1-3. (a) Yihooway nuussi immido imotaappe issoy aybee? Asay bessenna ogiyan a waati goˈettii? (b) Nuuni Xoossaa siiquwan deˈanau haasayana danddayiyo imotaa waatidi goˈettana koshshii?

NEENI siiqiyo urau imota immin, i eriiddi hegaa bessenna ogiyan goˈettiyaakko neeyyo aybi siyettanee? Neeni ayyo kaamiyaa immidabadan ane qoppa. I akeeki baynna ogiyan laaggidi, asa qohidoogaa guyyeppe siyadasa. Hegee nena azzanttiyaaba gidennee?

² Asau geliya ogiyan haasayiyoogee, ‘loˈˈo imo ubbaanne kumetta woyto ubbaa’ Immiya Yihoowa imota. (Yaaqooba 1:17) Asaa naata mehiyaappe dummayiya ha imotay, nu qofaa xalla gidennan nuussi siyettiyaabaakka haratussi qonccissanau maaddees. Gidikkokka, ha imotaa kaamiyaagaadan bessenna ogiyan goˈettana danddayoos. Nuuni harata azzanttiyaanne qohiya ogiyan akeeki baynna haasayaa haasayiyo wode, Yihooway ay keena azzananeeshsha!

³ Nuuni Xoossaa siiquwan deˈanau, haasayana danddayiyo imotaa, Immidaagee koyido ogiyan goˈettana koshshees. Yihooway bana ufayssiya haasayay ay malakko qonccissidi yootees. A Qaalay: “Intte haasayai siyiyaageeta go77ana mala, koshshiyoogaadan minttettiya lo77o qaalai intte doonaappe kiyoppe attin, iita qaalai mulekka kiyoppo” yaagees. (Efisoona 4:29) Nuuni akeekan haasayana bessiyoy aybissakko, ay mala haasayaappe haakkana koshshiyaakkonne  ‘minttettiya loˈˈo qaalaa’ waati haasayana danddayiyaakko kaallidi tobbana.

4, 5. Geeshsha Maxaafaa issi issi leemisoti, qaalau deˈiya wolqqaa waatidi qonccissiyoonaa?

⁴ Nuuni akeekan haasayana bessiyo issi waanna gaasoy, qaalau qohiyo woy goˈˈiyo wolqqay deˈiyo gishshataassa. Leemiso 15:4y: “SHonggaara de7iya lo77o haasayai de7o mittaa mala; shin geella haasayai ayyaanaa kinchchees” yaagees. Haatta xayidi shullida mittaa, haattay dalqqidalqqanaadan oottiyoogaadan, shonggaara deˈiya haasayay siyiyaageeta minttettana danddayees. Hegaappe dumma hanotan, geella haasayay harati azzananaadan oottana danddayees. Nu haasayau harata qohiyo woykko minttettiyo wolqqay deˈees.—Leemiso 18:21.

⁵ Hara leemisoy haasayau deˈiya wolqqaa loytti qonccissiiddi: “Akeekennan haasayiyo haasayai cuphedan caddees” yaagees. (Leemiso 12:18) Akeeki baynnan eesuwan haasayiyo haasayay, wozanaa keehippe masunxxissanaunne dabbotaa mooranau danddayees. Ne wozanay cubedan caddiya haasayan masunxxi erii? He leemisoy hara ogiyan: “Aadhdhida eranchchaa inxxarssai pattees” yaagees. Xoossay immiyo aadhida eran, akeekan haasayiyo qaalay, masunxxida wozanaa  pattanaunne zaarettidi dabbotaa medhanau maaddees. Keha haasayay pattiyoogaa neeni ne deˈuwan beˈido wodiyaa hassayay? (Leemiso 16:24) Nu haasayay harata qohana woy goˈˈana danddayiyoogaa akeekiyo gishshau, harata qohiyoogaappe eta goˈˈiyo ogiyan haasayana koyoos.

6. Nu inxxarssaa naagiyoogee tumuppe baaxeyiyaaba gididoy aybissee?

⁶ Nuuni ay keena baaxetikkonne, nu inxxarssaa muleera naagana danddayokko. Yaatiyo gishshau, nuuni akeekan haasayana koshshiyo naaˈˈantto gaasoy: Nagaraynne polotetta pacay nuuni inxxarssaa bessenna ogiyan goˈettanaadan oottiyo gishshataassa. Qaalay kiyiyoy wozanaappe; qassi “asi wozanan qoppiyoobai ubbai iita.” (Doomettaabaa 8:21; Luqaasa 6:45) Hegaa gishshau, nu inxxarssaa naagiyoogee tumuppe baaxeyiyaaba. (Yaaqooba 3:2-4) Nuuni nu inxxarssaa muleera naagana danddayennaba gidikkonne, a goˈettiyo ogiyaa giigissi giigissi baana danddayoos. Duge goggiya shaafan haattaa pude wadhiya uri haattaa sugettaa baaxetana koshshiyoogaadan, nuuni inxxarssaa bessenna ogiyan goˈettanaadan gakkiya sugettaa baaxetana koshshees.

7, 8. Nuuni haasayiyo haasayay Yihoowa sinttan ay keenaa oyshissii?

⁷ Nuuni akeekan haasayana koshshiyo heezzantto gaasoy, nu haasayan Yihoowa sinttan oyshettiyo gishshataassa. Nuuni nu inxxarssaa goˈettiyo ogee hara asaara deˈiya dabbotaa mooriyoogaa xalla gidennan, Yihoowaara deˈiya dabbotaakka moorees. Yaaqooba 1:26y: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela” yaagees. * Nuuni aadhida shemppuwan beˈidoogaadan, nu haasayay nu goynuwaara keehippe oyqettidaagaa. Nuuni darotoo qohiya haasayaa haasayiyoogan nu inxxarssaa naagennaba gidikko, nuuni Xoossaassi giidi oottiyo ooso ubbay A sinttan mela gidana danddayees. Hegee keehippe qoppana bessiya allaalle gidennee?—Yaaqooba 3:8-10.

 ⁸ Haasayana danddayiyo imotaa bessenna ogiyan goˈettennaadan oottiya mino gaasoy deˈiyoogee qoncce. Minttettiya loˈˈo haasayata beˈanaappe kasetidi, tumu Kiristtaaneti haasayana bessenna haasayata ane tobboos.

9, 10. (a) Ha wodiyan alamiyan ubbatoo siyiyoy ay mala haasayee? (b) Nuuni yeellayiya haasayaa ixxana koshshiyoy aybissee? (Tohossa qofaakka xeella.)

⁹ Yeellayiya haasayaa. Ha wodiyan alamiyan qanggettay, sheneyiya haasayaynne hara yeellayiya haasayay ubbatoo siyiyooba. Daroti bantta haasayaa mintti qonccissanau woykkko haasayana bessiya qaalaa erennaagaa genttanau, yeellayiya haasayaa haasayoosona. Asaa miichiyaageeti miichanau shori baynna, pokko haasayaa darotoo goˈettoosona. Gidikkonne, yeellayiya haasayay miicciyooba gidenna. Kiitettida PHauloosi 2,000 gidiya layttappe kase, geeshsha ayyaanay denttettin, “yeellayiya haasayaa” agganaadan Qolasiyaasa gubaaˈiyaa zoriis. (Qolasiyaasa 3:8) PHauloosi tumu Kiristtaanetu giddon “mulekka siyettoppo” giidobatuppe “pattenna qiree” issuwaa gidiyoogaa Efisoona gubaaˈiyau yootiis.—Efisoona 5:3, 4. 

¹⁰ Yeellayiya haasayay Yihooway ixxiyooba. Hegee a siiqiyaageetikka ixxiyooba. Yihoowa siiqiyoogee, nuuni yeellayiya haasayaa ixxanaadan denttettees. PHauloosi ‘asatettaa oosotuppe’ issoy geeshsha gidenna haasayaa gujjiya “tunatettaa” gidiyoogaa yootiis. (Galaatiyaa 5:19-21) Hegee deexo allaalle. Issi uri keehippe moorettida kandduwaa qonccissiya, bonchissennanne yeellayiya haasayaa ubbatoo haasayiyaagaanne darotoo zorin ba nagaraappe simmennaagaa gidikko, gubaaˈiyaappe bohettana danddayees. *

11, 12. (a) Haratubaa denttidi haasayiyoogee qohana danddayiyoy awudee? (b) Yihoowayyo goynniyaageeti zigirssaappe haakkana koshshiyoy aybissee?

 ¹¹ Harata iitaban denttidi haasiyoogaa, zigiriyoogaa. Asay haratubaanne eta deˈuwaabaa denttidi haasayiyoogaa dosees. Haratubaa denttidi haasayiyoogee ubbatoo qohiyaabee? Mata wode ooni xammaqettidaakko woy oona minttettana koshshiyaakko yootiyoogaa mala erana bessiyaabaanne maaddiyaabaa loˈˈo ogiyan nuuni haasayiyaaba gidikko, hegee qohiyaaba gidenna. Koyro xeetu layttan deˈida Kiristtaaneti issoy issuwaa sarotettau keehippe qoppoosonanne bantta mala Kiristtaaneetubaa yootana bessiyaabaa yootidosona. (Eisoona 6:21, 22; Qolasiyaasa 4:8, 9) Gidikkonne, haratubaa tumaa genttidi woykko eta buzo allalliyaa denttidi haasayiyoogee qohana danddayees. Ubba aadhi iitidi, ubbatoo qohuwaa gattiyaaba gidida zigirssa gidana danddayees. Zigirssay “harata kawushshiyaanne eta sunttaa moriya . . . worddobaa yootiyoogaa.” Leemisuwau Parissaaweti Yesuusa kawushshanau iita zigirssaa zigiriyoogaa doommidosona. (Maatiyoosa 9:32-34; 12:22-24) Zigirssay darotoo ooshshaa denttees.—Leemiso 26:20.

¹² Haasayana danddayiyo imotaa harata kawushshanau woykko shaaho medhanau goˈettiyaageetun Yihooway ufayttenna. “Ishatu giddon ooshshaa medhdhiya” asata i ixxees. (Leemiso 6:16-19) Zigirssa geetettida Giriike qaalay, Seexaanau imettida suntta gidida diyaboloos yaagiyaagaa. I Xoossaa sunttaa mooriya iitaa, “Seexaanaa woykko Dabloosa.” (Ajjuutaa 12:9, 10) Nuna Dabloosadan oottiya haasayaappe haakkana koyiyoogee qoncce. “Ooyettiyoogaa” nne “issoi issuwaappe shaahettiyoogaa” malatiya asatettaa oosuwaa denttettiya zigirssay gubaaˈiyaa giddon bessennaba. (Galaatiyaa 5:19-21) Hegaa gishshau, issi uraabaa neeni siyidobaa hara urau yootanaappe kasetada: ‘Hegee tumee? Hegaa hara urau yootiyoogee loˈˈobee? Hegaa demmido ubbau yootiyoogee bessiyaabee woykko koyettiyaabee?’ yaagada nena oycha.—1 Tasalonqqe 4:11.

13, 14. (a) Cayiyoogeetu bolli cashshay ay gattana danddayii? (b) Haratu bolli iitabaa haasayiyoogee aybee? Hegaadan haasayiya uri iita hanotan deˈiyoy aybissee?

 ¹³ Cashshaa. Kasetidi beˈidoogaadan qaalau asa qohiyo wolqqay deˈees. Polotettaa pacaappe denddidaagan issi issitoo, nuuni ubbay haasayennan aggarkkinaa giyoobaa haasayiyoogee tuma. Gidoppe attin, Kiristtaanetu son woykko gubaaˈiyan mule haasayana bessenna haasayaata Geeshsha Maxaafay akeekissees. PHauloosi Kiristtaaneta: “Ixo hanotettaa, yiilluwaa, hanqquwaa, waasuwaanne cashshaa ubbaa . . . intteppe xaissite” yaagidi zoriis. (Efisoona 4:31) Hara birshshettati “cashshaa” geetettida qaalaa “toochiyoogaa,” “iita qaalaa” nne “qohiya qaalaa” yaagidi goˈettoosona. Kawushshidi xeegiyoogaanne ubbatoo boriyoogaa gujjiya cashshay, cayiyoogeeti banttana guutti xeellanaadan oottanaunne eta bonchuwaa qaaranau danddayees. Cashshay, oonanne ammaniyaanne wozanaa kunttibeenna naata, ubba keehippe qohana danddayees.—Qolasiyaasa 3:21.

¹⁴ Geeshsha Maxaafay, haratu bolli iitabaa haasayiyoogee giishin, harata karidinne kawushshidi cayiyoogee woykko toochiyoogee keehippe ixettidaba gidiyoogaa minttidi yootees. Hegaa mala haasayaa meeze oottida uri iita hanotan deˈees. Ayssi giikko, haratu bolli iitabaa haasayiya uray hegaa agganaadan darotoo imettida zoriyaa siyennan ixxikko, gubaaˈiyaappe bohettana danddayees. He asi ba ogiyaappe simmana xayikko, Kawotettaa anjjoykka appe halana danddayees. (1 Qoronttoosa 5:11-13; 6:9, 10) Yaatiyo gishshau, nuuni loˈˈo woy tuma gidenna woykko keha gidenna haasayaa meeze oottiyaaba gidikko, Xoossaa siiquwan deˈennaagee erettidaagaa. Hegaa mala haasayay qohees.

15. Ay mala haasayay “minttettiya lo77o” haasayee?

¹⁵ Haasayana danddayiyo imotaa, Immidaagee koyido ogiyan  waatidi goˈettana danddayiyoo? Xoossaa Qaalay nuuni “minttettiya lo77o” qaala ubbaa haasayanaadan minttidi zoriyoogaa hassaya. (Efisoona 4:29) Nuuni harata minttettiya qaalaa haasayiyo wode Yihooway ufayttees. Hegaa mala qaalaa haasayanau akeekaa koshshees. Haasayana bessiyo haasayaa qommo ubbaa woykko “lo77o haasayaa” qommo ubbaa Geeshsha Maxaafay qonccissidi yootenna. (Tiitu 2:8) “Minttettiya lo77o” haasayaa haasayanau, nu haasayay minttettiyaagaa gidiyoogaa akeekanaadan maaddiya, metennaba milatidi keehi koshshiya heezzubata qoppana bessees; hegeekka, loˈˈo, tumanne keha qaala gidiyoogaa qoppana bessees. Hegeeta qofan wottidi, minttettiya haasayaa xeelliyaagan guutta leemisota ane beˈoos.—Sinttaa 140n deˈiya, “ Ta Haasayay Minttettiyaagee?” yaagiya saaxiniyaa xeella.

16, 17. (a) Nuuni harata galatana koshshiyoy aybissee? (b) Gubaaˈiyan harata galatanaadan oottiya ayba injje hanotay deˈii? so giddon shin?

¹⁶ Wozanappe galatiyoogaa. Yihoowaynne Yesuusi, harata galatananne nashshana koshshiyoogaa eroosona. (Maatiyoosa 3:17; 25:19-23; Yohaannisa 1:47) Kiristtaane gidiyoogaadan, nuunikka harata wozanappe galatana koshshees. Aybissi? Leemiso 15:23y, “Haasayaa likke wodiyan haasayiyoogee aiba lo77obee!” yaagees. ‘Tana asi wozanappe galatiyo wode, tau aybi siyettii? Hegee taani ufayttanaadaaninne minettanaadan oottennee?’ yaagada nena oycha. Wozanappe galatiyoogee, issi uri ne oottiyoobaa akeekiyoogaa, issi uri neessi qoppiyoogaanne neeni oottiyo baaxee goˈˈiyaaba gidiyoogaa neeni eranaadan oottees. Hegaa mala minttettoy, bessiya hanotan ne huuphen ammanettanaadan ootteesinne neeni kaseegaappe minnada oottanaadan denttettees. Nena asi galatiyo wode neeni ufayttiyo gishshau, neenikka zaarada harata wozanappe galatana koshshennee?—Maatiyoosa 7:12.

¹⁷ Haratussi deˈiya loˈˈo eeshshaa akeekanau ne huuphiyaa meezeya; yaatada eta galata. Gubaaˈiyan neeni issi loˈˈo  haasayaa siyana danddayaasa; ayyaanaaban dichaa bessanau baaxetiya issi yelagaa akeekanau woykko cimatettaappe denddidaagan abbee guuxxikkonne shiiquwaappe attenna asa beˈana danddayaasa. Neeni hegaa mala asata wozanappe galatiyoogee eta ufayssanaunne ayyaanaaban minttettanau danddayees. So giddon, azinaynne machiyaa issoy issuwaa wozanappe galatanaunne nashshanau koshshees. (Leemiso 31:10, 28) Ubba qassi naati nashshettiyo wodenne koyettiyaabadan xeelettiyo wode ufayttoosona. Awaynne haattay kattau koshshiyoogaadan, naatakka galatiyoogeenne nashshiyoogee koshshiyaaba. Yelidaageetoo, intte naatussi deˈiya galatissiya eeshshaanne eti oottiyo baaxiyaa akeekidi, eta galatiyo injjiyaa koyite. Hegaadan galatiyoogee, intte naati xalanaadaaninne bessiyaagaadan battanan ammanettanaadan oottanau, qassi kaseegaappekka aaruwan suure gididabaa oottanau baaxetanaadan denttettana daddayees.

18, 19. Nuuni nuugaadan ammaniyaageeta minttettanau danddayettiyaaba ubbaa oottana koshshiyoy aybissee? Hegaadan waatidi oottana danddayiyoo?

¹⁸ Minttettiyoogaa. Yihooway ‘banttana ziqqi oottiyaageetuyyoonne azzanidaageetuyyo’ wozanappe qoppees. (Isiyaasa 57:15) Nuuni “issoi issuwaa” minttettanaadaaninne ‘yayyiyaageeta woykko azzanidaageeta minttettanaadan’ A Qaalay minttidi zorees. (1 Tasalonqqe 5:11, 14) Nuugaadan ammaniya, keehippe azzanidaageeta minttettanau nuuni baaxetiyoogaa Xoossay akeekiyoogaanne hegan ufayttiyoogaa ammanettana danddayoos.

¹⁹ Gidoppe attin, azzanida woy hidootaa qanxxida ne mala issi Kiristtaaniyaa minttettanau woygana danddayay? A metuwaa giigissana bessiyaabadan qoppoppa. Daro hanotatun, amarida qaalaa haasayiyoogee darotoo keehippe maaddees. Azzanida uri neeni ayyo qoppiyoogaa ammanettanaadan ootta. Hidootaa qanxxida uraara qaalaa xoqqu oottada woossa.  Yihooway he ura maaddanaadaaninne Xoossaynne harati a woy o keehippe siiqiyoogaa, he uri akeekanaadan minttada woossana danddayaasa. (Yaaqooba 5:14, 15) I gubaaˈiyaa yame gidiyoogaadan, koyettiyaagaanne goˈˈiyaagaa gidiyoogaa ammanettanaadan ootta. (1 Qoronttoosa 12:12-26) Yihooway ayyo tumuppe qoppiyoogaa he uri ammanettanaadan Geeshsha Maxaafaappe minttettiya xiqisiyaa nabbaba. (Mazamure 34:18; Maatiyoosa 10:29-31) Azzanida urau neeni “shonggaara de7iya” qaalaa haasayanau gidiya wodiyaa immiyoogeenne wozanappe haasayiyoogee, neeni a siiqiyoogeenne nashshiyoogee assi siyettanaadan oottiyoogau siree baawa.—Leemiso 12:25.

20, 21. Zoree maaddiyaagaa gidanaadan oottiyaabati aybee?

²⁰ Maaddiya zoriyaa. Polo asa gidenna gishshau, nu ubbaassi ubbatoo zoriyaa koshshees. Geeshsha Maxaafay: “Zoriyaa siya; timirttiyaakka ekka. Yaatikko, neeni wurssettan aadhdhida eranchcha gidana” yaagidi nuna minttettees. (Leemiso 19:20) Zoriyaa immana bessiyay gubaaˈiyaa cimatu xalla gidokkona. Yelidaageeti bantta naata zoroosona. (Efisoona 6:4) Gastta michoti yelaga macca asaa zorana danddayoosona. (Tiitu 2:3-5) Harata siiqiyoogee eti eeno giidi ekkana danddayiyo zoriyaa nuuni zoranaadan denttettees. Hegaa mala zoriyaa immanaadan nuna maaddiyay aybee? Zoree keehippe maaddiyaagaa gidanaadan  oottiya heezzu yohota qoppa: Zoriyaa immiya uraa qofaanne a denttettiyaabaa, zoree baasettidobaanne imettido ogiyaa.

²¹ Maaddiya zoree, zoriya ura hanotan doommees. Ane: ‘Taayyo zoree ekkanau metennaagaa gidiyoy ayba hanotaanee?’ yaagada nena oycha. Nena zoriya uri neessi qoppiya asa, ne hanotan coo yiillotidi haasayiya asa gidennaagaanne bessenna halchuwan zorenna asa gidiyoogaa eriyo wode zoree ekkanau metenna. Yaatiyo gishshau, neeni harata zoriyo wode, ne qofaynne ne halchoy hegaa mala gidana koshshennee? Hegaa bollankka qassi, loˈˈo zoree Xoossaa Qaalan baasettidaagaa. (2 Ximootiyoosa 3:16) Geeshsha Maxaafaa xiqisiyaa yootidi gidin woy aggin, nuuni immiyo ay zoreenne Geeshsha Maxaafan baasettidaagaa gidana koshshees. Hegaa gishshau, gubaaˈiyaa cimati bantta qofaa harati ekkanaadan wolqqanttennaadan naagettoosona. Eti Geeshsha Maxaafaa qofaa, bantta qofaa kaafiyaaba milatissanau geellayokkona. Haray qassi, zoree suure ogiyan imettikko, keehippe maaddees. Siyanau kehiya zoree ekkanau metenna. Hegee, zoree imettiyo uray bonchettidabadan ayyo siyettanaadan oottees.—Qolasiyaasa 4:6.

22. Haasayana danddayiyo imotaa goˈettiyoogaa xeelliyaagan ay oottanau murttadii?

²² Haasayana danddayiyoogee, Xoossay immido alˈˈo imota gidiyoogee tuma. Yihoowa siiqiyoogee, nuuni ha imotaa bessiya ogiyan goˈettanaadan denttettana koshshees. Nu haasayiyo qaalau harata minttettanau woykko qohanau danddayiyo wolqqay deˈiyoogaa hassayana bessees. Yaatiyo gishshau, ha imotaa, Immidaagee nuuni goˈettanaadan koyido “minttettiya” ogiyan goˈettanau baaxetana bessees. Nu haasayay hegaadaana gidikko, nunaara gayttiya ubbata minttettiyaagaanne woppissiyaagaa, qassi nuuni Xoossaa siiquwan deˈanaadan maaddiyaagaa gidees.