1-3. a) ¿Ibu ibmar Jehová anmarga nasisa, geb igi anmar we ibmar ebudii gubie? b) Anmar abesundibe Bab Dummad anmar sabgumai guedi, ¿igi anmar sunmagdii guoe?

BE AI nuedga be aggan ugsasundibe, geb be iddoalir be ai yogasaar aggan ebudiye, geb agga emar nagbi saedga aggan ebudibarye, ¿igi be iddosale? Be binsasaler gebed, ibigala an ega aggan ugdibeye.

² Jehová, anmarga “bela ibmar nuegan” ugmamogad (Santiago 1:17). Anmar nabir sunmagdii guega, Jehová anmarga gwabin nasisad, ibmar durgandi degi imaggarsurmalad. Degi inigwale sun gwabin, agganyobi emar nagbi saedga ebulemogad. Emi ibagi dulemar urwedgi emarga sunmaggusmalad, emar nagbi saedgi binsasurgusmalad. Degsoggu, Jehová nunmag iddomamogar gebed, dulemar yogasaar gwabin duggu ebudimaladba.

³ Anmar abesundibe Jehová anmar sabgumai gued, anmar Biblia sogedba igar imagger gebed. Aaga Bibliagi soglenaid: “Gaya isgana mer be sunmaggo. Unnila be gaya nueganbi sunmaggo, adi, nabir be dule[mar] baigan ogannogega, baigan be iddobugmalad yeer iddo be imaggegar” (Efesios 4:29). Degsoggu anmar durdaggoena, igi anmar sunmagged abelesuli, geb igi anmar nued gwabin duggu ebudii gusbalile. Auggi we  igargi sunmagged iduale, bin anmar durdaggoloed, ibigala nuedi anmar na gwabin bargaed.

4, 5. Proverbiomargi ¿igi soglenanai dule sunmadele igi sun dule baid imagge?

⁴ Soggwengi, anmar sunmagged yeer gangusoggua, aaga anmar na gwabin bargaed abeleged. Aaga Proverbios 15:4 gine sognaid: “Gaya burba gwage gadi gadi imaggedi, ina nuediyobid. Gaya burba isganadina, emarga gwage naibid ugged”. Degsoggu dule nuedgi emarga sunmaggele, e abinnid nued iddomogoed. Auggi dule sabsur emarga ibmar sogerdina, yeer emar wioged. Degsoggu, anmar sunmaggedba sun anmar dulemar bendagged, sulirdi, anmar dulemar wiogodibe (Proverbios 18:21).

⁵ Proverbios 12:18 gine anba soglenabalid dule sunmadele igi emar imagge: “Dule yogasaar sunmaggedi, es suidse nagbigulegeyob emar imagged”. Degsoggu, dule dagge daggesur sunmaggele, yeer emar wioged, sun agga e aimar egi bangudbaloed. Degsoggu mag iddolleged, anmar emarga urwedgi ibmar sogele, esgi anmar  emar yaalu imagnaiyobid. Proverbiosgine soglenabalid: “Dule binsaed niggarbad e sunmaggeddina, ina nuedyob gued”. Dule Bab igar sogedba igar imaggele, binsaed niggaa sunmagdioed. Nuedgi emarga sunmagdii guosoggu, dule wile iddodiile, basur iddo imaggoed, wis igar gwaddirisale, igar onugubaloed. Bela anmar wisidbiid dule urwedgi emarga sunmagsurdaele, e abinnid nued iddomogoed (Proverbios 16:24 absogo). Anmar sunmagged yeer gangusoggua, aagala, anmar nue daggoed, igi anmar gwabin duggu ebumogoe, mer emar nagbi imaggega.

6. ¿Ibigala anmarga undar guardae gwabin duggu bargaega?

⁶ Sogbogi, anmar bela noedbibarsoggua, aagala anmar na gwabin duggu bargaed abelebalid. Bibliagi soglenaid, dulemar “e gwagegi unnila isguedginbi binsadimar[ye]”, ar anmar, anmar gwagegi ibmar naid sogdedasoggua, aaga, anmarga undar gudaed gwabin duggu bargaega (Génesis 8:21; Lucas 6:45). Anmar geg nueggwa gwabin duggu bargae inigwale, soglesulid geg bargaleye (Santiago 3:2-4 absogo). Degsoggu nabir anmar na gwabin duggu bargaega, burwa binnasur gormaid abin gamminaiyobi, anmar alamagnair gebed.

7, 8. ¿Anmar sunmaggedba, igi sun Jehová iddomaoe?

⁷ Sogbaagi, ar Jehová anmar dagmabarsoggu, aaga anmar na gwabin duggu bargaed abelebalid. Anmar sunmaggedba unnila anmar dulemar bamaladbii nagbi oiddosulid, sun anmar Jehová wile oiddobalid. Aaga Santiago 1:26 gine sognaid: “Ar dule wargwen Bab Dummad igarba nue nanadiiye binsaele, degi inigwele, na wissur gwabin bargaele, na duggin yardagdiid. Bab igar wisye sogdiid, binsa gordido”. Capítulo nasadgi anmar durdasad, dule sabsur emarga sunmaggele, sun Bab Dummad aa dulegi banguye. Anmar sabsur emarga  ibmar sogdaele, anmar inanusu midiiyob gusaled, degiile Jehová nued anmar daggosulid. Degsoggu mer dagge daggesur sunmagdii guo (Santiago 3:8-10).

⁸ Anmar ibmar sogbaa durdasad, ibigala anmar na gwabin duggu bargaed abelege. Emidi anmar durdagbaloed, igi anmar sunmagged abelege, geb igi anmar sunmagged abelesurbali.

9, 10. a) ¿Emi ibagi dulemar igi sunmaggusmala? b) ¿Ibigala nisaar sunmagged nuedsuli? (Urba naid daggo.)

⁹ Mer nisaar sunmaggo. Emi ibagi dulemar gadi emar ogaggansagusmalad, gaya nued gorsurgusmalad geb nisaar sunmaggusmarbalid. Aaga anmar iddoardaed dulemar uludele, gaya nued gorsurmala, geb nisaar goddedamarbalid, na buled imaggega. Películagi emar oallemaladbela, emar oallega, gaya nued gorsurdamarmogad. Anmardi we ibmarga allesii gubisulid. Birga milibogussaar Pablo Colosasginmaladga garda narmasmogad, sogega ibigala Jehová nued dagsuli “nisaar sunmagged” (Colosenses 3:8). Éfesoginmaladga weyob narmasbalid: “Gaya isganase baggale, mer egi [...] sunmagma[lo]” (Efesios 5:3, 4).

¹⁰ Jehová nued dagsulid dule nisaar sunmagged. Aaga anmar nued dagsurmogad nisaar sunmagleged, geb anmar nisaar sunmagbisurmogad. Pablo sogsad nisaar sunmaggedi, “galagwensuli sunnasur [sunmaggedye]” we ibmala, ‘ibmar nuedsurye’ (Gálatas 5:19-21). Degsoggu, anmar bibbisaar nisaar sunmagdi gubisurmogad. Auggi, ¿igi imaglegosunna dule emar abargi bingesur nisaar sunmagdaer, geb gaya nued gorsurdabalir? ¿Igi imaglebaloe, dule baggar buud gaya isgana sogsurdaerdi, auggi wis odugguaggwa sogdaer? We dulese gorlegoed ega sogega  wegi sunmagged nuedsurye. We dule degi sunmagged indagbisulile, onolesunnoed. *

11, 12. a) ¿Igi anmar nuedgi sunmagdii gusale? b) ¿Ibigala nuedsuli emar nug oisguega emar ogaggansaed?

¹¹ Mer emargi sunmaggo, geb mer emar ogaggansabalo. Anmar emarga sogele we dule bautizar imasye, we gwenaddi wis bendagged abeleye, we igargi anmar emarga sunmaggele issaggwasulid. Deyob ebbenne siglo I gine gwenadgan nagi nued sunmagdidii gusmalad, nagi issaggwa binsadidii gussurmalad (Efesios 6:21, 22; Colosenses 4:8, 9). Emargi issaggwa sunmaggeddina, geb emar ibmar imagdiidgi yogasaar sunmaggeddina, igar nuedsulid. Gadi anmar emargi sunmagdaele, sun anmar emar ogaggansassunnoed. Diccionario de la lengua Kuna, Jesús Erice gine sognaid emar ogaggansaedi “gagganba emar nug issoged[ye], emargi agumagged[ye]”, wegi daed boni bibbisulid. Be daggena, Fariseomar, Jesús ogaggansadii nanasmalad, Jesús nug oissogega (Mateo 9:32-34; 12:22-24). Degsoggu mag dagleged dule emar ogaggansaedgi arbaele, emarga urwed amigedid (Proverbios 26:20).

¹² Jehová nued dagsulid, dule emar nug oissogega emar ogaggansaed. Jehová isdar dagbalid dulemar na “gwenadgan ourwe[malad]” (Proverbios 6:16-19). Dule gadi “gaggansaedi”, griego gayaba sogleged, diábolos. Aaga Niagine sunmagledele, wag gayaba sogledaed “Diablo”, ar Nia, Jehová nug oisgudiid (Apocalipsis 12:9, 10). Degsoggu anmar bibbisaar gaggan dulega gubisulid, deyob anmar daele, anmar “niayobi” dae gusaled.  Aaga, anmar abargi abelesulid dule emar nug oisguega emar ogaggansaed, abelesurbalid dulemar na “abin abin imagmalad”, geb dulemar na “abin abin urwemalad” (Gálatas 5:19-21). Degsoggu, anmar emargi sunmagged iduale, anmar we ibmargi binsabied: “¿An ibmar sogsoggalid gaggansurdibe? ¿An we ibmargi emarga sunmadele, bule mag daglegodibe an nue emar sabe? ¿Ar nue abeledibe dule baid we ibmar wisgumogad?” (1 Tesalonicenses 4:11 absogo).

13, 14. a) ¿Ibigala nuedsuli gannarba emarga ibmar soged? b) ¿Ibigala boni bibbisuli gannarba emarga sunmagged?

¹³ Mer gannarba emarga ibmar sogo. Bela anmar wisidbiid, anmar na iddossuli sunmadele, sun anmar emar wioged. Bela anmar noedbisoggu, inbaggwa anmar sorba na iddodagoed an noar ibmar sogsa. Aagala, Bibliagi anmarga soglenaid igi anmar neguyagi sunmagged abelege, geb igi anmar, anmar sordaganga sunmagged abelebali. Apóstol Pablo sogsad: “Bemargi, bela isdar iddoged, sae iddoged, urwed naid, binnasur aimarse urwed, dulemar uggabsaed, [...] osulomarsun” (Efesios 4:31). “Dulemar uggabsaed[gi]” sunmagledgua Bibliamala weyob dulesig nasismalad: “Dulegin isdar sunmaggedye”, “niagwa sunmaggedye”. Degsoggu, weyob sunmaggedi, ibgwensur emar imaggedi, sabsur emar imaggedi, yeer dule baid wioged. Burwiganar bur buledo, ar burwigandi gadi emarse binsaed galesoggua, deyob ega ibmar sogledele, nabirye bidamaloed (Colosenses 3:21).

¹⁴ Bibliagi soglenaid igar nuedsurye, dule baidgi issaggwa sunmagged, sognabalid dule degi gudiile boni bibbisurye. ¿Igi yoogidse gumaloe, dulemar, emar ourwega sabsur emarga ibmar sogmalad, dulemar issaggwa emar nig sunmagmalad, geb dulemar sabsur emar imagmalad? Bali bali ega soglegoloed wegi daed nuedsurye, dule  aabali igar imagbisulile onolesunnoed. Dulemar degi damaladi yoogidse Bab Reinogi gudiguosurmalad (1 Corintios 5:11-13; 6:9, 10). Degsoggu, Jehová anmar sabgumai guega, mer anmar ibgwensur emar imagger gebed, mer anmar gaggansadii gubalir gebed, geb mer anmar emar ourwedii gubalir gebed. Degsoggu, anmar gannarba emarga ibmar sogdii gubisulid.

15. ¿Igi nabir nuedgi anmar gwenaganga sunmasale?

¹⁵ Jehová abeged, anmar “unnila [...] gaya nueganbi” emarga sunmagged (Efesios 4:29). Jehová yeer iddodaed anmar nuedgi emarga sunmagdaer. Auggi Bibliagi igar ileggwa nasulid, weyob weyob be sunmaggoye, geb we ibmar we ibmar be sogoye, soglegega weyob ‘nuedgi’ emarga sunmagleye (Tito 2:8). Anmar wisguega anmar emarga sunmader nuedgi sunmagdadibe, we ibmargi anmar binsaed abeleged, an emarga sunmader: an gaya isgana gorsurdadibe, an gaggansasurdabardibe, an nuedgi emarga sunmagdibe. Emisgi anmar we igarmargi wis burwi burwi sunmaggoloena, nued gwenaganga sunmagdii guega (recuadro “ ¿Be nuedgi emarga sunmagdadibe?” aagi naid dagbalo).

16, 17. a) ¿Ibigala nuedi, emarga soged be nued ibmar imagnaye? b) ¿Anmar sordagan ibmar nued imagnanaidba, ibu anmar ega sogoe, geb igi anmar neguyagi deyob imasbalile?

¹⁶ Na ogannodii gumalo. Jehová wisid, anba Jesús wismogad, bela anmar abegedbii, dule anmarga soged, be we ibmar nued imagnaye (Mateo 3:17; 25:19-23; Juan 1:47). Degsoggu, anmar emar ogannodii gubimogad. Aaga Bibliagi soglenaid: “Ibmar nued soglegedi, e ibagi sogledele, bur bule nuedid” (Proverbios 15:23). Dule wargwen anmarga sogsale, be nued ibmar imagnaye, anmar yeer iddodaed. Degsoggu dule wargwen nued anmargi  binsaedba anmarga sogele, be nued we ibmar imagnaye, gwendi anmar yeer iddogosurde. Degsoggu, dule deyob anmarga sogele, anmar binsadagoed, gwen an binsa alamassurdagleye, anmar bur balibulos arbadsunnoed. Bela anmar abegedbisoggua, dule anmarga wis soged, be nued ibmar imagnaye, degsoggu, anmar baiganga soge wilubmogad, be nued ibmar imagnaye (Mateo 7:12 absogo).

¹⁷ Anmar sordagan ibmar nuegan imagdiidginbi anmar addagdaele, anmarga ibgwensur guoed ega sogega, be ibmar nued imagnaye. Anmar sordagan ibmar nuegan imagdidimogad. Anmar sogoena, sun dule wargwen plataformagi gwissi nued Bab igargi anmar odurdagged, sun massigwa walagwen alamagnailed, nueggwa Jehovágala arbaega, sun dador wargwen bonigan abargi igar iddogedse nanaed iggudisulid, anmar wemarga sogele bemar nued imagnaye, wemar ibigwensur Bab igargi banguosurmalad. Anba neguyagi, omegan abemogad e sui ega soged, be nued ibmar imagnaye, anba massered abemogad, e ome deyob ega sogmogad (Proverbios 31:10, 28). Mimmigan abemarmogad e sergan ega sogmalad bemar nued ibmar imagnaye. Degsoggu, babgan, mimmiganga sogdii gumalo, bemar nued ibmar imagnanaye, degibi burwiganga soglediile, burwigan bur bule ibmar nuegan imadmaloed.

18, 19. ¿Ibigala anmar alamagnai gubie anmar gwenagan ogannogega, geb igi anmar nabir deyob imasale?

¹⁸ Emar ogannogo. Jehová dule “gwage eiggwaa” gudiid, geb dulemar “buggib binsadimalad” wile dagmaid (Isaías 57:15). Bibliagi sognaid: “Na be mudsub mudsub ogannomarsun [...]. Gwage nollo gudimalad oganno[malo]” (1 Tesalonicenses 5:11, 14). Anmar emar ogannogega alamagdiile, Jehová nued anmar dagmaoed.

 ¹⁹ Anmar sorda wargwen wis wile iddodiile, ¿ibu anmar imaggoe? Wis anmar ebo sunmagged abelegoed, auggi soglesulid anmar ega igar onuguoedye. Bur we dule wisgued abeleged anmar e iedisurmoga. Geb nabir be we dulebo Babse gorbalid, we dule mer iegega Jehová wile e dagmai, anba anmar wile e dagmoga (Santiago 5:14, 15). Anmar ega sogbaloed bela gwenagan wile be dagmarmoye (1 Corintios 12:12-26). Anmar, soggwen Bibliagi ega amibaloed, ega sogega Jehová nue be sabgumaye (Salmo 34:18; Mateo 10:29-31). Anmar, “gaya nued”, gwenad buggib binsadiidga sogdibe, we dule mag iddogoed anmar nue e sabe (Proverbios 12:25 absogo).

20, 21. Emarga anmar binsaed dagsoggalir, ¿ibu ibmar sogbaa anmar nabir imasale dulemar anmarba igar imaggega?

²⁰ Binsaed nuegan daggo. Bela anmar noedbisoggua, ibagwengi anmar abedamogoed dule wargwen wis anmarga binsaed dagged. Aaga Bibliagi soglenaid: “Bega binsaed uglegedi, be iddoge. Be unaedi mer be isdar iddoge, ar dule binsaed ibedga be guoed” (Proverbios 19:20). Unnila gwenagan idudimaladbi sordaganga binsaed dagsulid. Babgan na mimmiganga binsaed dagge dagleardamogad (Efesios 6:4). Anba omegan sergan gudimaladi anba nabir nusganaganga binsaed dagmogad  (Tito 2:3-5). Anmar nue gwenagan sabedbali, nuedgi anmar gwenaganga binsaed dagdaed, mer anmar abin isdar iddomalaga. Nabir anmar nuedgi gwenaganga binsaed daggegala, we ibmargi anmar binsaoed: ibigala an emarga binsaed dagbidae, bia anmar binsaed nuegan ega amigoe, geb igi an ega ibmar sogoe.

²¹ Soggwengi, anmar emarga binsaed daggega, anmar wisir gebed ibigala anmar emarga binsaed dagbie. Be binsaena, ¿dule igi bega binsaed dagnaile, be eba ibgwensur igar imasale? Be wissundibe we dule be sabedba bega binsaed dagnai, isdar iddogedbarsuli, geb ibmar soggwen binale gunasurbali, ibigwensur be eba igar imasaled. Degsoggu, be emarga binsaed daggalile, deyob be imagged abelemogad (2 Timoteo 3:16). Sogbogine, anmar emarga binsaed nued daggega, Bibliagi igarmar mamaidba anmar ega ibmar soger gebed. Idudimalad nueggwa we ibmargi binsaed abelemalad, mer e binsaedba gwenagan ounaega. Abelesulid idudimalad, e iddosiid binsaed gaega, Bibliagi ibmar soggwen naid yomo e binsaedba sogmalad. Sogbaagi, anmar nueggwa dagbaloed igi anmar sunmaggoe binsaed dagder. Anmar nuedgi binsaed daggele, mag dagledo anmar ibgwensur gwenagan imagsuli, degiile nabir anmarba igar imagmaloed (Colosenses 4:6).

22. ¿Igi anmar gwabin duggu ebudii gubie?

²² Jehová, nued anmargi binsaedba anmarga gwabin duggu nasisad, nabir anmar sunmagdii guega. Anmar Jehová sabsoggua, dagge daggesur anmar sunmagdii gubisulid. Anmar ieged abelesulid, anmar sunmadele, sun anmar emar ogannoged, sulirdi agga sun anmar emar wioged. Degsoggu, anmar sunmadele: “Nabir [...] dule[mar] baigan ogannogega” anmar Jehová sogedba sunmagbied. Degi anmar ibmar imagdiile, anmar nued gwenagan bendagdii guoed, geb Jehová anmar sabgumai gumogoed.