1. Ki kalite dimoun Zeova i atir ver li e akoz zot bezwen reste eveye spirityelman?

ZEZI ti dir: “Bann vre adorater [pou] ador Bondye an-espri e an verite, parski se koumsa ki Bondye i oule ki nou ador li.” (Zan 4:23) Kan Zeova i vwar sa bann ki anvi ador li, zis parey i’n vwar ou, i atir zot ver li ek son Garson. (Zan 6:44) Pa sa i en privilez! Me tou sa bann ki kontan sa laverite ki sorti dan Labib, zot bezwen kontinyen “konn disteng sa ki fer plezir Bondye,” akoz Satan i en eksper dan anbet dimoun.​—Efezyen 5:10; Revelasyon 12:9.

2. Eksplike ki mannyer Zeova i vwar sa bann ki esey melanz vre larelizyon avek sa ki fo.

² Annou egzamin sa ki ti arive o bor Montanny Sinai kan bann Izraelit ti demann Aaron pour fer en bondye pour zot. Aaron ti dakor e i ti fer en pti bef annor ki ti swadizan reprezant Zeova. I ti dir: “Demen i annan en lafet pour Zeova.” Eski Zeova pa ti antren li avek sa melanz vre ek fo larelizyon ki zot ti fer? Sa ti tou lekontrer. Akoz sa, i ti touy apepre trwa mil sa bann adorater zidol. (Egzod 32:1-6, 10, 28) Ki leson nou tire? Si nou anvi reste dan lanmour Bondye, nou pa devret “tous nanryen enpir” e fer tou sa ki nou kapab pour anpes laverite ganny kontaminen.​—Izai 52:11; Ezekyel 44:23; Galat 5:9.

3, 4. Akoz nou bezwen port byen latansyon lo bann prensip Labib kan nou pe egzamin bann koutim ek lafet ki popiler?

³ Malerezman, apre lanmor bann zapot ki ti anpes bann fo lansennyman antre dan kongregasyon, bann swadizan Kretyen ki pa ti vreman kontan laverite ti konmans  aksepte bann koutim, lafet ek bann zour “sen” ki bann payen ti obzerve e fer zot vin bann lafet Kretyen. (2 Tesalonisyen 2:7, 10) Anmezir ki ou egzamin serten sa bann lafet, remarke ki zot napa nanryen pour fer avek lespri Bondye, me plito zot reflekte lespri lemonn. An zeneral, sa bann lafet dan lemonn i annan serten keksoz an komen: Zot eksit move dezir imen e promot fo krwayans relizye e demonyak. Tousala i tipikman reprezant “Gran Babilonn.” * (Revelasyon 18:2-4, 23) Pa bliye ki Zeova li menm ti vwar sa bann pratik degoutan dan bann larelizyon payen, kot bokou koutim popiler ozordi i sorti. San okenn dout, menm ziska ozordi, i ankor vreman pa kontan sa bann lafet. Eski pa lafason ki Zeova i vwar keksoz ki devret pli enportan pour nou?​—2 Zan 6, 7.

⁴ Konman vre Kretyen, nou konnen ki i annan serten lafet ki Zeova pa kontan. Me pour nou kapab rezet net sa bann lafet, nou pou vreman bezwen annan en gran determinasyon dan nou leker. Kan nou revwar ansanm akoz Zeova pa kontan sa bann lafet, sa pou fer nou pli determinen pour evit okenn keksoz ki ti a kapab anpes nou reste dan lanmour Bondye.

5. Akoz nou kapab asire ki Zezi pa ti ne le 25 Desanm?

⁵ Labib pa dir ki bann serviter Bondye ti selebre nesans Zezi. Anfet, nou pa ni konn egzakteman kan i ti ne. Me nou kapab asire ki i pa ti ne le 25 Desanm, akoz sa letan dan sa rezyon i ti lepok liver. * Kwa ki fer nou asire ki i pa ti ne sa  dat, se akoz dapre Levanzil Lik, kan Zezi ti ne “bann berze . . . ti pas tou lannwit deor” pour vey zot troupo. (Lik 2:8-11) Sa pa ti pou enportan si zot ti annan labitid pour “pas tou lannwit deor” tou dilon lannen. Me vi ki pandan liver Betleenm, i annan lapli ek lanez, bann troupo ti ganny garde anndan pandan liver e i pa ti pou posib pour bann berze pas “lannwit deor.” Deplis, Zozef ek Mari ti al Betleenm akoz Sezar Ogis ti’n demann tou dimoun pour partisip dan en resansman. (Lik 2:1-7) I preski enposib pour krwar ki Sezar ti pou demann sa bann dimoun ki ti ankoler kont lafason ki bann Romen ti dirize, pour al dan lavil kot zot zanset ti ne dan gran liver.

6, 7. (a) Kote bokou bann koutim ki relye avek Nwel i sorti? (b) Ki diferans i annan dan lafason ki kado i ganny donnen zour Nwel ek lafason ki en Kretyen i donnen?

⁶ Nou pa pou vwar lorizin Nwel dan Labib, me plito dan bann lafet payen dan letan lontan, parey Saturnalia, en lafet ki bann Romen ti fer pour Saturn, bondye lagrikiltir. New Catholic Encyclopedia i dir ki pareyman, dapre zot kalkilasyon, savedir sa bann ki ti ador bondye Mithra, zot ti selebre le 25 Desanm konman “lanniverser soley.” “Nwel ti konmanse kan ladorasyon soley ti byen renonmen Ronm,” apepre trwa syek apre lanmor Kris.

⁷ Pandan sa lafet, bann payen ti donn kanmarad kado e manz bann repa spesyal ansanm e ozordi sanmenm sa ki nou vwar zour Nwel. Menm dan nou lepok, bokou sa bann kado ki ganny donnen zour Nwel, i pa ganny fer parey 2 Korentyen 9:7 i ankouraz nou pour fer. I dir: “Fodre ki sakenn i donn dapre sa ki i’n deside, non pa avek regre ou par lobligasyon, parski Bondye i kontan sa ki donn avek lazwa.” Bann vre Kretyen i donn kado akoz zot leker i pous zot pour donnen, zot pa fer li zis akoz en zour spesyal e zot pa ekspekte okenn kado an retour. (Lik 14:12-14; Akt 20:35) An plis ki sa, zot kontan en kantite ki zot pa bezwen viv anba presyon pandan sa letan e i en soulazman pour  zot akoz zot napa okenn det ki pou zis vin en fardo.​—Matye 11:28-30; Zan 8:32.

8. Eski bann astrolog ti anmenn kado lanniverser pour Zezi? Eksplike.

⁸ Me serten i kapab dir, eski pa bann astrolog ti anmenn kado lanniverser pour Zezi? Sa i pa vre. Sa bann kado ki zot ti anmennen ti senpleman en fason pour montre respe anver en dimoun ki ti enportan, en koutim ki ti egziste sa letan. (1 Lerwa 10:1, 2, 10, 13; Matye 2:2, 11) Anfet, zot pa ti vin sa zour swar ki Zezi ti ne. Kan zot ti arive, Zezi ti nepli en pti baba dan en loz, me i ti annan plizyer mwan e i ti pe reste dan en lakaz.

9. Ki ti arive pandan sa de lanniverser nesans ki Labib i koz lo la?

⁹ I vre ki ler en pti baba i ne, sa i toultan anmenn lazwa.  Me selman Labib pa mansyonn okenn serviter Bondye ki ti selebre son lanniverser nesans. (Psonm 127:3) Eski sa ti zis en lerer? Non, Labib i koz lo de lanniverser nesans pour Faraon ek Erod Antipas. (Zenez 40:20-22; Mark 6:21-29) Pour tou le de lanniverser nesans, i pa ti ariv sa ki byen, sirtou pour lanniverser Erod akoz zot ti koup latet Zan Batis.

10, 11. Ki pwennvi bann premye Kretyen ti annan lo lanniverser nesans e akoz?

¹⁰ The World Book Encyclopedia i fer resorti ki “bann premye Kretyen ti vwar selebrasyon lanniverser nesans konman en koutim payen.” Par egzanp, bann Grek ti krwar ki sak dimoun ti annan en lespri ki la prezan ler i ne e ki vey e protez li tou dilon son lavi. Dapre sa liv The Lore of Birthday, sa lespri “ti annan en relasyon misterye avek sa  bondye ki son lanniverser nesans ti tonm menm zour ki sa dimoun ti ne.” Deplis, pour bokou letan, lanniverser nesans in direkteman relye avek astrolozi ek oroskop.

¹¹ Bann serviter Bondye dan lepase pa ti refize pour swiv bann koutim ki relye avek lanniverser nesans zis akoz sa bann koutim i sorti parmi bann payen e i relye avek bann pratik demonyak. Me osi akoz bann prensip ki zot ti swiv. Akoz nou dir sa? Akoz zot ti bann dimoun ki ti annan limilite e ki ti napa en gran pwennvi lo zot menm, zot pa ti vwar zot nesans konman en keksoz telman enportan ki zot ti bezwen selebre. * (Mika 6:8; Lik 9:48) Zot ti plifere donn Zeova laglwar e remersye li pour sa lavi ki en kado presye. *​—Psonm 8:3, 4; 36:9; Revelasyon 4:11.

12. Ki mannyer zour nou lanmor i kapab pli bon ki zour nou nesans?

¹² Kan bann ki fidel i mor, Bondye pa pou zanmen bliy zot e zot lavenir i asire. (Zob 14:14, 15) Eklezyast 7:1 i dir: “Vomye en non ki en bon delwil, e vomye zour lanmor ki zour nesans.” Nou “non” i sa bon repitasyon ki nou annan devan Bondye akoz nou’n fidelman servi li. Sa sel levennman ki Kretyen in ganny demande pour obzerve, ki tre enportan pour nou, i napa nanryen pour fer avek nesans, me plito lanmor e sa i lanmor Zezi ki son “non” oubyen bon repitasyon i tre enportan pour nou ganny lavi.​—Lik 22:17-20; Ebre 1:3, 4.

13, 14. Ki lorizin sa koutim popiler ki apel Pak?

¹³ Menm si i ganny vwar konman en lafet ki selebre  rezireksyon Kris, annefe Pak ek semenn sent i relye avek bann koutim payen ki sorti dan fo larelizyon. An Kreol, non sa selebrasyon i donn lenpresyon ki sa i lafet Pak bann Zwif ki’n ganny adapte pour bann Kretyen. Parkont, non sa menm lafet an Angle Easter i relye avek bondye granmaten ek prentan, ki apel Eostre oubyen Ostara, ki ti bondye bann Anglo-Saxon lontan. Me ki dizef ek lapen i annan pour fer avek Pak? Dapre Encyclopædia Britannica, dizef “i renonmen konman en senbol ki reprezant nouvo lavi ek rezireksyon.” Deplis, lyev ek lapen in toultan ganny konsidere konman en senbol pour reprodiksyon. Alors, i evidan ki Pak i en lafet ki annan pour fer avek bann koutim payen lo reprodiksyon ki’n zis ganny sanze en ptigin pour fer li vin selebrasyon rezireksyon Kris. *

¹⁴ Eski Zeova pou aksepte en tel ladorasyon ki annan pour fer avek reprodiksyon ki swadizan komemor rezireksyon son Garson? Zanmen nou kapab krwar en keksoz parey! (2 Korentyen 6:17, 18) Premyerman, Labib pa’n zanmen demann nou pour komemor rezireksyon Zezi e pli grav ankor pour asosye li avek bann koutim payen ki sorti dan fo larelizyon.

15. Kote Halloween i sorti e kwa ki kapab ganny reprezante par sa zour ki zot in swazir pour selebre sa lafet?

¹⁵ Renonmen pour son bann sorsye, ptipti nen, vilen dekorasyon ek tou lezot keksoz ki relye avek sa lafet, Halloween, i osi ganny apele lavey tou bann Sen oubyen lavey Lafet Latousen. Lorizin Halloween i sorti parmi bann Celt  lontan ki ti sorti Langleter ek Irlann. Kan i ti plennlin ver le 1 Novanm, zot ti selebre en lafet ki ti apel Samhain, savedir “Lete in fini.” Pandan sa lafet, zot ti krwar ki i nepli annan separasyon ant imen ek lemonn spirityel e ki bann lespri, ki swa bon oubyen move, ti sirkile lo later. Zot ti osi krwar ki bann nanm ti retourn kot zot lakour e zot fanmir ti met manze ek bwar pour sa bann nanm ki ti vin vizit zot, avek lespwar ki zot pa ti pou fer nanryen mal. Alors, kan bann zanfan ozordi i abiy konman nanm ek sorsye e al kanzankaz pour fer sa met lakour per si i pa donn zot keksoz, san konnen zot pe kontinyelman prezerv sa koutim ki apel Samhain.

16, 17. (a) Akoz bann koup Kretyen ki pe al marye i devret verifye bann koutim lokal konsernan maryaz pour vwar si i annakor avek prensip Labib? (b) Ki en Kretyen i bezwen pran an konsiderasyon konsernan bann koutim tel parey anvoy diri oubyen lezot keksoz?

¹⁶ Byento “lavwa nouvo ek nouvel marye, pa pou tann ankor zanmen kot [Gran Babilonn].” (Revelasyon 18:23) Akoz? Enn parmi bann rezon akoz, i son bann pratik demonyak ki kapab sali en maryaz depi sa zour menm ki en koup i marye.​—Mark 10:6-9.

¹⁷ Dan sak pei koutim i pa parey. Serten koutim ki kapab paret napa nanryen mal avek, i kapab sorti dan bann ­pratik ki zot ti fer Babilonn ki sipoze anmenn ‘lasans’ pour sa koup ki pe marye ek bann envite. (Izai 65:11) Enn sa bann tradisyon i kan zot anvoy diri anler oubyen lezot keksoz. Sa koutim i kapab annan pour fer avek sa nosyon ki manze i kalme bann move lespri e anpes zot fer dimal nouvo ek nouvel marye. Deplis, pour bokou letan diri i annan en lyen misterye avek reprodiksyon, lazwa e pour viv lontan. Sirman, tou bann ki anvi reste dan lanmour Bondye pou rezet sa bann kalite koutim ki relye avek siperstisyon.​—2 Korentyen 6:14-18.

18. Ki bann prensip dan Labib ki devret gid sa koup ki pe al marye ek sa bann ki’n ganny envite?

 ¹⁸ Pareyman, bann serviter Zeova i evit okenn pratik lemonn ki kapab degrad en maryaz oubyen en resepsyon maryaz ki fer ki i perdi son dinite oubyen ki kapab afekte konsyans serten dimoun. Par egzanp, zot evite fer bann pti diskour ki annan koze mirak ki kapab ofans lezot ek bann dyok sal. Zot pa fer bann fars oubyen remark ki kapab anbaras sa nouvo koup marye ek lezot. (Proverb 26:18, 19; Lik 6:31; 10:27) Zot osi evit bann gran resepsyon ekstravagan, ki mank moderasyon, ki reflekte “lorgey dan lavi toulezour.” (1 Zan 2:16) Si ou pe fer preparasyon pour ou maryaz, pa zanmen bliye ki Zeova i oule ki sa zour spesyal i en zour ki ler ou pou mazinen i pou anmenn lazwa pour ou, me non pa regre. *

19, 20. Ki en liv i dir lo lorizin tap ver ansanm e akoz vre Kretyen pa aksepte sa?

¹⁹ Dimoun i kontan tap zot ver ansanm dan bann maryaz ek lezot rankont. International Handbook on Alcohol and Culture ki ti sorti an 1995 i dir: “Tap ver ansanm . . . i probab ki i en koutim popiler dan lavi tou le zour ozordi ki’n sorti dan sa lafet kot zot ti ofer en labwason sakre pour bann bondye . . . pour zot fer en swe an retour oubyen en pti lapriyer kot zot dir, ‘viv lontan!’ oubyen ‘pour ou lasante!’”

²⁰ I vre ki bokou dimoun i kapab pa vwar ki ler ou tap ver ansanm sa i en keksoz relizye oubyen i annan pour fer avek siperstisyon. Me kantmenm sa, sa koutim kot ou lev bann  ver diven anler i kapab pe reprezant en demann ki ganny fer avek “lesyel,” avek en lafors ki pli siperyer ki imen pour ganny en benediksyon, me ki pa annakor avek sa ki Labib i dir.​—Zan 14:6; 16:23. *

21. Menm si zot napa nanryen pour fer avek larelizyon, ki bann lafet popiler ki bann Kretyen i evite e akoz?

²¹ Pour montre ki standar sa lemonn ozordi pe kontinyelman degrade, en tandans ki’n ganny promote direkteman ouswa endirekteman par Gran Babilonn, se ki serten pei i finans bann karnaval, Mardi Gra, bann festival kot zot dans dan en fason degradan e kot bann omoseksyel i selebre pour lafason ki zot viv. Eski i ti pou byen pour en dimoun “ki kontan Zeova” asiste oubyen get sa bann kalite festival? Si i ti fer sa, eski sa ti pou montre ki i vreman ay sa ki mal? (Psonm 1:1, 2; 97:10) Pa i bokou pli byen pour imit latitid sa psalmis ki ti priye: “Fer mon lizye pa vwar sa ki napa valer”!​—Psonm 119:37.

22. Kan ki en Kretyen i kapab deside dapre son konsyans si i pou enplike dan serten lafet oubyen non?

²² De lot kote, si en koutim oubyen lafet i napa okenn konneksyon avek fo larelizyon, napa nanryen pour fer avek politik oubyen patriyotik e i pa kont bann prensip Labib, alors sak Kretyen i kapab deside pour li menm si i pou partisip dan en tel levennman. An menm tan i pou pran an konsiderasyon santiman lezot, pour ki i pa fer lezot tonbe. Sa zour ki i pou annan sa lafet, en Kretyen pou fer sir ki lafason ki i konport li pa pou donn lezot lenpresyon ki i pe selebre sa lafet. Zapot Pol ti ekrir: “Ki ou manze, oubyen ki ou bwar, ou nenport kwa ki ou fer, fer tou pour laglwar Bondye.”​—1 Korentyen 10:31; vwar sa bwat “ Pran desizyon ki saz.”

23, 24. Ki mannyer nou kapab donn en bon temwannyaz konsernan bann standar drwat Zeova?

²³ Premyerman, pour bokou dimoun sa bann lafet popiler i en mwayen pour zot zwenn ansanm avek zot fanmir ek zanmi. Me si en dimoun i mazinen ki nou pwennvi lo Labib i strik oubyen tro egzazere, avek ladouser nou kapab eksplik li ki Temwen Zeova i kontan asosye ansanm avek zot fanmir ek zanmi dan en bon fason. (Proverb 11:25; Eklezyast 3:12, 13; 2 Korentyen 9:7) Me vi ki nou kontan Bondye ek son bann standar ki drwat, nou pa anvi sali sa bann bon moman avek bann koutim ki pou ofans Bondye. Alors, nou kontan ler nou asosye avek sa bann ki nou kontan dan lezot moman diran lannen.​—Vwar sa bwat “ Vre ladorasyon i anmenn pli gran lazwa.”

²⁴ Serten Temwen in vwar rezilta kan zot in partaz bann pwen dan Sapit 16 dan sa liv Ki Labib i dir. Pa bliye ki nou bi se pour tous leker me pa pour ganny largiman. Alors, montre respe, annan ladouser e les ou parol “touzour agreab e enteresan.”​—Kolosyen 4:6.

25, 26. Ki mannyer paran i kapab ed zot zanfan pour annan en lafwa pli for e annan plis lanmour pour Zeova?

²⁵ Konman bann serviter Zeova, nou ganny byen edike. Nou konnen akoz nou krwar dan serten keksoz e akoz i annan serten keksoz ki nou fer e serten ki nou pa fer. (Ebre 5:14) Alors paran, montre ou zanfan konman pour rezonn lo bann prensip Labib. Kan ou fer sa, ou pe batir zot lafwa, ou pe ed zot pour servi Labib pour reponn sa bann ki kestyonn zot krwayans e ou pe asir zot ki Zeova i kontan zot.​—Izai 48:17, 18; 1 Pyer 3:15.

²⁶ Tou sa bann ki ador Bondye “an-espri e an verite” pa zis rezet bann lafet ki pa baze lo Labib, me zot osi fer bokou zefor pour zot onnet dan tou laspe zot lavi. Ozordi bokou dimoun pa vwar li vo lapenn pour zot onnet. Me parey nou pou vwar dan lot sapit, tou sa ki Bondye i dir nou i toultan pli byen.