1-3. a) ¿Chuqui bʌ majtañʌl tsiʼ yʌqʼueyonla Jehová, i bajcheʼ mach weñic miʼ mejlel ti cʼʌjñel? b) Mi la com chʌn ajñel tiʼ cʼuxbiya Dios, ¿bajcheʼ yom mi laj cʼʌn jiñi majtañʌl tsaʼ bʌ aqʼuentiyonla?

ÑAʼTANCU chaʼan mi lac majtan aqʼuen jumpʼejl carro juntiquil wen cʼuxbibil bʌ lac chaʼan pero mach weñic miʼ cʼʌn, mach tsajalic miʼ ñijcan i miʼ low yañoʼ bʌ. ¿Bajcheʼ yubil mi caj la cubin? Miʼ yʌqʼueñonla lac chʼijiyemlel.

² Jin chaʼan, tiʼ «pejtelel wem bʌ lac majtan yicʼot pejtelel utsʼat bʌ lac majtan miʼ tilel ti Dios» (Santiago 1:17). Junchajp tsaʼ bʌ aqʼuentiyonla maʼañic bʌ tsaʼ aqʼuenti juncojt añimal jiñʌch cheʼ mi lac mejlel ti tʼan, miʼ mejlel laj cʌl chuqui la com yicʼot bajcheʼ yubil mi la cubin. Pero ili majtañʌl, tajol mach weñic miʼ cʼʌjñel lajal bajcheʼ jiñi carro. An wiñicob xʼixicob (quixtañujob) mach bʌ i wentajic bajcheʼ miʼ cʼʌñob i miʼ yʌqʼuen i taj wocol yañoʼ bʌ. ¿Muʼ ba lac chʼʌmben isujm bajcheʼ yubil miʼ yubin Jehová chaʼan jiñi?

³ Mi la com chʌn ajñel tiʼ cʼuxbiya Dios, yom mi laj cʼʌn ti wen ili tsaʼ bʌ aqʼuentiyonla. Yom mi lac jacʼ jiñi ticʼojel tsaʼ bʌ i yʌcʼʌ yaʼ ti Biblia: «Mach yomic mi laʼ cʼʌn laʼ wej ti jontol bʌ tʼan. Yom jach mi laʼ sub chuqui utsʼat chaʼan mi laʼ pʼʌtʼesan jiñi [yañoʼ bʌ], chaʼan mi laʼ wʌqʼueñob i yutslel i pusicʼal» (Efesios 4:29). Jin chaʼan, mi caj laj cʌn baqui bʌ jiñi tʼan tac mach bʌ yomic mi laj cʌl yicʼot bajcheʼ yom mi laj cʼʌn jiñi majtañʌl chaʼan mi lac pʼʌtʼesan yambʌ lac piʼʌlob.  Pero cheʼ muʼto caj laj cʌn jiñi, laʼ lac ñaxan qʼuel chucoch ñuc i cʼʌjñibal cheʼ mi lac ticʼ la cacʼ.

4, 5. ¿Chuqui mi yʌl chaʼpʼejl uxpʼejl proverbio muʼ bʌ lac taj yaʼ ti Biblia chaʼan bʌ i pʼʌtʌlel jiñi tʼan?

⁴ Ñaxam bʌ, jin cheʼ añʌch i pʼʌtʌlel muʼ bʌ la cʌl. Jin chaʼan Proverbios 15:4 mi yʌl: «Jiñi uts bʌ tʼan lajalʌch bajcheʼ teʼ baʼ chʼoyol laj cuxtʌlel. Jiñi michʼ bʌ tʼan miʼ jecʼ lac pusicʼal». * Jiñi muʼ bʌ i wen chajpan bajcheʼ miʼ cʼʌn ti tʼan i yacʼ lajal bajcheʼ jiñi yeʼeb tsʌwan tsʌwan bʌ ti sʌcʼan yicʼot bajcheʼ jumpʼejl bálsamo muʼ bʌ i coltañonla. Pero jiñi mach bʌ weñic miʼ cʼʌn i yacʼ miʼ mejlel i yʌqʼuen i chʼijiyemlel i pusicʼal yañoʼ bʌ. Cheʼ bajcheʼ woli (choncol) laj qʼuel, jiñi tʼan miʼ mejlel i lowonla o i tsʼʌcañonla (Proverbios 18:21).

⁵ Jiñi i pʼʌtʌlel am bʌ i chaʼan, miʼ lajintel yaʼ ti Proverbios 12:18. Yaʼi mi yʌl chaʼan jiñi «mach bʌ utsic i tʼan. Miʼ jecʼonla bajcheʼ espada». Cheʼ maʼañic mi lac ñaʼtan bajcheʼ mucʼonla ti tʼan, miʼ mejlel lac low yañoʼ bʌ o mi lac sʌt la camigojob. Jiñi tʼan muʼ bʌ lac subentel ñumen cʼux to bajcheʼ jumpʼejl espada muʼ bʌ i jecʼ lac pusicʼal. Pero, cheʼ bajcheʼ  miʼ chaʼ al jiñi proverbio, jiñi muʼ bʌ lac subentel miʼ mejlel i coltañonla jaʼel: «I tʼan jiñi weñoʼ bʌ i pusicʼal i wentajʌch tsʼac muʼ bʌ i lajmesañonla». Jiñi Muʼ bʌ i chaʼlen wersa i pʌs chaʼan añʌch i ñaʼtʌbal tilem bʌ ti Dios, miʼ ñaxan ñaʼtan chuqui mi yʌl. Jiñi uts bʌ miʼ chaʼlen tʼan miʼ tsʼʌcʌben i pusicʼal jiñi lojwem bʌ i miʼ pʌs chuqui wem bʌ. Tajol añix laj qʼuele chaʼan jiñi tʼan añʌch i pʼʌtʌlel chaʼan tsʼʌcaya (pejcan Proverbios 16:24). Muʼ bʌ i loqʼuel ti lac tiʼ an cabʌl i pʼʌtʌlel, jin chaʼan mach yomic mi laj cʼʌn chaʼan mi lac low lac piʼʌl, yom chaʼan mi lac tijicñesʌbeñob i pusicʼal.

6. ¿Chucoch wocol mic ticʼ la cacʼ?

⁶ Anquese mi lac chaʼlen wersa laj cʌl wen jach bʌ tʼan, pero an i tajol mach mejloñicla. Ili miʼ pʌsbeñonla jiñi i chaʼchajplel chucoch yom mi lac ticʼ laj cacʼ: Come jiñi mulil jiñʌch miʼ yʌcʼonla chaʼan mach weñic bajcheʼ mi laj cʼʌn laj cacʼ. Jiñi muʼ bʌ la cʌl tilem ti lac pusicʼal, jin chaʼan, jiñi Biblia mi yʌl chaʼan ‹jontol chuqui mi lac ñaʼtan ti lac pusicʼal cʼʌlʌ cheʼ chʼitoñontola› (Génesis 8:21; Lucas 6:45). Wocol mi lac ticʼ la cacʼ (pejcan Santiago 3:2-4). Anquese xmulilonla pero miʼ mejlel laj cʼʌn ti wen. Pero yom mi lac chaʼlen wersa ti jujumpʼejl qʼuin, lajal bajcheʼ woliyonla ti ñuxijel letsel baqui cʌlʌx woli (yʌquel) ti ajñel tilel jiñi jaʼ ti lac tojlel.

7, 8. Chaʼan jiñi muʼ bʌ la cʌl, ¿bajcheʼ yilal miʼ qʼuel Jehová ti lac chʼujutesaya?

⁷ I yuxchajplel chucoch yom mi lac ticʼ laj cacʼ jiñʌch chaʼan jiñi eʼtel am bʌ lac chaʼan ti Jehová. Jiñi muʼ bʌ la cʌl mach mucʼ jach i yʌcʼ ti wocol jiñi yañoʼ bʌ, miʼ yotsañonla ti wocol jaʼel ti Jehová. Cheʼ bajcheʼ mi yʌl Santiago 1:26: «Jiñi muʼ bʌ i lon ñaʼtan utsʼat woliʼ chʼujutesan Dios cheʼ maʼañic miʼ ticʼ i yacʼ, woli jach i ñop lot. Tontojʌch. Miʼ lon sub i bʌ ti hermano». * Cheʼ bajcheʼ tsaʼ tsictesʌnti ti yambʌ  cʌntesʌntel, an chuqui lajal cheʼ bajcheʼ mucʼonla ti tʼan yicʼot lac chʼujutesaya ti Dios. Mi maʼañic mi lac ticʼ la cacʼ i mi lac low yañoʼ bʌ ti lac tʼan am bʌ i venenojlel yubil, maʼañic i cʼʌjñibal jiñi lac chʼujutesaya muʼ bʌ lac mel tiʼ tojlel Dios. Iliyi an chuqui yom miʼ yʌqʼueñonla lac ñaʼtan (Santiago 3:8-10).

⁸ Tsaʼix laj qʼuele uxchajp ñuc bʌ i cʼʌjñibal chaʼan bajcheʼ yom mi lac chaʼlen tʼan. Wʌle mi caj laj qʼuel baqui bʌ tʼan mach yom mi laj cʼʌn yicʼot baqui bʌ yom mi laj cʼʌn chaʼan mi lac pʼʌtʼesan yañoʼ bʌ.

9, 10. a) ¿Bajcheʼ yilal bʌ tʼan wen pujquem ti ili ora? b) ¿Chucoch yom mi lac tsʼaʼlen jiñi bibiʼ bʌ tʼan? (Qʼuele jaʼel jiñi nota.)

⁹ Bibiʼ bʌ tʼan. Ti ili ora, jiñi pʼajoñel, tsucul tʼan yicʼot jiñi mach bʌ tojic tac miʼ yʌjlel, cʌlʌxix pʼojlem. Cabʌl quixtañujob miʼ cʼʌñob jiñi tʼan tac chaʼan miʼ wen tajob chuqui miʼ yʌlob o chaʼan ñumen cʼux chuqui miʼ yʌlob. Yaʼ ti radio yicʼot ti televisión an muʼ bʌ i cʼʌñob tsucul tʼan yicʼot chiste tac ñumeñix bʌ ti pʼis chaʼan miʼ tijicñesañob jiñi quixtañujob. Pero maʼañic i cʼʌjñibal jiñi. Añix cheʼ bʌ chaʼpʼejl mil jab, Pablo tsiʼ choco majlel jumpʼejl carta chaʼan jiñi xñoptʼañob yaʼ ti Colosas baqui tsiʼ yʌcʼʌ ticʼojel chaʼan maʼañic miʼ cʼʌñob «bibiʼ tʼan» (Colosenses 3:8). Jiñi hermanojob yaʼ ti Éfeso tiʼ tsʼijbubeyob jaʼel: «Mach yomic [...] bibiʼ laʼ tʼan» (Efesios 5:3, 4).

¹⁰ Jiñi bibiʼ bʌ tʼan miʼ yʌcʼ ti wajlentel Dios. Jin chaʼan, joñonla mi lac tsʼaʼlen yicʼot maʼañic mi laj cʼʌn cheʼ bʌ tʼan jiñi. La cujilix chaʼan miʼ mejlel ti cʌjñel bajcheʼ «bibiʼ [bʌ]», loqʼuem bʌ tilel jaʼel ti lac «tsucul pusicʼal» tsʼaʼlebil bʌ i chaʼan Pablo (Gálatas 5:19-21). Yom mi lac chʼʌm ti ñuc jiñi. ¿Chuqui miʼ caj ti ujtel tiʼ tojlel jiñi muʼ bʌ i wen mulan i yʌl chaʼan tsʼiʼlel o bibiʼ tac bʌ, tajol jamʌl tsiquil mi yʌl o cheʼ mi yʌl tʼan tac chaʼchajp bʌ i sujmlel? Ñaxan mi caj i  wen tijqʼuel. Mi mach yomic i cʌy i mul o mach yomic i tojʼesan i bʌ mi caj i chaʼlentel ti expulsar yaʼ ti congregación. *

11, 12. a) ¿Baqui ora mach weñic miʼ yʌjlel chuqui ujtem tiʼ tojlel juntiquil? b) ¿Chucoch mach weñic mi lac chaʼlen jopʼtʼan tiʼ tojlel yambʌ lac piʼʌl?

¹¹ Tʼan tiʼ tojlel yambʌ yicʼot jopʼtʼan. Tajol maʼañic i wocolel cheʼ bʌ juntiquil mi yʌl chuqui wem bʌ tiʼ tojlel yambʌ, cheʼ bajcheʼ tiʼ tojlel juntiquil tsaʼ jaxto bʌ i chʼʌmʌjaʼ o juntiquil yom bʌ coltʌntel. Jiñi xñoptʼañob ti ñaxam bʌ siglo miʼ qʼuelob ti ñuc i yermañojob i wen jach chuqui miʼ yʌlob tiʼ tojlel yañoʼ bʌ (Efesios 6:21, 22; Colosenses 4:8, 9). Mach bʌ yomic mi lac mel jiñʌch cheʼ mi lac socben i sujmlel chuqui miʼ yʌjlel tiʼ tojlel yambʌ o mi laj cʌl mach bʌ yomic mi la cʌl tiʼ tojlel juntiquil. Tiʼ melol jiñi, miʼ mejlel i pʌyonla majlel ti jumpʼejl tsʌts bʌ wocol: Jiñi jopʼtʼan, cʌmbil bʌ bajcheʼ «jopʼ mulil tiʼ tojlel yambʌ chaʼan mi la cotsan ti wocol o chaʼan mi lac bibʼesan wem bʌ i melbal» (Diccionario del español usual en México). Jumpʼejl ejemplo, jiñʌch cheʼ bʌ jiñi fariseojob tsiʼ jopʼbeyob i mul Jesús chaʼan miʼ yotsañob ti wocol (Mateo 9:32-34; 12:22-24). Tiʼ sujm, jiñi jopʼtʼan miʼ tech cabʌl michʼajel (Proverbios 26:20).

¹² ¿Bajcheʼ yilal miʼ qʼuel Jehová muʼ bʌ i yʌl mach bʌ isujmic tiʼ tojlel yambʌ o miʼ tech michʼajel? Mach weñic miʼ qʼuel. Miʼ tsʼaʼlen jiñi «muʼ bʌ i tʼox hermanojob ti aʼleya» (Proverbios 6:16-19). Yom cʼajal lac chaʼan, jiñi tʼan am bʌ ti griego, muʼ bʌ yʌl «jopʼtʼan», jiñʌch diábolos, muʼ bʌ i cʼʌjñel jaʼel chaʼan miʼ subentel Satanás bajcheʼ «Diablo», yom yʌl,  jiñi muʼ bʌ i chaʼlen «jopʼtʼan» tiʼ tojlel Dios (Apocalipsis 12:9, 10). Maʼañic majqui yom sujtel bajcheʼ «diablo» (bajcheʼ juntiquil xjopʼtʼan). Ti jumpʼejl congregación mach yomic an muʼ bʌ i chaʼlen jopʼtʼan tiʼ tojlel yambʌ i piʼʌl mi jiñic chuqui yom bʌ i tsucul pusicʼal, yaʼ ochem jaʼel jiñi «aʼleya» yicʼot jiñi muʼ bʌ i«tʼoxob i bʌ» (Gálatas 5:19-21). Mi an chuqui com la cʌl tiʼ tojlel lac piʼʌl, yom mi laj cʼajtiben lac bʌ: «¿Cujil ba chaʼan melelʌch jiñi? ¿Woli ba c pʌs cʼuxbiya mi tsaʼ j cʌlʌ jiñi? ¿Cʼʌñʌl ba miʼ ñaʼtan yañoʼ bʌ?» (pejcan 1 Pedro 4:15).

13, 14. a) ¿Bajcheʼ miʼ low quixtañujob jiñi leco bʌ tʼan? b) ¿Baqui bʌ wocol woliʼ yotsañob i bʌ jiñi muʼ bʌ i chaʼleñob leco bʌ tʼan?

¹³ Cʼux bʌ tʼan. Cheʼ bajcheʼ tsaʼ laj cʌñʌ, jiñi lac tʼan miʼ mejlel ti cabʌl lowoñel. Come xmulilonla, an i tajol mi laj cʌl mach bʌ weñic i ti wiʼil mi lac chaʼ mel lac pusicʼal chaʼan tsaʼ bʌ la cʌlʌ. Jiñi Biblia mi yʌl chaʼan an junchajp mach bʌ cheʼic yom mi lac chaʼlen tʼan yaʼ ti congregación mi jiñic to ti lac familia. Pablo tsiʼ tiqʼui jiñi xñoptʼañob: «Cʌyʌla ti junyajlel: tsʼaʼleya, michʼajel, aʼleya, michʼ bʌ tʼan» (Efesios 4:31). Ti jiñi tʼan tac, yaʼ ochen jaʼel jiñi wajleya, leco bʌ tʼan, tsʌts bʌ tʼan yicʼot muʼ bʌ yʌcʼ ti ñaʼtʌntel chaʼan maʼañix laj cʼʌjñibal. Jiñi alpʼeñelob, come maxto cabʌlic chuqui miʼ ñaʼtañob i wen yujilob cʼuxbiya, miʼ mejlel i ticʼlañob jiñi (Colosenses 3:21).

¹⁴ Jiñi Biblia miʼ tsʼaʼlen jiñi xjopʼtʼañob yicʼot mi yʌl chaʼan woliʼ yotsañob i bʌ ti tsʌts bʌ mulil. ¿Chuqui mi caj i chaʼlen jiñi ñʌmʌl bʌ i cʼʌn tʼan chaʼan miʼ low yambʌ yicʼot chaʼan miʼ yʌcʼ ti wajlentel i piʼʌlob? Ñaxan mi caj i wen tijqʼuel. Pero mi maʼañic miʼ jacʼ mi caj i chaʼlentel ti expulsar ti congregación. I ñumen wocol bʌ, miʼ mejlel i sʌt i cuxtʌlel ti i Yumʌntel Dios (1 Corintios 5:11-13; 6:9, 10). Tsaʼix laj cʌñʌ, mi la com chʌn ajñel tiʼ cʼuxbiya Dios mach yom mi la cʌl bibiʼ bʌ tʼan, mi lac chaʼlen lot, mi lac low yambʌ lac piʼʌl ti lac tʼan o mi la cʌqʼuen i chʼijiyemlel.

15. ¿Baqui bʌ tʼan miʼ mejlel i coltan yañoʼ bʌ?

¹⁵ ¿Bajcheʼ yom Jehová chaʼan mi laj cʼʌn lac tʼan? Yom cʼajal lac chaʼan, jiñi Biblia miʼ subeñonla chaʼan yom mi la cʌl tʼan «chaʼan mi laʼ pʼʌtʼesan jiñi [yañoʼ bʌ]» (Efesios 4:29). Wen tijicña miʼ yubin Jehová cheʼ mi lac chaʼlen wersa laj cʼʌn tʼan muʼ bʌ mejlel i coltan yicʼot i pʼʌtʼesan yañoʼ bʌ. Pero jiñi Tsʼijbujel tac maʼañic miʼ chʼʌm tilel jumpʼejl lista baqui mi yʌl tiʼ pejtelel jiñi «toj [bʌ] tʼan» (Tito 2:8). Chaʼan mi lac ñaʼtan mi jiñi tʼan woli bʌ laj cʼʌn mi caj i pʼʌtʼesan yañoʼ bʌ, an uxchajp bajcheʼ miʼ mejlel laj cʌn: Mi sʌcʌch, mi isujmʌch yicʼot mi woliyʌch i yʌjlel ti uts bʌ tʼan. Yom cʼajal lac chaʼan ili uxchajp cheʼ bʌ woli laj cʌn majlel cabʌl ejemplo tac (qʼuele jiñi recuadro « ¿Muʼ ba i pʼʌtʼesan yañoʼ bʌ bajcheʼ mic chaʼlen tʼan?»).

16, 17. a) ¿Chucoch yom mi lac suben wem bʌ tʼan jiñi yambʌlob? b) ¿Baqui bʌ wem bʌ tʼan yom mi laj cʼʌn yaʼ ti laj congregación yicʼot ti la cotot?

¹⁶ Utsʼat bʌ tʼan. Jehová yicʼot Jesús yujilob chaʼan wen an i cʼʌjñibal cheʼ mi lac suben yañoʼ bʌ chaʼan tijicñayonla tiʼ tojlelob yicʼot chaʼan wen chuqui miʼ melob (Mateo 3:17; 25:19-23; Juan 1:47). Jiñi xñoptʼañonbʌla cheʼ yom mi lac mel jaʼel. Cheʼ jaʼel, «jiñi [...] wen bʌ tʼan an cabʌl i cʼʌjñibal ti coltaya» (Proverbios 15:23). Cheʼ an majqui miʼ subeñonla chaʼan wen chuqui tsaʼ bʌ lac mele, miʼ yʌqʼueñonla lac tijicñʌyel yicʼot miʼ chʼejlʼesañonla. Wen cheʼ mi la cubin bajcheʼ jiñi come woliʼ qʼuelonla ti ñuc yicʼot chuqui woli bʌ lac mel. Jiñi miʼ pʌsbeñonla chaʼan añʌch i cʼʌjñibal cheʼ tsaʼ lac chaʼle wersa, miʼ pʼʌtʼesan jiñi ñopol bʌ lac chaʼan i miʼ ñijcañonla chaʼan tijicña mi lac chaʼlen eʼtel ti jujumpʼejl qʼuin. La cujil chaʼan ti lac pejtelel mi lac mulan cheʼ mi lac subentel chuqui utsʼat bʌ mi lac mel, ¿mach ba yomic mi lac subeñob yambʌ jaʼel? (Pejcan Mateo 7:12.)

 ¹⁷ Cheʼ mi lac ñʌntesan lac bʌ laj qʼuel chuqui wem bʌ miʼ mel yambʌ, tiʼ pejtelel ora mi caj lac taj chuqui yom bʌ mi lac suben. Jumpʼejl ejemplo, ¿chuqui miʼ mejlel laj qʼuel yaʼ ti congregación? Juntiquil wen utsʼat bʌ miʼ ñusan discurso, juntiquil xcolel woli bʌ i chaʼlen wersa chaʼan miʼ taj i yeʼtel yaʼ ti congregación o juntiquil hermano añix bʌ cabʌl i jabilel muʼ bʌ i chaʼlen wersa chaʼan miʼ majlel ti tempa bʌ anquese an i cʼamʌjel. Cheʼ mi lac suben chaʼan weñʌch chuqui tsiʼ mele miʼ cʼotelob tiʼ pusicʼal i miʼ pʼʌtʼesañob. ¿I bajcheʼ miʼ pʌstʌl ti la cotot? Jiñi ñujpuñemoʼ bʌ yom i yubiñob uts bʌ tʼan yicʼot muʼ bʌ i coltañob (Proverbios 31:10, 28). Jiñi alobob jaʼel yom miʼ pʌsbentelob chaʼan mucʼʌch i jacʼbentelob i tʼan yicʼot chaʼan miʼ cʼuxbintelob. I cʼʌjñibal miʼ subentelob chuqui wem bʌ tsiʼ meleyob, lajal bajcheʼ jiñi alʌ teʼ i cʼʌjñibal i chaʼan jiñi jaʼ yicʼot qʼuin. Jin chaʼan, jiñi tatʌlob yom miʼ qʼuelob chuqui wem bʌ miʼ melob i yalobil chaʼan miʼ mejlel i subeñob chuqui wem bʌ tsiʼ meleyob i miʼ yʌqʼueñob i tijicñʌyel. Cheʼ bajcheʼ iliyi mi caj i wen tajob i tijicñʌyel i mi caj i pʼʌtʼesañob, cheʼ jaʼel mi caj i ñumen chaʼleñob wersa i melob chuqui yomob.

18, 19. ¿Chucoch yom mi lac chaʼlen wersa lac tijicñesʌben i pusicʼal la quermañojob yicʼot mi lac suben tʼan muʼ bʌ i coltañob chaʼan miʼ chaʼleñob wersa, i bajcheʼ yom mi lac mel?

¹⁸ Tʼan muʼ bʌ i coltañonla yicʼot muʼ bʌ i ñuqʼuesan lac pusicʼal. Jehová yom chaʼan wen miʼ yajñel «jiñi uts bʌ» yicʼot jiñi «am bʌ i wocol» (Isaías 57:15). Jiñi Biblia miʼ subeñonla: «Ñuqʼuesʌben laʼ bʌ laʼ pusicʼal [...]. Ñuqʼuesʌbeñob i pusicʼal jiñi cʼuñoʼ bʌ» (1 Tesalonicenses 5:11, 14). La cujil chaʼan Jehová mucʼʌch i qʼuel ti ñuc tiʼ pejtelel chuqui mi lac mel chaʼan mi laj coltan yicʼot mi lac ñuqʼuesʌben i pusicʼal jiñi cʼuñoʼ bʌ.

¹⁹ ¿Chuqui miʼ mejlel lac mel tiʼ tojlel juntiquil hermano chʼijiyem bʌ o maʼañix bʌ chuqui yom? Ñaxan yom mi lac suben muʼ bʌ i mejlel i pʼʌtʼesan. Anquese jiñi mach yomic yʌl chaʼan mi caj i tojʼesʌben i wocol, pero mach yomic laj  cʼojoʼtan. I cʼʌjñibal bʌ jiñʌch mi lac pʌsben chaʼan la com laj coltan yicʼot chaʼan la com wen miʼ yajñel. Cheʼ jaʼel, miʼ mejlel lac tem chaʼlen oración i mi laj cʼajtiben Jehová chaʼan miʼ pʌsben chaʼan mucʼʌch i cʼuxbintel ti yañoʼ bʌ yicʼot ti Dios (Santiago 5:14, 15). Yom mi lac suben chaʼan mucʼʌch i qʼuejlel ti ñuc yaʼ ti congregación yicʼot miʼ cʼuxbintel (1 Corintios 12:12-26). Yom miʼ pejcʌbentel jaʼel jumpʼejl texto baqui miʼ yʌqʼuen i cʼajtesan chaʼan mucʼʌch i cʼuxbintel ti Jehová (Salmo 34:18; Mateo 10:29-31). Mi mucʼʌch la cʌqʼuen i yorajlel chaʼan mi lac suben «wen bʌ tʼan» loqʼuem bʌ ti lac pusicʼal, mi caj i yubin chaʼan mucʼʌch i cʼuxbintel yicʼot miʼ qʼuejlel ti ñuc (pejcan Proverbios 12:25).

20, 21. ¿Chuqui uxchajp muʼ bʌ i coltañonla chaʼan wen miʼ yʌjqʼuel jiñi ticʼojel?

²⁰ Wem bʌ ticʼojel. Come xmulilonla ti lac pejtelel, an i tajol yom mi lac subentel chuqui yom mi lac mel. Jin chaʼan jiñi Biblia miʼ subeñonla: «Ñʌchʼtan wen bʌ tʼan [o ticʼol]. Acʼʌ ti a pusicʼal j cʌntesʌbal. Cheʼ jiñi mux a taj cabʌl a pusicʼal» (Proverbios 19:20). Jiñi ancianojob yaʼ ti congregación miʼ subeñoñobla tʼan muʼ bʌ i coltañonla. Pero mach cojach jiñi ancianojob chajpʌbilob chaʼan miʼ melob jiñi eʼtel. Jumpʼejl ejemplo, jiñi tatʌlob yom miʼ cʌntesañob i yalobil  ti chuqui wem bʌ (Efesios 6:4). Cheʼ jaʼel, jiñi hermanajob añobix bʌ cabʌl i ñaʼtʌbal tiʼ chaʼan bʌ Jehová miʼ mejlel i yʌqʼueñob ticʼojel jiñi xchʼocob maxto bʌ cabʌlic i jabilelob (Tito 2:3-5). Come an laj cʼuxbiya ti tojlel lac piʼʌlob, yom mi lac chajpan bajcheʼ yilal bʌ tʼan mi caj lac suben juntiquil chaʼan maʼañic miʼ lojwel. Mi caj laj qʼuel uxchajp muʼ bʌ caj i coltañonla laj cʌcʼ wem bʌ ticʼojel: Cheʼ la cujil chucoch woli laj cʌcʼ, cheʼ añʌch baqui chucul yicʼot wen jach bajcheʼ yom miʼ yʌjqʼuel.

²¹ Ñaxam bʌ jiñʌch chucoch woli laj cʌcʼ. ¿Chuqui mi caj i coltañonla chaʼan wen mi lac jacʼ muʼ bʌ lac subentel? Cheʼ mi lac ñaʼtan chaʼan woli lac subentel jiñi tʼan chaʼañʌch mi laj cʼuxbintel i mach chaʼañic jach miʼ bajñel cʼuxbin i bʌ jiñi woli bʌ i yʌcʼ. Jin chaʼan, cheʼʌch yom mi lac mel jaʼel cheʼ mi la cʌcʼ ticʼojel. I chaʼchajplel jin cheʼ chucul tiʼ Tʼan Dios jiñi muʼ bʌ la cʌl (2 Timoteo 3:16). Tiʼ pejtelel chuqui mi la cʌl yom chucul ti Biblia, mi lac pejcʌben yaʼi o maʼañic. Jiñi ancianojob wen tsajilob chaʼan mach cheʼic miʼ melob cheʼ bajcheʼ miʼ bajñel ñaʼtañob. Maʼañic miʼ qʼuextañob bajcheʼ mi yʌl jiñi texto am bʌ ti Biblia chaʼan miʼ yʌlob chuqui miʼ bajñel ñaʼtañob. I yuxchajplel yom miʼ yʌjqʼuel jiñi ticʼojel cheʼʌch bajcheʼ yom. Mi woliyʌch la cʌcʼ yicʼot laj cutslel i mi lac chʼʌm ti ñuc chuqui miʼ ñaʼtan jiñi yañoʼ bʌ, mach wocolic mi caj i jacʼob (Colosenses 4:6).

22. ¿Bajcheʼ yom mi laj cʼʌn jiñi lac majtan tsaʼ bʌ aqʼuentiyonla?

²² Jiñʌch jumpʼejl ñuc bʌ majtañʌl cheʼ Jehová tsiʼ yʌcʼʌ chaʼan mi lac mejlel ti tʼan. Come mi lac wen cʼuxbin lac Tat am bʌ ti panchan, jin chaʼan la com laj cʼʌn ti wen. Mach yomic miʼ ñajʌyel lac chaʼan, jiñi tʼan muʼ bʌ la cʌl miʼ mejlel i pʼʌtʼesan o i cʼunʼesan jiñi yañoʼ bʌ. Tiʼ pejtelel ora yom mi laj cʼʌn cheʼ bajcheʼ yom Jehová: «Chaʼan mi laʼ pʼʌtʼesan jiñi [yañoʼ bʌ]». Mi caj i tajob cabʌl bendición lʌcʼʌl tac bʌ añob la quicʼot, i cheʼ jaʼel, mi caj lac mejlel ti chʌn ajñel tiʼ cʼuxbiya Dios.