1-3. (a) Nemene la ketre ahnahna hnei Iehova hna hamëne koi së, nge tune kaa la aqane troa huliwane menune ej? (b) Maine easa thele troa lapa qale catre ngöne la ihnimi Akötresie, nemene la nyine troa kuca ngöne la easa xome la ahnahna cili, ene la hna ithanata?

MAINE hnei nyipunieti hna hamëne la ketre ahnahna kowe la ketre atr hnei epuni hna hnim, nge thë ju hi angeice troa xanadron, nemene ju hë la mekuna i epun? Maine hnei epuni hna hamë loto, nge thupene lai epuni a atre laka, angeic a nyinyapëne qena hmon nge eatre hë la itre xaa atr hnei angeic. Hapeu, tro kö epuni a madrine la aqane ujë i angeic?

² Ame la troa atreine ithanata, tre, ketre ahnahna lai qaathei Iehova, lo Atre Hamëne la “nöjei ahnahna ka loi asë.” (Iakobo 1:17) Ame la ahnahna celë hna hamëne kowe la itre atr, tre, kola asisitrianyi së hune la itre öni; thaa nyine tro hmekuje kö a aijijë së troa qaja amamane la itre mekuna së, ngo kola hane aijijë së troa fe koi itre xan la itre aliene la hni së. Ngo tune la loto, atreine hi troa huliwane menun e itre xaa ijin. Ame fe la aqane ithanata së, e huliwane menune hë së, tre, hace koi Iehova, nge hleuhleu me akötre fe koi itre xan!

³ Maine easa ajane troa lapa qale catre ngöne la ihnimi Akötresie, nyipi ewekë tro sa xome la ahnahna, ene la hna ithanata, ngo loi e tro pe a ce nine memine la hna amekötine hnei Atre Hamën. Iehova a amamane hnyawa la pengöne ithanata ka amadrinë Nyidrë. Kola qaja hnene la Wesi Ula, ka hape: “The xulu kö qa ngöne la ite ukeineqë i nyipunie la tenge ka sis, ngo loi pe la tenge ka loi, la nyine troa eamon, mate aciane la loi koi angete deng.”  (Efeso 4:29) Loi e tro sa ithanatane la kepine matre nyipi ewekë tro sa atreine hnöthe la aqane tro sa ithanata, me itre trenge ithanata nyine tro sa thipetrij, memine la aqane tro sa hamëne la itre trenge ewekë ka “loi . . . la nyine troa eamon.”

4, 5. Tune kaa la aqane amamane hnene la itre xaa edromë qa hnine la Tusi Hmitrötr, la ecatren me emenene la itre trenge hna ithanata?

⁴ Ame la ketre kepine ka tru ka upi së troa thupëne la aqane ithanata së, tre, hnene hi laka, ame la itre trenge ewekë, tre, tro fe itre ej a hane hetre menen. Kola qaja ngöne Ite Edomë 15:4 ka hape: “Ame la sesepeneqë ka menyik, te, sinöe ne mel ; ngo ame la kola ewekë aqalin, te, ate anyilanyilane la hni.” Tune la timi a aciane hmaca la isinöe ka tro ha fitr, haawe, ijije hi tro la itre trenge ithanata ka menyik a akeukawane la hni. Ngo ame pe itre trenge ithanata menu, kola akötrën me thaipiën la itre xan. Celë hi matre, atreine hi tro la itre trenge ewekë hne së hna qaja a ameune maine akötrëne pena la itre xan.—Ite Edomë 18:21.

⁵ Hnene la ketre edromë hna qaja la emenene la itre trenge ewekë, me hape: “Hetete ewekë kösë hna thine hnei taua.” (Ite Edomë 12:18) E tro pane hë la itre trenge ewekë nge pi mekune pë hë, thaa tro kö lai a pë ethane e kuhu hni ne la ketre atr, nge kolo ketre aqane ujë lai ka thë la lapa ka caas. Hapeue hna hane kö akötrëne la itre hni nyipunie hnene la ketre trenge ewekë, ceitune me kola thin hnei hele? Haawe, nyine loi pe koi së la hna qaja ngöne  la pune lai hna edromën kola hape: “Nyine ameune la sesepeneqe ne la ate ka inamacan.” Celë hi matre, atreine hi tro la itre trenge ewekë ka xulu qaathene la atre catre melëne la inamacane qaathei Akötresie a ameune la hni ka akötr me acatrene hnyawa hmaca la itre aqane imelekeu së. Eue la kola ameun la hni epun hnene la itre trenge ewekë ka menyik? (Ite Edomë 16:24) Maine atrehmekune hë së laka, ka hetre menene la itre trenge ewekë hne së hna qaja, haawe, loi e tro sa thele troa iëne la itre trenge ithanata ka troa ameune ngo thaa itre ka tro kö a iakötrë.

6. Pine nemen matre ketre huliwa ka tru la troa xome hnöthe la sesepeneqë së?

⁶ Eje hi lai laka thaa ka hmaloi kö e tro pala hi a xome hnöthe hnyawa la sesepeneqë së. Celë hi hnaaluene kepine matre nyipi ewekë tro sa hetre xou me thupën la aqane tro sa ithanata: Hnene laka atr ka ngazo së, haawe, canga saqe së hi huliwane menune la sesepeneqë së. Ka xulu qa kuhu hni së la itre trenge ewekë hne së hna qaja, nge ka “ngazo la aja ne la hni ate.” (Genese 8:21; Luka 6:45) Qa ngöne lai, thaa nyine tro kö sa sixane la tro sa xome hnöthe la sesepeneqë së. (Iakobo 3:2-4) Ngacama thatreine kö tro pala hi sa xome acone hnyawa la sesepeneqë së, ngo ame pe ijije hi tro sa thele troa huliwane hnyawa ej. Tune la atr ka aj e kuhu hnagejë a isi me thelec, haawe, tro fe sa catre cile kowe la ngazo ka jilapa the së, wanga huli së pi troa huliwane menune la sesepeneqë së.

7, 8. Tune kaa la aqane tro sa isa qeje thiinan koi Iehova pine la itre trenge ithanata hne së hna qaja?

⁷ Ame la hnaakönine kepin matre nyipi ewekë tro sa thupëne la aqane ithanata së, tre, ene laka, tro së lo a isa qeje thiinane koi Iehova pine la itre trenge ithanata së. Thaa kolo hmekuje kö a hetre ethane la itre hne së hna qaja kowe la aqane imelekeu së memine la itre atr, ngo kowe mina fe la mele së xajawa i Iehova. Kola qaja ngöne Iakobo 1:26, ka hape: “Maine hete ate thei nyipunie kola mekune angeic’ a hmi, ngo tha kolo kö a hnöthe la thineme i angeic, nge kola amenune hnei angeice la hni angeice kö, hawe, ame la hmi ne la ate cili, te, gufa pë hë.” * Tune la hne së hna ce wange hë ngöne la meken ka tro pa hune la, ame la aqane tro  sa ithanata, sinatrongene hi la hmi së lai. Maine thaa hne së kö hna xomehnöthe la sesepeneqë së, ene la troa qaja la itre trenge ka akötr, me aqane ithanata ka iapoizinë, eje hi lai laka, ame asë hi la itre hne së hna troa kuca matre troa nyi hlue i Akötresie, tre, ka troa gufa xajawa i Nyidrë. Hapeu, thaa kolo kö lai a hmekë së troa thupëne hnyawa la aqane tro sa ithanata?—Iakobo 3:8-10.

⁸ Kola mama hnyawa laka, tru catre hnei kepin matre nyipi ewekë tro sa thupën wanga troa athixötrëne la ahnahna, ene la aqane ithanata së. Qëmekene tro sa ce wange la itre aqane ithanata ka lolo ka ithuecatre koi së, loi e tro sa pane ithanatane la ketre aqane ithanata nyine troa thipetrije hnene la nyipi Keresiano qa ngöne la mele i angeic.

9, 10. (a) Nemene la trenge ithanata ka eje ngöne la qe ne la itre atr enehila ngöne la fen? (b) Pine nemen matre nyipi ewekë tro sa thipetrije la qeje ka sis? (Wange ju fe la itre ithuemacanyi e cahu fen.)

⁹ Qeje trenge ka sis. Tru hi la trenge ka sisi me iqaqa ka lö pi qa ngöne la qe ne la itre atr enehila. Hnei itre xane hna qaja la itre ka qaja la itre trenge ka sis matre troa pi mama hnei aqane ithanata, ame hmaca pena itre xan, tre, thatre kö la hna qaja matre qaja menune ju hi la ketre hnepe hna ithanata. Itre ka kuci qene hnyima a qeje ka sis, me ithanatane la itre aqane kuci ngazo, matre troa ahnyiman la itre atr. Ngo thaa nyine ihnyimane kö la itre trenge ka sis. Celë hi matre hamëne pi Paulo aposetolo ekö la ketre eamo kowe la ekalesia ne Kolose, kola hape, troa thupëne matre thaa tro kö a “ewekë iethi.” (Kolose 3:8) Hnei Paulo hna qaja kowe la ekalesia ne Efeso laka, ame la “iqene hnyima” ka sis, tre, ‘thaa tro hmaca kö qaja hnene la’ itre nyipi Keresiano.—Efeso 5:3, 4.

¹⁰ Atre icilekeu me Iehova la ka qeje ka sis. Ka icilekeu fe memine la itre atr ka hnimi Nyidrë. Nyipici, ihnimi së koi Iehova la troa jele trije qa hni së la itre trenge ewekë ka sis. Ame ngöne la Paulo a e wengëne la “ite huliwa ne la ngönetei,” hnei nyidrëti hna qaja fe la “thina ka sis,” ene fe hi la aqane ithanata ka sis. (Galatia 5:19-21) Celë hi ketre ngazo ka tru lai. Ijije hi troa upetrije la ketre atr qa hnine la ekalesia, maine thaa ietrane kö angeic la thiina i angeic  ka ngazo, ene la troa majemine qeje trenge ka sis, memine la itre trenge ithanata qene tratraij nge ka iaö. *

11, 12. (a) Nemene la iqej, nge tune kaa la aqane troa hetre ethane ej thene la itre xan? (b) Pine nemen matre nyipi ewekë tro la itre hlue i Iehova a neëne la ixöjetrij?

¹¹ Iqej, me ixöjetrij. Ame la itre atr, pi tro catre angatr a qaja la aqane mele ne la itre xan. Hapeu, ka ngazo la troa hane qaja la itre xaa atr? Ohea, thaa ka ngazo kö e tro sa porotrikëne la itre ithuemacanyi ka lolo nge nyine ixatua, tune la kola qaja la ketre atr ka xötrei hane xome la bapataiso maine ka aja ithuecatre pena. Hna hane wanga atrune ekö hnene la itre pane Keresiano la mele ne la itre xan, nge hnei angatr hna ithuemacanyine la pengöne la itre trejine me angatr. (Efeso 6:21, 22; Kolose 4:8, 9) Ngo kola hetre ethan la iqej, hnene la hna sasaithi tulune la itre ewekë hna qaja, maine thaa xome hnöthe kö la itre ithanata thaa nyine tro kö a iqajakeun. Nge ngazo catre hë e ixöjetrijine jë, ewekë lai ka troa hetre ethane pala hi ngöne la mele së. Ame la troa ixöjetrij, tre, “itre trenga thoi hna sil . . . ka jele ngazone la ketre atr me athixötrëne la mele i angeic.” Hanawang la ketre ceitun, hnene la itre Faresaio hna xöjetriji Iesu matre thaa tro kö la itre atr a mejiune koi nyidrë. (Mataio 9:32-34; 12:22-24) Kola mama hnyawa laka, ka thele iwesitrë la atr ka ixöjetrij.—Ite Edomë 26:20.

¹² Ka hace catre koi Iehova e troa xanadrone la hnei Nyidrëti hna nyi ahnahnan, ene la aqane ithanata, e troa ixöjetrijin, maine tro pena a thi lapa hnene ej. Methi Nyidrëti la itre ka “aciane la iwatratra i ange tejin.” (Ite Edomë 6:16-19) Ame la qene Heleni ne la hnepe hnëewekë hna hape “ixöjetrij” tre, di·aʹbo·los, caasi hi memine lo hna ati ëje i Satana. Angeice hi lo “Diabolo,” ka xöjetriji Akötresie me sili trenga thoi Nyidrë. (Hna Amamane 12:9, 10) Eje hi laka, easa thele troa neëne la itre trenge ithanata ka ngazo, wanga tro fe së a hane tui Diabolo. Pëkö göhnene la ixöjetrij e hnine la ekalesia, ke, ej a aciane la itre huliwa ne la ngönetrei tune la  ‘thele iwesitrë’ me “kaqa.” (Galatia 5:19-21) Haawe, maine easa pi qaja la pengöne la ketre atr, loi e tro sa pane thele ka hape: ‘Ka nyipici jë kö lai? Kola amexeje hmaca nyine ue? Nge pine ue la tro ni amexeje pena koi ketre?’—1 Thesalonika 4:11.

13, 14. (a) Nemene la thangane la itre trenge ithanata ka akötre thene la itre atr? (b) Nemene la iqaqa, nge pine nemen matre ame la ka iqaqa, tre, angeice kö a ketre sipu athixötrë angeice kö?

¹³ Itre trenge ka akötr. Tune lo hne së ce wange hë, ka iakötrë fe la itre trenge ewekë. Celë hi matre, ame ngöne la itre xaa ijin, pine laka, ka ngazo la atr, hne së asë hi hna nune ietrane lo itre trenge ithanata ka ngazo hne së hna qaja kowe la itre xan. Ngo Tusi Hmitrötre pe a hmekë së wanga tro së itre Keresiano a hane nyitipune la ketre aqane ithanata, nge troa hane qaja fe e hnine la ekalesia. Hnei Paulo hna eamo kowe la itre Keresiano me hape: “Iananyipi nyipunie memine la tenge ka haite asë, me iwesitë, me elëhni, me kakaeo, me nyi tru.” (Efeso 4:31) Hetrenyi la itre xaa aqane ujëne la xötrehnëewekë hna hape “trenge ka akötr” tune la “nyi tru,” me “ithanata akökötreny,” me “iqaqa.” Ame la itre trenge ka akötr, tre, kola qaja fe la ijelë, me calogitr, me qaja angazone pala hi la itre xan; itre aqane ujë lai ka iahmahmany me iwajahuj, ene pe mekune jë hi itre xan, ka hape, pë fe hë eloi angatr. Maine troa ewekë nyi tru me ithanata akökötrenyi kowe la itre nekönatr e co petre kö nyudren, tre, thaa tro kö lai a pë ethane kowe la mele i nyudren.—Kolose 3:21.

¹⁴ Hna jelengazone catrëne hnei Tusi Hmitrötr la atr ka ixöjetrij, laka ka thele troa wajahuje la itre xan hnene la trenge iqaqa, me iqaja angazo, maine aqane ithanata ka calogitre pena. Ame la atr ka majemine ithanata tune lai, tre, angeice kö a sipu athixötrë angeice kö; nge maine thaa drenge kö hnene la ketre trejine ka majemine iqaqa la itre ixatua ka tru hna hamëne matre ujë jë angeic, haawe, troa upetriji angeic qa hnine la ekalesia. Nge maine thaa saze kö angeic, trianyi angeice pë hë la itre manathith e hnine la fene ka hnyipixe. (1 Korinito 5:11-13; 6:9, 10) Haawe, kola mama hnyawa laka, thatreine jë kö tro sa lapa qale catre ngöne la ihnimi Akötresie, e hne së hna qaja la itre trenge ithanata ka ngazo, me itre trengathoi, maine itre trenge ewekë ka thaa menyike kö. Itre trenge ithanata lai ka ithaipië.

15. Nemene trenge ithanata ka “loi, la nyine eamon”?

¹⁵ Tune kaa la aqane tro sa nyipi ewekëne la ahnahna, ene la troa atreine ithanata, thenge la hna amekötine hnene la Atre hamën? The thëthëhmine kö së laka, Wesi Ula i Akötresieti a upi së troa ithanatane “la tenge ka loi, la nyine troa eamon.” (Efeso 4:29) Ka madrine Iehova la easa qaja la itre trenge ewekë nyine eamo, me ithuecatr, me iakeukawany. Epi thaa tro kö a paatre the së la itre trenge ewekë ka tune lai, kolo hi lo itre nyine tro së lai a qaja. Thaa Tusi Hmitrötre kö a hamëne la itre wathebo nyine troa trongën; ketre thaa hna amë wengëne kö la itre pengöne “tenge ewekë ka pë ethan” nyine troa qaja. (Tito 2:8) E tro sa qaja la itre trenge ewekë ka “loi, la nyine troa eamon,” köni ewekë ka tru thaa tro pi kö sa thëthëhmin, itre ka troa nyi hatrene la trenge ithanata së nyine eamo koi itre xan: Ka pë ethan, ka nyipici, nge hna hamën cememine la hni ka menyik. Ame ngöne la easa mekune la köni ewekë celë, loi e tro sa pane wange la itre tulu ne aqane ithanata ka troa ithuecatre kowe la itre xan.—Wange ju la itre mekune hna eköhagen, hna hape,  “Ka Ithuecatre Kö La Itre Trenge Ewekëng?,” ngöne götrane 140.

16, 17. (a) Pine nemene matre loi e troa qaja aloine la itre xan? (b) Nemene la itre ijine ka ijije troa qaja aloine la itre xan e hnine la ekalesia? e hnine la hnepe lapa?

¹⁶ Troa iqaja aloiny. Atrehmekune hnyawa hi hnei Iehova me Iesu la enyipiewekëne la troa iqajakeune la itre trenge ewekë nyine iqaja aloiny me kapa madrine la ketre atr. (Mataio 3:17; 25:19-23; Ioane 1:47) Pine laka itre Keresiano së, loi e tro mina fe sa hane qaja aloine hnyawa la itre xan. Pine nemen? Kola qaja ngöne Ite Edomë 15:23, ka hape, “Ame la tenge ewekë ngöne la ijin’ eje, te, nyipi loi!” Celë hi matre isa hnyinge ju së ka hape: ‘Nemene la hnenge hna drenge e kola qaja aloinyi ni? Akeukawane kö la hning, me ithuecatreng?’ Eje hi, qa ngöne la hna hane qaja aloinyi së, ene pe kola mama laka, hetre ka meku së fe, me wanga atrunyi së, nge thaa ka gufa kö la trenge catre së. Celë hi ewekë lai ka akeukawane la itre hni së me acatrene la mejiune së, me upi së troa huliwa hnyawa pala hi ngöne la itre drai ka troa xulu. Pine laka madrine la hni së la kola qaja aloinyi së, nemene la ka  ajolë së troa qaja la itre trenge ewekë nyine qaja aloine la itre xan?—Mataio 7:12.

¹⁷ Inine jë troa thele la ewekë ka loi thene la itre xan, matre hetre nyine tro sa qaja aloinyi angatre fe. Tune e hnine la ekalesia, maine jë easa drenge ngöne la ketre ijine icasikeu la ketre cainöj hna eköthe hnyawa, maine easë pena a öhne la ketre thöth ka tro kökötre hnyawa ngöne la götrane la ua, maine ketre qatre pena thaa ka hane fe kö paatre e ijine icasikeu ngacama kolo ha uti ipië trootro le trenge catre i nyidrë. Ame hi la itre trenge ithanata nyine qaja aloinyi angatr, ka tro hi lai a ketr la itre hni angatr me acatrene catrëne la aja i angatr troa nyi hlue i Iehova. Hnine la hnepe lapa, kola akeukawane la trahmanyi me föe hnene la hnei nyidro hna ithawakeune la itre trenge ewekë nyine iqaja aloiny, me iamamanekeun la isa hni ne ole i nyidro. (Ite Edomë 31:10, 28) Aqane tro fe nyidroti lai a ujë e kola öhne la ketre ewekë ka lolo a cia me kökötre hnyawa thene la itre nekönatr. Kola aceitunëne la iqaja aloiny me kapa madrine la itre thöth, memine la ketre feja e kola akeukawane hnei jö me fie hnei tim. E kola catr la nekönatre kuca la loi me eëne la itre thiina ka lolo, haawe, itre keme me thin, the thëthëhmine kö troa qaja aloinyi nyudren. Tro lai a akökötrene thene la itre nekönatr la catr me mejiun, qa ngöne lai tro hë nyudreni a thel troa kuca la thiina ka meköt ngacama jole ju hë.

18, 19. Pine nemene matre loi e tro sa catre thele troa hane akeukawane me ithuecatre kowe la itre sine hmi së, nge tro sa kuca tune kaa?

¹⁸ Keukawa me iaupuny. Iehova a wanga atrune hnyawa la “ate ipië” memine la “ange hna hutra hnyija.” (Isaia 57:15) Kola upi së hnene la Tusi Hmitrötr troa ‘eamo’ me “haji angete hni ka ewë.” (1 Thesalonika 5:11, 14) Loi e xecie hnyawa koi së laka, Akötresieti a öhne me madrine la trenge catr ka eje the së matre troa akeukawane me aupune la hni ne la itre trejine me easë ka hleuhleu me latresi.

¹⁹ Nemene la nyine tro sa qaja ka troa akeukawane la hni ne la ketre trejine Keresiano ka nanazij maine ka hlohlo? Maine thaa mama kö koi së la aqane troa nyinyin la jole cili, ngo ngöne la itre xaa ijin, ixatua ka tru la itre hnepe hnëewekë ka co hne së hna qaja. Canga mama ju hi kowe la atr ka kucakuca laka, easa  hane hnehengazo angeic. Sipone jë troa ce thithi me angeic; xëwe sai angeice jë draië koi Iehova matre kepe ixatua qaathei Nyidrë, nge tro angeic a atre hnyawa laka, kola hnimi angeice hnene la itre xan me Akötresie. (Iakobo 5:14, 15) Loi e xecie hnyawa koi angeic laka, hetre göhnë i angeice fe e hnine la ekalesia, nge ka nyipi ewekë catre angeic. (1 Korinito 12:12-26) E jë la ketre xötr ne la Tusi Hmitrötr ka thue ixatua, matre troa amamane hnyawa koi angeic laka, Iehova a hnehengazone fe la pengö i angeic. (Salamo 34:18; Mataio 10:29-31) Maine tro sa thele ijine troa ce thawa la ketre “tenge ewekë ka loi” memine la ketre atr ka kucakuca nge tro la itre trenge ewekë së a amamane koi angeice la hni së, eje hi lai laka, tro ha xatua angeic troa trotrohnine hnyawa laka, kola hnimi angeic me hane wanga atrunyi angeic.—Ite Edomë 12:25.

20, 21. Nemene la itre ewekë ka nyi eloine la eamo?

²⁰ Eamo ka hetre thangane ka loi. Pine laka itre atr ka ngazo së, nyipi ewekë tro pala hi sa kapa, easë asë, la itre eamo. Kola xatua së hnei Tusi Hmitrötr, me hape: “Dengeju la hna eamo, nge kapaju la hna inin, mate inamacan’ eö ngöne la pun.” (Ite Edomë 19:20) Thaa itre qatre thupe hmekuje kö la ka hamë eamo. Itre keme me thine fe a hamë eamo kowe la itre nekö i angatr. (Efeso 6:4) Nyipi ewekë tro fe la itre trejine föe ka macaj a hamë eamo kowe la itre föe hmae. (Tito 2:3-5) Tro la ihnimi së kowe la itre xan a upi së troa thele troa hamëne hnyawa la ketre eamo kowe la ketre atr, me thupëne matre thaa tro kö a akötrë angeic hnene la itre hne së hna troa qaja. Nemene la ka troa xatua së troa hamëne la eamo cili? Tro sa ce wange la köni ewekë ka troa xatua së troa hamëne  la ketre eamo ka hetre thangane ka loi: la aqane ujë me aja ka eje thene la ka hamë eamo, me ewekë ka eköthe la eamo, memine la aqane troa hamëne ej.

²¹ Hna nyiqaane mama hi la eamo ka lolo e cili thene la atre hamë eamo. Isa thele jë ka hape, ‘Eu la kola hnyapa koi ni troa kapa la ketre eamo?’ Ame la easa öhne ka hape, ame la ka hamë eamo koi së, tre, angeic a hnehengazo së, kola ithanata ngo paatre kö thei angeice la elëhni, nge pëkö hna juetrën, canga hetre aja së hi troa kapa la eamo. Tune kaa, thaa tro kö a tune lai la aqane ujë së me itre aliene hni së ngöne la easa hamë eamo kowe la itre xan? Itre eje e hnine la Wesi Ula i Akötresie la itre eamo ka hetre thangane ka loi. (2 Timoteo 3:16) Ngacama easa e la ketre xötr hnine la Tusi Hmitrötr, maine easë hi a troa amexej, ngo ame la ka nyipi ewekë, tre, tro pala hi sa nyi trepene hnene la Wesi Ula i Akötresie la nöjei eamo hne së hna hamën. Qa ngöne lai, loi e troa hmekëne hnene la itre qatre thup matre thaa tro kö a ce thawa me itre xan la itre sipu mekuna i angatr me iuku troa trongën; ketre thaa tro pi kö angatr a xome menune la itre xötr ne la Tusi Hmitrötr matre troa sajuëne la itre sipu mekuna i angatr. Ka hetre thangane catre fe la eamo, e hna hamën cememine la thiina ka loi. Ame la eamo hna hamën cememine la hni ka menyik, tre, canga tro hi a kapa hnene la atr, ke angeice fe a öhne laka thaa hna wange sixa angeice kö.—Kolose 4:6.

22. Nemene la hne së hna catre troa kuca göi aqane troa huliwane la ahnahna, ene la troa ithanata?

²² Eje hi lai laka, ame la troa ithanata, tre, celë hi ketre ahnahna lai ka sisitria qaathei Akötresie. Tro la ihnimi së koi Iehova a upi së troa huliwane hnyawa la ahnahna cili, ngo wange kö ke gufa pi ej. Loi e tro pala hi sa mekune hnyawa laka, ame la itre trenge ewekë hne së hna qaja kowe la itre xan, tre, ka hetre menen me ecatrene itre ej; ene laka ijije hi tro itre ej a ithuecatr maine pena troa iananazijë. Haawe, loi e tro sa thele troa huliwane hnyawa la ahnahna cili thenge la hna amekötine hnene la Atre Hamëne ej, laka “nyine troa eamon.” Nge tro hë la aqane ithanata së a ithuecatr me akeukawane la hni ne la itre atr ka mele xötreithi së, me hane xatua angatr troa lapa qale catre fe ngöne la ihnimi Akötresie.