1, 2. Ino ty hodinihintsika, le ino ty antony?

MANAMBALY va iha? Mahatiaro ho sambatsy am-panambalea va iha, sa misy raha manahira bevata ty amy tokantranonao ao? Manaly fa tsy mifankahazo soa va nareo morovaly? Tsy azonao tavy va ty fiarahanareo fa miaritsy avao iha? Laha zay ie, le azo inoa fa malahelo iha mahita hoe nihananintsy ty fifankatiavanareo. Kanefa azo antoky fa teanao hanome voninahitsy azy Ndranahary teanao iny ty fanambaleanao, satria Kristiana iha. Farany, miasa ty lohanao tratsy raha mahazo anao io. Mety hamparary ty fonao koa raha zay. Fe ka avy le mieritseritsy hoe fa tsy misy raha tamàny sasy ty aminareo.

² Tsy nifandramby soa koa ty mpivaly Kristiana sisany taloha. Niaritsy avao rozy. Fe, mifankatea biby rozy henanizao, satria nahita fomba hanasoava ty fifandrambesan-drozy. Ka ndre iha koa, le afaky hana tokantrano sambatsy. Ndao moa hodinihintsika ty raha azonao atao.

3, 4. Hazavao amy ohatsy hoe manjary mifandramby marìny ty mpivaly lafa miezaky hifandramby marìny amy Ndranahary.

³ Hifankarìny nareo morovaly laha miezaky hihamarìny a Ndranahary. Manao akory zao? Eritsereto, ohatsy, zao: Misy lahilahy noho ampela amy fotony vohitsy raiky, fe ty raiky avaratsy ao, le ty raiky antimo ao.  Manomboky mananiky rozy roe. Misy elanelany bevata mampisaraky an-drozy laha mbo ambany eny, fe mihamihena elanela io, lafa mihamarìny ty loha vohitsy iny rozy. Hitanao va ty hevitsy mampahery baka amy ohatsy io?

⁴ Azo ampitovizy amy ty ezaky ataon’olo mananiky vohitsy, ty ezaky atao mba hanompoa Jehovah amy fo iaby. Dikany zay, sahala fa samby mananiky vohitsy io nareo morovaly, satria tea any Jehovah. Fe laha nanjary tsy nifandramby marìny sasy nareo, le sahala mananiky vohitsy iny avao, fe amy vohony samby hafa. Mety hisy elanelany bevata ty aminareo roe amy voalohany, fe hifamonjy nareo arakaraky ty iakaranareo. Hifandramby  marìny vatany nareo morovaly, arakaraky ty iezahanareo hifandramby marìny amy Ndranahary. Ka manao akory ty hanaova raha zay?

5. a) Ino ty fomba raiky hahafahanao mifandramby marìny amy Ndranahary noho amy valinao? b) Manao akory ty fahità Jehovah ty fanambalea?

⁵ Fomba raiky bevata hananiha vohitsy io ty fanorihanareo morovaly ty safà Ndranahary mikasiky ty fanambalea. (Salamo 25:4; Isaia 48:17, 18) Tafilitsy amy zay ty torohevitsy namea apostoly Paoly hoe: “Soa laha misy hajany amy ty olo iaby ty fanambalea.” (Hebreo 13:4) Misy hajany na hoe lafovily amy Jehovah vatany ty fanambalea.

6. Manino ro azo volany hoe tsy nivola ty raha misy avao Paoly? Manino raha zay ro soa ho tiarovy?

⁶ Mpanompo Ndranahary nareo morovaly, ka fa mahay fa lafovily ty fanambalea, sady masy mihintsy aza. Ty vatatena Jehovah mihintsy ro namoro raha io. (Vakio ty Matio 19:4-6.) Fe ndre hainareo hoe misy hajany ty fanambalea, le mety tsy ho ampy mba handrisiky anareo hifankatea noho hifanaja raha zay, laha fa misy raha manahira ty amy tokantranonareo ao. Ka ino ty mety hanampy anareo hanao raha zay? Henteo moa fa tsy nivola avao Paoly hoe: ‘Misy hajany ty fanambalea’, fa hoe: ‘Soa laha misy hajany ty fanambalea.’ Nampirisiky hanao raha ie eo, fa tsy nivola ty raha misy avao. * Mety handrisiky anao hieritseritsy ty valinao ho lafovily ndraiky, ty fahatiarova fampirisiha zay. Ino ty antony?

7. a) Ino iaby ty didy orihintsika baka amy Baiboly ao, le ino ty antony? b) Ino ty raha soa azontsika baka amy fanoriha safà?

 ⁷ Mba diniho tseky moa: Manao akory ty fandrambesanao ty didy hafa amy Baiboly ao, ohatsy hoe, ty faniraha hanao mpianatsy, noho ty fampirisiha hivory? (Matio 28:19; Hebreo 10:24, 25) Mety ho sarotsarotsy avao ty manao raha reo kindraiky. Mety tsy handramby ty olo itorianao, na mety ho sarotsy biby aminao ty mandeha mivory lafa vozaky baka niasa iha. Fe ndre eo zay, le mitory noho mivory avao iha. Tsy misy mahasaka anao, ndre Satana aza! Fa manino? Satria ty fitiavanao laliky any Jehovah ro mandrisiky anao hanoriky ty didiny. (1 Jaona 5:3) Le ino ty vokany? Manjary milamin-tsay noho falifaly biby iha satria hainao fa ty sitrapo Ndranahary ro ataonao. Vomaiky iha mahazo hery. (Nehemia 8:10) Ino ty fianara rambesintsika baka amy zay?

8, 9. a) Ino ty mandrisiky ty mpivaly hanao ze hampisy hajany ty fanambaleany, le ino ty antony? b) Ino iaby ty hevitsy roe hodinihintsika?

⁸ Ty fitiava laliky a Ndranahary ro mahavy anao hanoriky ty didy hitory noho hivory ndre eo ty raha manakantsaka. Ka afaky mandrisiky anao koa fitiava io mba hanao ze ‘hampisy hajany ty fanambaleanao’, ndre mety ho sarotsy aza raha zay. (Hebreo 13:4; Salamo 18:29; Mpitoriteny 5:4) Amea Ndranahary fitahia maro biby iha lafa miezaky mitory noho mivory. Mitovy amy zay avao koa, fa ho hita Jehovah ty ezaky ataonao mba hahavy ty fanambaleanao hisy hajany, le hotahiny iha.—1 Tesalonianina 1:3; Hebreo 6:10.

⁹ Ka ino ty azonao atao mba hisy hajany ty fanambaleanao? Mila ialànao ty fomba sisany mety hanimba ty tokantranonao. Fe misy raha tokony hataonao koa mba hanasoava ty fifandrambesanareo morovaly.

10, 11. a) Ino ty fomba tsy mampisy hajany ty fanambalea? b) Ino ty fanontanea tokony hiaraha ty mpivaly midiniky?

¹⁰ Nivola ho zao ty ranabavy raiky, fa elaela zay: “Mivavaky amy Jehovah aho mba hahavita hiaritsy.” Hiaritsy ino? Nanazava ie hoe: “Antarantara valiko fivolana aho. ‘Fa entsaky anao aho!’, ‘Tsy manjary!’ Mandratsy ahy sanandro safà reo. Marina fa tsy misy lian-kabokaboky ty vatako. Fe, manenga holatsy am-poko atoa safà maharary rey.” Fahasahiràna bevata vatany raha niresahy ranabavy io zay. Tsy ino zay fa ty fivolana manaboka.

¹¹ Mampalahelo vatany lafa ty mpivaly kristiana ro mifanao fivolana maharary sady miteraky bay tsy mety janga am-po ao! Mazava ho azy fa tsy misy hajany ty fanambalea laha safà manahaky zay avao ty renao ao. Manao akory ty tokantranonao amy resaky zay? Ho hainao raha zay laha miambany iha. Anontaneo valinao hoe: “Manao safà maharary va aho lafa miresaky aminao?” Laha mivola ie hoe matetiky ro mamparary ty fony ty raha volaninao, le tsy maintsy parè hiova iha.—Galatianina 5:15; vakio ty Efesianina 4:31.

12. Ino ty mety hahavy ty fanompoan’olo raiky a Ndranahary ho fahatany?

¹² Tiarovo fa misy vokany amy ty fifandrambesanao amy Jehovah ty safà aboakinao amy valinao. Mivola ty Baiboly hoe: ‘Laha misy olo mieritseritsy ty vatany ho mpivavaky fe tsy mamehy ty lelany, fa mbo mamitaky ty fony avao ie, le fahatany ty fivavaha arahin’olo zay.’ (Jakoba 1:26) Hita baka amy zay fa misy ifandrambesany vatany ty safà aboakinao noho ty fanompoanao a Ndranahary. Tsy mivola ty Baiboly hoe lafa manao ty vatanao hoe mpivavaky amy Ndranahary iha, le tsy mampanino  ze raha miseho amy tokantranonao ao. Ka maneky ho voafitakiny zay, fa vatan-draha resaky io! (Vakio ty 1 Petera 3:7.) Mahavy ty fanambaleanao tsy hisy hajany iha, laha kinahinao azy ty manao safà maharary amy valinao. Mety ho fahatany amy Ndranahary ty fanompoanao azy amy zay, ndre mahay noho mazoto mitarazo andraikitsy iha amy fiangona eo.

13. Ino ty raha mety hatao ty olo manambaly, ka hamparary ty fo valiny?

¹³ Tokony hiamby soa avao koa ty mpivaly tsy no hanao raha mamparary ty fo valiny, ndre tsy mivanta aza. Diniho ohatsy retoa: Reny raiky tsy manambaly, mikaiky rahalahy raiky manambaly mba hila torohevitsy, le miresaky ela rozy. Na rahalahy tsy manambaly raiky, mandany fotoa maro sankerinandro hiaraha manompo amy ranabavy raiky manambaly. Mety tsy hieritseritsy hanao raha raty azy manambaly reo. Fe, manao akory ty fihetseham-po ty valin-drozy? Hoy ty ranabavy raiky: “Malahelo biby aho mahita hoe mandany fotoa maro hiaraha amy rahavavy raiky amy fiangona eo valiko, sady mikarakara azy marè. Ataho raha tsy misy dikany zay aho.”

14. a) Ino ty adidy ty olo manambaly laha hentea ty Genesisy 2:24? b) Ino ty raha tokony hodinihintsika?

¹⁴ Tsy mahatseriky ndre malahelo ranabavy io noho ty olo manahaky azy. Tsy orihy ty valin-drozy ty fitsipiky bevata namea Ndranahary hoe: “Ty lahilahy hiala amy ty babany noho ty reniny ka hitambatsy amy valiny.” (Genesisy 2:24) Marina fa mbo manaja ty babany noho ty reniny ty olo manambaly. Fe ty valiny ro adidiny voalohany marè, araky ty nandamina Jehovah azy. Manahaky zay avao koa, fa ndre teany ty finoa raiky aminy, le mbo ty valiny avao ro andraikitsiny voalohany marè. Mampisy roiroy amin-drozy morovaly ty Kristiana, laha mandany  fotoa maro loatsy miaraky amy mpiara-manompo, na mifankazatsy loatsy amin-drozy, sandraky moa laha ampela ro iaraha rahalahy iny, na lahilahy ro iaraha ranabavy iny. Zay vatany va ro manahira anareo an-trano ao? Laha zay, le diniho hoe: ‘Ameako fitiava noho fotoa voho fikarakarà tokony ho azy va ty valiko?’

15. Laha hentea ty Matio 5:28, manino ty Kristiana manambaly ro tsy tokony himany marè loatsy ty olo tsy valiny?

 ¹⁵ Tsy hendry sady misomonga loza mihintsy ty rahalahy manambaly, laha lako marè ty fimaneany ty ampela tsy valiny. Ho zay koa ty ranabavy manambaly laha manao manahaky zay amy lahilahy tsy valiny. Mampalahelo fa nanjary nifankatea amy ty olo nifankazatsy marè aminy ty Kristiana sisany fa manambaly. (Matio 5:28) Nitariky an-drozy amy raha raty raha zay, ka vomaiky nanjary tsy misy hajany ty fanambalean-drozy. Mba henteo moa ty raha nivolany Paoly mikasiky raha zay.

16. Ino ty didy namea Paoly mikasiky ty fanambalea?

¹⁶ Laha vo baka nampirisiky ty olo hanao ze haha misy hajany ty fanambaleany Paoly, le namepetsy hoe: “Ao tsy ho voaloto ty fandrea ty mpivaly, fa hohelofa Ndranahary ty mpijangajanga noho ty mpandranto.” (Hebreo 13:4) Firaisa ro teany hovolany amy hoe “fandrea ty mpivaly.” Lafa ty mpivaly avao ro manao firaisa, vo azo volany hoe ‘tsy voaloto’ raha io. Manoriky safà Ndranahary toy ty Kristiana laha manao ho zay: “Mifalea amy ty valy ty hatanorànao.”—Ohabolana 5:18.

17. a) Manino ty Kristiana ro tsy manoriky ty hevitsy tontolo toy mikasiky ty fandrantòva? b) Manao akory ty hanahafantsika any Joba?

¹⁷ Tsy manaja ty lalàna Ndranahary vatany ty olo manao firaisa amy ty olo tsy valiny. Marina fa tsy mampanino ty olo maro ty fandrantòva henanizao. Fe, tsy tokony hengà ty Kristiana marina hisy vokany aminy ty raha eritserety ty olo. Hain-drozy fa tsy olo ro hitsara an-drozy, lafa afara ao, fa Ndranahary. ‘Hohelofany ty mpijangajanga noho ty mpandranto.’ (Hebreo 10:31; 12:29) Zay ro mahavy an-drozy hanoriky ty hevitsy Ndranahary. (Vakio ty Romanina 12:9.) Tiarovo safà Joba iny, hoe: “Fa  nanao fifanekea tamy ty masoko aho.” (Joba 31:1) Mamehy ty masony vatany ty Kristiana marina, mba tsy haniry hanao firaisa amy ty olo tsy valiny. Satria ndre zay avao le mety hitariky azy handranto.—Henteo ty Fanazavà Fanampiny hoe “Fisaraham-panambalea noho Fifehea Tezitsy.”

18. a) Manao akory ty fahità Jehovah ty fandrantòva? b) Ino ty mampitovy ty fandrantòva noho ty fanompoa sampy?

¹⁸ Manao akory vatany moa ty fahità Jehovah ty fandrantòva? Hitantsika amy Lalàna Mosesy ao raha zay. Samby voatsara ho maty ndre ty mpandranto ndre ty mpanompo sampy, tamy Israely teo. (Levitikosy 20:2, 10) Hitanao va ty itoviza raha reo? Nandika ty fifanekea nataony tamy Jehovah ty Israelita, laha nanompo sampy. Mbo manahaky zay avao koa, fa nandika ty fifanekea nataony tamy ty valiny ty Israelita, laha nandranto. Samby fivaliha iaby raha reo. (Eksodosy 19:5, 6; Deoteronomia 5:9; vakio ty Malakia 2:14.) Zay ro mahavy an-drozy ho samby manan-kadisoa bevata, laha amy ty fahità Jehovah, azy Ndranahary azo atokisa noho tsy mivaliky iny.—Salamo 33:4.

19. Ino ty hanampy antsika ho tapa-kevitsy marè tsy handranto? Ino ty antony?

¹⁹ Fa tsy fehezy ty Lalàna Mosesy sasy aloha tsika. Fe, ho tapa-kevitsy marè tsika tsy handranto, laha mahatiaro fa fahotà bevata raha zay tamy Israely taloha tany. Nanino? Henteo fa mitovy raha retoa: Hilitsy an-deglizy ao va iha, bakeo handohaliky amy sary vonga, sady hivavaky eo? ‘Sanatria!’ hoy ty asanao. Ka laha amea drala maro biby? ‘Zaho tsy hanao any zao!’, hoasanao ndraiky. Fa mampangaroharo ty Kristiana marina vatany ndre ty mieritseritsy avao hoe hivaliky amy Jehovah ie, laha manompo sampy. Tokony hampangaroharo azy manahaky zay avao koa ndre ty mieritseritsy avao hoe hivaliky amy Jehovah noho ty valiny ie, laha mandranto. Tokony ho  zay avao ty fahitàntsika ty fandrantòva, ndre ino ndre ino ty raha mety haninto antsika amy raha zay. (Salamo 51:1, 4; Kolosianina 3:5) Tsy teantsika mihintsy ty hanao raha hampifalifaly Satana, kanefa hangala-baraka any Jehovah noho hahavy ty fanambalea tsy hisy hajany.

20. Nanjary nanao akory ty fifandrambesa ty mpivaly sisany? Hazavao amy ohatsy.

²⁰ Ino koa zao ty azonao atao mba ho lafovily manahaky ty taloha ndraiky ty fahitànao ty valinao? Azo ampitovizy amy trano io ty fanambalea. Ty safà soasoa, noho fifampidarea, voho fifanomeza voninahitsy ro sahala pozin-trano mandravaky azy. Laha mifandramby am-po nareo, le hanahaky trano mafana soa noho madera loko io ty fanambaleanareo, ka lasa mahateatea noho mahatamà ty ao. Fe, sahala miala tsikelikely pozin-trano rey, laha mihamihena ty fifankatiavanareo. Farany hanahaky trano raiky tsy misy poziny sasy ty fanambaleanareo. Tokony hanasoa ty fanambaleanareo avao nareo satria samby ta hanoriky ty didy Ndranahary hoe: ‘Asio hajany ty fanambalea.’ Sady raha lafovily noho misy hajany zao, maeva amboary laha simba. Ka ino ty azonao atao? Mivola ty Safà Ndranahary hoe: “Fahendrea ro ilà mba hanorena trano, le fahaiza manavaky ro ilà mba hahasoa fototsy azy. Fahaiza ro hahavy ty efitsy anatiny ho atsiky raha lafovily noho hanàna mahateatea iaby.” (Ohabolana 24:3, 4) Akory ty hanoriha any zay an-tokantrano ao?

21. Ino ty azo ty mpivaly atao mba hampifankatea marè an-drozy avao? (Henteo koa ty efajoro hoe “ Manao Akory ty Hanasoavako ty Fifandrambesanay?”)

²¹ Anaty ty hanàna lafovily mahavy ty an-trano ao ho feno hasambara ty fitiava vatany, ty fatahora a Ndranahary, noho ty finoa matanjaky. (Ohabolana 15:16, 17; 1 Petera 1:7) Mahavy ty mpivaly hifandramby soa toetsy  reo. Arakinao va hoe ino ty mahavy azy trano volany amy ohabolana ao iny ho atsiky hanàna lafovily? Ty “fahaiza.” Manova toe-tsay vatany ty Baiboly lafa orihy, ka le afaky mandrisiky ty mpivaly mba hiezaky hifankatea marerè. (Romanina 12:2; Filipianina 1:9) Ka, sahala mifily pozin-trano, mba mety hahasoasoa ty an-tranonareo ao nareo morovaly, saky miaraky mandiniky andinin-teny, na lahatsoratsy mikasiky ty fanambalea. Tafilitsy amy zay, ohatsy, ty safà natao hodinihy sanandro, na ty Tilikambo Fiambenana noho Mifohaza! Lafa manoriky ty torohevitsy hitanareo ao nareo, satria tea any Jehovah, le sahala mametraky pozin-trano iny amy “efitsy anatiny” rey ao. Mety hanahaky ty taloha ndraiky ty fifankatiavanareo, sady hanahaky trano soasoa noho mahatamà iny ty fanambaleanareo.

22. Manino iha ro ho falifaly laha manao ty anjaranao mba hampifankatea marè anareo morovaly?

²² Marina fa mila fotoa noho ezaky bevata ty fampimpolia pozin-trano rey ho amy ty pilasin-drozy iaby. Fe, ho falifaly iha laha manao ty anjaranao. Hainao fa manoriky raha volany Baiboly toy iha: “Manaova lohany, laha amy fifanomezam-boninahitsy.” (Romanina 12:10; Salamo 147:11) Fa ty vatan-draha marè, le hijano amy fitiava Ndranahary ao nareo, laha miezaky ‘hifanome voninahitsy’, na hoe hanao ze hampisy hajany ty fanambaleanareo.