1, 2. Xi zadúʼyanu lu capítulo riʼ, ne xiñee.

PA MAʼ bichaganaluʼ, ximodo rábiluʼ nuu xquendaxheelaluʼ yaʼ. Ñee zanda guiniʼluʼ nabánitu nayecheʼ la? o napaneluʼ xheelaluʼ stale guendanagana. Ñee huadiiluʼ cuenta maʼ qué rábiluʼ xheelaluʼ guiráʼ ni runi sentirluʼ ne maʼ cadi nayecheʼ nuutu la? Zándaca riuubaʼ ladxidoʼloʼ ora gúʼyaluʼ nuu xquendaxheelaluʼ zacá. Pa nácaluʼ ti xpinni Cristu, zándaca riuuluʼ xizaa ne riuubaʼ ladxidoʼloʼ gánnaluʼ cadi cusisaca xquendaxheelaluʼ Jiobá, Dios ni nadxiiluʼ. Peru cadi chuʼluʼ zacá. Zanda guni chaahuiluʼ xquendaxheelaluʼ.

² Galán guietenaláʼdxinu stale guendaxheelaʼ ni cayuni ni na Cristu yanna laaca gúpacaʼ guendanagana dxiqué, peru maʼ naguidxi nuu xquendaxheelacaʼ ne maʼ zanda gácacaʼ ti ejemplu para xcaadxi. Gunda bidxélacabe ni gucané laacabe para biʼniʼ chaahuicabe ni. Lii laaca zanda guidxélaluʼ modo chuʼ xquendaxheelaluʼ naguidxi. Nga runi, lu capítulo riʼ zadúʼyanu xi naquiiñeʼ guni binni para chuʼ xquendaxheelaʼ jma nayecheʼ.

3, 4. Xiñee riuu tobi jma gaxha de xheelaʼ ora guirópacaʼ gúnicaʼ stipa pur chuʼcaʼ gaxha de Dios. Biquiiñeʼ ti ejemplu para gusiéneluʼ ni.

³ Ora runi ca guendaxheelaʼ ca stipa pur chuʼcaʼ gaxha de Dios laaca riuucaʼ gaxha de xheelacaʼ. Ximodo raca nga yaʼ. Guzéʼtenu ti ejemplu. Bixuiʼlú zuhuaa ti hombre ne ti gunaa xaʼnaʼ ti dani na picu ne chichíbacaʼ ni. Nuucabe zitu purtiʼ hombre ca zuhuaa ladu guiaʼ ne gunaa ca nuu ladu  gueteʼ de dani ca. Ne guirópacabe bizulú ziguíʼbacabe ni juntu. Peru xi bizaaca despué yaʼ. Laga zicácabe dani que jma zidxíñacabe. Xi rizíʼdinu de ejemplu riʼ.

⁴ Stipa ni raca para guicá binni dani ca nga zeeda gaca stipa ni cayúninu casi xpinni Cristu para gúninu ni na Jiobá de guidubi ladxidoʼno. Zándaca lii ne xheelaluʼ nadxiitu Jiobá ne cayúnitu stipa pur gúnitu ni nabe casi runi binni stipa para guicá ti dani. Peru pa maʼ qué rábiluʼ xheelaluʼ guiráʼ ni runi sentirluʼ casi dxi nacubi bichaganatu la? zeeda gaca ni casi ñaca gadxé gadxé ladu zicatu dani que. Peru xi zazaaca pa qué gusaana de guicatu dani ca yaʼ. Neca zitu nuuluʼ de xheelaluʼ ante quíbatu dani que, peru ra ziguíʼbatu ni, o ra zidxiiñatu gaxha de Jiobá, bidiiluʼ cuenta maʼ  gaxha nuuluʼ de xheelaluʼ. Nga rusihuinni para ganda chuʼ binni gaxha de xheelaʼ caquiiñeʼ chuʼ gaxha de Dios. Peru ximodo zanda gaca nga yaʼ.

5. 1) Ximodo zanda guidxiña binni Jiobá ne chuʼ gaxha de xheelaʼ. 2) Ximodo ruuyaʼ Jiobá guendaxheelaʼ.

⁵ Ti modo jma jneza chuʼ ca guendaxheelaʼ ca jma gaxha de Dios nga ra gúnicaʼ stipa pur chinándacaʼ ca conseju zeeda lu Biblia (Salmo 25:4; Isaías 48:17, 18). Guidúʼyanu tobi de ca conseju ni bicaa apóstol Pablu: «Cadi gapa tu enda xheela casi enda riguite» (Hebreos 13:4). Xi nuu Pablu niníʼ né ca diidxaʼ ca yaʼ. Lu Stiidxa Dios Didxazá biquiiñecabe diidxaʼ cadi gapa binni guendaxheelaʼ casi «enda riguite», peru lu griegu biquiiñecabe ti diidxaʼ ni rusihuinni naquiiñeʼ gúʼyacabe guendaxheelaʼ ca casi xiixa nabé risaca. Ca diidxaʼ ca rusihuinni cani ximodo ruuyaʼ Jiobá guendaxheelaʼ, ne para laabe nabé risaca ni.

6. Ra guiene chaahuinu xipeʼ nga guníʼ Pablu de guendaxheelaʼ, xi caquiiñeʼ gúninu, ne xiñee galán gánnanu ni.

⁶ Pa lii ne xheelaluʼ cayúnitu ni na Jiobá, nanna dxíchitu nabé risaca guendaxheelaʼ para Laabe purtiʼ laabe gudixhestibe ni (biindaʼ Mateo 19:4-6). Yanna, ñee rábiluʼ caquiiñeʼ si gánnatu nabé risaca xquendaxheelatu para ganda gudxiilutu ca guendanagana ni guidxaagalutu la? Zándaca caquiiñeʼ gúnitu sti cosa para gannaxhiitu xheelatu ne guni respetartu laa. Xi laani yaʼ. Para gánnatu xi gúnitu, xiñee qué guidúʼyanu ca diidxaʼ ni bicaa Pablu sti biaje. Ora guníʼ Pablu «cadi gapa tu enda xheela casi enda riguite» cadi cuzeetesibe modo guʼyaʼ binni guendaxheelaʼ, sínuque cayábibe laacaʼ xi naquiiñeʼ gúnicaʼ. * Pa chinándanu ca conseju ni  bidii Pablu ca lu xquendaxheelanu, zacané ni laanu gánnanu xiruʼ caquiiñeʼ gúninu para gannaxhiinu xheelanu casi modo gunnaxhiinu laa dxiqué. Xiñee rininu zacá yaʼ.

7. 1) Xi ca cosa zeeda lu Biblia rúninu, ne xiñee. 2) Xi ribeendunu ora rúninu ni na ca mandamientu ca.

⁷ Yanna guníʼ ique, ñee raca nagana para lii gúniluʼ cani zeeda lu Biblia, casi gacaneluʼ binni gaca xpinni Cristu o guidagulisaaluʼ para guni adorarluʼ Dios la? (Mateo 28:19; Hebreos 10:24, 25.) Neca nagana raca cani para lii peru rúniluʼ cani. Rigucheecheluʼ diidxaʼ neca nuu binni qué riná gucaadiaga lii ne rieluʼ ca guendaridagulisaa ca neca maʼ bidxágaluʼ pur dxiiñaʼ stiluʼ. Neca zacá qué rusaanaluʼ de gucheecheluʼ diidxaʼ ne de guidagulisaaluʼ. Guirutiʼ ne gastiʼ zanda gucueeza lii de gúniluʼ ni na Dios, nin Binidxabaʼ. Xiñee yaʼ. Purtiʼ nadxiiluʼ Jiobá de guidubi ladxidoʼloʼ ne nga rucaa lii gúniluʼ ni na ca mandamientu stibe (1 Juan 5:3). Peru, xi ribeenduluʼ ora rucheecheluʼ diidxaʼ ne ridagulisaaluʼ yaʼ. Cumu nánnaluʼ cayúniluʼ ni canabaʼ Jiobá lii la? ratadxí ladxidoʼloʼ ne riécheluʼ. Ne laacani rudii cani stipa lii (Nehemías 8:10). Xi rusiidiʼ nga laanu yaʼ.

8, 9. 1) Xi rucaa laanu gusisácanu xquendaxheelanu, ne xiñee naquiiñeʼ gusisácanu ni. 2) Xi chupa cosa zacané laanu gusisácanu xquendaxheelanu.

⁸ Casi maʼ bidúʼyanu ca, pur nadxiinu Dios rucheechenu diidxaʼ ne ridagulisaanu, neca guidxaagalunu stale guendanagana. Laaca ngaca naquiiñeʼ gucaa laanu gusisácanu xquendaxheelanu casi na Biblia, neca guidxaagalunu stale guendanagana (Hebreos 13:4; Salmo 18:29; Eclesiastés 5:4). Ne cásica riguu ndaayaʼ Jiobá stipa ni rúninu para gucheechenu diidxaʼ ne guidagulisaanu, zaqueca zaguube ndaayaʼ stipa ni gúninu pur gusisácanu xquendaxheelanu (1 Tesalonicenses 1:3; Hebreos 6:10).

⁹ Yanna, xi zacané lii gusisácaluʼ xquendaxheelaluʼ yaʼ. Primé, cadi gúniluʼ xiixa ni guniná ni ne, guiropa, guyúbiluʼ modo chuʼ ni naguidxi sti biaje.

10, 11. 1) Ximodo zusihuínninu qué rusisácanu xquendaxheelanu. 2) Xi naquiiñeʼ guinabadiidxanu xheelanu.

¹⁰ Maʼ napa iza, ti gunaa Testigu guníʼ sicaríʼ: «Rinabaʼ Jiobá gudii stipa naa para guneʼ huantar». Xi guni huantarbe yaʼ. Laca laabe bisiénebe: «Nabé runiná ca diidxaʼ rabi xheelaʼ naa. Qué huayuu ora quíñebe naa peru guizáʼ maʼ bininabe ladxiduáʼ, purtiʼ guiráʼ ora rábibe naa: “Maʼ biree gana lii” o “Qué iquiiñeluʼ”». Gunaa ni maʼ bichaganáʼ riʼ bizeeteʼ nabé runiná ca diidxaʼ ni rabi xheelabe laabe.

¹¹ ¡Nabé triste nga ora ca xpinni Cristu ni maʼ bichaganáʼ guiniʼcaʼ ni guniná laacaʼ, purtiʼ ca diidxaʼ ca jma nagana para guiaandaʼ cani! Guiráʼ binni ni iquiiñeʼ ca diidxaʼ riʼ para guninásaacaʼ laacaʼ cadi cusisácacaʼ xquendaxheelacaʼ. Yanna, lii yaʼ. Ñee runiná ca stiidxaluʼ xheelaluʼ la? Para gánnaluʼ ni, zanda guinabadiidxaluʼ laabe: «Ximodo runi sentirluʼ pur cani rabeʼ lii». Pa gábibe lii maʼ huayuninaluʼ laabe stale biaje pur cani riniʼluʼ, naquiiñeʼ gúniluʼ stipa pur guchaaluʼ (Gálatas 5:15; biindaʼ Efesios 4:31).

12. Xi cadi naquiiñeʼ gúninu para cadi guʼyaʼ Dios qué risaca modo runi adorarnu laa.

¹² Guietenaláʼdxinu, pa guninanu xheelanu pur cani gábinu laa, zándaca maʼ qué chuʼnu gaxha de Jiobá. Stiidxaʼ Dios na: «Pa nuu tobi de laatu zácaxa runi ni na Dios, peru qué rucueeza ruaa de iníʼ ni cadi jneza la? caguite laca laa, purti cadi dxandí cayuni ni na Dios» (Santiago 1:26). Ca diidxaʼ ca cusihuinni cani laaca runi adorarnu Dios pur cani rininu. Cadi jneza diʼ nga guiníʼ íquenu cayúninu ni na Jiobá pa cadi cayúninu ni jneza ndaaniʼ lídxinu. Cadi quítenu laca laanu (biindaʼ 1 Pedro 3:7). Zándaca ti xpinni Cristu runi xhiiñaʼ Dios ne stale gana ne galán modo runi  ni ndaaniʼ neza binni ridagulisaa. Peru pa rábibe xheelabe diidxaʼ ni guniná laa, cadi cusisácabe xquendaxheelabe, ne para Dios qué risaca modo runi adorarbe laa.

13. Xi sti modo zándaca guniná ti xpinni Cristu xheelaʼ.

¹³ Cani maʼ bichaganáʼ laaca naquiiñeʼ gúʼyacaʼ cadi guninacaʼ xheelacaʼ de sti modo. Guzéʼtenu chupa ejemplu. Ndaaniʼ ti neza binni ridagulisaa, ra rié ti hombre ni maʼ bichaganáʼ nuu ti gunaa ni cusiniisi ca xiiñiʼ laasi; ora rinabaʼ gunaa riʼ laabe xiixa conseju nabé xadxí riníʼcabe pur teléfono. Sti ejemplu. Ti gunaa ni maʼ bichaganáʼ, guiráʼ semana rigucheeche diidxaʼ né ti hombre ni caʼruʼ guichaganáʼ. Zándaca ca binni ni maʼ bichaganáʼ riʼ qué riníʼ íquecaʼ gúnicaʼ cosa malu; peru, ximodo raʼbuʼ runi sentir xheelacabe yaʼ. Ti gunaa Testigu ni bizaaca zacá guníʼ: «Guizáʼ riuubaʼ ladxiduáʼ ora guuyaʼ nabé xadxí maʼ caniʼné xheelaʼ ti gunaa Testigu ni nuu ndaaniʼ neza binni ridagulisaa stidu. Casi ora rúnibe menu naa».

14. 1) Casi na Génesis 2:24, xi naquiiñeʼ guni cani maʼ bichaganáʼ. 2) Xi naquiiñeʼ guinabadiidxaʼ cani maʼ bichaganáʼ laca laacaʼ.

¹⁴ Gunaa Testigu riʼ napa stale razón para guiuubaʼ ladxidóʼ. Zacaca nga runi sentir ca gunaa ni maʼ bichaganáʼ ora qué runi xheelacaʼ mandatu gudixhe Dios para laacaʼ: «Zusaana hombre bixhoze ne jñaa ne naquiiñeʼ guicanú xheelaʼ» (Génesis 2:24). Ñee cayabi versículo riʼ laanu ora maʼ bichaganáʼ tuuxa maʼ qué zazaalaʼdxiʼ bixhoze ne jñaa la? Coʼ. Ni cayabi ni laanu nga ora guichaganáʼ tuuxa jma zazaalaʼdxiʼ ganna ximodo nuu xheelaʼ. Ne zacaca nga rizaaca né ca xpinni Cristu ni ridagulisaanécabe: neca nadxiicabe laacaʼ, peru jma zazaaláʼdxicabe gúʼyacabe modo nuu xheelacabe que laacaʼ. Nga runi, pa ti hombre nabé riniʼné ti gunaa diidxaʼ o ti gunaa nabé riniʼné ti hombre o nabé ridxaagacaʼ la? zápacaʼ guendanagana lu xquendaxheelacaʼ. Gunabadiidxaʼ laca lii: «Ñee pur ni runeʼ nga napaʼ guendanagana ndaaniʼ lidxeʼ la? Ñee ribeeʼ tiempu  para guuyaʼ ximodo nuu xheelaʼ ne gusihuinneʼ pabiáʼ nadxieeʼ laa la?».

15. Casi na Mateo 5:28, xiñee cadi naquiiñeʼ guindaapeʼ cani maʼ bichaganáʼ ca ora guiníʼnecaʼ tuuxa ni cadi xheelacaʼ.

¹⁵ Ora nabé riniʼné ti hombre ni maʼ bichaganáʼ ti gunaa o nabé ridxaagabe laa, zándaca gápabe guendanagana.  Zacaca pa ti gunaa ni maʼ bichaganáʼ nabé riniʼné ti hombre laaca ziuu lu guendanagana. Peru nabé triste nga ni huayaca, huayuu xpinni Cristu ni huayuni zacá ne qué rindaa riuuláʼdxicaʼ binni ni nabé ridxaagacaʼ (Mateo 5:28). Ne stale biaje rucaa ni laacaʼ gúnicaʼ sti cosa ni rusihuinni qué rusisácacaʼ xquendaxheelacaʼ. Guidúʼyanu xi guníʼ apóstol Pablu de laani.

16. Ximodo gudixhená Pablu cani maʼ bichaganáʼ.

¹⁶ Guníʼ si Pablu «cadi gapa [binni] enda xheela casi enda riguite» gudixhenabe cani maʼ bichaganáʼ: «Cani ma bichaganá la? cadi uchee né xheelaʼ, purti zusaba ná Dios cani rapa jnadxii ne cani riuu né xheela stobi» (Hebreos 13:4). Ca diidxaʼ «cadi uchee né xheelaʼ» ni zeeda lu textu riʼ caníʼ cani cadi gatané binni stobi ni cadi xheelaʼ. Para cadi chuʼ xiixa ni guni biidiʼ xquendaxheelacabe la? cani maʼ bichaganáʼ ca naquiiñeʼ gatanecaʼ xheelasicaʼ, ne gúnicaʼ ni ná ca diidxaʼ riʼ: «Biechené xheelaluʼ ni bichaganaluʼ dxi nahuiiniluʼ» (Proverbios 5:18).

17. 1) Xiñee cadi galán guiníʼ íquenu gastiʼ naca gapa binni jnadxii casi nuu tu riníʼ ique. 2) Ximodo zanda chinándanu ejemplu stiʼ Job.

¹⁷ Guiráʼ tu gatané sti binni ni cadi xheelaʼ la? rusihuinni qué runi respetar ca ley stiʼ Dios. Neca stale binni guidxilayú qué ruuyacaʼ pa malu nga gatané binni stobi ni cadi xheelaʼ, peru cani dxandíʼ xpinni Cristu qué riníʼ íquenu casi riníʼ ique binni. Nánnanu cadi binni guidxilayú nga chiguni juzgar «cani rapa jnadxii ne cani riuu né xheela stobi», sínuque Dios (Hebreos 10:31; 12:29). Nga runi riguixhe íquenu guni respetarnu ca ley stiʼ Jiobá (biindaʼ Romanos 12:9). Galán guininu casi guníʼ Job: «Maʼ bineʼ ti pactu né bizaluáʼ» (Job 31:1). Nga runi caquiiñeʼ gúninu stipa para cadi guuyadxinu sti binni ni cadi xheelanu ne cadi guxuíʼ  lunu gatanenu laa. Pa gúninu zacá la? zusihuínninu cayúninu stipa para cadi guchéʼnenu xheelanu (biiyaʼ apéndice ra ná: «Xi riníʼ Biblia de divorcio ne ora gusabixheelaʼ binni»).

18. 1) Ximodo ruuyaʼ Jiobá gapa binni jnadxii. 2) Xiñee cásica malu gatané binni stobi ni cadi xheelaʼ zaqueca malu nga guzuxibi binni xañee ti bidóʼ.

¹⁸ Ximodo ruuyaʼ Jiobá gapa binni jnadxii. Ley ni bidiibe Moisés que rusihuinni ximodo ruuyabe ni. Lu Ley que gucuá naquiiñeʼ gatiʼ binni ni gatané xheelaʼ stobi o ni guni adorar ti bidóʼ (Levítico 20:2, 10). Xiñee malu guiropaʼ pecadu ca yaʼ. Pa guzuxibi ti israelita xañee ti bidóʼ rucheené pactu ni biʼniné Jiobá. Zaqueca, pa tuuxa gatané sti binni ni cadi xheelaʼ laaca cucheené pactu ni biʼniné xheelaʼ. Guiropaʼ pecadu riʼ malu cani purtiʼ cudxii déchecabe pactu ni bíʼnicabe. Biblia na: «Ne laatu maʼ guniʼtu: “Xi pur yaʼ”. Purtiʼ Jiobá peʼ naca testigu nezaluluʼ ne nezalú ni bichaganaluʼ dxi nahuiiniluʼ, ne maʼ bidxiidécheluʼ laabe, neca laabe nga xcompañéraluʼ ne xheelaluʼ ni bíʼnineluʼ ti pactu» (Malaquías 2:14; Éxodo 19:5, 6; Deuteronomio 5:9). Ne Jiobá, Dios ni qué ruchee ne ni runi ni jneza, zusabanáʼ laacabe (Salmo 33:4).

19. Xi zanda gacané laanu para cadi guchéʼnenu xheelanu, ne xiñee.

¹⁹ Dxandíʼ, laanu maʼ qué rinándanu ni gucuá lu Ley ni gucuaa Moisés que. Peru galán guietenaláʼdxinu nanalaʼdxiʼ Dios gatané binni stobi ni cadi xheelaʼ. Xiñee yaʼ. Purtiʼ zacané ni laanu para qué chuʼ dxi gúninu ni. Guchaaganu ni né ti cosa ni nánnanu qué ziuu dxi gúninu. Ñee ziuuluʼ ndaaniʼ ti yuʼduʼ ne guzuxíbiluʼ xañee ti bidóʼ para guni orarluʼ la? Zándaca guiniʼluʼ: «¡Nin qué ziuu dxi guneʼ nga!». Peru pa cudiicabe lii stale bidxichi para gúniluʼ ni yaʼ. Neca zacá zaniʼluʼ: «¡Coʼ, qué zunediáʼ nga!». Ti binni ni dxandíʼ naca xpinni Cristu qué zaná guzuxibi xañee ti bidóʼ ne gudxiideche Jiobá. Cásica qué zadiʼdiʼ ndaaniʼ íquenu gudxiidéchenu Jiobá, zaqueca cadi naquiiñeʼ tiidiʼ ndaaniʼ íquenu  gatanenu sti binni ni cadi xheelanu, neca uquiinde laanu gúninu ni (Salmo 51:1, 4; Colosenses 3:5). Qué racaláʼdxinu gusiéchenu ladxidóʼ Binidxabaʼ ne guiníʼ binni mal de Jiobá ne de xquendaxheelanu.

20. Biquiiñeʼ ti ejemplu para guiniʼluʼ xi huazaaca lu caadxi guendaxheelaʼ.

²⁰ Para qué chuʼ dxi gusaana de guni respetarnu xheelanu, cadi caquiiñeʼ si gucáʼnanu ca cosa ni zándaca guniná xquendaxheelanu. Xiruʼ naquiiñeʼ gúninu yaʼ. Para ganda guicábinu guendarinabadiidxaʼ ca, guchaaganu guendaxheelaʼ ca ne ti yoo. Xi raʼbuʼ caquiiñeʼ para guihuinni ti yoo galán yaʼ. Nga nga ca cosa ni riguu binni ndaaniʼ ni. Zacaca nga zeeda gaca ti guendaxheelaʼ. Ora nuucabe tobi si riquiiñecabe diidxaʼ naxhi, rapasaacabe laacabe ne rannaxhiisaacabe, ca nga nga ni rusihuinni nuu ti guendaxheelaʼ galán. Peru pa maʼ cadi nadxiisaacabe la? maʼ cadi nuu xquendaxheelacabe galán. Cadi dxandíʼ qué racaláʼdxiluʼ gaca nga la? sínuque racaláʼdxiluʼ guisaca xquendaxheelaluʼ casi modo racalaʼdxiʼ Dios. Guibiguétanu guininu de yoo ni bizéʼtenu que. Pa gúʼyaluʼ cayaca feu ni zuyúbiluʼ modo guni chaahuiluʼ ne gápaluʼ ni. Zacaca caquiiñeʼ gúniluʼ ne xquendaxheelaluʼ. Caquiiñeʼ gúniluʼ stipa pur gápaluʼ ni ne guyúbiluʼ modo guni chaahuiluʼ ca guendanagana stitu. Ximodo zanda gaca nga yaʼ. Stiidxaʼ Dios na: «Né guendabiaaniʼ nga para cuí ti yoo, ne para guzuhuaa ni dxiichiʼ naquiiñeʼ gánnacabe ximodo gaca ni. Ne laaca naquiiñeʼ gánnacabe xi gúnicabe ti guidxá ca cuartu stini de ca cosa sicarú ne ni risaca» (Proverbios 24:3, 4). Guidúʼyanu ximodo zanda gaca ni ná ca diidxaʼ riʼ lu ti guendaxheelaʼ.

21. Xi zanda gúninu para chuʼ xquendaxheelanu naguidxi (biiyaʼ cuadru ra ná: « Xi zanda guneʼ para chuʼ xquendaxheelaʼ naguidxi»).

²¹ Chupa chonna «cosa sicarú» ni napa stale xpinni  Cristu ndaaniʼ lidxi nga: nadxiisaacaʼ, ridxíbicaʼ Dios ne naguidxi fe sticaʼ (Proverbios 15:16, 17; 1 Pedro 1:7). Laacani ne xcaadxi guenda racané cani ca guendaxheelaʼ ca chuʼcaʼ naguidxi. Peru maʼ biiyaluʼ ximodo nga riuu cosa «sicarú» ndaaniʼ ca cuartu ca casi na Proverbios 24:4 la? Textu ca na «né guendabiaaniʼ». Nga runi, guiráʼ cani maʼ bichaganáʼ ni racalaʼdxiʼ guchaa modo laa ne racalaʼdxiʼ gannaxhii xheelaʼ sti biaje caquiiñeʼ gánnacaʼ xiná Biblia ne gúnicaʼ ni (Romanos 12:2; Filipenses 1:9). Zanda gúʼndacabe folletu Guidúʼndanu Stiidxaʼ Dios guiráʼ dxi o ti tema ni zeeda lu Torre stiʼ ni rapa o ¡Despertad! ni caníʼ de guendaxheelaʼ ti gánnacabe xiruʼ caquiiñeʼ gúnicabe para chuʼ lídxicabe galán o xquendaxheelacabe. Ne cumu nadxiicabe Jiobá la? zúnicabe stipa pur cúʼcabe ca cosa sicarú ca ndaaniʼ cuartu stícabe o zúnicabe guiráʼ ni caziidicabe lu xquendanabánicabe. Ora gúnicabe nga la? casi ñaca nuzuchaahuicabe lídxicabe sti biaje ti guihuinni ni galán cásica dxiqué.

22. Xi zabeendunu pa gúninu stipa pur gusisácanu xquendaxheelanu.

²² Cadi casi zécabe zanda cúʼcabe ca cosa sicarú ca ndaaniʼ lídxicabe o guibiguetaʼ guihuinni xquendaxheelacabe galán casi dxiqué. Peru ca xpinni Cristu ni guni stipa pur chinanda ca conseju zeeda lu Biblia ni caníʼ gusisácacaʼ stobi ne cadi laca laacaʼ zatadxí ladxidoʼcaʼ (Romanos 12:10; Salmo 147:11). Ne stipa ni cayúnicabe para gusisácacabe xquendaxheelacabe zacané ni laacabe para cadi guixélecabe de Dios ni nadxii laacabe.