1-3. (a) Nama pemeri ti diberi Jehovah ngagai kitai, lalu baka ni pemeri tu ulih dikena enggau chara ti salah? (b) Ngambika meruan dalam pengerindu Petara, baka ni chara kitai patut bejaku?

ENTI NUAN meri siti pemeri ngagai orang ti dikesayau, baka ni asai ati nuan enti iya sengaja ngena pemeri nya enggau chara ti salah? Chunto, nuan meri iya kerita, tang udah nya nuan nemu iya enda bejimat mai kerita nya, lalu ngemakalka orang bukai. Enda ke nuan pedis ati?

² Ulih bejaku nya pemeri ari Jehovah, ke meri “semua pemeri ti menyana, ti pemadu badas.” (James 1:17) Pemeri tu ngasuh mensia bebida ari jelu. Iya ulih nulung kitai nunjukka runding enggau pengasai ati. Pemeri tu mega ulih dikena enggau chara ti salah, baka kerita tadi. Kitai ulih ngemediska ati Jehovah enti kitai enda bejimat bejaku sereta ngemediska ati orang!

³ Ngambika meruan dalam pengerindu Petara, kitai patut ngena jaku ti dikedeka Petara. Jehovah enggau terang madahka gaya jaku ti ngerinduka ati Iya. Bup Kudus madah: “Anang mansutka jaku ti jai, tang semina nyebut jaku ti manah kena ngemansangka  pengarap orang, ba maya ti patut, ngambika jaku nya meri berekat ngagai orang ke ninga.” (Epesus 4:29) Aram kitai berandauka kebuah kitai patut nyaga jaku, jaku ti patut di seliahka sereta baka ni kitai ulih “nyebut jaku ti manah kena ngemansangka.”

4, 5. Baka ni sekeda ayat Bup Kudus madahka jaku bisi kuasa?

⁴ Siti kebuah kitai nyaga jaku laban jaku bisi kuasa. Jaku Dalam 15:4 madah: “Jaku ti siru mai pengidup, tang jaku ti jai ngelemika semengat.” Nya alai, jaku ti siru ulih ngeringka semengat orang ke ninga.[1] Tang, jaku ti jai ngelemika semengat. Endang amat, jaku kitai bisi kuasa kena ngemedis tauka nyuman.—Jaku Dalam 18:21.

⁵ Siti agi ayat Bup Kudus madah: ‘Leka jaku ti disebut enggau enda berunding, ngasuh ati balat telih baka diachuk pedang.’ (Jaku Dalam 12:18, NW)  Jaku ti disebut enggau enda berunding ulih ngasuh ati balat tusah sereta ngerusak kaul. Kala nuan ngasaika ati nuan balat pedis maya ninga jaku jai? Tang ayat ti sama bisi madah: “Jaku ti disebut enggau bejimat, ulih nyuman.” Jaku ti disebut enggau berunding ulih nyumanka ati ti pedis sereta ngemanahka kaul. Agi nuan ingat maya orang ngena jaku ti manah ngasuh nuan lantang ati? (Bacha Jaku Dalam 16:24.) Nya alai, kitai patut ngena jaku ti manah ngambika orang lantang ati, ukai pedis ati.

6. Nama kebuah enda senang nyaga jaku diri?

⁶ Kekadang, kitai enda ulih nyaga jaku diri. Nya alai, kebuah kedua kitai patut nyaga jaku diri laban kitai bedosa enggau enda sempurna. Jaku ti disebut datai ari ati, lalu “kenyau ari sida agi biak, runding [ati] sida endang jai.” (Pemungkal 8:21; Luke 6:45) Nya alai, enda senang nyaga jaku diri. (Bacha James 3:2-4.) Taja pia, kitai agi ulih ngubah chara bejaku ngambika manah agi. Baka orang ke nyemerai nanjak ai, kitai mega patut ngelaban pengelemi diri ke enda ulih nyaga jaku.

7, 8. Baka ni jaku kitai bekaul enggau sembah ngagai Jehovah?

⁷ Kebuah ketiga kitai patut nyaga jaku diri laban kitai betanggungjawap ngagai Jehovah. Jaku kitai ukai semina bekaul enggau orang bukai, tang mega enggau Jehovah. James 1:26 madah: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.” Baka ke udah dipelajar kitai, jaku mega bisi kaul enggau sembah. Enti jaku kitai enda dijaga—nyebut utai ti selalu ngemediska  ati—sembah kitai enda beguna ba mata Petara. Nya alai, kitai patut nyaga jaku kitai!—James 3:8-10.

⁸ Kitai endang bisi kebuah ti berat nyaga jaku diri. Sebedau kitai meda gaya jaku ti ulih ngemansangka, aram kitai berandauka gaya jaku ti enda patut disebut orang Kristian ti bendar.

9, 10. (a) Nama bansa jaku ke selalu dikena orang kemaya hari tu? (b) Nama kebuah kitai nulak jaku ti kamah? (Peda mega nota kaki ba baruh lambar.)

⁹ Jaku ti kamah. Jaku sumpah enggau jaku kamah selalu dikena orang kemaya hari tu. Mayuh orang ngena jaku ti kamah maya sida ringat tauka betundi.[4] Taja pia, jaku ti kamah ukai dikena betundi. Kira-kira 2,000 taun ti udah, rasul Paul ngelalau orang Kristian ba Kolosi nyeliahka “jaku ti kamah.” (Kolosi 3:8) Paul madahka orang Kristian ba Epesus enda tau ngena jaku ti “enda senunuh,” indah “enda patut” disebut ba bala orang Kristian ti bendar.—Epesus 5:3, 4.

¹⁰ Jehovah enggau orang ke rinduka Iya enggai ninga jaku ti kamah. Lebuh madah pasal “utai ti dikereja mensia,” Paul ngumbai “runding ti kamah” nya nyengkaum jaku ti kamah. (Galatia 5:19-21) Tu penyalah ti besai. Nya alai, orang ke selalu ngena jaku ti kamah ulih dibuai ari gerempung Jehovah enti iya enggai nesal ati. *

11, 12. (a) Nama reti bejakuka orang, lalu baka ni tu ulih ngemedis? (b Nama kebuah nembiak Jehovah patut nyeliahka jaku petenah?

 ¹¹ Bejakuka orang, betenahka orang. Endang amat, orang udu bejaku pasal orang bukai. Chunto, kitai engka madahka berita manah pasal orang ke baru dibaptisa tauka orang ke begunaka peransang. Orang Kristian ti keterubah ibuhka bala menyadi Kristian sida; sida mega bekunsi penemu ti manah enggau pangan diri. (Epesus 6:21, 22; Kolosi 4:8, 9) Taja pia, bejakuka orang ulih ngemedis enti kitai ngaga jaku tauka madahka utai ti tau ngemalu orang bukai. Kelebih agi, tu ulih ngujungka kitai betenahka orang. Betenahka orang reti iya “nyebut utai ti bula kena ngemalu sereta ngenyaika nama orang bukai.” Chunto, orang Parisi betenahka Jesus kena ngenyaika nama iya. (Matthew 9:32-34; 12:22-24) Jaku petenah selalu ngujungka laya.—Jaku Dalam 26:20.

¹² Ba mata Jehovah, pengawa ngemaluka orang tauka ngasuh orang belaya nya penyalah ti besai. Iya begedika orang ti “nyungkak pengachau nyadi entara pangan.” (Jaku Dalam 6:16-19) Leka jaku Gerika “betenah” dikumbai di·aʹbo·los. Leka jaku tu mega disalin nyadi “Antu,” lalu tu gelar Sitan ke betenahka Petara. (Pemandang 12:9, 10) Endang amat, kitai patut nyeliahka jaku ti ulih ngasuh kitai niru Sitan. Nya alai, anang ngena jaku petenah ti tau ngasuh “belaya” enggau “bepechah-belah.” (Galatia 5:19-21) Nyadi, sebedau nampung cherita orang bukai, tanya diri empu: ‘Kati nya amat? Patut  aku nampung cherita nya? Kati manah enti aku bekunsi pasal cherita nya?’—Bacha 1 Tesalonika 4:11.

13, 14. (a) Nama nyadi ngagai orang ke ninga jaku ransi? (b) Nama agi gaya jaku ti dikutuk Bup Kudus, lalu nama kebuah orang ke bisi tebiat tu ngenusahka diri empu?

¹³ Jaku ransi. Baka ke udah dipelajar, jaku ulih ngemedis. Endang amat, kekadang ketegal enda sempurna, kitai nyebut utai ti ngasuh kitai nesal. Taja pia, Bup Kudus nangkan pasal jaku ke diseliahka orang Kristian. Paul madahka orang Kristian: “Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi.” (Epesus 4:31) Enti kitai ngeransi orang ngena jaku jai enggau petenah, kitai ulih ngemaluka orang lalu ngasuh orang ngasaika diri enda beguna. Kelebih agi ngagai anak mit, jaku ransi ulih ngasuh sida lemi semengat.—Kolosi 3:21.

¹⁴ Siti agi gaya jaku ti dikutuk Bup Kudus, iya nya ngemalu sereta ngemaruhka orang bukai enggau enda bepampul. Orang ke bisi tebiat tu ngenusahka diri empu. Iya ulih dibuai ari gerempung Jehovah enti iya enda nesal ati tauka enggai berubah. Iya mega ulih lenyau berekat idup belama iya ba dunya baru. (1 Korint 5:11-13; 6:9, 10) Nya alai, enti kitai ngena jaku kamah, bula tauka ngeransi, kitai enda ulih meruan dalam pengerindu Petara. Jaku tu ngelemika semengat.

15. Nama bansa jaku ti “manah kena ngemansangka”?

¹⁵ Baka ni kitai ulih ngena jaku nitihka peneka  Petara? Kingatka, Bup Kudus ngansak kitai “semina nyebut jaku ti manah kena ngemansangka.” (Epesus 4:29) Jehovah rindu ati enti kitai ngena jaku ti ngemansang, meransang sereta ngeringka semengat orang bukai. Nya alai, kitai patut berunding dulu sebedau bejaku. Bup Kudus nadai madahka enggau terang bansa jaku ti patut dikena kitai. (Titus 2:8) Jaku ti “manah kena ngemansangka” nya jaku ti menyana, amat, sereta manah. Aram kitai beratika sekeda chunto jaku ti ngemansangka.—Peda kutak “ Kati Jaku Aku Ngemansangka?.”

16, 17. (a) Nama kebuah kitai patut muji orang bukai? (b) Kemaya kitai ulih muji orang ba endur gempuru? ba diri sebilik?

¹⁶ Jaku puji. Jehovah enggau Jesus nemu jaku puji nya beguna. (Matthew 3:17; 25:19-23; John 1:47) Kitai mega patut muji orang bukai. Nama kebuah? Jaku Dalam 15:23 madah: “Naka meh pengaga tetemuka leka jaku ba maya ti ngena.” Tanya diri empu: ‘Baka ni asai ati aku maya dipuji? Enda ke iya ngagaka ati enggau meransang aku?’ Endang amat, jaku puji nunjukka orang bukai ibuhka nuan, lalu utai ti dikereja nuan berega ba mata sida. Tu ulih ngeringka pengarap sereta meransang nuan bebendar agi ngereja pengawa jemah ila. Enti nuan beterima kasih ke puji ti diterima nuan, nuan mega patut enggau naka ulih muji orang bukai.—Bacha Matthew 7:12.

¹⁷ Nuan patut matih diri ngiga pemanah ke bisi ba orang bukai, lalu muji sida. Ba endur gempuru,  nuan engka bisi ninga ceramah ti badas, meda nembiak Kristian mansang ba pengarap tauka meda menyadi Kristian ke tuai tetap ati datai gempuru, taja pan bisi penanggul ketegal udah tuai. Jaku puji ti diberi ngagai sida tu ulih meransang sereta ngeringka pengarap sida. Ba diri sebilik, laki bini patut muji sereta nunjukka penyayau ngagai pangan diri. (Jaku Dalam 31:10, 28) Jaku puji mega ulih meransang sereta ngagaka ati anak. Apai indai, giga meh peluang muji anak kita enti sida bisi ulah ti manah sereta bebendar ngereja pengawa. Jaku puji kita ulih ngasuh sida berani, ngeringka pengarap sida sereta meransang sida bebendar agi ngereja utai ti betul.

18, 19. Nama kebuah kitai patut enggau naka ulih meransang menyadi Kristian kitai, lalu baka ni kitai ulih ngereja nya?

¹⁸ Jaku ti meransang. Jehovah balat ibuhka “orang ke tusah ati.” (Masmur 147:3) Bup Kudus ngansak kitai meransang pangan diri sereta “meransang orang ke takut.” (1 Tesalonika 5:11, 14) Kitai ulih pechaya Petara rindu ati meda kitai meransang bala menyadi Kristian ke tusah ati.

¹⁹ Tang, nama ulih disebut nuan kena meransang menyadi Kristian ke lemi semengat tauka tusah ati? Anang ngumbai diri patut mutarka penusah iya. Tang, kesuah agi ngena jaku puji aja ulih nulung iya. Tunjukka ngagai orang ke tusah ati, kitai ibuhka iya. Chunto, nuan ulih besampi enggau iya ngambika iya nemu, iya dikerindu Jehovah enggau bala bukai. (James 5:14, 15) Padah ngagai  iya, bala menyadi Kristian ti bukai begunaka iya, lalu iya mega berega ba sida. (1 Korint 12:12-26) Bacha ayat Bup Kudus ti nunjukka Jehovah amat ibuhka iya. (Masmur 34:18; Matthew 10:29-31) Meri awak bekunsi “jaku ti siru” enggau orang ke lemi semengat ulih nulung iya ngasaika diri berega sereta dikerindu.—Bacha Jaku Dalam 12:25.

20, 21. Nama ngasuh jaku lalau senang diterima?

²⁰ Jaku lalau ti beguna. Kitai enda sempurna, nya alai kitai seruran begunaka jaku lalau. Bup Kudus ngansak kitai: “Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila.” (Jaku Dalam 19:20) Ukai semina tuai gempuru aja ke ulih meri jaku lalau. Apai indai mega ulih meri jaku lalau ngagai anak. (Epesus 6:4) Menyadi Kristian indu ke tuai meri jaku lalau ngagai menyadi Kristian indu ke biak. (Titus 2:3-5) Pengerindu meransang kitai meri jaku lalau ti enda ngemediska ati orang ke ninga. Nama ulih nulung kitai meri jaku lalau ke baka nya? Peratika tiga chara ke ulih nulung kitai meri jaku lalau ti beguna:  tuju orang ke meri jaku lalau, kebuah meri jaku lalau, lalu chara jaku lalau diberi.

²¹ Jaku lalau ti beguna bepanggai ba orang ke meri jaku lalau. Tanya diri empu, ‘Ni maya aku senang nerima jaku lalau?’ Lebuh nuan nemu orang ke meri jaku lalau nya ibuhka nuan, bisi tuju ati ti manah sereta enda nganu, nuan deka senang agi nerima jaku lalau iya. Nya alai, enti nuan deka meri jaku lalau ngagai orang bukai, nuan tentu deka bisi ulah enggau tuju ati ti manah. Jaku lalau ti badas bepanggai ba ajar Bup Kudus. (2 Timoti 3:16) Sekalika ngena ayat ari Bup Kudus tauka enda, jaku lalau patut sejalai enggau ajar Bup Kudus. Nya alai, bala tuai gempuru patut bejimat ngambika enda mansutka penemu diri maya meri jaku lalau; tauka ngelimpangka ajar Bup Kudus kena nyukung penemu sida empu. Jaku lalau mega badas agi enti diberi enggau chara ti betul, ngambika senang agi diterima sereta ngeringka semengat orang ke nerima iya.—Kolosi 4:6.

22. Baka ni nuan deka ngena pemeri ulih bejaku?

²² Endang amat, ulih bejaku nya pemeri ti berega ari Petara. Pengerindu kitai ngagai Jehovah patut meransang kitai ngena pemeri tu enggau manah, ukai enggau chara ti salah. Kingatka, jaku kitai bisi kuasa—ulih ngemansangka tauka ngelemika semengat. Nya alai, aram meh kitai ngena pemeri tu nitihka chara ti dikedeka Petara—“kena ngemansangka.” Jaku kitai ulih meransang orang bukai sereta nulung kitai empu meruan dalam pengerindu Petara.