1, 2. Ka sạio‘ teset ta ‘is la hạifäegag sin, ma hün se tese?

KA TE KA ‘äe ‘inos? Kepoi ka ‘ī, te ka ‘ou ‘inos ta iạ hū ne ‘oaf‘ofa, ne te ka ‘äe agtạu ma pefä‘ ‘e ‘ou ‘inos ta? Ka te ka ‘äe ma ‘ou vävän ta tokamuạr ‘e la hại‘eleag? Te ka ‘äe rötröt‘ạkia noanoa ne ‘omuạr mȧür fak ‘inos ta ka kat ‘oaf‘oaf ra? Kepoi ka ‘ī, taf pạu ne ‘äe kokon, ‘e rēko ‘oaf‘ofat ne ‘äe pō ‘e ‘on mumua, tokana. ‘E rēko ‘äe rot fakKaristo, ‘äe ‘oaf la ‘ou ‘inos ta la a‘kölör‘ạkia Jihova, ‘Ạitut ne ‘äe hanis sin. Ka ne ‘ou fūfū ‘e ‘on ‘i‘i kop ma ta ho‘am kokono ma rū se ‘ou huga. La fak ma se, figalelei ma se a‘vạhia ne tē ne soko kat ‘es potot ra.

² ‘E terạni te ‘i, ma ‘on ‘inos rot fakKaristo ne noh ag‘esea, ka ‘e ta av het ka iris kat hại‘eleag ra ma ‘oris väväne ne ‘oris hạina. Ka iris ‘i pō ma ao sal la a‘ne‘ne‘ạkia ‘oris hạikạinagaga. ‘Äe tape‘ma la pō la ‘oaf‘oaf ka fürmariạ ‘e ‘ou ‘inos ta. Ka la pō tapen?

3, 4. Ka po ‘e tese ta ‘inoso la pō la hại‘eleag kepoi ka iriạ la ‘ut a‘el se ‘Ạitu? A‘tatạu‘ạkia.

³ ‘Äe la po la hại‘eleag ma ‘ou vävän ta ne ‘ou hạina kepoi ka ‘ạuạr la nā ‘omuạr vahia la ‘ut a‘el se ‘Ạitu. Ka ‘e rēko tese? ‘Is la ‘io se ta a‘tatạu‘ȧk het: Re a‘häe se ta sol ti‘ut ka is jiạk—iạ ofrạu ‘e hün hā ne sol ta ka jiạkjiạk ‘e uluạg he ta.Ta fāat fūfūen ‘e hün hā ne sol ta ‘e utut te not  ta, ka ta hạnit fū agạim iạ ‘e hanhapa te tore, ‘e saot ta, ma tä iriạ kamat la jor ag‘ȧk se rere. ‘E avat ne iriạ nōnō ‘el ma se hün hā ne sol ta, iriạ väevā sousou pạu. Ka ‘e avat ne iriạ jor ma kikia la lamlam se uluạg jiạkjiạk ne sol ta, iriạ kamat la hại‘eleag. Ka te ka ‘äe pō resön a‘ne‘ne‘ȧk huạg ne fäeag a‘tatạu‘ȧk hete‘?

⁴ ‘E ‘ou fe‘eni la ‘atakoa‘ạkia ‘ou agaga se Jihova la pō la a‘tatạu‘ȧk se fe‘enit ne ‘äe rē la jor se uluạg ne sol ta. ‘E rēko ‘ou hanisi se Jihova, ‘äe nā pạu ‘ou vahia ma ‘ou ne‘ne‘i. Kepoi ka ‘äe ma ‘ou vävän ta ne ‘ou hạina tokamuạr ‘e la hại‘eleag, kop ma ‘ạuạr jor agại se uluạg ne sol ta. Ka tes ta soko ‘e avat ne ‘ạuạr jor ma kikia se uluạg sol ta? Kop ma ‘e ‘on kamataga, ‘ạuạr väevā. Ka fe‘en ne ‘äe rē la  hại‘eleag ma ‘Ạitu,—‘e ‘omuạr joroag ag‘ȧk se uluạg sol ta—ta hele‘ue la ‘ạuạr la hại‘eleag le‘et se le‘et. ‘I, iạ tē pumuet la ‘ut a‘el se ‘Ạitu, ‘e rēko iạ ta salat ne ‘äe la pō la hại‘eleag ma ‘ou vävän ta ne ‘ou hạina. Ka la pō tapen la ‘äe la a‘sokoa tē ta‘ag?

5. (a) Ka tes ta sal ‘eseat ne la pō la a‘elea ‘äe se Jihova ma se ‘ou vävän ta ne ‘ou hạina? (e) Ka tes ta räe ‘on Jihova se ‘inoso?

⁵ Ta sal pumuet la ‘äe ma ‘ou vävän ta ne ‘ou hạina la jor se uluạg sol ta, ta ‘omuạr la tạupir se muạ‘ạkiạg ne ‘inoso ‘e fäeag ‘on ‘Ạitu. (Salamo 25:4; Aisea 48:17, 18) ‘Is la rē a‘häe se pạin het ‘e fäeag puer‘ȧk ne ‘apostol ta Paula ‘ea: Inos a‘lele la a‘pumuạ‘ȧk ‘e te‘ ne ‘ạus ‘atakoa.” (Hiperiu 13:4) Ka tes ta ‘on fūạga? Fäeag te‘ “a‘pumuạ‘ȧk” ‘on fūạga tēet ne ‘e‘ȧk ka pumua. Ma ta‘ag räe ‘on Jihova se ‘inoso—iạ ‘ē‘ȧk ‘inoso ma hat la tē pumuet.

6. Tes ta fäeag puer‘ȧk ‘on Paula kel‘ȧk hün se ‘inoso, ma ‘e rēko tese ta iạ ‘es‘ao la ‘is la a‘häe‘ȧk?

⁶ La fak ma ne ạuạr agag se Ạitu, ạuạr ‘inea vạhia ne ‘inoso iạ tē pumuet ka tē ha‘a tape‘ma. Jihova ta kamatan fūfū‘ȧk ne ‘inoso. (Hat Mataio 19:4-6.) Ka kepoi ka hạikạinagag ne ‘ou mȧür fak ‘inos ta ma ‘on pefä‘ ‘e ‘on ‘i‘i, ‘ou ‘ineag ne ‘inoso la a‘pumuạ‘ȧk iạ kop ma kat vȧh ra la rue‘ạkia ‘äe ma ‘ou vävän ta ne ‘ou hạina la hạihanisiạg ma hại‘ē‘ạkiạg. Ka tes ta la rue‘ạkia ‘äe la rē? ‘Io a‘lelei pạu se tē ne Paula ‘ea ‘e rēko ‘os la kel‘ȧk ne ‘ē‘ạkiga. Iạ kat ‘ea ra ne, inoso a‘lele iạ a‘pumuạ‘ȧk”; ka iạ ‘ea, “ka ‘inos a‘lele la a‘pumuạ‘ȧk.” Paula kat fäeag‘ạkia ra tē ne iạ a‘häe, ka iạ nā‘ia ta fäeag fas‘ạkit. * Ka ‘äe la a‘häe‘ȧk a‘lelei ne fäeag ne Paula nā iạ fäeag fas‘ạkit ka ‘eake ‘on  a‘häe ma iạ la pō la hạiasoag la rue‘ạkia ‘äe la a‘häe‘ȧk ma ‘ē‘ȧk iạ ne ‘äe ‘inos sin. Ka hün se tese?

7. (a) Ka fäeag fas‘ȧk fak Puk Ha‘ tese ta ‘is a‘soko, ma hün se tese (e) Ma tē lelei tese ta ‘äe pō ‘e tovavhina?

⁷ Rē a‘häe a‘totoak pạu ne ‘äe la kokon‘ȧk tapen foh fak Puk Ha‘a, la fak se garue la rē lelea‘ rak tē ne fäeag fas‘ạkit la tạunạ‘iạg ‘esea ‘e titi‘ạkiga. (Mataio 28:19; Hiperiu 10:24, 25) Ka la a‘sok ne foh ‘og la pō la noanoa ‘e av ‘e ‘on rereag. Famör ne ‘äe marag‘ȧk sin rog heg ta kop ma kat tȧr ‘e ra ‘äe, ne ‘äe fạiȧk sirien ‘e ‘ou garue ta ma iạ noanoa pạu la ‘äe la la‘ se tạutạunạ‘i. Ka ‘äe la marag‘ȧk makikia rog heg ne Pure‘ag ta, ma la la‘ ma kikia se tạutạunạ‘i. Kat ‘es ra ta le‘et la pō la fū‘ạkia ‘äe—ka tape‘ma se Satan ta! Ka pō ‘e? ‘E rēko ‘ou hanisit se Jihova ‘e ‘ou huga ta rue‘ạki e ‘äe la tovavhiạn se ‘on foho. (1 Jone 5:3) Ma tē lelei tes ta ‘äe pō? ‘Ou ‘es väega ‘e garue marag ta ma la‘ se tạutạunạ‘i ta nā se ‘äea fürmariạ ne a‘häe ma ‘oaf‘oaf ne huga ‘e rēko ‘äe ‘inea ne ‘äe rē‘ia pa ‘es ‘on ‘Ạitu. Ma ‘e rēko tē ‘i, ‘äe la pō la ‘es ne‘ne‘ a‘ti‘ hoi‘ȧk. (Nehemaia 8:10) Ka resön tes ta ‘is rak ‘e te‘?

8, 9. (a) Ka tes ta la pō la rue‘ạkia ‘äe la tovavhiạn se fäeag fas‘ạkit la ‘ē‘ȧk ‘ou ‘inos ta, ma hün se tese? (e) Pạin tes he ruạ ta ‘is la hạifäegag sin ‘e ‘on ‘i‘i?

⁸ La fak ma ne ‘ou hanisit se ‘Ạitu ‘e lal ne ‘ou huga rue‘ạkia ‘äe la tovavhiạn se fäeag fas‘ạki la marag‘ạkia rog heg ta ma la tạunạ‘iạg ‘esea, ‘inea ne tese se ‘on noanoa, ‘ou hanisi se Jihova la pō la rue‘ạkia ‘äe la tovavhiạn se fäeag fas‘ạkit ‘e Puk Ha‘a ne a‘mah‘ȧk la inos a‘lel [‘on‘ou] la a‘pumuạ‘ȧk,” aier ne iạ keleag la noanoa. (Hiperiu 13:4; Salamo 18:29; Le‘ Marag ta 5:4) ‘Ou fe‘enit la ‘es väeag ‘e garue marag ta ma tạutạunạ‘i ho‘am ạlạlum‘ạkiạg ma‘oi ‘e ‘Ạitu, ka Jihova la pō la räe ma la ạlạlum‘ȧk tape‘ma fe‘enit ne ‘äe rē la ‘ē‘ȧk ‘ou ‘inos ta.—1 Tesalonaika 1:3; Hiperiu 6:10.

 ⁹ Ka ‘äe la ‘ē‘ȧk tapen ‘ou ‘inos ta? ‘Äe kop la hȧ‘ȧk ‘e ag ne la mane‘ȧk ‘ou ‘inos ta. Tape‘ma, ‘äe kop la ‘io se sal ne la a‘ne‘ne‘ạkia ‘ou ‘inos ta.

10, 11. (a) Ka ag teset ta kat faktē‘ȧk ra ‘inos a‘lele? (e) Ka sạio‘ teset ta nonoj la ‘is ma ‘os väväne ne ‘os hạina la rē a‘häe se?

¹⁰ Ta hȧn rot fakKaristōot ‘ea: “Gou ro‘ạit se Jihova la nā ta ‘otou ne‘ne‘ ma la hạiasoagan gou la röt‘ȧk tē.” La röt‘ạkia tese? Iạ ‘ea: Otou vävän ta a‘rū pạu ‘otou huga ‘e fäeag ne iạ ‘ea‘ea se goua. Kop ma ‘otou foro kat lahlah ra, ka fäeag ne iạ ‘ea‘ea hạisokoag se goua, la fak se Äe ho‘am ke käveag rạurạut!’ ma Äe kat ‘es‘ao ra!’ iạ a‘rū pạu ‘otou huga.” Hȧn te‘is fäeag‘ạkia ta pefä‘ mah pạut la ‘is la kokon‘ȧk—fäeag a‘raksa‘ȧk tē ‘e laloag ne ‘inos a‘lele.

¹¹ Iạ tē ne kokonot ‘e avat ne väväne ne ‘oris hạina ‘e laloag ne kạunohoag rot fakKaristo la hại‘oho‘ạkiạg fäeag se lelei ne po la a‘rū‘ȧk huạg ka a‘noa la mao‘ȧk! Ma taf pạu, ‘e ta ‘inosot ne ta le‘et ‘e iriạ, ne iriạ rua ‘es‘av‘ȧk fäeag ne la a‘rū‘ạkia huạg ‘on ta le‘ hoi‘ạkit, kat hại‘ē‘ạkiạg ra. Ka tapen se ‘ou ‘inos ta ‘e tekäe hete‘? La ‘inea‘ia, ‘äe la sạio‘ se ‘ou vävän ta ne ‘ou hạina, “Ka fäeag ne gou ‘ea täe tapen se ‘äea?” Kepoi ka ‘ou vävän ta ne ‘ou hạina a‘häe ne fäeag ne ‘äe ‘ea‘ea a‘rū‘ȧk hạisokoag ‘on huga, ‘äe kop la jenea ‘ou aga la a‘leleia pefä‘ te‘.—Kalatia 5:15; hat Efeso 4:31.

12. Ka la pō tapen la agag ‘on ta le‘et la pō la hat la tē väväre ‘e maf ‘on ‘Ạitu?

¹² ‘Äe la a‘häe‘ȧk a‘lelei pạu ne ‘ou la ‘es‘av‘ȧk ne ‘ou alele ‘e ‘ou ‘inos ta la pō la täe se ‘ou hạikạinagagat ma Jihova. Puk Ha‘a ‘ea: “Kepoi ka ta le‘ hat iạ la le‘ rotu, ka iạ kat mätmätea ra ‘on alele, ka iạ sikoa ma ‘on huga, ‘äna rot ‘on le‘ ta tē väväre.” (Jemesa 1:26) ‘Ou fäefäega iạ  hạikạinagag ‘el pạu ma ‘ou titi‘ạkiga. Puk Ha‘a kat kạu‘ȧk ra a‘häet ne ‘inea ne tē tes ta sok ‘e ‘ou laloag rī ta ka fita‘ ma la ‘äe la agag se ‘Ạitu. Figalelei ma ‘äe se rosia ‘äe ‘e rēko iạ tē mah pạut. (Hat 1 Pita 3:7.) La pō sema la ‘äe la fạiạv ma la huạg fe‘en, ka nōnō ka ‘äe ‘amnȧk‘ȧk la a‘rūan huạg ne ‘ou vävän ta ne ‘ou hạina ‘e fäeag ne ‘äe ös la ‘ea se ia, ma kel‘ȧk ne ‘äe kat ‘ē‘ȧk ra fūfū‘ȧk ne ‘inoso, ma ‘ou agagat se Ạitu iạ hat la tē väväre.

13. Ka ta famör ‘inosot la pō la a‘rū‘ȧk tapen huạg ne ‘on vävän ta ne ‘on hạina?

¹³ ‘Inoso la matạ‘ la se a‘rū‘ạkia huạg ne ‘oris väväne ne ‘oris hạina ‘e sal se nonojo. ‘Is la ‘io se ta kel‘ạkiạg he ruạ: Ta ö‘hön se ‘inosot gat ma ke av piliạg‘ȧk se ta sạsig fā ‘inosot ‘e kạurotuạg ta la far hạiasoag, ma iriạ hạifäegag roa; ka ta sạsig fā haharạgit nā ‘on ava ‘e gasav ‘i la garue ag‘esea ma ta sạsiạg hȧn ‘inosot. Iriạ ne ‘inoso ‘e kel‘ạkiạg he ruạ ‘og kop ma ‘oriạ ‘amnạki lelei; ka, tē ne iriạ rē täe tapen se famör ruạ ne iriạ ‘inos sin? Ta hȧn ‘inosot ne sok se ia ta tē tape‘it ‘ea: E avat ne gou ‘inea ne ‘otou vävän ta nā ‘on ava se ta sạsiạg hȧn hoi‘ȧk het ‘e laloag ne kạurotuạg ta, iạ a‘rū pạu ‘otou huga. Iạ rē gou la fak se gou tē la‘ma.”

14. (a) Tes ta väeag nonojot hün se ‘inoso ne a‘mah‘ạkim ‘e Kamataga 2:24? (e) Tes ta nonoj la ‘is la sạio‘ se ‘isa?

¹⁴ ‘Is ‘inea ne hȧn te‘is ma iris ‘e ‘on rereag ne sok sin ta tē tape‘it, ‘oris huga rū pạu. ‘Oris väväne ma hạina pa kat ‘inea ‘e ra muạ‘ạkiạg aier ‘on ‘Ạitu hün se ‘inoso: “Ta ‘on‘on fāat la fue‘i e ‘on ö‘fā ta ma ‘on ö‘hön ta, ma iạ la hạimouạg ma ‘on hạina.” (Kamataga 2:24) Aier iris ne ‘inoso nōnō ‘ē‘ȧk ma ‘oris o‘o‘i; ka ‘e fūfū‘ȧk tē ‘on Ạitu, ‘oris ‘ē‘ạkiga nonoj la muạ se ‘oris väväne ne ‘oris hạina. La fak ma se, lelea‘ rot fakKaristo hanis se iris ne tēag‘esea ma iris ‘e pilifi; ka mou se irisa la rē mumuạ se ‘oris väväne ne ‘oris hạina. Ta ‘on‘on, ‘e avat ne iris lelea‘  rot fakKaristo ne ‘inoso la nā ‘oris ava la hại‘eleag sirien ma iris ne tēag‘esea ma irisa ‘e pilif ta, a‘ti‘ se‘ se fā ma hạiạn ne iris kat ‘inos sin, ‘oris a‘häe täla tokana ‘e la lelei se le‘et ne iris ‘inos mar. Te ka iạ hün het ne ‘ou ‘inos ta kat la‘ lelei e? Sạio‘ se ‘äea, ‘Te ka gou nā aier ‘otou ava, ‘otou a‘häe, ma ‘otou ‘ofa se ‘otou vävän ta ne ‘otou hạina?’

15. La fak se tē ne ‘ea ‘e Mataio 5:28, hün se tese ta ‘inos rot fakKaristo nonoj la matạ‘ la se nā ‘oris ava la ti‘ se fā ma hạiạn ne iris kat ‘inos sin?

 ¹⁵ Tape‘ma, lelea‘ rot fakKaristo ne nā ‘oris ava la ti‘ se fā ma hạiạn ne iris kat ‘inos sin la‘la‘aris ‘e salat ne la a‘hele‘ua pefä‘e se ‘oris mȧür fak ‘inoso. Ka tē ne kokonot la ‘ea ne, iris ‘inos rot fakKaristo ‘e ‘on rereag ‘oaf ‘ia se iris ne iris hại‘eleag mar ka ‘eake ‘oris vävän ne ‘oris hạiạn. (Mataio 5:28) Ma hele‘ue, la ‘ofat ne täe ‘e ‘on huga la tạkia iạ la a‘sokoa ag ne kat ‘ē‘ȧk ra ‘inoso. ‘Is la rē a‘häe se tē ne ‘apostal ta Paula ‘ea ‘e rēko väeag te‘.

16. Ka foh tese ta Paula ‘ea ‘e rēko ‘inoso?

¹⁶ ‘E vạhiạg ne Paula ‘on nāag ne fäeag fas‘ạkit la inos a‘lele la a‘pumuạ‘ȧk,” iạ sok‘ȧk sin ta fäeag fakne‘ne‘it: “Ma moseag ta la se a‘pearpear‘ȧk, ko ‘äna ‘Ạitu täla puer a‘lelea te‘ ne lelea‘ mös ‘e‘eve ma te‘ ne lelea‘ väehäke.” (Hiperiu 13:4) Paula ‘es‘av‘ȧk “moseag ta” la hün‘ȧk se a‘sokoag ne ag ne ‘inoso. Kạinag ag tape‘ ‘i la “se a‘pearpear‘ȧk” ne la ma‘ma‘, kepoi ka la a‘sok kikia ‘e laloag ne fūfū‘ȧk ne mou se ‘inoso. Ta ‘on‘on, lelea‘ rot fakKaristo a‘fạliạg se fäeag ‘on ‘Ạitu ne ‘ea: Äe la ‘oaf‘oaf ma se hạnit ne ‘äe ‘inos mar ‘e avat ne ‘äe haharạgie—Fäeag ‘Es Fuạga 5:18.

17. (a) ‘E rēko tese ta lelea‘ rot fakKaristo la matạ‘ la räe ‘on famör ne rȧnte‘ hün se väehäke, la se täe se ‘oris räe? (e) Ka tes ta ‘is la rē la po la ‘is la tạupir se kel‘ạkiạg ‘on Jope?

¹⁷ Iris ne a‘sok ag ne ‘inoso ma le‘et ne iris kat ‘inos sin kel‘ȧk ne iris kat ‘ē‘ȧk ra foh ‘on ‘Ạitu hün se ‘inoso. Aier, ma‘oit ‘e terạni te ‘i kạu‘ȧk väehäke. Ka, ‘inea ne tese se a‘häe ‘on famör ne tore hün se väehäke, ka matạ‘ la ‘oris räe la se täe se räe ‘on lelea‘ rot fakKaristo hün se väehäke. Iris ‘inea ne ‘e ‘on fakmuri, ‘eake famori, ka Ạitu täla puer a‘lelea te‘ ne lelea‘ mös ‘e‘eve ma te‘ ne lelea‘ väehäke.”  (Hiperiu 10:31; 12:29) Ka lelea‘ rot fakKaristo aire tạupir se räe ‘on Jihova hün se väeag te‘. (Hat Roma 12:9.) A‘häe‘ȧk ne petriak ta Jope ‘ea: “Gou rē vạhia ta fäeag puliot la gou se a‘häe raksa‘ se ta le‘ hȧn het” (Jope 31:1) ‘I, la hȧ‘ạkia ‘e ta huạlā het se salat ne pō la tạkia ‘is se väehäke, lelea‘ rot fakKaristo aire matạ‘ ‘oris mafa la se ‘io la hea‘hea‘ se ta fāat ne ta hạnit ne ‘eake ‘oris väväne ne ‘oris hạina.—‘Io se ‘On Asoa, rạu peap 219-221.

18. (a) Ka tes ta räe ‘on Jihove ‘e rēko väehäke? (e) Ka väehäke ma ‘ạit se tupu‘a tatạu tapen?

¹⁸ Ka tes ta räe ‘on Jihova ‘e rēko väehäke? Foh ‘on Mosese hạiasoagan ‘is la ‘inea‘ia räe ‘on Jihova. ‘E ‘Isireli, väehäke ma ‘ạit se tupu‘a iạ hat la kao foho ma ‘on tötög ta la al‘ȧk. (Foh Ne Rạu‘ifi 20:2, 10) Ka väehäke ma ‘ạit se tupu‘a tatạu tapen? ‘Is la rē a‘häe se tē ‘i, ne kepoi ka ta le‘ ‘Isirelit agag se ta tupu‘et, iạ kaoa fäeag hạiporạkiget ne iạ rē ma Jihova. La fak ma se, ta le‘ ‘Isirelit ne väehäke, iạ kaoa fäeag hạiporạkiget ne iạ rē ma ‘on vävän ta ne ‘on hạina. Iriạ ag rösrös ag‘esea. (Sại‘ạkiga 19:5, 6; Nā Hoi‘ạkiạg Ne Foho 5:9; hat Malakai 2:14.) Iriạ rē sin ta ag raksa‘ ti‘ut se Jihova, ‘Ạitut ne huạg aier ka pō la tua‘nȧk sin.—Salamo 33:4.

19. Tes ta la pō la a‘ne‘ne‘ạkia le‘et ne pa ‘es la roua väehäke, ma hün se tese?

¹⁹ Aier, famör rot fakKaristo kat puạ ra ‘e fȧn ne Foh ‘on Mosese. Ka, la a‘häe‘ȧk ne väehäke iạ ag raksa‘ mah pạut ‘e ‘Isireli ‘e ‘on mumua, iạ pō la a‘ne‘ne‘ạkia famör rot fakKaristo la se a‘sokoa kạinag ag te‘. Ka hün se tese? Rē a‘häe se a‘tatạu‘ȧk hete‘ la pō‘ia ‘on tūtū heta: Te ka ‘äe la sur se ta rī rotut, lo‘ fū se‘, ma ro‘ạit ‘e muạ ne ta tupu‘et? ‘Äe la ‘ea igkȧ‘’. Ka te ka ‘äe ‘oaf la a‘sok tē ta‘ag kepoi ka ta famorit la nā se ‘äea ta mone ti‘ut? Igkȧ‘!’ ta‘ag ‘ou tög heta. Aier pạu, ta a‘häet la a‘rū‘ạkia huạg ‘on Jihova ‘e la agag se tupu‘a iạ tē kelea‘efakinet se ta le‘ rot fakKaristo  airet. ‘E sal ‘esea ma, lelea‘ rot fakKaristo nonoj la hȧ‘ȧk ‘e a‘häe ne la a‘rū‘ạkia ‘oris ‘Ạit ta, Jihova, ka tape‘ma se väehäke ne po la hö‘ rū se ‘oris väväne ne ‘oris hạina—‘inea ne tē tese ta rē e iris la väehäk. (Salamo 51:1, 4; Kolosa 3:5) ‘Is kat ‘oaf ra la a‘sok ta agat ne la a‘ofan Satan ta, ka kat faktē‘ȧk ra Jihova ma ha‘ ka ma‘ma‘ ne fūfū‘ȧk tē ne mou se ‘inos a‘lele.

20. Ka tes ta sok se ‘inos a‘lel ‘e ‘on rereag? A‘tatạu‘ạkia.

²⁰ Ag‘esea ma ‘os la hȧ‘ȧk ne ‘e ag ne kat faktē‘ȧk ra ‘inos a‘lele, ka sal tes ‘atama ta ‘äe la pō la rē la a‘leleia ‘ou la ‘ē‘ȧk ne iạ ne ‘äe ‘inos sin? La togia, re a‘häe se fūfū‘ȧk ne ‘inos a‘lele la fak se ta rīit. Tohiof, re a‘häe se kạinag fäeag a‘fürmariạ‘ȧk huạg, garue ne ‘äe a‘häe‘ȧk a‘mah la rē, ma kạinag ‘ē‘ạkiạg hoi‘ȧk ne iris ne ‘inoso a‘lele kel‘ȧk le‘et se le‘et la fak se tē ososiạg rī ne la a‘keleagleleia rī ta. Kepoi ka ‘ạuạr la hại‘eleag, ‘omuạr ‘inos ta la fak se ta rī keleag leleit ne famori la ‘oaf la fa‘ leum ‘e rēko ‘on ösös heta. Tē ösös ‘i täla kamat la mao a‘riri‘ kepoi ka ‘omuạr hại‘ofaga kamat‘ia la mạtit ma ‘omuạr ‘inos ta la fak se rīit ne kat a‘ririạf kel ra. ‘E rēko ‘äe pa ‘es la tovavhiạn se foh ‘on ‘Ạitu la inoso la a‘pumuạ‘ȧk,” iạ rue‘ạkia ‘äe la a‘leleia pefä‘ ta. Aier pạu, tēet ne helav ka a‘pumuạ‘ạki iạ nonoj pạu la a‘lelei. Ka ‘äe la rē tapen? Fäeag ‘on ‘Ạitu ‘ea: E poto riit fū‘ȧk se‘. ‘E huạg ‘atmại iạ a‘fūmou‘ȧk. ‘E ‘inea tē te‘ ne rumu hoi‘ia. ‘E te‘ ne kạinag koroa pumuạ ka a‘värväre.” (Fäeag ‘Es Fuaga 24:3, 4) ‘Is la rē a‘häe sin ne fäeag ‘i la garue‘ȧk tapen se ‘inos a‘lele.

21. Ka ‘is la pō la a‘ne‘ne‘ȧk tapen ‘os ‘inoso? (‘Io tape‘ma se kes tä “ Ka Gou la A‘ne‘ne‘ȧk Tapen ‘Otou ‘Inos Ta?”)

²¹ ‘E laloag ne koroa pumuạ ne la rē ta kạunohoag ‘oaf‘ofat ta ag pumuạ la fak se hanis aire, fea fak‘ạitu, ma pilif fūmou. (Fäeag ‘Es Fuạga 15:16, 17; 1 Pita 1:7) Iạ la pō la rē  ‘inoso la fūmou. Ka te ka ‘äe räe ne rum ne ‘ea ‘e fäeag ‘es fuaga hoi tapen ‘e koroa pumua? E ‘inea tē.” ‘I, nōnō ka la garue‘ȧk, ‘inea tē ne Puk Ha‘a ‘es ne‘ne‘ la jenea a‘häe ‘on famori ma la rue‘ạkia iris la hö‘ȧk hoi‘ạkim ‘oris hại‘ofaga le‘et se le‘et. (Roma 12:2; Filipai 1:9) Ka, ‘e av het ma ne ‘äe ma ‘ou vävän ta ne ‘ou hạina la nā av la hạifäegag se ta ut ne puk het ‘e Puk Ha‘a, la fak se daily text, ne ta väegat ne hün‘ȧk se Puk Ha‘a ‘e ‘os The Watchtower ne Awake! ne mou se ‘inoso, iạ la fak se ‘äe sạkior a‘leleia ta tē ososiạg keleag lelei het ne la a‘keleag leleia ‘ou rī ta. ‘E avat ne ‘ou hanisi se Jihova rue‘ạki e ‘äe la garue‘ạkia ‘e ‘ou ‘inos ta fäeag puer‘ạkit ne ‘äe kotä sạkior se‘, iạ fak se ‘äe ho‘am tē ososiạg tē heta‘ag se rum ne ‘ou ri ta.” ‘E rēko tē ta‘ag, ‘äe la pō hoi‘ȧk ‘oaf‘oaf het, ma tē lelei ne ‘äe ‘oaf la rē ‘e ‘ou ‘inos ta ‘e ‘on mumua.

22. Ka ‘oaf tes ta ‘is la pō kepoi ka ‘is nā ‘os vahia la a‘sokoa väegat ne mou se ‘isa la a‘ne‘ne‘ạkia ‘os ‘inoso?

²² Aier, ‘is kop la nā ‘os ava ma ‘os ne‘ne‘i la tuk hoi‘ȧk tē ososiạg tē se ‘on nāag heta. Ka, kepoi ka ‘äe la nā vahiạ la a‘sok väegat ne mou se ‘äea, ‘äe la ‘oaf pạu la ‘inea ne ‘äe tovavhiạn se fäeag fas‘ạkit ‘e Puk Ha‘a: E faktē‘ạkiga, le‘et ma la a‘pumuạ‘ạkia le‘et.” (Roma12:10; Salamo 147:11) Ka ‘e te‘ ne tē ‘atakoa, ‘ou garue fe‘eni la ‘ē‘ạkia ‘ou ‘inos ta la po la ȧf‘ȧk ma kikia ‘äe ‘e hanis ‘on ‘Ạitu.