TOKO FAHA-11
“Hajà Tokantran̈onao”
“Miravoravoa amy vadiny fahatanoran̈anao.”—OHABOLANA 5:18.
1, 2. Ino ma raha hidinihintsika izioty? Ino antony?
IZIKOA anao manambady, mahatsiaro sambatra anao sa misy raha manahiran̈a anao amy tokantran̈onao? Maro tokantran̈o mikorontan̈a, ke mety an̈arany fo iro fivadiany fa iro tsy sambatra karaha taloha eky. Izikoa zen̈y edy raha misy amy tokantran̈onao, tsy diso anao izikoa malahelo, fotony tianao han̈amia voninahitry Zan̈ahary tokantran̈onao. Aza kivy anao izikoa misy raha manahiran̈a mandalo amy tokantran̈onao!
2 Maro Kristianin̈y manambady tsy nifankatia, na an̈arany fo iro fivadiany. Fa zioty ndraiky, iro mahatsiaro sambatra, fotony iro nahita fomba nankatsaran̈a tokantran̈ondro. Ke atsika izio hizaha, ino raha tokony hataonao baka ho sambatra tokantran̈onao?
ANKATSARÀ FIFANDRAISANAO AMY ZAN̈AHARY NDREKY AMY VADINAO
3, 4. Ino ivolan̈ana fa ho tsara fifandraisanaro izikoa anaro samy mifen̈y ho tsara fihavan̈ana amy Zan̈ahary? Man̈ameza ohatra.
3 Ho tsara fifandraisanaro fivadiany izikoa anaro samy mifen̈y ho tsara fihavan̈ana amy Zan̈ahary. Iritrireta hely baka ty: Misy lelahy ndreky man̈angy han̈aniky bongo. Iro samy amy lan̈iny misy iro. Amy voanalohany, iro mifankalavitry, fa iro koa fa samy mifen̈y man̈aniky bongo io, iro mahay mifankarikitry fo firaka iro avy amy tendrony bongo. Asa mazava aminao ino raha maventy tiany ohatra io koran̈iny?
4 Mety hampitovisin̈y aminolo man̈aniky bongo io raha ataonolo manompo Jehovah amy fo jiaby. Namandraha efa samy mifen̈y man̈aniky bongo io anaro fivadiany, fotony anaro samy tia Jehovah. Fa anaro koa fa tsy mifandray, mira olo man̈aniky bongo io, fa samy amy lan̈iny misy izy. Mety ho lavitry elan̈elan̈anaro amy voanalohany, kanefa hifan̈aton̈o fo anaro arakaraka ny han̈anianaro bongo io. Karaha zen̈y koa, izikoa anaro samy mifen̈y ho tsara fihavan̈ana amy Zan̈ahary, hahaitsara koa fifandraisanaro. Efa zen̈y edy ny raha tokony hatao. Akory han̈anovan̈a zen̈y?
Hifankatia olo fivadiany izikoa samy man̈araka raha koran̈iny Baiboly
5. a) Ino raha tokony hataonao izikoa tianao ho tsara fo fifandraisanao amy Jehovah ndreky amy vadinao? b) Akory fahitany Jehovah vadian̈a io?
5 Ho vitanaro han̈aniky bongo io izikoa anaro samy mifen̈y man̈araka torohevitry Zan̈ahary momba fanambadian̈a. (Salamo 25:4; Isaia 48:17, 18) An̈isanizen̈y raha nikoran̈iny apostoly Paoly ty: “Vadian̈a io tokony ho hisy hajany aminolo jiaby.” (Hebreo 13:4) Amy Jehovah, vadian̈a io raha misy hajany fa tsy raha fatao soma.
IRARIAN̈A ANAO HO TIA JEHOVAH ANKITIN̈Y
6. Ino ma raha tiany Paoly koran̈iny, izy koa fa nan̈amia torohevitry momba fanambadian̈a? Nan̈ino ma raha zen̈y tsy tokony hadin̈antsika foeky?
6 Amy maha Kristianin̈y anaro, hainaro tsarabe fa vadian̈a io raha maventy ndreky masin̈y amy Zan̈ahary namoron̈o fanambadian̈a io. (Vakia Matio 19:4-6.) Kanefa, zen̈y tsy mivolan̈a fa hifan̈aja ndreky hifankatia fo anaro, indraka eky izikoa fa misy raha manahiran̈a. Ino raha mety han̈ampy anaro hifankatia ndreky hifan̈aja fo? Paoly tsy raha vitany nivolan̈a fa misy ‘hajany’ fanambadian̈a, fa ‘tokony ho hisy hajany aminolo jiaby’ koa izio. Hitantsika amy volan̈a Paoly zen̈y, fa misy raha tokony hataonolo manambady. * Zen̈y koa mety hampatsiaro anao fa tokony ho tia ndreky han̈aja vadinao anao, karaha taloha in̈y. Ino antony?
7. a) Ino didy amy Baiboly ao tokony harehantsika? b) Han̈ano karakory atsika izikoa man̈araka didy io?
7 Baiboly man̈iraka atsika hitory ndreky hivory. (Matio 28:19; Hebreo 10:24, 25) Tsy mora man̈ano raha aby zen̈y ndraikindraiky, fotony olo hikoran̈antsika mety tsy hitandren̈y hafatra indesintsika, na mety ho kajo mare atsika koa fa baka miasa ke mety ho sarotro amintsika handeha hivory. Ndray izy man̈ano zen̈y, tsisy raha ambelantsika hisakana atsika tsy hitory ndreky hivory, ndray Satana! Ino antony? Fotony atsika tia Jehovah. Zen̈y mahavy atsika man̈araka didinany. (1 Jaona 5:3) Manjary milamin̈y fo jerintsika. Ravoravo koa atsika, fotony haintsika fa atsika man̈ano sitrapony Jehovah. Atsika koa man̈ano zen̈y, mahaimahazo angovo fo. (Nehemia 8:10) Ino raha ianarantsika baka amy zen̈y?
8, 9. a) Nan̈ino ma olo fivadiany tokony han̈ano raha hampisy hajany fanambadian̈andro? b) Ino raha aroe hidinihintsika izioty?
8 Baka amy fitiavanao Jehovah mahavy anao hitory ndreky hivory, ndray misy raha manahiran̈a. Mbala fitiavan̈a io koa mahavy anao han̈ano raha hampisy hajany vadian̈anao. (Hebreo 13:4; Salamo 18:29; Mpitoriteny 5:4) Maro hatsaran̈a hamiany Zan̈ahary anao, izikoa anao mazoto mitory ndreky mivory. Matokisa fa tsy hadin̈any Jehovah koa raha jiaby ataonao hampisy hajany fanambadian̈anao io, ke izy tsy maintsy han̈ampy anao.—1 Tesalonianina 1:3; Hebreo 6:10.
9 Ino raha tokony hataonao baka ho hisy hajany vadian̈anao? Misy raha tsy tokony hatao fotony mandrobaka tokantran̈o, fa misy ndraiky raha tsy maintsy atao fotony mampatsara fifandraisanao amy vadinao. Raha aroe zen̈y hidinihintsika izioty.
MITANDREMA AMY VOLAN̈A NA RAHA METY TSY HAMPISY HAJANY FANAMBADIAN̈A
10, 11. a) Ino raha fataonolo kanefa tsy man̈isy hajany fanambadian̈a? b) Ino fan̈ontanian̈a tokony dinihinaro fivadiany?
10 Nisy ranabavy araiky zay nivolan̈a: “Mangataka amy Jehovah zaho baka hahavita hiaritry.” Ino ma nahavy izy nivolan̈a zen̈y? Karaha ty nivolan̈iny: “Volandraty fo raha mahazo zaho amy vadiko. Isaka teteky izy mivolan̈a aminaka: ‘Zaho efa empaka mahita anao! Man̈angy tsy manjary!’ Marin̈y ndraiky fa ain̈inaka tsy hitanolo mivambon̈o, fa man̈amia holatra an̈atiny ain̈inaka tihitihy mahazo zaho zen̈y.” Mafy raha hiaretany ranabavy io!
11 Ny raha mampalahelo, misy tokantran̈o kristianin̈y ahitan̈a raha karaha zen̈y. Manjary tsisy hajany vadian̈andro, izikoa zen̈y raha misy. Asa mba misy raha karaha zen̈y koa amy tokantran̈onao? Izikoa tianao ho hay valiny fan̈ontanian̈a io, tsara anao man̈ontany vadinao karaha ty: “Mamparary fonao ma fomba fikoran̈ako aminao sa karakory?” Izikoa vadinao mivolan̈a fa ndraikindraiky anao man̈ano volan̈a mahery aminany, anao tokony ho von̈ono hiova.—Galatianina 5:15; vakia Efesianina 4:31.
12. Ino ma mety hahavy fanompoan̈a ataonolo araiky tsy ho hisy dikany amy Zan̈ahary?
12 Aza adin̈a fa arakaraka fomba fikoran̈anao amy vadinao mety hahavy anao ho tsara fihavan̈ana amy Jehovah na ho ratsy fihavan̈ana aminany. Karaha ty volan̈iny Baiboly: “Izikoa misy olo mivolan̈a fa izy pivavaka, kanefa izy tsy man̈isy lamboridy lelananany, fa mbala mamitaka fonany fo, tsisy varany izy mivavaka.” (Jakoba 1:26) Dikanizen̈y, tsy maintsy mitandrin̈y atsika amy volan̈a ataontsika. Baiboly mivolan̈a fa izikoa olo araiky mivolan̈a izy pivavaka, kanefa izy zatra man̈ano volandraty amy vadiny, Jehovah tsy hitandren̈y vavakanany. Tsy kidikidy aminany raha zen̈y! (Vakia 1 Petera 3:7.) Ndray anao mazoto amy fanompoan̈a, na manan̈a andraikitry amy fiangonan̈a, tsy ho hisy dikany amy Zan̈ahary raha jiaby zen̈y, izikoa anao zatra manihitihy vadinao. Tsy zen̈y fo fa tsy ho hisy hajany koa vadian̈anao.
13. Ino ma raha hataonolo araiky, kanefa mety hampalahelo vadiny?
13 Mety ho hisy raha ataonolo araiky kanefa tsy azony onon̈o aby fa mamparary fony vadiny raha zen̈y. Diniha hely baka ohatra aroe ty: Ranabavy mitaiza zanany manokan̈a mangataka torohevitry amy rahalahy araiky manambady. Iro tsy basiny mifampitelefony matetiky fa mahadin̈y ela koa. Araiky faharoe ndraiky, rahalahy tsy manambady mandany fotoan̈a be miaraka manompo amy ranabavy efa manambady. Iro mety tsy hieritreritry han̈ano raha ratsy, kanefa mety han̈ano akory fahitany vadindro raha zen̈y? Karaha ty nambarany ranabavy araiky: “Vadiko mandany fotoan̈a be miaraka amy rahavavy araiky amy fiangonan̈a, baka io mikarakara izy mare. Zaho ten̈a malahelo sady mahatsiaro ten̈a tsisy dikany foeky.”
14. a) Izikoa Genesisy 2:24 dinihin̈y, ino adidinolo manambady? b) Ino raha mila dinihintsika?
14 Maro olo tojy raha mitovy amy ranabavy io. Tsy amian̈a tsin̈y iro izikoa malahelo amy raha mahazo iro zen̈y. Izikoa dinihin̈y, tsy narehany vadindro foeky fitsipiky Zan̈ahary ty: ‘Lelahy hiala babany ndreky reniny, baka io hitambatra amy vadiny.’ (Genesisy 2:24) Tokony han̈aja raimandreny olo araiky ndray efa manambady. Fa ndray zen̈y, Jehovah mivolan̈a fa vadiny adidiny voanalohany. Karaha zen̈y koa atsika, ndray tiantsika iro rahalahintsika aby io, mbala vadintsika fo adidintsika voanalohany. Izikoa olo araiky mandany fotoan̈a be miaraka aminolo amy fiangonan̈a, na mifankazatra be loatra aminolo tsy vadiny, mety hampalahelo vadiny raha zen̈y. Tsao mba zen̈y fo mahavy tokantran̈onaro tsy milamin̈y? Ke ty raha tsara dinihinao: ‘Zaho ty ma mba man̈amia fitiavan̈a ndreky mikarakara raha ilainy vadiko ankitin̈y?’
15. Izikoa Matio 5:28 zahan̈a, nan̈ino Kristianin̈y manambady tsy tokony hifankazatra be loatra aminolo tsy vadiny?
15 Tsy misain̈y ndreky misoma ratsy zay rahalahy na ranabavy manambady, kanefa mikarakara be olo tsy vadiny. Ny raha mampalahelo, nanjary loso tia olo nifankazatra be tamindro iro Kristianin̈y efa manambady aby io, ke nitariky iro han̈ano raha ratsy raha zen̈y. Iro nanjary tsy nan̈isy hajany tokantran̈ondro. (Matio 5:28) Atsika izio hizaha raha nivolan̈iny Paoly momba raha zen̈y.
IRARIAN̈A FANDRIAN̈ANOLO FIVADIANY HADIO FO
16. Ino ma raha nampitandreminy Paoly iro Kristianin̈y aby io momba fanambadian̈a?
16 Paoly koa fa baka nandrisiky Kristianin̈y aby io han̈isy hajany tokantran̈o, ty raha nampitandreminy iro: ‘Irarian̈a fandrian̈anolo fivadiany tsy ho voaloto, fotony hisaziny Zan̈ahary lan̈iany olo pijangajanga ndreky pandiadia vady.’ (Hebreo 13:4) Firaisan̈a aranofo raha tiany koran̈iny amy “fandrian̈anolo fivadiany” io. Firaisan̈a ataonolo fivadiany fo ‘tsy mandoto’ izio. Ke zen̈y mahavy Kristianin̈y tokony han̈araka raha koran̈iny Soratra Masin̈y ty: “Miravoravoa amy vadiny fahatanoran̈anao.”—Ohabolana 5:18.
17. a) Tsy mampan̈ino olo amy donia ty mandiadia vady zen̈y. Nan̈ino Kristianin̈y tsy tokony hanan̈a toetsain̈y karaha zen̈y? b) Akory han̈arahantsika raha nataony Joba?
17 Olo araiky koa man̈ano firaisan̈a aminolo tsy vadiny, izy ten̈a tsy man̈isy fotiny lalàn̈any Zan̈ahary. Maro olo mieritreritry fa tsy mampan̈ino mandiadia vady zen̈y. Kanefa, atsika tsy tokony hanan̈a toetsain̈y mitovy aminolo amy donia ty, fotony haintsika tsarabe fa mbala ‘hisaziny Zan̈ahary olo pijangajanga ndreky pandiadia vady zen̈y.’ (Hebreo 10:31; 12:29) Fomba fisain̈any Jehovah fo tokony harehantsika. (Vakia Romanina 12:9.) Atsika tokony hangala tahaka raha nataony Joba. Karaha ty nivolan̈iny: “Zaho efa nan̈ano fifan̈ikian̈a tamy masonaka, ke hataoko akory koa hizaha man̈angy hafa zalahy?” (Joba 31:1) Dikanizen̈y, Kristianin̈y tokony hahay hifehy masonany. Izy tsy tokony han̈iry han̈ano firaisan̈a aminolo tsy vadiny, fotony izikoa izy tsy mitandrin̈y, mety hahavy izy handiadia vady raha zen̈y.—Zahava Fan̈ampiny Fan̈azavan̈a “Fisintahan̈a Ndreky Fisarahan̈a.”
18. a) Akory fahitany Jehovah olo mandiadia vady? b) Ino raha mampitovy olo mandiadia vady ndreky olo manompo sampy?
18 Akory fahitany Jehovah olo mandiadia vady? Amy Lalàn̈any Mosesy ahitan̈a valiny fan̈ontanian̈a io. Tamy faha Israely taloha tan̈y, naripaka Zan̈ahary aby, na olo pandiadia vady na olo panompo sampy. (Levitikosy 20:2, 10) Asa hainao ino raha mampitovy iro io? Tsy nan̈aja fifan̈ikian̈a nataondro tamy Jehovah iro Israelita aby io izikoa nanompo sampy. Karaha zen̈y koa, tsy nan̈aja fifan̈ikian̈a nataony tamy vadiny Israelita araiky izikoa nandiadia vady. Iro samy nivadiky. (Eksodosy 19:5, 6; Deoteronomia 5:9; vakia Malakia 2:14.) Halany Jehovah olo man̈ano raha aby io, fotony izy Zan̈ahary mety hatokisan̈a ndreky tsy mivadiky.—Salamo 33:4.
19. Nan̈ino ma atsika tokony ho tapakevitry tsy handiadia vady? Ino han̈ampy atsika han̈ano zen̈y?
19 Marin̈y ndraiky fa atsika izio efa tsy fiheziny Lalàn̈any Mosesy. Kanefa, izikoa alentsika onon̈o fo fa fahotan̈a maventy taminy Israely mandiadia vady zen̈y, mahay tapakevitry fo atsika tsy han̈ano izio. Diniha hely baka ty: Asa ho vitanao hiditry amy leglizy araiky, baka io handohaliky amy sary masin̈y? Anao mety hivolan̈a: ‘Tsy mety zaho koa han̈ano zen̈y, ndray amian̈a vola be!’ Ndray anao mety hangaroharo foeky mieritreritry raha zen̈y, fotony hainao fa mivadiky amy Jehovah anao izikoa man̈ano zen̈y. Tokony hampangaroharo atsika koa fandiadiavan̈a vady io, fotony olo araiky koa mandiadia vady, izy mivadiky amy Jehovah ndreky amy vadiny. Zen̈y fo raha tokony hiritriretintsika ndray maro raha mety hitaon̈o atsika. (Salamo 51:1, 4; Kolosianina 3:5) Tsy tiantsika foeky han̈ano raha mamparavoravo Satana, ke hangala baraka Jehovah. Kanefa zen̈y raha ho hisy izikoa tsy asiantsika hajany fanambadian̈a io.
ATAOVA RAHA HAMPAFATATRA TOKANTRAN̈ONARO
20. Nanjary nan̈ano akory ma vadian̈anolo sasany? Man̈ameza ohatra.
20 Ino raha tokony hataonao baka anao ho tia vadinao fo? Vadian̈a io mety hampitovisin̈y amy tran̈o. Ke volan̈a tsara, fikarakaran̈a ndreky fan̈amezan̈a voninahitry vady mira raha fatao sanjiny tran̈o. Izikoa tran̈o araiky misy sanjiny, mamparavoravo ndreky mahatamana mipetraka ao. Tsisy ny hafa amy zen̈y koa fanambadian̈a io, izikoa anaro fivadiany tsy mifankatia eky. Namandraha miala tsihelihely sanjiny tran̈onaro, ke mety tsy ho hisy foeky izio amy farany. Hay be fa hifen̈y fo anao hankatsara fifandraisan̈anaro, fotony tianaro han̈araka didiny Zan̈ahary, ke han̈ano raha hampisy hajany fanambadian̈anaro. Ty misy fan̈ontanian̈a: Karakory hataonao izikoa misy raha tianao mare robaka? Anao tsy maintsy han̈amboatra raha robaka io. Karakory fo basy tokony hataonao izikoa misy raha manahiran̈a amy tokantran̈onao? Karaha ty volan̈iny Baiboly: “Fahendrena raha ilain̈y han̈oren̈ana tran̈o, baka io fahaizan̈a misain̈y raha ilain̈y hampafatatra izio. Fa baka amy fahaizan̈a ndraiky hahavy efitry maromaro antran̈o ao ho feno raha valera ndreky raha maro tsara jiaby.”—Ohabolana 24:3, 4.
21. Ino ma raha mety hataonolo fivadiany baka iro hifankatia tsarabe? (Zahava koa efajoro “ Akory Hataoko Baka Zahay Hifankatia Fo?”)
21 Fitiavan̈a, favozoan̈a Zan̈ahary, baka io finoan̈a an̈isany “raha valera” mampasambatra tokantran̈o. (Ohabolana 15:16, 17; 1 Petera 1:7) Toetry aby io koa han̈ampy olo fivadiany hifankatia tsarabe. Asa azonao onon̈o ino nahavy “efitry” aby io feno raha valera? “Fahaizan̈a.” Izikoa iro samy mahay raha koran̈iny Baiboly, hiova toetsain̈indro. Izio koa handrisiky iro hifen̈y han̈ano zay vitandro baka iro hifankatia ndraiky, karaha taloha. (Romanina 12:2; Filipianina 1:9) Isaka iro fivadiany miaraka mandiniky raha koran̈iny Baiboly, na fan̈azavan̈a baka amy boky ndreky gazety mikoran̈a momba tokantran̈o, iro mandiniky sanjiny tran̈o tsara ilaindro amy tokantran̈ondro. Fitiavandro Jehovah amy zay hahavy iro han̈araka torohevitry hitandro. Mira man̈apetraka sajiny tran̈o aminy “efitry” an̈atiny tran̈ondro iro koa fa man̈ano zen̈y. Iro hifankatia ndraiky, baka io vadian̈andro hanjary mira tran̈o tsara sady mahatamana in̈y.
22. Ho ravoravo anao izikoa man̈ano zay vitanao hampifankatia anaro fivadiany. Ino mahavy atsika mivolan̈a zen̈y?
22 Marin̈y ndraiky fa tsy voatery ho tafimpody indraiky mipaka sanjiny tran̈o aby io. Kanefa, izikoa anao man̈ano anjaranao, anao ho ravoravo, fotony hainao tsarabe fa anao nan̈araka raha volan̈iny Baiboly ty: “Irarian̈a anaro han̈amia voninahitry namanaro, alohany iro han̈amia voninahitry anaro.” (Romanina 12:10; Salamo 147:11) Fa ny raha ten̈a maventy, anaro koa samy mifen̈y ‘hifan̈amia voninahitry’, ke hataonaro fo raha hampisy hajany vadian̈anaro, anaro tsy hiala amy fitiavany Zan̈ahary foeky.
^ feh. 6 Izikoa zahan̈a andininy hafa man̈odidin̈y, mbala araiky amy raha maromaro nirahiny Paoly hataonolo manambady torohevitry io.—Hebreo 13:1-5.
