1-3. (a) Mic mene ma Jehovah ominiwa, dok kitwero tic kwede i yo marac nining? (b) Wek wabed i mar pa Lubanga, omyero wati ki mic me lok-ki nining?

KET-TI imiyo mic mo bot ngat mo ma imaro adada, ento en dok tiyo kwede marac akaka, itamo ni ibiwinyo nining? Ket-ti imiye mutoka, ento lacen iniang ni en dwoyo i yo marac ma kelo awano i kom jo mukene. Pe obicwero cwinyi mada?

² Kero me lok obedo mic mua ki bot Jehovah, ma obedo Lami “kit gin mo ducu maber, ki mot ducu mabeco tutwal.” (Yakobo 1:17) Mic man ma pe kimiyo bot lee-ni, konyowa me tito tamwa kacel ki kit ma wawinyo kwede bot jo mukene. Mic me lok bene kiromo tic kwede i yo marac calo mutoka. Cwiny Jehovah cwer adada ka ce watiyo ki lebwa i yo marac, ma kelo wangcwiny ki arem bot jo mukene!

³ Wek wabed i mar pa Lubanga, omyero wati ki micwa me lok-ki kit ma Lamiyone mito kwede. Jehovah otito ka maleng kodi lok mene ma yomo cwinye. Lokke waco ni: “Lok mo marac myero pe okatti ki i dogwu; wulok lok mabeco keken ma dongo tam pa dano i yo ma mitte, wek jo ma winyo lokwu gunong kony ki iye.” (Jo Epeco 4:29) Kong dong wanyamu tyen lok mumiyo  omyero wagwok lebwa, leb ma myero pe wati kwede, ki dong kit ma watwero loko kwede lok ‘mabeco ma dongo tam pa dano.’

4, 5. Carolok mogo me Baibul tito teko pa lok nining?

⁴ Tyen lok acel ma pire tek mumiyo omyero wagwok lebwa aye ni lok tye ki teko. Carolok 15:4 waco ni: “Lok ma giloko mot ki kica tye macalo yat me kwo, ento lok mogo mungak balo cwiny dano woko.” * Dong lok ma kiloko mot ki kica twero kweyo cwiny jo ma winyo. Ento lok mungak twero balo cwiny jo mukene woko. Ada, lok ma waloko tye ki teko me wano nyo cango dano.—Carolok 18:21.

⁵ Me tito teko pa lok ma waloko, carolok mukene waco ni: “Lok pa ngat ma pe ki tam winnye malit macalo pala lucwan ka ocobo dano.” (Carolok 12:18) Lok ma kirune ka wacone labongo tam, keto bur malit i cwiny dano dok balo wa wat bene. Tika nino mo acel cwinyi  owang pi lok ma kiloko ma ocobi calo pala lucwan? Carolok acel-li, owaco bene ni: “Lok ma a ki i leb ngat maryek twero cango dano.” Lok me niango ma a ki i dog ngat ma tye ki ryeko pa Lubanga twero cango bur ma tye i cwiny dano dok roco wat. Wi tika po i kom nino mo acel ma inongo iye kwe cwiny ki i lok mo me kica? (Kwan Carolok 16:24.) Bedo ki ngec ni lok ma waloko gudu jo mukene miyo watute me tic ki lebwa me cango jo mukene, ento pe me wango cwinygi.

6. Pingo gwoko leb obedo gin matek adada?

⁶ Kadi bed watute ki kerowa ducu, pe watwero gwoko lebwa kwicikwici. Pi meno, tyen lok me aryone mumiyo omyero wabed ma wangwa twolo i kom tic ki lebwa aye ni: Bal kacel ki roc ma watye kwede miyo watiyo ki lebwa i yo marac. Lok ma waloko a ki i cwinywa, dok ‘tam ducu ma i cwiny dano kemo bal keken.’ (Acakki 8:21; Luka 6:45) Pi meno, gwoko lebwa mito tute matek adada. (Kwan Yakobo 3:2-4.) Kadi bed ni pe watwero gwoko lebwa kwicikwici, ento pud waromo medde ki tute me tic kwede i yo maber. Kit macalo lakwang mo ma kwang kemo tung ka ma pii a ki iye myero olweny ki mol pa pii, wan bene omyero wamedde ki lweny ki cwinywa me bal ma terowa i tic ki lebwa i yo marac.

7, 8. Jehovah mono ngolo kop i wiwa ma rom mene pi lok ma waloko?

⁷ Tyen lok me adekke mumiyo omyero wagwok lebwa aye ni wabicung i nyim Jehovah pi lok ma waloko. Kit ma watiyo kwede ki lebwa pe gudu watwa ki luwotwa keken ento gudo wa watwa ki Jehovah bene. Yakobo 1:26 wacci: “Ka ce dano mo otamo ni en ladini kun pe juko lebe, nongo bwolle abwola kene ki i cwinye, dinine-nu konnye pe.” Kit ma waneno kwede i dul mukato-ni, lok ma waloko kubbe ki worowa. Ka waloko  leb maraco kun pe wagwoko lebwa, ci tic ducu ma watiyo macalo Lukricitayo konnye doko pe i wang Lubanga. Man mono pe miyo wayabo wangwa malac i lok man?—Yakobo 3:8-10.

⁸ Dong nen ka maleng ni watye ki tyen lok madit mumiyo omyero wagwokke ki tic ki micwa me lok-ki i yo marac. Ma peya waneno lok mogo mabeco ma kiloko ma dongo tam pa dano, kong wanenu kodi leb mogo ma Lukricitayo myero pe guti kwede.

9, 10. (a) Kodi leb ango ma dong gudoko lok me nino ducu i kare-ni? (b) Pingo omyero wakwer tic ki leb me ore ma winyone lik? (Nen lok ma kiketo i tere piny.)

⁹ Leb me ore me lewic. Tic ki leb macilo ki leb mukene ma winyone lik gudoko dong lok me nino ducu i kare-ni. Jo mukene gitiyo ki leb me yet ka igi owang, mukene gitiyo ki leb mogo macilo me mit nyo leb me ore mogo ma pe ber wek dano onyer. Leb ma kit magi kono pe gubedo gin me tuku. Mwaki 2,000 mukato angec, lakwena Paulo ocoyo tira bot kacokke me Kolocai ni myero gubol “lok mogo me lewic” woko cen. (Jo Kolocai 3:8) Paulo otito bot kacokke me Epeco ni “loko lok oree ma konye pe” tye i kin jami ma myero “pe owinnye” i kin Lukricitayo me ada.—Jo Epeco 5:3, 4.

¹⁰ Leb me ore ma winyone lik obedo gin me kwer bot Jehovah. Wango bene wa cwiny jo ma marre. Adada, marwa pi Jehovah miyo wakwero tic ki leb ma winyone lik. I kare ma tye ka ryeyo “tic me kit pa dano,” Paulo ocimo tim “caro” nyo tim cilo ma tye i kine loko leb me ore maraco. (Jo Galatia 5:19-21) Man pe obedo lok me tuku. Kiromo ryemo ngat moni woko ki i kacokke ka ce en oloko gire odoko kite me loko lok macilo  me tarwang ki lok me lewic ma balo dano, teke kicikke kwe. *

11, 12. (a) Kwoto nying dano obedo ngo, dok romo doko gin marac nining? (b) Pingo luwor Jehovah omyero gugwokke ki i kwoto nying dano?

¹¹ Kwoto nying dano marac, balo nying. Kwoto dano obedo lok i kom dano kacel ki kwogi. Kwoto nyo lok i kom dano mono dong ducu rac? Pe rac gire ka ce waloko i kom jami mabeco ma kelo kony, calo lok i kom nga ma pud onongo batija nyen nyo nga ma mito cuko cwiny. Lukricitayo me cencwari me acel gubedo ki miti me ngeyo kit ma luwotgi gitye kwede dok gunywako ngec mupore i kom luye luwotgi. (Jo Epeco 6:21, 22; Jo Kolocai 4:8, 9) Kwoto dano doko rac ka ce pe kiloko lok ada nyo kidonyo i lok me mung pa jo mukene. Marac dong loyo aye ni twero o wa i balo nyinggi marac adada, ma pol kare romo kelo adwogi marac mada. Balo nying dano obedo “coko lok goba . . . ma balo nying ki kit ngat moni.” Me labolle, Luparicayo gucoko lok goba maraco me balo nying Yecu nono. (Matayo 9:32-34; 12:22-24) Kwoto nying dano pol kare kelo yoko wic.—Carolok 26:20.

¹² Jehovah pe tero jo ma gitiyo ki mic me lok ma kiminigi-ni me balo nying jo mukene nyo me kelo apokapoka calo gin tuko. En dag jo ma ‘tubo kin omegigi.’ (Carolok 6:16-19) Nyig lok me leb Grik di·aʹbo·los ma kigonyo ni “kwoto dano,” bene kitiyo kwede macalo nying me dog tic pa Catan. En obedo “Ladot,” labal  nying Lubanga. (Niyabo 12:9, 10) Adada, omyero wagwokke ki i loko lok ma biweko wadoko calo Ladot ca. Kacokke pe obedo kabedo me kwoto dano ma man tugo tic me kit pa dano calo “daa” ki “pokke.” (Jo Galatia 5:19-21) Pi meno, ma peya ikubo lok mutimme i kom ngat moni, penye kong kekeni ni: ‘Lok-ki mono obedo lok ada? Tika obedo gin me kica ka ce akubu? Mono bedo ber me rweyo pire i kin piny?’—Kwan 1 Petero 4:15.

13, 14. (a) Yet twero kelo adwogi ango i kom jo ma kiyetogi? (b) Pingo ngat ma oloko yeto dano odoko kite twero bedo marac?

¹³ Yet. Kit ma waneno kwede con, lok tye ki teko me wano dano. Ki lok ada, i cawa mukene pi roc ma watye kwede, waloko jami mogo ma wakoko ange iye lacen. Ento, Baibul cikowa i kom leb mogo ma omyero pe owinnye i paco pa Lakricitayo nyo i kacokke. Paulo ociko Lukricitayo ni: “Wuwek dong keccwiny ducu, ki wang-ic ki kiniga, da i wi dano mukene, yet, kacel ki raccwiny ducu.” (Jo Epeco 4:31) I Baibul mukene, lok man ni ‘yet-ti’ kigonyo ni “loko leb maraco,” “leb ma kelo awano.” Yet tye iye lwongo ngat moni ki nying me anywar, loko lok ma golo bal pa ngati moni ka maleng kare ducu, ma twero rwenyo worogi woko dok weko giwinyo ni gin kara konygi pe. Jo matino ma cwinygi pud tojo aye tutwalle giwinyo malit adada ka kiyetogi.—Jo Kolocai 3:21.

¹⁴ Baibul otiyo ki lok magwa adada me kwero tim me yeto dano kare ki kare. Ngat ma oloko yeto dano ki leb makec odoko kite nongo tye marac, pien kiromo ryeme woko ki i kacokke ka ce en pe ye winyo tira ma kimiye wek olok kite. Ka ce en pe oloko kite, ci en romo keng mot me kwo i lobo manyen. (1 Jo Korint 5:11-13; 6:9, 10) Man dong nyutu atir ni pe watwero bedo i mar  pa Lubanga ka ce wabedo ka loko lok maraco, lok goba, nyo lok ma pe obedo me kica. Lok ma kit magi poko kin dano.

15. Kodi lok ango ma obedo lok ‘mabeco ma dongo tam pa dano’?

¹⁵ Wan watwero tic ki mic me lok kit ma Lamiyone mito kwede nining? Wi po ni Lok pa Lubanga cuko cwinywa me loko “lok mabeco keken ma dongo tam pa dano.” (Jo Epeco 4:29) Cwiny Jehovah bedo yom ka waloko lok ma dongo tam pa dano, ma cuko cwiny, dok jingo jo mukene. Wek walok lok ma kit magi, mito kong watam iye matut. Baibul pe miyo cik mo me aluba; dok bene pe oryeyo kodi lok ango ma obedo ‘lok ma roc mo pe iye.’ (Tito 2:8) Wek walok lok ‘mabeco ma dongo tam pa dano,’ omyero wiwa opo i kom jami adek ma pigi tego ma nyutu ni lok moni dongo tam pa dano: Lokke myero obed ber, lok ada, ki dong obed lok me kica. Kong dong wanenu labol mogo manok nok ma lubbe ki lok ma dongo tam pa dano, kun waketo lok adek magi bedo i wiwa.—Nen bok ma wiye tye ni “ Lok ma Aloko Mono Dongo Dano?” i pot karatac 140.

16, 17. (a) Pingo omyero wapwo jo mukene? (b) Kare maber ango ma tye me pwoyo jo mukene i kacokke? i ot?

¹⁶ Mi pwoc ki cwinyi ducu. Jehovah gin ki Yecu gingeyo ni miyo pwoc kacel ki nyuto cwak obedo gin ma pire tek. (Matayo 3:17; 25:19-23; Jon 1:47) Wan macalo Lukricitayo bene omyero wapwo jo mukene ki cwinywa ducu. Pingo? Carolok 15:23 wacci: “Lok ma [kiloko] i kare ma mitte kikome, ber mada!” Penye kong kekeni ni: ‘An mono awinyo nining ka ce ngat mo opwoya ki cwinye ducu? Mono pe weko awinyo maber dok cuko cwinya?’ Ada, pwoc ma ngat moni pwoyi ki cwinye  ducu weko ingeyo ni en paro piri, dok ni gin moni ma itimo-ni obedo gin maber atika. Cwiny ma kit meno miniwa gen dok cuko cwinywa me medde ki tic matek i anyim. Kit macalo cwinyi bedo yom ka kimini pwoc, in kono pe omyero itute matek me pwoyo jo mukene?—Kwan Matayo 7:12.

¹⁷ Pwonnye me neno jami mabeco ma jo mukene gitimo, ci ipwogi pire. I kacokke, romo bedo ni iwinyo pwony mo ma kimiyo maber adada, iromo neno bulu mo ma tye ka dongo me cobo yubbe me cwiny, nyo ngat mo ma pe keng cokke kadi bed dong oteggi. Pwoc ma a ki i cwinyi twero gudu cwiny jo ma kit meno dok jingogi i yo me cwiny. Bot jo me odi, laco nyo dako bedo ki yomcwiny me winyo pwoc me ada ma a ki bot lawote. (Carolok 31:10, 28) Lutino aye dong tutwalle gibedo maber ka giwinyo ni kineno ticgi maber dok kimarogi. Ber pa miyo pwoc ki dok nyuto cwakki bot latin rom ki ber pa pii ki ceng bot yat. Lunyodo, yenyu yo me pwoyo lutinowu pi kit mabeco kacel ki pi tutegi. Pwoc ma kit meno twero jingo cwiny lutinoni, miyo gibedo ki gen i komi ma man weko gitute matek me timo gin maber.

18, 19. Pingo omyero watute matek me kweyo cwiny luye luwotwa, dok watwero timo meno nining?

¹⁸ Kwe cwiny. Jehovah paro mada pi “[jo] mamwol” ki “jo ma cwinygi cwer.” (Icaya 57:15) Lokke kwayowa me ‘kweyo cwiny luwotwa’ ki ‘loko lok ma kweyo cwiny jo ma kumo.’ (1 Jo Tecalonika 5:11, 14) Watwero bedo ki gen ni Lubangawa neno dok pwoyo tutewa me kweyo cwiny luye luwotwa ma nongo cwinygi cwer.

¹⁹ Ento ngo ma itwero wacone me kweyo cwiny Lakricitayo lawoti ma cwinye otur nyo tye ki cwercwiny?  Pe itam ni omyero icob pekone-ni cutcut. Pol kare, lok mogo manok nok romo kelo kony. Cuk cwinye wek onge ni in iparo pire. Wuleg ki ngat ma cwinye otur-ri ki dwan ma winye; kun ibako dogi bot Jehovah me konyo dano meno me niang ni Lubanga ki jo mukene  gimare. (Yakobo 5:14, 15) Wek en onge ni en pud mitte dok pire tek macalo lamemba me kacokke. (1 Jo Korint 12:12-26) Kwan bote wang Baibul ma weko en bedo labongo akalakala mo ni ada Jehovah kara paro pire. (Jabuli 34:18; Matayo 10:29-31) Kwanyo kare me nywako “lok maber me kica” ki ngat ma cwinye otur ki dong loko lok ma a ki i cwinyi bimiyo en winyo ni kimare dok kipwoye.—Kwan Carolok 12:25.

20, 21. Jami ango-gu ma weko tira bedo me kony?

²⁰ Tira ma konyo. Macalo cwec ma tye ki roc, wan ducu omyero wabed ka nongo tira kare ki kare. Baibul cuko cwinywa ni: “Winy [tira] ma gimini dok imak pwony ma gipwonyi kwede, ci ibibedo dano ma laryeko i kare me anyim.” (Carolok 19:20) Miyo tira pe obedo tic pa luelda keken. Lunyodo bene gitiro lutinogi. (Jo Epeco 6:4) Lumego muteggi giromo miyo tira bot lumego matino. (Tito 2:3-5) Mar pi jo mukene  weko wamiyo tira ma ngat ma wamiye tira-ni twero jolone labongo winyo marac. Ngo ma romo konyowa me miyo tira ma kit meno? Nen kong jami adek ma weko tira moni bedo me kony: cwiny ma lami tira moni tye kwede, guti ma tira meno jenge iye, ki dong kit ma kimiyo kwede.

²¹ Tira ma konyo cakke ki bot lamiyone. Penye kekeni ni, ‘Kare mene ma an anongo ni jolo tira yot iye bota?’ Ka ingeyo ni ngat ma tye ka mini tira-ni paro piri, ma pe tye ka lok pi pekone mo, dok pe tye ki cwiny mo marac, ci ye tira meno bedo yot. In kono pe itamo ni in bene omyero ibed kit meno ka itye ka miyo tira bot jo mukene? Tira ma kelo adwogi maber jenge i Lok pa Lubanga. (2 Temceo 3:16) Kadi bed wakwano lokke atir ki i Baibul nyo pe, omyero wawek tira mo keken ma wamiyo ojenge i Ginacoya. Pi meno, luelda omyero pe gumi tam ma megi bot jo mukene; dok pe omyero gudwo Ginacoya i yo ma gin ngeyo, wek onen calo Baibul cwako tam ma meggi-ni. Tira bene romo bedo me kony ka kimiyo i yo matir. Tira ma kimiyo ki cwiny me kica jolone yot dok keto deyo i kom ngat ma bijolone.—Jo Kolocai 4:6.

22. In dong imoko tammi ningo ma lubbe ki kit me tic ki mic me lok?

²² Adada, lok obedo mic ma pire tek mua ki bot Lubanga. Marwa pi Jehovah myero oterwa me tic ki mic man i yo maber, ento pe i yo marac. Dong wiwa myero opo ni lok ma waloko tye ki teko me ribo kin dano nyo me poko kin dano. Pi meno, watute wunu me tic ki mic man kit ma Lamiyone mito kwede—me “dongo tam pa dano.” Ka watimo kit meno ci lokwa bibedo mot madit bot jo ma wakwo kacel kwedgi dok bikonyowa me bedo i mar pa Lubanga.