1-3. (a) Se a te meaalofa e tasi ko oti ne tuku mai ne Ieova ki a tatou, kae e mafai pefea o sona fakaaoga ne tino? (e) Ke tumau i te alofa o te Atua, e ‵tau o fakaaoga pefea ne tatou a te meaalofa ko te faipati?

KAFAI e tuku atu ne koe se meaalofa ki sou kāiga pele, e mata, ka pefea ou lagonaga māfai e sona fakaaoga ne ia te mea tenā? Kāti ne tuku ne koe ki ei se motoka, kae fakamuli ifo ne iloa ne koe me ne sona fakateletele ne ia, kae ne pa‵kia i ei a nisi tino. E mata, ka se kaitaua koe ki a ia?

² A te faipati mo te loto malamalama se meaalofa eiloa mai i a Ieova, ko te Tino telā e tuku mai ne ia “a mea ‵lei katoa kolā e maua fua mo meaalofa katoatoa takitasi.” (Iakopo 1:17) A te meaalofa tenei, telā e se maua ne manu katoa, e fai ne ia ke mafai o fakaasi atu ki nisi tino, e se ko ‵tou mafaufauga fua kae pelā foki mo ‵tou lagonaga. Kae e pelā me se motoka, e mafai foki o sona fakaaoga te meaalofa tenei ko te faipati. E pefea te fakafanoanoa ki a Ieova māfai e sona fakaaoga a pati ke fakalogo‵mae ei a loto o nisi tino!

³ Ke tumau i te alofa o te Atua, e ‵tau o fakaaoga ne tatou te meaalofa ko te faipati e pelā eiloa mo te mea ne manako ki ei te Tino telā ne tuku mai ne ia. Ne fakaasi manino mai ne Ieova a vaegā pati kolā e fiafia a ia ki ei. E fai  mai tena Muna: “Sa faipati ki muna e ‵mae ei a te loto o te suā tino. Fakaaoga eiloa a pati fesoasoani, ko vaegā pati kolā e aoga i te puti ake kae maua mai ei foki a mea ‵lei, ko te mea ke ‵fua mai au pati ki te ‵lei, i tino kolā ne fakalogo‵logo ki a koe.” (Efeso 4:29) Nei la, ka mafau‵fau tatou ki pogai e ‵tau ei o fakaeteete tatou i ‵tou pati, ne a pati e ‵tau o ‵kalo keatea mai ei, mo “pati kolā e aoga i te puti ake” o tino.

4, 5. E fakamatala mai pefea i nisi faataoto i te Tusi Tapu a te ma‵losi o pati?

⁴ E tasi te pogai tāua e ‵tau ei o fakaeteete i ‵tou pati me e ma‵losi ‵ki a pati. E fai mai te Faataoto 15:4: “A muna a‵lofa e aumai ne ia te ola, ka ko muna sē ‵lei e fai fua ne ia koe ke fanoanoa.” * E pelā eiloa mo te vai e fakaola aka ne ia se lakau ko velasia, e penā foki te fakamalosi aka ne pati atafai a loto o tino kolā e fakalogo‵logo ki ei. Kae e fakama‵sei atu fua ki loto o nisi tino a pati sē ‵lei kolā e laku atu. E tonu, a pati kolā e fai ne tatou e isi se lotou malosi o fakapakia io me fai ke mafu te pakiaga.—Faataoto 18:21.

⁵ E fakamatala faka‵lei mai a te ma‵losi o pati i te suā faataoto: “A muna kolā e sona fai fua e mafai o fakapakia ne ia te tino e pelā mo te pelu.” (Faataoto 12:18) A pati e fai fakavave mo te sē mafaufau e faka‵mae malosi atu ki lagonaga o tino kae fakamasei atu foki ki fesokotakiga fakataugasoa. E mata, kai logo‵mae aka eiloa tou loto i pati kolā e fai pelā me se pelu? Kae i te suā feitu, e fai mai foki te faataoto tenā: “Ka ko muna kolā e fai mo te mafaufau e mafai o fakasao ne ia te tino.” A pati ‵lei kolā e  fakaasi mai ne te tino telā e maua ne ia te poto mai te Atua e mafai o faka‵lei aka ei se loto mafatia kae toe faka‵lei aka ei a fesokotakiga ‵lei. E mata, e masaua ne koe se taimi ne lagona ei ne koe te ma‵losi o pati fakaalofa‵lofa? (Faataoto 16:24) Ona ko te ‵tou iloa me e pokotia a nisi tino i pati e fai ne tatou, e ma‵nako eiloa tatou o fakaaoga ‵tou pati ke faka‵lei aka ei a nisi tino, e se ko te fakalogo‵mae atu ki a latou.

6. Kaia e se faigofie ei ke pule faka‵lei atu ki ‵tou gutu?

⁶ Faitalia te uke o ‵tou taumafaiga e fai, e se mafai o pule katoatoa atu tatou ki ‵tou gutu. Tela la, tenei eiloa te lua o pogai e ‵tau ei o fakaeteete faeloa tatou e uiga ki ‵tou pati: E fai ne te agasala mo te tulaga sē ‵lei katoatoa ke fakaaoga ‵se ne tatou ‵tou gutu. A pati e o‵mai i ‵tou loto, a ko “te loto o te tino e masei faeloa.” (Kenese 8:21, Tusi Paia, Samoa; Luka 6:45) Tela la, e se faigofie te tausiga o ‵tou gutu. (Faitau te Iakopo 3:2-4.) E tiga eiloa e se mafai o pule katoatoa atu tatou ki ‵tou gutu, e mafai o ga‵lue faeloa tatou ke faka‵lei aka te auala e fakaaoga ei ne tatou. E pelā me se tino e ‵kau ki luga i te ‵miti o te tai, e penā foki te ‵tou taua atu ki ‵tou tulaga agasala ke fakaaoga ‵se ‵tou gutu.

7, 8. E pefea te ‵mafa o te fakamasinoga a Ieova e uiga ki ‵tou pati?

⁷ A te tolu o pogai e ‵tau ei o fakaeteete i ‵tou pati me e fakamasino ne Ieova tatou e uiga ki ei. A te auala e fakaaoga  ei ne tatou ‵tou gutu e se pokotia fua i ei ‵tou fesokotakiga ‵lei mo nisi tino kae e pelā foki mo ‵tou tulaga i mua o Ieova. E fai mai te Iakopo 1:26: “E isi se tino e mafaufau i a ia se tino lotu? Kafai e se mafai ne ia o taofiofi tona gutu, e seai se aoga o tena toaga ki lotu, ka ko faka‵segina foki a ia ne ia eiloa.” E pelā mo te mea ne matea atu i te mataupu ko teka, a ‵tou pati ne vaega o te ‵tou tapuakiga. Kafai e se tausi ‵tou gutu—mai te lakuatuga o pati faka‵mae loto kae ‵poisini—e mafai o se aoga ‵tou galuega faka-Kelisiano katoa i te kilokiloga a te Atua. E mata, e se ‵tau o mafaufau ‵mafa tatou ki ei?—Iakopo 3:8-10.

⁸ E manino ‵lei me e isi ne pogai tāua e ‵tau ei o fakaeteete i te sona fakaaogaga o te meaalofa ko te faipati. A koi tuai o mafau‵fau tatou ki pati aoga kolā e ati aka ei te tino, ke sau‵tala muamua tatou ki pati kolā e se ‵tau eiloa o fai ne se Kelisiano tonu.

9, 10. (a) Ne a vaegā pati kolā ko fai faeloa i aso katoa i te lalolagi i aso nei? (e) Kaia e ‵tau ei o ‵teke atu tatou ki pati ma‵sei? (Ke onoono foki ki te fakamatalaga mai lalo.)

⁹ Pati ma‵sei. Ko pati fetū, pati ma‵sei, mo nisi vaegā pati ma‵sei kolā e fai faeloa i aso katoa i te lalolagi i aso nei. E fakaaoga ne tino e tokouke se pati io me se tugapati masei māfai e se iloa ne latou te pati tonu telā e ‵tau o fakaaoga. E fakaaoga sāle ne tino fai fa‵kata a pati mataga i mea fakatauavaga ke ‵kata ei a tino. Kae e se ‵tau o fai fa‵kata ki pati ma‵sei. I se 2,000 tausaga ko ‵teka ne fakaosofia te apositolo ko Paulo ke fakamalosi atu ki te fakapotopotoga i Kolose ke tuku keatea a “muna ma‵sei mai i [olotou] gutu.” (Kolose 3:8) Ne fai atu a Paulo ki te fakapotopotoga i Efeso me i “pati lai‵lai” e aofia i mea kolā e “se ‵tau ke faipatigina” i va o Kelisiano ‵tonu.—Efeso 5:3, 4.

 ¹⁰ E se fiafia a Ieova ki pati ma‵sei. E ‵tau foki o se fia‵fia ki ei a tino kolā e a‵lofa ki a ia. E tonu, e fakamalosi mai te ‵tou a‵lofa ki a Ieova ke ‵teke atu tatou ki pati ma‵sei. I tena fakasologa e uiga ki “manakoga faka-te-foitino,” ne fakaasi mai ne Paulo a “amioga lai‵lai,” kolā e aofia i ei a pati ma‵sei. (Kalatia 5:19-21, NW) E se ‵tau o manatu māmā ki te mea tenei. E mafai o fakatea se tino mai te fakapotopotoga māfai e se salamo, e tiga te uke o pati polopoloki e fai ki ei, kae fakaaoga faeloa ne ia a pati kolā e fakasino kae ‵lago atu ki te faiga o amioga matagā kae ma‵sei. *

11, 12. (a) Se a te gutu fai‵tala, kae e mafai pefea o fakalogo‵mae atu? (e) Kaia e ‵tau ei o ‵kalo keatea a tino tapuaki ki a Ieova mai te gutu fatufatu?

¹¹ Te gutu fai‵tala mo te gutu fatufatu kolā e fakalogo‵mae atu. A te gutu fai‵tala ko tala e uiga ki tino mo olotou olaga. E mata, e ma‵sei katoa a tala e uiga ki tino? Ikai māfai e sau‵tala tatou e uiga ki mea ‵lei, e pelā mo se tino fatoa papatiso telā e manako ki se fakamalosiga. Ne fakatau amanaia a Kelisiano i te senitenali muamua mō te ‵lei o latou katoa kae ne sau‵tala sāle latou e uiga ki olotou taina tali‵tonu. (Efeso 6:21, 22; Kolose 4:8, 9) Kae e mafai o fakalogo‵mae atu te gutu fai‵tala māfai e se ‵tonu a tala io me fakaasi atu i ei a mea totino a se tino. Kae e silia atu i te masei māfai e iku atu ki te fatufatu, telā ko te fakamasei atu faeloa. A te gutu fatufatu ko “te faiga o ‵losiga ‵se . . . kolā e fakamasei ei te igoa o se isi tino.” E pelā mo te kau Falesaio, ne fakaaoga ne latou a pati fatufatu i  te lotou taumafai ke faka‵se ne latou a Iesu. (Mataio 9:32-34; 12:22-24) E fakamāfua sāle ne pati fatufatu a kinauga.—Faataoto 26:20.

¹² E se manatu māmā a Ieova ki tino kolā e fakaaoga ne latou te meaalofa ko te faipati ke fakamasei atu ki nisi tino io me fakamāfua aka ei a mavae‵vaega. E takalialia a ia ki “te tagata telā e faka‵tupu ne ia fakalavelave i va o taugasoa.” (Faataoto 6:16-19) A te pati Eleni telā e ‵fuli ki te “tino fatufatu” ko te di·aʹbo·los, telā ko te suā igoa o Satani. A ia ko te “Tiapolo,” telā e fatufatu ne ia te Atua. (Fakaasiga 12:9, 10) E tonu, e ‵tau eiloa o ‵kalo keatea tatou mai pati kolā e fai ei tatou mo fai se tiapolo. E se ‵tau eiloa o ‵sae aka i te fakapotopotoga a pati fatufatu kolā e fakamalosi aka ei a galuega o te foitino e pelā mo te “finau valea” mo te “fakamavae‵vae.” (Kalatia 5:19-21) Tela la, a koi tuai o fai sau tala e uiga ki se tino, fesili ifo ki a koe: ‘E mata, e tonu te tala tenei? E mata, se mea ‵lei ke fai ne au te tala tenei? E mata, e ‵tau o fakasalalau atu te tala tenei?’—1 Tesalonia 4:11.

13, 14. (a) E pokotia pefea a tino kolā e fakalogo‵logo ki pati faka‵mae loto? (e) Ne a pati fakamasiasi, kae kaia e tu ei se tino fakamasiasi i se tulaga fakamataku?

¹³ Pati faka‵mae loto. E pelā mo te mea ne matea atu muamua, e isi se malosi o pati o faka‵mae atu. Se mea tonu me ona ko ‵tou tulaga sē ‵lei katoatoa, e fai ne tatou a pati kolā e fai ei ke fanoa‵noa tatou i nisi taimi. E ui i ei, e polopoloki mai te Tusi Tapu e uiga ki vaegā pati kolā e se ‵tau lele eiloa o fakaaoga i te kāiga Kelisiano io me i te fakapotopotoga. Ne fakamalosi mai a Paulo ki Kelisiano: “Tiaki a uiga fakapiau, a uiga faka‵mae loto, mo uiga fakaitaita. Fakagata te sōna paka‵laga valevale mo te pati ma‵sei! Fakagata foki a uiga katoa o te loto masei.” (Efeso 4:31) E ‵fuli i nisi Tusi Tapu a “pati ma‵sei” ki “pati  matagā,” “pati faka‵mae loto,” mo “pati faka‵mae mafaufau.” A pati faka‵mae loto—e aofia i ei a fakamaseiga ki te tino mo fakamaseiga matagā—kolā e fakamasei atu ki te loto talitonu o te tino kae fai ei ke mafaufau a ia me ko seai sena aoga. Kae maise eiloa te faigofie ke pokotia a loto o tama‵liki i ikuga ma‵sei o pati faka‵mae loto.—Kolose 3:21.

¹⁴ Mai te fakaaogaga o toe pati ma‵losi, e taku fakamasei ne te Tusi Tapu a te faifaiga masani ko te fakamasiasi atu ki nisi tino mai te lakuatuga o pati ma‵sei, io me ko pati faka‵mae loto. So se tino e fai sāle ne ia a pati konei ko tu loa i se tulaga fakamataku, me e mafai o tapale keatea se tino penā mai te fakapotopotoga māfai e se fakalogo ki fesoasoani e uke ke ‵fuli ana uiga. Seiloga ke ‵fuli ana uiga, e mafai foki o se maua ne ia te fakamanuiaga ke ola a ia i te lalolagi fou. (1 Kolinito 5:11-13; 6:9, 10) Tela la, e manino ‵lei me e se mafai o tumau tatou i te alofa o te Atua māfai e fai faeloa ne tatou a pati sē aoga, sē ‵tonu, e aunoa mo te loto alofa. E fakamasei atu ki tino a vaegā pati penā.

15. Ne a “vaegā pati e aoga i te puti ake”?

¹⁵ E fakaaoga pefea ne tatou a te meaalofa ko te faipati e ‵tusa mo te mea e manako ki ei te Tino telā ne tuku mai ne ia? Ke masaua a fakamalosiga i te Muna a te Atua ke fai a “vaegā pati kolā e aoga i te puti ake.” (Efeso 4:29) E fiafia a Ieova māfai e fai‵pati tatou ki pati kolā e ati kae fakama‵losi aka i ei a nisi tino. E manakogina te mafaufau faka‵lei ke fai atu ei a pati penā. E seai ne tulafono mautinoa e tuku mai i te Tusi Tapu ke tau‵tali ki ei, kae e seai foki se fakasologa o “pati aoga” kolā e talia ne ia. (Tito 2:8, NW) Ke fai atu a “vaegā pati kolā e aoga i te puti ake,” se mea ‵lei ke masaua ne tatou a mea faigofie kae tāua e tolu kolā  e ati aka i ei: E aoga, e ‵tonu, kae e isi se alofa atafai i ei. Mai mea konā, ke mafau‵fau tatou ki nai fakaakoakoga o pati kolā e ati aka i ei.—Ke onoono ki te pokisi “ E Mata, e Aoga Aku Pati ki te Putiakega?”

16, 17. (a) Kaia e ‵tau ei o fakamālō atu tatou ki nisi tino? (e) Ne a avanoaga e mafai ei o fakamālō atu ki nisi tino i te fakapotopotoga? i te kāiga?

¹⁶ Pati fakamālō mai te loto. E iloa ne Ieova mo Iesu te manakoga ke fai atu a pati fakamālō kae fakaasi atu te lā taliaga. (Mataio 3:17; 25:19-23; Ioane 1:47) Se mea ‵lei foki mō Kelisiano ke fakaasi atu a pati fakamālō mai te loto ki nisi tino. Kaia? “Ko oko eiloa i te gali kae fakafiafia manafai ko maua te tinā muna tonu eiloa [pati fakamālō] mō te taimi tonu tenei!” ko pati i te Faataoto 15:23. Fesili ifo ki a koe: ‘E pefea oku lagonaga māfai e fai mai ki a au ne pati fakamālō mai te ‵kano loto o se tino? E mata, e se fakafiafia ki toku loto kae fakamalosi mai foki ki a au?’ E tonu, e fakaasi atu i so se pati fakamālō me e isi se tino e matea ne ia koe, e isi se tino e amanaia ki a koe, kae ne aoga ‵ki eiloa au mea kolā ne fai. E fakamalosi aka ne mea konā tou loto talitonu kae fakamalosi atu foki ke sinā galue malosi aka eiloa koe. Ona ko te mea ne gali ki a koe te taimi ne maua ei ne koe a pati fakamālō, e mata, e se ‵tau foki o fai ne koe te ‵toe mea e mafai o fai ke avatu ei a pati fakamālō ki nisi tino?—Faitau te Mataio 7:12.

¹⁷ Fakamasani ke matea ne koe a mea ‵lei i nisi tino, ko tuku atu ei a pati fakamālō. I te fakapotopotoga, kāti e lagona ne koe se lauga telā ne fakatoka faka‵lei i se fakatasiga, se talavou telā e gasolo ki mua i ana fakamoemoega faka-te-agaga, io me se tino matua telā e fakamaoni o kau ki fakatasiga faitalia tena matua. E mafai o otia a loto o tino penā kae fakamalosi atu foki i te feitu faka-te-agaga māfai e fakamālō atu. E manakogina ke lagona ne te  tauavaga i loto i te kāiga a pati fakamālō mo te loto fakafetai mai te suā tino ki te suā tino. (Faataoto 31:10, 28) Kae maise eiloa te uke o fakamalosiga e maua ne tama‵liki māfai e iloa ne latou i a latou e taulia kae manakogina. A pati fakamālō ki tama‵liki e mafai o faka‵tusa ki te aoga o te mainaga mo vai ki se lakau. Mātua, onoono ki avanoaga e maua ke fakamālō atu ki otou tama‵liki mō olotou uiga mo taumafaiga aoga. E mafai o ati aka ne pati fakamālō penā a te loto malosi mo te loto talitonu i au tama‵liki kae fakamalosi atu ke ga‵lue malosi o fai te mea tonu.

18, 19. Kaia e ‵tau ei o fai ne tatou te ‵toe mea e mafai o fai ke fakamafanafana atu ki ‵tou taina tali‵tonu, kae e fai pefea ne tatou te mea tenā?

¹⁸ Fakamafanafanaga. E amanaia malosi a Ieova ki “tino loto mau‵lalo” mo tino [“loto mafatia,” NW]. (Isaia 57:15) E fakamalosi mai tena Muna “ke fakamalosi atu te suā tino ki te suā tino” kae fakamafanafana atu “ki tino vāi‵vai.” (1 Tesalonia 5:11, 14) E tali‵tonu tatou me e matea ne te Atua kae fiafia foki ki ‵tou taumafaiga ke fakamafanafana atu ki taina tali‵tonu kolā e loto mafatia.

¹⁹ Ne a la au pati e mafai o fai atu ke fakamalosi aka ei sou taina Kelisiano telā ko loto vāivāi io me loto mafatia? Sa mafaufau me e mafai o faka‵lei ne koe te fakalavelave tenā. I te ukega o taimi, a te faiga o nai pati faigo‵fie ko te ‵toe auala ‵lei tenā. Fakatalitonu atu ki te tino loto mafatia me e amanaia tonu koe ki a ia. Ofo atu ke ‵talo fakatasi mo te tino loto mafatia; e mafai o fakamolemole atu koe ki a Ieova ke fesoasoani atu ki te tino tenā ke iloa ne ia te lasi o te a‵lofa o nisi tino mo te Atua ki a ia. (Iakopo 5:14, 15) Fakatalitonu atu me e manakogina kae tāua a ia ki te fakapotopotoga. (1 Kolinito 12:12-26) Faitau atu se fuaiupu fakamalosi loto i te Tusi Tapu ke fakatalitonu  atu me e amanaia tonu te Atua ki a ia. (Salamo 34:18; Mataio 10:29-31) A te fakaaogaga o taimi e lava ke sau‵tala fakatasi mo se tino loto mafatia ki se “pati ‵lei” e tasi kae faipati atu mai tou ‵kano loto, ka fesoasoani atu eiloa ke lagona ne ia me e alofa kae fakatāua a ia ne koe.—Faitau te Faataoto 12:25, Tusi Paia, Samoa.

20, 21. Ne a mea e fai i ei ke ma‵goi a pati fakatonutonu?

²⁰ Pati fakatonutonu ma‵goi. E pelā me ne tino sē ‵lei katoatoa, e ma‵nako tatou katoa ki pati fakatonutonu i nisi taimi. E fakamalosi mai te Tusi Tapu: “Kafai e fakalogo koe ki manatu fakatonutonu, kae loto fiafia o tauloto, kae ka maua ne koe te poto i se aso.” (Faataoto 19:20) A te tukuatuga o pati fakatonutonu ki nisi tino e se fai fua ne toeaina. E fakatonutonu ne mātua olotou tama‵liki. (Efeso 6:4) Kāti e manakogina ke tuku atu a pati fakatonutonu ne tuagane ma‵tua ki fafine kolā koi tai fo‵liki. (Tito 2:3-5) E fakamalosi tatou ne te alofa ki nisi tino ke tuku atu a pati fakatonutonu kolā e mafai o talia ne se tino e aunoa mo te fakamasei atu ki ana lagonaga. Se a te mea e fesoasoani mai ke tuku atu ei a vaegā fakatonutonuga penā? Mafaufau ki mea e tolu kolā e fai i ei a pati fakatonutonu ke momea aka te ma‵goi: te kilokiloga mo lagonaga o te tino fakatonutonu, te  fakavae o pati fakatonutonu, mo te auala e tuku atu i ei.

²¹ E kamata a pati fakatonutonu ma‵goi i te tino fakatonutonu. Fesili ifo ki a koe, ‘Ko te taimi fea e taliagofie ei ne au a pati fakatonutonu?’ Kafai e iloa ne koe me e faipati atu te tino telā e fakatonutonu ne ia koe e aunoa mo te kaitaua, e seai ne ana lagonaga ma‵sei, ko faigofie ei ke talia a pati fakatonutonu. Tela la, kafai e fakatonutonu ne koe a nisi tino, e mata, e se ‵tau foki o fai penā tau kilokiloga mo ou lagonaga? E ‵tau foki o fakavae a pati fakatonutonu manuia ki te Muna a te Atua. (2 Timoteo 3:16) Faitalia me e siki mai ne tatou mai te Tusi Tapu io me ikai, e ‵tau o isi se fakavae faka-te-Tusi Tapu mō so se fakatonutonuga e tuku atu ne tatou. Tela la, e ‵tau o fakaeteete a toeaina ke mo a ma faimālō atu olotou kilokiloga totino ki nisi tino; e se ‵tau foki o fakapiko io me ‵fuli fakakotua ne latou te Tusi Tapu, ke foliga atu me e talia ne te Tusi Tapu a nisi kilokiloga totino. E ma‵goi atu foki a pati fakatonutonu māfai e tuku atu i te auala tonu. A pati fakatonutonu kolā e fakamasima ki te alofa atafai e faigofie ke talia kae e fai i ei ke fakatumau te loto talitonu o te tino telā e maua ne ia.—Kolose 4:6.

22. Se a tau fakaikuga e uiga ki te fakaaogaga o te meaalofa ko te faipati?

²² Se mea mautinoa me i te faipati se meaalofa tāua mai te Atua. E fakama‵losi aka tatou ne te ‵tou a‵lofa ki a Ieova ke fakaaoga faka‵lei, kae se fakaaoga ‵se, te meaalofa tenei. Ke masaua i pati kolā e fai ne tatou ki nisi tino e isi se lotou malosi—te malosi o ati aka io me fakavāivāi atu. Tela la, ke na taumafai tatou o fakaaoga te meaalofa tenei e ‵tusa mo te mea e manako ki ei te Tino telā ne tuku mai ne ia—‘mō te putiakega.’ Ko fai ei ‵tou pati mo fai se fakamanuiaga ki tino i ‵tou tafa kae ka fesoasoani mai ke tumau tatou i te alofa o te Atua.