1-3. (a) Jehova okwe tu pa omagano gashike, nongiini taga vulu okulongithwa nayi? (b) Opo tu kale mohole yaKalunga, ongiini tu na okulongitha omagano gokupopya?

NATU tye owa pa gumwe ngoka wu hole omagano. Mbela oto ku uva ngiini ngele ote ga longitha nayi ta ningile owina? Natu tye owe mu pa oshihauto, ihe konima yethimbo oto mono kutya ote shi hingi nuuhasha note etele yalwe iiponga. Mbela itashi ke ku yemateka?

² Jehova Omugandji ‘gwoshipewa kehe oshiwanawa nomagano kehe ga gwana’ okwe tu pa omagano guunongo wokupopya tu uvitike. (Jak. 1:17) Omagano ngoka taga yoolola aantu kiinamwenyo, ohage tu kwathele tu lombwele yalwe omadhiladhilo nomaiyuvo getu. Ihe omagano ngoka otashi vulika tu ga longithe nayi ngaashi owala oshihauto shoka twa popi. Shika itashi yemateke tuu Jehova ngele omagano gokupopya otatu ga longitha nuuhasha nosho wo okweehameka yalwe!

³ Opo tu ikaleke mohole yaKalunga, otu na okulongitha omagano gokupopya ngaashi sha li elalakano lyOmugandji gwago. Jehova okwa yelitha nawa kutya okupopya kwoludhi luni haku mu nyanyudha. Oohapu dhe otadhi ti: “Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.” (Ef. 4:29) Natu tale kutya omolwashike tu na okukala twa kotokela okupopya kwetu nokupopya kuni  tu na okuhenuka nongiini tu na okupopya “oohapu ndhoka oombwanawa tadhi tungu.”

4, 5. Omayeletumbulo gamwe gomOmbiimbeli otaga hokolola ngiini kutya oohapu odhi na oonkondo?

⁴ Etompelo lyotango lya simana olyo molwaashoka oohapu odhi na oonkondo. Omayeletumbulo 15:4 otaga ti: “Elaka etalala olyo omuti gwomwenyo, ihe elaka lyomakoto ohali tolokana omwenyo.” * Ngaashi naanaa omeya haga talaleke omuti gwa notelwa, elaka etalala ohali vulu okutalaleka omwenyo gwaangoka te li pulakene. Mepingathano naashoka, oohapu oonkunkutu ohadhi vulu okuteya po omitima dhayalwe. Dhoshili, oohapu ndhoka hatu popi odhi na oonkondo okweehameka nenge okwaaludha yalwe. — Omayel. 18:21.

⁵ Eyeletumbulo limwe tali yelitha kutya oohapu odhi na oonkondo otali ti: “Aanamalaka omadhigu otayu ulula ngegongamwele.” (Omayel. 12:18) Omalaka omadhigu ohaga vulu okweehameka omaiyuvo nokuteya po ekwatathano. Mbela owe ehamekwa nale komwenyo koohapu tadhi ulula dha fa egongamwele? Ihe eyeletumbulo olyo tuu ndyoka  otali ti: “Elaka lyaanawino olyo ealudho.” Oohapu dhohenda tadhi popiwa kugumwe ngoka e na uunongo wopakalunga otadhi vulu okwaaludha omutima nokugalulila po ekwatathano ndyoka lya li lya teka po. Mbela oto dhimbulukwa sho wa li wa aludhwa koohapu oontalala dhagumwe? (Lesha Omayeletumbulo 16:24.) Molwaashoka otu shi shi kutya oohapu ohadhi gumu yalwe, otwa hala okupopya kwetu ku kale taku aludha yalwe, ihe haku ye ehameka.

6. Omolwashike shi li oshidhigu okupangela elaka lyetu?

⁶ Kashi na nduno mbudhi kutya otatu kambadhala shi thike peni, itatu vulu lelalela okupangela elaka lyetu. Onkee ano, etompelo etiyali kutya omolwashike sha pumbiwa tu kale twa kotokela okupopya kwetu olyo: Uulunde nokwaahagwanenena ohayi tu ningitha tu longithe elaka lyetu nayi. Oohapu ohadhi zi komutima gwomuntu, ‘nomadhiladhilo ge omawinayi.’ (Gen. 8:21; Luk. 6:45) Onkee ano, oshi li lela oshidhigu okupangela elaka lyetu. (Lesha Jakob 3:2-4.) Nonando itatu vulu lela oku li pangela, otatu vulu okukambadhala okuninga omalunduluko momukalo moka hatu li longitha. Ngaashi owala omuyogi ta kambadhala okuyoga u uka hoka taku zi omakuthikuthi e na okukondja, natse otu na okukondjitha omahalo guulunde gokulongitha elaka lyetu nayi.

7, 8. Ongiini tu na okwiihokolola kuJehova omolwoohapu dhetu?

⁷ Etompelo etitatu molwaashoka tu na okukotokela elaka lyetu olyo kutya otu na okwiihokolola kuJehova omolwoohapu dhetu. Omukalo moka hatu longitha elaka lyetu inagu guma owala ekwatathano lyetu naantu, ihe ogwa guma wo ekwatathano lyetu naJehova. Jakob 1:26 ota ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.” * Ngaashi twe shi mono montopolwa ya tetekele, okupopya kwoye oku na ekwatathano  lyolela nokulongela kwoye Kalunga. Ngele ihatu pangele elaka lyetu mokupopya oohapu ombwiinayi notadhi ehameke yalwe, iilonga yetu ayihe yopaKriste otayi kala kaayi na ongushu yasha momeho gaKalunga. Mbela shika itashi tu ningitha tu kotokele okupopya kwetu? — Jak. 3:8-10.

⁸ Osha yela kutya otu na etompelo lya kola okukotokela okulongitha nayi omagano gokupopya. Manga inaatu tala omikalo dhokupopya ndhono tadhi tungu, natu kundathaneni omikalo ndhoka itaadhi opalele okupopiwa kOmukriste gwashili.

9, 10. (a) Okupopya kwakehe esiku kuni ku li muuyuni kunena? (b) Omolwashike tu na okutonda okupopya oohapu oombwinayi? (Tala wo enyolo lyopevi.)

⁹ Oohapu oombwinayi. Okutukana nosho wo omaludhi galwe gokupopya omawinayi oyi li hayi longithwa esiku kehe muuyuni kunena. Oyendji ohaya longitha omatukano opo ya tse omuthindo shoka taya popi nenge molwaashoka kaye shi oshitya shoka shi na okulongithwa. Aaningi yiiyolitha olundji ohaya longitha oohapu dha kaka nodhopaihulo opo ya yolithe aantu. Ihe oohapu oombwinayi kadhi shi oshinima shokuyolwa. Oomvula 2 000 lwaampono dha piti omuyapostoli Paulus okwa li a nwethwa mo a gandje omayele kegongalo lyAakolossa li ethe po “oohapu oombwinayi.” (Kol. 3:8) Paulus okwa li a lombwele egongalo lyAaefeso kutya “omategu guugoya” oga kwatelwa miinima mbyoka kaayi na ‘okuuvika mokati’ kAakriste yashili. — Ef. 5:3, 4.

¹⁰ Jehova oku tonde okulongitha oohapu oombwinayi. Naamboka ye mu hole oye dhi tonde wo. Okuhola Jehova ohaku tu inyengitha lela tu tonde oohapu oombwinayi. Sho a popi omusholondondo ‘gwiilonga yonyama,’ Paulus okwa totha mo “onyata” moka mwa kwatelwa oohapu oombwinayi. (Gal. 5:19-21, NW) Shika oshi li oshinima sha kwata miiti. Omuntu ota vulu okukondwa mo megongalo ngele  okwa kala ha popi iinima ya nyata, tayi sitha ohoni noya yonuka nongele okwa pewa omayele lwiikando, ihe ota tsikile owala nopwaahe na okwiiyela ombedhi. *

11, 12. (a) Uunake shi li oshiwinayi okupopya yalwe? (b) Omolwashike mboka haya longele Jehova kaaye na okulundila yalwe?

¹¹ Olwaambo nokulundila. Aantu oye hole okupopya yalwe niinima yawo. Mbela osha puka aluhe okupopya kombinga yagumwe? Ngele otatu mu popile muuwanawa inashi puka nenge tatu popi sha tashi tungu, ngaashi kombinga yaamboka opo ya ninginithwa naamboka ya pumbwa etsomukumo. Aakriste yomethelemimvo lyotango oya li ye na ko nasha nonkalonawa yayalwe noya li hayi ilombwele uuyelele mboka tawu tungu kombinga yooitaali ooyakwawo. (Ef. 6:21, 22; Kol. 4:8, 9) Molwaashoka olwaambo olwo okugoyokitha oshili nenge okuholola iiholekwa yaantu ohalu vulu okweehameka. Shoka oshiwinayi unene osho kutya ohalu vulu okufala wo mokulundila hoka haku ehameke aluhe. Okulundila “okwo okupopya oohapu dhiifundja . . . hoka haku yono nokunyateka edhina lyagumwe.” Pashiholelwa, Aafarisayi oya li ya kambadhala okunyateka edhina lyaJesus moku mu lundila. (Mat. 9:32-34; 12:22-24) Olundji okulundila ohaku eta oontamanana. — Omayel. 26:20.

¹² Mboka haya longitha omagano gokupopya ya nyateke omadhina gayalwe nenge ye ete etopoko, Jehova ihe ya hokwa. Oku tonde mboka haya “kunu olutandu mokati kaamwayina.” (Omayel. 6:16-19) Oshitya shOshigreka “okulundila” osho di·aʹbo·los, shoka shi li edhina limwe lyaSatana.  Ye oye “Ondiaboli,” omulundili omunene gwaKalunga. (Eh. 12:9, 10) Otwa halelela okuhenuka okupopya hoka taku tu ningitha tu kale twa fa ondiaboli. Egongalo itali ki idhidhimikila aalundili mboka haye etitha ‘oontamanana nomatopoko’ mbyoka yi li iilonga yonyama. (Gal. 5:19-21) Onkene manga inoo hokolola sho wu uva kugumwe ipula ngeyi: ‘Mbela oshoshili?’ Mbela oshi li ngaa pahole ngele onde shi hokolola? Osha pumbiwa nenge oshi li ngaa pandunge ndi taandelithe uuyelele mbuka?’ — Lesha 1 Aatessalonika 4:11.

13, 14. (a) Ongiini okutukana haku gumu ngoka te ku pulakene? (b) Okusheka oshike, nomolwashike omusheki ti itula moshiponga?

¹³ Omatukano. Ngaashi sha zi nokupopiwa, oohapu ohadhi vulu okweehameka noonkondo. Odhoshili kutya tu li aantu inaya gwanenena omathimbo gamwe ohatu ipe uusama omolwokupopya kwetu. Ihe Ombiimbeli otayi londodha shi na ko nasha nokupopya hoka itaaku idhidhimikilwa nando megumbo lyOmukriste nenge megongalo. Paulus okwa londodha Aakriste a ti: “Etheni ano uululu auhe, ondjahi nonkone, omakudhilo nenge omatukano, uuwinayi kehe nau mú kale kokule.” (Ef. 4:31) Omatoloko gamwe oga toloka uutumbulilo “omatukano” taga ti “elaka lya honga” nosho wo “elaka tali tolokana.” Okutukana okwa kwatela mo okuula aantu omadhina noku ya pa aluhe uusama, oku ya shundula noku ya ningitha ya kale yu uvite ya fa kaaye na oshilonga. Aanona mboka ye na omitima omipu nohayi itaale kehe shimwe oyo unene ye li iihakanwa yomatukano. — Kol. 3:21.

¹⁴ Ombiimbeli otayi pangula thiluthilu oohapu dhokusheka ndhoka aantu haya longitha opo ya shundule yamwe noku ya lyatela pevi. Ngoka ha ningi iinima ya tya ngaaka oti itula moshiponga, molwaashoka omusheki ota vulu okukondwa mo megongalo ngele ina hala okutaamba omapukululo ngoka ta pewa a ninge omalunduluko. Ngele ina  lundulula oondjila dhe, ota vulu wo okukanitha omalaleko nuuyamba okukala muuyuni uupe. (1 Kor. 5:11-13; 6:9, 10) Osha yela kutya itatu vulu okukala mohole yaKalunga ngele otatu popi iinima mbyoka itayi tungu, kaayi shi yoshili nenge kaayi li pahole. Okupopya hoka ohaku teya.

15. Okupopya kuni ku li oohapu “oombwanawa tadhi tungu”?

¹⁵ Ongiini tatu vulu okulongitha omagano gokupopya ngaashi sha li elalakano lyOmugandji gwago? Dhimbulukwa kutya Oohapu dhaKalunga otadhi tu ladhipike tu popye “oohapu ndhoka oombwanawa tadhi tungu.” (Ef. 4:29) Jehova oha kala a panda ngele tatu popi oohapu tadhi tungu notadhi ladhipike yalwe. Otashi pula tu dhiladhile nawa opo tu popye oohapu ndhoka. Ombiimbeli inayi tula po omuhingo gwontumba ngoka tu na okulandula, yo kayi na omusholondondo ‘gwoohapu oombwanawa’ ndhoka tu na okulongitha. (Tit. 2:8, NW) Opo tu popye oohapu ndhoka “oombwanawa tadhi tungu” otu na okukaleka momadhiladhilo iitsa itatu yanathangwa ihe oya simana mbyoka hayi ndhindhilikitha okupopya hoka: Oyo okupopya taku tungu, kwoshili nokwopahole. Tu na iitsa mbyoka momadhiladhilo, natu taleni iiholelwa yokondandalunde yokupopya hoka taku tungu. — Tala oshimpungu “ Mbela okupopya kwandje otaku tungu?”

16, 17. (a) Omolwashike tu na okupandula yalwe? (b) Opoompito dhini tatu vulu okupandula yalwe megongalo nomuukwanegumbo?

¹⁶ Okupandula nomutima aguhe. Jehova naJesus oye wete kutya osha pumbiwa opo tu pandule yalwe nokukala twe ya hokwa. (Mat. 3:17; 25:19-23; Joh. 1:47) Tu li Aakriste oshi li nawa okukala hatu pandula wo yalwe nomutima aguhe. Omolwashike mbela? Omayeletumbulo 15:23 otaga ti: ‘Ohapu oyo opala ngiini pethimbo lyu uka!’ Ipula to ti: ‘Ohandi kala ndi uvite ngiini uuna gumwe a pandula ndje nomutima aguhe? Mbela ihandi kala ndi uvite nawa nonda  ladhipikwa?’ Ngele wa pandulwa nomutima aguhe oho mono lela kutya gumwe oku wete oonkambadhala dhoye, oku na ko nasha nangoye, nosho wo kutya shoka wa ninga oshi na oshilonga. Ngele to pandulwa ngaaka ohashi ku tsu omukumo nohashi ku inyengitha wu longe nuudhiginini monakuyiwa. Molwaashoka oho kala wa nyanyukwa ngele yamwe taye ku pandula, mbela ku na okuninga ngaashi to vulu wu pandule wo yalwe? — Lesha Mateus 7:12.

¹⁷ Ilonga okutala kuukwatya uuwanawa wayalwe e to ya pandula. Pokugongala otashi vulika gumwe a gandje oshipopiwa oshiwanawa, wu ndhindhilike omugundjuka ngoka ta lalakanene iinima yopambepo, nenge wu ndhindhilike omunamimvo ngoka ha kala pokugongala kehe nonando okwa kulupa. Okupandula nomutima aguhe aantu mboka otashi vulu okuguma omitima dhawo noku ya ladhipika pambepo. Muukwanegumbo omusamane nomukulukadhi oye na okukala haya pandulathana nomutima aguhe. (Omayel. 31:10, 28) Aanona oye hole unene tuu okupewa eitulomo nokupandulwa. Ngaashi owala oonte dhetango nomeya hayi talaleke oshimeno, aanona ohaya talalekwa ngele taya pandulwa. Aavali kaleni hamu pandula aanona yeni omolwomaukwatya gawo omawanawa nosho wo oonkambadhala dhawo. Okupandula ohaku ladhipike aanona nokukala yi inekela aavali nohashi yi inyengitha opo ya kambadhale okulonga shoka shu uka.

18, 19. Omolwashike tu na okuninga oonkambadhala opo tu tse omukumo notu hekeleke ooitaali ooyakwetu, nongiini tatu vulu oku shi ninga?

¹⁸ Okutsaathana omukumo nokuhekelekathana. Jehova oku na ko nasha lela ‘naaifupipiki’ nosho wo ‘mboka ya nyanyagulwa.’ (Jes. 57:15) Oohapu dhe otadhi tu lombwele tu ‘tsaathane omukumo notu popye nehekeleko naamboka ya polimana.’ (1 Tes. 5:11, 14, NW) Otu na uushili kutya Kalunga oha ndhindhilike noha pandula oonkambadhala dhetu dhokutsa omukumo nokuhekeleka ooitaali ooyakwetu  mboka ya gwililwa po koluhodhi.

¹⁹ Oshike to vulu okupopya opo wu hekeleke Omukriste omukweni ngoka a teka omukumo nenge a polimana? Ino dhiladhila kutya owu na okukandula po uupyakadhi we. Moompito odhindji iitya yanathangwa ohayi kwathele noonkondo. Ulukila omuntu ngoka a polimana kutya owu na ko nasha naye. Galikana pamwe naangoka a teka omukumo, to indile Jehova e mu kwathele a mone kutya oku holike kuyalwe nokuJehova. (Jak. 5:14, 15) Mu shilipaleka kutya okwa pumbiwa noku na oshilonga e li oshilyo shegongalo. (1 Kor. 12:12-26) Mu leshela ovelise mOmbiimbeli wu mu shilipaleke kutya Jehova oku na ko nasha naye shili. (Eps. 34:18; Mat. 10:29-31) Longitha ethimbo lya gwana wu kundathane “oohapu dhuukuume” naangoka a gwililwa po nokupopya tashi zi komutima otaku mu ningitha a kale e uvite e holike noku niwe naye. — Lesha Omayeletumbulo 12:25.

20, 21. Oshike hashi ningitha omayele ga kale taga ti sha?

²⁰ Omayele taga ti sha. Tu li aantu inaatu gwanenena, atuhe otwa pumbwa okupewa omayele ethimbo nethimbo. Ombiimbeli otayi tu ladhipike tayi ti: “Pulakena omayele, taamba eputudho, opo u kale omunandunge komeho.” (Omayel. 19:20) Aakuluntugongalo hayo owala ye na okugandja omayele kuyalwe. Aavali ohaya pe oyana omayele. (Ef. 6:4) Aamwameme aakokele otaya vulu okukumagidha  aakiintu aagundjuka. (Tit. 2:3-5) Ohole ohayi tu inyengitha tu kale twa hala okupa yalwe omayele ngoka itaage ya uvitha nayi. Oshike tashi tu kwathele tu gandje omayele ga tya ngaaka? Iinima itatu mbyoka tayi ningi omayele ga kale taga ti sha oyo: iikala neinyengotompelo lyomugandjimayele, hoka kwa kankamena omayele nosho wo omukalo moka taga gandjwa.

²¹ Opo omayele ga kale taga ti sha, naku ga gandja oku na okukala te shi ningi neinyengotompelo lyu uka. Ipula to ti: ‘Uunake hashi kala oshipu kungame okutaamba ko omayele?’ Uuna wu shi kutya ngoka te ku pe omayele oku na ko nasha nangoye noku na einyengotompelo ewanawa, ohashi kala oshipu okutaamba ko omayele ge. Onkee ano, uuna to pe yalwe omayele, ku na mbela okuninga sha faathana? Omayele ngoka taga tungu oga kankamena wo kOohapu dhaKalunga. (2 Tim. 3:16) Kutya nduno otatu totha mOmbiimbeli nenge hasho, omayele kehe tatu gandja oge na okukala ga kankamena kOmanyolo. Kungeyi, aakuluntugongalo kaye na okuthiminikila yalwe omataloko gawo, yo ihaya endameke nenge ya goyokithe Omanyolo opo Ombiimbeli yi kale ya fa tayi yambidhidha omataloko gamwe gopaumwene. Omayele ohaga kala wo taga ti sha ngele oga gandjwa momukalo gu uka. Omayele ngoka taga gandjwa nohenda oge li omapu okutaambiwa ko naangoka te ga pewa oha kala e wete a simanekwa. — Kol. 4:6.

22. Owa tokola toko okulongitha ngiini omagano gokupopya?

²² Osha yela kutya okupopya oku li omagano gondilo ga za kuKalunga. Itatu ka longitha omagano ngoka nayi ngele otu mu hole. Natu dhimbulukwe kutya oohapu ndhoka tatu popi nayalwe otadhi vulu okutunga nenge okuteya. Natu kambadhale ano okulongitha omagano ngoka ‘okutunga’ yalwe ngaashi shi li elalakano lyOmugandji gwago. Ngele tatu shi ningi, oohapu dhetu otadhi ka kala tadhi tsu omukumo mboka ye li putse notadhi ke tu kwathela tu ikaleke mohole yaKalunga.