1-3. (a) Anhte hpe Yehowa hpa kumhpa jaw da ai kun? Dai hpe gara hku jailang hkrup chye ai kun? (b) Karai Kasang a n-gaw nwai ai tsawra myit galoi mung hkam la lu na matu ga shaga lu ai chyeju kumhpa hpe gara hku jailang ra na kun?

NANG tsawra ai marai langai hpe kumhpa jaw ai ngu saga. Shi gaw dai kumhpa hpe manu n shadan ai sha, shut ai hku jailang ai shaloi nang gara hku hkamsha na kun? Shi hpe mawdaw langai kumhpa jaw ai ngu saga. Mawdaw hpe kam ai hku gawt ai majaw, masha ni hkra machyi mat ai hpe, hpang de she chye dat ai. Nang shi hpe myit htum mat ai n re i?

² Ga shaga lu ai atsam gaw, “kaja ai kumhpaw nlang hte hte, hkum hkum re ai kumhpa yawng” hpe jaw ai Madu Yehowa kaw nna kumhpa langai re. (Yaku 1:17) Dusat ni hpe n re ai sha, masha ni hpe sha, dai kumhpa jaw da ai. Dai majaw, kaga ni hpe anhte a myit mang ai lam ni, hkamsha lam ni hpe tsun dan mai ai. Raitim, mawdaw kumhpa lu ai masha zawn, ga shaga lu ai chyeju kumhpa hpe shut ai hku jailang hkrup chye ai. N myit yu ai sha ga shaga ai majaw, masha ni hpe myit hkra machyi shangun ai shaloi, Yehowa grai myit n pyaw na re.

³ Ga shaga lu ai chyeju kumhpa hte dai hpe jaw da ai Madu ra sharawng ai hte maren jailang yang she, Karai Kasang a n-gaw nwai ai tsawra myit hpe galoi mung hkam la lu na re. Yehowa gaw shi ra sharawng ai hku tsun shaga na matu asan sha tsun da ai. “N se ai ga hkaw mi mung nanhte a n-gup na  hkum pru u ga; madat mara nga ai ni a matu akyu byin hkra, ra nga ai hte maren shadaw shalan na matu, mai kaja ai ga sha a tsun nga mu” nga nna Chyum Laika hta tsun da ai. (Ehpesu 4:29) N-gup hpe hpa majaw hkang ging ai kun? Kaning re ai ga hpe koi ging ai kun? “Mai kaja ai ga” hpe gara hku tsun mai na kun? ngu ai lam ni hpe hkaja yu ga.

4, 5. Chyum Laika hta lawm ai hpaji ga nkau mi gaw ga a atsam hpe gara hku madun dan ai kun?

⁴ N-gup hpe hkang ra na ahkyak ai lam gaw, ga gaw atsam nga ai majaw re. Ga Shagawp 15:4 hta “ngwi ai shinglet gaw asak hpun rai nga ai; hkalau ai shinglet chyawm gaw, gawng run ai lam rai nga ai” nga nna tsun da ai. Hka gaw hka hpang gara nga ai hpun hpe tsit tsawm shangun ai zawn, mai kaja ai ga gaw madat ai ni hpe ngwi pyaw simsa shangun ai. Hkalau ai ga gaw masha ni hpe hkra machyi shangun ai. Anhte a ga gaw masha ni hpe hkra machyi shangun ai zawn, shamai ya lu ai atsam mung nga ai.​—Ga Shagawp 18:21.

⁵ “N myit yu ai sha tsun ai ga gaw nhtu hte galun ai zawn re” ngu ai hpaji ga gaw, ga a atsam hpe dan dan leng leng madun dan ai. (Ga Shagawp 12:18, NW) N myit yu ai sha, alawan  tsun dat ai ga gaw myit hpe hkra machyi shangun nna hku hkau lam hpe mung hten za shangun ai. Nhtu hte galun ai zawn tsun ai ga a majaw, nang myit hkra machyi ga ai kun? “Hpaji rawng ai wa a shinglet chyawm gaw, ana pyi shamai ya lu ai” nga nna matut tsun ai. Karai Kasang jaw ai nyan nga ai ni gaw, atsawm myit yu nna tsun chye ai. Shi a ga gaw myit hkra machyi ai hpe mai tsai shangun nna, hku hkau lam bai kaja wa shangun ai. Mai kaja ai ga a majaw, myit hkra machyi ai lam mai mat ai hpe hkrum ga ai kun? (Ga Shagawp 16:24 hpe hti u.) Ga gaw atsam nga ai lam chye da ai majaw, anhte gaw myit hkra machyi shangun ai ga tsun na malai, myit hkra machyi ai hpe mai tsai shangun ai ga sha tsun mayu na re.

6. Shinglet hpe hkang na matu hpa majaw grai yak ai kun?

⁶ Yubak hte n hkum tsup ai a majaw shinglet hpe shut ai hku jailang hkrup chye ai. Dai majaw mung n-gup hpe hkang ra ai. Anhte kade daram shakut tim, shinglet hpe tsep kawp hkang lu na n re. Ga gaw myit kaw nna pru wa ai. Masha ni a “kraw lawang na myit mang gaw, . . . n shawp nga lu ai.” (Ningpawt 8:21; Luka 6:45) Dai majaw, shinglet hpe hkang na matu grai shakut ra ai. (Yaku 3:2-4 hpe hti u.) Shinglet hpe tsep kawp n hkang lu tim, tsun shaga ai ga hpe gaw grau kaja hkra shakut mai ai. Lagaw leng jawn ai shaloi, kawng yu ai shara ni hta angwi ngwi jawn na matu hte, magaw ai shara ni hta n adawt hkra hkang ra ai zawn, anhte mung mara galaw mayu ai myit jasat a majaw, shinglet hpe shut ai hku jailang mayu ai myit hpe hkang ra ai.

7, 8. Anhte a tsun shaga ai lam gaw anhte a nawku daw jau ai lam a ntsa gara hku hkra machyi chye ai kun?

⁷ Anhte tsun ai ga a matu Yehowa a man hta jahpan dan ra ai majaw mung n-gup hpe hkang ra ai. Shinglet hpe atsawm n jailang yang, masha shada da sha n-ga, Yehowa hte hku hkau lam hkra machyi chye ai. “Ngai gaw naw ku htung shadik ai wa rai nga nngai, nga nna marai langai ngai myit nawn dam timung, tinang a shinglet hpe n chye hkang ai hte, tinang a myit hpe hkalem kau yang, dai wa a naw ku htung,  kaman lila sha rai nga lu ai” nga nna Yaku 1:26 hta tsun ai. Shawng na daw hta anhte chye wa sai hte maren, anhte a tsun shaga ai lam gaw nawku daw jau ai lam hte matut mahkai nga ai. Shinglet hpe n hkang ai sha, hkra machyi shangun ai ga tsun na nga yang, anhte a nawku daw jau ai lam yawng gaw, Karai Kasang a man hta kaman lila byin mat chye ai. Dai majaw, anhte a tsun shaga ai lam hpe atsawm hkang ging ai n re i?​—Yaku 3:8-10.

⁸ Ga shaga lu ai chyeju kumhpa hpe shut ai hku n jailang hkrup na matu, n-gup hpe hkang na matu ahkyak ai. Mai kaja ai ga ni a lam n bawngban shi yang, Hkristan langai tsep kawp n tsun ging ai ga ni a lam shawng hkaja yu ga.

9, 10. (a) Dai ni na aten hta kaning re ai ga ni hpe shani shagu tsun nga ai kun? (b) Matsat shabat ga hpe hpa majaw n tsun ging ai kun? (Lawu matsing hpe yu u.)

⁹ Matsat shabat ga. Matsa mawa ga, grai mazut ai hku tsun ai ga ni hpe, dai ni na aten hta masha ni shani shagu tsun shaga nga ma ai. Masha law malawng gaw masin pawt ai shaloi, grai mazut ai hku tsun nna, mani hpa tsun ai shaloi mung ngang hte seng ai lam ni tsun ma ai. Gaja nga yang, dai zawn ga ni gaw mani hpa n re ai. Lai wa sai shaning 2,000 daram hta “matsat shabat ga” tsun ai hpe koi na matu, Kolose nawku hpung de kasa Pawlu laika ka nna sadi jaw wa ai. (Kolose 3:8, NW) Jet ai Hkristan ni gaw, “matsat shabat re ai mani hpa ga” ni hpe “ga hte pyi n tsun ging ai” lam Ehpesu nawku hpung hpe Pawlu tsun wa ai.​—Ehpesu 5:3, 4, NW.

¹⁰ Matsat shabat ga hpe Yehowa n ra ai. Shi hpe tsawra ai ni mung dai zawn ga hpe n ra ma ai. Yehowa hpe tsawra ai myit gaw matsat shabat ga n tsun na matu karum ya ai. “Hkum shan a bungli” ni hta “n san n seng ai” lam lawm ai hpe Pawlu tsun wa ai. Dai n san n seng ai lam ni hta matsat shabat ga lawm ai. (Galati 5:19-21) Dai gaw ahkyak shatai ra ai lam re. Chyahkring hkring sadi jaw nga ai lapran myit malai n lu nna, akyang hten ai, matsat shabat re ai, nse nsa ai lam ni hte dai ni hpe n-gun  jaw ai ga ni hpe matut nna tsun taw na nga yang, nawku hpung kaw nna pyi shapraw hkrum chye ai. *

11, 12. (a) Shatan ai ngu ai gaw hpa rai a ta? Dai gaw gara hku hkra machyi shangun ai kun? (b) Yehowa hpe nawku ai ni gaw sari jahpoi ai ga hpe hpa majaw koi ra ai kun?

¹¹ Hkra machyi shangun ai shatan ai ga hte, sari jahpoi ai ga. Shatan ai ngu ai gaw masha na lam hpe hkan tsun ai re. Masha na lam tsun shagu n kaja ai ngu tsun mai na kun? Hkalup hkam la ai nau n na shi ai ni a lam, n-gun jaw na matu ra nga ai ni a lam, akyu nga ai shiga hpe tsun na nga yang, n kaja ai ngu n lu tsun ai. Tsa ban langai na Hkristan ni gaw, shada da a akyu hpe tau nna makam masham bung ai ni a lam htap htuk ai hku tsun jahta ma ai. (Ehpesu 6:21, 22; Kolose 4:8, 9) Raitim, tinang tsun mayu ai hku n teng n man tsun ai, kaga ni hpe n chye shangun mayu ai marai langai ngai a lam hpe tinang gaw hkan tsun ai nga yang hkra machyi ai lam ni byin chye ai. Grau sawng ai gaw, shatan ai kaw nna sari jahpoi ai du hkra byin mat chye ai. Dai gaw hkra machyi ai lam sha byin shangun ai. Sari jahpoi ai ngu ai gaw, “masha ni mying hten hkra hkan tsun ai lam” re. Ga shadawn, Hparishe ni gaw Yesu hpe masha ni n kam hkra n ju n dawng ai myit hte sari jahpoi wa ai. (Mahte 9:32-34; 12:22-24) Sari jahpoi ai majaw, n dang kalang hkat nna ga law ai lam ni byin chye ai.​—Ga Shagawp 26:20.

¹² Masha ni hpe jahpoi tsun ai ni, myit bra hkra tsun ai ni hpe Yehowa ahpa atang n sawn la ai. “Kahpu kanau shada dumbru dumbra” byin hkra galaw ai ni hpe shi n ra ai. (Ga Shagawp 6:16-19) Sari jahpoi ai wa nga nna ga gale da ai Greek ga si gaw, di·aʹbo·los rai nna Satan hpe mung dai hku tsun da ai. Shi gaw Karai Kasang hpe sari jahpoi ai “Nat” re. (Shingran 12:9, 10) Anhte hpe Satan zawn byin mat shangun ai ga shaga ai lam hpe  koi mayu na re. Sari jahpoi ai ga ni hpe nawku hpung hta hkap la n mai ai. Dai ga ni gaw “ga law ga la ai,” “shai wa bra wa ai lam” ni zawn mara nga ai akyang ni byin shangun ai majaw re. (Galati 5:19-21) Dai majaw, marai langai ngai a lam n tsun shi yang, ‘ndai shiga jaw ai kun? Tsun dat yang tsawra myit n nga ai zawn byin mat na kun? Ndai lam hpe tsun ra na kun? Tsun yang kaja na kun?’ nga nna tinang hkum tinang san u.​—1 Htesaloni 4:12 hpe hti u.

13, 14. (a) Matsa mawa ai ga gaw, masha ni hpe n kaja ai akyu gara hku byin shangun ai kun? (b) Matsa mawa ai ngu ai gaw hpa rai a ta? Matsa mawa ai ga tsun chye ai akyang nga ai wa gaw, hpa majaw shoihpa nga ai lam de du nga ai ngu tsun lu a ta?

¹³ Matsa mawa ga. Shawng nnan hta tsun wa ai zawn, tsun ai ga ni gaw hkra machyi shangun lu ai atsam nga ai. Masha a n hkum tsup ai lam ni a majaw, hpang de she myit malai lu ai ga ni hpe anhte tsun hkrup chye ai. Raitim, Hkristan dinghku hta, nawku hpung hta tsep kawp n tsun ging ai ga a lam Chyum Laika hta sadi jaw da ai. “Myit gadun ai, sindawng katawt ai, masin pawt ai, ga law ga la ai, shatan nhkan ai [matsa mawa ai, NW] amyu myu hte, n hkru n hkra ai yawng hte nawng, nanhte hte tsan gang nga u ga” nga nna Hkristan ni hpe Pawlu sadi jaw wa ai. (Ehpesu 4:31) Matsa mawa ai hta masha ni hpe la hpa n nga hkra tsun ai, grai zai ai hku tsun ai, mara shagun ahkre ai ni mung lawm ai. Matsa mawa ai gaw, masha ni a sari hpe hkra machyi shangun nna myit kaji shangun ai. Myit masin hkalung nna kam loi ai ma ni gaw, matsa hkrum ai shaloi aloi sha myit hkra machyi mat chye ai.​—Kolose 3:21.

¹⁴ Matsa mawa ga tsun nna, masha ni hpe roi shagoi chye ai akyang hpe Chyum Laika hta dan dan leng leng pat shingdang da ai. Dai hku tsun chye ai akyang nga ai wa gaw, shoihpa nga ai lam de du nga sai. Galai shai na matu chyahkring hkring karum ya ai hpe n gawn n sawn galaw yang, shi hpe nawku hpung kaw nna shapraw mai ai. Shi a akyang ni n galai shai yang, mungdan shaman chyeju ni mung sum mat chye ai. (1 Korinhtu 5:11-13; 6:9, 10) Dai majaw, anhte gaw akyu n nga ai, n teng n man ai, tsawra myit n lawm ai ga ni hpe tsun ai akyang nga taw  yang, Karai Kasang a n-gaw nwai ai tsawra myit hkam la lu na n re. Dai zawn tsun shaga ai ga ni gaw hkra machyi shangun ai.

15. Gara ga ni gaw “shadaw shalan na matu, mai kaja ai ga” re ai kun?

¹⁵ Ga shaga lu ai chyeju kumhpa hte, dai hpe jaw da ai Madu ra sharawng ai hku gara hku jailang mai ai kun? “Shadaw shalan na matu, mai kaja ai ga sha a tsun nga mu” ngu ai Chyum ga hpe dum u. (Ehpesu 4:29) Mai kaja ai ga, n-gun jaw ga, n-gun lu hpa ga ni hpe tsun na nga yang, Yehowa ra sharawng ai. Dai zawn ga ni hpe myit yu nna tsun ra ai. Gara ga si ni gaw mai kaja ai ga ni re ai hpe Chyum Laika hta tup hkrak n ka da ya ai. “San seng ai mung ga” ni hta hpa ni lawm ai hpe mung, jahpan galaw nna n ka da ya ai. (Titu 2:8) “Shadaw shalan na matu, mai kaja ai ga” tsun lu hkra, ahkyak ai lam masum hpe matsing da ging ai. Anhte tsun ai ga gaw, akyu nga ai, teng ai, tsawra myit nga ai ga ni rai ging ai. Dai ni hpe matsing da nna, mai kaja ai ga hte seng ang ai kasi nkau mi hpe hkaja yu ga.​—Laika man 140 hta lawm ai “ Nye A Ga Gaw Shadaw Shalan Ya Ai Ga Rai Kun?” ngu ai lawk hpe yu u.

16, 17. (a) Kaga ni hpe hpa majaw shakawn ging ai kun? (b) Nawku hpung hta, dinghku hta kaga ni hpe shakawn na matu gara ahkaw ahkang ni nga ai kun?

¹⁶ Dingman ai myit hte shakawn ai lam. Yehowa hte Yesu gaw, shakawn ai ga, tsawra myit madun ai ga ni tsun ra ai hpe chye ai. (Mahte 3:17; 25:19-23; Yawhan 1:47) Hkristan ni hku nna anhte mung kaga ni hpe dingman ai myit hte shakawn ging ai. Hpa majaw kun? “Ahkyak e tsun ai ga gaw, gade pyaw nga a hka!” nga nna Ga Shagawp 15:23 hta tsun da ai. ‘Sharawng awng let shakawn hkrum ai shaloi ngai gara hku hkamsha ai kun? Myit dik nna n-gun lu mat ai n re i?’ nga nna tinang hkum tinang san yu u. Dingman ai myit hte shakawn ai ga a majaw, kaga ni gaw tinang hpe sadi hkrup ai lam, lanu lahku ai lam, tinang shakut ai gaw akyu nga ai hpe chye wa ai. Dai zawn hkamsha lam gaw, tinang hkum tinang kam ai myit grau nga wa nna, hpang de grau shakut galaw na matu shadut ya ai. Nang gaw shakawn hkrum ai shaloi, kabu ai nga yang,  kaga ni hpe mung dang lu ai daram shakawn ging ai n re i? ​—Mahte 7:12 hpe hti u.

¹⁷ Masha ni a kaja ai lam hpe tam nna shakawn chye ai akyang nga hkra shakut u. Nawku hpung hta nang gaw kaja ai mungga langai hpe madat lu ai. Wenyi lam hte seng ai bandung ni hpe shakut nna galaw nga ai ramma langai hpe nang sadi hkrup ai. Asak grai kaba sai majaw, n kung n kang raitim, zuphpawng ni hpe sadi dung let lung nga ai asak kaba ai marai langai hpe sadi hkrup ai. Dai shaloi, shanhte ni hpe dingman ai myit hte shakawn ya ai gaw, shanhte a myit masin hpe kabu shangun nna, Karai Kasang hpe matut nawku daw jau lu na matu n-gun lu shangun na re. Dinghku num, la ni gaw langai hte langai sharawng awng let shakawn nna chyeju dum ai ga ni tsun ra ai. (Ga Shagawp 31:10, 28, 29) Laksan hku nna kashu kasha ni gaw, lanu lahku hkrum ai shaloi, manu shadan hkrum ai shaloi grau nna zet let wa ai. Hpun langai tu wa na matu jan hte hka ra ai zawn, ma ni a rawt jat ai lam a matu mung shakawn ai ga hte tsawra myit ra ai. Kanu kawa ni e, kashu kasha ni a shakawn ging ai atsam ningja ni, shakut shaja ai lam ni a matu ahkaw ahkang tam nna shakawn ya u. Dai zawn shakawn ya ai gaw, kashu kasha ni hpe n-gun lu shangun nna, tinang hkum tinang kam ai myit nga wa hkra karum ya ai. Teng man ai hpe galaw na matu grau shakut mayu ai myit pyi nga wa shangun ai.

18, 19. Hpunau nauna shada da hpa majaw dang lu ai daram shalan shabran ging ai kun? Gara hku shalan shabran ya lu ai kun?

¹⁸ Myit shalan ya ai lam. Yehowa gaw “myit nem ai wa hte myit gyip ai wa” hpe grai lanu lahku ai. (Esaia 57:15) “Shada da shadum shahprang” na matu, “myit kaji nga ai ni hpe shalan shabran” na matu Chyum Laika hta tsun da ai. (1 Htesaloni 5:11, 14) Yawn hkyen nga ai hpunau nauna ni hpe shalan shabran ya na matu anhte shakut ai hpe Karai Kasang mu mada hkrup nna ra sharawng na hpe kam mai ai.

¹⁹ Raitim, myit daw nga ai Hkristan langai hpe gara hku n-gun jaw mai ai kun? Manghkang hpe nang hparan ya ra ai nga nna hkum sawn la yaw. Lam law law hta ga shaga  ai hte sha, tang du ai lam ni nga ai. Nang gaw myit daw nga ai wa hpe lanu lahku nga ai lam chye shangun u. Myit daw nga ai wa hte rau n sen pru nna akyu hpyi u. Kaga ni mung, Karai Kasang mung shi hpe kade daram tsawra ai lam shi chye hkra karum na matu, Yehowa hpang de akyu hpyi ya lu ai. (Yaku 5:14, 15) Hpung masha langai hku nna shi gaw ahkyak ai lam, shi hpe manu shadan ai lam chye shangun u. (1 Korinhtu 12:12-26) Shi hpe Yehowa teng sha lanu lahku ai lam kam na matu, n-gun lu hpa Chyum daw langai hpe hti dan u. (Shakawn 34:18; Mahte 10:29-31) Yawn hkyen nga ai ni hpe “ngwi pyaw ai ga” tsun na matu aten law law la u. Dai hpang, na a myit kraw kata na tsun ai ga a majaw, kaga ni gaw shi hpe tsawra ai lam, manu shadan ai lam shi chye na wa na re.​—Ga Shagawp 12:25 hpe hti u.

20, 21. Gara lam ni gaw, akyu nga ai hpaji jaw ga byin shangun ai kun?

²⁰ Akyu rawng ai hpaji ga. N hkum tsup ai ni hku nna anhte yawng aten shagu nyan hpaji lu na matu ahkyak ai. “Nang gaw htawm hpang de hpaji rawng ai wa tai na matu, Hpaji daw ai ga madat la u, sharin shaga ai ga hta la u” nga nna Chyum Laika hta n-gun jaw da ai. (Ga Shagawp 19:20) Myitsu salang ni sha masha ni hpe hpaji jaw ra ai n re. Kanu kawa ni mung kashu kasha ni hpe hpaji jaw ra ai. (Ehpesu 6:4) Kunghpan ai nauna ni mung asak kaji ai nauna ni hpe hpaji jaw ra ai. (Titu 2:3-5) Kaga masha ni a myit hta yu kaji hkrum ai ngu n hkamsha hkra, hpaji jaw chye na matu tsawra myit gaw anhte hpe shadut ya  ai. Dai zawn hpaji jaw lu na matu, hpa gaw karum ya lu na kun? Hpaji jaw ga hpe grau akyu nga shangun ai lam masum hpe hkaja yu ga. Hpaji jaw ai wa a myit jasat hte yaw shada lam, hpaji jaw ga a madung lam hte hpaji jaw ai ladat ni re.

²¹ Akyu nga ai hpaji jaw lu na matu, hpaji jaw ai wa maga hku nna galaw hpang ra ai. ‘Ngai rai yang, gara aten hta hpaji jaw ga hpe hkap la na matu loi ai kun?’ nga nna tinang hkum tinang san u. Hpaji jaw ai wa gaw, nang hpe lanu lahku ai lam, shi myit shuk nga ai majaw tsun ai ga n re ai lam, dingman ai myit hte tsun ai hpe nang chye ai shaloi, shi a hpaji jaw ga hpe hkap la na matu loi na re. Dai majaw, masha ni hpe hpaji jaw ai shaloi hta mung, na a myit jasat hte yaw shada ai lam gaw dai hte maren byin ging ai n re i? Akyu nga ai hpaji jaw ga gaw, Chyum Laika hta madung ai. (2 Timohti 3:17) Na a hpaji jaw ga gaw, Chyum Laika hpe ading tawk la kap da ai raitim, n raitim, Chyum Laika hpe madung da ging ai. Dai majaw, myitsu salang ni gaw tinang mu mada ai hte maren, kaga ni mu mada wa hkra atik anang n galaw na matu sadi ra ai. Dai hta n-ga, tinang a mu mada ai lam nkau mi hpe, Chyum Laika hta madi shadaw da ai zawn rai hkra, Chyum daw ni hpe shut ai hku jailang na n re. Jaw ai lam hku nna hpaji jaw na nga yang, grau nna akyu nga ai. Tsawra myit nga ai hpaji jaw ga gaw, hkap la na matu loi ai. Hkap la ai wa a sari hpe mung hkra machyi na n re.​—Kolose 4:6.

22. Ga shaga lu ai kumhpa hpe jailang ai hte seng nna nang gara hku myit dawdan da ai kun?

²² Ga shaga lu ai atsam gaw, Karai Kasang kaw nna manu dan ai kumhpa re. Dai kumhpa hpe shut ai hku jailang na n re ai sha, jaw ai hku jailang na matu Yehowa hpe tsawra ai myit gaw shadut ya ai. Masha ni hpe anhte tsun dat ai ga ni hta, mai kaja ai hku n-gun jaw lu ai atsam nga ai zawn, hkra machyi shangun lu ai atsam nga ai hpe mung matsing da ga. Dai kumhpa jaw ai Madu ra sharawng ai hte maren, “shadaw shalan” na matu ga hpe akyu nga hkra tsun shaga ga. Dai rai yang, anhte a ga gaw makau grupyin na masha ni hpe ngwi pyaw simsa shangun na re. Anhte mung Karai Kasang a n-gaw nwai ai tsawra myit hta galoi mung a nga nga lu na re.