1-3. a) Ino ma raha tsara namiany Jehovah atsika, baka io ino raha tokony tandremantsika? b) Izikoa tsy tiantsika hiala amy fitiavany Zan̈ahary, tokony hampiasaintsika amy fomba karakory izio?

OHATRA izio anao man̈amia bisikilety namanao. Ren̈inao amy zay tafara tatỳ fa tsy nasiany fotiny foeky bisikilety namianao izy io fa nindesiny mare, ke nikon̈o olo. Tsy halahelo anao?

² Fahaizan̈a mivolan̈a io an̈isany raha tsara namiany Zan̈ahary atsika, fotony baka aminany “fan̈amezan̈a tsara ndreky lavorary jiaby.” (Jakoba 1:​17) Izio koa tsy mampitovy atsika amy biby, fotony atsika olombelon̈o fo natao hahay hivolan̈a ndreky han̈aboaka raha an̈aty jerintsika ndreky fontsika. Ndray zen̈y, tsy tokony hampiasaintsika amy fomba ratsy izio, karaha bisikilety in̈y fo. Izikoa atsika tsy mitandrin̈y, atsika mety hivolan̈a raha mampalahelo na mamparary fonolo. Malahelo Jehovah izikoa zen̈y raha ataontsika!

³ Tokony hampiasaintsika amy fomba itiavany Jehovah izy fahaizantsika mivolan̈a io, izikoa tsy tiantsika hiala amy fitiavany. Karazan̈a volan̈a karakory tiany Jehovah? Baiboly mivolan̈a: “Irarian̈a tsy ho hisy volandraty foeky hiboaka amy vavanaro, fa volan̈a tsara sady mankahery, izikoa ilain̈y zen̈y, amy zen̈y hahita hatsaran̈a zay  olo mitandren̈y anaro.” (Efesianina 4:​29) Atsika izio hizaha, nan̈ino atsika mila mitandrin̈y amy raha volan̈intsika? Volan̈a karakory tsy tokony hataontsika, baka io akory han̈anovantsika “volan̈a tsara sady mankahery”?

4, 5. Izikoa bokiny Ohabolana zahan̈a, ino ivolan̈ana fa misy heriny ankitin̈y volan̈a aboakany vavantsika io?

⁴ Antony araiky maventy mahavy atsika mitandrin̈y, fotony volan̈a io misy heriny. Ohabolana 15:4 mivolan̈a: “Volan̈a koa milamin̈y, mamelombelon̈o mira kakazony fahin̈ana. Fa volan̈a koa feno fitaka, mampakivy.” Karaha ataony kakazo maniry koa fa mahazo rano in̈y, ho velombelon̈o koa atsika izikoa maharen̈y volan̈a milamin̈y na mankahery. Fa volan̈a ankolatra ataonolo ratsy jery mampakivy. Hitantsika baka amy zen̈y fa volan̈a io mety hankahery na hampakivy.—Ohabolana 18:⁠21.

⁵ Mazava raha koran̈iny Baiboly ty: “Volan̈a tsy voadiniky, marary karaha tomboko sabatra in̈y.” (Ohabolana 12:18) Volan̈a koa fa tsy voadiniky, mety hamparary fony naman̈a ndreky handrobaka fihavan̈ana. Asa mba efa nisy olo nan̈amia anao volan̈a mahery, ke mira  voatomboko sabatra in̈y fonao? Mankahery tohiny koran̈a aminy andininy io. Koran̈iny ao: ‘Volan̈anolo misain̈y mampahivan̈a.’ Mety hampajanga ndreky hampatsara fihavan̈ana raha volan̈intsika, izikoa dinihintsika tsarabe alohany atsika hivolan̈a. Asa mba efa nisy fotoan̈a nahitanao tsarabe fa mampajanga marin̈y volan̈a feno hatsarampan̈ahy zen̈y? (Vakia Ohabolana 16:24.) Hitantsika baka amy zen̈y fa misy heriny ankitin̈y volan̈a io, ke tiantsika izikoa volan̈a mankahery fo aboakany vavantsika, fa tsy volan̈a mamparary fo.

6. Nan̈ino ma sarotro amintsika mifehy lelantsika io?

⁶ Faharoe, atsika tsy lavorary, ke mety hitariky atsika hampiasa lelantsika amy fomba ratsy raha zen̈y. Zen̈y mahavy atsika tsy mety mahavoafehy lelantsika, ndray efa mifen̈y mare. Zay raha an̈aty fonolo fo volan̈iny vavanany, kanefa matetiky raha ratsy fo volan̈inizio. (Genesisy 8:21; Lioka 6:45) Ten̈a tsy mora mamehy lela io. (Vakia Jakoba 3:2-4.) Izikoa atsika mifen̈y fo hifehy lelantsika, karaha ataonolo milomaon̈o mifen̈y manohitry daroba in̈y, ho haintsika fo hampiasa izio amy fomba tsara.

7, 8. Akory fahitany Jehovah fanompoan̈antsika izikoa atsika tsy mitandrin̈y amy volan̈a aboakany vavantsika?

⁷ Ty antony fahatelo mahavy atsika mila mitandrin̈y mare amy raha volan̈intsika: Mbala hitsarainy Jehovah atsika amy fomba ampiasantsika lelantsika. Izikoa tsy haintsika mampiasa lelantsika io, mety ho robaka fihavan̈antsika amy Jehovah ndreky amy namantsika. Jakoba 1:26 mivolan̈a karaha ty: “Izikoa misy olo mivolan̈a fa izy pivavaka, kanefa izy tsy man̈isy lamboridy lelananany, fa mbala mamitaka fonany fo, tsisy varany izy mivavaka.” * Hitantsika tamy toko taloha in̈y fa misy ifandraisany amy  fanompoan̈antsika raha volan̈intsika. Izikoa atsika tsy man̈isy lamboridy lelantsika, fa zatra man̈ano volan̈a mamparary fo mira poizin̈y mahafaty in̈y, tsy ho hisy dikany amy Zan̈ahary fanompoan̈a ataontsika. Mampaloso diniky raha zen̈y!—Jakoba 3:8-10.

⁸ Hitantsika baka amy zen̈y fa mila mitandrin̈y mare atsika amy raha volan̈intsika. Fa atsika izio hizaha, volan̈a karakory tsy tokony hataony Kristianin̈y. Koa fa vita zen̈y, hidinihintsika ndraiky volan̈a karakory mahatsara ndreky mankahery.

9, 10. a) Koran̈a karakory ma mahazatra olo amy donia ty? b) Nan̈ino ma atsika tsy tokony han̈ano koran̈a vetaveta? (Zahava koa lamariky amy pazy ambany.)

⁹ Koran̈a vetaveta. Tsisy dikany aminolo amy donia ty man̈asaha ndreky man̈ano koran̈a vetaveta zen̈y, indraka eky iro koa fa meloko na hankamafy raha volan̈indro. Man̈ano koran̈a tsy manjary ndreky vetaveta koa iro pisoma filma aby io hampitokizan̈a olo fo. Kanefa tsy mampitokiky foeky raha karaha zen̈y! Efa 2 000 taon̈o loso zay, Paoly nan̈amia torohevitry iro Kristianin̈y ta Kolosia, baka iro tsy han̈ano “koran̈a vetaveta.” (Kolosianina 3:8) Nivolan̈a tamindro Kristianin̈y ta Efesosy koa izy fa an̈isany raha tsy tokony ‘hiton̈onin̈y amy’ Kristianin̈y foeky “songetaka vetaveta” zen̈y.—Efesianina 5:3, 4.

¹⁰ Mampangaroharo Jehovah koran̈a vetaveta io, ke tokony hampangaroharo lan̈iany olo tia izy koa raha zen̈y. Atsika tsy tokony han̈ano na hitandren̈y koran̈a vetaveta. Paoly nivolan̈a fa izio mbala an̈isany fahalotoan̈a ndreky “asany nofotro.” (Galatianina 5:​19-​21) Tsy tokony hataontsika kidikidy raha zen̈y! Mety ho voaroaka tsy ho an̈isany fiangonan̈a olo araiky izikoa zatra man̈ano koran̈a  vetaveta na mitariky olo han̈ano raha tsy manjary, kanefa tsy mety mibebaka ndray efa nanarin̈y matetiky. *

11, 12. a) Ino maharatsy mitsiko olo? b) Nan̈ino olo manompo Jehovah tsy man̈ody raha tsy ataonolo?

¹¹ Mitsiko ndreky man̈ody raha tsy ataonolo. Izio ma koa fa mikoran̈a olo efa ratsy edy? Izikoa atsika mikoran̈a vaovao tsara momba olo araiky, ohatra, azovy vo vita batisa na mila ankahirezin̈y, tsisy maharatsy izy. An̈isany raha ten̈a maventy tamindro Kristianin̈y taloha tan̈y nahay vaovaony piaramanompo amindro, ndreky nifampitantara vaovao. (Efesianina 6:21, 22; Kolosianina 4:​8, 9) Izio ma ratsy ankitin̈y mitsiko olo? Ia, fotony olo araiky koa mitsiko olo, izy mety han̈ova raha ten̈a misy na hitantara sekirenolo io. Izy koa mety han̈odihody raha tsy ataonolo, ke zen̈y ny ten̈a ratsy. Man̈ody raha tsy ataonolo zen̈y “mivolan̈a raha tsy marin̈y momba olo araiky, han̈isian̈a baraka izy.” Zen̈y raha nataondro Fariseo aby io tamy Jesosy, baka Jesosy halaza ratsy. (Matio 9:32-34; 12:22-24) Mampiady raha karaha zen̈y!—Ohabolana 26:20.

¹² Hisaziny Jehovah zay olo mampiasa fahaizany mivolan̈a io indesin̈y mankaratsy na mampiady olo. Halany koa olo “man̈ano raha tsy hampifankahazo olo samy pirahalahy.” (Ohabolana 6:16-19) Baka tamy volan̈a griky diabôlôs nandikan̈a volan̈a “man̈ody raha tsy ataonolo” io. Izio manondro Satana. Devoly koa fikahian̈a Satana, fotony izy man̈odihody raha tsy ataony Zan̈arahary. (Apokalypsy 12:​9, 10) Tsy tiantsika foeky han̈ano raha  hahavy atsika hanan̈a toetriny Devoly. Tsy tokony hankaratsy olo amy fiangonan̈a koa atsika, fotony mampisy “gidragidra” ndreky “fisaratsarahan̈a” atsika, izikoa man̈ano asany nofotro aby io. (Galatianina 5:​19-​21). Ke alohany hikoran̈anao raha momba olo araiky, ty raha tsara dinihinao: ‘Marin̈y ma vaovao handeha hikoran̈iko ty? Izikoa tantaraiko aminolo izio, mba tsara fan̈ahy aminany edy zaho? Tsy maintsy mitantara raha zen̈y ma zaho?’—Vakia 1 Tesalonianina 4:⁠11.

13, 14. a) Man̈ano akory olo araiky izikoa fa tihitihin̈y? b) Ino mahavy atsika mivolan̈a fa misoma ratsy olo araiky izikoa zatra manihitihy olo?

¹³ Manihitihy. Efa hitantsika fa mety hamparary fo volan̈a sasany. Atsika jiaby io samy man̈eky fa efa nan̈ano volan̈a nanin̈enantsika, fotony atsika tsy lavorary. Baiboly mampitandrin̈y atsika fa misy volan̈a tsy tokony hataony Kristianin̈y foeky, na an̈atiny tokantran̈o zen̈y na amy fiangonan̈a. Volan̈iny Paoly: ‘Adosoa aminaro lolompo jiaby, heloko jiaby, heloko mare jiaby, tihitihy jiaby, ndreky fankaratsian̈a jiaby.’ (Efesianina 4:​31) Amy Baiboly sasany, karaha ty handikan̈a “tihitihy” io: “Ozon̈o, volan̈a mamparary fo, baka io asaha.” Manihitihy koa olo araiky izikoa man̈amia olo an̈aran̈a man̈ambany, na tsy voly man̈amia tsin̈y. Mahatsiaro voabaraka ndreky tsisy dikany olo araiky koa tatrany raha karaha zen̈y. Matetiky tsaiky ten̈a tatrany raha zen̈y, fotony iro mora matoky olo, baka io mora meloko.—Kolosianina 3:⁠21.

¹⁴ Mahery volan̈a ampiasainy Baiboly han̈aboahan̈a fa ratsy manihitihy na man̈ambany na man̈asaha olo zen̈y! Ten̈a misoma ratsy lan̈iany olo man̈ano zen̈y, fotony mety ho voaroaka tsy ho an̈isany fiangonan̈a izy, izikoa efa matetiky nanarin̈y kanefa tsy mety miova. Mety tsy ho tafiditry amy Paradisa ho avy io foeky izy. (1 Korintianin̈y  5:​11-​13; 6:​9, 10) Hitantsika baka amy zen̈y fa hiala amy fitiavany Zan̈ahary atsika, izikoa zatra man̈ano volandraty, mivolan̈a raha tsy marin̈y ndreky volan̈a tsisy hatsarampan̈ahy. Sady volan̈a karaha zen̈y mampifankaratsy foeky!

15. Karakory ma ‘volan̈a mankahery’ zen̈y?

¹⁵ Akory hampiasantsika fahaizantsika mivolan̈a io amy fomba itiavany Jehovah izy? Aza adin̈a fa Baiboly mandrisiky atsika han̈ano ‘volan̈a mankahery.’ (Efesianina 4:29) Ho ravoravo mare Jehovah izikoa atsika man̈ano zen̈y. Dikanizen̈y, tsara atsika mandiniky tsarabe alohany hivolan̈a. Baiboly tsy man̈amia lalàn̈a na lisity karazan̈a ‘volan̈a mankahery.’ (Titosy 2:⁠8) Izikoa tiantsika han̈ano “volan̈a tsara sady mankahery”, raha telo ty tsy tokony hadin̈antsika: Mahatsara naman̈a, marin̈y, baka io misy hatsarampan̈ahy. Atsika izio hizaha ohatra sasany han̈ampy atsika han̈ano zen̈y.—Zahava efajoro “ Mba Mankahery edy Volan̈a Ataoko?”

16, 17. a) Nan̈ino ma atsika tokony hidera olo hafa? b) Ombian̈a atsika afaka midera olo amy fiangonan̈a ndreky an̈atiny tokantran̈ontsika?

¹⁶ Volan̈a fideran̈a baka amy fo. Jehovah ndreky Jesosy samy man̈eky fa ilain̈y midera ndreky mankasitraka olo hafa. (Matio 3:17; 25:19-23; Jaona 1:47) Atsika koa tokony hidera namantsika. Ino antony? Koran̈iny Ohabolana 15:23 fa “tsisy tsara mandilatra volan̈a atao amy fotoan̈a mety.” Diniha hely baka ty: ‘Akory fahitanao izy izikoa misy olo midera anao amy fonany jiaby? Mamparavoravo ndreky mankahery anao raha zen̈y, sa karakory?’ Izikoa fa misy olo midera atsika baka amy fo, atsika mahatsiaro ten̈a misy dikany, fotony haintsika fa misy olo tia atsika ndreky mahita raha tsara vitantsika. Haintsika koa fa tsy  very boriny ezaka nataontsika. Hanjary hatoky ten̈a atsika, ke handrisiky atsika han̈ano ny tsara fo zen̈y. Izikoa tianao hidera anao olo hafa, anao antsendriky tokony hifen̈y han̈ano zen̈y amindro.—Vakia Matio 7:12.

¹⁷ Mifen̈a fo hahita toetry tsara aminolo, baka io man̈anova volan̈a fideran̈a. Ohatra, mety haharen̈y kabaro mankahery amy fivorian̈a an̈y anao, na mahita tanora mifen̈y manakatra tanjon̈o amy fanompoan̈a, na olo efa matoe kanefa tsy manapatapaka fivorian̈a. Mety hankahery iro volan̈a fideran̈a baka amy fo ataonao. Akory fo basy olo tran̈o araiky aminao? Ilain̈y koa man̈ano volan̈a fideran̈a, indraka eky fa amy vady. (Ohabolana 31:​10, 28) Ravoravo mare koa tsaiky izikoa olobendro midera iro amy raha tsara vitandro. Kakazo koa voarozy ndreky mahazo masoandra, maniry tsarabe. Karaha zen̈y koa ataondro tsaiky aby io izikoa fa misy olo mankasitraka raha ataondro. Raimandreny ma anao? Mahaiza midera zanakanao isaka izy mahavita raha tsara. Anao koa man̈ano zen̈y, izy hanjary tsy havozovozo fa hatoky ten̈a tsarabe. Zen̈y koa han̈ampy izy hifen̈y fo han̈ano raha manjary.

18, 19. Nan̈ino ma atsika tokony hifen̈y fo hankahery piaramanompo amintsika, karakory han̈anovantsika raha zen̈y?

¹⁸ Volan̈a fankahirezan̈a. Jehovah ten̈a mikarakara olo kivy ndreky “malahelo mare.” (Isaia 57:15) Baiboly man̈iraka atsika hankahery namantsika kivy na nandalovany raha ratsy. (1 Tesalonianina 5:11, 14) Matokisa fa Jehovah tsy mety han̈adin̈a ezaka ataontsika hankahirezan̈a piaramanompo amintsika an̈atiny alahelo.

¹⁹ Asa anao mba efa nieritreritry ino raha mety volan̈inao izikoa fa misy Kristianin̈y kivy mare. Anao mety hivolan̈a karaha ty: ‘Tsisy varany zaho hikoran̈a aminany, zaho kony tsy mahafaka jalinany e!’ Aleva onon̈o fa volan̈a tsotra hely efa ten̈a mety hankahery  izy. Amia toky izy fa anao mbala tia izy sady von̈ono han̈ampy izy. Anao mety mivavaka miaraka aminany. Ampatsiarova izy koa fa Jehovah ndreky olo amy fiangonan̈a ten̈a tia izy. (Jakoba 5:​14, 15) Koràn̈a aminany fa izy ten̈a ilain̈y. (1 Korintianina 12:​12-​26) Anao koa mety mamaky andininy baka amy Baiboly hahitany fa Jehovah ten̈a tia izy. (Salamo 34:18; Matio 10:​29-31) Hankahery izy “fikoran̈anao raha tsara” zen̈y aminany izikoa tsy ataonao mekimeky. Fa ny raha ten̈a maventy, tokony baka amy fontsika han̈anovantsika zen̈y.—Vakia Ohabolana 12:25.

20, 21. Ino raha tokony hataontsika baka mahomby torohevitry amiantsika?

²⁰ Torohevitry mahomby. Atsika jiaby io samy mila torohevitry aby ndraikindraiky, fotony tsy lavorary. Zen̈y mahavy Baiboly mivolan̈a: “Tandrin̈esa torohevitry, baka io man̈araha anatra, baka anao ho hisy jery aminy amaray an̈y.” (Ohabolana 19:20) Atsika koa samy mety man̈amia torohevitry, fa tsy antipan̈ahy zaraiky fo. Raimandreny mety man̈amia torohevitry zanany. (Efesianina 6:⁠4) Ranabavy matotro mety man̈amia torohevitry ranabavy tanora. (Titosy 2:​3-5) Atsika koa manan̈a fitiavan̈a, ho vitantsika han̈amia torohevitry mankahery fa tsy  mampakivy. Ino han̈ampy atsika han̈ano zen̈y? Raha telo ty mila dinihintsika: 1) Karakory toetsain̈y tokony hanan̈anolo pan̈amia torohevitry io, baka io ino antony mahavy izy han̈ano zen̈y? 2) Baka aia nangalany torohevitry io? 3) Karakory fomba an̈amezan̈a izio?

²¹ Arakaraka fomba nan̈amezan̈a torohevitry hampahomby na tsy hampahomby torohevitry. Iritrireta baka ty: ‘Amy fotoan̈a karakory ma hitanao mora man̈eky torohevitry?’ Ho mora aminao man̈eky torohevitry izikoa hitanao fa ten̈a tia anao olo man̈amia izio fa tsy antony ratsy nahavy izy nan̈ano zen̈y, baka io izy tsy meloko aminao. Ndray anao fo karaha zen̈y izikoa fa hamian̈a torohevitry, ke intsaka eky olo hafa? Hahomby koa torohevitry izikoa baka amy Volan̈a Zan̈ahary nangalan̈a izy. (2 Timoty 3:​16) Tokony baka amy Soratra Masin̈y fo torohevitry amiantsika, na han̈aboaka andininy atsika na tsy han̈aboaka. Tokony hitandrin̈y koa antipan̈ahy tsy hanery olo han̈araka hevitrinany, na han̈ova hevitry Soratra Masin̈y hankamarin̈any raha koran̈iny. Hahomby torohevitry amiantsika, izikoa atsika tsara fan̈ahy na tsara fomba ivolan̈antsika izy. Anao koa man̈ano zen̈y, izy ten̈a hahatsiaro ilain̈y.—Kolosianina 4:⁠6.

22. Tokony hampiasaintsika amy fomba karakory ma fahaizantsika mivolan̈a io?

²² An̈isany raha tsara namiany Zan̈ahary atsika fahaizan̈a mivolan̈a io. Atsika koa tia Jehovah, tokony hampiasaintsika amy fomba tsara fo izio. Aza adin̈a fa mety hankahery na hampakivy olo raha volan̈intsika. Man̈anova “volan̈a mankahery”, fotony zen̈y antony nan̈amezany Jehovah izio. Izikoa atsika mifen̈y fo han̈ano zen̈y, volan̈antsika hankahery olo. Zen̈y koa han̈ampy atsika tsy hiala amy fitiavany Zan̈ahary.