1, 2. Ana citulijiganye yakwamba yiwusyo yapi, soni ligongo cici?

ANA wawoji ŵajinjile mwiŵasa? Naga ŵajinjile mwiŵasa, ana akusasangalalaga nawo ulombela wawo, kapena akusimana ni yakusawusya yejinji mu ulombelamo? Ana cinonyelo cawo ni ŵamkwawo cinandipe? Ana akwamba kutama mu liŵasa mwakupilila? Naga yili m’yoyo, nikuti akusaŵa ŵangasangalala ligongo lyakuti kunonyelana kwakwapali mu liŵasa mwawo kunandipe. Pakuŵa wawojo ali Mklistu, mwangakayicila akusasaka kuti ulombela wawo uyikasye ucimbicimbi kwa Yehofa, jwali Mlungu jwakusamnonyela. Nambope, mwayiŵelele yindu mu ulombela wawo mpaka yatengusye, soni kwapweteka mumtima. Atamose kuti yili m’yoyo, akajanguya kuganisya kuti yinduyi ngakomboleka kucenga.

² Lelo jino, apali Aklistu ŵane ŵalombane ŵakusangalala nambo pandandapo ŵagambaga kutama mwakupililana, ngananonyelanaga yisyesyene. Nambo ŵapatile litala lyakwakamucisya kulimbikasya mkamulano wawo wa mu ulombela. Wawojosoni komboleka kuŵa ŵakusangalala mnope mu ulombela mwawo. Mwatuli?

3, 4. Ana ŵalombane mpaka aŵe ŵakuŵandikana mwatuli naga wosope akulinjilila kum’ŵandicila Mlungu? Asale ciwanicisyo.

³ Wawojo mpaka aŵe paunasi wakulimba ni ŵamkwawo naga wosope akulingalinga kuŵa paunasi wakulimba ni Mlungu. Ligongo cici? Tuwanicisye m’yi: Tujile kuti pana litumbi  lyesyungulile, lyalili lyekulungwa pasi pakwe nambo lili lyamwana kwinani kwakwe. Ni tujile kuti jwamlume akwima mbali jakungopoko lyuŵa kwa litumbilyo, jwamkongwe akwima kungapilo lyuŵa kwakwe. Ni wosope akutanda kukwela litumbilyo. Mkanakwele mnope jwalijose mpaka aŵe kuti ali pakutalikangana ni mjakwe. Nambo jwalijose pakwendelecela kukwela litumbilyo kwawulaga kwinani kwakuli kwamwana, lutando lwa pasikati pa jwine ni mjakwe lukusanandipilanandipila. Ana mu ciwanicisyoci mwana lijiganyo lyakulimbikasya lyatuli?

⁴ Kulingalinga kwakusatenda pakumtumicila Yehofa ni mtima wosope, mpaka tukulandanye ni kulingalinga kwampaka atende pakukwela litumbi. Pakuŵa akusamnonyela Yehofa, yili mpela kuti akulinjilila kala mwamtawu kukwela litumbi. Nambo naga wawojo ni ŵamkwawo cinonyelo cawo cinandipile, komboleka kuti ali mpela ŵakukwela litumbi ŵali mbali syakulekangana.  Ana mpaka citendekwe cici naga akwendelecela kukwela litumbilyo? Pandanda, komboleka kuti lutando lwalupali pasikati pa jemanja mpaka lwalekanganye mnope. Nambope, pakwendelecela kulingalinga mwamtawu kum’ŵandicila Mlungu, mwakukwelape mwinani, ni pacacitanda kuŵandicilana ni mjawo jwa mu ulombela. Kusala yisyene, kum’ŵandicila Mlungu kucakamucisyasoni kuti aŵandikane ni ŵamkwawo. Nambo, ana yeleyi mpaka ayitende catuli?

5. (a) Ana litala lyapi lyampaka limkamucisye mundu kum’ŵandicila Yehofa, soni ŵamkwakwe? (b) Ana Yehofa akusawuwona mwatuli ulombela?

⁵ Litala limo lyakusosekwa mnope kuti ŵalombane am’ŵandicile Mlungu lili kupikanila yagakusasala Maloŵe ga Mlungu pakwamba ya ulombela. (Salimo 25:4; Yesaya 48:17, 18) Kwende tulole yaŵaŵecete Paulo pakwamba ya ulombela. Jwalakwe ŵatite: “Ulombela m’wucimbicisyeje jemanja wosope.” (Ahebeli 13:4) Ana yeleyi yikugopolela cici? Kusala kuti cindu cine cakwe ‘tucicimbicisyeje,’ yikusalosya kuti cinduco cili cakusosekwa mnope, soni capenani. Mwelemu ni mwakusawuwonela Yehofa ulombela. Jwalakwe akusawuwona kuŵa cindu cakusosekwa, soni capenani.

6. Ana Paulo ŵasasile yatuli pakwamba ya ulombela, soni ligongo cici yeleyi yili yakusosekwa kuyikumbucilaga?

⁶ Pakuŵa wawojo ni ŵamkwawo ali ŵakutumicila ŵa Mlungu, nikuti ayimanyi kala kuti ulombela uli wapenani, kapena kuti uli wapajika. Yehofa ni juŵatandisye ulombela. (Aŵalanje Matayo 19:4-6.) Nambope, naga apano akusimana ni yakusawusya mu ulombela, kwamba kumanyilila kuti ulombela uli wakucimbicikwa nganikuŵa kwakwanila kwatendekasya wawojo ni ŵamkwawo kunonyelana, soni kucimbicisyana. Nambi cici campaka cakamucisye kuti anonyelaneje, soni acimbicisyaneje? Patukulolecesya yaŵasasile Paulo pakwamba ya ulombela, pa Ahebeli 13:4, yikulosya kuti yaŵasasileyi yili mbali jimo ja yindu yele Paulo ŵalimbikasyaga Ahebeli mwamacili. (Ahebeli 13:1-5) M’yoyo, Paulo nganagambaga kusala yaŵayiwonaga ŵandu  ali mkutenda, nambo jwalakwe mwamacili ŵasalilaga jemanjajo kuti atendepo kandu pakwamba ya ulombela. Kukumbucila kuti Paulo ŵalimbikasyaga Ahebeli mwamacili, mpaka kwakamucisye kuti atandilesoni kwacimbicisya ŵamkwawo. Ligongo cici yili m’yoyo?

7. (a) Ana m’Malemba ŵatulamwile kuti tutendeje cici, soni ligongo cici? (b) Ana pakusaŵa yakuyicisya yatuli naga tukupikanila?

⁷ Aganicisye mwakusayiwonela yindu yine yakusatulamula m’Malemba, mpela masengo gakwiganya ŵandu kapena kusongana pampepe kuti tulambileje. (Matayo 28:19; Ahebeli 10:24, 25) Kusala yisyene, ndaŵi sine kutenda yindu yaŵatulamwileyi mpaka kuŵe kwakusawusya. Ndaŵi sine pakulalilcila, ŵandu ngaŵa mkwapocela cenene, kapena akusaŵeluka kumasengo ali apesile mnope mwati kwawula ku misongano ja Ciklistu mpaka kuŵe kwakusawucisya. Atamose yili m’yoyo, akusajendelecela kulalicila utenga wa Ucimwene, soni kusimanikwa pamisongano ja Ciklistu. Pangali jwampaka ŵalekasye wawojo kutenda yeleyi, atamose Satana jwene! Ligongo cici? Ligongo kumnonyela Yehofa ni mtima wawo wosope kukusatendekasya kuti apikanileje malamusi gakwe. (1 Yohane 5:3) Ana kutenda yeleyi kukusaŵa ni yakuyicisya yatuli? Kukamula nawo masengo gakulalicila, soni kusimanikwa kumisongano kukusatendekasya kola mtendele wa mumtima, soni kuŵa ŵakusangalala ligongo lyakuti akusamanyilila kuti akutenda lisosa lya Mlungu. Kulipikana m’yiyiku kukusalimbikasya mnope. (Nehemiya 8:10) Ana tukulijiganya cici pelepa?

8, 9. (a) Ana cici campaka citukamucisye kupikanila lilamusi lyakucimbicisya ulombela, soni ligongo cici kupikanilaku kuli kwasosekwa? (b) Ana sambano citulijiganye yindu yiŵili yapi?

⁸ Mwayikusaŵela kuti kumnonyela mnope Mlungu kukusatendekasya kupikanila lilamusi lyakuti akalalicile, soni lyakuti asonganeje pampepe atamose pali pana yakusokonasya, kumnonyelasoni Yehofa mpaka kwakamucisye kuti apikanileje yaŵalimbikasisye m’Malemba yakuti ‘Ulombela [wawo] awucimbicisyeje,’ atamose kuti kutenda yeleyi mpaka kuwonece kuŵa kwakusawusya. (Ahebeli 13:4; Salimo 18:29; Mlaliki 5:4) Konjecesya pelepa, mpela mwayikusaŵela kuti Mlungu akusiŵajaliwa ŵakulingalinga mwamtawu kulalicila, soni kusongana pampepe,  m’yoyosoni pakulinjilila kuwucimbicisya ulombela wawo Yehofa cacajaliwa.​—1 Atesalonika 1:3; Ahebeli 6:10.

⁹ Sambano, ana mpaka awucimbicisye catuli ulombela wawo? Akusosekwa kuŵambala ndamo jilijose jampaka jisokonasye ulombela wawo. Konjecesya pelepa, akusosekwa kutenda yindu yampaka yilimbikasye mkamulano wawo mu ulombela.

10, 11. (a) Ana ndamo japi jangacimbicisya ulombela? (b) Ana tukusosekwa kuganicisya ya ciwusyo capi ni ŵamkwetu?

¹⁰ Mklistu jwine jwamkongwe munyumamo ŵaŵecete kuti: “Ngusapopela kwa Yehofa kuti ambe macili gakungamucisya kupilila.” Kupilila cici? Jwalakwe ŵatite: “Ŵamkwangu akusambecetela maloŵe gakupweteka. Komboleka kuti nganingola maŵasi gakuwoneka ni meso, nambo yakusaŵeceta ŵamkwangu ndaŵi syejinji, mpela maloŵe gakuti ‘M’mwe mli ŵakupesya!’ soni gakuti ‘Mli ŵakupwambwana!’ gandecele maŵasi mumtima mwangu.” Jwamkongweju ŵasasile ngani jakusawusya mnope jajili kuŵeceta yakuwulasyana mu ulombela.

¹¹ Yikusaŵa yakutesya canasa naga Aklistu ŵalombane akusaŵecetelana mwawukali, yayikusatandisya maŵasi gakusawusya kugaposya. Kusala yisyene ŵalombane ŵakusaŵecetana mwati m’yiyi ulombela wawo ukusaŵa wangacimbicikwa. Ana wawojo yindu yili uli mu ulombela mwawo? Kuti amanyilile mwayiŵele yindu akusosekwa kum’wusya mwakulinandiya mjawo jwa mu ulombelajo kuti, “Ana ngusaŵeceta wuli?” Naga ŵamkwawo akwanga kuti maloŵe gawo ndaŵi ni katema gakusaŵa gakupweteka, akusosekwa kuŵa ŵakusacilila kucenga ndamo jeleji.​—Agalatia 5:15; aŵalanje Aefeso 4:31.

12. Ana kulambila kwa mundu mpaka kuŵe mwatuli kwangali mate pameso pa Mlungu?

¹² Akusosekwa kumanyilila kuti mwatukusaŵecetelana mu ulombela, yikusakwayasoni unasi wetu ni Yehofa. Baibulo jikusasala kuti: “Naga jwine akulitenda kuti ali jwa dini mnope, nambo ali jwakuŵecetaga yangalumbana, dini jakwejo jili jamtega, soni akusagamba kulilambusya.” (Yakobo 1:26) Yakusaŵeceta  yikusakwayana ni kulambila kwawo. Baibulo jangajiticisya nganisyo syakuti yakusatenda mundu kumangakwe yangali kandu bolaga mundujo akusati akutumicila Mlungu. Conde akasalilambusya. Ngani jeleji jili jekulungwa kwabasi. (Aŵalanje 1 Petulo 3:7.) Wawojo komboleka kutendaga yindu cenene, soni kola mtawu pakulambila Mlungu, nambo naga akusaŵeceta mwamele maloŵe gakumpweteka mjawo, akusaŵa kuti ngakucimbicisya ulombela, soni kuti Mlungu mpaka akuwoneje kulambila kwawo kuŵa kwangali mate.

13. Ana mpaka tumlagasye catuli mjetu jwa mu ulombela?

¹³ Ŵalombane akusosekwa kuŵa ŵakalamuka kuti akatendagasoni yakumpweteka mjawo jwa mu ulombela mwangamanyilila. Aganicisye yisyasyo yiŵili ayi: Tujile kuti nangolo jwine jwakulela ŵanace jika akusakangala kumjimbila foni kaŵilikaŵili Mklistu jwamlume jwamlombele kum’ŵendaga kuti amkamucisye, ni akusaŵecetanaga kwa ndaŵi jelewu. Tujilesoni kuti Mklistu jwamlume jwanganalombele akusakangala kwenda mu undumetume wamumgunda cijuma cilicose ni Mklistu jwamkongwe jwamlombegwe. Ŵandu ŵalombane ŵa mu yisyasyoyi mpaka akoleje lisosa lyambone lyakutendela yeleyi, nambo ana yeleyi mpaka yimkwaye catuli mjawo jwa mu ulombelajo? Jwamkongwe jwine jwaŵasimene ni yeleyi jwatite: “Yikusambweteka mnope kumanyilila kuti ŵamkwangu akusamalila ndaŵi jejinji, soni akusanonyela kumkamucisya mnope mklistu jwine jwamkongwe mumpingo wetu. Yikusandendekasya kuliwonaga kuŵa jwangali mate.”

14. (a) Ana ŵalombane akwete ukumu watuli wakuwugombelecesya pa Genesis 2:24? (b) Ana tukusosekwa kuliwusya kuti cici?

¹⁴ Yili yakupikanika kuti jwamkongweju, soni ŵane ŵakusimana ni yakulandana ni yeleyi m’ma ulombela mwawo akusapikana kupweteka. Aciŵamkwawo ŵangapikanila yaŵasasile Mlungu pakwamba ya ulombela yakuti, ‘Jwamlume cacityoka kwa babagwe ni mamagwe ni kuja kulumbikana ni ŵamkwakwe.’ (Genesis 2:24) Mundu jwajinjile mwiŵasa akusosekwa kwendelecelape kwacimbicisya acinangolo ŵakwe, nambo akusosekwa kukumbucila kuti Mlungu ŵalinganyisye yakuti ŵamkwakwe aŵeje pa malo gandanda kwasamalila. M’yoyosoni,  Aklistu akusanonyela ŵakulupilila acimjawo, nambo akusosekwa kwanonyelaga mnope ŵamkwawo. M’yoyo, naga Mklistu jwamlume kapena jwamkongwe jwali mwiŵasa akusamalila ndaŵi jejinji kapena akusasyoŵekana mnope ni ŵakulupilila acimjakwe, mnopemnope ŵanganaŵa ŵamkwakwe, akusaŵa kuti akusokonasya mkamulano wawo wa ulombela. Ana kapena lyeleli ni ligongo lyakwe akusimana ni yakusawusya mu ulombela wawo? Aliwusye kuti, ‘Ana ŵamkwangu ngusinapa  ndaŵi, kwalosya kuti ngusasamala ya ŵalakwe, soni kwanonyela mwayikusosecela kuŵela?’

15. Mwakamulana ni Matayo 5:28, ligongo cici Aklistu ŵaŵajinjile mwiŵasa akusosekwa kuŵambala kusyoŵekana mnope ni mundu jwanganaŵa ŵamkwakwe?

¹⁵ Konjecesya pelepa, Aklistu ŵali mwiŵasa ŵakusakola mnope lung’wanu ni ŵanganaŵa ŵamkwawo akusaliŵika mwamele pangosi. Yakutesya canasa yili yakuti Aklistu ŵane ŵaŵajinjile mwiŵasa atandite kunonyelana mnope ni ŵandu ŵakusasyoŵekana nawo mnope. (Matayo 5:28) Kunonyelana mnope kweleku kutendekasisye kuti ŵandu ŵane atende ndamo jangacimbicisya ulombela atapanandi. Kwende tulole yaŵasasile Paulo pakwamba ya nganiji.

16. Ana Paulo ŵasasile lilamusi lyapi pakwamba ya ulombela?

¹⁶ Paulo paŵasasile kuti “ulombela m’wucimbicisyeje jemanja wosope,” ŵajonjecesye kusala kuti: “Acalume ni acakongwe aŵeje ŵakulupicika kwa jwine ni mjakwe, pakuti ŵandu ŵalilama ni cikululu Mlungu tacalamula.” (Ahebeli 13:4) Yeleyi yikulosya kuti ŵalombanepe ni ŵakusosekwa kugonanaga. M’yoyo, Aklistu akusapikanila maloŵe ga Mlungu gagakusati: “Msangalaleje ni jwamkongwe jwa pa unyamata wenu.”​—Miyambo 5:18.

17. (a) Ligongo cici Aklistu akusasiwona nganisyo sya ŵandu ŵajinji kuŵa syakulemweceka pakwamba ya cikululu? (b) Ana mpaka tukuye catuli cisyasyo ca Yobu?

¹⁷ Ŵakusagonana ni mundu jwanganaŵa ŵamkwakwe ngakusacimbicisya malamusi ga Mlungu gakwamba ndamo syambone. Ŵandu ŵajinji moŵa agano akusaciwona cikululu kuŵa ndamo jakundigwa. Nambope, mwakusaganicisya ŵandu ŵane pakwamba ya cikululu yikasiyicenga mwakusajiwonela Aklistu nganiji. Aklistuŵa akusamanyilila kuti pambesi pakwe, “ŵandu ŵalilama ni cikululu Mlungu tacalamula,” ngasalamulwa ni ŵandu iyayi. (Ahebeli 10:31; 12:29) Ni ligongo lyakwe Aklistu ŵasyesyene akusapikanila malamusi ga Yehofa pa ngani jeleji. (Aŵalanje Aloma 12:9.) Tukumbucileje yaŵasasile nangolo Yobu kuti: “Ndesile cilanga ni meso gangu.” (Yobu 31:1)  Kusala yisyene, pakuŵambala kutenda cindu cimo campaka cimtendekasye mundu kutenda cikululu, Aklistu ŵasyesyene akusagalamulila meso gawo, soni ŵangamlolecesya mnope mundu jwanganaŵa ŵamkwawo.​—Alole Yakonjecesya, pa mapeji 219 mpaka 221.

18. (a) Ana Yehofa akusajiwona ngani ja cikululu kuŵa jekulungwa catuli? (b) Ana cikululu ni kutindiŵalila milungu jakupanganyidwa yikusalandana wuli?

¹⁸ Ana Yehofa akusajiwona ngani ja cikululu kuŵa jekulungwa catuli? Cilamusi ca Mose cikusatukamucisya kumanyilila mwakusaciwonela cikululu Yehofa. Mu Yisalayeli, kutenda cikululu, soni kulambila milungu jakupanganyidwa yaliji mu likuga lya yindu yele ŵakuyitendawo ŵapocelaga cilango ca kuwulajigwa. (Levitiko 20:2, 10) Ana akukuwona kulandana kwa cikululu ni kutindiŵalila milungu jakupanganyidwa? Aganicisye yindu yakuyicisyayi, M’yisalayeli jwaŵalambilaga milungu jakupanganyidwa ŵakasaga cilanga caŵatesile ni Yehofa. Mwakulandana ni yeleyi, M’yisalayeli jwatesile cikululu ŵaŵaga kuti akasile cilanga cakwe ni ŵamkwakwe. Wosope ŵaŵaga kuti atesile yindu mwangakulupicika. (Eksodo 19:5, 6; Deuteronomo 5:9; aŵalanje Malaki 2:14.) Wosopewo ŵaŵagasoni kuti atesile cakulemweceka pameso Yehofa, jwali Mlungu jwetu jwakulupicika, soni jwakwenela kumkulupilila.​—Salimo 33:4.

19. Ana cici campaka cimkamucisye mundu kuti asimicisye kuŵambala cikululu, soni akusasimicisya kutenda yeleyi ligongo cici?

¹⁹ Yisyene kuti Aklistu nganaŵa pasi pa Cilamusi ca Mose. Atamose yili m’yoyo, kukumbucila kuti mu ndaŵi ja Ayisalayeli cikululu ŵaciwonaga kuŵa cakulemwa cekulungwa, mpaka yalimbikasye Aklistu kusimicisya kuti akatenda cakulemwecekaci. Ligongo cici? Aganicisye ya cakuwanicisya aci: Ana mpaka yikombolece wawojo kwawula m’macalici ni kutindiŵala ni kupopela pameso pa mtembe? Mwangakayicila mpaka ajanje kuti, ‘Une ngaŵa mkutenda kose yeleyo!’ Nambo ana mpaka asace kutenda yeleyi naga ŵasalile kuti ciŵape mbiya syejinji? Wawojo mpaka ajile kuti, ‘Ngakomboleka!’ Kusala yisyene, kuganisya yakumtumbilikasya Yehofa mwakujitindiŵalila milungu jakupanganyidwa cili cindu cakunyalaya kwa Mklistu jusyesyene. Mwakulandana ni yeleyi, Aklistu akusosekwa  aŵambaleje kutenda cindu campaka cimtumbilikasye Mlungu jwawo, Yehofa, soni ŵamkwawo mwakutenda cikululu, atamose pali cakwakanganicisya kutenda cakulemwecekaco. (Salimo 51:1, 4; Akolose 3:5) Ngatukusaka kutenda cindu campaka cimtendekasye Satana kusangalala, nambo cili cangamcimbicisya Yehofa, soni ulombela.

20. Ana m’ma ulombela gejinji mutendekwe cici? Asale cakuwanicisya.

²⁰ Konjecesya pa kuŵambala kutenda yindu yangacimbicisya ulombela, ana mpaka atendesoni cici campaka cakamucisye kutandilasoni kumcimbicisya mjawo jwa mu ulombela? Kuti tujanje ciwusyoci tuwanicisye yayikusatendekwa mu ulombela kuti yili mpela nyumba. Kaneko aganicisye kuti maloŵe gakunonyelesya, kumtendela mjakwe yambone, soni yindu yine yakulosya kucimbicisyana yayikusatendekwa mu ulombela kuti yili mpela yakusalalisya ya m’nyumba. Naga akusanonyelana mnope, ulombela wawo ukusaŵa mpela nyumba jaŵajisalalisye cenene. Naga kunonyelana kwawo kumasile, yakusalalisya yeleyi yikusatotokoka panandipanandi, kuwuleka ulombela wawo uli ngawukuwoneka cenene mpela nyumba jangali yakusalicisya. Pakuŵa akusasacilila kupikanila lilamusi lya Mlungu lyakuti “ulombela m’wucimbicisyeje jemanja,” cacilinjililalinjilila kulinganya yindu kuti yiŵe cenene. Kusala yisyene, cindu capenani, soni cakucimbicikwa cikusaŵa cakuŵajilwa kucilinganyasoni naga cijonasice. Ana mpaka atende catuli yeleyi? Maloŵe ga Mlungu gakusati: “Lunda lukusataŵa liŵasa, soni kupikanicisya yindu ni kwakucilitendekasya kuŵa lyakulimba. Soni kumanyilila yindu kucitendekasya kuti yumba yakwe yamkati yigumbale ni yindu yosope yapenani, soni yambone mnope.” (Miyambo 24:3, 4) Kwende tulole mwampaka gakamulile masengo maloŵe gelega pa ngani ja ulombela.

21. Ana mpaka tulimbisye catuli ulombela wetu? (Alolesoni libokosi pa  peji 131.)

²¹ Yine mwa ‘yindu yapenani’ yayikusaŵa mu liŵasa lyakusangalala yili mpela cinonyelo cisyesyene, kogopa Mlungu,  soni cikulupi cakulimba. (Miyambo 15:16, 17; 1 Petulo 1:7) Yindu yeleyi yikusatendekasya ulombela kuŵa wakulimba. Nambo ana ayiweni mwayikusagumbalila yumba ni yindu yapenani mwakamulana ni lilemba lila? Yikusagumbala ni “kumanyilila yindu.” Kukamulicisya masengo umanyilisi wa yindu ya m’Baibulo mpaka kwakamucisye ŵandu kucenga kaganisye kawo, soni yeleyi yikusatendekasya kuti cinonyelo cawo kwa jwine ni mjakwe citandilesoni. (Aloma 12: 2; Afilipi 1:9) Ni ligongo lyakwe, pandaŵi jakulijiganya Baibulo pampepe ni ŵamkwawo, cinga pa lilemba lyesiku, kapena akuŵalanga ngani jine jakwe kutyocela mu Nsanja ya Olonda kapena mu Galamukani! jakwayana ni ulombela, yikusaŵa mpela akuwungunya yindu yambone yakusalalicisya nyumba jawo. Naga kumnonyela Yehofa kukwatendekasya kuti akamulicisyeje masengo mu ulombela mwawo yalijiganyisyeyo, nikuti akusaŵa mpela akwinjisya yakusalalisya mu “yumba.” Yakuyicisya yakwe yiciŵa yakuti cinonyelo, soni kusangalala yayapali mu ulombela wawo pandanda mpaka yiwujile.

22. Ana mpaka tuŵe ŵakusangalala catuli naga tukulinjilila mwamtawu kutenda mbali jetu pakulimbisya ulombela wetu?

²² Nambo kusala yisyene, mpaka pasosekwe ndaŵi, soni mtawu kuti yakusalalisyayi yiwujile m’mangwakwe. Nambope, naga akulinjilila kutenda mbali jawo, caciŵa ŵakusangalala kumanyilila kuti wawojo akupikanila yajikusalamula Baibulo yakuti, ‘Mwacimbicisyeje ŵane kupunda mumkusatendela mwasyene.’ (Aloma 12:10; Salimo 147:11) Kupunda yosope, kulinjilila kwawo mwamtawu kuwucimbicisya ulombela wawo kucakamucisya kuti alisunje m’cinonyelo ca Mlungu.