1, 2. Bai yumi skelim wanem askim? Bilong wanem bai yumi skelim dispela askim?

 OLSEM WANEM? Yu marit pinis? Sapos olsem, marit bilong yu i givim amamas long yu, o yu gat ol bikpela hevi insait long en? Yu na poroman marit bilong yu i no pas gut moa? Yu stap wantaim poroman marit bilong yu, tasol yu no amamas long marit bilong yu? Sapos olsem, ating yu bel hevi olsem yu na poroman marit bilong yu i no pas gut moa olsem long bipo. Yu wanpela Kristen, na yu laik bai marit bilong yu i litimapim nem bilong Jehova, em dispela God yu save laikim tru. Olsem na ating i stap bilong yu long nau i mekim na yu tingting planti na bel hevi. Tasol maski i olsem, yu no ken ting i no gat rot bilong stretim.

² Long nau, i gat planti gutpela marit Kristen em bipo marit bilong ol i no gat amamas insait long en. Tasol ol i painim rot bilong strongim marit bilong ol. Yu tu inap kisim bikpela amamas moa insait long marit bilong yu. Olsem wanem yu inap mekim olsem?

3, 4. Bilong wanem tupela marit bai i go klostu moa long narapela narapela sapos ol i wok strong long i go klostu moa long God? Stori long dispela.

³ Yu na poroman marit bilong yu bai pas gut wantaim sapos yupela i wok strong long i go klostu long God. Bilong wanem i olsem? Tingim dispela tok piksa: I gat wanpela maunten em as bilong en i traipela na het bilong en i sap. Man i sanap long as bilong maunten long hap not na meri i sanap long narapela sait bilong as bilong maunten, long hap saut. Tupela i kirap wokabaut i go antap long maunten. Taim tupela i stap yet klostu long as bilong maunten, narapela i stap longwe long narapela. Tasol taim tupela i wok long i go antap moa klostu long het bilong maunten, narapela i wok long i go klostu moa long narapela. Yu luksave long gutpela samting dispela tok piksa i lainim yumi long en?

⁴ Yumi ken tok hatwok yu mekim bilong givim bel olgeta long wok bilong Jehova i olsem hatwok yu mekim bilong wokabaut i go antap long maunten. Yu laikim tru Jehova, olsem na yu wok long taitim bun long mekim laik bilong em. Tasol sapos yu na poroman marit bilong yu i no pas gut moa, i kain olsem yupela i wokabaut i go antap long maunten long narapela narapela sait bilong en. Tasol wanem samting i kamap sapos yutupela i wok yet long wokabaut i go antap long maunten? Tru, ating pastaim yupela i stap longwe long narapela narapela. Tasol taim yupela i wok strong moa long i go klostu long God​—olsem wokabaut i go antap long maunten​—yu na poroman marit bilong yu bai wok long i go klostu moa long narapela narapela.  Tru tumas, pasin bilong i go klostu moa long God em i rot bilong i go klostu moa long poroman marit bilong yu. Tasol olsem wanem yu ken mekim dispela samting?

5. (a) Wanem wanpela rot bilong i go klostu moa long Jehova na long poroman marit? (b) Jehova i gat wanem tingting long marit?

⁵ Wanpela bikpela rot bilong i go klostu long poroman marit bilong yu em olsem: Yutupela wantaim i mas bihainim ol tok bilong Baibel long marit. (Song 25:4; Aisaia 48:​17, 18) Tingim wanpela bikpela tok aposel Pol i bin mekim. Em i tok: “Olgeta manmeri i mas tingim marit olsem samting i dia tumas.” (Hibru 13:​4, NW) Jehova i gat dispela kain tingting long marit​—em i tingim marit olsem samting i dia tumas.

6. Ol ves i stap klostu long tok bilong Pol long marit i soim wanem samting? Bilong wanem em i bikpela samting long tingim dispela?

⁶ Yu na poroman marit bilong yu, yupela i wokboi bilong God, olsem na yupela i save pinis olsem marit i samting i dia tumas, na i holi. Jehova yet i bin kamapim marit. (Matyu 19:​4-6) Tasol sapos nau yu gat sampela hevi insait long marit bilong yu, na yu save olsem marit i olsem samting i dia tumas, ating dispela samting tasol i no inap kirapim yu na poroman bilong yu long laikim na rispektim narapela narapela. Olsem na wanem samting bai kirapim yutupela long mekim olsem? Lukim gut tok Pol i mekim long pasin bilong tingim marit olsem samting i dia tumas. Pol i no tok tasol long samting em i luksave long en, nogat, em i tokim ol man long mekim samting, em i tok: “Olgeta i mas tingim marit olsem samting i dia tumas” o samting ol i mas  rispek long en. a Taim yu tingim dispela samting, dispela inap kirapim yu long tingim na amamas long poroman marit bilong yu. Bilong wanem i olsem?

7. (a) Yumi save bihainim wanem ol tok bilong Baibel? Bilong wanem yumi mekim olsem? (b) Pasin bilong bihainim tok i save kamapim wanem ol gutpela samting?

⁷ Tingim dispela: Yu save ting olsem wanem long ol arapela tok bilong Baibel i kirapim yumi long mekim ol samting, olsem yumi mas kamapim ol disaipel na bung wantaim bilong mekim lotu? (Matyu 28:19; Hibru 10:​24, 25) Tru, ating sampela taim i hatwok long bihainim ol dispela tok. Ol man yu autim tok long ol, ating ol i no laik harim, o wok mani bilong yu i pinisim strong bilong yu na i hatwok tru long i go long ol miting Kristen. Tasol maski i olsem, yu wok yet long autim tok bilong Kingdom, na yu wok yet long i go long ol miting Kristen. I no gat wanpela man inap stopim yu​—Satan tu i no inap! Bilong wanem i olsem? Long wanem, pasin bilong yu long laikim tru Jehova i kirapim yu long bihainim ol tok bilong em. (1 Jon 5:3) Dispela i save kamapim wanem ol gutpela samting? Pasin bilong autim tok na go long ol miting, dispela i save givim bel isi na bikpela amamas long yu, long wanem, yu save olsem yu mekim laik bilong God. Na taim yu stap amamas na bel isi, dispela i givim nupela strong long yu. (Nehemia 8:10) Dispela i lainim yumi long wanem samting?

8, 9. (a) Wanem samting inap kirapim yumi long bihainim tok bilong tingim marit olsem samting i dia tumas? Bilong wanem i olsem? (b) Nau bai yumi skelim wanem tupela samting?

⁸ Pasin bilong yu long laikim tru God i kirapim yu  long bihainim tok bilong em long autim tok na go long ol miting maski i gat ol hevi, na olsem tasol, pasin bilong yu long laikim Jehova inap kirapim yu long bihainim tok bilong Baibel long “tingim marit olsem samting i dia tumas,” maski i luk olsem i hatwok long mekim olsem. (Hibru 13:​4, NW; Song 18:29; Saveman 5:4) Na tu, taim yu wok strong long autim tok na go long ol miting, yu kisim planti blesing i kam long God, na olsem tasol, taim yu wok strong long tingim marit bilong yu olsem samting i dia tumas, Jehova bai lukim dispela na em bai mekim gut long yu.​—1 Tesalonaika 1:3; Hibru 6:10.

⁹ Orait yu ken mekim wanem bilong tingim marit bilong  yu i olsem samting i dia tumas? Yu mas abrusim ol pasin em inap bagarapim marit. Na tu, yu mas mekim ol samting bilong strongim marit bilong yu.

10, 11. (a) Wanem kain pasin i save daunim marit? (b) Yumi mas skelim wanem askim wantaim poroman marit bilong yumi?

¹⁰ Inap sampela taim i go pinis, wanpela meri Kristen i tok: “Mi save beten askim Jehova long strongim mi long karim hevi.” Wanem kain hevi? Em i tok: “Man bilong mi i save mekim ol hatpela tok long mi. Mi no gat ol bagarap long skin, tasol ol tok em i sutim long mi, olsem ‘Yu save givim hevi long mi!’ na ‘Yu yusles meri!’ ol dispela tok i save bagarapim tru bel bilong mi.” Dispela meri i stori long wanpela bikpela hevi i save kamap​—pasin bilong mekim ol hatpela tok insait long marit.

¹¹ Sori tru sapos tupela marit Kristen i sutim ol hatpela tok long narapela narapela​—dispela i save bagarapim tru bel na bel i no inap kamap orait hariap! Sapos ol marit i mekim tok i bagarapim narapela, ol i no tingim marit olsem samting i dia tumas. Olsem wanem? Kain samting olsem i save kamap insait long marit bilong yu? Wanpela rot bilong painimaut em olsem, long pasin daun askim poroman marit bilong yu, “Tok bilong mi i save mekim wanem long yu?” Sapos poroman marit bilong yu i pilim olsem planti taim tok bilong yu i bagarapim bel bilong em, orait yu mas redi long senisim pasin bilong yu.​—Galesia 5:15; Efesus 4:31.

12. Olsem wanem God inap ting olsem lotu yu mekim i samting nating?

¹² Yu mas tingim dispela, ol tok yu mekim insait long marit i mekim sampela samting long pasin bilong yu  long pas gut wantaim Jehova. Baibel i tok: “Sapos wanpela man i ting olsem, ‘Mi gutpela Kristen na mi save lotu tru long God,’ tasol em i no bosim gut maus bilong en, orait em i save giamanim em yet. Olsem na bilip bilong en na lotu bilong en em i samting nating tasol.” (Jems 1:26) Ol tok yu mekim i poroman wantaim pasin bilong yu long mekim lotu. Baibel i no sapotim dispela tingting olsem maski wanem samting i kamap long haus, dispela i no bikpela samting sapos man i tok em i lotuim God. Nogat. No ken giamanim bel bilong yu yet. Dispela em i wanpela bikpela samting tru. (1 Pita 3:7) Ating yu gat save long mekim wok na yu givim bel long mekim, tasol sapos yu mekim ol tok bilong bagarapim bel bilong poroman marit bilong yu, yu daunim marit na God inap ting olsem lotu yu mekim i samting nating.

13. Olsem wanem wanpela inap bagarapim bel bilong poroman marit bilong em?

¹³ Ol marit i mas was gut, nogut ol i bagarapim bel bilong poroman bilong ol long sampela narapela rot. Tingim tupela rot olsem: Wanpela singel mama i save ring planti taim long wanpela marit brata insait long kongrigesen bilong kisim gutpela tingting long em, na tupela i save toktok longpela taim. Wanpela singel brata i save lusim bikpela hap taim long autim tok wantaim wanpela marit sista. Ating dispela marit brata na marit sista i gat gutpela tingting long helpim narapela, tasol pasin bilong ol bai mekim wanem long poroman marit bilong ol? Dispela samting i painim wanpela maritmeri na em i tok: “Taim mi lukim olsem man bilong mi i save tingim na givim bikpela hap taim long narapela sista insait long kongrigesen, dispela i save bagarapim bel bilong mi. Mi pilim olsem mi samting nating.”

14. (a) Stat 2:24 i gat wanem tok long ol marit? (b) Yumi mas givim wanem askim long yumi yet?

 ¹⁴ Dispela meri na ol narapela husat i gat wankain hevi insait long marit, bel bilong ol i save bagarap. Poroman marit bilong ol i givim baksait long wanpela bikpela tok bilong God long ol marit: “Man i save lusim papamama na i pas wantaim meri bilong en.” (Stat 2:24) Tru, ol man na meri i marit, ol i soim yet rispek long papamama bilong ol, tasol God i tok ol i mas tingim poroman marit bilong ol pastaim. Na olsem tasol, ol Kristen i laikim tru ol wanbilip bilong ol, tasol ol i mas tingim poroman marit bilong ol pastaim. Olsem na taim wanpela marit Kristen i lusim bikpela hap taim long stap wantaim ol wanbilip o i pas pas tumas wantaim ol​—na moa yet sapos brata i mekim olsem long narapela sista, o sista i mekim olsem long narapela brata​—dispela bai putim hevi long marit. Olsem wanem? Dispela em as na marit bilong yu i gat hevi? Askim yu yet, ‘Mi save givim taim, tingim tru, na mekim gut long poroman marit bilong mi olsem i stret long mi mas mekim?’

15. Olsem Matyu 5:28 i kamapim, bilong wanem ol marit Kristen i no ken tingim tumas wanpela husat i no poroman marit bilong ol?

¹⁵ Na tu, ol marit Kristen husat i save pas pas tumas wantaim wanpela i no poroman marit bilong ol, ol i wokabaut long rot we hevi inap painim ol. Sori tru, sampela marit Kristen i kirap laikim wanpela em ol i bin pas pas tumas wantaim em. (Matyu 5:28) Na dispela i bin kirapim ol long mekim sampela pasin i daunim moa yet marit bilong ol. Tingim tok aposel Pol i bin mekim long dispela samting.

16. Pol i mekim wanem tok long marit?

¹⁶ Bihain stret long Pol i mekim dispela tok long  “tingim marit olsem samting i dia tumas,” em i mekim wanpela tok lukaut: “Marit i mas i stap klin, long wanem, God bai kotim ol man i mekim pasin pamuk na pasin adaltri.” (Hibru 13:​4, NW) Ol marit tasol i ken mekim maritpasin. Olsem na ol Kristen i bihainim dispela tok bilong Baibel: “Yu mas amamas wantaim meri bilong yu em yu bin kisim taim yu yangpela yet.”​—Sindaun 5:​18, NW.

17. (a) Bilong wanem tingting bilong ol man bilong graun long pasin adaltri i no ken stiaim tingting bilong ol Kristen? (b) Olsem wanem yumi ken bihainim pasin bilong Jop?

¹⁷ Ol man na meri husat i slip wantaim wanpela i no poroman marit bilong ol, ol i no rispek liklik long ol lo bilong God long stretpela pasin. Tru, planti man long nau i no gat tok long pasin adaltri. Tasol maski ol man i gat wanem kain tingting long pasin adaltri, dispela i no ken stiaim tingting bilong ol Kristen long dispela samting. Ol i save olsem “God bai kotim ol man i mekim pasin pamuk na pasin adaltri,” na em i no wok bilong ol man long mekim olsem, nogat. (Hibru 10:31; 12:29) Olsem na ol Kristen tru i save bihainim tingting bilong Jehova long dispela samting. (Rom 12:9) Tingim tok bilong bilipman Jop: “Mi bin mekim strongpela promis pinis olsem, mi no ken aigris long ol meri.” (Jop 31:1) Yes, bilong abrusim tru rot em inap kirapim man long mekim pasin adaltri, ol Kristen tru i save bosim ai bilong ol na ol i no aigris long wanpela husat i no poroman marit bilong ol.​—Lukim Apendiks, pes 251-53.

18. (a) Long ai bilong Jehova, pasin adaltri i nogut olsem wanem? (b) Olsem wanem pasin adaltri na pasin bilong lotuim god giaman i poroman wantaim?

¹⁸ Long ai bilong Jehova, pasin adaltri i nogut olsem wanem? Lo Bilong Moses i helpim yumi long kliagut  long tingting bilong Jehova long dispela samting. Long Israel, strafe bilong man i mekim pasin adaltri na lotuim god giaman, em ol i mas kilim em i dai. (Wok Pris 20:​2, 10) Yu inap luksave long olsem wanem dispela tupela pasin i poroman wantaim? Man Israel husat i lotuim imis, em i brukim kontrak em i bin wokim wantaim Jehova. Na olsem tasol, man Israel husat  i mekim pasin adaltri, em i brukim kontrak em i bin wokim wantaim poroman marit bilong em. Dispela tupela man wantaim i brukim promis ol i bin mekim. (Kisim Bek 19:​5, 6; Lo 5:9; Malakai 2:14) Olsem na tupela wantaim i gat asua long ai bilong Jehova, em God i save truim tok bilong em na yumi inap bilip tru long em.​—Song 33:4.

19. Wanem samting inap strongim wanpela long sakim pasin adaltri? Bilong wanem i olsem?

¹⁹ Tru, ol Kristen i no stap aninit long Lo Bilong Moses. Tasol taim ol Kristen i tingim olsem long Israel bilong bipo, pasin adaltri i wanpela bikpela rong tru, dispela inap strongim ol long no ken mekim kain pasin olsem. Bilong wanem i olsem? Tingim dispela: Bai yu go insait long wanpela haus lotu, brukim skru, na beten long ai bilong wanpela imis? Yu bai tok, ‘Nogat tru!’ Tasol sapos ol i tok ol bai givim bikpela mani long yu, dispela bai kirapim yu long mekim olsem? Yu bai tok, ‘Mi no inap tru long mekim!’ Tru tumas, ol Kristen tru i no laik tru long givim baksait long Jehova long rot bilong lotuim wanpela imis. Na olsem tasol, ol Kristen i mas nolaik tru long givim baksait long God bilong ol, Jehova, na poroman marit bilong ol long rot bilong mekim pasin adaltri​—maski wanem samting i laik kirapim ol long mekim olsem. (Song 51:​1, 4; Kolosi 3:5) Yumi no laik tru long mekim wanpela pasin em Satan bai amamas long en, tasol dispela pasin bai bagarapim tru nem bilong Jehova na marit i holi.

20. Wanem samting i bin kamap insait long sampela marit? Stori long dispela.

²⁰ Yu mas abrusim ol pasin i save daunim marit, tasol  tu, yu inap mekim wanem na bai yu soim rispek gen long poroman marit bilong yu? Bilong bekim dispela askim, tingim olsem marit i olsem wanpela haus. Nau tingim olsem ol naispela tok, gutpela pasin, na ol arapela gutpela samting ol marit i save mekim long narapela narapela i olsem ol bilas i mekim haus i luk nais. Sapos yutupela i pas gut wantaim, marit bilong yupela i olsem haus i gat ol bilas i mekim em i kamap gutpela ples bilong i stap long en. Sapos pasin bilong yupela long laikim poroman marit i no strong moa, isi isi ol bilas bilong haus i lus, na marit bilong yupela bai kamap olsem haus i no gat ol naispela bilas long en. Yupela i gat laik long bihainim tok bilong God long “tingim marit olsem samting i dia tumas,” na dispela bai kirapim yupela long mekim ol samting bilong strongim marit. Tru tumas, i stret yupela i laik stretim samting i gutpela na i dia tumas. Orait olsem wanem yupela inap mekim olsem? Baibel i tok: “Man i gat gutpela tingting na save, em bai i gat gutpela haus, na famili bilong en bai i kamap strong. Dispela kain man em inap baim olkain gutpela samting i dia tumas na putim long haus bilong en.” (Sindaun 24:​3, 4) Tingim olsem wanem ol dispela tok i stret long marit.

21. Olsem wanem isi isi yumi ken strongim marit bilong yumi? (Lukim tu  blok long pes 149.)

²¹ Sampela bilong “olkain  gutpela samting” insait long famili em ol kain pasin olsem pasin laikim, pasin bilong pret long God, na strongpela bilip. (Sindaun 15:​16, 17; 1 Pita 1:7) Ol dispela pasin i strongim marit. Tasol yu luksave long olsem wanem dispela haus em Buk Sindaun i stori long en i pulap long ol gutpela samting? Long rot bilong “gutpela tingting na save.” Em nau, taim ol manmeri i kisim save long Baibel na i bihainim ol tok bilong en, dispela i gat strong long senisim tingting bilong ol na kirapim ol long laikim gen narapela narapela. (Rom 12:2; Filipai 1:9) Olsem na taim yu na poroman marit bilong yu i sindaun na toktok gut wantaim long wanpela hap tok bilong Baibel, olsem teks bilong de, o wanpela tok bilong Baibel long Wastaua o Kirap! i toktok long marit, i olsem yupela i skelim wanpela naispela bilas em inap mekim haus bilong yupela i luk nais tru. Taim pasin bilong laikim tru Jehova i kirapim yu long bihainim ol tok bilong marit em nau tasol yu bin skelim, orait i olsem yu wok long bilasim ‘haus bilong yu.’ Dispela bai mekim na marit bilong yu bai kamap gutpela ples bilong i stap long en olsem long bipo.

22. Sapos yumi mekim hap wok bilong yumi long strongim marit bilong yumi, yumi bai amamas long save long wanem samting?

²² Tru, ating longpela hap taim liklik bai lus bilong putim bek ol dispela bilas. Tasol sapos yu wok strong long mekim hap wok bilong yu, yu bai amamas tru long save olsem yu wok long bihainim tok bilong Baibel, olsem: “Yupela i mas strong long litimapim nem bilong ol arapela tasol.” (Rom 12:10; Song 147:11) Na bikpela samting moa, hatwok yu mekim bilong tingim marit olsem samting i dia tumas bai helpim yu long stap insait yet long pasin laikim bilong God.