1. Mɛnɔmɛ Yehowa gblaa kɛ baa e ngɔ, nɛ mɛni he je e sa kaa a hɛ nɛ hi níhi nɛ sa Mawu hɛ mi ɔ he daa a?

YESU de ke: ‘Anɔkuale jali ma ja Tsɛ ɔ ngɛ mumi mi kɛ anɔkuale mi, ejakaa nihi nɛ jaa lɛ kikɛ ɔ Tsɛ ɔ hu ngɛ hlae.’ (Yohane 4:23) Ke Yehowa na kaa nihi suɔ kaa a ma ja lɛ ngɛ mumi mi kɛ anɔkuale mi kaa bɔ nɛ mo hu o suɔ kaa o ma ja lɛ ɔ, e gblaa mɛ kɛ baa e kɛ e Bi ɔ a ngɔ. (Yohane 6:44) Hyɛ bɔ nɛ e ji bua jɔmi ha! Enɛ ɔ he je ɔ, e sa nɛ nihi nɛ a bua jɔ Baiblo mi anɔkuale ɔ he ɔ nɛ a ‘bɔ mɔde nɛ a kase Nyɔmtsɛ ɔ suɔmi nya ní,’ ejakaa Satan he be kɛ nɔ sisimi.​​—Efeso Bi 5:10; Kpojemi 12:9.

2. Moo tsɔɔ bɔ nɛ Yehowa buu nihi nɛ hlaa kaa a kɛ lakpa jami ma futu anɔkuale jami ɔ ha.

² Mo susu nɔ́ nɛ ya nɔ ngɛ Sinai Yoku ɔ he benɛ Israel bi ɔmɛ de Aaron ke e pee mawu ha mɛ ɔ he nɛ o hyɛ. Aaron bua jɔɛ he mohu, se e kplɛɛ nɛ e pee sika tsu na bi ko, nɛ e tsɔɔ kaa e daa si ha Yehowa. E de ke, ‘Hwɔɔ ɔ, wa maa ye nyami ligbi ha Yehowa.’ Anɛ Yehowa bua jɔ lakpa jami nɛ a kɛ futu anɔkuale jami ɔ he lo? Dɛbi. E ha nɛ a gbe nimli maa pee 3,000 nɛ a ja wɔ nɛ ɔ. (2 Mose 32:1-6, 10, 28) Mɛni wa ma nyɛ maa kase kɛ je sane nɛ ɔ mi? Ke wa suɔ nɛ waa to wa he ngɛ Mawu suɔmi ɔ mi ɔ, e sɛ nɛ waa “ta nɔ́ ko nɛ he tsɔ we he.” E sa nɛ waa kɛ kã nɛ po anɔkuale ɔ he piɛ ngɛ níhi nɛ maa wo anɔkuale ɔ he mu ɔ a he.​​—Yesaya 52:11; Ezekiel 44:23; Galatia Bi 5:9.

3, 4. Mɛni he je nɛ e sa kaa waa ngɔ Baiblo sisi tomi mlaahi kɛ hla kusumihi kɛ gbijlɔ yemihi nɛ he biɛ ɔ a mi fitsofitso ɔ?

 ³ Aywilɛho sane ji kaa, benɛ bɔfo ɔmɛ nɛ tsi hemi kɛ yemi kuami nya a gbo ɔ, ni komɛ nɛ a sume anɔkuale ɔ, se a bua tsɛɛ a he ke Kristofohi ɔ ba bɔni wɔ jami kusumihi, gbijlɔ yemihi, kɛ ligbi “klɔuklɔuhi” a nɔ kplɛɛmi, nɛ a deɔ ke tɔmi ko be he kaa Kristofohi maa pee jã. (2 Tesalonika Bi 2:7, 10) Benɛ o ngɛ gbijlɔ nɛ ɔmɛ ekomɛ a he susue ɔ, mo kadi bɔ nɛ a jeɔ je ɔ suhi se pi Mawu suhi kpo ha. A pɔɔ suhi nɛ nyɛɛ se nɛ ɔmɛ nami ngɛ je ɔ mi gbijlɔ yemihi a mi: A haa nɛ nihi dii he lo ɔ akɔnɔhi a se, nɛ a woɔ mumi yayami kɛ ní tsumi, kɛ lakpa jami hemi kɛ yemihi a mi he wami. Ní nɛ ɔmɛ ji ‘Babilon Ngua a’ kadimi níhi. * (Kpojemi 18:2-4, 23) Jehanɛ ɔ, mo kai kaa Yehowa le kaa kusumihi nɛ he biɛ fuu je wɔ jami ní peepeehi nɛ e sume kulaa a mi. Jã nɔuu atsinyɛ jemi ko be he kaa mwɔnɛ ɔ hu e sume gbijlɔ yemi nɛ ɔmɛ kulaa. Anɛ e sɛ kaa wɔ hu waa yu wa he ngɛ gbijlɔ yemi nɛ ɔmɛ a he lo?​​—2 Yohane 6, 7.

⁴ Akɛnɛ anɔkuale Kristofohi ji wɔ he je ɔ, wa le kaa gbijlɔ yemi komɛ sɛ Yehowa hɛ mi. Se e he hia nɛ waa mwɔ wa yi mi kpɔ kaa waa kɛ wa he be a mi woe kɔkɔɔkɔ. Ke wa susu yi mi tomi he je nɛ gbijlɔ nɛ ɔmɛ sɛ Yehowa hɛ mi ɔ he ɔ, lɔ ɔ ma ha nɛ wa ma fi si konɛ wa kua nɔ́ tsuaa nɔ́ nɛ ma nyɛ ma ha nɛ wa be Mawu suɔmi ɔ mi hie ɔ.

5. Mɛni he je wa ma nyɛ ma de kɛ nɔ mi mami kaa a fɔ we Yesu ngɛ December 25 ɔ?

⁵ Baiblo ɔ wui Yesu fɔmi ligbi yemi ta. Ngɛ anɔkuale mi ɔ, nɔ ko nɔ ko li be pɔtɛɛ nɛ a fɔ Yesu. Se kɛ̃ ɔ, wa ma nyɛ  maa ma nɔ mi kaa a fɔ we lɛ December 25 ɔ nɔ. Jamɛ a be ɔ mi ɔ, fĩɛ yee wawɛɛ ngɛ he nɛ a fɔ lɛ ngɛ ɔ. * Nɔ́ he je nɛ wa ma nyɛ ma de jã ji, Luka ngma ke benɛ a fɔ Yesu ɔ, ‘to hyɛli komɛ ngɛ a tohi a he bue ngɛ nga a nɔ.’ (Luka 2:8-11) Ke jeha mluku ɔ tsuo ‘to hyɛli buu a tohi a he ngɛ nga nɔ’ ɔ, jinɛ Luka amaniɛ bɔmi ɔ he ko hia we. Se akɛnɛ hiɔmi kɛ snoo nɛɛ ngɛ Betlehem wawɛɛ ngɛ ahlabata be mi he je ɔ, to hyɛli ɔmɛ tsii a tohi a nya ngɛ tsu mi nɛ a ji kpo kɛ yɛ ‘nga nɔ.’ Jehanɛ ɔ, Yosef kɛ Maria hia blɔ kɛ ho Betlehem ya, ejakaa Kaisare Augusto fã ke nɔ tsuaa nɔ nɛ ya e ma mi nɛ a ya kane lɛ. (Luka 2:1-7) E ngɛ heii kaa Kaisare be nimli nɛ a sume Roma nɔ yemi ɔ fãe kaa a ya a ma mi ngɛ fiɛ̃ nɛ nya wa nɛ ɔ mi.

6, 7. (a) Jije Bloonya yemi kusumihi je? (b) Mɛni ji slɔɔto nɛ ngɛ ní nɛ a kee ngɛ Bloonya mi kɛ ní nɛ Kristofohi kee ɔ kpɛti?

⁶ Ngmami ɔ tui Bloonya yemi he munyu. Bloonya yemi je sisi ngɛ blema wɔ jami gbijlɔhi kaa Saturnalia a mi. E ji gbijlɔ nɛ Roma bi yeɔ kɛ haa ngmɔ humi mawu nɛ ji Saturn ɔ. Womi nɛ ji New Catholic Encyclopedia a hu tsɔɔ kaa, ngɛ nihi nɛ jaa wɔ nɛ a tsɛɛ ke Mitra akɔtaa bumi nya a, a yeɔ ‘pu nɛ nɔ ko be e nɔ kunimi nyɛe maa ye ɔ fɔmi ligbi’ ngɛ December 25 ɔ nɔ. Kristo gbenɔ se maa pee jeha lafa etɛ “benɛ pu jami he si ngɛ Roma a, nɛ Bloonya yemi je sisi.”

⁷ Ke wɔ jali ɔmɛ ngɛ gbijlɔ nɛ ɔ yee ɔ, a kee a he ní nɛ a yeɔ ní kpɔtɔɔ. Ní peepee nɛ ɔ yaa nɔ mwɔnɛ ɔ ngɛ Bloonya yemi mi. E ngɛ mi kaa mwɔnɛ ɔ, ke nihi ngɛ Bloonya yee ɔ, a keɔ a he ní kaa bɔ nɛ wɔ jali ɔmɛ peeɔ ke a ngɛ jamɛ a gbijlɔ ɔ yee mohu lɛɛ, se pi su nɛ a tu he munyu ngɛ 2 Korinto Bi 9:7 ɔ nɔ nɛ daa kɛ peeɔ jã. A ngma ngɛ  lejɛ ɔ ke: “Nɔ tsuaa nɔ nɛ ha bɔ nɛ e to kaa e ma ha. E ha kɛ bua jɔmi, se pi kaa a ngɛ e nɔ nyɛe ke e pee; ejakaa Mawu suɔ nɔ nɛ haa nɔ́ kɛ tsui mi jɔmi.” Suɔmi mi anɔkuale Kristofohi jeɔ nɛ a kɛ kee nihi ní, a mlɛ we be pɔtɛɛ ko loko a ke ní, nɛ a hyɛ we blɔ kaa nihi nɛ a ke mɛ ní kɛ to nane mi. (Luka 14:12-14; kane Bɔfo Ɔmɛ A Ní Tsumi 20:35.) Jehanɛ se ɔ, a bua jɔɔ kaa a yeɔ a he ngɛ pɔtɔtɔɛ kɛ hiɔ bɔmi nɛ ngɛ Bloonya yemi mi ɔ he.​​—Mateo 11:28-30; Yohane 8:32.

8. Anɛ dodoe mi hyɛli ɔmɛ ke Yesu ní ligbi nɛ a fɔ lɛ ɔ lo? Moo tsɔɔ nya.

⁸ Se eko ɔ, ni komɛ ma bi ke, tse dodoe mi hyɛli ɔmɛ ke Yesu ní ligbi nɛ a fɔ lɛ ɔ? Dɛbi. Nike ní nɛ a ya ha Yesu ɔ tsɔɔ bumi kpo nɛ a je kɛ ha lɛ kaa ganɔ, nɛ e ji nɔ́ nɛ a pɔɔ peemi ngɛ mahi nɛ a wo a ta ngɛ Baiblo ɔ mi ɔ a mi.  (1 Matsɛmɛ 10:1, 2, 10, 13; Mateo 2:2, 11) Ngɛ anɔkuale mi ɔ, pi nyɔ ɔ mi nɛ a fɔ Yesu ɔ nɛ a ya. Benɛ a ya lejɛ ɔ, Yesu be lohwehi a niye ní daka mi, nɛ tsa pi bimwɔyo ji lɛ hulɔ, mohu ɔ, e ye nyɔhiɔhi abɔ, nɛ e ngɛ we mi.

9. Mɛni ya nɔ ngɛ fɔmi ligbi yemihi nɛ a wo ta ngɛ Baiblo ɔ mi ɔ a sisi?

⁹ Be tsuaa be nɛ a ma fɔ bimwɔyo ɔ, wa náa bua jɔmi, se Baiblo ɔ de we gblee kaa a ye Mawu sɔmɔlɔ ko fɔmi ligbi. (La 127:3) Anɛ e be Baiblo ngmali ɔmɛ a hɛ mi lo? Dɛbi, ejakaa a wo nihi enyɔ nɛ ye a fɔmi ligbi ta​​—Farao nɛ je Egipt kɛ Herode Antipa. (Kane 1 Mose 40:20-22; Marko 6:21-29.) Ní yayamihi lɛ ya nɔ ngɛ fɔmi ligbi yemi enyɔ  nɛ ɔmɛ a sisi. Nɔ́ nɛ pa hí kulaa ji kaa a po Yohane Nɔ Baptisilɔ ɔ yi ngɛ Herode Antipa fɔmi ligbi yemi ɔ sisi.

10, 11. Kɛ Kristofohi nɛ a hi si ngɛ kaseli ɔmɛ a be ɔ mi ɔ bu fɔmi ligbi yemi ha kɛɛ, nɛ mɛni he je?

¹⁰ Womi ko nɛ ji The World Book Encyclopedia a tsɔɔ kaa “Kristofohi nɛ a hi si ngɛ kaseli ɔmɛ a be ɔ mi ɔ bu fɔmi ligbi yemi kaa wɔ jali a ní peepee.” Kaa nɔ hyɛmi nɔ́ ɔ, Hela bi ngɛ hemi kɛ yemi kaa nɔ tsuaa nɔ ngɛ mumi ko nɛ yeɔ e fɔmi he odase nɛ lɔ ɔ se ɔ, e buu e he e wami ligbi tsuo. Womi nɛ ji The Lore of Birthdays ɔ de ke mumi nɛ ɔ kɛ “mawu nɛ a fɔ nɔ ko ngɛ e ligbi nɔ ɔ ngɛ tsakpa nɛ ngɛ nyakpɛ.” Jehanɛ se hu ɔ, dodoe mi hyɛmi kɛ fɔmi ligbi yemi ngɛ tsakpa nɛ mi wa kɛ je blema lokoo.

¹¹ Pi kaa fɔmi ligbi yemi je wɔ jami mi he je kɛkɛ nɛ Mawu sɔmɔli nɛ a hi si blema a yi ngɛ, se eko ɔ, je mi bami he mlaahi nɛ a yeɔ nɔ ɔ hu he je. Mɛni he je? Mawu sɔmɔli nɛ ɔmɛ ji nyumuhi kɛ yihi nɛ baa a he si, nɛ a bui ligbi nɛ a fɔ mɛ ɔ kaa e he hia kaa a ye he gbijlɔ. * (Mika 6:8; Luka 9:48) Mohu ɔ, a woɔ Yehowa hɛ mi nyami nɛ a naa lɛ si ngɛ wami nɛ e kɛ ha mɛ kaa nike ní ɔ he je. *​​—La 8:3, 4; 36:9; Kpojemi 4:11.

12. Mɛni blɔ nɔ wa gbenɔ ligbi hi pe wa fɔmi ligbi ngɛ?

¹² Nihi tsuo nɛ gbo ngɛ anɔkuale yemi mi ɔ ngɛ Mawu juɛmi mi, nɛ nɔ mi mami ngɛ he kaa e ma ha mɛ wami hwɔɔ se. (Hiob 14:14, 15) Wa kaneɔ ngɛ Fiɛlɔ 7:1 ɔ ke: ‘Biɛ kpakpa hi pe nu je via nɛ he jua wa. Ligbi nɛ nɔ ko gbo ɔ hi pe ligbi nɛ a fɔ lɛ.’ “Biɛ kpakpa” a ji biɛ nɛ wa ná ngɛ Mawu  ngɔ akɛnɛ waa kɛ anɔkuale yemi sɔmɔ lɛ ɔ he je. Nɔ́ nɛ sa kadimi ji kaa, gbijlɔ nɛ a fã Kristofohi kaa a ye ɔ kɔ gbenɔ he, se pi fɔmi he. Lɔ ɔ ji Yesu gbenɔ ɔ, nɛ e “biɛ” kpakpa a nɔ a maa da kɛ he wa yi wami.​​—Hebri Bi 1:3, 4; Luka 22:17-20.

13, 14. Jije Ista kusumihi nɛ a he biɛ ɔ je?

¹³ Nihi deɔ ke a yeɔ Ista kɛ kaiɔ Kristo si temi ɔ, se ngɛ anɔkuale mi ɔ, e je lakpa jami mi. Biɛ Ista kɛ Anglo-Saxon bi a makɛ̃ kɛ gbiɛ nya yo mawu nɛ ji Eostre loo Ostara ngɛ tsakpa. Mɛni he je nɛ a ngɔɔ hlui kɛ alɔngɔ kɛ tsuɔ ní ngɛ Ista mi ɔ? Womi nɛ ji Encyclopædia Britannica a de ke, hlui “ji wami ehe loo gbogboe si temi he okadi nɛ a le saminya.” Nɛ a le alɔngɔ hu kaa e ji bi fɔmi he okadi kɛ je blema. Enɛ ɔ he ɔ, Ista ji bi fɔmi he kusumi ní peemi nɛ a tsake hɛ mi kɛ pee Kristo si temi ɔ he gbijlɔ. *

¹⁴ Anɛ Yehowa maa kplɛɛ bi fɔmi kusumihi nɛ a he tsɔ we ɔ a nɔ kaa a kɛ ye e Bi ɔ si temi ɔ he gbijlɔ lo? E be nɔ kplɛɛe kɔkɔɔkɔ! (2 Korinto Bi 6:17, 18) Ngɛ anɔkuale mi ɔ, Ngmami ɔ fã we po kaa a ye Yesu si temi ɔ he gbijlɔ. Enɛ ɔ he ɔ, ke wa yeɔ Ista nɛ wa deɔ ke wa yeɔ Yesu si temi ɔ he gbijlɔ ɔ, lɔ ɔ tsɔɔ kaa wa yi Yehowa anɔkuale kulaa.

15. Kɛ Halloween plɛ kɛ je sisi kɛɛ, nɛ mɛni sa kadimi ngɛ be nɛ a kɛ yeɔ gbijlɔ nɛ ɔ he?

¹⁵ Blema Celt bi nɛ a hi Britain kɛ Ireland ɔ lɛ ngɔ Halloween yemi nɛ a tsɛɛ lɛ He Tsɔli A Ligbi ɔ kɛ ba, nɛ ke e su gbijlɔ nɛ ɔ nɔ ɔ, nihi dlaa a he kaa azetsɛmɛ (hiali), nɛ a woɔ tade gbeyegbeyehi. Ke e piɛ bɔɔ nɛ e maa su  November 1, benɛ nyɔhiɔ ɔ nya kpe ɔ, a yeɔ Samhain gbijlɔ nɛ e sisi ji “Mawulɛ Nyagbe” ɔ. A he ye kaa bo ko po adesahi a je kɛ mumihi a je ɔ kpɛti, nɛ ke e su Samhain gbijlɔ ɔ nɔ ɔ, a jeɔ bo nɛ ɔ nɛ mumi kpakpahi kɛ mumi yayamihi ba kpaa si ngɛ zugba a nɔ. A he ye kaa ni gbogboe ɔmɛ a klaahi yaa a wehi a mi, enɛ ɔ he ɔ, weku li ngɔɔ niye ní, kɛ dã kɛ maa si ha kpadehi nɛ ba slaa mɛ ɔ konɛ a kɛ jɔɔ a tsui he. Enɛ ɔ he je ɔ, mwɔnɛ ɔ, ke jokuɛwi dla a he kaa kpadehi loo azetsɛmɛ nɛ a ya nihi a wehi a mi ya ngɛ a he gbeye woe kaa ke a ha we mɛ nɔ́ ko ɔ, a maa ye mɛ awi ɔ, a kɛ a he ngɛ Samhain kusumihi a mi woe se a li.

16, 17. (a) Mɛni he je nɛ e sa kaa nyumu kɛ yo nɛ a ji Kristofohi nɛ a ngɛ blɔ nya toe nɛ a sɛ gba si himi mi ɔ nɛ ngɔ Baiblo sisi tomi mlaahi kɛ susu yo kpeemi kusumihi a he ɔ? (b) Mɛni e sa kaa Kristofohi nɛ susu he ngɛ omɔ loo womi nɛ a poo tsɔwitsɔwi nɛ a fĩaa a he?

¹⁶ E piɛ bɔɔ nɛ ‘a be ayɛflo huno, kɛ ayɛflo nya nue hu ngɛ [Babilon Ngua a] mi.’ (Kpojemi 18:23) Mɛni he je? Yi mi tomi kake ji kaa Babilon Ngua a kunya yemi ní peemihi woɔ gba si himi he mu kɛ jeɔ yo kpeemi ligbi ɔ nɔ tɔɔ.​​—Marko 10:6-9.

¹⁷ E slo ma tsuaa ma kɛ e kusumi. Eko ɔ, kusumi komɛ nɛ e peeɔ wɔ kaa tɔmi ko be a he ɔ ji Babilon ní peemihi nɛ tsɔɔ kaa “siade” (aklama kpakpa) maa ba nyumu kɛ e yo ɔ, loo nihi nɛ ba yo kpeemi ɔ a nɔ. (Yesaya 65:11) Kusumi ní peemi nɛ ɔmɛ eko ji omɔ loo womi nɛ a poo tsɔwitsɔwi nɛ a fĩaa. Eko ɔ, ní peepee nɛ ɔ tsɔɔ kaa niye ní ɔ maa jɔɔ mumi yayami ɔmɛ a tsui he nɛ a be ayɛflo huno ɔ kɛ ayɛflo ɔ awi yee. Jehanɛ ɔ, a he ye kaa omɔ hɛɛ he wami ngɛ bi fɔmi, bua jɔmi kɛ wami se kɛmi nɔ kɛ je blema lokoo. E ngɛ heii kaa nɔ tsuaa nɔ nɛ suɔ kaa e maa hi Mawu suɔmi ɔ mi ɔ ma kua kusumi nɛ ɔmɛ nɛ woɔ nɔ he mu ɔ.​​—Kane 2 Korinto Bi 6:14-18.

18. Mɛni ji Baiblo sisi tomi mlaahi nɛ sa kaa e kudɔ nyumu kɛ yo nɛ ngɛ blɔ nya toe nɛ a sɛ gba si himi mi kɛ nihi nɛ a maa fɔ mɛ nine ɔ?

 ¹⁸ Jehanɛ se hu ɔ, Yehowa sɔmɔli kɛ a he wui je ɔ ní peepeehi nɛ be hae nɛ bumi maa ba yo kpeemi kɛ yo kpeemi okplɔɔ ngmɛmi he ɔ mi, nɛ a kɛ a he hu wui níhi nɛ maa hao ni kpahi a he nile ɔ mi. Kaa nɔ hyɛmi nɔ́ ɔ, a tu we he fɛu yemi loo yakayaka munyuhi nɛ ma ha zo maa gbe nihi nɛ sɛ gba si himi mi ehe ɔ kɛ ni kpahi. (Abɛ 26:18, 19; Luka 6:31; 10:27) Jehanɛ ɔ, a ngmɛ́ yo kpeemi okplɔɔ nguahi nɛ jeɔ “níhi nɛ nihi fĩaa kɛ fɔɔ ɔ nɔ” kpo. (1 Yohane 2:16) Ke o ngɛ yo kpeemi he blɔ nya toe ɔ, ha nɛ e hi o juɛmi mi kaa Yehowa suɔ kaa be tsuaa be nɛ o ma kai jamɛ a ligbi ɔ, o bua nɛ jɔ, se pi nɛ o ma pia o he. *

19, 20. Mɛni je mi womi ko de kɛ kɔ dã kɛ kplu nɔ womi he, nɛ mɛni he je e sɛ kaa Kristofohi nɛ ngɔ a he kɛ wo kusumi ní peemi nɛ ɔ mi?

¹⁹ Nɔ́ ko nɛ a pɔɔ peemi ngɛ yo kpeemi kɛ he nya buamihi a sisi ji dã kɛ kplu nɔ womi. Womi ko nɛ ji International Handbook on Alcohol and Culture nɛ a pee ngɛ jeha 1995 ɔ de ke: “Eko ɔ, dã kɛ kplu nɔ womi ji blema kusumi nɛ a guu nɔ kɛ ngɔɔ dã loo muɔ kɛ tɛliɔ ha wɔhi konɛ a kɛ bi nɔ́ ko ngɛ a dɛ. A deɔ ke ‘o se nɛ kɛ’ loo ‘o ná nɔmlɔ tso mi he wami!’”

²⁰ E ngɛ mi kaa nihi fuu be susue kaa dã kɛ kplu nɔ womi ji jami loo kusumi ní peemi ko. Se kɛ̃ ɔ, a ma nyɛ maa bu dã kɛ kplu nɛ a woɔ nɔ kɛ tsɔɔ hiɔwe ɔ kaa ní peemi nɛ a kɛ baa jɔɔmi kɛ jeɔ he wami ko nɛ ngɛ mumihi a je ngɔ, nɛ enɛ ɔ kɛ Ngmami ɔ kpa we gbi.​​—Yohane 14:6; 16:23. *

21. Mɛni gbijlɔ yemi komɛ lɛ eko ɔ, a kɛ jami be tsakpa, se kɛ̃ ɔ, e sa kaa Kristofohi nɛ yu a he ngɛ he, nɛ mɛni he je?

²¹ Ma komɛ toɔ Mardi Gras nɛ ji gbijlɔ yemi ko nɛ nihi dlaa a he bɔ nɛ e tleɔ bɔmi nami akɔnɔ si he blɔ nya, nɛ a doɔ kɛ nyɛɛɔ gbɛjegbɛhi a nɔ daa jeha. Gbijlɔ nɛ ɔ woɔ je nɛ puɛ kulaa nɛ Babilon Ngua a ngɛ nɔ he wami náe tɛ̃ɛ loo ngɛ blɔ nɛ a yo we nɔ ɔ su nɛ ji nyumu kɛ nyumu, kɛ yo kɛ yo a yakayaka ní peepeehi a mi he wami. Anɛ e sa kaa nihi nɛ a suɔ Yehowa a nɛ a ngɔ a he kɛ wo gbijlɔ nɛ ɔ mi, loo a ya hyɛ eko lo? Anɛ nihi nɛ a peeɔ jã a ma nyɛ maa tsɔɔ kaa a sume yayami lo? (La 1:1, 2; 97:10) E maa hi saminya kaa wa maa kase la polɔ ɔ su ɔ. E sɔle ke: “Níhi nɛ a he be se nami ɔ, ko ha ma hyɛ”!​​—La 119:37.

22. Mɛni be Kristofo no ko ma nyɛ maa da e he nile nɔ kɛ mwɔ e yi mi kpɔ kaa e maa ye gbijlɔ ko loo e be yee?

²² Ke je ɔ ngɛ gbijlɔ ko yee ɔ, e sa kaa Kristofo no nɛ hyɛ nɛ hi konɛ e ko ha e ní peepee nɛ tsɔɔ kaa e ngɔ e he kɛ ngɛ gbijlɔ yemi ɔ mi woe. Paulo ngma ke, ‘Ní nyɛ ngɛ yee jio, ní nyɛ ngɛ nue jio, nyɛɛ pee nɔ́ tsuaa nɔ́ kɛ wo Mawu hɛ mi nyami.’ (1 Korinto Bi 10:31; hyɛ daka nɛ e yi ji, “ Moo Mwɔ Yi Mi Kpɔ Nɛ Da.”) Se ke gbijlɔ yemi ko kɛ jami be tsakpa, e fĩ we ma kudɔmi blɔ nya tomi se, nɛ Baiblo sisi tomi mlaa ko hu bui lɛ fɔ ɔ, e sa nɛ Kristofo no tsuaa Kristofo no nɛ da e he nile nɔ kɛ mwɔ e yi mi kpɔ ke ji e maa ye loo e be yee. Se e sa kaa e susu ni kpahi hu a he konɛ e ko tɔ̃tɔ̃ nɔ ko nane.

23, 24. Mɛni blɔ nɔ wa maa gu kɛ ye Yehowa dami mlaa amɛ a he odase kpakpa kɛ tsɔɔ nihi?

²³ Nihi fuu buu ligbihi nɛ a kɛ yeɔ gbijlɔhi nɛ a he biɛ ɔ kaa a ji be nɛ sa nɛ weku li kɛ huɛmɛ buaa a he nya. Enɛ ɔ  he je ɔ, ke nɔ ko ná susumi nɛ dɛ kaa suɔmi be yi mi kpɔ nɛ wa daa Ngmami ɔ nɔ kɛ mwɔ ɔ mi ɔ, waa kɛ mi mi jɔmi ma nyɛ maa tsɔɔ lɛ nya kaa, Yehowa Odasefohi bua jɔɔ weku li kɛ huɛmɛ a he nya buamihi nɛ sa a he saminya. (Abɛ 11:25; Fiɛlɔ 3:12, 13; 2 Korinto Bi 9:7) Wa bua jɔɔ kaa waa kɛ wa suɔli ma ná huɛ bɔmi ngɛ be kpahi a mi ngɛ jeha a mi, se akɛnɛ wa suɔ Mawu kɛ e dami mlaa amɛ he je ɔ, wa sume kaa wa maa ngɔ kusumihi nɛ Mawu sume ɔ kɛ futu ní peemi nɛ ɔmɛ.​—Moo hyɛ daka nɛ yi ji, “ Anɔkuale Jami Ngɔɔ Bua Jɔmi Agbo Kɛ Baa.”

²⁴ Yehowa we bi komɛ ngɔ munyu otihi nɛ ngɛ Mɛni Tutuutu Ji Baiblo ɔ Tsɔɔmi? womi ɔ yi 16 kɛ tsɔɔ nihi gbijlɔ yemi sanehi a nya nɛ a nu sisi. * Mo kai kaa wa yi mi tomi ji kaa wa ma ha wa munyu ɔ nɛ sɛ nihi a tsui mi, se pi nɛ waa kɛ mɛ maa je atsinyɛ. Lɔ ɔ he ɔ, moo to o tsui si nɛ o ná bumi ha mɛ, konɛ o ha ‘munyu nɛ maa je o nya a nɛ ngɔ kaa nɔ́ ko nɛ a wo lɛ ngo.’​​—Kolose Bi 4:6.

25, 26. Mɛni fɔli maa pee kɛ ye bua a bimɛ konɛ a hemi kɛ yemi ɔ mi nɛ wa, nɛ a suɔ Yehowa?

²⁵ Akɛnɛ wa ji Yehowa sɔmɔli he je ɔ, a tsɔse wɔ saminya. Wa le nɔ́ he je nɛ wa peeɔ ní komɛ, kɛ nɔ́ he je nɛ wa yuɔ wa he ngɛ ní komɛ hu a he. (Hebri Bi 5:14) Enɛ ɔ he ɔ, fɔli, nyɛɛ tsɔɔ nyɛ bimɛ konɛ a susu Baiblo sisi tomi mlaahi a he. Ke nyɛ pee jã a, lɔ ɔ ma ha a hemi kɛ yemi mi ɔ mi maa wa, nɛ e maa ye bua mɛ konɛ a ngɔ Ngmami ɔ kɛ ha nihi nɛ biɔ a hemi kɛ yemi ɔ he sane ɔ heto, nɛ lɔ ɔ ma ha a maa na kaa Yehowa suɔ mɛ.​​—Yesaya 48:17, 18; 1 Petro 3:15.

²⁶ Nihi tsuo nɛ jaa Mawu ngɛ “mumi kɛ anɔkuale mi” ɔ ngɔɛ a he kɛ wui gbijlɔ yemihi nɛ be Ngmami ɔ mi ɔ mi, nɛ a bɔɔ mɔde hu kaa a maa ye anɔkuale ngɛ a si himi mi be tsuaa be. (Yohane 4:23) Mwɔnɛ ɔ, e peeɔ nihi fuu kaa anɔkuale yemi he hia we. Se kaa bɔ nɛ wa maa na ngɛ yi nɛ nyɛɛ se ɔ mi ɔ, Mawu blɔ ɔmɛ a se be.