1-3. (a) Wetin na wan pan di gift dɛn we Jiova dɔn gi wi? Aw sɔm nɔ kin yuz am fayn? (b) Fɔ mek Gɔd kɔntinyu fɔ lɛk wi, aw wi fɔ yuz dis gift?

IF YU gi gift to sɔmbɔdi, aw yu go fil if di pɔsin nɔ de yuz am fayn? Lɛ wi se yu gi di pɔsin wan fayn fayn motoka. Bɔt yu kam no se di pɔsin nɔ de tek tɛm drayv, ɛn i de ivin bang pipul dɛn. Yu go mɔs fil bad, nɔto o?

² Di tɔk we mɔtalman ebul fɔ tɔk, na gift we Jiova gi wi. Na dat mek di Baybul se, “na Gɔd nɔmɔ de gi wi ɔl dɛn tin we gud.” (Jems 1:17) Na dis gift mek mɔtalman difrɛn frɔm di animal dɛn we Gɔd mek. Di tɔk we wi de tɔk de mek wi ebul tɛl ɔda pipul dɛn wetin wi de tink ɛn aw wi de fil. Bɔt if wi nɔ tek tɛm, wi nɔ go yuz dis gift fayn jɔs lɛk aw da pɔsin nɔ bin yuz da motoka fayn. Jiova go fil bad if wi de tɔk tin dɛn we de mek wi kɔmpin dɛn at pwɛl.

³ Fɔ mek Gɔd kɔntinyu fɔ lɛk wi, wi fɔ yuz dis gift di we aw i want wi fɔ yuz am. Jiova dɔn tɛl wi klia wan bɔt di kayn we aw i want wi fɔ tɔk we go mek i gladi. Na dat mek in Wɔd tɛl wi se: “Una fɔ lɛf fɔ tɔk bad wɔd, una fɔ de tɔk dɛn wɔd we go ɛp ɔda pipul, so dat wetin una de tɔk go du gud fɔ di pipul dɛn we de yɛri una.” (Lɛta Fɔ  Ɛfisɔs 4:29) Lɛ wi tɔk naw bɔt wetin mek wi fɔ tek tɛm aw wi de tɔk, uskayn tɔk dɛn wi fɔ avɔyd, ɛn aw wi go tɔk tin dɛn we go “ɛp ɔda pipul” dɛn.

4, 5. Aw sɔm parebul dɛn na di Baybul sho se di wɔd dɛn we wi kin tɔk gɛt pawa?

⁴ Wan impɔtant rizin we mek wi fɔ tek tɛm tɔk na dat, di wɔd dɛn we wi kin tɔk gɛt pawa. Na dat mek Prɔvabs 15:4 tɔk se: “Fayn ansa tan lɛkɛ tik we de gi layf, bɔt bakansa de kil pɔsin in spirit.” Jɔs lɛk aw wata kin mek plant we want day gɛt layf bak, na so di fayn wɔd dɛn we wi kin tɔk kin ɛnkɔrej ɔda pipul dɛn. Bɔt di bad ɛn lay lay tin dɛn we wi kin tɔk kin mek ɔda pipul dɛn shem ɔ mek dɛn at pwɛl. Fɔ tru, di wɔd dɛn we wi kin tɔk gɛt pawa fɔ mek, ɛn dɛn gɛt pawa fɔ pwɛl.​—Prɔvabs 18:21.

⁵ Fɔ sho klia wan aw wɔd gɛt pawa, wan ɔda parebul tɔk se: “Wɔd we pɔsin nɔ tink bɔt bifo i pul am na mɔt, kin kɔt shap lɛk sɔd.” (Prɔvabs 12:18) If pɔsin nɔ tink bifo i tɔk, i go tɔk wɔd we go wund ɔda pɔsin in at, ɛn we go pwɛl di fayn padi biznɛs we i gɛt wit ɔda pipul dɛn. Sɔmbɔdi dɔn ɛva tɛl yu wɔd we wund yu at? Di sem parebul tɔk bɔt di fayn tin we gud wɔd kin du.  I se, udat “gɛt sɛns, wɛn i tɔk, i kin mek pɔsin at kol.” If pɔsin de tink bifo i tɔk, i de sho se i gɛt Gɔd in sɛns. Dis kin mek i ebul ɛp pɔsin we in at pwɛl ɛn mek pipul dɛn mek pis. Sɔmbɔdi dɔn ɛva tɛl yu wɔd we mek yu at gladi? (Rid Prɔvabs 16:24.) We wi dɔn no se di wɔd dɛn we wi de tɔk gɛt pawa, dis fɔ mek wi tɔk tin dɛn we go mek pipul dɛn at gladi, nɔto tin dɛn we go mek dɛn at pwɛl.

6. Wetin mek i nɔ kin izi fɔ kɔntrol di tin dɛn we wi de tɔk?

⁶ Ilɛksɛf wi tray te, wi nɔ go ebul fɔ kɔntrol ɔl di tin dɛn we wi de tɔk. Di sɛkɔn rizin we mek wi fɔ tek tɛm tɔk na dat, wi de sin ɛn wi nɔ pafɛkt, so dis kin mek wi tɔk tin dɛn we nɔ fayn. Di tin dɛn we kin de na wi at, na in wi kin tɔk, ɛn “na soso bad tin” mɔtalman kin tink. (Jɛnɛsis 8:21; Lyuk 6:45) I nɔ rili izi fɔ kɔntrol di tin dɛn we wi kin tɔk. (Rid Jems 3:2-4.) Na tru se wi nɔ go ebul kɔntrol ɔl wetin wi de tɔk bikɔs wi nɔ pafɛkt, bɔt wi fɔ tray fɔ du ɔl wetin wi ebul du fɔ mek wi tek tɛm tɔk. I jɔs tan lɛk we pɔsin want fɔ krɔs riva. Di pɔsin gɛt fɔ tray tranga wan fɔ mek di wata nɔ kɛr am go. Semweso, wisɛf gɛt fɔ tray tranga wan fɔ kɔntrol di tin dɛn we wi de tɔk.

7, 8. Aw di tin dɛn we wi de tɔk go ambɔg wi padi biznɛs wit Jiova?

⁷ Di tɔd rizin we mek wi fɔ tek tɛm tɔk na dat wi gɛt fɔ ansa to Jiova fɔ di tin dɛn we wi de tɔk. Di tin dɛn we wi de tɔk nɔ jɔs de ambɔg wi padi biznɛs wit wi brɔda dɛn, bɔt i ivin de ambɔg wi padi biznɛs wit Jiova. Jems 1:26 tɔk se: “If ɛnibɔdi tink se in de fala Gɔd ɛn i nɔ de tek tɛm wɛn i de tɔk, i de mek insɛf ful. Na fɔ natin di pɔsin de fala Gɔd.” * As wi bin dɔn lan na Chapta 11, di tin dɛn  we wi de tɔk gɛt fɔ du wit wi wɔship. If wi nɔ de kɔntrol di tin dɛn we de kɔmɔt na wi mɔt, ɔl di fayn wok we wi de du fɔ Gɔd, go bi fɔ natin. Dis na siriɔs tin fɔ tink bɔt, nɔto so?​—Jems 3:8-10.

⁸ Wi dɔn si klia wan se wi gɛt gud rizin dɛn fɔ mek wi tek tɛm tɔk. Naw, lɛ wi tɔk bɔt di tin dɛn we Kristian nɔ fɔ ɛva tɔk. Afta dat, wi go tɔk bɔt tin dɛn we wi go tɔk we go ɛp ɔda pipul dɛn.

9, 10. (a) Aw pipul dɛn de tɔk na di wɔl tide? (b) Wetin mek wi nɔ fɔ tɔk ɔ lisin to dɔti tɔk? (Rid di futnot.)

⁹ Dɔti tɔk. Na soso kɔs, bad wɔd, ɛn ɔda dɔti dɔti tɔk dɛn pipul dɛn de yuz na di wɔl tide. Bɔku pipul dɛn kin tɔk bad wɔd we dɛn vɛks ɔ fɔ mek pipul dɛn fil fayn. Kɔmidian dɛnsɛf kin yuz rud wɔd dɛn ɛn tɔk bɔt tin dɛn we gɛt fɔ du wit mami ɛn dadi biznɛs fɔ mek pipul dɛn laf. Bɔt dis na siriɔs tin, nɔto tin we wi fɔ tek mek jok. Na lɛk 2,000 ia dɔn pas frɔm we di apɔsul Pɔl tɛl di brɔda dɛn we de na Kɔlɔse se, dɛn “nɔ fɔ tɔk bad wɔd.” (Lɛta Fɔ Kɔlɔse 3:8) Pɔl bin tɛl di brɔda dɛn na Ɛfisɔs bak se, dɛn “nɔ fɔ tɔk bad, fulish, ɔ dɔti wɔd.” I tɛl dɛn bak se, ‘i nɔ gud sɛf fɔ mek dɛn de tɔk bɔt dɛn tin ya to dɛn kɔmpin’ Kristian dɛn.​—Lɛta Fɔ Ɛfisɔs 5:3, 4.

¹⁰ Dɔti tɔk na tin we Jiova et bad bad wan. Di wan dɛnsɛf we de sav am nɔ fɔ lɛk dɔti tɔk. Fɔ tru, di lɛk we wi lɛk Jiova, go mek wi nɔ tɔk ɔ lisin to dɔti tɔk. We Pɔl bin de tɔk bɔt di tin dɛn we “mɔtalman lɛk,” i bin tɔk bɔt “bad layf.” Wan pan di tin dɛn we de sho se pɔsin de liv bad layf na we i de tɔk dɔti tɔk dɛn. (Lɛta Fɔ Galeshya 5:19-21) Dis na siriɔs siriɔs tin! If dɛn dɔn wɔn pɔsin bɔku tɛm fɔ lɛf fɔ tɔk dɛn dɔti tɔk, fɔ lɛf fɔ tɔk dɛn bad wɔd, ɛn dɛn tin we go briŋ kɔnfyushɔn na di kɔngrigeshɔn,  bɔt i nɔ gri fɔ chenj, dɛn kin disfɛloship dis kayn pɔsin. *

11, 12. (a) Ustɛm i bad fɔ tɔk bɔt ɔda pɔsin? (b) Wetin mek pɔsin we de wɔship Jiova nɔ fɔ tɔk lay lay tin bɔt ɔda pɔsin?

¹¹ Fɔ tɔk bad bɔt ɔda pɔsin ɛn fɔ lay. Pipul dɛn kin tɔk bɔt ɔda pipul dɛn. Bɔt i bad fɔ tɔk bɔt ɔda pipul dɛn? Nɔ, i nɔ bad, wans na gud tin wi de tɔk, lɛk udat jɔs baptayz ɔ udat wi gɛt fɔ ɛnkɔrej. Dɛn fɔstɛm Kristian dɛn bin kia fɔ dɛn kɔmpin dɛn ɛn dɛn bin de tɔk gud tin bɔt dɛn kɔmpin Kristian dɛn. (Lɛta Fɔ Ɛfisɔs 6:21, 22; Lɛta Fɔ Kɔlɔse 4:8, 9) Bɔt i bad fɔ tɔk bɔt ɔda pipul dɛn we di tin we wi de tɔk nɔto tru ɔ we wi de pul di pɔsin in sikrit na do. Dis na tin we siriɔs bikɔs i kin mek wi tɔk lay lay tin bɔt pɔsin. Ɛn dis kin du bad bad tin to di pɔsin. We yu tɔk lay lay tin bɔt pɔsin, yu de pwɛl in nem. Fɔ ɛgzampul, di Faresi dɛn bin de tɔk lay lay tin dɛn bɔt Jizɔs fɔ pwɛl in nem. (Matyu 9:32-34; 12:22-24) Fɔ tɔk lay lay tin bɔt ɔda pipul dɛn kin briŋ plaba.​—Prɔvabs 26:20.

¹² Jiova nɔ de tek am izi wit di wan dɛn we de yuz dɛn mɔt fɔ pwɛl ɔda pipul dɛn ɔ fɔ kam wit kɔnfyushɔn. I et di wan dɛn “we de briŋ plaba bitwin padi dɛn.” (Prɔvabs 6:16-19) Di Grik wɔd we dɛn yuz fɔ “pɔsin we de tɔk lay tɔk bɔt ɔda pɔsin” na di·aʹbo·los. Na wan pan di taytul dɛn dis we dɛn gi Setan. Setan na “Dɛbul” we min se na in de tɔk lay lay tin dɛn bɔt Gɔd. (Rɛvɛleshɔn 12:9, 10) So wi nɔ fɔ tɔk lay lay tin dɛn we go mek wi jɔs tan  lɛk dɛbul. Nɔbɔdi nɔ fɔ tɔk lay lay tin dɛn bɔt in kɔmpin. Dɛn tin ya go kam wit prɔblɛm na di kɔngrigeshɔn. (Lɛta Fɔ Galeshya 5:19-21) So bifo yu tɔk sɔntin bɔt ɔda pɔsin, aks yusɛf dɛn kwɛstyɔn ya: ‘Dis tɔk we a want tɔk, na tru? I go fayn fɔ lɛ a tɛl ɔda pɔsin? I go fayn fɔ lɛ a skata dis tɔk?’​—Rid Fɔs Lɛta Fɔ Tɛsalonayka 4:11.

13, 14. (a) Aw pɔsin kin fil we dɛn kɔs am ɔ tɛl am bad wɔd? (b) Wetin i min fɔ tɔk bad wɔd? Wetin mek pɔsin we de gi ɔda pipul dɛn badnem de put insɛf pan denja?

¹³ Fɔ kɔs. As wi bin dɔn tɔk, wɔd gɛt pawa fɔ mek pipul dɛn at pwɛl. Na tru se, wi ɔl kin tɔk tin we wi kin rigrɛt leta, bikɔs wi nɔ pafɛkt. Bɔt di Baybul dɔn wɔn wi bɔt di we aw Kristian dɛn nɔ fɔ de tɔk na dɛn os ɔ na di kɔngrigeshɔn. Pɔl bin tɛl Kristian dɛn se: “Una nɔ fɔ gɛt bad at fɔ una kɔmpin, una nɔ fɔ gɛt wam at, una nɔ fɔ ala pan ɛnibɔdi, ɛn una nɔ fɔ kɔs. Una nɔ fɔ et ɛnibɔdi ɛn una nɔ fɔ tɔk bad bɔt una kɔmpin.” (Lɛta Fɔ Ɛfisɔs 4:31) Insay ɔda Baybul dɛn, dɛn translet “una nɔ fɔ kɔs” as una ‘nɔ fɔ tɔk wikɛd tin,’ ‘una nɔ fɔ tɔk tin we go wund ɔda pɔsin in at,’ ɛn ‘una nɔ fɔ tɔk wɔd we go mek pɔsin fil bad.’ Apat frɔm dɛn wan ya, i kin min bak fɔ kɔl pɔsin nem we go mek i fil bad ɔ fɔ de ala ɛn tɔk bad bɔt pɔsin ɔltɛm we go mek di pɔsin nɔ gɛt wan rɛspɛkt, ɛn we go mek di pɔsin fil lɛk se in na natin. Na pikin dɛn mɔ kin fil am we pɔsin de kɔs ɔ ala pan dɛn.​—Lɛta Fɔ Kɔlɔse 3:21.

¹⁴ Di Baybul sho wi klia wan se i nɔ fayn fɔ de tɔk bad wɔd. Dis min se wi nɔ fɔ tɔk wɔd dɛn we go mek ɔda pipul dɛn shem, fil bad, ɔ fil lɛk se dɛn nɔ impɔtant. Ɛnibɔdi we de du dɛn tin ya de put insɛf pan denja, bikɔs if i nɔ gri fɔ chenj pan ɔl we dɛn dɔn tɔk to am plɛnti tɛm, dɛn go disfɛloship am. Bɔt nɔto dat nɔmɔ, i nɔ go ebul fɔ ɛnjɔy di fayn blɛsin fɔ de na Paradays. (Fɔs Lɛta Fɔ Kɔrint  5:11-13; 6:9, 10) Ɔl dis dɔn sho wi klia wan se Gɔd nɔ go kɔntinyu fɔ lɛk wi if wi de mek am abit fɔ de tɔk tin we nɔ gud, tin we nɔ tru, ɔ tin we nɔ fayn. Dɛn kayn tɔk ya, de pwɛl ɔda pipul dɛn at, ɛn i nɔ de ɛp dɛn atɔl.

15. Aw wi go tɔk we go “ɛp ɔda pipul dɛn”?

¹⁵ Aw wi go ebul yuz wi mɔt jɔs lɛk aw Gɔd want wi fɔ yuz am? Mɛmba di advays we di Baybul gi wi we i se, wi “fɔ de tɔk dɛn wɔd we go ɛp ɔda pipul” dɛn. (Lɛta Fɔ Ɛfisɔs 4:29) Jiova kin gladi we wi de tɔk tin dɛn we de ɛp ɔda pipul dɛn, ɛnkɔrej dɛn, ɛn mek dɛn fil fayn. If wi want fɔ tɔk dɛn kayn tin ya, wi fɔ tink fɔs gud gud wan. Di Baybul nɔ tɛl wi di patikyula wɔd dɛn we wi fɔ tɔk, ɛn i nɔ gɛt list usay wi go pik “gud gud” wɔd dɛn fɔ tɔk. (Taytɔs 2:8) Fɔ lɛ wi ebul tɔk wɔd dɛn “we go ɛp ɔda pipul” dɛn, i go fayn mek wi tink bɔt dɛn tri impɔtant tin ya: Di tin dɛn we wi de tɔk fɔ gud, dɛn fɔ tru, ɛn dɛn fɔ mek ɔda pipul dɛn fil fayn. As wi de tink bɔt dɛn tri tin ya, lɛ wi tɔk bɔt sɔm ɛgzampul dɛn we go sho wi aw wi go tɔk we go ɛp ɔda pipul dɛn.​—Rid di bɔks we se “ Di We Aw A De Tɔk De Ɛp Ɔda Pipul Dɛn?”

16, 17. (a) Wetin mek wi fɔ prez ɛn tɛl ɔda pipul dɛn tɛnki? (b) Wetin wi fɔ prez ɛn tɛl pipul dɛn tɛnki fɔ na di kɔngrigeshɔn ɛn na di famili?

¹⁶ Prez ɛn tɛl pipul dɛn tɛnki. Jiova ɛn Jizɔs no se i fayn fɔ prez pipul dɛn, fɔ tɛl dɛn tɛnki, ɛn fɔ sho dɛn se dɛn lɛk dɛn. (Matyu 3:17; 25:19-23; Jɔn 1:47) Wisɛf we na Kristian fɔ de prez ɛn tɛl pipul dɛn tɛnki. Wetin mek? Na bikɔs Prɔvabs 25:11 tɔk se “ɛni wɔd we yu tɔk di rayt tɛm tan lɛk we yu tek gold mek fayn dizayn pan silva sɛtin.” Aks yusɛf dɛn kwɛstyɔn ya: ‘Aw a kin fil we pɔsin kin prez mi? I kin mek a fil gud ɛn i kin ɛnkɔrej mi?’ Fɔ  tru we pɔsin prez yu ɔ tɛl yu tɛnki fɔ sɔntin, i kin mek yu fil fayn ɛn no se pɔsin de we gladi fɔ yu, ɛn we kia bɔt yu, ɛn dis kin mek yu no se yu dɔn du di rayt tin. Dɛn tin ya go mek yu biliv yusɛf mɔ, ɛn i go mek yu want fɔ du yu bɛst pan ɛnitin we yu de du tumara bambay. I go mɔs bi se yu kin gladi we pipul dɛn de prez ɛn tɛl yu tɛnki. So dis fɔ mek yusɛf tray tranga wan fɔ prez ɛn tɛl ɔda pipul dɛn tɛnki.​—Rid Matyu 7:12.

¹⁷ Tray fɔ si di gud tin dɛn we pipul dɛn de du, ɛn prez dɛn ɔ tɛl dɛn tɛnki fɔ dat. We yu go na mitin, yu kin yɛri we pɔsin gi fayn fayn tɔk, yu kin si yɔŋ pɔsin we de tray fɔ go bifo na di kɔngrigeshɔn, ɔ yu kin si wan ol brɔda ɔ sista we nɔ de mis mitin pan ɔl we i nɔ izi fɔ am. We yu prez ɔ tɛl tɛnki to dɛn kayn pipul ya, i kin mek dɛn at gladi ɛn i kin mek dɛn want fɔ kɔntinyu fɔ sav Jiova. Insay di famili, maredman ɛn mareduman fɔ de prez ɛn tɛl dɛnsɛf tɛnki fɔ di tin dɛn we dɛn de du. (Prɔvabs 31:10, 28) Na pikin dɛn mɔ kin want mek dɛn tɛl dɛn tɛnki ɛn prez dɛn fɔ di tin dɛn we dɛn de du. We yu prez ɛn tɛl tɛnki to pikin kin mek i gladi, ɛn dis kin mek i gro fayn, jɔs lɛk aw san ɛn wata kin mek plant gro fayn. Mama ɛn papa dɛn fɔ fɛn we fɔ prez ɛn tɛl dɛn pikin dɛn tɛnki fɔ dɛn fayn abit ɛn di gud wok dɛn we dɛn de du. Dis go mek yu pikin gɛt kɔrej ɛn biliv insɛf mɔ, ɛn i go ɛp am fɔ tray tranga wan fɔ du wetin rayt ɔltɛm.

18, 19. Wetin mek wi fɔ du ɔl wetin wi ebul fɔ du fɔ ɛnkɔrej ɛn tɔk fayn to wi kɔmpin Kristian dɛn? Aw wi go ebul du dat?

¹⁸ Ɛnkɔrej ɛn tɔk fayn to pipul dɛn. Jiova rili kia fɔ di wan dɛn “we dɛn at sik.” (Sam 147:3) Na dat mek in Wɔd tɛl wi se wi fɔ de ‘kɔrej ɛn ɛp wi kɔmpin Kristiɛn dɛn’ ɛn tɔk fayn to di wan dɛn we dɛn at pwɛl. (Fɔs Lɛta Fɔ Tɛsalonayka 5:11, 14) Wi biliv se Gɔd no, ɛn  i gladi fɔ di tray we wi de tray fɔ ɛnkɔrej wi kɔmpin Kristian dɛn we dɛn at pwɛl.

¹⁹ If yu kɔmpin Kristian in at pwɛl, wetin yu go tɛl am we go ɛp am? Nɔ fil se yu fɔ sɔlv di prɔblɛm. Bɔku tɛm, na simpul tin yu go tɛl am we go ɛp am. Tɛl di pɔsin we in at pwɛl se yu rili kia bɔt am. Yu kin ivin pre wit di pɔsin we in at pwɛl, ɛn beg Jiova fɔ ɛp di pɔsin fɔ no se Gɔd ɛn ɔda pipul dɛn rili lɛk am. (Jems 5:14, 15) Tɛl am bak se wi nid am ɛn valyu am as mɛmba na di kɔngrigeshɔn. (Fɔs Lɛta Fɔ Kɔrint 12:12-26) Rid fayn Baybul vas we go ɛp am fɔ no se Jiova rili kia bɔt am. (Sam 34:18; Matyu 10:29-31) Spɛn tɛm wit di pɔsin we in at pwɛl fɔ “kɔrej” am, ɛn we yu de tɔk to am, mek shɔ se wetin yu de tɔk, kɔmɔt na yu at. Dis go mek i no se yu rili lɛk am ɛn bisin bɔt am.​—Rid Prɔvabs 12:25.

20, 21. Us tri tin dɛn go ɛp wi fɔ gi gud advays?

²⁰ Gi gud advays. Wan wantɛm, wi ɔl nid advays bikɔs wi nɔ pafɛkt. Di Baybul tɛl wi se: “If yu de tek advays ɛn rɛdi fɔ lan, wan fayn de yusɛf go gɛt sɛns.” (Prɔvabs 19:20) Nɔto di ɛlda dɛn nɔmɔ kin advays pipul dɛn. Mama ɛn papa dɛnsɛf kin advays dɛn pikin dɛn. (Lɛta Fɔ Ɛfisɔs 6:4) Sista dɛn we gɛt ɛkspiriɛns na di kɔngrigeshɔn kin ivin advays dɛn yɔŋ sista dɛn. (Taytɔs 2:3-5) Di  lɛk we wi lɛk pipul dɛn na in go mek wi want fɔ advays dɛn. Bɔt wi fɔ advays dɛn wan kayn we we dɛn nɔ go fil bad. Wetin go ɛp wi fɔ gi dis kayn advays? Na tri tin dɛn go ɛp wi fɔ du dat. Di we aw wi de biev ɛn di rizin we mek wi de gi di advays, usay wi pul di advays, ɛn di we aw wi de gi di advays.

²¹ Fɔ lɛ advays gud, i lɛf to di pɔsin we de gi di advays. I fɔ sidɔm ɛn aks insɛf dis kwɛstyɔn, ‘Ustɛm i kin izi fɔ mek a tek advays?’ We yu no se di wan we de advays yu kia bɔt yu ɛn i nɔ de tɔk bikɔs i vɛks pan yu, ɛn nɔ de mɛmba bad tin fɔ yu, i go izi fɔ mek yu tek di advays. So we yu de advays ɔda pipul dɛn, yu nɔ tink se i go fayn mek yu du di sem tin? Fɔ mek pɔsin tek di advays we yu de gi am, i go fayn mek yu advays kɔmɔt na di Baybul. (Sɛkɛn Lɛta To Timoti 3:16) Ilɛksɛf wi de kot di Baybul ɔ wi nɔ de kot am, di tin we wi de tɔk fɔ kɔmɔt na di Baybul. So ɛlda dɛn rili gɛt fɔ tek tɛm mek dɛn nɔ fos ɔda pipul dɛn fɔ du wetin dɛn want, ɛn dɛn nɔ fɔ de bɛn bɛn Gɔd in Wɔd fɔ sɔpɔt wetin dɛn de se. Pipul dɛn go tek di advays we wi de gi dɛn if wi gi dɛn di advays di rayt we. We yu tek tɛm advays pɔsin, i go mek i izi fɔ lɛ i tek di advays ɛn i go mek i stil gɛt in rɛspɛkt.​—Lɛta Fɔ Kɔlɔse 4:6.

22. Aw yu go want yuz di gift we Gɔd dɔn gi wi?

²² Fɔ tru, di tɔk we wi ebul fɔ tɔk, na fayn gift we Gɔd dɔn gi wi. Di lɛk we wi lɛk Jiova go mek we want fɔ yuz dis gift di rayt we. Lɛ wi mɛmba se di wɔd dɛn we wi kin tɔk gɛt pawa fɔ ɛp pipul dɛn ɔ fɔ pwɛl dɛn at. Lɛ wi du ɔl wetin wi ebul fɔ du so dat wi go yuz dis gift fɔ “ɛp ɔda pipul” dɛn jɔs lɛk aw Gɔd want. If wi du dis, di wɔd dɛn we de kɔmɔt na wi mɔt go ɛnkɔrej pipul dɛn ɛn mek dɛn fil fayn, ɛn i go ɛp wi fɔ mek Gɔd kɔntinyu fɔ lɛk wi.