1, 2. Цавӕр фарстайыл аныхас кӕндзыстӕм ӕмӕ цӕмӕн?

КӔД дын бинонтӕ ис, уӕд амондджын дӕ? Ӕви уӕ цард нӕ цӕуы ӕмӕ дӕ цардӕмбалимӕ уӕ кӕрӕдзийӕ адард стут? Мыййаг дын дӕ бинонты цард уӕззау уаргъ сси? Кӕд о, уӕд, ӕвӕццӕгӕн, маст кӕныс, кӕрӕдзийыл раздӕрау ӕнувыд кӕй нал стут, ууыл. Чырыстон кӕй дӕ ӕмӕ Йегъовӕйы кӕй уарзыс, уымӕ гӕсгӕ дӕ фӕнды, цӕмӕй йӕ дӕ бинонты цардӕй кадджын кӕнай. Ӕмӕ, ӕвӕццӕгӕн, мӕт кӕныс, дарддӕр нӕ хабар куыд уыдзӕн, зӕгъгӕ. Фӕлӕ афтӕ ма хъуыды кӕн, ӕмӕ дӕ уавӕры ницыуал ис саразӕн.

² Ис ахӕм чырыстон бинонтӕ, ӕмӕ кӕд раздӕр кӕрӕдзиимӕ хорз нӕ цардысты, уӕддӕр сӕ къухтӕ не ’руагътой, ӕмӕ абон тынг ӕнгом сты. Уӕдӕ дӕуӕн дӕр дӕ бон у афтӕ бакӕнын, цӕмӕй дӕ бинонты цардӕй ноджы райгонддӕр уай. Уымӕн цы хъӕуы?

3, 4. Афтӕ зӕгъӕн цӕмӕн ис, ӕмӕ, лӕг ӕмӕ ус Хуыцаумӕ ӕввахсдӕр куы кӕной, уӕд кӕрӕдзимӕ дӕр ӕввахсдӕр кӕндзысты? Ӕрхӕсс цӕвиттон.

³ Уӕ дыууӕ дӕр Хуыцаумӕ ӕввахсдӕр кӕныныл куы архайат, уӕд кӕрӕдзимӕ дӕр ӕввахсдӕр кӕндзыстут. Афтӕ зӕгъӕн цӕмӕн ис? Дӕ цӕстытыл-ма ауайын кӕн ахӕм ныв: хохыл иуырдыгӕй схизы нӕлгоймаг,  иннӕрдыгӕй та – сылгоймаг. Фыццаг кӕрӕдзийӕ тынг дард уыдысты, фӕлӕ цас уӕлдӕр хизынц, уыйас кӕрӕдзимӕ ӕввахсӕй-ӕввахсдӕр кӕнынц. Ацы цӕвиттон дын ницӕуыл дзурӕг у?

⁴ Йегъовӕйӕн ӕппӕт хъарутӕй лӕггад кӕныныл кӕй архайыс, уый абарӕн ис, хохыл уӕлӕмӕ куыд хизай, уыимӕ. Йегъовӕйы кӕй уарзыс, уымӕ гӕсгӕ, зӕгъӕн ис, ӕмӕ ныридӕгӕн хохыл хӕрдмӕ схизыс. Фӕлӕ кӕд дӕ цардӕмбалимӕ кӕрӕдзийӕ адард стут, уӕд та афтӕ рауад, цыма ды хохӕн йӕ иу фарс схизыс, дӕ цардӕмбал та – йӕ иннӕ фарс. Фӕлӕ дарддӕр уӕлӕмӕ куы хизат, уӕд цы ’рцӕудзӕн? Кӕй зӕгъын ӕй хъӕуы, райдианы кӕрӕдзийӕ тынг дард уыдзыстут. Фӕлӕ цас тынгдӕр архайат уӕлдӕр хизыныл, ома Хуыцаумӕ ӕввахсдӕр кӕныныл, уыйас кӕрӕдзимӕ дӕр ӕввахсдӕр кӕндзыстут. Уӕдӕ цӕмӕй лӕг ӕмӕ ус кӕрӕдзимӕ баввахс уой, уый тыххӕй ӕнӕмӕнг у, цӕмӕй Хуыцаумӕ баввахс уой. Уый куыд аразӕн ис?

5. а) Дӕ бон куыд у Йегъовӕмӕ ӕмӕ дӕ цардӕмбалмӕ ӕввахс кӕнын? б) Йегъовӕ бинонты цардмӕ цы цӕстӕй кӕсы?

⁵ Тынг ахсджиаг у, цӕмӕй уӕ дыууӕ дӕр архайат, Хуыцауы Ныхасы бинонтӕн цы уынаффӕтӕ ис, уыдонмӕ гӕсгӕ (Псалом 25:4; Исай 48:17, 18). Зӕгъӕм, апостол Павел радта ахӕм уынаффӕ: «Йӕ бинонты цард уӕ алкӕй цӕсты дӕр уӕд кадджын» (Дзуттӕгтӕм 13:4). Уый куыд ӕмбаргӕ у? Дзырд «кадджын» амоны, аргъ кӕнын цӕмӕн хъӕуы ӕмӕ зынаргъ цы у, уымӕ. Йегъовӕ дӕр бинонты цардмӕ ахӕм цӕстӕй кӕсы – аргъ ын кӕны ӕмӕ йӕ зынаргъыл нымайы.

6. Павел бинонты царды тыххӕй цы уынаффӕ радта, уымӕй нӕ бон цы у базонын?

⁶ Хуыцауы лӕггадгӕнджытӕ кӕй стут, уымӕ гӕсгӕ  зонут, бинонты цард зынаргъ ӕмӕ суанг табуйаг кӕй у. Йегъовӕ йын йӕхӕдӕг ӕрӕвӕрдта бындур. (Бакӕс Матфейы 19:4–6.) Фӕлӕ кӕд ныртӕккӕ зындзинӕдтӕ ӕвзарут, уӕд фаг нӕ уыдзӕн, бинонты цард кадджын кӕй у, уый зонын, цӕмӕй та кӕрӕдзийӕн аргъ кӕнат ӕмӕ кӕрӕдзи уарзат. Уӕдӕ уын цы баххуыс кӕндзӕн? Дзуттӕгтӕм 13:4 стих цы скъуыддзагӕй ист у, уымӕ лӕмбынӕг куы ’ркӕсӕм, уӕд фендзыстӕм, Павел дзы алыхуызон хъуыддӕгты фӕдыл уынаффӕтӕ кӕй дӕтты (Дзуттӕгтӕм 13:1–5). Ӕмӕ, бинонты царды тыххӕй цы загъта, уый дӕр у фӕдзӕхст кӕнӕ уынаффӕ. Ӕнӕуи нӕ загъта, «бинонты цард у кадджын», зӕгъгӕ, фӕлӕ, дам, «бинонты цард... уӕд кадджын». Уый фӕдзӕхст кӕй у, уый хъуамӕ уӕ зӕрдыл дарат. Ӕркӕсӕм, уый ахсджиаг цӕмӕн у, уымӕ.

7. а) Фыстадӕй цавӕр фӕдзӕхстытӕ ӕххӕст кӕнӕм ӕмӕ цӕмӕн? б) Хуыцауы коммӕ кӕй кӕсӕм, уый нын цы пайда у?

⁷ Ахъуыды-ма кӕн, Фыстады иннӕ фӕдзӕхстытӕм цы цӕстӕй кӕсыс, ууыл, зӕгъӕм, ахуыргӕнинӕгтӕ цӕттӕ кӕнынмӕ ӕмӕ ӕмбырдтӕм цӕуынмӕ (Матфейы 28:19; Дзуттӕгтӕм 10:24, 25). Иуӕй-иу хатт ӕнцон нӕ вӕййы ацы фӕдзӕхстытӕ ӕххӕст кӕнын. Хорз хабар кӕмӕн фӕдзурыс, уыдон дӕм, гӕнӕн ис, ма хъусой, йе та куысты афтӕ бафӕллайыс, ӕмӕ дын ӕмбырдмӕ ацӕуын зын вӕййы. Фӕлӕ уӕддӕр хорз хабар хъусын кӕныс ӕмӕ ӕмбырдтӕм цӕуыс. Ӕмӕ дӕ никӕй бон у бауромын, суанг Хӕйрӕджы бон дӕр! Цӕуылнӕ? Уымӕн ӕмӕ Йегъовӕйы тынг уарзыс, ӕмӕ дӕ фӕнды йӕ фӕдзӕхстытӕ ӕххӕст кӕнын (1 Иоанны 5:3). Уый дын цы пайда у? Уацамынды ӕмӕ ӕмбырдтӕм кӕй цӕуыс, уый фӕрцы дӕ зӕрдӕйы ис фарн ӕмӕ цин кӕныс, уымӕн ӕмӕ зоныс, Хуыцауы фӕндон кӕй ӕххӕст кӕныс. Уый фӕрцы та дӕ хъарутыл хъарутӕ бафты (Нееми 8:10). Уый куыд баст у, цы фарстайыл ныхас кӕнӕм, уыимӕ?

8, 9. а) Цы нӕ разӕнгард кӕндзӕн, нӕ бинонты цард кадджын уа, ууыл архайынмӕ ӕмӕ цӕмӕн? б) Цавӕр дыууӕ хъуыддагыл аныхас кӕндзыстӕм?

 ⁸ Куыд федтам, афтӕмӕй, Хуыцауы тынг кӕй уарзыс, уый дӕ разӕнгард кӕны йӕ фӕдзӕхстытӕ ӕххӕст кӕнынмӕ – зын дын куы вӕййы, уӕд дӕр фӕхъусын кӕныс ӕмӕ ӕмбырдтӕм фӕцӕуыс. Раст афтӕ, Йегъовӕйы кӕй уарзыс, уымӕ гӕсгӕ дӕ фӕнддзӕн, бинонты царды фӕдыл Библийы цы фӕдзӕхст ис, уый дӕр ӕххӕст кӕнын – архайдзынӕ, цӕмӕй дӕ бинонты цард кадджын уа, уый дын зын куы уа, уӕд дӕр (Дзуттӕгтӕм 13:4; Псалом 18:29; Екклесиаст 5:4). Йегъовӕ уый ӕнӕфенгӕ нӕ фӕуыдзӕн ӕмӕ дын арфӕ  кӕндзӕн, хъусын кӕныныл ӕмӕ ӕмбырдтӕм цӕуыныл ӕппӕт тыхтӕй кӕй архайыс, уый тыххӕй дын куыд арфӕ кӕны, афтӕ (1 Фессалоникӕгтӕм 1:3; Дзуттӕгтӕм 6:10).

⁹ Уӕдӕ дӕ бон цы у аразын, цӕмӕй дӕ бинонты цард кадджын уа? Фыццаг: хъуамӕ дӕхи хизай, уӕ цард уын чи фехалдзӕн, ахӕм хъуыддӕгтӕй. Дыккаг: хъуамӕ бӕлвырд къахдзӕфтӕ саразай, цӕмӕй та кӕрӕдзимӕ баввахс уат.

10, 11. а) Бинонты цард цы ӕгад кӕны? б) Дӕ цардӕмбалы дӕ бон цӕмӕй у бафӕрсын?

¹⁰ Иу чырыстон сылгоймаг загъта: «Йегъовӕмӕ фӕкувын, цӕмӕй мын сфӕразынӕн хъарутӕ радта». Цымӕ цы сфӕразынӕн? «Мӕ лӕг мын йӕ ныхӕстӕй мӕ зӕрдӕ скъахы. Йӕ рӕхуыст ныхӕстӕй мӕ буарыл хъӕдгӕмттӕ нӕ фӕзыны, фӕлӕ мӕ зӕрдӕйы та? Ӕдзух мын афтӕ кӕны, „мӕ бон дӕ нал у“, „ды ницӕйаг дӕ“». Ацы сылгоймаг ракодта, уӕлӕнгай цӕстӕй кӕсӕн кӕмӕ нӕй, ахӕм хъуыддаджы кой – цардӕмбалӕн ӕфхӕрӕн ныхӕстӕ кӕнын.

¹¹ Куыд зын вӕййы, чырыстон лӕг ӕмӕ ус кӕрӕдзийӕн алы ӕфхӕрӕн ныхӕстӕ куы фӕкӕнынц ӕмӕ кӕрӕдзийы зӕрдӕты, афтӕ тагъд чи не сдзӕбӕх вӕййы, ахӕм хъӕдгӕмттӕ куы ныууадзынц, уӕд! Ахӕм бинонты цард кадджын схонӕн нӕй. Дӕ бинонтӕй та цы зӕгъӕн ис? Дӕ бон у дӕ цардӕмбалы фӕлмӕнӕй бафӕрсын: «Мыййаг дӕ мӕ ныхӕстӕй нӕ фӕхъыг кӕнын?» Кӕд дӕ цардӕмбал афтӕ зӕгъа, ӕмӕ йын дӕ ныхӕстӕй арӕх йӕ зӕрдӕ скъахыс, уӕд хъуамӕ бацархайай, цӕмӕй афтӕ мауал уа (Галатӕгтӕм 5:15; бакӕс Ефесӕгтӕм 4:31).

12. Кӕд уыдзӕн зӕгъӕн, ӕмӕ адӕймагӕн йӕ лӕггад Хуыцауы цӕсты ницы у?

 ¹² Дӕ зӕрдыл дар иу хъуыддаг: дӕ цардӕмбалимӕ куыд ныхас кӕныс, уый фӕзындзӕн, Йегъовӕ дӕм цы цӕстӕй кӕсдзӕн, ууыл. Библийы фыст ис: «Кӕд исчи йӕхи Хуыцауӕн кувӕг адӕймагыл нымайы, йе ’взаджы рохтыл та нӕ хӕцы, уӕд йӕхи сайы, ӕмӕ ахӕмӕн йӕ дин ницы у» (Иаковы 1:26). Цы фӕзӕгъыс ӕмӕ йӕ куыд фӕзӕгъыс, уый дӕ лӕггадимӕ ӕнгом баст у. Чи зоны, исчи афтӕ хъуыды кӕны, зӕгъгӕ, кӕд Хуыцауӕн лӕггад кӕнын, уӕд, мӕ хӕдзары цы цӕуы, уый афтӕ диссаг нӕу. Фӕлӕ Библийы афтӕ никуы ис фыст. Ӕмӕ дӕхи ма сай. Уыцы хъуыддагмӕ уӕлӕнгай цӕстӕй кӕсӕн нӕй. (Бакӕс 1 Петры 3:7.) Чи зоны, курдиатджын адӕймаг дӕ ӕмӕ зынгзӕрдӕйӕ лӕггад кӕныс, фӕлӕ кӕд дӕ цардӕмбалӕн барӕй рӕхуыст, ӕфхӕрӕн ныхӕстӕ фӕкӕныс, уӕд дӕ бинонты цард ӕгад кӕныс ӕмӕ Хуыцауы цӕсты дӕ лӕггад ницы у.

13. Куыд рауайы афтӕ, ӕмӕ лӕг кӕнӕ ус йӕ цардӕмбалы зӕрдӕ фӕриссын кӕны?

¹³ Афтӕ дӕр гӕнӕн ис, ӕмӕ лӕг кӕнӕ ус йӕ цардӕмбалы зӕрдӕ риссын кӕны, ӕмӕ йӕ йӕхӕдӕг та ӕмбаргӕ дӕр нӕ кӕны. Ӕркӕсӕм дыууӕ цӕвиттонмӕ. Зӕгъӕм, йӕ сывӕллоны иунӕгӕй чи хъомыл кӕны, ахӕм хо телефонӕй арӕх фӕдзуры, бинойнаг кӕмӕн ис, ахӕм ӕфсымӕрмӕ, уынаффӕ дзы фӕкуры ӕмӕ бирӕ фӕныхас кӕнынц. Кӕнӕ ӕнӕус ӕфсымӕр алы къуыри дӕр уацамынды бирӕ рӕстӕг вӕййы моймӕдзыд хоимӕ. Фыццаг цӕвиттоны цы ’фсымӕры кой ис ӕмӕ дыккаджы цы хойы кой ис, уыдонӕн, чи зоны, сӕ зӕрды ӕвзӕрӕй ницы ис. Фӕлӕ сӕ цардӕмбӕлттӕ та цы хъуыды кӕнынц? Ахӕм уавӕры чи ис, иу ахӕм сылгоймаг загъта: «Мӕ лӕг ӕндӕр хойӕн уыйбӕрц рӕстӕг кӕй рахицӕн кӕны, уый мын тынг зын вӕййы. Мӕхимӕ ницыуал фӕкӕсын».

14. а) Райдианы 2:24 стихмӕ гӕсгӕ лӕг ӕмӕ ус сӕйраджыдӕр кӕуыл хъуамӕ хъуыды кӕной? б) Цавӕр фарстатыл хъӕуы ахъуыды кӕнын?

 ¹⁴ Зын бамбарӕн нӕу, ацы хо ӕмӕ ма ноджыдӕр ахӕм уавӕры чи ис, уыдон афтӕ цӕмӕн маст кӕнынц, уый. Сӕ цардӕмбӕлттӕ куыдфӕндыйы цӕстӕй кӕсынц Хуыцауы сӕйраг фӕдзӕхстмӕ бинонты царды фӕдыл: «Адӕймаг ныууадздзӕн йӕ фыд ӕмӕ йӕ мады ӕмӕ баиу уыдзӕн йӕ усимӕ» (Райдиан 2:24). Кӕй зӕгъын ӕй хъӕуы, ус чи ракуры кӕнӕ мой чи скӕны, уый йӕ ныййарджыты раздӕрау фӕнымайы ӕмӕ сын фӕаргъ кӕны. Фӕлӕ йын Хуыцауы фӕндонмӕ гӕсгӕ сӕйрагдӕр хъуамӕ уа йӕ цардӕмбал. Ӕмӕ ӕмбырды дӕр афтӕ: чырыстӕттӕ сӕ хоты ӕмӕ се ’фсымӕрты тынг уарзынц. Фӕлӕ сӕйраджыдӕр хъуамӕ сӕ цардӕмбӕлттыл хъуыды кӕной. Уӕдӕ, бинонтӕ кӕмӕн ис, уый ӕмбырдӕй искӕимӕ бирӕ рӕстӕг куы ӕрвита кӕнӕ йемӕ ӕгӕр куы лымӕн кӕна, уӕлдайдӕр та хо ӕфсымӕримӕ кӕнӕ ӕфсымӕр хоимӕ, уӕд сӕ бинонты цард тӕссаг уавӕры ӕппарынц. Мыййаг, сымах хабар дӕр афтӕ нӕ рауад? Ахъуыды кӕн ахӕм фарстатыл: «Мӕ цардӕмбалимӕ цас рӕстӕг ӕрвитын? Бӕрӕг у, ӕцӕгдӕр ӕй кӕй уарзын? Уыцы хъуыддӕгты йӕ ницӕмӕй цух кӕнын?»

15. Матфейы 5:28 стихмӕ гӕсгӕ, чырыстонӕн цӕуылнӕ ӕмбӕлы, йӕ цардӕмбал чи нӕу, ахӕм адӕймагмӕ ӕргом ӕгӕр здахын?

¹⁵ Уымӕй уӕлдай ма, бинонтӕ кӕмӕн ис, ахӕм чырыстон, йӕ цардӕмбал чи нӕу, ахӕм адӕймагмӕ йе ’ргом ӕгӕр куы здаха, уӕд йӕхи тӕссаг уавӕры ӕппары. Хъыгагӕн, чырыстӕттӕй кӕмӕндӕрты сӕ хабар афтӕ рауад: сӕ цардӕмбал чи нӕу, ахӕм адӕймагимӕ ӕгӕр фӕлымӕн сты, ӕмӕ сӕ зӕрдӕмӕ цӕуын райдыдта (Матфейы 5:28). Ӕмӕ сӕ уый та ӕркодта, бинонты цард ноджы тынгдӕр чи ӕгад кӕны, ахӕм хъуыддӕгтӕм. Ӕркӕс-ма, апостол Павел уый тыххӕй цы загъта, уымӕ.

16. Бинонтӕ кӕмӕн ис, уыдонӕн Павел цы бафӕдзӕхста?

¹⁶ Апостол Павел афтӕ куы загъта, уӕ бинонты цард уӕд кадджын, зӕгъгӕ, уӕд ма бафӕдзӕхста: «Уӕ хуыссӕнуат ма фӕчъизи кӕнут, уымӕн ӕмӕ, хӕтгӕ чи кӕны ӕмӕ йӕ цардӕмбалыл гадзрахатӕй чи цӕуы, уыдонӕн Хуыцау кӕндзӕн тӕрхон» (Дзуттӕгтӕм 13:4). Павелы ныхӕстӕ, «уӕ хуыссӕнуат», зӕгъгӕ, амонынц ӕмуат ӕрцӕуынмӕ. Ӕмӕ уыцы хъуыддаг ӕрмӕст лӕг ӕмӕ усы ’хсӕн куы уа, уӕд бинонты цард ницӕмӕй «фӕчъизи» уыдзӕн, ома уыдзӕн ӕгъдау ӕмӕ ӕфсармы уагыл. Уымӕ гӕсгӕ чырыстӕттӕ хъусынц Хуыцауы фӕдзӕхстмӕ: «Цин кӕн дӕ усыл, де ’взонджы бонты дӕ цард кӕимӕ баиу кодтай, ууыл» (Ӕмбисӕндтӕ 5:18).

17. а) Чырыстӕттӕ хӕтындзинадмӕ адӕмы цӕстӕй цӕуылнӕ хъуамӕ кӕсой? б) Куыд ис Иовы бафӕзмӕн?

¹⁷ Йӕ цардӕмбал чи нӕу, ахӕм адӕймагимӕ ӕмуат чи ’рцӕуы, уый ӕвдисы, Хуыцауы закъӕттӕ ӕппындӕр кӕй ницӕмӕ дары. Абон бирӕтӕ ӕвзӕрыл нӕ нымайынц, адӕймаг йӕ цардӕмбалӕй уӕлдай ӕндӕр искӕимӕ ӕмуат ӕрцӕуа, уый. Фӕлӕ чырыстӕттӕ хъуамӕ адӕмы зондыл ма цӕуой. Уыдон зонынц, адӕм нӕ, фӕлӕ Хуыцау кӕй тӕрхон кӕндзӕн, «хӕтгӕ чи кӕны ӕмӕ йӕ цардӕмбалыл гадзрахатӕй чи цӕуы, уыдонӕн» (Дзуттӕгтӕм 10:31; 12:29). Уымӕ гӕсгӕ ацы хъуыддагмӕ ӕцӕг чырыстӕттӕ кӕсынц Йегъовӕйы цӕстӕй. (Бакӕс Ромӕгтӕм 12:9.) Ӕрхъуыды-ма кӕн Иовы ныхӕстӕ: «Ӕз мӕ цӕстытимӕ скодтон бадзырд» (Иов 31:1). Ӕцӕг чырыстӕттӕ, сӕ цардӕмбал чи нӕу, ахӕм адӕймагмӕ мондагкаст нӕ фӕкӕнынц ӕмӕ сын уый ӕххуыс кӕны, цӕмӕй хӕтындзинады ’рдӕм иу къахдзӕф дӕр ма скӕной. (Кӕс Уӕлӕмхасӕн, статья «Библийы хицӕн кӕныны ӕмӕ хицӕнтӕй цӕрыны тыххӕй цы фыст ис?».)

18. а) Йегъовӕйы цӕсты хӕтындзинад уӕззау тӕригъӕд у? б) Хӕтындзинад ӕмӕ мӕнгхуыцӕуттӕн кувын ӕмхуызон цӕмӕй сты?

 ¹⁸ Цымӕ Йегъовӕйы цӕсты хӕтындзинад уӕззау тӕригъӕд у? Ацы хъуыддаджы фӕдыл Йегъовӕ цы хъуыды кӕны, уый бамбардзыстӕм Моисейы закъоны фӕрцы. Хӕтындзинад ӕмӕ мӕнгхуыцӕуттӕн кувын Израилы  нымад уыдысты, мӕлӕты тӕрхон кӕй тыххӕй хастой, ахӕм фыдракӕндтыл (Левит 20:2, 10). Ацы дыууӕ хъуыддаджы ӕмхуызон цӕмӕй сты? Мӕнгхуыцӕуттӕн чи куывта, уыцы израилаг-иу фехӕлдта, Йегъовӕимӕ йын цы бадзырд уыд, уый. Хӕтгӕ чи кодта, уый та-иу фехӕлдта, йӕ цардӕмбалимӕ кӕй скодта, уыцы бадзырд. Сӕ дыууӕ дӕр кӕуылдӕр гадзрахатӕй рацыдысты (Рацыд 19:5, 6; Дыккаг закъон 5:9; бакӕс Малахийы 2:14). Уымӕ гӕсгӕ сӕ дыууӕ дӕр уыдысты, иузӕрдион чи у ӕмӕ ӕууӕндӕн кӕуыл ис, уыцы Хуыцау Йегъовӕйы тӕрхоны аккаг (Псалом 33:4).

19. Хӕтындзинадӕй нӕхи ноджы тынгдӕр цӕй фӕрцы хиздзыстӕм?

¹⁹ Чырыстӕтты Моисейы закъон ӕххӕст кӕнын нал хъӕуы. Фӕлӕ рагон Израилы дӕр хӕтындзинад уӕззау тӕригъӕд кӕй уыд, уый сӕ зӕрдыл куы дарой, уӕд дзы сӕхи ноджы тынгдӕр хиздзысты. Цӕмӕн? Ахъуыды-ма кӕн: аргъуанмӕ бацӕуис ӕмӕ нывы раз дӕ зонгуытыл ӕрлӕууис? «Никуы!» – зӕгъдзынӕ ды. Ӕмӕ дын бирӕ ӕхца куы дӕттиккой, уӕд та? Уӕддӕр не сразы уаис. Мӕнгхуыцӕуттӕн кувын ӕмӕ афтӕмӕй Йегъовӕйыл гадзрахатӕй рацӕуын – ӕрмӕст уыцы хъуыды дӕр ӕцӕг чырыстонӕн ӕнад у. Раст афтӕ ӕнад хъуамӕ уа чырыстонӕн, йӕ цардӕмбалыл ӕмӕ афтӕмӕй Йегъовӕйыл дӕр гадзрахатӕй рацӕуа, уыцы хъуыды дӕр, ахӕм тӕригъӕд саразынмӕ йӕ цыфӕнды ма цыбӕл кӕна, уӕддӕр (Псалом 51:1, 4; Колоссӕгтӕм 3:5). Мах нӕ фӕнды ахӕм ми саразын, цӕмӕй Хӕйрӕг цин кӕна, Йегъовӕ ӕмӕ нӕ бинонты цард та фегад уой.

20. Иуӕй-иу бинонтыл цы ’рцӕуы? Ӕрхӕсс цӕвиттон.

²⁰ Дӕ бон цы у саразын, цӕмӕй дӕ цардӕмбалӕн ногӕй аргъ кӕнын райдайай? Бинонты цард абарӕн ис  хӕдзаримӕ. Фӕлмӕн ныхас, хӕларзӕрдӕдзинад ӕмӕ, лӕг ӕмӕ ус кӕрӕдзийӕн кӕй аргъ кӕнынц, уый ма ноджыдӕр бӕрӕг кӕмӕй у, ӕндӕр ахӕм хъуыддӕгтӕ та абарӕн ис, хӕдзар кӕмӕй фидауы, ахӕм дзауматимӕ. Кӕрӕдзийыл ӕнувыд куы уат, уӕд уӕ бинонтӕ уыдзысты, алы рӕсугъд дзауматӕ кӕм ис ӕмӕ адӕймагӕн хорз кӕм у, ахӕм хӕдзары хуызӕн. Кӕд уӕ уарзондзинады зынг мынӕг кӕнын райдыдта, уӕд та уыцы рӕсугъд дзауматӕ иугай-дыгай фӕцыдӕр уыдзысты ӕмӕ уӕ «хӕдзар» суыдзӕн хасты хуызӕн. Фӕлӕ дӕ Хуыцауы фӕдзӕхст ӕххӕст кӕнын кӕй фӕнды, «уӕ бинонты цард... уӕд кадджын», зӕгъгӕ, уымӕ гӕсгӕ дӕ бафӕнддзӕн уавӕр фӕхуыздӕр кӕнын. Дӕ цӕсты кадджын цы у ӕмӕ дын зынаргъ цы у, уый сцалцӕг кӕнай ӕмӕ йӕ бадзӕбӕхтӕ кӕнай, уый йӕ фыдӕбоны аргъ у. Уый тыххӕй дӕ бон цы у саразын? Хуыцауы Ныхасы фыст ис: «Хӕдзар сырӕзы зонды фӕрцы ӕмӕ фидар кӕны арфуынындзинады фӕрцы. Ӕмӕ зонындзинӕдты фӕрцы хӕдзары къуымтӕ байдзаг вӕййынц алыхуызон зынаргъ ӕмӕ рӕсугъд дзауматӕй» (Ӕмбисӕндтӕ 24:3, 4). Ӕркӕсӕм, ацы ныхӕстӕ бинонты цардмӕ куыд хауынц, уымӕ.

21. Лӕг ӕмӕ усӕн сӕ бон цы у аразын, цӕмӕй та кӕрӕдзимӕ баввахс уой? (Ноджыдӕр кӕс рамкӕ « Мӕ бон цы у саразын, цӕмӕй кӕрӕдзийыл ӕнувыддӕр суӕм?».)

²¹ Амондджын бинонтӕ кӕм цӕры, уыцы хӕдзары «зынаргъ... дзауматӕй» иуӕй-иутӕ сты ӕцӕг уарзондзинад, фидар уырнындзинад  ӕмӕ, Хуыцауӕй кӕй тӕрсынц, уый (Ӕмбисӕндтӕ 15:16, 17; 1 Петры 1:7). Ахӕм бинонты кӕрӕдзийӕ ницы фӕхицӕн кӕндзӕн. Фӕлӕ ӕмбисонды куыд бакастыстӕм, афтӕмӕй хӕдзары къуымтӕ зынаргъ дзауматӕй цӕй фӕрцы байдзаг вӕййынц? «Зонындзинӕдты фӕрцы». Ӕмӕ уый ӕцӕгдӕр афтӕ у. Библийы цы зонындзинӕдтӕ ис, уыдонӕн ахӕм тых ис, ӕмӕ адӕймагӕн йӕ зондахаст фӕивынц ӕмӕ йӕ баразӕнгард кӕнынц, цӕмӕй та йӕ цардӕмбалы раздӕрау бауарза (Ромӕгтӕм 12:2; Филиппӕгтӕм 1:9). Уӕдӕ-иу дӕ цардӕмбалимӕ иумӕ куы ’рбадат ӕмӕ Библийӕ цавӕрдӕр скъуыддзагыл, зӕгъӕм, алы боны стихыл, кӕнӕ бинонты царды тыххӕй «Хъахъхъӕнӕн мӕсыг»-ӕй йе та «Райхъал ут!»-ӕй ист статьятыл сабырӕй куы ныхас кӕнат, уӕд, зӕгъӕн уыдзӕн, ӕмӕ алырдыгӕй ракӕс-бакӕс кӕнут, уӕ хӕдзар уын чи срӕсугъд кӕндзӕн, ахӕм дзаумамӕ. Йегъовӕйы кӕй уарзут, уымӕ гӕсгӕ уӕ, ӕвӕццӕгӕн, бафӕнддзӕн, цы уынаффӕйыл аныхас кодтат, уымӕ гӕсгӕ цӕрын. Ӕмӕ уӕд уый афтӕ уыдзӕн, цыма уыцы рӕсугъд дзаума уӕ хӕдзармӕ бахастат. Ӕмӕ та уӕ «хӕдзар» раздӕрау йӕ хуыз скалдзӕн ӕмӕ уӕ йӕ хъармӕй тавдзӕн.

22. Лӕг ӕмӕ ус кӕрӕдзимӕ ӕввахсдӕр кӕныныл куы архайой, уӕд сын уый цины хос цӕмӕн уыдзӕн?

²² Хӕдзар чи рӕсугъд кӕны, уыцы дзауматӕ иугай фӕстӕмӕ сӕ бынӕтты сӕвӕрынӕн бахъӕудзӕн дзӕвгар рӕстӕг ӕмӕ тыхтӕ. Фӕлӕ, дӕ бон цы у, уый куы аразай, уӕд дӕхӕдӕг дӕр цин кӕндзынӕ, уымӕн ӕмӕ афтӕмӕй ӕххӕст кӕндзынӕ Библийы фӕдзӕхст: «Кӕрӕдзийӕн кад кӕнынмӕ-иу иу иннӕйы разӕй фӕуӕд» (Ромӕгтӕм 12:10; Псалом 147:11). Уымӕй ахсджиагдӕр та уый у, ӕмӕ дӕ бинонты цард кадджын кӕныныл зӕрдиагӕй куы архайай, уӕд дӕхи Хуыцауы уарзтӕй ӕнӕхай нӕ фӕкӕндзынӕ.