzimbapasa nsisi kwene-kwene. Wanthu akambaphatisa basa mafala yakuipa m’banja mwawo, malowozi yawo yambakhala lini yakulemekezeka. Kodi banja lanu liri tani pa nkhani imweyi? Njira ibodzi yakudziwira bzimwebzi ni kubvunza mwakubzicepswa mwanzanu omwe mudalowolana nayeyo kuti: “Kodi mafala yangu yambakutokonya tani?” Penu mwanzanuyo atawira kuti mafala yanu yambamupweteka kawiri-kawiri, imwepo mun’dzafunikira kucinjiratu kuti bzinthu bzikhale bwino.—Wagalata 5:15; werengani Wayefezo 4:31.

12. Kodi n’ciyani cingacitise kuti Mulungu aleke kubvuma kunama kwathu?

¹² Kumbukirani kuti momwe mumbalewalewera na mwanzanu wa m’banja kungalimbise ayai kudzonga uxamwali bwanu na Yahova. Bibliya limbati: ‘Penu munthu ankubziwona  ningati ambanamata Mulungu, koma ankukwanisa lini kutonga bwino lirime lace, munthu umweyo ankunamiza mtima wace, ndipo kunamata kwace n’kwapezi.’ (Tiyago 1:26) Tenepo, bzomwe mumbalewa bzimbatokonya kwene-kwene kunamata kwanu Mulungu. Bibliya limbathandizira lini nzeru yakuti munthu ambanamate Mulungu, ndipo pa nthawe ibodzi-bodziyo ambacite bzomwe an’funa kumui kwace. Lekani kubzinamiza. Nkhani imweyi njakufunika kwene-kwene. (Werengani 1 Pedru 3:7.) Imwepo mungakhale na luso na kumbacitambo bzinthu na nyongo. Tsono, mukambapweteka utowa mwanzanu wa m’banja mwakuphatisa basa mafala yakuipa, mun’dzacitisa kuti malowozi yanu yaleke kukhala yakulemekezeka, ndipo Mulungu an’dzabvuma lini kunamata kwanuko.

13. Kodi ni bzicito bziponi bzomwe bzingacitise kuti munthu ambapweteke mwanzace wa m’banja?

¹³ Wanthu wakulowolana an’funika kumbacita bzinthu mwakusamala kwene-kwene kuti aleke kumbapwetekana mu mtima na bzicito, napo mwakusaya kuzindikira. Onani bziratizo bziwiribzi: (1) Mkazi omwe ankulera yekha wana ambapfuwira mtedwe kawiri-kawiri m’bale omwe ana banja lace kuti amukumbire nzeru, acimbamalizira kuceza kwa nthawe itali. (2) Mwamuna wakusaya kulowola mdzinga uli-wense ambayenda mu utumiki na mkazi omwe ana banja lacembo. Wanthu awiri omwe ana mabanja mu bziratizobzi angakhale na mathangwe yabwino; tsono, kodi bzicito bzawobzi bzingatokonye tani anzawo omwe adalowolana nawo? Mkazi munango omwe akhali pa cakucitika ninga cimweci, adati: “Bzimbandiwawa kwene-kwene kuwona bayangu ankumala nthawe itali acimbathandiza mpfumakazi ya mu gwere. Bzimbacitisa kuti ndibziwone ninga wakunyozeka.”

14. (a) Kodi mafala ya pa Ciyambo 2:24 yambalewa bza udindo buponi bomwe anabo wale omwe ali m’banja? (b) Kodi tin’funika kubzibvunza ciyani?

¹⁴ Mpsakubveseseka kuti adakhumudwa kwene-kwene mkaziyu pabodzi na akazi winango omwe adawonekeredwa na bvuto limweri. Anzawo omwe adalowolana nawowo alibe kubvera malango ya Mulungu pa nkhani ya malowozi, yakuti: ‘Mwamuna an’dzasiya baba wace na mai wace, acidzaphatana na mkazace.’ (Ciyambo 2: 24) N’cadidi kuti wanthu wakulowolana ambapitiriza kulemekeza abereki wawo. Tsono, makonzedwe ya Mulungu  njakuti munthu omwe ana banja, an’funika kuikha patsogolo mkazi wace ayai bayace. Tenepo, Mkristau omwe ana banja akambamala nthawe itali acimbaceza na anzace wacikhulupiro, ndipo maka-maka na akazi ayai amuna omwe si mwanzawo wa m’banja, ambamalizira kubzibweresera mabvuto m’banja mwace. Kodi bvuto limweri linkubweresambo phiringu m’banja mwanu? Bzibvunzeni kuti: ‘Kodi ndimbam’pasa mkazangu ayai banyangu nthawe, tceru na lufoyi lense lomwe ambafunikira?’

15. Mwakubverana na Mateu 5:28, thangwe ranyi Akristau an’funika kutcenkha kumala nthawe itali na mwamuna ayai mkazi omwe si wawo?

 ¹⁵ Kuthumizira bzimwebzi, Akristau omwe ana banja akambamala nthawe itali na akazi ayai amuna omwe si wawo, ambabziikha utowa pa ngozi. Mpsakupasa nsisi kulewa, koma Akristau winango omwe ana banja, adamalizira kumbafunana na wanthu winango omwe akhali lini mwanzawo wa m’banja thangwe ra kuzolowerana kwene-kwene. (Mateu 5:28) Bzimwebzi bzacitisa kuti winango afike pakucita bzinthu bzakusaya kulemekezesa malowozi yawo. Kumbukirani bzomwe Paulo adafotokoza pa nkhani imweyi.

16. Kodi Paulo adacenjeza ciyani pa nkhani ya malowozi?

¹⁶ Mpostolo Paulo atandomaliza kupereka malango yakut: ‘Malowozi yakhale yakulemekezeka,’ iye adacenjeza kuti: ‘Pomwe pan’gona wanthu wakulowolana paleke kupswipizidwa, pakuti Mulungu an’dzayeruza anzazi na anyaupombo.’ (Wahebereu 13:4) Pakulewa mafala yakuti ‘pomwe pan’gona wanthu wakulowolana,’ Paulo akhalewa bza kugonana. Kugonanako kumbakhala lini kwakupsipizidwa penu wanthuwo adalowolana. Tenepo, Akristau ambateweza mafala yakufuliziridwa yakuti: ‘Kondwa na mkazi wa pa utswaka bwako.’—Mimwani 5:18.

17. (a) Thangwe ranyi Akristau an’funika lini kutewezera makumbukidwe ya ku dziko pa nkhani ya upombo? (b) Kodi tingamutewezere tani Djobi?

¹⁷ Wanthu omwe ambagonana na mwamuna ayai mkazi omwe si wawo, ambalatiza kuti ankulemekeza lini na pang’onopo mitemo ya Mulungu yakulewa bza makhalidwe yabwino. Ndipo, nsiku zino, wanthu azinji ambawona kuti kucita upombo si kuphonya. Tsono, bziribe basa momwe wanthu winango ambaiwonera nkhani imweyi, Akristau an’funika lini kutewezera makumbukidwe yamweya. Iwo ambadziwa kuti pa nthawe yace, ‘Mulungu an’dzayeruza anzazi na anyaupombo.’ (Wahebereu 10:31; 12:29) Tenepo, Akristau wacadidi ambateweza makumbukidwe ya Yahova pa nkhaniyi. (Werengani Waroma 12:9.) Kumbukirani kuti Djobi adalewa kuti: ‘Ndacita mpangano na maso  yangu.’ (Djobi 31:1) Pakufuna kutcenkha ciri-cense comwe cingawafikise pakucita upombo, Akristau wacadidi ambasamala pa bzomwe ambawona, ndipo ambalambiratu kunyang’anisa munthu omwe si mkazi ayai mwamuna wawo na cikhumbo cakuipa.—Onani Nkhani Yakuthumizira ya msolo wakuti “Momwe Bibliya Limbawonera Nkhani ya Kulambana na Kupumirana.”

18. (a) Kodi Yahova ambawona kuti kucita upombo n’kuphonya kukulu? (b) Kodi pana kundendemerana kuponi pakati pa kucita upombo na kunamata bzifanikiso?

¹⁸ Kodi Yahova ambawona kuti kucita upombo n’kuphonya kukulu? Cakutonga ca Mozeji cimbatithandiza kubvesesa momwe Yahova ambaiwonera nkhaniyi. Mu nthawe ya Ajirayeri, kucita upombo na kunamata bzifanikiso bzikhali pakati pa pikado zomwe munthu omwe akhazicitayo, akhaphedweratu. (Mwambo 20:2, 10) Kodi mukukwanisa kuwona kundendemerana pakati pa kucita upombo na kunamata bzifanikiso? Mjirayeri omwe akhanamata bzifanikiso akhaswa mpangano omwe iye akhadacita na Yahova. Ndipo, Mjirayeri omwe akhacita upombo akhaswambo mpangano omwe iye akhadacita na mkazi wace ayai bayace. Munthu omwe akhacita upombo pabodzi na munthu omwe akhanamata bzifanikiso, wensenewo akhacita bzinthu mwakusaya kukhulupirika. (Kufuluka 19:5, 6; Bzakutonga 5:9; werengani Malakiya 2:14.) Tenepo, awiriwo akhakhala na mulandu pamaso pa Yahova, omwe ni Mulungu wakukhulupirika.—Psalymo 33:4.

19. Kodi n’ciyani cingapase mphanvu munthu kuti afunisise kutcenkha kucita upombo, ndipo thangwe ranyi?

¹⁹ N’cadidi kuti Akristaufe tiri lini pansi pa Cakutonga ca Mozeji. Tsono, kudziwa kuti kwa Ajirayeri wakale-kale, kucita upombo kukhali kuphonya kukulu, kungatipase mphanvu kuti tifunisise kuleka kucita bzimwebzi. Thangwe ranyi? Tindendemeze tenepayu: Kodi imwepo mungayezere kupita mu gereja, kugodama, mucipemba kwa cifanikiso? Pinango mungalewe kuti: ‘Nee, ndingacite lini na pang’onopo!’ Tsono, munthu acikupasani kobiri zizinji, kodi mungatengeke, mucibvuma kucita bzimwebzo? Pinango mungalewe pomwe kuti: ‘Ndingacite lini bzimwebzo!’ Inde, Mkristau wacadidi angafune lini ne kundokumbukira pang’ono pokha bza kuphindukira Yahova,  acinamata cifanikiso. Mu njira ibodzi-bodziyi, Akristau an’funika kunyansidwa na makumbukidwe yomwe yangawacitise kuti aphindukire Mulungu wawo pabodzi na mwanzawo wa m’banja mwa kucita upombo. An’funika kucita bzimwebzo napo apumpsidwe tani. (Psalymo 51:1, 4; Wakoloso 3:5) Tin’funika lini kucita pikado yomwe ingacitise kuti Sathani akondwe, koma ticinyozesa Yahova na makonzedwe ya malowozi yomwe njakupambulika.

20. Kodi n’ciyani cimbacitika na mabanja manango? Perekani ciratizo.

²⁰ Kuthumizira pa kutcenkha kucita bzinthu bzomwe bzingadzonge banja lanu, kodi mungacitembo ciyani kuti muyambe pomwe kulemekeza mwanzanu wa m’banja? Kuti mutawire mbvunzoyu, ndendemezerani malowozi na nyumba. Mafala, makhalidwe yakulatiza kuti mumbakumbukirana pabodzi na bzicito bzabwino bzakulatiza kuti mumbalemekezana bziri ninga bzinthu bzakudekesera nyumbayo. Mukambafunana kwene-kwene, banja lanu lingandendemezedwe na nyumba yomwe ina bzinthu bzizinji bzakuidekesera. Lufoyi ranu likacepa, bzakudekeserabzo bzimbamala pang’ono-pang’ono, bzicisiya banjalo lakusunama ninga nyumba yomwe iribe bzakudekesera. Pakuti mun’funa kubvera malango ya Mulungu yakuti ‘malowozi yakhale yakulemekezeka,’ imwepo mun’dzacita ciri-cense kuti bzinthu bzicinje. Ndipo, cinthu comwe n’cakulemekezeka na cakufunika kwene-kwene cimbafunika kulungamizidwa. Kodi mungacite tani bzimwebzo? Fala la Mulungu limbati: ‘Nzeru zimbamanga banja la munthu, ndipo kuzindikira kumbacitisa kuti banjalo lirimbe kwene-kwene. Kudziwa bzinthu kumbacitisa kuti bzipinda bza mkati bzidzale na bzinthu bzense bza mtengo wapadzulu na bzakukondwesa.’ (Mimwani 24:3, 4) Mbatiwoneni momwe mafalaya yangaphatisidwire basa m’banja.

21. Kodi tingalimbise tani banja lathu pang’ono na pang’ono? (Onanimbo kwadru ya msolo wakuti “ Kodi Ndingacite Tani Kuti Banja Langu Limbafambe Bwino?”)

²¹ Lufoyi lacadidi, kugopa Mulungu na kukhala na cikhulupiro  cakulimba ni makhalidwe manango yakufunika kwene-kwene kuti banja likhale lakukondwa. (Mimwani 15:16, 17; 1 Pedru 1:7) Makhalidwe yamweya yambacitisa kuti banja lirimbe. Tsono, kodi mwazindikira kuti n’ciyani cacitisa kuti bzipinda bzakulewedwa pa vesi la Mimwaniri bzidzale na bzinthu bzakufunika kwene-kwene? Ni ‘cidziwiso.’ Cidziwiso ca m’Bibliya cikaphatisidwa basa, cina mphanvu ya kucinja makumbukidwe ya wanthu, cicicitisambo kuti ayambe pomwe kufunana. (Waroma 12:2; Wafiripo 1:9) Tenepo, nthawe zomwe mun’khala pansi kuti mucezerane mwakuderekha na bayanu ayai mkazanu, mbali ya m’Bibliya, ninga kuwerenga vesi la nsiku, ayai nkhani ya mu Nsanza ya Mulindiri na Galamukani!, bzimbakhala ningati munkudinga cinthu comwe cingadekese nyumba yanu. Lufoyi lanu kwa Yahova likakupasani mphanvu yakuphatisa basa malango yomwe mwapfunzayo m’banja mwanu, bzin’dzakhala ningati munkudekesa bzipinda bza m’nyumba mwanu. Ndipo, bzakutewera bzace mpsakuti mun’dzayamba pomwe kukondwa na kufunana ninga momwe mukhacitira paciyambi.

22. Thangwe ranyi mun’dzakondwa kwene-kwene mukalimbikira kucita mbali yanu kuti mulimbise malowozi yanu?

²² N’cadidi kuti bzingatenge nthawe na nyongo kuti muyambe pomwe kudekesa nyumba yanu pang’ono na pang’ono. Tsono, mukalimbikira kucita mbali yanu kuti mulimbise malowozi yanu, mun’dzakondwa kwene-kwene thangwe ra kudziwa kuti munkubvera cakutonga ca m’Bibliya cakuti: ‘Pakulatizana ulemu, khalani patsogolo.’ (Waroma 12:10; Psalymo 147:11) Ndipo, kuthumizira bzimwebzi, nyongo yanu yakufunisisa kulemekeza malowozi yanu in’dzacitisa kuti Mulungu apitirize kukufunani.