1, 2. Se a te mea ka sau‵tala tatou ki ei, kae kaia?

A KOE se tino avaga? Kafai e penā loa, e mata, e fiafia koe i tou olaga fakatauavaga, io me ko ‵tupu a fakalavelave ‵lasi i ei? E mata, ko se fealofani koulua mo tau avaga? E mata, ko fa‵ki fua kae ko se fiafia koe ki ei? Kafai e penā loa, kāti ko fanoanoa koe ona ko te fealofani telā ne maua muamua ne koulua ko kamata o matafitafi. E pelā me se Kelisiano, e manako eiloa koe ke avatu ne tou olaga fakatauavaga a vikiga ki a Ieova, ko te Atua telā e alofa koe ki ei. Tela la, e mafai o fakamanavase kae faka‵mae ulu te mea tenā ki a koe. E ui i ei, fakamolemole sa fakaiku aka me ko seai se mea e mafai o fai ki ei.

² E isi ne tauavaga Kelisiano ‵lei i aso nei ne fai foki penā i aso mua, ne ‵nofo fa‵ki fua ona ko te seai o se fealofani. Kae ne maua ne latou se auala ke fakama‵losi aka ei olotou fesokotakiga. E mafai foki o maua ne koe te lotomalie i tou olaga fakatauavaga. E pefea la?

3, 4. Kaia e gasolo aka ei o ‵pili atu te tauavaga māfai e taumafai ke fakapili‵pili lāua ki te Atua? Fakamatala mai.

³ Ka ‵pili atu te lū va mo tou avaga māfai e taumafai  koulua o fakapili‵pili atu ki te Atua. Kaia? Ke onoono ki te fakatusa tenei: Mafaufau ki se mauga e fai pelā me se pulou—e lauefa tena tafito kae lauliki tena taulu. E tu te tagata i tena tafito i te feitu ki mātū kae tu te fafine i tena tafito i te suā feitu o te mauga ki saute. Ko kamata o ‵kake aka laua. A koi ‵nofo ‵pili atu lāua ki te tafito o te mauga, ne ‵mao ‵ki te lā va. Kae i te taimi e ka‵kake aka ei lāua ki tena taulu lauliki, ko gasolo atu foki o ‵pili te lā va. E a, e matea ne koe te akoakoga fakamalosi loto i te fakatusa tenei?

⁴ Au taumafaiga kolā e fai ke tavini atu mo te loto kātoa ki a Ieova e mafai o faka‵tusa ki taumafaiga kolā e fai ke kake aka koe i se mauga. Ona ko koe e alofa ki a Ieova, ko leva ne taumafai koe o kake aka i se auala fakatusa. Kae kafai ko se fealofani koulua mo tau avaga, kāti ko ‵kake aka nei koulua i feitu e lua o te mauga. Kae se a la te mea e tupu māfai e ‵kake aka faeloa koulua? E tonu, e mafai o ‵mao ‵ki te koga e ‵tu ei koulua i te taimi muamua. E tiga te feitu tenā, ko te uke o au taumafaiga e fai ke pili atu koe ki te Atua—i te kake aka faeloa ki luga—ko te ‵pili foki tenā o te lū va mo tou avaga. E tonu, a te fakapilipili atu ki te Atua ko te kī ki te fakapilipili atu ki tou avaga. Kae e mafai pefea o fai ne koe te mea tenā?

5. (a) Se a te auala e tasi ke fakapilipili atu ei ki a Ieova mo tau avaga? (e) E pefea te kilokiloga a Ieova ki te avaga fakaipoipo?

⁵ E tasi te auala tāua ke ‵kake aka ei i se auala fakatusa, ko te faka‵logo o koulua mo tau avaga ki pati fakatonutonu e uiga ki avaga fakaipoipo kolā e maua i te Muna a te Atua. (Salamo 25:4; Isaia 48:17, 18) Tela la, mafaufau ki se manatu fakatonutonu e tasi telā ne taku mai ne te apositolo ko Paulo. Ana muna: “E ‵tau  o faka‵malu ne tino katoa a te fakaipoipoga.” (Epelu 13:4) Se a tena uiga? E fakaasi mai i te pati “faka‵malu” me e isi se mea e tāua ‵ki i ei. Kae tenā eiloa te kilokiloga a te Atua e uiga ki te avaga fakaipoipo—e fakatāua malosi ne ia.

6. Se a te mea e fakaasi mai i pati fakatonutonu a Paulo e uiga ki te fakaipoipoga, kae kaia e tāua ei ke maina faka‵lei i ei?

⁶ E tonu, e pelā me ne tavini a te Atua, ko leva ne iloa ne koulua mo tou avaga me tāua kae ‵malu te avaga. Ko Ieova eiloa ne kamata ne ia te avaga. (Faitau te Mataio 19:4-6.) Kae kafai ko ‵tupu nei a fakalavelave fakatauavaga, kāti ko se lava fua i te iloa atu me e ‵malu te avaga fakaipoipo ke fakamalosi atu ke fakatau a‵lofa kae fakatau āva koulua mo tou avaga. Se a la te mea ka fakamalosi atu ke fai koulua penā? Ke onoono faka‵lei ki pati a Paulo e uiga ki te mataupu ko te fakaasiatuga o te tulaga ‵malu. Ne seki fai mai a ia me ‵malu te fakaipoipoga”; i lō te fai mai penā, ana muna, “e ‵tau o faka‵malu . . . te fakaipoipoga.” Ne seki fai mai fua ne Paulo ana mafaufauga; ne tuku mai eiloa ne ia se fakamalosiga. * A te maina ‵lei i pati konā a Paulo e mafai o fesoasoani atu ke maua ne koe se fakamalosiga lasi ke toe fakatāua ne koe tou avaga. Kaia e fai ei penā?

7. (a) Ne a fakatonuga mai te Tusi Tapu e fai ne tatou, kae kaia? (e) Ne a ikuga ‵lei e maua mai te faka‵logo ki ei?

⁷ Mafaufau malie aka me e saga atu pefea koe ki nisi  fakatonuga mai te Tusi Tapu, e pelā mo te galuega ke fai a soko io me ko te fakamalosiga ke ‵kau fakatasi mō te tapuakiga. (Mataio 28:19; Epelu 10:24, 25) E tonu, kāti e mafai o faigata te faiga o fakatonuga konā i nisi taimi. Kāti e mafai o se fia ‵saga mai a tino kolā e talai koe ki ei, io me e mafai o fi‵ta malosi koe i tau galuega ‵togi ko faigata ei o kau atu koe ki fakatasiga faka-Kelisiano. E tiga te feitu tenā, e talai atu faeloa ne koe te fekau o te Malo, kae kau atu faeloa koe ki fakatasiga faka-Kelisiano. E seai se tino e mafai o taofi ne ia koe—ke oko ki a Satani! Kaia? Me e fakamalosigina koe ne te ‵poko o tou alofa ki a Ieova ke fakalogo koe ki ana fakatonuga. (1 Ioane 5:3) Ne a ikuga ‵lei e maua mai i ei? E maua ne koe te filemu o te mafaufau mo te fiafia tonu mai te kau atu ki te galuega talai mo fakatasiga ona ko tou iloa me e fai ne koe te loto o te Atua. Kae ko lagonaga eiloa konā e maua ne koe i ei se malosi fou. (Neemia 8:10) Se a te akoakoga e maua mai i te mea tenei?

8, 9. (a) Se a te mea e mafai o fakamalosi mai ke faka‵logo tatou ki te fakamalosiga ke faka‵malu te avaga fakaipoipo, kae kaia? (e) Ne a manatu e lua ka mafau‵fau nei tatou ki ei?

⁸ E pelā eiloa mo te fakamalosi atu o te ‵poko o tou alofa ki te Atua ke fakalogo koe ki ana fakatonuga ke talai kae tapuaki fakatasi atu faitalia a fakalavelave, e penā foki te fakamalosi atu o tou alofa ki a Ieova ke fakalogo koe ki te fakamalosiga mai te Tusi Tapu me ‘e ‵tau o faka‵malu [tau] fakaipoipoga,’ faitalia te foliga mai me e faigata ke fai penā. (Epelu 13:4; Salamo 18:29; Failauga 5:4) E se gata i ei, e pelā eiloa mo au taumafaiga ke talai kae tapuaki fakatasi atu, e maua i ei a fakamanuiaga e uke mai te Atua, e penā foki au  taumafaiga ke faka‵malu tau avaga fakaipoipo, e matea kae fakamanuia ne Ieova.—1 Tesalonia 1:3; Epelu 6:10.

⁹ E mafai la pefea o faka‵malu ne koe tau avaga fakaipoipo? E ‵tau o ‵kalo keatea koe mai amioga kolā ka fakamasei atu ki ei. E se gata i ei, e ‵tau o fai ne koe a faiga kolā ka fakamalosi aka i ei tau feagaiga.

10, 11. (a) Ne a amioga e se faka‵malu atu ki te avaga fakaipoipo? (e) Se a te fesili e ‵tau o mafau‵fau tatou ki ei fakatasi mo ‵tou avaga?

¹⁰ Ne fai mai se fafine avaga Kelisiano i se taimi ko teka: “E ‵talo atu au ki a Ieova ke fesoasoani mai ke  mafai ne au o kufaki.” Ke kufaki i te a? Tenei loa tena fakamatalaga: “E ta au ne taku avaga ki pati ma‵sei. Kāti e seai ne pa‵kiaga i toku foitino kae ko ana pati fakatauemu e pelā mo te ‘A koe se amoga ‵mafa!’ ‘E seai sou aoga!’ ne logo‵mae masei i ei toku loto.” Ne avaka ne te fafine avaga tenei se mataupu e ‵tau o manavase malosi ki ei—ko pati faka‵mae loto i loto i te avaga fakaipoipo.

¹¹ Ko tafaga la te fakafanoanoa māfai e fakatau peipei ne se tauavaga a vaegā pati penā i loto i se kāiga Kelisiano, e fakalogo‵mae atu i ei a lagonaga kolā e faigata o faka‵lei aka! E maina ‵lei me e se ‵malu te avaga telā e fakaaoga i ei a pati faka‵mae loto penā. E a tou olaga fakatauavaga i te feitu tenei? E tasi te auala e iloa ei ne koe ko te fesili atu mo te loto maulalo ki tou avaga, “E pokotia pefea koe i aku pati?” Kafai e fai mai tau avaga me ko oti ne fakama‵sei atu au pati ki ana lagonaga i taimi e uke, e ‵tau o talia ne koe ke faka‵lei aka te feitu tenā.—Kalatia 5:15; faitau te Efeso 4:31.

12. E mafai pefea o se aoga te tapuakiga a se tino i te kilokiloga a te Atua?

¹² Fai ke maina faka‵lei koe me i te fakaaogaga o tou gutu i loto i tou olaga fakatauavaga e pokotia i ei tou fesokotakiga mo Ieova. E fai mai te Tusi Tapu: “Kafai e se mafai ne ia [se tino] o taofiofi tona gutu, e seai se aoga o tena toaga ki lotu, ka ko faka‵segina foki a ia ne ia eiloa.” (Iakopo 1:26) E se mafai o ‵vae keatea au pati mai tau tapuakiga. E se ‵lago te Tusi Tapu ki te manatu me e se tāua so se mea e tupu i te kāiga māfai e fai mai fua koe i a koe e tavini ki te Atua. Fakamolemole sa fakaloiloi ne koe a koe eiloa. A te  mea tenei e tāua ‵ki eiloa. (Faitau te 1 Petelu 3:7.) E uke a mea e mafai ne koe o fai mo te loto finafinau, kae kafai e fakalogo‵mae ne koe tau avaga mo te iloa tonu ki pati fakatauemu, ko se faka‵malu ne koe te avaga fakaipoipo kae e mafai o se aoga tau tapuakiga i te kilokiloga a te Atua.

13. E mafai pefea o ma‵sei a lagonaga o se tino avaga?

¹³ E ‵tau foki o matapula‵pula te tauavaga ke mo a ma fakalogo‵mae atu i auala kolā e se mateagofie. Mafaufau ki fakaakoakoga e lua: E telefoni atu faeloa se mātua e seai sena avaga ki se tagata avaga i te fakapotopotoga mō se fesoasoani, kae e fai‵pati lāua i se taimi leva ‵ki; e fakamaumau ne se taina taka a taimi e uke ke ga‵lue mo se tuagane avaga i te galuega talai i vaiaso katoa. Kāti e ‵lei loa a manakoga o lāua konei e a‵vaga i te avā fakaakoakoga konei; kae e mata, e pokotia pefea i ei a lā avaga? Ne fai mai se fafine avaga telā ne pokotia i se vaegā mea penā: “Ne logo‵mae au i te matea atu a te uke o taimi e fakamaumau ne toku avaga ki se isi tuagane i te fakapotopotoga. Ne fai ei au ke mafaufau i a au se tino fatauva.”

14. (a) Se a te tiute i te olaga fakatauavaga telā e faka‵mafa mai i te Kenese 2:24? (e) Se a te fesili telā e ‵tau o ‵sili ifo ki a tatou eiloa?

¹⁴ E malamalama tatou i te logo‵mae o te avaga tenei mo nisi tino kolā e fe‵paki mo tulaga penei i te olaga fakatauavaga. Ko se ‵saga atu olotou avaga ki te fakatonuga tāua a te Atua mō tino a‵vaga: “Tenā te pogai e tiakina ei ne te tagata tena tamana mo tena matua kae ‵nofo fakatasi mo te fafine, telā ko tasi ei laua.” (Kenese 2:24) E tonu, a latou kolā e a‵vaga e tumau eiloa i te āva ki olotou mātua; kae mai lalo i te fakatokaga a te Atua, te lotou toe tiute tāua ko olotou avaga. E  penā foki te a‵lofa o Kelisiano ki olotou taina tali‵tonu; kae ko te lotou tiute muamua ko olotou avaga. Tela la, kafai ko tō fakamaumau ne Kelisiano a‵vaga a taimi e uke io me ko tō masani mo tino tali‵tonu, maise eiloa i va o tagata mo fafine, ko fakafaigata i ei te feagaiga i te avaga fakaipoipo. E mata, tenā loa te pogai o fesokotakiga sē ‵lei i te lū avaga? Fesili ifo ki a koe, ‘E mata, e lava te taimi e saga tonu atu ei au ki toku avaga, kae fakaasi atu te alofa atafai telā e ‵tau eiloa o maua ne ia’?

15. E ‵tusa mo te Mataio 5:28, kaia e ‵tau ei o ‵kalo keatea a Kelisiano a‵vaga mai te tō ‵saga atu ki se tagata io me se fafine telā e se avaga mo latou?

¹⁵ E se gata i ei, a Kelisiano a‵vaga kolā ko tō silia te lotou ‵saga atu ki tino kolā e se ko olotou avaga e va‵lea me e fai fua i ei ke ‵tu atu latou i se tulaga fakamataku. E fakafanoanoa me ko oti ne fia‵fai a nisi Kelisiano a‵vaga ki a latou kolā ko tō masani mo latou. (Mataio 5:28) Ko oti ne iku atu a lagonaga penā ki te faiga o amioga kolā e se faka‵malu i ei ki te avaga fakaipoipo i auala e uke. Mafaufau ki pati a te apositolo ko Paulo e uiga ki te mataupu tenei.

16. Se a te fakatonuga e tuku mai ne Paulo e uiga ki te olaga fakatauavaga?

¹⁶ Mai tua mālie eiloa o te fakamalosiga a Paulo ‘e ‵tau o faka‵malu te fakaipoipoga,’ ne tuku mai ne ia te faka‵pulaga tenei: “[ke] se fakalailai te moega o te tauavaga, me ka fakamasino ne te Atua a tino finalalolagi mo tino mulilua.” (Epelu 13:4, Tusi Paia, Samoa) Ne fakaaoga ne Paulo te tugapati ko  “te moega o te tauavaga” ke fakasino atu ki faifaiga fakatauavaga. E “se fakalai‵lai,” io me tausi ke ‵ma a faifaiga konā, māfai e fai katoa i loto i te olaga fakatauavaga. Tela la, e faka‵logo a Kelisiano ki pati konei mai te Atua: “Ke fiafia koe ki te tamafine ne avaga koe ki ei.”—Faataoto 5:18.

17. (a) Kaia e se ‵tau ei o fakamalosigina a Kelisiano ne te kilokiloga a te lalolagi e uiga ki te mulilua? (e) E tau‵tali atu pefea tatou ki te fakaakoakoga a Iopu?

¹⁷ A latou kolā e ‵moe mo tino kolā e se ko olotou avaga e fakaasi atu i ei a te lasi o te sē āva o latou ki tulafono a te Atua e uiga ki amioga. E tonu, e talia ne tino e tokouke i aso nei a te mulilua e pelā me se faifaiga masani. Kae faitalia te kilokiloga a nisi tino e uiga ki te mulilua, e se ‵tau o fakamalosi atu te mea tenā ki Kelisiano. E iloa ne latou me i te fakaotiga, e se ko tino kae “ka fakamasino ne te Atua a tino finalalolagi mo tino mulilua.” (Epelu 10:31; 12:29) Tenā te pogai e ‵piki ‵mau ei a Kelisiano ‵tonu ki te kilokiloga a Ieova e uiga ki te mataupu tenei. (Faitau te Loma 12:9.) Ke masaua a pati a te toeaina ko Iopu: “Ko oti ne fai ne au se tautoga ‵malu, ke mo a e kilo oku mata ki se fafine mo toku loto lailai.” (Iopu 31:1) Ao, ke ‵kalo keatea mai se mea fua e tasi telā e mafai o iku atu ki te mulilua, e tausi faka‵lei ne Kelisiano ‵tonu olotou mata, ke mo a ma ‵kilo atu ki se isi tino telā e se ko tena avaga mo te fia fai ki ei.—Ke onoono ki te Mataupu Fakaopoopo, “Te Kilokiloga a te Tusi Tapu ki te Talaga mo te Mavae o te Avaga.”

18. (a) E pefea te matagā o te mulilua i te kilokiloga a Ieova? (e) E tai ‵pau pefea te mulilua mo te ifo ki tupua?

¹⁸ E pefea te matagā o te mulilua i te kilokiloga a Ieova? E fesoasoani mai te Tulafono a Mose ke matea  ne tatou a lagonaga o Ieova e uiga ki ei. I Isalaelu, ne aofia te mulilua mo te ifo ki tupua i agasala kolā ne fakasala ki te mate. (Levitiko 20:2, 10) E a, e matea ne koe a te mea e tai ‵pau ei te avā mea konei? Ia, ne soli ne te tino Isalaelu telā ne ifo ki tupua tena feagaiga mo Ieova. E penā foki te tino Isalaelu mulilua, ne soli  ne ia tena feagaiga mo tena avaga. Ne seki fakamaoni lāua tokolua konā ki te lā feagaiga. (Esoto 19:5, 6; Teutelonome 5:9; faitau te Malaki 2:14.) Tela la, ne seki ‵ma a te tokolua konei i mua o Ieova, te Atua fakamaoni kae fakatuagagina.—Salamo 33:4.

19. Se a te mea e mafai o fakamalosi atu ki te fakaikuga a se tino ke ‵teke atu ki te mulilua, kae kaia?

¹⁹ E tonu, ko se ‵nofo a Kelisiano mai lalo i te Tulafono a Mose. E ui i ei, a te matea atu o te matagā o te kilokiloga e uiga ki te mulilua i Isalaelu mua e mafai o fakamalosi atu ki fakaikuga a Kelisiano ke se fai ne latou te mea tenā. Kaia? Mafaufau ki te fakatusa tenei: E mata, e mafai o ulu atu koe ki se falesa, totuli, kae ‵talo atu i mua o se tupua? Ka fai mai koe ‘E se tāitāi eiloa!’ Kae e a māfai e fakaosoosogina koe ke fai penā mai te ofoatuga o tupe e uke? ‘E se mafai lele eiloa!’ ko tau tali. E tonu, e se tāitāi o talia ne Kelisiano ‵tonu a te mafaufau ke fakaloiloi ne latou a Ieova mai te tapuaki atu ki se tupua. E penā foki a Kelisiano, e se tāitāi o talia ke mafau‵fau fua latou o fakaloiloi te lotou Atua, ko Ieova, e pelā foki mo olotou avaga mai te mulilua—faitalia te uke o takolekolega ke fai te agasala tenā. (Salamo 51:1, 4; Kolose 3:5) E se ma‵nako lele tatou o fai se mea telā ka fakafiafia atu ki a Satani kae avatu i ei se luma lasi ki a Ieova mo te fakatokaga e uiga ki te avaga.

20. Ne a mea ko oti ne ‵tupu ki nisi avaga fakaipoipo? Fakamatala mai.

²⁰ I tafa o te ‵kalo keatea mai i amioga kolā e se faka‵malu atu ki te avaga fakaipoipo, ne a mea e  mafai o fai ne koe ke toe fakamalosi aka ei tou āva ki tau avaga? Ke tali a te fesili tenā, mafaufau ki te avaga fakaipoipo e pelā me se fale. Ka oti, ko mafaufau ei ki pati fakaalofa‵lofa, faifaiga ‵lei, mo nisi pati fakaaloalo kolā e fai ne te suā tino ki te suā tino e pelā me ne mea fakagali‵gali kolā e teu ki ei te fale. Kafai e ‵pili te lū va, ko fai ei te lū avaga fakaipoipo pelā me se fale telā ko oti ne teu fakagaligali ke ‵nofo i ei. Kafai e gasolo ifo te lū a‵lofa, ko gasolo foki o ‵galo atu a teuga konā, ko fai ei ke ‵pafu te lū avaga e pelā mo se fale telā e seai ne ana teuga. Ona ko tou manako o fakalogo ki te fakatonuga a te Atua ‘ke faka‵malu te fakaipoipoga,’ ka fakamalosi atu ei ke saga atu koe o faka‵lei aka te tulaga tenā. E tonu, so se mea tāua kae ‵malu e ‵tau eiloa o faka‵lei aka. E mafai la pefea o fai te mea tenā? E fai mai te Muna a te Atua: “A kāiga e ‵tau o fakavae ki te poto mo te malamalama. A potu e teu fakagaligali ki teuga ‵gali, e iloa ei me e isi ne tino ata‵mai e ‵nofo i konā.” (Faataoto 24:3, 4) Mafaufau ki te fakaaogaga o pati konā i te olaga fakatauavaga.

21. E fakamalosi malielie aka pefea ne tatou a ‵tou olaga fakatauavaga? (Ke onoono foki ki te pokisi i te “ E Faka‵lei Aka Pefea ne Au Toku Olaga Avaga?”)

²¹ E aofia i ‘mea ‵gali’ e faka‵fonu ki ei te fale o se kāiga fiafia ko te alofa tonu,  te mataku ki te Atua, mo se fakatuanaki ‵mautakitaki. (Faataoto 15:16, 17; 1 Petelu 1:7) E fai ne mea konā ke malosi te avaga. Kae e mata, e matea ne koe te pogai ne ‵fonu ei a potu i mea tāua i te faataoto telā ne siki mai i luga? Ko “te poto.” Ao, kafai e fakaaoga, e isi se malosi o te poto mai te Tusi Tapu ke ‵fuli ei a mafaufauga o tino kae toe fakamalosi aka te alofa o te suā tino ki te suā tino. (Loma 12:2; Filipi 1:9) Tela la, i so se taimi e sau‵tala faka‵lei ei koulua mo tou avaga ki se mataupu mai te Tusi Tapu, e pelā mo te tusi siki mō te aso, io me se mataupu mai te Tusi Tapu i Te Faleleoleo Maluga io me ko te Awake! e uiga ki te olaga fakatauavaga, e fai eiloa pelā me e iloilo ne koulua se mea teu fale telā ka fakagaligali ne ia te lū fale. Kafai e fakamalosi atu tou alofa ki a Ieova ke fakaaoga ne koe a pati fakatonutonu kolā fatoā oti ne iloilo ne koe, ko avatu eiloa ne koe, i se auala fakatusa, te mea teu fale tenā ki loto i “potu.” A tena ikuga ko te ‵toe mauaga o te fealofani mo te alofa telā ne maua muamua ne koulua i te lū olaga fakatauavaga.

22. Se a te lotomalie e mafai o maua māfai e taumafai ma‵losi tatou o fai ‵tou tusaga i te fakamalosiakaga o ‵tou olaga avaga?

²² E tonu, e mafai o leva te taimi kae uke a taumafaiga e fai ke toe faka‵foki malielie mai a mea teu fale konā. E ui i ei, kafai e taumafai malosi koe o fai tou tusaga i ei, ka maua eiloa ne koe te lotomalie i te iloa atu me e fakalogo koe ki te fakatonuga tenei mai te Tusi Tapu: “Ke fakatau a‵lofa koutou i te alofa fakataina.” (Loma 12:10; Salamo 147:11) Kae e sili i mea katoa, au taumafaiga ‵tonu e fai ke faka‵malu atu ki tau avaga fakaipoipo ka tumau ei koe i te alofa o te Atua.