1, 2. O le ā le fesili o le a tatou iloiloina, ma aiseā?

PO UA e faaipoipo? Po o e fiafia i lau faaipoipoga, po o le mea ea ua matuiā faafitauli o le lua ulugalii? Po ua lē toe māfana la oulua mafutaga? Po o le mea ea o loo e onosaʻi i lau faaipoipoga ae e te lē o fiafia ai? Afai o lea, e lē taumatea ua e faanoanoa ona ua mou atu la oulua mafutaga māfana na iai muamua. Ae ona o oe o se Kerisiano, e mautinoa e te manaʻo ia faamamaluina Ieova le Atua o lē e te alofa i ai i lau faaipoipoga. O lea la, ua matuā faapopoleina oe ma ua tigā lou loto i lou tulaga. Ae aua neʻi e manatu ua siliga se faamoemoe mo oe.

² O loo iai ni ulugalii lelei Kerisiano o ē e leʻi māfana muamua a latou faaipoipoga, e na o le nonofo faatasi ae e lē fiafia. Ae na latou maua se auala e faamalosia ai la latou faiā. E mafai foʻi ona e maua le lotomalie i lau faaipoipoga. E faapefea?

3, 4. Aiseā e atili vavalalata ai se ulugalii pe a taumafai e faalatalata i le Atua? Ia faataʻitaʻi.

³ O le a atili vavalalata la oulua mafutaga ma lou toʻalua, pe a lua taumafai e faalatalata atili i le Atua. Aiseā? Seʻi mafaufau i lenei faataʻitaʻiga: O loo iai se mauga e lautele lona auvae, ae maʻai lona tumutumu. O loo tū se  tamāloa i le itu agavale o le auvae mauga, ae tū se fafine i le itu taumatau. Ua amata nei ona feʻaʻei i laʻua. E mamao lava lo la va a o lata i le auvae mauga. Ae ina ua maualuga le mea e feʻaʻei ai e agaʻi i le tumutumu mauga, ua amata ona faaitiitia lo la va. Po o e mātauina le lesona lelei i lenā faataʻitaʻiga?

⁴ O au taumafaiga e auauna ai ma le lotoatoa iā Ieova, e mafai ona faatusa i le taumafai e aʻe i se mauga. Talu ai e te alofa iā Ieova, e peiseaʻī o lenā ua e taumafai malosi e aʻe. Ae afai ua maalili lo oulua alofa ma lou toʻalua, atonu e eseese itu o loo oulua feʻaʻei ai i le mauga. Ae o le ā le mea e tupu pe a faaauau ona oulua feʻaʻei? E moni e lua te matuā vavamamao i le taimi muamua. Ae o le tele o  lou taumafai e faalatalata i le Atua, e peiseaʻī o lenā e te aʻe maualuga i le mauga, o le a atili ai ona oulua vavalalata ma lou toʻalua. O le mea moni, o le faalatalata i le Atua, o le auala lenā e te māfana ai i lou toʻalua. Ae e faapefea ona e faia lenā mea?

5. (a) E faapefea ona faalatalata iā Ieova ma le paaga faaipoipo? (e) O le ā le silafaga a Ieova i faaipoipoga?

⁵ O se tasi o auala tāua e feʻaʻei ai, o le lua utagiaina lea o fautuaga i faaipoipoga, e pei ona maua i le Afioga a le Atua. (Salamo 25:4; Isaia 48:17, 18) Ia mafaufau i se fautuaga maʻoti na taʻua e le aposetolo o Paulo. Na fai mai o ia: “Ia faamamaluina e tagata uma le faaipoipoga.” (Eperu 13:4) O le ā le uiga o lenā mau? O le upu “faamamaluina,” e iai lona uiga o le faatāuaina o se mea, ma e tautele. O le auala tonu lenā e silasila ai Ieova i faaipoipoga, e faatāuaina e ia, ma e tautele iā te ia.

6. O le ā ua faaalia mai i le fautuaga a Paulo e uiga i faaipoipoga, ma aiseā e tāua ai le iloa o lenā mea?

⁶ Talu ai o loo oulua auauna i le Atua, ua lua iloa ai ma lou toʻalua o le faaipoipoga o se mea e tautele, ma e paia. Na faavaeina e Ieova le faatulagaga o le faaipoipoga. (Faitau le Mataio 19:4-6.) Peitaʻi, afai ua iai ni faafitauli i la oulua faaipoipoga, e lē lava le tau ina iloa e mamalu le faaipoipoga, e uunaʻia ai oe ma lou toʻalua e alofa ma faaaloalo le tasi i le isi. Ae o le ā le mea e uunaʻia ai oe? Ia mātau lelei le tala a Paulo i le faamamaluina o le faaipoipoga. E leʻi fai mai o ia “e mamalu le faaipoipoga.” Ae na fai mai o ia “ia faamamaluina . . . le faaipoipoga.” E leʻi faapea na tau ina aumai e Paulo se manatu, peitaʻi na ia aumaia se faatonuga. * O le iloaina o  lenā eseesega, e uunaʻia atili ai oe ina ia toe faatāuaina lou toʻalua. Aiseā?

7. (a) O ā poloaʻiga a le Tusi Paia e tatou te faatinoina, ma aiseā? (e) O ā ni iʻuga lelei o le usiusitaʻi?

⁷ Seʻi mafaufau foʻi i lau vaaiga i isi poloaʻiga a le Tusi Paia, e pei o le poloaʻiga o le faia o soo, ma le apoapoaʻiga ia potopoto faatasi mo le tapuaʻiga. (Mataio 28:19; Eperu 10:24, 25) E moni e faigatā i nisi taimi le faatinoina o na poloaʻiga. Atonu e lē fiafia mai tagata e te talaʻi atu i ai, po ua e vaivai foʻi mai i lau galuega ma faafaigatā ai ona e auai i sauniga faa-Kerisiano. Ae ui i lea, e faaauau pea ona e talaʻi le feʻau o le Malo, ma e auai pea i sauniga faa-Kerisiano. E leai se tasi e taofia oe, e oo lava iā Satani! Aiseā? Auā o lou alofa iā Ieova e uunaʻia ai oe e usiusitaʻi i ana poloaʻiga. (1 Ioane 5:3) O ā la ni iʻuga lelei? O le auai i le talaʻiga ma sauniga, e te maua ai le filemu o le mafaufau ma le olioli, auā ua e iloa o loo e faia le finagalo o le Atua. O na faalogona fiafia e faafouina ai lou malosi. (Neemia 8:10) O le ā se lesona mo i tatou?

8, 9. (a) O le ā e uunaʻia ai oe e usitaʻia le faatonuga ina ia faamamaluina le faaipoipoga, ma aiseā? (e) O ā ni manatu se lua o le a tatou iloiloina?

⁸ O lou alofa tele i le Atua ua uunaʻia ai oe e te usitaʻi i le poloaʻiga e talaʻi ma potopoto faatasi e ui i tulaga faigatā, ua faapena foʻi ona uunaʻia oe e lou alofa iā Ieova e usitaʻi ai i le faatonuga a le Tusi Paia “ia faamamaluina [lau] faaipoipoga,” e tusa lava pe e iai faafitauli. (Eperu 13:4; Salamo 18:29; Failauga 5:4) E lē gata i lea, e pei ona matuā faamanuiaina oe e le Atua i au taumafaiga e auai i le talaʻiga ma sauniga, e faapena foʻi ona silasila mai le Atua ma faamanuiaina au taumafaiga e faamamaluina lau faaipoipoga.​—1 Tesalonia 1:3; Eperu 6:10.

⁹ E faapefea la ona e faamamaluina lau faaipoipoga? Ia  e ʻalofia amioga e faaleaga ai lau faaipoipoga. E tāua foʻi ona e gaoioi e faamalosia le fusi o le faaipoipoga.

10, 11. (a) O ā amioga e faalumaina ai le faaipoipoga? (e) O le ā se fesili e tatou te fesili atu ai i a tatou paaga?

¹⁰ Na faapea mai se avā Kerisiano i se taimi ua teʻa: “Ou te tatalo iā Ieova e foaʻi mai le malosi e onosaʻi ai.” E onosaʻi ai le ā? Na fai mai o ia: “E ese le tutui o upu a loʻu toʻalua. E ui lava e leai ni manuʻa o loʻu tino, ae ua matuā faamanuʻalia loʻu loto i ana faamatalaga tigā, e pei o le ʻMatuā e faatigā ulu tele!’ ma ʻE ese lou faavalevalea!’” Ua faamatilatila mai e lenei avā se mea matuiā o loo tupu, o le faia lea o upu tutui i le faaipoipoga.

¹¹ Pagā le leaga o le lafo e ulugalii Kerisiano o upu faatigā e le tasi i le isi, e faamanuʻalia ai faalogona lea e faigatā ona toe faaleleia! E lē mamalu se faaipoipoga e faaaogāina upu tigā. O faapefea mai lau faaipoipoga i lenā itu? O se tasi o auala e iloa ai, o le fesili lea ma le lotomaulalo i lou toʻalua, “O ā ni ou faalogona ona o aʻu upu?” Afai e manatu lou toʻalua e tigā lona loto i au tala e fai, ia e lotomalie la e sui ou uiga ina ia faalelei ai le lua ulugalii.​—Kalatia 5:15; faitau le Efeso 4:31.

12. E faapefea ona faalēaogāina le tapuaʻiga a se tasi i le silafaga a le Atua?

¹² Ia manatua, e aafia lau faiā ma Ieova i le faaaogāina o lou laulaufaiva i le faaipoipoga. Ua fai mai le Tusi Paia: “Afai e manatu se tasi iā te ia lava o sē e toʻaga i le tapuaʻiga [e auauna i le Atua] ae lē pulea lona laulaufaiva, ua faasesēina e ia lona lava loto, ua lē aogā la lana tapuaʻiga.” (Iakopo 1:26) O lau tapuaʻiga, e aofia ai upu e te tautala ai. E lē lagolagoina e le Tusi Paia le manatu e lē tāua mea e fai i le fale, ae e pau le mea e tāua o le auauna i le Atua.  Aua neʻi faasesēina oe. E tugā tele lenei mataupu. (Faitau le 1 Peteru 3:7.) Atonu e te maelega ma e iai foʻi ni ou tomai, ae peitaʻi afai e te faatigā ma le loto i ai lou toʻalua i au upu tutui, ua e faalumaina la le faatulagaga o le faaipoipoga, ma e ono faalēaogāina lau tapuaʻiga i le silafaga a le Atua.

13. E faapefea ona faatupuina e se paaga faaipoipo ni lagona tigā i lana paaga?

¹³ E ao foʻi i ulugalii faaipoipo ona faaeteete ina neʻi latou faatupuina ni lagona tigā i isi auala. Seʻi manatu i ni faaaʻoaʻoga se lua: E masani ona telefoni se tinā nofofua i se uso Kerisiano faaipoipo i le faapotopotoga e fesili i ai mo ni fautuaga, ma e umi ona la talatalanoa; e fai ma masani a se uso Kerisiano nofofua le galulue faatasi i le talaʻiga ma se tuafafine Kerisiano faaipoipo i vaiaso taʻitasi. Atonu e lelei faanaunauga o i laʻua o ē ua faaipoipo i na faaaʻoaʻoga. Peitaʻi, o ā ni aafiaga o a la amio i o la taʻitoʻalua? Na faapea mai se tuafafine o loo iai i lenā tulaga: “E tigā loʻu loto i le vaai atu i loʻu toʻalua o loo naunau ma faifaimea faatasi ma se isi tuafafine i le faapotopotoga. O loʻu lagona, e lē ano mai o ia iā te aʻu.”

14. (a) O le ā le tiute tauave i le faaipoipoga o loo faamatilatila mai i le Kenese 2:24? (e) O le ā se fesili e tatou te fesili ifo ai iā i tatou?

¹⁴ Ua talafeagai le tigā o faalogona o lenā avā ma isi o ē e talitutusa o latou tulaga. Auā foʻi ua teena e a latou paaga le faatonuga maʻoti a le Atua mo faaipoipoga: ʻE tuua e le tane lona tamā ma lona tinā, ae faatasi ma lana avā.’ (Kenese 2:24) O le mea moni, o ē ua faaipoipo, e faaaloalo pea i latou i o latou mātua. Ae e tusa ai ma le faatulagaga a le Atua, o lo latou tiute tauave muamua lava o o latou taʻitoʻalua. E alolofa faapelepele Kerisiano i o latou uso talitonu. Peitaʻi, o lo latou tiute tauave muamua lava o o latou taʻitoʻalua. O le mea lenā e ōia ai le fusi o  le faaipoipoga pe a tele ina faifaimea faatasi ni Kerisiano faaipoipo ma uso talitonu, aemaise o ē o le isi itupā, pe e soona māfana foʻi iā i latou. Po o se māfuaaga ea lea ua vevesi ai le lua ulugalii? Ia fesili ifo iā te oe, ʻPo o ou naunau moni lava i loʻu toʻalua, ma faifaimea faatasi ma ia, ma faaali i ai loʻu alofa, auā o le mea lea e tatau ona ou faia iā te ia?’

15. E tusa ai ma le Mataio 5:28, aiseā e ʻalofia ai e Kerisiano faaipoipo le soona māfana i se tasi o le isi itupā?

 ¹⁵ E lē gata i lea, o loo taaalo i le afi Kerisiano faaipoipo o ē e soona māfana i tagata o le isi itupā, e lē o ni a latou paaga faaipoipo. O le mea e faanoanoa ai, ua manaʻonaʻo nisi Kerisiano faaipoipo i tagata o ē ua soona māfana i ai. (Mataio 5:28) Ona o lenā manaʻonaʻo, ua oo ina latou faia ai ni amioga e faaluma atili ai le faaipoipoga. Seʻi mafaufau i upu a le aposetolo o Paulo i lenei mea.

16. O le ā le poloaʻiga a Paulo i faaipoipoga?

¹⁶ Na tuuina atu muamua e Paulo le faatonuga “ia faamamaluina . . . le faaipoipoga,” ona ia lapataʻi atu lea: “Ia aua neʻi faaleagaina le moega o le faaipoipoga, auā e faamasino e le Atua o ē e faitaaga ma ē e mulilulua.” (Eperu 13:4) Na faaaogā e Paulo le faaupuga o le “moega o le faaipoipoga” e faasino atu i feusuaʻiga. E lē “faaleagaina” pe e mamā feusuaʻiga, pe afai e faatinoina e na o ē ua fusia faatasi i le faaipoipoga. O le mea lea e utagia ai e Kerisiano upu nei: “Ia e fiafia i lau avā na fai a o e tauleʻaleʻa.”​—Faataoto 5:18.

17. (a) Aiseā e lē talafeagai ai mo Kerisiano le manatu o le lalolagi i le mulilua? (e) E faapefea ona tatou mulimuli i le faaaʻoaʻoga a Iopu?

¹⁷ O ē e faia feusuaʻiga ma se tasi e leʻi faaipoipo i ai, ua matuā lē faaaloalo i latou i tulafono tau amio a le Atua. E moni e toʻatele tagata e manatu e lē leaga le mulilua i aso nei. Ae e lē tatau ona sesē le manatu o Kerisiano i le mulilua ona ua taaʻina i manatu o tagata. Auā ua latou iloa, “e faamasino e le Atua o ē e faitaaga ma ē e mulilulua,” ae e lē faamasino e tagata. (Eperu 10:31; 12:29) O lea la, e tāua i Kerisiano moni le silafaga a le Atua e faatatau i lenei mataupu. (Faitau le Roma 12:9.) Ia manatua  foʻi upu a le augātamā o Iopu: “Ua ou osia le feagaiga ma oʻu mata.” (Iopu 31:1) Ioe, e puleaina e Kerisiano moni o latou mata, ma e lē vaavaai ma le manaʻonaʻo i se tagata o le isi itupā e lē o sana paaga, ina ia latou teena ai le faia o se mea e iʻu ai i le mulilua.​—Tagaʻi i le mataupu o loo i le Faaopoopoga “O le Aʻoaʻoga a le Tusi Paia i le Teteʻa ma le Nonofo Eseese.”

18. (a) O le ā le matuiā o le mulilua i le silafaga a Ieova? (e) O le ā le itu e tutusa ai le mulilua ma le ifo i tupua?

¹⁸ O le ā le matuiā o le mulilua i le silafaga a Ieova? Ua fesoasoani le Tulafono a Mose iā i tatou e iloa ai lagona o Ieova i lenei mataupu. Na faasala i le oti ē na faia le mulilua ma le ifo i tupua i taimi o Isaraelu. (Levitiko 20:2, 10) Po o e mātau mai le itu e tutusa ai na agasala e lua? O se tagata Isaraelu na ifo i tupua, na ia solia la laʻua feagaiga ma Ieova. E faapena foʻi se tagata Isaraelu na mulilua, na ia solia la laʻua feagaiga ma lona toʻalua. O i laʻua uma o ni tagata e lē faamaoni. (Esoto 19:5, 6; Teuteronome 5:9; faitau le Malaki 2:14.) Na nofosala uma i laʻua i luma o Ieova, o le Atua faamaoni ma le maufaatuatuaina.​—Salamo 33:4.

19. O le ā e ono faamalosia ai le filifiliga a se tasi e teena le mulilua, ma aiseā?

¹⁹ E moni ua lē o toe ola Kerisiano i le Tulafono a Mose. Ae o le iloaina e faapea, o se agasala matuiā le mulilua i aso o Isaraelu anamua, e ono faamalosia ai le filifiliga a Kerisiano ina ia lē faia lenā agasala. Aiseā? Seʻi manatu i lenei faatusatusaga: Pe e mafai ona e ulu atu e tootuli i totonu o se falesā, ma tatalo i luma o se faatusa? E te tali mai ʻE lē taitai!’ Ae faamata e te faia faapena pe a ofoina atu ni tupe se tele? E te tali mai ʻE lē mafai lava!’ Ioe, e matuā ʻinoʻino le Kerisiano moni e faatigā iā Ieova e ala i le ifo i se tupua. E tatau foʻi la ona ʻinoʻino Kerisiano i le faatigā i lo latou Atua o Ieova ma a latou paaga i lo latou faia o le mulilua, po o le ā lava se mea e ofoina mai iā  i latou e faia ai lea agasala. (Salamo 51:1, 4; Kolose 3:5) Tatou te lē mananaʻo lava e faia se mea e ono faafiafia ai Satani, ae e matuā faalumaina ai Ieova ma le faatulagaga paia o le faaipoipoga.

20. O le ā le mea ua tupu i isi faaipoipoga? Ia fai se faataʻitaʻiga.

²⁰ O ā ni gaoioiga e te faia ina ia saga faamalosia ai lou faaaloalo i lou toʻalua, e faaopoopo atu i le teena o amioga e faaluma ai faaipoipoga? Ina ia tali lenā fesili, seʻi manatu e faapea o le faaipoipoga e pei o se fale. O upu alofa, o gaoioiga agalelei, ma isi uiga faaaloalo e faaalia e ulugalii faaipoipo i le tasi i le isi, e faatusa na uiga i mea teuteu e faamatagofie atili ai le fale. Afai e māfana le lua ulugalii, e pei le lua faaipoipoga o se fale ua teuteuina lelei, e matagofie i le vaai. Afai e maalili lo oulua alofa, e faasolosolo ina leai ni mea teuteu, ma ua pei ai la oulua faaipoipoga o se fale e lē matagofie i le vaai, auā ua leai ni mea e teuteu ai. O lou faanaunauga ina ia usitaʻia le poloaʻiga a le Atua “ia faamamaluina . . . le faaipoipoga,” e uunaʻia ai oe e faaleleia lea tulaga. O le mea moni, e alu aogā taumafaiga e toe faaleleia ai se mea e tautele ma tāua. E faapefea ona e faia lenā mea? Ua fai mai le Afioga a le Atua: “Ua atiaʻe le aiga o i le fale i le atamai, ma ua faamausalīina i le faautaga loloto. O le poto foʻi e faatumuina ai potu i totonu i mea tautele ma mea tāua mananaia.” (Faataoto 24:3, 4) Seʻi manatu i le auala e faatatau ai lenā mau i faaipoipoga.

21. E faapefea ona faasolosolo ina tatou faamalosia a tatou faaipoipoga? (Tagaʻi foʻi i le pusa “ E Faapefea Ona Faaleleia Laʻu Faaipoipoga?”)

²¹ O “mea tautele” o loo faatumulia ai se aiga fiafia, e aofia ai uiga e pei o le alofa moni, o le mataʻu i le Atua, ma le faatuatua malosi. (Faataoto 15:16, 17; 1 Peteru 1:7)  E faamalosia e na uiga se faaipoipoga. Ae pe na e mātauina pe e faapefea ona faatumulia i mea tautele le potu o loo taʻua i le mau? E ala i “le poto.” E iai le malosi o le poto o le Tusi Paia pe a faatatauina, e suia ai mafaufauga o tagata ma uunaʻia ai i latou e toe faaolaola le alofa o le tasi i le isi. (Roma 12:2; Filipi 1:9) O lea la, o taimi uma lava e lua te talatalanoa faatasi ai i se auala toʻafilemu i mau o le Tusi Paia, e pei o le mau o le aso, po o se mataupu faale-Tusi Paia o loo i Le Olomatamata ma le Ala Mai! e fitoitonu i faaipoipoga, ua peiseaʻī o lenā e lua te iloiloina se mea teuteu manaia e faamatagofie ai lou fale. Afai e uunaʻia oe e lou alofa iā Ieova ina ia faatatauina i lau faaipoipoga fautuaga o loo i lenei mataupu, e peiseaʻī ua e faatumulia potu o lou fale i mea teuteu. O le iʻuga, atonu e toe maua e lau faaipoipoga le tulaga matagofie ma le manaia lea na iai muamua.

22. E faapefea ona faamalieina i tatou pe a finafinau e fai la tatou vaega i le faamalosia o le faaipoipoga?

²² Atonu e tele se taimi ma taumafaiga e alu ai i le faasolosolo ona aumai o na mea teuteu. Ae afai e te finafinau e fai lau vaega, o le a matuā faamalieina ai oe i le iloa o loo e usitaʻi i le poloaʻiga a le Tusi Paia: “Ia tausolomua ona faaaloalo le tasi i le isi.” (Roma 12:10; Salamo 147:11) O le sili o na mea uma, o au taumafaiga malosi e faamamaluina lau faaipoipoga, e te tumau ai i le alofa o le Atua.