1-3. (а) Хwәде чь пʹешкʹеш дайә мә, у ча һьнәк нәрʹаст wе дьдьнә хәбате? (б) Әм әве пʹешкʹеше ча гәрәке бьдьнә хәбате, wәки дь һʹьзкьрьна Хwәдеда бьминьн?

БЬДӘ бәр чʹәʹве хwә кö тә пʹешкʹешәк дайә кәсәки, ле әwи пʹешкʹеша тә нә рʹаст да хәбате. Тәйе чь ль сәр хwә тʹәхмин кьра? Мәсәлә һәрге тö авто-мәкʹине бьди мәрьвәки, ле әw жь бо автоажотьна нәфәсал, зийане бьда кәсәки. Һьлбәт тöйе гәләк бәрхwә кʹәви.

² Әв йәк кö әм дькарьн хәбәр дьн, пʹешкʹешәкә qимәт ә жь Хwәде. Нә ахьр «һәр дайина qәнщ у һәр пʹешкʹеша кʹамьл» жь Хwәде йә (Аqуб 1:17). Бь сайа ве пʹешкʹеше, кö мә жь һʹәйwана щöда дькә, әм дькарьн һьм фькьред хwә, һьм жи һәстед хwә дәрбази һәв бькьн. Ле һәла бьфькьрә кö дьле Йаһоwа чьqас дешә чахе кәсәк әве пʹешкʹеше нәрʹаст дьдә хәбате, у бь хәбәрдана хwә зийане дьдә мәрийа!

³ Сәва кö әм дь һʹьзкьрьна Хwәдеда бьминьн, лазьм ә әм әве пʹешкʹеша хәбәрдане öса бьдьнә хәбате, чаwа кö Әʹфьрандар сәре-серида хwәстийә. Йаһоwа рʹьнд мәрʹа дьдә кʹьфше, кö чь хәбәрдан wи хwәш те. Дь Кʹьтеба Пирозда те готьне: «Тʹö щар бьра жь дәве wә хәбәрәкә хьраб дәрнәйе, пештьри тьштед кö кери гöһдара тен у кʹаре дьдьнә wан» (Әфәси 4:29). Wәрә әм пебьһʹәсьн, кö чьма әм гәрәке зьмане хwә бькарьбьн, жь кʹижан  хәбәрдане гәрәке дур бьн, у чь хәбәрдан «кери гöһдара тен у кʹаре дьдьнә wан».

4, 5. Ча һьнә мәтʹәлокед жь Кʹьтеба Пироз qәwата хәбәрдане әʹйан дькьн?

⁴ Мәʹнийа әʹwьл, кö чьма әм гәрәке зьмане хwә бькарьбьн әw ә, кö qәwата хәбәрдана мә мәзьн ә. Дь кʹьтеба Мәтʹәлок 15:4-да öса ньвисар ә: «Зьмане ша кәр жийане дьдә, ле бәле зьмане чәwт [чʹәп, ДТʹ] рʹöһʹе бьриндар дькә». * Зьмане ша у рʹьһʹәт дькарә мәрийа нуйажин у qәwи бькә. Ле зьмане чʹәп дькарә һьлшинә. Бь рʹасти жи qәwата зьман һәйә йан бьриндар кә, йан жи qәнщ кә (Мәтʹәлок 18:21).

⁵ Дь мәтʹәлока дьнда рʹьнд те әʹйан кьрьне кö qәwата зьман чьqас ә: «Готьнен бефькьрандьн һатьнә готьн, мина шур дьбьрьн» (Мәтʹәлок 12:18). Хәбәред бефькьранди у ләз готи, дькарьн мина шур бьриндар кьн у һәләqәтийа ортʹа мәрийа хьраб кьн. Дьбәк кәсәки бь гьлийа дьле тә бьриндар кьрийә. Ле бир нәкә кö дь ве мәтʹәлокеда öса жи те готьне кö мәрьв бь гьлийа öса  жи дькарә qәнщ кә. Гьлийед рʹьнд һазьркьри, йед кö жь дәве хьзмәткʹаред билан дәртен, дькарьн дьле тәйи бьриндар qәнщ кьн, у әʹдьлайе бьдьнә тә. Һьлбәт тә жи ль сәр хwә тʹәхмин кьрийә qәwата хәбәред qәнщ. (Бьхунә Мәтʹәлок 16:24). Чьмки әм заньн кö qәwата хәбәрдане мәзьн ә, ләма әм дьхwазьн хәбәрдана хwә бьдьнә хәбате нә кö wәки бьриндар кьн, ле qәнщ кьн.

6. Чьма чәтьн ә зьмане хwә бькарьбьн?

⁶ Ле йазьх, кö әм чьqаси жи бьхwазьн әм нькарьн бь тʹәмами зьмане хwә контрол бькьн. Мәʹнийа дöда кö чьма әм гәрәке зьмане хwә бькарьбьн әw ә, кö әм мәринә гöнәкʹар ьн у qöсур ьн, у ләма әм нькарьн зьмане хwә рʹаст бьдьнә хәбате. Гьлийед мәрьв жь дьле мәрьв дәртен, ле «дьле мәрьв . . . хьраб ә» (Дәстпебун 8:21, ПКʹМ; Луqа 6:45). Ләма жи гәләк чәтьн ә зьмане хwә бькарьбьн. (Бьхунә Аqуб 3:2-4). Рʹаст ә әм нькарьн бь тʹәмами зьмане хwә контрол кьн, ле әм гәрәке бьхәбьтьн кö чьqаси дькарьн һе зедә контрол кьн. Чаwа совәкʹаре кö пешбәри пʹела дьчә у гәләк qәwат хәрщ дькә, öса жи әм гәрәке гәләк qәwат хәрщ кьн, сәва кö зьмане хwә рʹаст бьдьнә хәбате.

7, 8. Бона чь әме бәр Йаһоwа щабе бьдьн?

⁷ Мәʹнийа сьсийа, кö чьма әм гәрәке зьмане хwә бькарьбьн әw ә, кö һәр кәс жь мә бона хәбәрдана хwә wе бәр Йаһоwа щаба хwә бьдә. Демәк хәбәрдана мә нә кö тʹәне ль сәр һәләqәтийа мә тʹәви мәрийа, һʹöкöм дьбә, ле öса жи ль сәр wе йәке кö Йаһоwа wе мә qәбул кә, йан на. Дь кʹьтеба Аqуб 1:26-да ньвисар ә: «Һәрге йәк хwә хwәденас һʹәсаб дькә у зьмане хwә нькарә, әw хwәха хwә дьхапинә, хwәденасийа wи пʹучʹ ә». * Чаwа кö әм жь сәре 11 пеһʹәсийан, хәбәрдана мә хьзмәта мәва гьредайи йә. Һәрге әм зьмане хwә нькарьн, демәк  зьмане мә жәʹр ә у хәбәрдана мә бемәʹрифәти йә, wи чахи хьзмәта мә бәр чʹәʹве Хwәде пʹучʹ ә. Бь рʹасти жи әw фькьр мә һʹьшийар дькә! (Аqуб 3:8-10).

⁸ Гәләк мәʹнийед мә һәнә, кö әм пʹешкʹеша хәбәрдане рʹаст бьдьнә хәбате. Пешийа кö әм пебьһʹәсьн, кö кʹижан ә хәбәрдана qәнщ йа кö qәwи дькә, wәрә әм пебьһʹәсьн кö Мәсиһийед рʹаст жь кʹижан хәбәрдана гәрәке дур бьн.

9, 10. (а) Дь ве дьнйайеда хәбәрдана чь щурʹәйи буйә тьштәки бь нормал? (б) Чьма әм гәрәке жь хәбәрдана нәщайиз дур бьн? (Бьньһерʹә öса жи спартьн).

⁹ Хәбәрдана нәщайиз. Дь ве дьнйайеда хәбәрдана нәщайиз, чʹерʹ у хәбәрдана бемәʹрифәт тьштед нормал ьн. Гәләк мәрьв ван хәбәра дьдьнә хәбате чахе һерс дькʹәвьн. Һьнәк жи ван хәбәра жь бо wе йәке дьдьнә хәбате, кö хәбәред дьн ньзаньн. Гәләк щар сәва кö мәрийа бьдьнә кʹәнандьне, мәрьвед һʹәнәкчи дәрһәqа һәләqәтийа сексуал тьштед бенамуси дьбежьн. Ле бь рʹасти хәбәрдана нәщайиз, әw һʹәнәк нинә. Wәкә 2 000 сал пешда Паwлосе шанди готә щьвата дь Колосида wәки әwана жь «хәбәред нәщайиз» хwә дур бьгьрьн (Колоси 3:8). Ле щьвата Әфәсийерʹа Паwлос гот, кö «һʹәнәкед qәлпе хьраб» нава Мәсиһийед рʹаст qә гәрәке нәйнә готьне (Әфәси 5:3, 4).

¹⁰ Хәбәрдана нәщайиз беһöрмәт дькә һьм Йаһоwа Хwәде, һьм жи хьзмәткʹаред wи. Жь бо һʹьзкьрьна һьндава Хwәде әм хwә жь һʹәму хәбәред нәщайиз дур дьгьрьн. Чахе Паwлос дәрһәqа «кьред бьнйатʹа инсен» гот, әwи öса жи да хәбате хәбәра «һʹәрами», кʹижан кö öса жи те һʹәсабе хәбәрдана нәщайиз (Галати 5:19-21). Әв пьрсәкә гьран ә. Һәрге Мәсиһи хәбәред нәщайиз, бенамуси у хәбәред кö һьлдьшиньн дьбежә, у һәрге  бона wе йәке чәнд щара ширәта дьдьнә wи, ле әw тʹобә накә у диса wан хәбәра дьбежә, wи чахи әw жь щьвате дәрдьхьн. *

11, 12. (а) Чь те һʹәсабе гәвәзти, у ча әв йәк дькарә зийане бьдә? (б) Чьма хьзмәткʹаред Йәһоwа гәрәке дур бьн жь бöхданбежийе?

¹¹ Гәвәзти у бöхдан. Хәйсәте мәрьва һәйә, кö дәрһәqа мәрвед майин хәбәр дьн. Гәло әв йәк хьраб ә? Һәрге тьштед баш у керһати хәбәр дьдьн, wи чахи на. Мәсәлә һәрге хәбәр дьдьн дәрһәqа wе йәке кö кәсәк wан пашwахтийа һатийә ньхöмандьне, йан жи кәсәк һʹәwщә йә кö аликʹарийе бьдьне. Мәсиһийед бәре хәм дькьрьн бона һәв дö, у һәв дö qәwи дькьрьн, wана дәрһәqа хушк-бьра дәнг у бәʹсед öса гьли дькьрьн кö һәв дö бьшьдиньн (Әфәси 6:21, 22; Колоси 4:8, 9). Гәвәзти те һʹәсабе әw хәбәрдан чахе факта дьгöһезьн йан жи тьштед мәрьвайә шәхси дьбежьн, демәк тьштед кö мәрьвед дьн гәрәке пенәһʹәсьн. Щарна гәвәзти дьбә бәрбь бöхдана, ле бöхдан тʹьме зийандар ә. Бöхдан, әв һәйә бәлакьрьна әʹламәтийа qәлп, сәва кö наве мәрийа хьраб кьн. Мәсәлә, Ферьсийа сәва кö наве Иса хьраб кьн, бöхдан авитьнә wи (Мәтта 9:32-34; 12:22-24). Бöхдан гәләк щар дьбә бәрбь шәрʹкьрьне (Мәтʹәлок 26:20).

¹² Йаһоwа wе әʹсәйи щәза кә wан мәрийа, йед кö пʹешкʹеша хәбәрдане нәрʹаст дьдьнә хәбате у бöхдана давежьнә мәрийа у ортʹа wан һәвдьхьн. Йаһоwа нәфрʹәт дькә wан мәрийа йед кö шәрʹ-дәʹwа дькьнә ортʹа мәрийа (Мәтʹәлок 6:16-19). Хәбәра Йунани диаболос, кʹижан кö  те һʹәсабе «бöхданбеж», әв һәйә навәки Шәйтʹан. Шәйтʹан Иблис ә, демәк бöхданбеже кö бöхдан авитә Хwәде (Әʹйанти 12:9, 10). Бешьк әм нахwазьн бьбьнә мина Шәйтʹан, ләма жи әм гәрәке дур бьн жь бöхданбежийе. Щьват щийе бöхданбежийе нинә, чьмки бöхдан мәрийа дьбә бәрбь «һерскʹәтьне», «дöтирәтийе, щöдатийе» (Галати 5:19-21). Ләма жи пешийа кö бона кәсәки әʹламәтийе бәла ки, пьрсед öса бьдә хwә: «Әв әʹламәтийа рʹаст ә, йан на? Һәрге әз әве әʹламәтийе бәла кьм әз qәнщийе дькьм, йан хьрабийе? Әʹсәйи йә, йан жи лазьм ә әве әʹламәтийе бежьм, йан на?» (Бьхунә 1 Тʹесалоники 4:11).

13, 14. (а) Хәбәрдана кö беһöрмәт дькә, чь зийане дьдә? (б) Чь те һʹәсабе кʹьфьри-зьфьри, у кʹи кö кʹьфьрийа дькә чь зийане дьдә хwә?

¹³ Кʹьфьри-зьфьри. Ча мә ида гот, хәбәр дькарьн дьле мәрийа бьриндар кьн. Чьмки әм гöнәкʹар ьн, щарна әм тьштед öса дьбежьн, кö паше пʹошман дьбьн. Ле Кʹьтеба Пироз тʹәмийе дьдә мә, wәки әм хwә жь хәбәрдана öса дур бьгьрьн, һьм щьватеда һьм жи дь малбәтеда. Паwлосе шанди гьлийе öса гот: «Дә бьра һәр тәʹлайи, һерс, бәрзәqи, qарʹә-qарʹ у кʹьфьри-зьфьри жь wә дур бьн тʹәви һәр щурʹә кʹин-бохийева» (Әфәси 4:31). Дь wәлгәрʹандьнед дьненада дәwса хәбәра «кʹьфьри-зьфьри» те хәбьтандьне хәбәред öса: «Хәбәрдана кö беһʹормәт дькә», «хәбәрдана зöлми». Чахе кәсәки бь хәбәред хwә беһöрмәт дьки, йан жи тʹьме кьритик дьки у нәһәq дьки, wи чахи әw мәрьв дькарә хwә кемqимәт у qә нә тʹö тьшт һʹәсаб кә. Илаһи дьле зарʹа гәләк назьк ә, ләма кʹьфьркьрьн у беһöрмәткьрьн дькарә зийанәкә мәзьн бьдә зарʹа (Колоси 3:21).

¹⁴ Кʹьтеба Пироз сәрт qәдәхә дькә кʹьфьркьрьне, демәк хәбәрдана кö мәрийа беһöрмәт дькә. Кʹи кö бь хәбәра, мәрийа беһöрмәт дькә әw дькарә зийане бьдә  хwә. Чьмки һәрге әw чәнд щара бе ширәткьрьне, ле рʹаст нәбә, wи чахи әw wе жь щьвате бе дәрхьстьне. Һәрге әw тʹобә нәкә wи чахи әw дькарә кʹәрәма жийина һʹәта-һʹәтайе öнда кә (1 Корьнтʹи 5:11-13; 6:9, 10). Демәк һәрге әм нәрʹастийе дьбежьн, у бь хәбәред хwә зийане дьдьн, öса жи һәрге хәбәрдана мә нәщайиз ә, wи чахи әм нькарьн һʹьзкьрьна Хwәдеда бьминьн. Чьмки хәбәрдана öса һьлдьшинә.

15. Хәбәрдана чь щурʹәйи кʹаре тинә у qәwи дькә

¹⁵ Ча әм дькарьн пʹешкʹеша хәбәрдане öса бьдьнә хәбате чаwа кö Хwәде сәре-серида qьрар кьрийә? Бинә бира хwә кö Хwәде мә һелан дькә тʹәне «тьштед кö кери гöһдара тен у кʹаре дьдьнә wан» бежьн (Әфәси 4:29). Йаһоwа ша дьбә чахе әм тьштед öса хәбәр дьдьн, чь кö мәрийа һелан дькә, дьлгәрм у qәwи дькә. Ле дь Кʹьтеба Пирозда конкрет нәһатийә ньвисаре әw хәбәред бона qәwикьрьне, wәки бьзаньбьн чь хәбәра бьдьн хәбате. Ләма жи, сәва кö гьлийед öса бежьн лазьм ә мәрьв пешда рʹьнд бьфькьрә (Тито 2:8). Ньһа әме хәбәр дьн бона се нишана, wәки чаwа әм дькарьн бьзаньбьн кʹижан хәбәрдан «кери гöһдара тен у кʹаре дьдьнә wан». Хәбәрдана кö кʹаре тинә йа пешьн гәрәке qәнщийе бинә, йа дöда гәрәке рʹаст бә, у йа сьсийа гәрәке бь рʹәʹмти бә. Wәрә ньһа дәрһәqа хәбәрдана кö qәwи дькә һьнә мәсәлед конкрет пебьһʹәсьн. (Бьньһерʹә чаргошә, наве чаргоше öса нә: « Гәло хәбәрдана мьн qәwи дькә?»)

16, 17. (а) Чьма әм гәрәке пʹайе мәрийа бьдьн? (б) Чь мәщалед мә һәнә пʹайе мәрийа бьдьн дь щьватеда? У дь малбәтеда?

¹⁶ Пʹайидайина дьлпʹаки. Йаһоwа у Иса Мәсиһ рʹьнд заньн кö лазьм ә хәбәре пʹайидайине у qәwикьрьне (Мәтта 3:17; 25:19-23; Йуһʹәнна 1:47). Әм жи чаwа Мәсиһи гәрәке пʹайе мәрийа бьдьн. Ле чьма?  Дь Мәтʹәлок 15:23-да аһа те готьне: «Бәрсива ль щиһ, хwәдийе хwә кʹефхwәш дькә у готьна кö дь щиһе хwә дә те готьн, чьqас хwәшьк ә!» Һәла пьрсе бьдә хwә: «Әз чь сәр хwә тʹәхмин дькьм чахе бь дьл у щан пʹайе мьн дьдьн? Пʹайе öса мьн фьрнаq у дьлгәрм дькьн?» Бь рʹасти пʹайи дьдә кʹьфше кö шьхöле тә һатийә тʹәхминкьрьне у тö тейи qимәткьрьне. Әв йәк тә дьдә баwәркьрьне кö тö дькари шьхöл бьки у бал тә хwәстьн пешда те кö һе зедә бьки. Чахе пʹайа дьдьнә тә, зәʹф тә хwәш те рʹаст ә? Дә wәки öса нә, тö жи пʹайе мәрьва бьдә. (Бьхунә Мәтта 7:12).

¹⁷ Бьхәбьтә кö мәрьвада тьштед баш бьвини у пʹайа бьди wан. Дь щьватеда тö дькари бьбьһейи тʹемайа рʹьнд сазкьри, тʹәхмин ки кö мьзгинване щаһьл һʹәму тьшти дькә кö рʹöһʹанида пешда һәрʹә, йан жи Мәсиһи кʹижан кö рʹаст ә әʹмьрда мәзьн ә, ле һәр тʹьм те щьвате. Пʹайе дьлпʹаки wе али wан мәрьва бькьн кö әwана рʹöһʹани qәwи бьн. Дь малбәтеда жьн у мерарʹа лазьм ә пʹайа бьдьнә һәв у рʹазибуна хwә һәврʹа бьдьн кʹьфше (Мәтʹәлок 31:10, 28). Ле чахе зарʹа qимәт дькьн әwана жь шабуне гәш дьбьн. Ча тәʹв у ав лазьм у кʹар ә бона шинкайе, öса жи пʹайидайин бона зарʹа. Де-бавно, һәр мәщаләке бьдьнә хәбате wәки пʹайе зарʹед хwә бьдьн бона шьхöл у һʹöнöред wанә баш. Пʹайидайин wе али wан бькә, кö әwана һе мерхас бьн у әwана wе һелан бьн тʹьме тьштед рʹаст бькьн.

18, 19. Чьрʹа әм гәрәке бетьмайи wәʹде хwә хәрщ кьн, сәва кö дьл бьдьнә хöшк-бьра, у ча дькарьн әве йәке бькьн?

¹⁸ Дьл бьдьнә һәв. Йаһоwа хәм дькә бона «бәләнгаза» у дьлшкәстийа (Ишайа 57:15). Хәбәра Хwәде мә һелан дькә: «Дьл бьдьнә һәв» у «кери кʹәтийа» бен (1 Тʹесалоники 5:11, 14). Әм сәд сәләфи заньн кö чахе әм аликʹарийе дьдьнә кʹәтийа, Йаһоwа дьвинә у дьшекьринә шьхöле мә.

 ¹⁹ Ча тö дькари дьл бьди wан мәрийа, йед кö дьлтәнг бунә? Нәфькьрә кö тö әʹсәйи гәрәке проблема wи сафи ки. Һәрге тö пе хәбәра, дьл бьди wи, әв йәк ида гәләк баш ә. Wана бьдә баwәркьрьне кö тö wана qимәт дьки у һазьр и али wан бьки. Һун дькарьн тʹәвайи дöа бькьн. Тö дькари дöакьрьнеда һиви жь Хwәде бьки, wәки әw бьра йан хушк фәʹм бькә, кö әм у Хwәде чьqас wи йан wе һʹьз дькьн (Аqуб 5:14, 15). Бежә wи йан wе, кö әw гәләк qимәт ә бона хушк-бьра (1 Корьнтʹи 12:12-26). Wирʹа рʹезәкә öса бьхунә жь Кʹьтеба Пироз, кö бе кʹьфше wәки Хwәде илаһи бона wи хәм дькә (Зәбур 34:18; Мәтта 10:29-31). Һәрге тö бь дьл у щан wәʹде хwә хәрщ ки, сәва кö бь хәбәред qәнщ дьл бьди бәр wи мәрьви, тöйе бькарьби wи бьди баwәркьрьне, кö әw qимәт ә у гьшк wи һʹьз дькьн. (Бьхунә Мәтʹәлок 12:25).

20, 21. Бь сайа чь ширәт дькарә кʹаре бинә?

²⁰ Ширәта керһати. Мә һәр кәсирʹа лазьм ьн ширәт, чьмки әм гьшк жи гöнәкʹар ьн. Кʹьтеба Пироз мә һелан дькә: «Гöһ бьдә ширәте у пәрwәрдәйе qәбул бькә кö, дь майина тʹәмәна хwә дә тö занийар бьбә» (Мәтʹәлок 19:20). Ширәта нә тʹәне рʹуспи дькарьн бьдьн. Мәсәлә, де-бав ширәта дьдьнә зарʹед хwә (Әфәси 6:4). Хушкед әʹмьрда мәзьн дькарьн ширәта бьдьнә щаһьла (Тито 2:3-5). Һʹьзкьрьн мә һелан дькә, кö әм ширәта бь  щöрʹәки öса нәдьн, кö дьле мәрийа бешиньн. Ле чь wе али мә бькә ве йәкеда? Әме ньһа хәбәр дьн бона се тьшта, йед кö wе али мә бькьн, кö әм ширәта бь щурʹәки öса бьдьн wәки керһати бә. Йа пешьн, чь йә нет у мәрәма wи кʹи кö ширәте дьдә. Йа дöда, һʹиме ширәте чь йә. У йа сьсийа, ширәт бь чь щурʹәйи те дайине.

²¹ Сәва кö ширәта тә кʹаре бинә, пьрсәкә öса бьдә хwә: «Ле мьнрʹа wе кʹәнге һеса бә ширәте qәбул кьм? Һьлбәт wи чахи, чахе тö зани wәки әwе кö ширәте дьдә тә, дьле wи сәр тә дьшәwьтә у нет-фькьред wи вәшарти ниньн, демәк әшкәрә йә кö әw тәрʹа qәнщийе дьхwазә, нә кö хьрабийе. Ләма тö жи гәрәке һәма бь wи щурʹәйи ширәта бьди. Бир нәкә кö ширәта баш гәрәке ль сәр һʹиме Кʹьтеба Пироз бә (2 Тимотʹейо 3:16). Щарна дьбәк әм рʹезе жь Кʹьтеба Пироз нәхуньн у нә жи әзбәри бежьн, ле ширәта мә диса жи гәрәке ль сәр һʹиме Кʹьтеба Пироз бә. Ләма жи рʹуспи тʹö щар ширәта жь бәр хwә дәрнахьн, у фькьред хwә зоре сәр мәрийава накьн. Әwана öса жи тʹö щар нета тʹö хәбәрәкә жь Кʹьтеба Пироз нагоһезьн, wәки избат кьн кö йан чь фькьра wи жь Кʹьтеба Пироз ә. Ширәта мә wи чахи кʹарәкә мәзьн тинә чахе әм рʹаст ширәта дьдьн. Һәрге тö ширәте бь һʹьзкьрьне бьди, wи чахи мәрьв wе һеса qәбул кә чьмки тö wи ньмьз наки (Колоси 4:6).

22. Тö пʹешкʹеша хәбәрдане ча дьхwази бьди хәбате?

²² Бь рʹасти жи хәбәрдан әв пʹешкʹешәкә беһʹәсаб qимәт ә жь Хwәде. Жь бо һʹьзкьрьна һьндава Хwәде әм гәрәке рʹаст бьдьнә хәбате әве пʹешкʹеше. Бьра тʹьме бира мәда бә, кö qәwата хәбәрдана мә мәзьн ә, әw дькарә йан qәwи кә, йан жи һьлшинә. Wәрә әм хәбәрдана хwә öса бьдьнә хәбате, чаwа кö Хwәде сәре-серида qьрар кьрийә, демәк бона qәwикьрьне бьдьнә хәбате. Һәрге әм öса бькьн, wи чахи хәбәрдана мә wе бьбә кʹәрәм бона мәрьва, у әме бькарьбьн һʹьзкьрьна Хwәдеда бьминьн.