1. Cosa clase de gente si Jehova ta busca para hace cerca con ele y porque kita debe esta alerto na espiritual?

“AQUELLOS quien ta adora deverasan ay adora con el Tata na Espiritu y na verdad. Cay ese clase de gente amo quiere el Tata que adora con Ele,” ya habla si Jesus. (Juan 4:23) Si ta puede incuntra si Jehova ansina clase de individual​—igual cuando ya incuntra le contigo​—ta hace le kanila cerca con ele y con el de suyu Anak. (Juan 6:44) Un privilegio gayot se! Pero aquellos quien ta ama con el verdad na Biblia debe ‘pricura discubri si cosa ta hace alegre con el Señor’ cay bueno gayot engaña si Satanas.​—Efeso 5:10; Revelacion 12:9.

2. Explica si cosa el mirada de Jehova con aquellos quien ta pricura hace junto con el verdadero religion na falso.

² Considera si cosa ya sucede cerca na Monte de Sinai cuando ya manda el maga Israelita con Aaron que hace kanila un dios. Forzao ya conforma si Aaron y ya hace un baka de oro pero ya habla le kanila que ta representa se con Jehova. “Tiene mañana un fiesta para con Jehova,” ya habla le. Aceptable ba con Jehova que man junto el verdadero religion na falso? Gendeh. Ya destroza le con el maga 3,000 gente quien ya adora con aquel idolo. (Exodo 32:1-6, 10, 28) Cosa el leccion? Si quierre kita esta na amor del Dios, ‘no kita agarra cosas mabuling’ y vicia enbuenamente para gendeh contamina el diaton adoranza con Dios.—Isaias 52:11; Ezequiel 44:23; Galacia 5:9.

3, 4. Porque kita debe pone gayot atencion na maga principio na Biblia si ta examina maga popular tradicion y celebracion?

 ³ Makatriste cay despues del muerte del maga apostoles, el quien ta guarda contra na apostasia, manada maga falso Cristiano quien nuay amor na verdad el ya principia practica maga tradicion y celebracion del maga pagano que asegun kanila, aceptable se para na maga Cristiano. (2 Tesalonica 2:7, 10) Mientras considera tu con este cuanto maga celebracion, nota si paquemodo este ta dale mira con el espiritu del mundo y gendeh del Dios. Puede kita habla que el maga celebracion na entero mundo tiene un comon aspeto: Ta influencia este con el maga deseo del cuerpo y ta suporta con el espiritismo y maga falso creencia​—maga marca del “Grande Babilonia.” * (Revelacion 18:2-4, 23) Pone tambien na pensamiento que ya mira mismo si Jehova con el maga detestable practica de pagano donde ya sale el maga popular celebracion. Asigurao que detestable siempre con ele ahora ese maga celebracion. Gendeh ba el mirada de Jehova amo el mas importante para kanaton?​—2 San Juan 6, 7.

⁴ Como maga verdadero Cristiano, sabe kita que cuanto na maga celebracion gendeh ta hace alegre con Jehova. Poreso, necesita determinao kita no queda envuelto con ese. Si man repaso kita si porque gendeh aceptable con Jehova ese maga celebracion, hay queda fuerte el diaton determinacion que evita maskin cosa que puede sangga kanaton para esta na amor del Dios.

5. Porque kita puede asigura que nuay nace si Jesus del Deciembre 25?

⁵ Nuay menciona el Biblia acerca na celebracion del cumpliaño de Jesus. Gane, nuay quien sabe si cuando el exacto  fecha del de suyu nacimiento. Pero puede kita asigura que nuay le nace del Deciembre 25, un mes que bien frio na aquel lugar. * Un razon amo que asegun con Lucas, cuando ya nace si Jesus el “maga pastor ta durmi na sereno” y ta vicia con el diila maga carnero. (Lucas 2:8-11) Si acustumbrao sila esta “na sereno” entero año, gendeh quel queda bien importante detalle. Pero ciendo el Betlehem ta experiencia ulan y nieve, el maga carnero gendeh ta esta afuera durante ese tiempo y el maga pastor gendeh “durmi na sereno.” Mas pa, ya anda kanda Jose y Maria na Betlehem cay ya manda si Cesar Augusto con el maga gente anda registra. (Lucas 2:1-7) Imposible que manda si Cesar con el maga gente, quien rabiao na rulanza del maga Romano, que viaja para na diila lugar durante el bien frio tiempo.

6, 7. (a) Onde estaba el manada tradicion durante el Pascua? (b) Cosa el diferencia del dalida de regalo durante el Pascua y del maga Cristiano?

⁶ Gendeh na Escritura ya origina el Pascua sino na maga pagano fiesta de antes igual na Saturnalia del maga Romano. Celebracion este que dedicao para con Saturno, el dios de agricultura. Asegun na diila cuntada, el maga devoto ta celebra tambien cada Deciembre 25 el cumpliaño de Mithra que dios de sol, ya habla el New Catholic Encyclopedia. “Ya principia el Pascua na tiempo donde bien fuerte el adoranza na sol na Roma,” maga tres siglo despues del muerte de Cristo.

⁷ Durante el diila celebracion, el maga pagano tan cambiajan regalo y tiene comejan​—maga practica que parte ahora del celebracion de Pascua. Igual na diaton tiempo ahora, el dalida de regalo durante ese celebracion gendeh harmonia na 2 Corinto 9:7 que donde ta habla: “Cada uno necesita dale el cosa le ya decidi na disuyo corazon gendeh alang-alang  o forzao, cay el Dios ta ama con aquel quien ta dale con alegria.” El maga verdadero Cristiano ta dale regalo cay tiene sila amor y gendeh sila ta depende na un particular fecha ni ta expecta que ricibi tambien regalo. (Lucas 14:12-14; le con el Maga Actividad 20:35.) Mas pa, alegre sila cay gendeh sila ta experiencia el lisud y ta tiene manada debe durante el Pascua.​—Mateo 11:28-30; Juan 8:32.

8. Ya dale ba regalo el maga astrologo con Jesus na de suyu cumpliaño? Explica.

⁸ Pero manada el tan razon, gendeh ba ya dale regalo el maga astrologo con Jesus na de suyu cumpliaño? Nuay. Ya dale sila regalo cay ta conoce sila con Jesus como un importante persona, un tradicion que comon ya na tiempo del Biblia. (1 Rey 10:1, 2, 10, 13; Mateo 2:2, 11) Gane, nuay sila anda na mismo noche del nacimiento de Jesus. Cuanto meses ya si Jesus y na casa ya cuando ya llega sila y gendeh un nuevo nacido bata na pasungan.

9. Cosa ya sucede na celebracion del cumpliaño que ya menciona na Biblia?

⁹ Maskin pa un alegre ocasion el nacimiento del un bata, nuay menciona el Biblia acerca na celebracion del cumpliaño del un siervo del Dios. (Salmo 127:3) Tiene dos celebracion de cumpliaño el ya menciona​—del Faraon de Egipto y de Herodes Antipas. (Le con el Genesis 40:20-22; Marcos 6:21-29.) Pero na este dos ocasion ya tiene maga mal suceso​—especialmente na cumpliaño de Herodes Antipas que donde ya curta el cabeza de Juan Bautista.

10, 11. Cosa el mirada del maga Cristiano del primer siglo con el celebracion de cumpliaño y porque?

¹⁰ Asegun na The World Book Encyclopedia, “el maga Cristiano del primer siglo ya considera con el celebracion de nacimiento  del maskin quien como tradicion de pagano.” Por ejemplo, el maga Griego del antes ta creé que presente el un espiritu na nacimiento del un persona y protege este con ele na de suyu entero vida. Ese espiritu “tiene misterioso coneccion con el dios que el cumpliaño igual na dia que ya nace el persona,” ya habla el libro The Lore of Birthdays. Tarda ya tiene cerca coneccion el cumpliaño na astrologia y horoscope.

¹¹ Puera que gendeh ta celebra cumpliaño el maga siervo del Dios de antes cay estaba este na maga pagano, posible que gendeh tambien sila ta celebra por causa na cosa sila ta creé. Porque se kita puede habla? Maga humilde hombre y mujer sila quien gendeh ta pensa que bien importante el diila llegada na mundo que debe con este celebra. * (Miqueas 6:8; Lucas 9:48) Sino, ta dale sila gloria con Jehova y ta rindi gracias con ele cay ya dale le kanila vida. *​—Salmo 8:3, 4; 36:9; Revelacion 4:11.

12. Porque mas bueno el dia del diaton muerte contra na dia del diaton nacimiento?

¹² El Dios hay acorda con aquellos fiel con ele si muri sila y asigurao que hay resucita kanila na futuro. (Job 14:14, 15) El Eclesiastes 7:1 ta habla: “Mas bueno pa el un buen nombre contra na buen aceite y mas bueno pa el dia del muerte contra na dia del nacimiento.” El diaton “buen nombre” amo el buen reputacion que ya tiene kita con Dios por medio na diaton fiel servicio. Gane, un comemoracion lang el ya manda celebra con el maga Cristiano​—gendeh el nacimiento sino el muerte de Jesus de quien “Nombre” bien importante na diaton salvacion.​—Maga Hebreo 1:3, 4; Lucas 22:17-20.

13, 14. Porque gendeh aceptable na maga Cristiano el celebracion de Año Nuevo?

¹³ El celebracion de año nuevo ya origina na maga pagano tradicion. Asegun na The World Book Encyclopedia, “El ta rula na maga Romano que si Julio Cesar ya establicia con el Enero 1 como Dia de Año Nuevo del 46 B.C. El maga Romano ya dedica con este dia con Janus, el dios de maga fuerta y principio. El mes de Enero ya saca na nombre de Janus quien tiene dos carra​—el uno ta mira adelante y el uno atras.”

¹⁴ Otro-otro el fecha y maga tradicion que ta hace cada Año Nuevo na diferente nacion. Asegun na Standard Dictionary of Folklore, Mythology, and Legend: “Manada maga nacion na parte Occidental el ta celebra con el pasada del año y el llegada del nuevo año por medio de bailada, tomada y sobra de alegria.” El mismo referencia ya habla que maskin aquellos de otro cultura “ta considera con el fin del un año y el principio del nuevo año como tiempo de alegria.” Pero el Roma 13:13 ta dale este consejo: “Vivi kita asegun con el maga custumbre conviene con el maga gente del luz: Evita el maga boracherias, maga tragonadas, maga immoralidad, maga cabit, maga peleajan, y maga imvidia.”​—Galacia 5:19-21; 1 Pedro 4:3, 4.

15. Onde ya origina el Todos Los Santos?

¹⁵ Onde ya origina el Todos Los Santos? Na cuanto maga lugar, ta llama tambien con este como Halloween. Ta celebra con este na noche del Todos Los Santos y conocido na usada de maga makamiedo decoracion igual como buruju. Ya origina este celebracion na maga Celt de Britain y Ireland de antes. Durante el interacion o full moon que cerca na fecha de Noviembre 1, ta celebra sila con el fiesta de Samhain que quierre decir “Fin del Soles.” Ta creé sila que durante del  Samhain, ta abri el cosa ta separta con el mundo del maga espiritu y del maga gente. El maga espiritu, bueno man o malo, ta bulcha na tierra. Ta creé sila que el maga alma del maga muerto ta bira na diila casa y el maga familia ta prepara cosa come y toma para gendeh kanila rabia el maga alma. Poreso, estaba na pagano el maga tradicion que ta hace durante el Todos Los Santos, igual como lleva comida y reza para na maga muerto.

16, 17. (a) Porque el maga Cristiano quien quierre casa debe examina con el maga local tradicion de casamiento por medio na maga principio na Biblia? (b) Acerca na tradicion de butada flores durante el casamiento y si quien hay ricibi con ese amo el sunod casa, cosa debe considera el Cristiano?

¹⁶ Gendeh limpio na ojos del Dios el maga casamiento que influenciao de maga tradicion del Grande Babilonia. (Marcos 10:6-9) Poreso, ta habla el Revelacion 18:23 que gendeh dura “nunca mas ay oi alli [na Grande Babilonia] el voz del novio y del novia.”

¹⁷ Otro-otro el maga tradicion que ta hace na cada nacion. Tiene maga tradicion que dol bueno pero posible influenciao del maga practica de Babilonia que ta lleva daw ‘suerte’ na man maridable o na diila maga visita. (Isaias 65:11) Un popular tradicion na casamiento ahora amo que buta el mujer con el de suyu flores. Ta creé sila que si quien puede ricibi con ese amo el sunod casa. Ya origina este na falso enseñanza y na maga pagano. Claro que todo quien quierre esta na amor del Dios debe evita con ese maga mabuling tradicion.​—Le con el 2 Corinto 6:14-18.

18. Cosa maga principio na Biblia el debe guia con el quien casa y aquellos quien atende na casamiento?

¹⁸ El maga siervo de Jehova debe tambien evita con el maga practica que comon na mundo ahora que posible hace perde con el dignidad del casamiento y del wedding reception  o posible gendeh aceptable na conciencia del otro. Por ejemplo, ta evita sila dale mensaje que puede hace sinti duele o acerca na sexo o man broma cosas que puede hace huya con el nuevo casao o con otro. (Proverbio 26:18, 19; Lucas 6:31; 10:27) Ta evita tambien sila hace engrande celebracion que ta dale mira con “el orgullo del vida.” (1 San Juan 2:16) Si ta plaña tu de tuyu casamiento, no ulvida que quierre si Jehova que queda este especial y puede tu acorda como dia de alegria y gendeh tu arripinti. *

19, 20. Cosa ya habla el un referencia acerca na toasting y porque este tradicion gendeh aceptable con el maga Cristiano?

¹⁹ Comon na maga casamiento y na otro celebracion el man toast—hace tupa con el maga baso na uno’y otro y despues habla ‘cheers’ antes de toma. El 1995 International Handbook on Alcohol and Culture ya habla: “El toasting . . . posible un secular tradicion que estaba pa na tradicion de antes donde ta ofrece sagrao tomada con el maga dios . . . como premio cay ya oi con el rezo usando el maga palabra ‘largo vida!’ o ‘tiene tu buen salud!’”

²⁰ Deverasan para na manada gente ahora, el toasting nuay coneccion na religion o supersticion. Maskin pa ansina, el tradicion que alza con el baso pa-arriba puede mira como ta pidi bendicion na “cielo” na manera que gendeh harmonia na Escritura.—Juan 14:6; 16:23. *

21. Maskin pa nuay coneccion na maga practica del religion, cosa maga celebracion el ta evita el maga Cristiano y porque?

²¹ Puede mira ahora el bien bajo moral del mundo que influenciao na directa o gendeh directa manera del Grande  Babilonia. Gane, cuanto nacion ahora el ta organiza fiesta cada año que ta dale mira maga gendeh buen clase de bailada y ta dale mira el manera de vida del maga homosexual. Justo ba para con aquellos quien ta ama con Jehova que participa o mira con ese clase de celebracion? Si hace sila se, ta dale ba sila mira que ta odia gayot sila si cosa el malo? (Salmo 1:1, 2; 97:10) Bien bueno para imita con el salmista quien ya reza: “No conmigo permiti mira el maga cosas que nuay valor”!​—Salmo 119:37.

22. Cuando puede decidi el un Cristiano base na de suyu conciencia si participa ba le na un celebracion?

²² Na dia del maga celebracion del mundo, el un Cristiano necesita con cuidao que gendeh le dale impresion con otro que ta celebra tambien le con ese. “Maskin cosa ustedes ta come, maskin cosa ustedes ta toma, maskin cosa gayot ustedes ta hace, hace ese para el gloria del Dios.” (1 Corinto 10:31; mira con el cajon “ Hace Justo Decicion.”) Pero si el un celebracion nuay coneccion na falso religion, politica y gendeh ta viola con el maga principio na Biblia, el cada uno Cristiano necesita decidi si participa ba le con ese. Na de suyu decicion, considera tambien le con el sentido del otro para gendeh sila man luya por causa con ele.

23, 24. Paquemodo kita puede explica con otro acerca na maga justo principio de Jehova?

²³ Manada gente ta mira con el cuanto maga popular celebracion como oportunidad para man junto con el diila maga amigo y familia. Poreso, si tiene quien habla que gendeh amable o sobra el diaton mirada con ese maga celebracion, puede kita explica kanila na buen manera que importante para na maga Testigo de Jehova el maga aceptable celebracion junto con el diila familia y maga amigo.  (Proverbio 11:25; Eclesiastes 3:12, 13; 2 Corinto 9:7) Entero año, alegre kita man junto con aquellos con quien kita ta ama. Pero por causa na diaton amor con Dios y na de suyu justo principio, no quierre kita inclui na ese maga ocasion el maga tradicion que ta odia le.​—Mira con el cajon “ El Verdadero Adoranza Ta Dale Grande Alegria.”

²⁴ Ya tiene buen resulta cuando ya explica el cuanto maga Testigo de Jehova con aquellos quien ta pregunta usando el maga punto na capitulo 16 del libro Cosa Kanaton Puede Enseña el Biblia? * Pero acorda que hace kita se cay quierre kita que queda sila interesao na verdad y gendeh para dale mira que gendeh sila justo. Poreso queda respetoso, esta calmao y “hace el de ustedes conversada alegre y interesante.”—Colosa 4:6.

25, 26. Paquemodo puede ayuda el maga mayores con el diila anak queda fuerte el fe y amor con Jehova?

²⁵ Como maga siervo de Jehova, sabe kita si porque kita ta creé y ta practica el cuanto maga cosas pero ta evita con otro. (Maga Hebreo 5:14) Poreso, maga mayores enseña con el de ustedes maga anak si paquemodo pensa harmonia na maga principio na Biblia. Por medio con ese, ta hace ustedes fuerte el diila fe, ta ayuda kanila si paquemodo contesta estaba na Escritura si tiene quien pregunta kanila acerca na cosa sila ta creé y ta asigura ustedes kanila que ta ama kanila si Jehova.​—Isaias 48:17, 18; 1 Pedro 3:15.

²⁶ Todo quien ta adora con Dios na “Espiritu y na verdad” gendeh lang ta evita maga celebracion que contra na Biblia sino ta pricura tambien queda honesto na todo aspeto del diila vida. (Juan 4:23) Manada ahora ta pensa que gendeh ya practical queda honesto. Pero como cosa kita discuti na siguiente capitulo, el maga manera del Dios amo el de con todo bueno.